Monthly Archives: April 2014

Hachhek Constituency Development Committee-in Hachhek bialah Hachhek mi Tuikuk chauh lakluh remti

Aizawl; Hachhek Constituency Development Committee chuan thuchhuah siamin, Mizoram sorkarin Tuikuk Mizoram chhuahsan te laklet atum mek chungchangah, Hachhek Constituency mi leh sa te ngei chauh Hachhek Constituency ah lak luh ni se an duh tih an sawi a. District dang mi leh sa te Hachhek Constituency huamchhungah lakluh an nih chuan a tawp thlengin HCDC chuan a dodal tlat dawn a ni, an ti.

HCDC chuan Mizoram sorkar hmalaknaa Tuikuk lak let lehnaah sorkar huntiam chhunga kir duhlo te chu Hachhek Constituency mi leh saah an ngai tawh dawn lo tih sawiin, huntiam ral hnua Hachhek Constituency-a Tuikuk rawn lut lehte chu Inhmun lo ram pek theih an ni tawhlo ang, an ti bawk.

Facebooktwittergoogle_plusredditpinterestlinkedinmail

Biak ina upa vui loh rel

Nimina Biate Pastor bial Inkhawmpui rorel palaite chuan Kohhran Upa thite Biak Ina vui tawh loh nise tih an rel a. Tuichang Presbytery-ah he an rorel hi thlena Synod Inkhawmpuiah pawh thlen zui nise an ti.?Presbyterian Kohhranin mitthi vui dan tur a siamah Upa thi te Biak Ina vui tur tih a awm lo, an ti niin thudawn a ni.

Facebooktwittergoogle_plusredditpinterestlinkedinmail

School khar tintuah

Tuichangral Zirlai Pawl chuan an huam chhunga Govt. Primary School, Chekawn (Serchhip District) zirlai 24 awmnaah kumin February atang khan zirtirtu pakhat chauh a awm tih sawiin, hei pawh hi naute nei mai tur a nih avangin tunah zirtirtu nei loin he school hi a awm mek a ni, an ti a. Sorkar hnenah zirtirtu dah belh tura vawi tamtak an lo dil tawh chu May ni 15 ral hmaa zirtirtu pahnih aia tlem lo dah belh turin sorkar an phut a, zirtirtu dah belh a nih loh chuan he school-ah hian zirna kalpui zel theih tawh lohah ngaiin TZP chuan zirtirtu dah belh a nih hma chuan a khar dawn tih thuchhuah siamin an sawi.

Facebooktwittergoogle_plusredditpinterestlinkedinmail

Chawngte p-ah in 4 hal

April ni 24 chawhnu lam khan Chawngte lui hnära Chakma In Pali(4) chu halsak an ni. Thu lakna tarlan danin, Chawngte(P) ram lama lui hnar, Vanteikhawr bul vela Chakma In neite chu chhuak tura tih an ni a, tum hnih ‘warning’ an pek hnu-ah pawh an chhuah duh loh avangin helaia pawl thenkhatin an halsak ta a ni. Heng mite hian Chawngte luidunga thing leh mau, luia cheng tinrengte tichereuvin eizawn nan an hmang thin a, hei hi YMA lam chuan an ngaimawh hlea hriat a ni.

Facebooktwittergoogle_plusredditpinterestlinkedinmail

Tui nghei vangin school khar

Thuampui Venga Holy Cross School chuan tui an neih loh avangin Nigani leh Zirtawpni khan school an khar. He school-ah hian zirlai 450 vel awmin tui connection pahnih an la a, mahse, tui a haw that loh avangin zirlaite’n harsatna an tawh an hlauh avangin school hi nihnih an chawl niin an sawi. Tui mamawh ang an neih theih chuan naktuk atangin school kai tan leh an tum a ni.

Facebooktwittergoogle_plusredditpinterestlinkedinmail

Oil/Gas documentary

Mizoramin Gas/Oil ngah hle anga mipuite hnena sawi thin chungchanga thu chiang zawk puanchhuahna neih tum a ni a, duanlawk ang chuan May ni 3, 2014 khian Chanmari YMA Hall-ah chawhma lamah he gas laihchhuah chungchang documentary chu tlangzarha thlirhona leh sawihona hun hman a ni ang.

Facebooktwittergoogle_plusredditpinterestlinkedinmail

Animal health camp

World Veterinary Day denchhenin College of Veterinary Sciences & Animal Husbandry chuan Selesih ah a thlawna ran entirna ‘free animal health camp’ an buatsaih a, hetah hian ran 300 enin a thlawna damdawi pek an nih bakah hri danna pek an ni.

Facebooktwittergoogle_plusredditpinterestlinkedinmail

Phochhuak dawn

Mizoram State Child Protection Society chuan ‘International Child Abuse Awareness month’ denchhena Poster, Logo, Poetry, Slogun, Photography a buatsaiha Item lutte chu April ni 29 leh 30 hian Aijal Club-ah an phochhuak dawn a, April ni 29 chawhma dar 10:30-ah tan a ni ang.

Facebooktwittergoogle_plusredditpinterestlinkedinmail

Police kalphung a inthlak ta em?

Kum kua vel liam ta 2004 khan Aizawl nula pakhat rawng taka thah a ni a, a thattu a puh vai pahnihte inpuanna chu khatih laia kartin chanchinbu Zozam-ah khan KAN chhuah a. Chutia court-in thutlukna a siam hma leh police pawhin an la chhuichhuah hma hauha pawikhawiha puhte inpuanna (tunlai a lar em em statement kan tih ang hi) tlangzarh a lo ni ta chu police lam ngaihdan a ni lo hle a, Zozam enkawltute pawh min koh hial an tum a ni. Kum 2007 pawh khan Zozam chanchinbu a kan thawh lai bawkin SRS kuta awm laia thi pakhat chu RTI Act hmangin a ruang endikna (post-mortem report) police hnenah kan dil a. Min pe phal lawk lo a, mahse a tawpah chuan hreh tak chungin min pe ta hram a, an uizia kha ka la hre reng. Tun hnai lawk thleng khan chutiang chu Mizoram police-te rilru put hmang a ni.

Police hnen atanga thubuai kal lai mek leh an thil chhui lai document neih a harsat zia leh an hmalakna chin pawh puanzar an hreh thinzia hi chanchinbua inhmang chuan an hre vek awm e. Mizoram sorkar hnathawk zingah police tluka document/file ui an awm lo ang tih hial a ni thin. Kum 2003 MLA inthlana Suangpuilawn biala candidate pathum rukbo chungchanga inquiry report pawh kha kum li vel liam hnuah Zozam chanchinbu bawk hian Home department-ah RTI Act hmangin kan dil a, chu pawh chu pek chhuah harsa an ti khawp mai. Tunlai khawvelah hi chuan thil inthup hi a awm thei tak tak tawh lo a ni ber, sorkar kalphungah pawh hian engkim mai hi a langtlang zawnga kalpui a ni tan mek a. Hmun dangah chuan tualthahna leh pawikhawihna lian tham mipui ngaihven tur chi a thlen changin police-ten an hmalakna chin media kal tlangin an puangzar fo thin a, a bikin post-mortem report te phei hi chu an thup vak lem lo. Mizoram police erawh an dang bik tlat thin, pawn lam thilin an hmalakna a tihbuai an hlauh vang pawh a ni anga, thubuai kal lai leh an chhui mek lai a nih chuan an puangzar mawh thin khawp mai.

Mahse, tun hnai lawk atang khan police kalphungah thil a inthlak danglam nasa hle tih hai rual a ni lo. EVM tichingpena inpuhna thu kal zelah police hmaa mi thenkhat inpuanna TV leh chanchinbu lamah kim chang taka puanzar a ni ta fo mai a, a mak khawp mai. Chu aia mak zawk mah chu political party-ten police hnena mi inpuanna (statement) a copy siam punga an sem darh leh zel hi a ni, social media – facebook, whatsapp, etc., ah te nasa zawkin a darh chuai chuai thin a nih kha. Thilsual ti a puhte leh suahsualna thila inhnamhnawiha rinhlelhte hi police-in an man thin a, court-in an chungthu a rel felsak hma chuan thiam loh chang an la ni bik lo a. Police hmaa an inpuanna pawh hi court-ah an pha leh thei bawk. Thu tawp a la ni lo a, a hnuah an la thlak danglam leh thei tho. Chungte a nih avang chuan police lam hian an mi mante inpuanna hi an tlangzarh mai mai ngai lo thin a, an thil chhui lai nena inkaihhnawih thil dang a awm theih avangin mipui hriata an puanzar chang pawhin a vai vaiin an puang ngai meuh lo thin.

EVM tichingpen a inpuhna hi a thubuai a lian tham tih a chiang a, inpuhnaa hming lang chin ho pawh an hraw tlang khawp mai. Chuvang chu a ni maithei kan police-ten an kalphung pangngai pel rawk a an mi mante inpuanna an tlangzarh chiam chiam thin ni. Mahse, chu chu ngaihtuah chianin police tan a pawi thei a, mipui tan a tha lo a, sorkar tan pawh a him bik lo thei ang. Hetiang a nih te chuan misual an mante pawh hi (an inpuanna a ngai ngaia a darh chhuak dawn a nih chuan) an inpuang tha duh tawh lo mai ang tih a hlauhawm. Ngaihtuah chian a ngai khawp mai.

Tunhma atanga kan police-ten an tlakchham fo thin chu media nen a an inkar siamthat hi a ni. Buaina lian tham deuh a lo chhuah chang phei chuan media kal tlangin mipuiin police hmalakna kan lo chang thup thin a. Mahse, police lam hian engmah tak tak hi an puangzar ngai lem lo a, court thutlukna chauh hi mipui hriat turah an ngai ni berin a lang. Chu lah chu hun a duh rei viau bawk si. Chuvang chu ania, pawikhawihna leh a kaihhnawih thil, mipui ngaihven zawng a lo thlen chang hian ngaihdan mak pui pui a tam em em thin ni. Police hian an thil chhui lai pawhin mipui ngaihdan kal sual nasa lutuk tur ven hi an tum tel tur a ni a, media kal tlanga a awm tawk puanzar thin hi an tih tur pawimawh tak niin a lang.

Hman deuh khan Mizoram DGP pakhat chuan police leh media inkarah harsatna a awm fo chhan chu a tul chin mipui hriat puangzar tur PRO (Public relations officer) an neih loh vang niin a sawi. A dik ngeiin a rinawm. Tun hnaia home minister-in an mi man pakhat inpuanna chipchiar taka a lo puang ve ngawt mai leh a hma deuh a chief minister-in press conference a sawi chhuah atang ngawt pawh khan DGP hlui thusawi pawimawh zia hi a chiang viau a ni. Home minister hian party mite hmaa sawi loin police hotu lawkte nen ngun takin sawiho phawt se, chumi hnuah thuthar theh darhtute kawm zawk ta se a kalphung a dik zawkin a rinawm. Chanchinbu mite pawhin zawh belh tur an nei ngei ngei ang a, mipui pawh an hmin zawk ang.

A tawpna atan chuan a chunga tarlan police kuta awm mek mi thenkhat statement puanzar thin chungchangah hian police hotute a pawng a puia dem erawh a fuh lo maithei. Hetianga an tih chhan hi chung lam atanga nawrna vang a nih a rinawm zawk mah. Mi tam tak chuan hengte hi police thuchhuak ni loin ministry thuchhuak a nih an ring zawk hial a ni. Chuvangin, thil pawimawh tak mai lo lang ta chu, politician-te inbeihna tawngkam takin Mizoram police hi an ‘kut phuar sak’ ni lo se, zalen tak leh fim takin kal zel se, tih hi a ni. Tun hma pawh khan an hmalaknaa ministry a inrawlh ni a a lan chiah hian rinhlelhna a lo piang duh khawp mai. Pawi lian tham an chhui chang hian mipui chiai tur leh mipui ngaihdan kal sual tur erawh ven nachang hre deuh deuh ta bawk se. Chumi atan chuan media kal tlanga mipui hriat tura puanzar chin tur te pawh thliar thiam a tul viau awm e.

Lalthlamuana Ralte

Facebooktwittergoogle_plusredditpinterestlinkedinmail

Engnge i hmuh ve?

Nu pakhat hi a pasal indona awm zawm turin Mojave thlalerah a kal ve a. A pasal chu a ngai a, a mamawh a, a pan a, a bulah engemaw chen a va khawsa a ni.

Mahse chu hmun chu a ning ta thuai a. A lum thei em em mai a, tuar hleih theih pawh ni lo tur hial khawpin thingbuk hlim hnuaiah pawh 125 degree fareinheit a ni vui vui mai reng a. Thlaler vaivut thli a thaw vuk vuk a, hawi lam apiang chu vaivut hlir vaivuit hlir hi a ni mai si. A tawpah phei chuan a nu leh pate lehkha thawnin, chulai hmun chu arang aranga chhuahsan a, an hnen lama hawn a tum thu a thawn ta nge nge a.

A chhanna chu rang takin a lo thleng a, a pa kutziak ngei chuan, thu tawite – “Mi pahnih hian tan in pindana thir kar atangin pawn lam an thlir dun a, pakhat chuan chirhdup hlir a hmu a, pakhat chuan arsi a hmu thung” tih chiah hi a lo inziak a.

Chu thu chu a chhiar a, thinlung leh tihtakzetin a inngaihtuah vang vang a. Haw lova chu lai hmuna awm chu a thlang zui leh ta zawk a. Chulai rama mi chengte chu a kawmngeih a, a ram chu hmangaih leh ngainat tumin a zir a, chumi ram leh a mi chengte chanchin lehkhabu a ziak ta hial a.

An awmna thlaler chu a ngai reng a la ni a, a danglam lo. Mahse a rilru puthmang leh thil thlir dan chu a lo danglam ta a. A pa thu rawn thawn tawite chuan a tan khawvel thar a rawn hawnsak ta a ni.

Khawvel hi thlaler ang mai a ni. Nihphung sa, danglam thei lo, ze nghet a nei tlat. Kan rilru erawh hi chu a danglam thei. Thil thlir dan thlakthleng thiam tura finnaa thuam kan ni.

Mahni dinhmun mek nin hluah hluah chang a awm thin. Kan chhehvela thil thleng thinah hian kan tihdanglam theih loh a tam si. Kan thu lohna khawvelah hian nun ram a chauh chang a tam a. Hlim a har fo. Kan thil tawn azirin kan rilru a hah viau thei. A then phei chuan nun kan ning a, thih daihte kan chak thin.

Hlimna hi kan chhehvela thil thlengah aiin thil thleng leh nihna kan dawnsawn danah hian a innghat thui zawk.

Kan thil thlir dan azirin kan rilru hi a hlimin a hlim lo a, kan lawmin kan lawm lo mai thin a nih hi. Mi thenkhat tan chuan khawvel hi thlaler khawlum hrehawm leh vaivut hmun ninawm leh huatthlala pawh a ni mai thei a. Mi thenkhat tan erawh arsiin a cheimawi, hlimna hmun a ni thei bawk.

A pasal mamawh leh thlahlela pantu nu khan a pasal awmna thlaler khawlum leh vaivut chu a ngaithei lo. A nun a chau a ni. An pa leh thlaler lah chu lakhran theih a ni bawk si lo. A rilru siam danglama thlaler chu cham chilh a, a kawmngeih a, thianah a siam hnu khan a nun a lo hlim ta zawk a nih kha.

Tanin tukverh thir kar atanga ‘lungaihna chirhdup’ ringawt hmutu an awm laiin ‘beiseina arsi eng’ hmutu an awm a nih kha. I awmna pindan atang khan khawvel hi eng angin nge i hmuh ve le? Tuna i dinhmun mek leh thil tawn mek kha han ngaihtuah la, lungngaihna chirhdup chunga beiseina arsi eng kha i hmu ve thiam em le?

Facebooktwittergoogle_plusredditpinterestlinkedinmail

Login

Lost your password?