135 telloin Zorini Khiangte, Michael M Sailo kalsan tak track hmangin single thar

A thih hnuah a sulhnu hnutchhuah chu hai chhuah a ni chho zel dawn niin a lang. Zorinzuali Khiangte chuan single thar a buaipui mek a. He a hla thar tur hi Michael M Sailo nena an zai dunna a ni. Thla leh lamah chuan a single music video hi tihchhuah hman a ni tawh ang.

Zorinzuali Khiangte hian music video hi shooting a nei mek a. A hla thar tur hi Mizo rapper ni a, songwriter leh musician, producer ni bawk thi ta — Michael M Sailo nena an zai dunna a ni a. A hla hming chu Ka Ngaidam Che’ tih niin, Michael M Sailo dam laia an record dun kha a ni. Mahse, vanduaithlak takin Michael-a damlaiin music video hi an siam hman lo ta hlauh. A dam laia shooting nei tura an project neih dun kha a ni.

Michael M Sailo hian a damlaiin artist eng emaw zat a lo produce tawh thin. Chu’ng zingah chuan Zorinzuali Khiangte leh DJ Lalvenhimi te chu a langsar ber ber an ni ang. Anni pahnih tan hian track mai bakah hla siampui a nei hman nual a. A hla siam sa, tihchhuah mai theih tura an dah a awm nawk bawk. He’ng an hla tihchhuah loh zinga pakhat chu Zorinzuali Khiangte chuan Michael-a tel loin shooting a neih a tul ta a ni.

Zorini hla thar tur hi ngaihzawng inthen tawh hnua inkawp leh a, inngaihdam tawn lehna hla a ni a. Tunlai musician lar leh zaithiamte pawhin a hla phuah an sak sak nual tawh — Lal K Sailo phuah niin, music video hi RDS SHOTS – Mawitea Hauchhum chuan a buaipui mek a. Tunkar tawp lamah hi chuan an zawh fel theih a rinawm.

Hetih lai hian, Michael-a’n a damlaia recording a lo neih tawh, DJ Lalvenhimi nena tihchhuah an tum, shooting an neih dun hman tak loh track pakhat chu shooting an nei zo thawkhat tawh a. DJ-i nena an zai dunna hla pawh hi thla tharah hi chuan a rawn tihchhuah hman mai hmel a.

Michael-a’n a kal hmain DJ-i leh Zorinzuali Khiangte te hian hla a siam dunpui ve ve tawh a. Zorini nena an siam dun chu — A Rem Tawh Lo — tih a ni a. He hla bakah hian Michael-a studio — Spaceville Pro Sessions — hnuaiah ‘Ka Phallo’ tih hla an record dun hman bawk a. DJ-i leh Michael-a hian hla hit tak mai — Liam Mai Rawh — tih hla an siam dun bakah — Ka Tling Lo — tih hla an siam dun hman bawk.

He’ng hla — A Rem Tawh Lo — tih leh — Ka Tling Lo — tih hla te hi Michael-a’n a stage name — 135 — hnuaia a siampui ve ve an ni a. ‘135’ tih awmzia hi a damlai khan a sawi chhuak duh ngai lem lo. Mahse, Thalaite Khawvel hnenah — 135 — tih awmzia chu, a stage name ‘ACE’ tih thumal hi ‘ABC’ alphabet-a an awmna number zat chiah a nih thu a lo hrilh hman thung.

Michael M Sailo hi kum 37-a upa niin, April ni 7, 2017 khan accident avangin a thi a ni.

Facebooktwittergoogle_plusredditpinterestlinkedinmail

Comments

Leave a Reply

Login

Lost your password?