Monthly Archives: March 2014

CL Ruala Campaign

16th Lok Sabha MP General Election campaign a Mizoram dung leh vang fanga zinkual mek INC atanga Lok Sabha MP candidate CL Ruala chuan nimin khan Saiha, Lawngtlai, Lunglei, Serchhip leh Champhai a MLA bial zawng zawng a tlawh chhuah hnuin Aizawl a thleng.

CL Ruala hi Champhai atanga Aizawl a panna kawngah hian Minister pahnih John Rotluangliana leh Lalrinmawia Ralte ten an tawiawm a ni.

Facebooktwittergoogle_plusredditpinterestlinkedinmail

Strong room endik

Aizawl; Nimin khan Dr. Rakesh Gupta, IAS, General Observer (Aizawl, Kolasib leh Mamit) chuan Mamit DC Office a EVM leh VVPAT dah thatna Strong Room a endik a, he mi zawh hian VVPAT endik hna DC Conference Hall, Mamit a neih mek pawh a hmunah kalin a endik bawk a ni.

Facebooktwittergoogle_plusredditpinterestlinkedinmail

Prism kal zel

Prism chuan an kal zel dan tur ngaihtuahin March ni 31, 2014 chawhnu dar 2 hian FW Savidge Hall, Baptist House, Upper Khatla-ah meeting an nei dawn a, hmalak an tum dante an puangzar ang.

Facebooktwittergoogle_plusredditpinterestlinkedinmail

Chawlh puang

Kumin YMA Day, June ni 15, 2014 chu Pathianni a nih avangin, Mizoram Governor chuan mipuiten YMA an lawm theih nan June ni 16, 2014 chu sorkar chawlhah a puang.

Facebooktwittergoogle_plusredditpinterestlinkedinmail

Security Meeting

March ni 31, 2014 chawhma dar 11 hian Lok Sabha MP inthlan lo awm tur atana inbuatsaih nan Security Coordination Committee chu C Zorammuana DIG (Northern Range) Office-ah neih a ni dawn a, Security Agency hrang hrang – Assam Rifles, BSF, CRPF, SIB leh Mizoram Police aiawh te an tel ang.
MAA hruaitu Mizoram Athletics Association chuan kum 2014-2016 chhunga an pawl hruaitu atan President-ah Lalbuanga Sailo, Sr. Vice President-ah David Lalthanngura Sailo, Vice President-ah Vanlalsawma, General Secretary-ah Lalramzauva, Joint Secretary (Organisation)-ah A Lalngilneia, Joint Secretary (Technical)-ah C Lalroliana, Treasurer-ah Lalremliani leh Financial Secretary-ah C Lalremruata te an thlang.

Facebooktwittergoogle_plusredditpinterestlinkedinmail

Hnamdang dapchhuah hnatlang engtin?

Tunhnai chho khan YMA Sub-Hqrs., Serchhip chuan khawmpui neiin an thurel zingah hnamdang dan lova awmte dapchhuah nise tih an rel a. Nimin piah lawkah Zampuimanga Group YMA khawmpui pawhin hnamdang dapchhuah beihpui thlak nise tih an pass bawk. YMA Sub-Hqrs. dangte leh Group YMA te pawhin hetiang zawng hian hma an la chho dawn niin a lang. Heng hi YMA kumpuan ‘Ram leh hnam humhalh’ langsar tak a ni chho dawnin a lang.

MA chauh ni lovin, zirlai pawl MZP leh MSU bakah pawl eng eng emaw, dan lova Mizorama hnamdang lut tam lutuk tia veitute pawhin a khat tawkin heng dan bawhchhiaa Mizorama awm te dapchhuah hna hi an thawk fo tawh a, an la thawk zel ang tih a rin theih bawk.

Hetianga dan lo/dan bawhchhiaa hnamdang, Mizoram-a lo lut an tam thu hi tlawmngai pawlte hian an auchhuahpui mai ni lovin, dan lova sumdawnna thlenga thuk taka an inrawlh thin avangin an ngaimawh a, ram leh hnam tana tha zawk tur nia ngaiin a dapchhuah hna an thawk thin hi thil lawmawm tak a ni.

Hetih laia mi thenkhatin, dan lova Mizorama sumdawng leh awmte dapchhuah hna kalpuina kawngah fimkhur a tulzia an tlangaupui ve reng bawk a, an tihtur pawh a ni bawkin a lang. Amaherawhchu, ram leh hnam hmakhua thlir chunga hma la thinte finchhuah zawng ni lo, a sawisel leh a ep zawnga chetna awm thin erawh hi chu thil tha ber a ni lovang.

Hetih rual hian, dan bawhchhiate manchhuah leh zawnchhuah chungchangah, dan bawhchhe ve kher lova hmalak dan a awmin a rinawm a, chutiang zawng chuan tlawmngai pawlte pawhin fing tak leh fimkhur taka hma an lak a tulin a rinawm. Dan bawhchhia an nih avanga dan bawhchhe bawka hnawhchhuah tum emaw chu thil dik a ni lova, chuvangin, hma la tur pawhin kalphung fel tak duan a tul.

‘Dan bawhchhia an ni e’ tih vanga nawr bawrh bawrh mai chu a leh a linga mualpho letna a ni thin a, chu chu Mizorama NGO thahnemngai tak takte hmai tibaltu a ni fo. Dan bawhchhetuten an khinlet theihna remchang siamsak lo zawnga ruahmanna fel tak siama ram leh hnam humhalh dan dik ngaihtuah chhuah a tul khawp mai.

Dan bawhchhiaa Mizorama lo lut, ILP chungchanga nise an permit hmuhna ang ni lova thilti engemawzat an awm tih hi a chiang a. Hei hi sorkar chak lohna lantirtu ni bawk mahse, sorkar tan engkim ven sen rual a ni lova, chuvangin, NGO te nen tang tlangin, dik tak leh huaisen taka ram leh hnam rilru pu chunga tanho dan hi sorkar lam pawhin a ngaihtuah a tul ta niin a lang.

Ram leh hnam hi eng vanga humhalh ngai nge, tunge humhalh ang, eng tianga humhalh tur nge tihte thleng hian pawl chhungah chauh ngaihtuah lovin, chhungkua atanga inzirtir a tha in a rinawm. Ram leh hnam tana him lo zawnga hnamdang sumdawng thurualpui hi Mizorama dan lova hnamdang sumdawngte inkhuar nghehna lian tak a nih a rinawm! Awlsam zawk leh hlawk zawka sum an hmuh theihna tur ngaihtuaha dik lo taka lo hnamdang thurualpui thinte hian anmahni zahawmna mai ni lovin, ram leh hnam zahawmna an hralh tih inhria se a tha hle ang.

Ram leh hnam humhalh kan tum rual hian, Mizote hi Mizo hlang chauhva khawsa thei an ni bik lo tih an inhriat a tul a. Mihringte chu inmamawh tawn vek kan nih avangin, thliarkar rilru pua inhung bing reng thei kan ni dawn lo tih pawh hriat tel a pawimawh a, hnam dangte chimrala kan lawm lohna tur chuan nasa taka kan inzirtir a ngai tel bawk tih hi hrereng ang u.

Facebooktwittergoogle_plusredditpinterestlinkedinmail

“A HO TLAT”

Nula pakhat, mahni anpui ngaizawng thin hian a nun thlak a duh a. Ama anpui ngaihzawn a duh tawh lo. A chhan ka zawh chuan, “A ho tlat!” tiin min chhang nia!

Mahni nihna mil loa nun hi a tawpah a ho tlat duh fo reng a ni. Nunna hlu tak ho taka khawhralna a ni duh khawp mai.

Mahni inhriat chian a, mahni nihna pawm a, chumi azira nun hman a, hmasawn tumna nei chunga mahni inzahpui loh hi hlimna bul pawimawh tak a ni. Mi fing chuan tunge a nih a inhre chiang a, a thiam zawng leh thiam loh zawngte a hria a, a chakna leh chak lohna a hrechiang a, chumi mil chuan a tihtur a thlang a, a nun kaihruaituah a hmang thin. A thiam zawng a hmang tangkai a, a thiam loh zir belh a tum a, hma a sawn a, a hlim mai thin.

Rilru lam enkawlna kawnga tehfung pawimawh tak kan hman fo chu, ‘insight a nei em? amah a inhre chiang em?’ tih hi a ni. Mi thenkhat chuan an mahni nihna miah lo ni tlatin an inhria a, an nihna ni miah lo chu nunpui an tum a, thil dik miah lote chu dik tlat emaw tiin an buai a. Ngaihdan dik lo leh hriat dan dik loh an neihte chu an tan chuan ‘a dik’ tlat avangin an nun a buai a, enkawl an ngai fo. Mi thenkhat chuan an nihna leh nih lohna chu an hrethiam tho a, mahse an nihna angin an nung lo a, an nun a buai tho bawk. An nihna an zahpui avang te, mi dang bum duh avangtein an nihna an thup a, an nihna lo anga lan an tum fo.

Khawvelah hian keimahni ang chiah hi pakhatmah an awm lo a. Pathianin a bika a siam theuh kan ni. ‘Special’ tak vek kan ni maw le! Chutih lai chuan mahni inhmuhniam, mi dang pha lo leh tluk lo, nep bika inngai kan awm fo. Mahni inhmuhniam a, mahni inhmusitte nun hi a hlim thei lo. Mi tin hian thiam zawng leh thatna kan lo nei theuh. Mi dang nen hian kan intehkhin mawl satliah a, kan buk lung khai a dik lo a, tehfung dik loin kan inteh a, kan nun a buai a, kan hlim loh phah fo. Mi dang nen inkhaikhin mawl satliah ngawt lovin kan tih theih tawk theuhah theihtawp chhuah thin ila. Mahni hlutna hre chungin, mi dang dah hniam hauh si lo leh hmusit hauh lovin hmasawn tum mai ila, kan hlim ang a, kan nun kawng a buai dawn lo alawm!

Kan ramah hian mahni nihna hre chiang loa nung ve mai mai, thli chhem zawnga awn dual dual, ze nghet leh kalphung nghet vawn tlat nei lo kan tam viau ang em? Mahni nihna hre reng chunga chutianga nung duh si lo, kan tih ve atana mawi lo pawh ti ve duh zel, kan rilru chhungrilin tih a duh loh pawh ‘mihring chak lohna’ chhuanlama hmanga ti ve mai duh zel kan tam viau ang em?

Mahni nihna haia an nihna lo pui anga nungte hi han hlim ve viauin lang thin mahse a tawpah an nun a buai tho thin. An ho tlat zel!

— Dr. Hrekima

Facebooktwittergoogle_plusredditpinterestlinkedinmail

Ka Huang (March 30, 2014)

Mahni huangah na na na chuan huangtau deuh mah ila, chhiartute’n ‘a huang a ni tlat a’ in lo tih beisei chungin ka’n chhuah leh a nih hi. Kan sawrkharin Zu dan a zam a, BUR lai vel kha tih BUR loh deuh an tum dawn deuh avang hi ni maw, a ka kaw nazawng, keini ang duang thleng hian mawngvawm ba ang maia phet sek a tul a ni ang e. Ka sawi ve duh lai hi chu kohhran nena inzawm/zawm loh lai bawr vel hi a ni mah mah.

Kan hriat theuh angin Mizoramah hi chuan Roman Catholic chauh lo chuan ZU hi kan duh lo bur mai niin a lang a. Roman Catholic unaute hi chuan an la dal deuh ni maw ka ti mai. Kohhran dang hi chuan an la tur ngun mai ni maw ka ti. Chuvang chuan tuna KHAP BUR dan siam that an tum deuh tih thawm a’n awm phawt hian a phusa saah an tang mai a nih hi. Chuti khawpa KHAP BUR policy duh tlat e ti lo chuan Aizawl (ti bik ila) a zu tamzia hi chu Upa e, Pastor e kan hre theuh mai lawi si chu a ni a, kan thlang lawk, Sairang kawng khawi maw laiahg te khuan a zema bilh an tih mai thin pawh kha ni tawh loin A FACTORY te an la ti leh ta zel a.

Zu in lah chu kan tlem chuang pawhin a lang lo, chuti e ti lo chuan kohhran chuan a mite zu in emaw, zu zuar emaw lah chu a thunun duh malek a, sawrkhar hian khap bur se keini kan awl hlauh ang ti ang hrimin sawrkharin a thlahdul deuh ang tih hi an hlau em em ni maiin a lang. Sawrkharin hetia a khapbur denchhen hian kan member-te zu in/zu zuar chungah hian dan i lo lekkawh ve ang u tih taka ruangin an kel e awl titih tlat mai hi ngaituah puat chuan a mak tih loh rual a ni lo. Amaherawhchu, han ngaihtuah ngun deuh chuan Khristian theuh theuh kan in-kohhran tawn dan hi tu kohhran emaw hi chu darh vek se, keinin lo lawm lut hmiah hmiah ila tih mena meng kohhran hi kan ni deuh vek mai hian a lang. Chuvangin kohhran chhunga tal vak lem lo, zu in satliah, zan hnih khat lek inru tih ang mai mai hi chu denomination dangin an lo lakluha kan kohhran member tlem ai chuan tiin inpalzam mai mai nite pawh hian a lang.

Kohhran leh kohhran, Lal Isua ring theuh theuh, denomination hrang kan nih vang maia hrang ta luaa inngaih (ruk)-na kan nei hi a pawi takzetin ka hre ve thin. Kohhran pakhatin a thunun lai, lak luh tuma lo phe lo phe kohhran hi chu an thlen san tehchiam bik ka ring thin lo. Hman deuh pawh khan kan kohhran upa pakhat chuan hum sual a dai hlauh avangin kohhranin a chungah dan a chelek a, mak tak maiin kar loah denomination dangah zuk awm theuh maia maw le! Mi duh loh chang an awm kan inhlauh hlawm avang hian kan kohhran thuneitu theuhte hian an tih tur mang mang pawh ti ngam loa an awm avang hian em ni kohhranah hian zu in leh zuar thunun/zilh/phuar te an awm ngai tak loh?

Kei mi mawlin ka’n ngaih ve dan ngawtah chuan kohhran theuh mai hian an tualchhung dan kha chu vawng nung theuh mai se, an member zinga zilh/thunun/phuar tur an awm a nih phawt chuan chu kohhran dan bawhchhia a nih miau avangin dan chu lehkawh mai se. Kohhran denomination hrang pawhin chutiang denomination hrangin dan an lekkawh chungah chuan engti mahin lo uksak lo se, rawn hnar ngial thin ta pawh ni se, a dan lehkawhtu kohhranin a hlih hnu chauhah uksak se. A nih loh pawhin tu kohhran mah hian member tam hi awt lo se, an member chunga dan an lekkawhte chu an thak thaka thaktir tawp mai sela, a thlarau mah zawk lo’ng maw?

Zu lam ve tawh aw le. Kei chu a tira ka sawi ang khan zu hi thil a ni ve mai bawk a ni. A hmangtu hman dana thuin sual chu a bet ve lek zawk a ni. Sawi leh sawi hnu kan Pathian hi chuan a titu hi a ni a mawh ni. He khawvelah hian sual leh tha hi a dah chawm nuai mai a, chuta a duh anga awm chu sawm tam tak zinga TLEMTE a tih zinga mi kha an ni mai a, a duh anga awm lote chu kawngka zau lama liam tate an ni maiah ka ngai mawl tawp mai.

Zu, Meizial, Sahdah tih ang reng vel hi chu kohhran pawh hian a duh loh dan a inang lo zut mai a nih hi. Phai lamah chuan zu kan ti hi chuti tehchiamin an la thupui loin a lang. Assembly of God Pastor Bantaine-s kha chuan meizial a ni a ngaimawh em em ni. Trivandrum (Tiruvananthapuram)-ah te pawh khuan zu aiin meizial an ngaimawh zawk. Megnanapuram (Tamil Nadu)-ah te chuan Biak Ina pheikhawk an bun lut thak lem lo, TENAWM a ni awm e. Mahse, keini chuan nghawngawrh nen induang zuahin ke-lawngin inkhawm ta ila – mi ang lo hmuhin kan inhmu mai ta ve lo’ng maw?

Hawh u, heng THIL hi chu ngaia neih i zir ang u. Tunah pawh hian zu han zuar tha leh rih ta pawh ni se, a tirah chuan kan khukpui lui lui mahna, rei a nih ka ring thei lo. Sawrkhar hian a intu lam zu rui chu dim eih loin han hrem deuh tak tak se, kan dai rang khawp ang. Chuvangin kum hnih khat hnuah chuan ngaiah kan neih ang a, zuartu nih a hlawh loh avangin kan inhnawn hialin a nia ka rin ni. Grape zu (Zawlaidi) te pawh kha a tir chuan kan khukpui lui lui a, hmeichheho lah khan in lo nihte kha an hlau mah mah emaw tih tur kha a nia – hei nikhua a’n rei deuh a, a zuar chuan an sekhawn han zawrh ve ngawr ngawr mai a ni lo’m ni? êng ren dan te, tui ren dan te, khawlai tihbawlhhlawh loh dan te, mei zuk dan te, zu in dante leh a dang tam takte hi ngaia neih (awareness neih) hun a nghahhlelhawm tak meuh a ni. KHAP hi chu a dul hun hunah a hluar leh mai thin. Chu chu a rei hunah ngaiah ngeih a nih chuan zawi zawiin a reh a, a hnawksak lo mai a ni ber.

— CHHUANLIANA, BVT

Facebooktwittergoogle_plusredditpinterestlinkedinmail

Doctor Ka Zawhna (March 30, 2013)

Zawhna: Ka ngal hi 1995 vela damdawi ka tihna ser a la awm a, chu chu October thla
vel khan ka hnathawhna-ah ka ti pem leh palh a, Betadine tui chi in ka dressing char char a, tun thlengin a la damlo a, engtia enkawl chi nge min hrilh theih chuan ka  
lawm hle ang.

Chhanna:    Ruihtheih thil khawih, inchiu thin te hriat tur chu kan inchiu avanga kan
thisen zam (vein) a lo chhiat nasat hian kan taksa, a bikin kut/ban leh ke/chawn/malah te hian thisen che vel (blood circulation) a tha thei tawh lova, blood flow a that loh chuan pem a dam har em em a, a vung duh bawk a, tin, zu in hian blood circulation a tih chak avangin thisen let tha thei lo hian ke leh kut te a tivung duh em em bawk a ni.

Post injection ulcer kan tih mai hi kan sawi tak angin a dam mawh hle a, ke a kal a haw bawk a, chu mai ni lovin chawhmeh rim na chi leh thak te a haw hle bawk. Zan mutna-ah ke hi awm (chest) aia sang hret a kam kan a pawimawh hle; chu chuan a healing process hi a ti chak thei a ni. Chu bakah chuan dressing tih hian a pan bul bawr tissue dim a ngai hle a, hruk hul aiah deh ro te a tha zawk a, ke a kal tlem a pawimawh viau bawk. Tih huh a pawi thei a, a ro thei anga awm tir a tha hle bawk. Chu bakah chuan Blood sugar i neih leh neih loh check tel thei bawk la, sugar problem nei te hi pem a dam har duh viau. |ha berah chuan surgery OPD-ah lo inentir la, in lama dressing tih dan tha zawk te an lo kawhhmuh thei ang che.

Facebooktwittergoogle_plusredditpinterestlinkedinmail

SAKHUA (March 30, 2014)

Myanmar-ah Synod hotute zin
OM Committee-in a ruat angin Rev. K Lalhmuchhuaka Synod Moderator, Rev. Lalzuithanga Sr. Executive Secretary, Upa Zoliana, Synod Secretary (Sr) leh Pastor B Sangthanga, Synod Secretary (Jr) te chu Myanmar-a Presbyterian Kohhran te zirchiang turin an kal a. March ni 24, 2014 khan Presbyterian Church of Myanmar (PCM) hnuaia Synod hrang hrang 6 te nen Tahan Venglai Presbyterian Kohhran Committee Hall- ah nilengin inkawmhona hun an hmang. March ni 24 leh ni 25 khan Tahan leh a chhehvela Presbyterian Kohhran hrang hrang leh Synod Office hrang hrang te an tlawh kual bawk.

Harhna thlen Champha
Aizawl; April ni 4, 2014 khian Mizoram Baptist Kohhran chuan an Kohhran ni pawimawh zinga pakhat, “Harhna thlen Champha” an hmang dawn. He Ni hi Pathian ni a nih loh chuan Headquarters atangin hman ngei ngei turin Kohhrante a phut lem lo a, a hmang thei tur te tan thupui buatsaih sa “Harh a hun tawh tak zet” (Rom 13:11) hmangin thuchah an ngaithla ang. Tualchhung Kohhranin an duhdanin programme an siam mai thin a, Headquarters atanga thuchah buatsaih chhiarchhuah a ni ang.

SA-in Camping Centre hawng
Aizawl; Kum 2011 khan Salvation Army India Eastern Territory Home League Congress rah chhuah atanga Home League member ten an sak, Prayer Mountain-a Camping Centre an sak chu March ni 28 khan Col. Lalngaihawmi, Territorial Commander chuan hawngin Pathian hnenah a hlan. He Camping Centre sakna atan hian Home League member te bakah mi thahnemngai tam takin sum leh pai an thawh a, heng bakah hian Lungthanga leh Selthangi, Electric veng ten an nu leh pate hriatreng nan cheng nuai 4 an pe a, he sum hmang hian Camping Centre sak bul tan a ni a, mi thahnemngai dang ten pe chhunzawm zelin he In hi cheng nuai 19.8 seng sak zawh a ni.

Synod Revival Retreat zo
Aizawl; March ni 27 leh 28 khan Mission Veng Presbyterian Kohhran Hall-ah ‘Synod Revival Speaker Retreat’ neih a ni a, Synod Moderator Rev. K Lalhmuchhuaka’n a hmanpui. Retreat-ah hian Rev. R Lalengzauva paper buatsaih ‘Kohhran leh a thurin humhalh’ tih Rev. K Lalthangmawia paper buatsaih ‘Thusawia fimkhurna tur : Mihring leh Sual thu’ tihte zirho leh a ni a. Nimin khan Synod Secretary, Upa H Zoliana paper buatsaih ‘Tunlai Kohhran mite mamawh’ tih leh Upa C Lalzawnga, Revival Committee Member paper buatsaih ‘Thlaurauva rawngbawl’ tihte an zirho leh bawk. Tun dinhmunah Mizoram Synod hian Revival Speaker mi 70 nei mekin, retreat-ah hian Speaker 68 an tel.

NCCI Centenary lawm mek
Aizawl; March ni 27 atang khan National Christian Council of India (NCCI) kum 100-na, India Hmarchhak huapa lawmna chu Mizoram Presbyterian Kohhran bultumin Synod Conference Centre, Mission Vengah neih a ni. NCCI kum 100-na lawmna hi Mizoram Presbyterian Kohhran Synod-in a senso te tumin bul a tum a, programme leh tul dang lo huaihawt mawhphurhna chu Mission Veng Kohhranin a la thung a ni. Thupui chu “Chanchin Tha hril hna leh Kristiante inpumkhatna lam hawia ke pen” tih a ni a, he programme hian zanin thleng a awh ang. March 27 khan Moderator-in palaite zanriah a kilpui a, March ni 28 khan hawnna inkhawm neih niin, Mizoram Governor Vakkom Purushothaman-a’n a hmanpui. NCCI Centenary lawmnaah hian NCCI lehkhabu tlangzarh a nih bakah paper zirhona neih zui a ni a, zan lamah, Chief Minister Lal Thanhawla’n Aijal Club-ah palaite zanriah a kilpui bawk.

Facebooktwittergoogle_plusredditpinterestlinkedinmail

Login

Lost your password?