Monthly Archives: April 2014

Central YMA Flying Squad-in ruihhlo do beihpui thlak tan

Aizawl; YMA kum-puan ‘Ram leh hnam hum-halh’ bawhzui tur liau liaua din Kum-puan Committe en-kawl mek Flying Squad chuan zu leh ruihhlo dap chhuah beihpui a thlak tan mek a, hna hmasa ah Phunchawng leh Rangvamual lam tuamin, zu factory 3 an tihchhiat tawh bakah mi 20 chuang an man tawh bawk.

Flying Squad te hian kar khatah an remchan dan azirin tumhnih emaw tum thum emaw heng veng pahnihah hian zu leh ruihhlo dapchhuah beihpui an thlak thin a, hma an lak tawh chinah zu thahnem tak leh he thila inhnam hnawih mi 20 vel an man tawh tih Flying Squad Convener, K Lalthlantuma chuan Zalen a hrilh a. A bik takin zu dapchhuah hna an ngawrh lehzual a, ruihhlo lam pawh an hma tel tho tih a sawi.

Zu leh ruihhlo dap beihpui thlakah hian Vaivakawn Police Station duty ten an tawiawm tha thin hle tih Flying Squad Conve-ner chuan a sawi a, an mi mante pawh Vai-vakawn Police Station-ah hian hlanin, zu sakna bungrua, a neitu hriat lohte erawh chu Central YMA Office lamah an dah rih niin a sawi bawk.

Flying Squad hian ruihhlo, a bikin tunlaia lar tak Pseudo-ephedrine (khehpuam) leh hemi atanga ruih-hlo hlauhawm zawk ‘Meth’ an tihte pawh an nan fuh phawt chuan an hlah dawn lo tih thudawnna chuan a sawi a. Mihring in-daih tawk loh avangin hma an la zau lutuk thei rih lo tih sawiin, Central YMA thuneitu sang, Central Executive Committee (CEC)-ah mi 20 vel an dil belh mek niin thu dawn a ni.

Central YMA hnuaia Kumpuan Committee-ah hian Chairman chu Vice President, Vanlalrema Rokhum a ni a, Secretary chu Vanlalzuia, CEC niin member 39 an awm mek a. Heng Kumpuan Committee member-te hi Flying Squad member ni nghalin, Squad kil-kawitu bik (Convener ) chu K Lalthlantuma, CEC Member a ni.

 

Facebooktwittergoogle_plusredditpinterestlinkedinmail

FCS&CA Department-in buhfai phurh man vbc.12 chuang a ba

Aizawl; Food, Civil Supplies & Consumer Affairs Department chuan March ni 31,2014 thleng khan carrying contractor te buhfai phurhman ba Rs. 12,57,40,359/- a ba.

FCS&CA Department chuan buhfai phurhman sawrkarin a bat chhan chu sum indaihlohna avang a ni tih an sawi a, annual budget a nuai 2000 awm hmangin sawrkar kumthar ah pek tan tum a nih thu leh budget in a daih chin chin pek phawt a, Finance Department atanga rulh zawhna khawp pawisa pek an nih chuan rulh zawh an tum tih an sawi. FCS&CA department chuan Carrying Contractor bill pek danah duhsak bik an awm lo niin an sawi a. A theih chin chinah seniority a pek a ni a, damlohna emaw engemaw tulbik thil erawhchu an ngai pawimawh thin niin an sawi.

FCS&CA Department in Carrying Contractor te bill an bat dan
Name of District Amount (Rs.)
Directorate Nil
DCSO Aizawl East 81,50,495
DCSO Aizawl West 9,53,486
DCSO Lunglei 2,94,23,967
DCSO Saiha 1,98,14,295
DCSO Champhai 93,20,206
DCSO Kolasib 15,20,072
DCSO Mamit 1,08,17,342
DCSO Serchhip 1,52,23,700
DCSO Lawngtlai 3,05,16,797
Total 12,57,40,359

Facebooktwittergoogle_plusredditpinterestlinkedinmail

2014 HSLC Result : Kum 5 chhunga III Div-a pass tam ber kum

Aizawl; Mizoram Board of School Education (MBSE) in April ni 25, 2014-a High School Leaving Certificate Examination 2014 result a tihchhuahah, a pumpuia pass percentage chu 67.51% a ni a, mahse, 2014 HSLC result-ah hian tunhnai kum 5 chhunga III Division-a passed an tam ber kum a ni a, pass zawng zawng 12,468 zinga 6515, 52.25% chu III Division-a passed an ni.

HSLC Result 2014 leh kum hmasa lam result zirchiangtu C Lalhriatpuia, Editor, Students’ Outlook chuan, “Kum 2014-ah hian HSLC exam hmachhawntu zirlai zawng zawng atangin 2.30% chauh Distinction-ah an pass a, kum 2013-ah 2.31% in pass-in, HSLC Result that ber kum, kum 2012-ah chuan 4.93%-in Distinction-ah an pass a. Kan pass percentage-in hma a sawn hret lai hian kan result quality pawh hian hma a sawn ve zel tur a ni a, mahse hma kan sawn mang tlat lo. 3rd division-a pass zat hi tunhnai kum 5 chhunga a san ber tum a ni tlat! Chuti a nih chuan HSLC 2014 result leh Mizoram zirna hian hma a sawn lutuk rih lo tihna a ni thei ang,” a ti.
Kum 2013 kha, a hma lam kum 6 chhung hisap pawhin HSLC result chhiat ber kum a ni a, exam beitu zirlai 16,144-ah 9466 (58.63%) in an passed a. 2014-ah 67.51% ah kai chho. Kum 6 chhungin HSLC top 10-a mipa an lan tam zawk tum khat chiah a awm a, kum 2013-ah a inzat chiah a, 8 ve ve an awm. Top 10-ah hmeichhia an lang tam zawk zel. Kum 6 chhungin HSLC Top 10-ah hmeichhia 61 zet an lan theih laiin mipa erawh chu 34 chiah an lang phak. Subject topper-ah hmeichhia an tam zawk zel bawk. Hetih rual hian, pass percentage, subject hrang hrang – Mathematics, Science leh SS-a Distinction-a tlin tam lamah te hmeichhia in mipa an tluk ngai meuh lo a, Language subject- English leh Mizo-ah mipain hmeichhia an tluk lo thei hle thung.

“Mizorama High School hrang hrangte hi Management chi hrang hrang – Govt. School, Deficit School, Aided School, Lumpsum school leh Private school-ah te then an ni a. Sorkar school chu a tlangpuiin an pass percentage a chhe lutuk lo. Deficit School ten Mizoram education quality an chawisang hle. Aided School leh Lumpsum-te hi an dinhmun ngaihtuahin hei aia la tang deuha la ti tha zawk deuh tur a ngaih an ni. Mizoramah Private School a tam hle a, school tha tak tak awm bawk mah se, private school tam lutukin an management result a tichhia a. Chuti chung chuan an contribution erawh a ropui hle tho mai. Private school tamtak, fee to tak tak a lakna, result nei tha thei chuang miah lote chungchang hi enfiah a hun ta hle,” tiin Students’ Outlook Editor chuan a sawi.
2014 HSLC result-ah hian Mathematics subject-a Mizo zirlaiten harsatna an tawk nasat tih result atangin a lang a, subject hrang hranga Letter Mark (80% leh a chunglam) an hmuh dan English-ah 787; Major Indian Language (MIL) ah 604; Mathematics-ah 301; Science-ah 617 leh SS-ah 747 a ni a. Subject dang zawng zawngah Mathematics a Letter Mark hmu zat aia a leta tam vekin letter mark an hmu a, hei hian Mizoten Mathematics-ah harsatna lian tak kan nei tih a entir a ni.

Private Candidate an tam thei hle a, hengte hi school hrang hranga a thiamthei lo zual, pass tura beisei ngam chiah loh, kumtluana school kala fee chawi ve vek si, school hminga exam tura an duh leh si lohte an ni tlangpui a. Kum 2014-ah hian candidate exam bei zingah 27.36% (5054/18469) an awm a. Kum 2013-ah private-a exam 4,206 (26.05%) awmin 1,568 (39.48%) an pass a. Kum 2012-ah 3,972 (26.14%) awmin 905 (21.52%) an pass a ni.

Facebooktwittergoogle_plusredditpinterestlinkedinmail

Khehpuam thubuaia man zinga mi Rozara hospital-ah dahluh a ni

Aizawl; Pseudoephedrine tam tham tak man kaih-hnawiha April ni 20-a Police te’n an man rorellai MPCC thupuangtu leh Media Department Secretary hlui Lalrozara chu damdawi inah dah luh a ni.

Thu lakna talran dan-in, Lalrozara hi a zun thlum a san zual avangin April ni 24, 2014 khan Central Jail doctor-in damdawiina en-kawl turin a thawn a. Civil Hospital-ah khum a awm loh avangin Kulikawn-a Al-pha Hospital-a Private Cabin-ah daha enkawl a ni ta a ni. MPCC Media Deptt. member, VZ Kaia sawi dan chuan, Lalrozara hi bail tum a ni a, mahse, bail-a chhuah a duh loh thu leh roreltu hmaah dingin diklohna a neih loh avangin thiam a chang mai dawn niin a sawi thu a sawi.

Kar kaltaa Mizoram Police te’n Pseudeoephe-drine cheng nuai 150 man hu an man chhui zel naah Mizoram Police te chuan damdawi thenkhat te hi Modi Life care Industries Ltd, Gujarat Industries Development Corporation Ahmeabad atanga thlawhtheihna a Aizawl rawn phur luh a nih thu niminpiah khan an sawi a. Pseudeoephedrine an man neitu nia puh Lalremsangi Fanai chuan amah thu zawt fiahtute hnenah heng damdawi te hi a ta a nih thu a puang tawh niin Police te chuan an sawi.

Mizoram Police te chuan chhui chhunzawm zelin an damdawi man kaihhnawih lehkha thenkhat atanga a lan danin dam-dawi thenkhat hi chu Ahmedabad atanga thawn chhuah niin an sawi.

Facebooktwittergoogle_plusredditpinterestlinkedinmail

Communist ram Laos-a inbengbel Mizo pa Buansanga Sailo a boral

Aizawl; April ni 23, 2014 tlai dar 4:30 khan Buansanga Sailo (89), Communist Laos rama kum 1972 vel atanga awm tawh chu ama chen-na In, Vientiene khawpui daifemah Lung na avangin a thi a, a nupui leh fanu 2 leh fapa 1 a kalsan.

Buansanga Sailo hi a tleirawl lai, kum 1954 velah kum 18 a nihin Mizoram a chhuahsan a, Burma leh Thailand-ah lut chhovin, Laos-ah kum 1972 velah lut chho zelin Laos mi (Kheng Keo) nupuiah a nei a, fanu 2 leh fapa neiin Vientiene khawpui daifemah mahni in leh lo neiin an khawsa a ni.

1970’s chho khan Laos ram chu Maoist communism leh North Vietnam communist-Ho Chi Minch a ho (Vietcong) hote puiha Communist-ho thuhnuaia a tluk luh khan, foreigners leh missionary te an tlanchhuak vek a; chutih lai chuan Buansanga pawh hi tlanchhuah a tum a, Thai-hoten Indian a nih avangin ramri a kan an phal sak loh avangin UN hnuaiah in hum-himna dilin, chumi hnuah Laos communist hnuaiah a rammi anga awm a dil leh a, Laos khua leh tui a ni zui ta a, 1954 vela Mizoram a chhuahsan chu a kir leh ta miah lo a ni.

Buansanga Sailo hi Lunglei chhak lam Rotlang East lam chhuak a ni a, a unaute hi Lunglei Chanmari, Mission Vengthlang Aizawl leh Hnah-thialah an awm niin a dam laiin a sawi. Laos hi Communist ram a nih avangin lehkhathawn vel pawh Post Office-ah Box neiin, sorkarin a duh chuan a endik (censore) thei a, fim-khur a ngaih avangin a chhungte pawh a be pawp meuh lo niin hriat a ni.
“Ka chhungte pawhin thi tawh-ah min ngai ang,” tiin kum 2006 August thlaa amah zawng chhuaktu Cambodia-a Missionary hnathawka awm mek CT Lalrinawma hnenah a sawi a ni. Buansanga hian a fanute hming pawh Lao tawng vekin a phuah a, a fanu naupang zawk Noundy Nuomtao Rajavong (24)chu Adventist kohhran office-ah Accountant niin, Pathianni zan dar 6:30 ah Laos TV lar tak Lao Star “Zoom Zoom” program-ah hostess niin, a thiante nen an zai thin bawk. He program hi Laos thalaiten an hlut hle.

Facebooktwittergoogle_plusredditpinterestlinkedinmail

Ranvulhte hmangaih let turin chah

Aizawl; Animal Husbandry & Veterinary Minister C Ngunlianchunga chuan, nitin khawsaknaah ran kan mamawh viau laiin an hamthatna leh enkawlna lam erawh chu Mizoten an ngaihthah niin a sawi a. “Hmangaih letna a awm lo thin a, hei hi pawi ka ti hle a ni,” a ti.

He thu hi nimina Tourist Lodge, Chaltlang-a ‘World Veterinary Day’ hmanna inkhawmah sawiin Vety Minister chuan, ranvulh chu Mizo nuna bet tlat, sakhuana leh thiltihna dangah pawh ran tello chuan hun hman harsa tak a nih thu a sawi a.Ran atanga natna awm theite inhrilhhriat leh zirtir kawngah Vety thawktute chu tan la lehzual tura chahin, hrisel zawka ranvulh nan leh ran vulhtute pawhin hriselna an neih theih nan Medical Doctor te nen inrawn tlanga hmala thin tur leh dawhkan maia hun hmang lova, an chenna hmun ngeia ran endik thin turin a chah bawk.

World Veterinary Day hi Mizoram State Veterinary Council leh Indian Veterinary Council te bultumin hman a ni a, inkhawm hi Dr.. R Kapthuama, MSVC President-in kaihruaiin Dr. Engkunga Chhangte chuan mihring natna 60% chu ran atanga kai a ni tih a sawi a. Ran enkawl kawngah fimkhur a ngaih thu a sawi a. Ran atanga natna inkaichhawntheih thleng avangin khawvel hmun hrang hrangah hrileng eng emaw zat a awm tawh niin a sawi bawk.

Kumin World Veterinary Day thupui atan hian Animal Health ‘Ranvulhte Hamthatna’ tih chu thlan a ni. World Veterinary Day hi kum 2000 atang khan hman tan a ni a, kumtin April Inrinni hnuhnung ber hi he ni bik atan ruat a ni.

Facebooktwittergoogle_plusredditpinterestlinkedinmail

Bethlehem YMA in thisen Unit 96 pe

Aizawl; Bethlehem Veng Branch YMA chuan an Branch Golden Jubilee lawmna pualin nimin khan Aizawl Civil Hospital-a damlote hman atan a thlawnin thisen Unit 96 an pe. Thisen petute hi mipa 78 leh hmeichhia 18, an vaiin mi 96 an ni.

Blood Bank atanga thudawn danin, tunhnaiah Civil Hospital-in damlote hnena thisen pekchhuah tur an tlakchham titih thu media hrang hrang atanga hriaa thisen petu pawl leh mimal tlawmngaite inpekna avangin thisen tlakchham hlauhthawnawm dinhmunah an ding tawh rih lo a, thisen mamawhna hriaa tlawmngaia thisen petute zawng zawng chungah lawmthu an sawi a ni. Hetih rual hian, thisen pek hi mimal ang pawha uar deuh deuh turin an ngen bawk.

Facebooktwittergoogle_plusredditpinterestlinkedinmail

VOHBIK naupangte hnenah tanpuina sem chhuak

Aizawl; Zirtawpni kalta khan SSA Mission, Lawngtlai chuan an huam chhunga School naupang vohbik mi 17 hnenah tarmit leh wheelchair an sem. SSA Mission,Lawngtlai District hian zirlai naupang, taksa lama harsatna nei Vohbik ti a an koh thin te hnenah an harsatna neih a zirin a thlawna tanpuina thilpek an sem thin a, Zirtawpni pawh khan chutianga har-satna nei zirlai naupang 17 te hnen ah tarmit, wheelchair leh crutch pakhat an sem.

Facebooktwittergoogle_plusredditpinterestlinkedinmail

Mizoram pumah school 3890 a awm

Aizawl; Economic Survey 2013-2014 atanga a lan danin Mizoramah school 3890 a awm a, heng te hi Central enkawl 24, State sorkar enkawl 1611, local body enkawl 364, Deficit 26, Council Deficit 35, Adhoc Aided 206, Council Aided 7, Lumpsum Aided 76, School thar 479, Private sorkar atanga tanpuina dawng lo 1086 te an ni. Survey tarlan danin school zingah hian sorkar atanga tanpuina dawng lo private school zat chu 27.75% an ni a, private tanpuina dawng hi 21.18% a ni a, hetih lai hian zirlai erawh an nei tam ber thung. Mizoram Legislative Assembly Session hnuhnung bera pharh tak Economic Survey 2013-14 in a tarlan danin kum 2012-13 chhung hian private un-aided in zirlai 121011 an nei a, Sorkar school central in 2204, state sorkar school in 109819 an nei a, local body enkawl ten 28012 an nei a, Adhoc Aided in 13223 an nei a, New school in 21331 an nei a, Deficit in 8463, Lumpsum aided in 4674, Council deficit in 2322, Council aided in 619 an nei a ni.

Zirtirtu hi State sorkar school ah tam berin 10043 an awm a, Private in dawtin 7061 an nei a, New School in 2173, Local body enkawlin 2098, Adhoc Aided in 1703, Lumpsum Aided in 456, Deficit in 398, Council deficit in 317, Central school in 176, Council aided in 43 an nei a ni. Central school enkawl ah hian zirtirtu 1 in zirlai 13 zel zirtir ang an ni a, state sorkar enkawlah zirtirtu 1 in 11 zel, local body enkawlah 13, Deficit ah 21, Council Deficit ah 7, Adhoc aided ah 8, Council aided ah 14, Lumpsum aided ah 10, new school ah 10, private ah 17 a ni a, a pumpuia chawhrual (overall) in zirtirtu pakhatin naupang 13 zel enkawl ang an ni.

Primay School, Middle Schhol, High School leh HSS School a zirtirtu zinga 43.76% te hi trained teacher an ni a, Sorkar school ten trained teacher an ngah ber a, 70.04% an nei a, Private unaided school in trained teacher an nei tlem ber a, 11.02 % chauh trained teacher an nei a ni. School chawlhsan (drop-out) rate hi Primary ah 31.26%, Middle School ah 38.26%, Hiogh School ah 45.68% a ni a, kum 2011 chhiarpui angin Mizoramah hian kum 7 chin chunglam ziak leh chhiar thiam 847592 awmin ziak leh chhiar thiam lo 77886 an la awm bawk a ni.

Facebooktwittergoogle_plusredditpinterestlinkedinmail

Pukzingah in kang

Nimin tlai dar 5:40 khan Pukzing khuaa In pahnih chu bungraw chuh hman lohvin a kangral vek. Thudawn danin, heng In te hi Ropianga leh Lalmawia te In niin Assam Type a ni a, Ropianga te In atang hian kangmei a chhuak a, kangmei chhuah chhan hi an rawngbawl laia an chhuahsan lawk laia kang a nih avangin thuk atanga kang nia rin a ni. Kang tuarte hi Hall lamah riahtir phawt an ni a, nimin khan kang hnuhma te senghawia hnatlangin kang tuart chhawmdawlna tur vehbur khawn nghal a ni bawk.

Facebooktwittergoogle_plusredditpinterestlinkedinmail

Login

Lost your password?