Monthly Archives: May 2014

Sorkar, Kohhran leh NGO te’n nasa taka vaihlo do a ngai : Lal Thanzara

Aizawl; Nimin May ni 31,2014 kha khawvel puma zuk leh hmuam do ni ‘World No Tobacco Day’ a ni a, he ni hi Mizoram State Tobacco Control Society leh Indian Society on Tobacco & Health (Mizoram chapter) bultumin Millennium Centre ah hman a ni.

World No Tobacco Day hmanna inkhawmah hian thu sawiin Health Minister Lal Thanzara chuan, “Zuk leh hmuam hi sorkar, kohhran leh NGO ten nasa taka kan do loh chuan kan tuar zel dawn a. Zuk leh hmuam ti thinte pawh a pawizia hria a, an thiltih thin te sim turin ka sawm duh a ni,” a ti. Health Minister chuan ram mipui ngaihtuaha Cancer vei nasa ber rama Mizoram a awm chu zahthlak a tih thu a sawi bawk a, sawrkar kuta dah mai lova mitin ten tih tak zeta an do a ngai tih sawiin kalkhawmte chu nitin World No Tobacco Day hmang turin a sawm bawk.

Indian Society on Tobacco & Health (Mizoram chapter) President Lal Riliani pawhin vaihlo chu ‘Tur nung a ni’ a ti a. Vaihlo chu taksa tana thatna pakhat mah awmlo ni mai lovin natna thlentu anih avangin zuk leh hmuam lakah fihlim a ngai tih a sawi. Nimin he ni hmanna ah hian kalkhawmte chu zuk leh hmuam laka fihlim turin an intiam a ni.

Aizawl; Mizoram sawrkar chuan vaihlo atanga chhiah 13.50% a lak thin chu 20% ah a tisang. Chhiah tihsan tak hi an duhthusam ni chiahlo mahse lawmawm an ti hle tih Dr. Jane R Ralte, State Nodal Officer, Mizoram State Tobacco Control Society chuan a sawi a, tun tuma chhiah tihsan hi cigratte ah hman phawt a ni dawn a, tualchhung atanga siamchhuah tuibur, zozial, sahdah ah te pawh chhiah lak anih zelnan hma an la dawn tih Zalen palai a hrilh. India ram state zingah vaihlo atanga chhiah la sang ber Rajasthan chuan 65% a la a, UP leh Punjab in 55% an la a. Hmarchhak state zingah Assam chuan vaihlo atanga chhiah hi la sang berin 25% a la a, Meghalaya, Sikkim leh Arunachal Pradesh ten 20% lain an dawt a, Nagaland chuan 15% a la a ni. Vaihlo atanga chhiah lak tihpun hian a hmangtu an tlem phah tih zirchianna atangin hmuh a ni. Mizoram sawrkar chuan vaihlo zuk leh hmuam chi atangin kum 201-11 ah chhiah Rs. 556,81,977 a hmu a, kum 2011-12 ah Rs. 764,67,656 leh nikum 2012-13 chhung khan Rs. 952,47,436 a hmu bawk.

Facebooktwittergoogle_plusredditpinterestlinkedinmail

Passport diltu zingah document lem hmang an awm

Aizawl; Aizawl atanga passport diltu zingah voters identity card leh document lem hmang manchhuah an awm nual tawh niin hriat a ni.
ZALEN palaiin Mini Passport Kendra, Aizawla Deputy Passport Officer H Lalramliana hnen atanga thu a dawn danin, mi thenkhat, passport dilna atan document lem hmang an awm thin avangin Guwahati-a Regional Passport Office chuan Mizoram atanga dilna awmte an ringhlel zel mai ang tih a hlauhawm tih a sawi a. Hei hian harsatna tam tak a thlen thei tih sawiin, “Nakinah chuan a dik ngei pawh a lem a nih hlauh vangin rei tak an kawl ang a, midang tan harsatna a thlen thei dawn a ni,” a ti a. Document diklo te chuan dil buai lovin a dik an neih hun nghak thin se a duh tih a sawi bawk.

Deputy Passport Officer chuan, mi thenkhat, passport hmuhsak thei nia insawia mi dawrkual thin leh an sum laksak thin an awm nia an hriat thu a sawi bawk a. Rinhlelh pawh an neih tawh thu sawiin mipuite fimkhur tura a duh thu a sawi a. “Harsatna nei te chu kan hnenah lo kal se, a thlawnin kan pui thei reng a ni,” a ti.

Mizote zingah sumdawnna, sports, zirna leh enge maw thilah ramdanga kal duh thut thut an awm thin avangin passport lo neih lawk a pawimawh tih a sawi a. “Tep ter taka buaipui lovin, lo inrin lawk theih a tha ber a ni,” a ti a. Tatkal hmanga passport neih chu pumpelh hram thaa a hriat thu leh hemi hmanga passport siamte chu Police verification a tel loh avangin ram thenkhata zin tum ten harsatna an tawh phah fo niin a sawi bawk.
Mini Passport Kendra, New Secretariat Complex hi kum 2012 July thla atang khan hawn tan a ni a, a din atanga kumin May thla tawp thleng khan passport dilna 4000 dawn an dawng tawh a, heng zinga a tam ber hi an tihfel sak tawh a ni.

Passport dil nan hian birth certificate, educational qualification, voters ID te thiltel a ngai a. Naupang tan Rs. 1000 leh puitling tan Rs. 1500 chawi a ngai bawk.

Facebooktwittergoogle_plusredditpinterestlinkedinmail

Skill Fest training turin tuarchhuah peih a ngai : T Sangkunga, MYC Chairman

Mizoram Youth Commission Chairman, T Sangkunga chuan Labour Emploment & Industrial Training Department nena June 4-5 a an huaihawt tur Skill Fest sawifiahin ‘Training neih hun chhungin hrehawm tawrh a ngai a, tawrh peih lote tan chuan tih mai mai chi a ni lova, thingtlang chhuak lo tan phei chuan tih chi a ni lo,’ tiin a sawi.

He thu hi ZALEN palai hrilhin T Sangkunga chuan ‘A ti tha peih tan erawh hna a tam a, a ti tha bik te phei chu training an zawh hmanin hna hmuhsak mai an ni thin,’ tiin a sawi a. ‘ Singapore ah te Mizo-in hna an thawk tih kan hre thin a,thla khatah 20,000 te an hlawh mai a, mahse darkar 14 hna an thawk a hemi avanga hlawh hnem hi an ni a, hrehawm an tuar a ni. Mizoram-ah pawh hna thla khata 4,000 hlawh tur te chuan tih inhlawhna a tam a hlawh tam tur chuan hah leh rim a ngai a ni,’ a ti bawk.

Training pe tura chah chhuah 22 te chu ‘trainer’ niin zawmpui an nei teuh a, an ni hian hna an pe thei niin a sawi bawk. India ramah hian ITI leh polytechnic te hian hna hmu lo hmun 5-a hmun 4 chauh an zirtir thei a, a bak zawng hna nei lo thiamna/skill pe tur chuan heng training pe thin te hi an rintlak niin ZALEN palai a hrilh. He scheme hnuaiah hian training senso chu sorkarin a tum thei a, tution fee pawh sokarin a tum sak thei tiin MYC chairman chuan a sawi bawk a, hei hi training an chhuah huna an tih that chuan an hmu thei chauh dawn a ni.
Hospitality, Basic Health Care, Spa, Retail, Aviation, Plastic Processing leh a dangte an tel.

Mizoram Employment exhange a hna hmu lo inziaklut chu 50,265 an ni.

India ramah hian hotel hi 700 a awm thar dawn a, 100 lai chu Kolkatta-ah a awm thuai dawn a, hna a tam rin a ni.

Facebooktwittergoogle_plusredditpinterestlinkedinmail

Sorkarin ‘Mizoram Education Service’ buaipui mek

Aizawl; Education changtu Parliamentary Secretary Joseph Lalhimpuia chuan Mizoram sorkarin ‘Mizoram Education Service’ nei turin chak takin hma a la mek tih a sawi.

Parliamentary Secretary chuan, Mizoramin Education-ah bungthar a kai a pawimawh thu leh hmei atan hian Mizoram Education Service (MES) neih thuai a pawimawh thu a sawi a. “MES nei turin chak takin hma kan la chho mek a ni,” a ti a. Mizoramah zirna siamthat kawnga ‘pek leh lak’ (give and take) neih a tul thu leh hemi chungchangah hian Education Deptt. hnuaia thawktu zawng zawngte leh pawl hrang hrang ten, mahni leh pawl hmakhua chauh ngaituah lova, engtinnge Mizoram pumin a thatpuia ramin zirna lamah a hmasawn tura ke a pen chhoh theih ang tih ngaituah a tul tih a sawi.

Joseph Lalhimpuia hian May ni 30 khan Chaltlang High School-a ‘State Level Science, Mathematics & Environment Exhibition 2013-14’ kharna inkhawm a hmanpuinaah heng thu hi sawiin, Exhibition-a titha te hnenah lawmman a sem nghal a ni.

.34th State Level Science, Mathematics & Environment Exhibition 2013 – 14 ah hian Mizoram khaw hrang hrang atangin Higher Secondary School 4 leh High School 14 atang tein zirlai 58 telin model 58 an siamte an phochhuak a. Hengte hi mithiam 3 in endikin a pumpuia sikul titha ber chu St John’s HSS, Kolasib an ni a, St. Paul’s HSS, Aizawl chu pahnihna niin Govt. Mizo HSS, Aizawl chu pathumna an ni. Heng bakah hian mimala tithate hnenah lawmman sem a ni bawk. Exhibition-a phochhuah 58 te hi a chanchin kimchang nen SCERT chuan NCERT ah an thawn thla dawn a, hemi atang hian NCERT lamin National Level-a tel tur an lo thlang dawn a ni.

Facebooktwittergoogle_plusredditpinterestlinkedinmail

Mitthi kuang 63 hlan

Aizawl ; Industries Minister H Rohluna chuan Kolasib Sub-Hqrs YMA huamchhung khaw hrang hrang leh Guwahati, Shillong leh Silchar Mizo Welfare-te hman tur Mau atanga mawi taka siam mitthi kuang 63 (Ready to assemble Coffin) chu Ceeke Bamboo & Wood Products Factory, Thingdawl atangin a hmangtu turte hnenah Zirtawpni khan a hlan.

Kuang tehi National Mission on Bamboo Application (NMBA) ten a siamna tur pawisa tumin Factory neitu Lalthan puia, Managing Director, Ceeke Bamboo hnenah an hlan a. Tun tumah hian kuang 63 pek chhuah phawt a ni a, zavaia an sanction zat chu kuang 250 siamna tur niin, hemi atan hian NMBA chuan cheng nuai 165 a sanction a, kuang dang hi nakina la sem chhuah leh tur a ni.

Industries Minister H Rohluna chuan, “Loan latu tamtakin ba kan rulh duh loh thin avangin Financial Institution te pawh ‘ba thing institution’ ah kan chantir a, hei hi kan tu leh fate hmalakna tur kawng daltu a nih avangin a pawi hle a ni,” a ti a. Mizoramah thing zai tur a van tawh avang leh sik leh sa pawh a danglam nasat tawh thu sawiin, thing tipuitling tura kum 20 dawn a ngaih laiin mau chu kum 4-ah a puitlin theih avangin Mizoram tihring tur leh sum hnar ni bawk mau chin an uar a tul tih a sawi bawk.

Congress Ministry hmasa zawkah kum hnih chhung mau thawnchhuah khap a nih thu leh central lam nawrna nasa tak leh Cachar Paper Mill ngei pawh khar mai tul hiala a lan avangin he khapna hi sut leh a nih thu a sawi bawk.

Kum 2008 tawplam atangin mau hmanga thil siamin bul a tan a. Transformer vawi hnih tekin a denchhiatsak a. Bamboo mat, Dap-Board,Jute Board,Eco smat board leh Teak faced Board te a siam.

Facebooktwittergoogle_plusredditpinterestlinkedinmail

Hawla thusawi inhmeh lo – MNYF

Aizawl; MNF Thalai chuan Chief Minister Lal Thanhawla’n, “Central-ah Congress sorkar aiin party dang kaihhruai sorkar hrawn an nuam zawk,” tia Chief Minister tum 5 ni tawh leh MPCC President in a sawi chu inhmehlo an ti hle tih an sawi.

Nimina thuchhuah an siamah MNYF chuan kum 2008 MLA inthlan dawn a PM Man Mohan Singh, Congress President, Sonia Ghandhi leh Rahul Ghandi te’n Mizo mipuite hmaa Prime Minister Special Package pek min rawn tiam avang leh, an intiamna te a nawrchhuak thei lova Plan fund atanga NLUP a sem vangin Pu hawla hi AICC leh UPA sorkar lakah lungawi lohna nasa tak a lo pu ru reng tawh em ni? tih hi kan zawhna a ni, an ti a. Prime Minister kal chhuak ta, Manmohan Singh-a diriamna thu chhakchhuak a, “Mi thiam ngawi reng,” a ti duh te, “Central-ah Congress-in thuneihna a changlo chu Mizoram Congress tan thatna a awm zawk ang,” a han ti te leh, “Central-ah Congress sorkar aiin Congress ni lo sorkar hrawn an nawm zawk thu chu AICC president, Sonia Gandhi bulah pawh ka sawi ngam,” a ti chu a puitlin loh thlak nia an ngaih thu MNF Thalai Press Release chuan a tarlang a ni.

Facebooktwittergoogle_plusredditpinterestlinkedinmail

RS inthlang hnai

Aizawl; Mizoram in Rajya Sabha MP a neih chhun hmunruak hnawh khah nan June 19,2014 (Ningani) khian vote thlak a ni dawn. Election Commission of India chuan Rajya Sabha inthlan lo awm tura Returning Officer atan Assembly Secretary Ngurthanzuala leh Asst. RO atan Assembly a Addl. Secretary SR Zokhuma te a ruat a ni.

Election Commission ruahman dan chuan inthlan hriattirna (notification) hi June 2 ah chhuah a ni ang a, chuh tumte tan June 9 thleng hming pekluh theih a ni ang a, hming pekluh te hi June 10 ah endikin inhnukdawk duh tan June 12 thleng hun hun a ni leh dawn a. Inthlan a ngai anih chuan June 19,2014 ah MLA ten MP tur hi an thlang dawn a ni.

Tuna Mizoram in Rajya Sabha MP a neih mek Pu Lalhmingliana term hi July 18,2014 ah a tawp dawn a ni.

Facebooktwittergoogle_plusredditpinterestlinkedinmail

Truck hmangin buhfai thiar dawn

Aizawl ;Supply Minister John Rotluangliana chuan kumin October thla atang chuan Bairabi Rel kawng zauh hna thawh tan a nih dawn avangin, hemi chhung zawng hian Truck hmangin phai atanga buhfai thiarluh a ngaih dawn tih a sawi.

Supply leh Transport changtu Minister John Rotluangliana chuan nimin zing khan Lawngtlai-a DCSO Office, Supply Department Godown leh District Transport Office te a tlawh a. Food Corporation of India (FCI) chuan Rel kawng siam chhunga buhfai phurh dan turah hian ruahmanna fel tak an siam a tul tih a sawi a. FCI chu central sorkar ta ni mahse, Mizoram mipuite ei tur chhawp hnaihsaktu an nih avangin ngaihthah ngawt theih an ni lo tiin helai hmuna FCI kudam a tlawh bawk.

Lawngtlai Supply Deptt. Godown luhna kawng leh buhfai hlan thlakna lai chhe zualte chu siam nghal dan ngaihtuah a nih tur thu a sawi a. Lawngtlai-a Supply kumdamah hian buhfai Quintals 9000 vel a dah theih a, tunah hian Quintals 2600 chhekkhawl sa a awm mek a, furpui lo thleng tur atan a thlaphan awmloh thu a thawktuten Minister hi an lo hrilh niin nimina sorkar thuchhuah chuan a tarlang.

Lawngtlai FCI kudamah hian buhfai Quintals 34,500 a dahkhawl theih a, tun dinhmunah Quintals 9,000 awmin hei hi a tha tawk hle tih kudam enkawltute chuan Minister hi an hrilh bawk.

Facebooktwittergoogle_plusredditpinterestlinkedinmail

Doctor hriattir

Sorkar thuchhuah tarlan danin, Health & Family Welfare Deptt. hnuaia Medical Officer 3(f) of MPSC Regulation, 1994 hmanga lak te, May ni 31, 2014 thlenga Medical Officer-a a ngheta lakna tur ruahmanna a la fel hman loh avangin, Medical Officer 3(f) te hi thil tihfel hma chuan an thawhna hmun theuhah thawk chhunzawm zel rih turin Health Deptt. changtu Principal Secretary chuan a hriattir.

Facebooktwittergoogle_plusredditpinterestlinkedinmail

MOA hruaitu thar

Zirtawpni chawhnu dar 3 khan I&PR Auditorium ah Mizoram Olympic Association chuan khawmpui neiin heng mite hi kum 2013-2017 chhunga MOA hruaitu atan an thlang. President Lal Thanhawla (Boxing), Senior Vice President Zodintluanga (Tennis), Vice President Zoliana Royte (Table Tennis), Secretary General Laltlanthanga (Judo), Treasurer Dr. Lalrinawma Hnamte (Basketball), Joint Secretary K.Biakthianghlima (Fencing).

Facebooktwittergoogle_plusredditpinterestlinkedinmail

Login

Lost your password?