Monthly Archives: March 2014

Jeremy Zobiakvela (JB-a) Tribute Concert; ‘Salvation to Everyone’

A dam lai khan hla nalh leh tha tak tak a lo phuah chhuak tawh a, Mizorama khawthlang lam hla vawrh chhuak tute zing a mi a ni. A dam lai ngaihtuahin hla a phuah hnem hman hle a, mahse, album pakhat chauh a siam hman. He a album hmasa ber leh a awm chhun ni ta chu lei theihin a awm leh dawn.

jb

Thangthar zawkte chuan tunge a nih khan hre lo mai thei a, album pakhat chauh min hnutchhiah hman avangin hriat loh pawh a awm ve tho e. Amaherawh chu, a hunlai na na na kha chuan tunge a nih inzawh nawn fo a ngai lem lo ang. Chu pa hming chu — Jeremy Zobiakvela a ni.

JB-a tia hriat lar, Jeremy Zobiakvela hian a hun hnuhnung lam, kum 1991 ah thlarau lama piantharna changin, gospel singer-ah a inlet a, chumi hnu kum 1992-ah a album hmasa ber leh hnuhnung ber ‘Salvation to Everyone’ a tlangzarh a, mahse, August ni 16, 1999 khan a boralsan a. He a album hi ama puala zan bik buatsaih, JB-a Tribute Concert-ah lei theihin chhawpchhuah a ni leh dawn.

April ni 12, 2014 zanah, JB-a hriatrengna concert chu Vanapa Hall-ah neih tum a ni a. Inpuahchahna a kal muah muah reng a, heta tan hian Organising Committee phuisui tak siamin — Chairman-ah Er. L.Pachuau; Vice Chairman-ah Er. Zothanpuia awmin, manager atan Makuka a awm bawk a. Secretary-ah OP-a (Tribal Power) awm lehin, Asst. Secretary atan Chhuantea (Forever Young) a awm bawk a, Treasurer-ah Nguri (w/o Pu JB-a) te an awm bawk.

jjj
JB-a Tribute Concert-ah hian hranghlui chan chang tawh musician tha tak tak, thangtharte’n an rimawi tum LIVE ngeia kan la hmuh phak loh te chuan stage-ah an chetla dawn a, musician-ah house band Makuka band te bakah Forever Young-in JB-a hla tam thei ang ber an ‘play’ ang.

Rohmingthanga (Raw-a), P. B. Lianzama, Lalduhawma Hnamte, James B. Ralte bakah stage-a a lo chettlat pui thin hmelte hmuh tur a awm dawn dawn bakah, tunlai zaithiam lar tak tak te’n hun an hmang bawk ang. He hunah hian ama hla leh hla lar dangte pawh ngaihthlak tur a awm dawn a ni.

Facebooktwittergoogle_plusredditpinterestlinkedinmail

Venghlui khawtlangin kangmei tuarte chenna tur In an sa

Aizawl; Pathianni kalta (March 23,2014) a bungrua engmah chuh hman loha kangral Rothuami In sak hnatlang chu Venghlui khawtlang chuan thawkin an in thar hi nimin khan Pathian hnenah hlan a ni. Thawhtanni atanga Zirtawpni thleng khan Local Council bultumin In sak hnatlang hi neih a ni a, an chenna tur hi ft.24X18 a zau, a chung rangva leh a bang tile hmanga sak a ni. In sak nan hian vengchhungah vehbur khawn a niin vengpawn atang pawhin tanpuina engemaw zat hmuh a ni bawk a, a vaiin tanpuina hi nuai 2 chuang deuh hmuh a ni. In sak hi zo tawh mahse Venghlui Local Council, YMA, MHIP leh MUP te chuan vawiin hian joint meeting an nei leh dawn a, kangmei tuarte hian mutbu, bungbel, khum etc. engmah an neih loh avangin chhawmdawl dan tur an sawiho leh dawn nia thudawn a ni.

Venghlui In thar

Facebooktwittergoogle_plusredditpinterestlinkedinmail

April 2014 atangin Electric bill sang dawn

Aizawl; Mizoram a Electric bill chu April 2014 hman man atang-in tihsan a ni dawn a, pawl thenkhat ten dodal mah se, kaltlang pui a ni dawn nia thudawn a ni.

ele

Joint Electricity Regulatory Commission a Assitant Secretary Richard Zothankima chuan, electric man sang chu anmahni tih ni mai lovin Power & Electricity Deptt.-in rawtna an siam hmanga pawl hrang hrang leh mithiamte telna State Advisory Committee in uluk taka an bi-thliah anih avangin sut leh a ni dawnlo tih a sawi a. Power & Electricity Deptt. rawtna chu an pawm mailo tih sawiin, “Mipuite hi kan ngai pawimawh ber a, mipuite tana phurrit lutuk lo tur leh Department tan pawha hekna lutuk lo kan ngaihtuah thin a ni,” a ti.

Pawl thenkhat ten Electric man sang chu sawisel mahse sut theih a ni tawhlo tih sawiin JERC Assistant Secretary chuan, “kum tinin thilman a san zel avangin tihsan hi a ngai hrim hrim a. Chubakah sawiselna hun kan hawn laiin he thil hi sawisel a ni lo a ni,” a ti bawk.

Central YMA General Secretary Vanlalruata chuan Electric hman man tihsan chu a chhan a that chuan an do bur lo tih a sawi a. Power & Electricity Deptt. in rawtna an siamah thil diklo leh fel tawklo a awm nia an hriat vangin enthat phawt hnuah chauh hman nise an duh tih ZALEN a hrilh a. P&E in an chhut naah hnathawktu zat leh an hlawh tur zat te, Power an leina leh hralhna zat tur te, an hloh zat turte a chianglo a, hei hi tihchian anih hnuah chauh tihsan nise an duh tih a sawi a. “Tuna kan duhlohna hi sawrkar tan thahnem kan ngaihna vang zawk a ni,” a ti bawk.

Central YMA General Secretary chuan a tul chuan Appellate Authority thlenga kalpui an tum tih a sawi. Mizoram Consumer Union (MCU) chuan Power & Electricity Deptt. chu Corporation a dah phawt hnuah chauh electric hman man chu tihsan nise an duh tih an sawi a. Indian Electricity Act 2003 pawhin state tin chu Electric deptt. te Corporation a dah turin a ti a. He rawtna hi Mizoram ah pawh hman ni ve se tun ai hian deptt. tana sawrkar sum sen hi a tlem zawk dawn bakah electric hman man pawh a hniam zawk a beiseiawm tih an sawi a. Deptt. anga buaipui anih chhung chuan sum hloh hi a tam deuh deuh dawn a ni, tiin Mizoram chu electric hman man ah leh transmission loss ah a sang ber nia an hriat thu an sawi bawk.

Facebooktwittergoogle_plusredditpinterestlinkedinmail

Aizawl-ah Meth hmang thin 30 vel awm tawh

Aizawl; Tunlaia ruih nana hman damdawi hlauhawm leh lar chho mek, ‘Meth’ hmang thin mi 25 atanga 35 inkar vel an awm mek niin hriat a ni. Hetih lai hian, thla 2 vel kalta chhung hian Mizoram ah damdawi hlauhawm ‘Meth’ mum 2000 chuang man a ni tawh bawk.

met
Amphetamine Type Stimulants (ATS), Meth an tih mai hi chemical hrang hrang chawhpawlh atanga siam ‘ruihhlo’ a ni a, kumin (2014) chhungin hlawm lian tak takin tum 3 man a ni tawh. Special Narcotics, Aizawl P/S ten an man vawi khatna ah mum 1068, a thawh hnihnaah mum 226 leh a tum 3-naah mum 1205 an man a, Meth an man rual hian Pseudoephedrine mum engemawzat man telin, mum 226 an man tum hian Pseudoephedrine mum nuai 3 chuang zet an man tel a ni.

Meth hi danin a phal loh hmun atanga siam chhuah an nih avangin, eng ‘chemical’ hrang hrang nge an pawlh hriatchian a ni lo a, an hlauhawm hle tih he damdawi zirchiangtute chuan an sawi a, “A ngawl vei a awlsam hle bawk,” an ti.

Meth hian inpawlna (sex) hman chakna a tisang ve thei a, mahse, inpawlna (sex) hlimawm tak a thlen thei lo a, a nawmna a tinep zawk thin. Ruih nasat deuh phei chuan mipa serh a khawng tha theilo thin a. He ruihhlo ti thinte chuan inpawlna an hmanin a vawrtawp thlen an harsat thin tih damdawi hnathawh dan zirchiangtute chuan an sawi bawk.

Methamphetamines user : Thlalaka vei lam hi kum 2006-a lak a ni a, a ding lam ami hi kum 2008-a lak a ni thung. Mihring hmelhmang a ti danglam hneh hle!

Aizawlah chuan Meth hi mum khat Rs.150/- atanga Rs.200/- inkar vel man a ni a, Mizorama hluar ber chu a rawng sen, a pang lehlama ’88’ inziak, a lehlama ‘1’ inziak a ni a, a changin ‘wy’ tih inziak a awm bawk.

Meth hian mi a tiphurin a tithatho thei a, mahni inrintawkna, hlimna leh lawmna (diklo) a thlen a, a damdawi hnathawh a reh hnu ah hrehawmna nasa thak a thlen zui thin tih a zirchiangtute chuan an sawi.

Meth hi zan lam intihthlimna leh lamna hmuna kal thin ten an hmang nasa hlea sawi a ni a, United Nations Office on Drugs and Crime-in a chhut dan chuan, khawvel puma ruihhlo hman nasat ber chu ‘Cannabis’ a ni a, a dawttu chu ATS (Meth) hi a ni.

Facebooktwittergoogle_plusredditpinterestlinkedinmail

Dam lo enkawlna nuai 1300 pechhuak tawh

Aizawl; Mizoram State Health Care Society chuan nikum 2013 leh kumin January thla thleng khan damlo te enkawl nan cheng nuai 1300 pawisa an sem chhuak tawh.

He scheme hnuaiah hian Rashtriya Swas-thya Bima Yojana RSBY Scheme hnuaiah MGNREGA Job card Holder leh Street Vendor te tan Smart Card siam a ni a, he scheme hi April ni 1 atanga hman tan leh a nih vangin tunah hian inziahluhna hun hawn a ni a. Hemi chungchang-ah hian he scheme hnuaia inziak lut thei te chu chhungkua kim taka thla la turin Mizoram State Health Care Society-a OSD, Dr C.Lalthanpara chuan mipui an ngen tih a sawi.

RSBY BPL Scheme bikah hian cheng sing 3 thleng damlo enkawl nan a bill theih a, inziahluh hun April thla thleng hawn a ni a. Mizoram Health Care Scheme hnuaiah vek hian sawrkar hna-thawk lo, BPL chhungkua ni lo leh sorkar hnathawk Medical MR Bill theilo te tan ruahmanna dang siam niin, cheng nuaikhat thleng Bill duh te tan Rs.500/- in inziahluh theih a, cheng nuai 2 chin Bill duh te tan Rs.750/- cheng nuai 3 thleng bill duh te tan Rs.1,000/- seng a inziahluh theih a ni bawk.

Health Care Scheme hmanga damlote inenkawlna a tan hian Sorkar damdawi in ah tawh phawt chuan tih theih ani a,Private Damdawi in ah chuan Aizawl Hospital leh Care damdawi in pahnihah tihloh chuan a MR bill hi a tih theih vek a ni.

Facebooktwittergoogle_plusredditpinterestlinkedinmail

Hawla leh Patea lakah UDF-in complaint an thehlut

Aizawl; United Democratic Front chuan Chief Minister Lal Thanhawla leh MoS Lal Thanzara te thusawi chuan Election Model Code of Conduct a kalh nia hriain Chief Election Commission hnenah Chief Electoral Officer kal-tlangin complaint an thehlut tih an sawi.

Nimina thuchhuah an siamah UDF Publicity Deptt. chuan Congress Party Campaigner ten NDA chu a sorkar chuan Kristian-te sawisak leh tih-duhdahna thlentu tur anga hmuntina thupui bera a sawi thin chu UDF chuan mak a ti hle tih an sawi a. Sakhaw thila inpuh chhiatna leh inbeihna hi Election Model Code of Conduct kalh a ni a. Congress hruaitu te hi Mizoram mipuiin an nin tawh zia an hriat avang-in, mipui rilru hruai kawi nan Mizoram pawn lam thil hlir an sawi a. Hetianga an sawi dawn a nih chuan Mizote thinlung hruaisualtu Chief Minister leh Congress Party hi Jeroboama, Israel-te lal nen khan a inang hleah UDF chuan a puh ve mai dawn a ni, an ti.

MHIP-in Hrangturzo bial hmeichhe Candiate vote tura lehkha an sem chungchang pawh legal case-ah nge, engtia kalpui tur nge tih UDF chuan a ngaihtuah mek niin an sawi bawk. UDF hruaitute chu Mizoram hmun hrang hrangah an zinchhuak tih sawiin an zin chhuah naah thawhhona a thain UDF Candidate ten hnehna an chan ngei a beiseiawm hle a. MP atan Upa tawh lutuk leh hnathawh nei mumal lo aiin thangthar viak tha zawk Robert Romawia Royte vote an tum hle niin an sawi bawk.

Facebooktwittergoogle_plusredditpinterestlinkedinmail

ACB-ah FIR thehluh tum

Aizawl; Mizoram sorkar Social Welfare Deptt. leh Zoram Entu Pawl (ZEP) ten inremna (agreement) siama Vocational Training Centre a kalpui danah thil diklo leh felhlel eng-emawzat awm ngeia an hriat avangin Mizo Zirlai Pawl (MZP) Gen.Hqrs. chuan naktuk hian Anti-Corruption Bureau (ACB)-ah First Information Report (FIR) an thehlut dawn.

MZP hian ZEP ten Vocational Training Centre siama zirlaite a enkawl dan hrang hrangte RTI Act hmanga information an dil chhuah hrang hrang atanga chhui chiangin, documents an lakkhawm hnu-ah thil dik lo a awm ngei niin an hria tih MZP President, Lalhmachhuana chuan a sawi.

Rinhlelhawm tak tak an hmuh zingah, fund awm hauh lo atanga fashion show buatsaih te, zirlaite stipend pekchhuah danah, puanthui (tailoring) trade hnuaia zirlaite tan brown paper supply anga ziah a nih laiin, a tak takah chuan chanchinbu hlui/chhia vel mai mai hman nia an hriat thu te, zirlai thenkhat, 85% class kal lote stipend ‘cut’ thensak an nih dan te chu dana awm lo niin an sawi bawk. Zirlai zingah hian zir ziktluak lo te pawh an awm nual bakah, hming ziah danah rinhlelhawm, hming phel chauha ziahte an awm niin thu dawn a ni.

Zoram Entu Pawl hi Roman Catholic hnuaia awm a ni a, Social Welfare Deptt. nen inremna siama thawk dunin, Vocational Training Centre pakhatah hian zirlai 15 zel an awm thei a, tunah hian heng VTC-a zirlaite hian exam an hmachhawn dawn mek tih thudawnna chuan a sawi bawk.

Facebooktwittergoogle_plusredditpinterestlinkedinmail

Tui tla ruang hmu

Aizawl; Zirtawpni kalta chawhnu dar 2 vela Chhimtuipui lui a chesual Buansanga (34) ruang chu nimin zing dar 5:55 khan hmuh a ni a, a ruang hi nimin khan an khua Cheural ah vui tura lak a ni.

Lawngtlai a Fire and Emergency Service Department a Driver hnathawk mek Buan-sanga hi Zirtawpni khan department tui chawiin Lawngtlai leh Saiha inkalpawhna hnai zawk tuipui Ferry ah hian an kal a, an motor a tui an thal zo chu inchiahdai turin lui ah hian a cheng a,vaiduaithlak takin a chesual zui ta a ni.

He chetsualna hi hriat anih veleh Lawngtlai DC J. Hmingthanmawia chuan hmanrua engemaw zat nen Vanlalchhuanawma, MCS, SDC Lawngtlai, Disaster Management changtu chu a hmunah tir nghal a ni.

Facebooktwittergoogle_plusredditpinterestlinkedinmail

Mizoramah PRRS a tlahniam

Aizawl; Vawk natna chikhat Porcine Respiratory and Reproductive Syndrome (PRRS) chu Mizoram ah a vei an tlem sawt hle a, AH&Vety department chuan he natna hi nikum lam khan Vawk zinga 30% in an vei niin an chhut a, kumin ah erawh chuan a vei hi 5% chauh an ni tawh niin an sawi.

ZALEN palaiin a biak naah AH&Vety Doctor te chuan Mizoram district tinah special task force dinin Vawk in he natna an kai leh kai loh finfiah vek an tum tih an sawi a. Vawk serum sample lain chungte chu department laboratory ah Anigen PRRS Alisa Kit test an nei dawn tih an sawi bawk.

AH&Vety department thawktute chuan PRRS loluhna ber chu thenawm ram Myanmar a ni tih sawiin DC zawng zawngte chu vawk lakluh khapna order tichhuak vek turin kan ngen a, mahse hetih lai hian mi thenkhat, Ministry a tlatlum leh thilti thei deuh, Myanmar lam atanga vawk lalut thin an awm nia an hriat thu an sawi a. Heng mite hian lalut lo se he natna hi control theih mai an beisei tih sawiin mahse lakluh reng anih chuan he natna hi a darh zel dawn a. Mihring tan chuan hlauhawm lo mahse vawk an thih zel avangin hloh (economic loss) hi a nasa lutuk dawn a ni, an ti bawk.

Hetih lai hian nikum lama PRRS natna vei, no tam tak tithi vawkpui thenkhat chuan kumin ah chuan tha takin no a nei leh niin an sawi. Vawkin PRRS natna hi a kai chuan an thaw a hah a, inthlahchhawnna kawngah harsatna awmin an thi mai thin a, a bikin vawk note in an tuar bik a ni

Facebooktwittergoogle_plusredditpinterestlinkedinmail

Observer-in Official leh NGO te a kawm

Aizawl; Nimin khan Dr. Rakesh Gupta, IAS, General Observer (Aizawl, Kolasib leh Mamit) chuan Mamit DC office ah Mamit District a Election buaipuitute a kawm.

He inkawmhona R.S. Lalzamliana, District Election Officer (DEO), Mamit kaihhruaiah Dr. Rakesh Gupta chuan MP thlanna tura District inbuatsaihna Flying Squad, Police, Video Surveillance Team, Video Viewing team, Model Code of Conduct (MCC) leh MCMC te hmalakna chu tha thawkhat a a hriat thu a sawi a. Kawng engkimah Election Commission of India in kaihhruaina a siam ang te zawm theuh turin a chah bawk.

General Observer chuan Model Code of Conduct hman chhunga Candidate te leh leh an campaigners ten dan an zawm leh zawm loh uluk taka vil turin Officials te a chah a ni. He meetingah hian team hrang hrang Nodal officers te leh Sectoral Magistrate te an tel tha hle a ni.

Nimin vek khan General Observer hian Mamit khawpuia Political Party hruaitute, tlawmngai pawl hruaitute leh thuthar thehdarhtute DC’s Office Chamber-ah a kawm zui nghal a. Pawl hrang hrang hruaitute chu inthlanna fel fai leh muanawm a awm theih nana hmalak puiah a sawm a. Harsatna emaw thil hriat duh an neih chuan Telephone No. 08974931684 ah emaw State Guest House, Aizawl-ah nitin zing dar 9-10 inkarah biak theih reng anih thu a hrilh bawk.
Political Party hruaitute pawhin Model Code of Conduct bawhchhe lova hmalak an tum thu General Observer hi an hrilh bawk a ni.He inkawmhona ah hian Political Party hruaitute, Tlawmngai Pawl hruaitute leh thuthar thehdarhtute an tel a ni.

Facebooktwittergoogle_plusredditpinterestlinkedinmail

Login

Lost your password?