Monthly Archives: May 2014

Centenary

North Vanlaiphai khua chuan June ni 3, 2014 khian an khaw damdawi In kum 100 tlin ruai nen ropui takin an lawm dawn a, Chief Minisiter Lal Thanhawla bakah Health Minister Lalthanzara leh bialtu MLA, Vanlalawmpuii Chawngthu ten an hmanpui ang.

Facebooktwittergoogle_plusredditpinterestlinkedinmail

Bye-Election

State Election Commission buatsaihin Chakma/Lai/Mara Autonomous District Council-a MDC Bye-Election chu June ni 4, 2014 hian neih a ni dawn a, zing dar 7 atanga tlai dar 5 inkarah vote thlak a ni ang a, vote hi June ni 6, 2014-ah chhiar a ni ang.

Facebooktwittergoogle_plusredditpinterestlinkedinmail

Environment Day

June ni 5, 2014 khi World Environment Day a ni a, hemi ni chawhma dar 11 hian Assembly Annexe, Treasury Square-ah Environment & Forest Deptt. chuan inkhawm an buatsaih dawn a, Environment Music Video Album tlangzarh nghal a ni ang.

Facebooktwittergoogle_plusredditpinterestlinkedinmail

Legal Adoption

State Adoption Resource Agency (SARA) chuan June ni 4, 2014 chhun dar 12 khian I&PR Auditorium, Aizawlah chanchinbumite pualin fa lak (Adoption) chungchang inzirtirna neih a ni dawn a. SARA hi dan dik taka fa lak (Adoption) chungchanga hma latu ber a ni.

Facebooktwittergoogle_plusredditpinterestlinkedinmail

Mi Larte leh SUICIDE : Engtin nge an sawi?

Tunlai mahni inthar tam lutuk hi ka vei em em a, ka thauah te min man hial a ni. Mahni intihlum duh khawp awm chu an tuar nasa hle a ni tih a hriat mai a; mahse, ka ngaihdanah chuan harsatna paltlang ngam lo khawpa mahni inhmangaih lutuk leh mi dawihzep takah ka ngai a ni. Harsatna, manganna, rilru natna tam tak kei ngei paw’n ka tawng fo tawh. Thih daih chakna pawh ka nei fo! Mahse, kha ka harsatna atang khan thinlung leh tih tak zetin Pathian ka bel a. Ama’n min chhawk zangkhai thin.
Ka thalai puite u, i intihhlum chuan i kalna tur kha ngaihtuah rawh! Chatuan hremhmunah inhnuklut lul suh. Engang natna pawh tawk la, Setana paw’n intihlum turin thlem che mah se, Lalpa chauh en la, tawngtai la, a chhawng zangkhai ang che. Tin, Setana hi bum let ang u! Intihlum turin a thlem che paw’n hrui la la, intihlum tur ang takin awm la. Setana chu nui vur vur tawh anga. Mahse, Setana kha vau la, i mi bum tumna hi tihhlawhtlinin a awm dawn lo ti la, intihhlum i tumna kha paih hmak la, Bible chhiar la, tawngtai hnan la, Lal Isua hmingin hau let hmak rawh!
— Hlutei

Kawng bumboh tak tak hi ka hmachhawn nasa lutuk. Mahse, intihhlum ka tum ngai lo. Depression ka neih pawh keimahin ka sual chhuak thei. Engvangin nge i theih loh bik ang?
Intihlum ho hi ka demna a ni lo. Mahse, ringtu kan nih chuan kan tihloh tur hulhual a ni si a. Mizoram hian Lalpa hi tihtak zeta kan auh a ngai tawh a ni. Kan nun hlu tak hi mi tana malsawmna’n hman i tum tlat ang u. A hunah chuan Pathianin a angchhung nuamah min la hruai dawn tho alawm. I harsatna kha huaisen takin paltlang la, hneh tum tlat ang che.
— Manuni

Tunlai hian Mziote zingah a bikin thalaiah mahni intihhlum na hi a hluar em em a, he thil hian ka rilru a ti na takzet a. Thil pakhat ka sawi duh chu, kei ngei pawh hian rilru hah leh hrehawma ka awma dam thlakhlelh loh changte pawh ka nei ve thin a. Mahse, thalaite u, heihi ka sawi duh. Harsatna leh hrehawm ngawih ngawih, dam thlakhlelh loh chang i nei a nih paw’n maw, fight rawh! Sual hian min tih beidawn a, a duhdan taka min sawisak hi a duh a, mahse, chu chu i hneh thei tih chiang takin hria la ka duh. Heihi ka hneh tur a ni tih rilru pu chungin, Pathian chakna ringin bei la, he harsatna hi i hneh theih ngei ka ring a. He thil laka inthiar fihlim tur hian ka thalai puite theihtawp chhuah turin ka chah ngawih ngawih che u a ni.
— H. Lalchhanchhuaha

Kan hriat leh kan hmuh angin, tunlai kan khawvel a chhe tawh hle a. A bikin thalaiteah rilru beidawng avanga mahni intihlum (suicide) kan tam ta telh telh hriat hian rilru a ti thlabarin, a ti hrehawm takzet a.

Kei ngei pawh hian engmah chu nilo mah ila, hetianga mahni nunna la duh khawpa beidawnna nei hi puih theih ka chak takzet. Pathian chakna ringin puih hi ka inhuam reng tih ka sawi duh bawk a ni. Pathianin mihringte nunna hlu tak min pek hi chiang takin hria se tih hi ka va duh em!
Tin, a berah chuan anmahni hi demawmin lang thin mah se, nu leh pa leh chhungkua hi an pawimawh hmasa hle a. Piantharna diktak an nuna tuh hi an mawhphurhna a va ni teh lul em tih hi ka sawi daih duh a ni. Fate’n an harsatna leh rilru manganna thlen ngam tur khawpa an rilru an lo tihzaua, an kawm ngeih hi kawng pawimawh tak pakhat a ni.

Thalaite paw’n harsatna leh beidawnna tak tak kan neih a, nu leh pa te leh chhungte hnenah kan hrilh hreh/ngam lo a nih paw’n councelling center tha tak tak a awm bakah pastor emaw, kohhran upa te kan mi rin berte hi i pan hreh lo ila. Rilru fim tak nen Pathianin nunna hlu tak a fapa Isua Krista kaltlanga min pek hi ngaihtuah ila. Tunhnaia thihna rapthlak tak tak kan tawn atang hian thalaite ngun takin rilru fim tak nen inngaihtuah ila, i thangharh hram teh ang u!
— Bethsy

Kan Zoram tunlai khawvel hi, The Beatles hla ‘This World Is Full Of Lonely People’ a tih ang mai kha kan lo ni ve ta a. Buai em em si, chhungril khawhar em em lawi si hunah kan cheng a, hei hian ‘unhealthy relationship’ thlengin a bik takin thalai leh lai lo te pawh a hnuk lut a. Tu emaw kawp loa awm thiam lo, tu emaw text loa khawhar leh mal ngawih ngawiha inhria an pung a. Kha relationship a lo ‘break’ palh leh si khan chhe ta vek angin an in ‘feel’, inhriattir ti a dam pawh a peih loh tir a, mi tam takin suicide thinlung hial an put phah ta niin a lang a. Chu chauh a la ni lo, khawhar hnemna’n damdawi khawih chingte an awm hi a pawi a. Inhnemna an tih hi an hre sual a ni.

Chuvangin, ngaihzawng emaw, innei te pawh emaw hi ‘zawng-zawng; pe loin mahni tana mahni reserve chin neih ve ve thiam a, inhriatthiam tawn hi zir a tul ta hle a ni.

Tin, tunlai thalai tam tak hi hauh an haw lutuk hi insiamthat an ngai. Nu leh pa, chhungte zilh leh hauh an la na lutuk a. Inrunluihna ni awm taka langa inthat ta an awm nual. Nu leh pa leh hmangaihtu ten an zilh lohin tuin nge maw zilh ang le aw tih te pawh an ngaihtuah thiam a tul.
Mahni inthat te hi mi thenkhatin ‘An huai mang e’ an ti a, inthat ngam tur khawpin an huai chu a ni ngei ang. ‘An dawihzep’ ti pawh ni ila a dik tho. Dama khawvel hmachhawn an ngam lo a a dawih thlak bawk tho. A enga pawh nise, hringnun hi kawng engkima fight ngai a ni a, ‘mistakes’ kan lo siam palh pheng phung anih pawhin midang kan ngaidam thin ang bawkin mahni leh mahni pawh inngaidam ila, huaisen takin nun bul tan thar ngam zel ila, rilru hrisel pu zelin.

Ngaihzawng uar lutuk leh damdawi leh ruihtheih thil ti ho hian emotional imbalance a thlen a, suicidal tendency neih a ti awlsam em em mai.
— C. Luri

Harsatna tawk lo mihring kan awm lo a, mahse, kan hmachhawn a zir pawh a ni thei. Mihring nuna thil hlauhawm ber chu beidawnna a ni.
Keima ngaihdan chuan Pathianin harsatna min pek chuan a sual chhuah dan kawng min pe tel ngei ngei thin. Kan zawh loh tur harsatna min thlen lo.

Keipaw’n harsatna ka lo tawk ve tawh thin. Mihring atang chuan beiseina neih a har thin. Puitu leh lamtang tumah ka nei lo emaw intih chang ka nei fo. Mahse, engtiklaimaha min ensan ngailotu Pathianin min tanpui thin. Chuvanginin ka thalai puite ka chah ve duh mai mai chu, sual kan tih pawha beidawnsan mai loa, Pathianin min ngaidam duh a ni tih hriaa, a thim zawnga thlir loin min ngaidam theitu Pathian hnenah intukluh nachang hria ila, kan harsatna te min sut kian sak thei a ni tih hria ang u. Chuan, engkim hi a bul leh tawpna chu Pathian a ni.
— DJ LALVENHIMI

Ka thalai puite’n an nun beidawn avang leh beiseina leh damchhan nei tawh loa an inhriatna avanga an nunna hial an inlak ta mai hi ma ka tii, ka rilru a tinain min ti hrilhhai hle a ni.

He khawvelah hian chhan neiloin Pathianin tumah min siam ka ring lo. Ka thalaipui duhtakte’n hei hi lo hria se ka ti.
Hringnunah hian a hlim reng theihloh. I hlim a i nui anih chuan i lungngaihna in a hmuak che tihna a ni. Chumi tawn thiam a, patlang thiam tur chuan chakna i neih a ngai. Chu chakna pe thei tu che awmchun chu Pathian a ni. Tin, i chhungte leh i thiantha te, i hlimni berin Pathian ilo theihnghilh a ni thei a. Amaherawh chu, i lungngaih ni ber pawha theihnghilh ngai lo tu che Pathian a awm a ni tih hria la ka duh. Amah chu au la, a ni’n a lo chhang ang che.

Thil kan ngaihtuah ngut ngut a, a thim zawng hlirin engkim mai kan han thlir hi chuan he khawvelah hian lungawina reng reng a lo awm lo. Khawvel chu a kal ngaiin a kal reng dawn a ni. Chutah chuan, ka thalai pui te’n, in hriat atana ka duh chu. I nunna kha a hlu a, midangte nun chhanhimtu i ni thei, midang tana malsawmna i ni thei lo anih chuan midangte nun ti hrehawm tu ni lo hram ang che. I tawngkam hote avangin miin damchhan neiloin an inhriat phah thei. Tin,. i tawngkamhote khan midang nunna a chhanhim thei bawk.

Tunlai thil thleng hluat tak suicide chungchang hi ka bei a, engvanga hetia lo hluar ta nge a nih a, kan thalai puite’n mahni nunna chiang taka an tawp tir duh? A mak ka tiin rilru an ti na a ni. Suicide chungchangah hian nasa lehzualin awareness hi kan neih a ngai ta niin a lang.
— SANGTEI KHUPTONG

Harsatna kan tawh hian Pathian hnaih hi a harsa em em a, tawngtai te pawh a harsa, mahse, chu chu kan mamawh ber a ni thung si. Thil reng reng hi a eng zawng hlir chuan harsatna tam tak kan pumpelh thei bawk a ni. Pathian kan hnaih a, Biak Ina kal tamte, tawngtai tam te hi kan harsatna min phuhrutu ber a ni.
— GRACE LALCHHANHIMI

 

Facebooktwittergoogle_plusredditpinterestlinkedinmail

Doctor Ka Zawhna (June 1, 2014)

Zawhna: Hmeichhia kum 30 mi ka ni a, mipat hmeichhiatna a inhnamhnawih ngai lo ka ni. December thla atang khan ka thi neih a tawp daih a, keimah hi ka khua a sik reng bawk a, ka chau ngawih ngawih bawk a, eng tia in enkawl chi nge ni ang?

CHHANNA : I insawi dan atangin pasal i la nei lova, i la virgin bawk anih hmel a. December hma hian thi i nei pangngai turah a ngaih theih bawk a, chuti a nih chuan “Secondary Amenorrhea” i nei (thi neih pangngai hnua hul leh, rai vang ni lovin) tihna a ni thei. Amaherawhchu standard guideline an hmanah hian period vawi 3-6 miss hnuah an ti deuh kher a. Vawi nga chu i miss tawh angah a ngaih theih.

Secondary amenorrhea hi a chhan hrang hrang awm thei zingah Hormones lam fel lo hi a common deuh ber a, chi insiam fel loh vanga awm te, thyroid hormone chak lutuk (overactive) vang te, nau neih invenna ei vangtein a awm thei a ni. A dang lehah chuan chi bawm (ovaries) ah tui pai bawk (cysts) insiam vak, Polycystic Ovary Syndrome vangin a awm fo bawk.

Lifestyle factors an tih mai, thau/rih lutuk vang te (overweight), intihcher tumna lama rihna tlahniam chak lutuk vang te, rilru hah, hnathawk hah lutuk vang te, zin nasat vang te thlengin a awm thei bawk. Chau ngawih ngawih i rawn sawi tel hi eng nge a chhan tih hriat a tha hle. Kan tarlan tak rilru hah, taksa hah, zan mut that theih loh te vang a nih chuan chu lam chu enkawl a ngai ngei ang.

A dang leh ah chuan infection engemaw tak vangin a awm thei bawk a. I khua a sik tel avang hian infection engemaw tak i nei ani thei. Chung zingah chuan TB te hi a common ang reng viau. Sex hman vang ni lovin chhul leh a bul bawr hi infection a awm ve fo thei a, chu chu Reproductive Tract Infection (RTI) an ti a, hygiene lam ngaihthah vang te pawhin a awm thei bawk a ni.

In enkawl tur chuan infection i nei nge nei lo (zun test leh culture) hriat a tul thei a. Tin, i chhul leh chi bawm lamah fel lo a awm nge awm lo hriat nan Ultrasonography i tih ngei pawh a ngai ang. Thisen lam test ah chuan Thyroid function test pawh i tih tel a tha a. Nitin khawsak phung lamah thlak danglam ngai, zan mut tam te, thau lutuk tan ei leh in lam fimkhur leh exercise lak regular te a pawimawh hle bawk ang.

Facebooktwittergoogle_plusredditpinterestlinkedinmail

Thu Khawchang : PM Modi leh hmarchhak bial

Kum 2008 MLA inthlanah khan ram hmasawnna thupui a nei, hlemhletna tihbo tum, mi retheiten lei rem an rah theihna tura hmalak intiam Congress party hneh taka thlantlin an ni a. Chumi hma lawk chuan US president inthlannaah pawh campaign auhlaa kalphung thar (change) hmang Barack Obama thlantlin a ni bawk. Chutiang tho chuan tun hnai deuha India ram state dang inthlannaah pawh development aupuitu leh hlemhletna do ngam tura ngaihten mipui an hip ber zel thin. Hmanni lawka India ram inthlanpui zawh fel taka hneh taka tling Pu Narendra Modi leh a thuihruai BJP/NDA pawh hi an campaign auhla ber chu ram hmasawnna (development) bawk a ni.

Modi hian khawpui lian leh hmun kilkhawr ber bera a campaign pawhin development hi thupui berah a nei zel a, chu chu mipuiin an tuipui tih a hria a, kum 10 kal ta chhunga Gujarat hmasawnna chakzia hmutu India mipui hriatthiam theih tur zawnga sawi dan a thiam bakah corruption leh thil dang hmangin UPA sorkar leh Congress hruaitute a bei reng bawk. Tha thlah miah loa thla 9 kal ta chhunga Narendra Modi-a’n India ram dung leh vang suar tluana a veivah thui zawng hi km 300,000 zet a tling a (hemi chhunga Rahul Gandhi zin kual thui zawng chu Km 118,000 a ni thung). Mipui pungkhawm hmaa thusawi bakah India mipui hip turin hmanraw awm thei zawng zawng a hmang a tih theih hial, hmai chhana a thusawi ngaithla pha lote tan TV leh chanchinbua advertisement bakah digital/social media hrang hrang – 3D hologram, callertune, SMS, facebook, twitter leh youtube te a hmang nasa hle a. Nikum September atanga a thusawi ngaithlatu (TV leh radio tiam loin) hi maktaduai 234 an tling a chhut a ni a. Chutihlaiin, Rahul Gandhi thusawi ngaithlatu chu maktaduai 13.3 vel an ni thung. Tun tum inthlan hi India history-a digital & social media hmanga campaign nasat ber tum a ni a, a hmang uar ber pawh Narendra Modi hi a ni.

US President inthlana candidate-te campaign beihpuithlak ang chiaha hmun hrang hranga zin kuala a beih chiam avangin political analyst-te chuan tun tumah hian Modi hian inthlan campaign kalphung a thlak danglam dawrh niin an sawi hial a ni. Thusawi a thiam bakah tute emaw ang lo takin a sawina hmun leh a ngaithlatute azirin sawi dan a thiam a, mipuiin an tuipui theih tur zawnga a sawi thiam bawk a, hmarchhak bialah pawh Modi thli a tleh tih loh rual a ni lo. Meghalaya MP P.A. Sangma’n, “Tun inthlanah hian a vawi khatna atan hmarchhak bial mipuiten NDA hi pawm ve ta tih a lang,” a ti hial a ni.

Chuvangin, hmarchhaka chengte tan hian sorkar tharah hian beisei a sang dawn tih a chiang reng a. Helai bial hmasawnna buaipui tur tur liau liaua din Ministry of Development of North Eastern Region (DoNER) changtu Retd Gen. V.K.Singh hi politics-ah mi thar a ni a, Minister of State niin External Affairs Minister Sushma Swaraj a pui tel dawn bawk. Sushma Swaraj hi hmarchhak bial hre ve thawkhat tura ngaih a ni a, Mizoram Governor hlui Swaraj Kaushal nupui a ni a. Santosh Trophy-a Mizoram team an champion tum khan twitter-ah Mizo tawng ngeiin lawmpuina thu a ziak nghe nghe a nih kha. Hmarchhak bial state hrang hrangte hi India ram aia ram dang nena inhnaih zawk vek kan nih avangin sipaia a tan laia hmarchhak a lo awm hrep tawh, DONER Minister hian External Affairs a kawp tel hi a fuh phianin political analyst-te chuan an ngai nghe nghe.
Chumai bakah Home Affairs puitu, Minister of State Kiren Rijiju hi Arunachal Pradesh M.P. a ni leh zel a. Hei pawh hi inthlan campaign laia Modi-a thusawi thin bawhzuina anga ngaih a ni. Hmarchhak biala chengte hian Bangladesh atanga dan loa lo pem lutte vangin harsatna kan tawk vek a. Chumi hre chiangtu tur hmarchhak pa ngei Home Ministry pui tura ruat a ni hi thil lawmawm tak a ni awm e. Chubakah, Delhi leh khawpui dangah hmarchhak miten hmuhsitna leh tihduhdahna an tawk fo thin a, Home Minister, hmarchhakpa ngei hi a tul anga hmala theitu a ni dawn ta tihna a ni bawk. Ningani kal ta khan Home Minister Rajnat Singh chuan a hnuaia official-te hnenah hmarchhak atanga lokal India ram khawpui hrang hranga chengte himna ngai pawimawh tur leh engti zawng pawha an himna atana hmala turin a hrilh nghe nghe.

Sawi tawh angin development tuipui em em mai Prime Minister kan neih avangin DoNER kalphung pawh hi eng emaw chen chu siam that a nih ngei a rinawm. An lo kalpui tawh thin dan han en hi chuan hmarchhak bial hmasawnna tak tak a thlen thei meuh dawnin a lang lo, hmalakna lian tham railways leh infrastructure lama national project 10 tuna an kalpui mekte pawh hian harsatna nasa tak a tawk vek hlawm. Chutiang a nih avang chuan Second Administrative Reforms Commission (ARC) phei chuan tlem lai deuh khan DoNER hi nuai bo a, a hmalakna hi Ministry of Home Affairs kuta hlan a rawt hial a ni. Hmarchhak state hrang hrangten hmasawnna tura kan innghahna bulpui ber, DoNER hi chutiang vel chu a nih mek laiin Minister thar hnuaiah kalphung thar leh awmze nei zawk i beisei phawt ang.

A tawpna atan chuan Prime Minister thar hian campaign-a a sawi ang khan hmarchhak bial hi a ngaihsak zui ang em tih rei lo teah a lang thuai dawn a ni. Rajiv Gandhi hnua Prime Minister zingah inthlan campaign ni loa Mizoram rawn tlawhtu awm chhun chu kum khat tling lo Prime Minister lo ni ve zuai pahnih, Deve Gowda leh I.K.Gujral te kha an ni. An hun chhung rei lo tea vawi khat ve ve an lo zin kha kan hlawkpui em em lehnghal a. Narendra Modi pawh hi kan dinhmun dik tak hre turin a lo la zin ve turah ngai ila. Engpawh nise, kan sorkar hian ram hmasawnna tak tak ngaihtuah chunga sorkar laipui a dawr thiam chuan sorkar thar hi Mizoram tan malsawmna a ni thei turah ngai ila. Prime Minister lak luhnaa Congress party Chief Minister dangte leh an hruaitu lawk hote an tel duh loh laia zu tel vang vang Chief Minister, India politician zingah pawh a tlo ber pawl ni bawk kan neih avangin kan hmabak a thim lo turah ngai ila. Kan CM hian mi mal tak paw’n a fak viau niin an sawi nghe nghe. Hindu firfiak pawla lo tel hrep tawh RSS hoin an thlawp tlat PM NaMo hnuaiah hian kan sakhua leh kan hnam a himna zel a pawimawh ber a, chumi vawng nung zel chunga hmasawnna kan dawn theih i beisei phawt ang.

– Lalthlamuana Ralte

Facebooktwittergoogle_plusredditpinterestlinkedinmail

INTHAH I DUH MAW? LO NGAWI LAWK TEH…

A mak lo. I phur kha a rit em a, i zo lo a nih kha. Zak suh. I nep vang leh i chak loh bik vang a ni lo. Kan dem lo che. A tuartu kan ni ve lova, a natzia kan hriatthiampui mai lo che alawm. Hriatthiam che kan duh a, ngaihthlak che kan inpeih a, puih i ngaia i duh anih phawt chuan pui theitu che an awm asin.

Engmah sawi lo leh tumah hrilh lova i thih daihte chuan tuman kan hrethiam dawn hleinem che. I thih chhan kan inrinsiak ang a, ngaihtuahna tha lo pui pui kan nei ang a, mawi lo deuh deuhin kan hisap ang a. Demtu che an awm ang a, tuar ve atana i duh lohte khan rilru na takin an tuar dawn asin. I chhungte vangah an ngai ang a, thiam lohna nei miah lo chu kan hmu khaw lo zo ang a. A thenin i bialnu / bialpa vangah an ngai ang a, a then phei chuan sawn i thlak vang emaw, sawn i pai vang emaw an ti ang a, ‘nau an titla a’ te an tizui mai thei che u asin. Chu, mak deuh deuhin, dik lo pui puiin, mawi lo deuh deuhin an sawi dawn che asin! A chhan tal hriat a va tha ve.

I phur a rit a, i tawrh hi a na a, i chau hle ang tih kan ring. I hah em a ni tiraw? Hahchawlh i duh a ni lawm ni? Hahchawlhna hrethiam tur chuan nun a ngai asin! I thih daihte chuan engtinnge hahdamna chu i hriatthiam theih si ang?

I rilru a na tiraw? Rilru hahdam i duh a ni lawm ni? Rilru na lova awm i duh a ni lawm ni? I thih daihte chuan engtinnge rilru hahdamna pawh chu i hriat ang?

I bialnu / bialpa kha i hmangaih a ni lawm ni? A duh tawh lo chein i hria a, dam chhan tur i nei tawh lo maw? Dam chhan tur dang a va tam si ve, han ngaihtuah zau deuh teh! I hmangaihna chuan mahni hma a va sial awm ve?! Kan hmangaihte hlim taka an leng lai hmuhte hi hmangaihtu dik tan chuan hmuh a nuam asin! Chumi hmu thei tur chuan dam a ngai alawm.

Mamawhtu leh hmangaihtu che an awm lovin i hria em ni? Han thlir kual teh. Mi zawng zawng hian an hmangaih hauh lo che tih chu ka pawmpui che, a theih loh. Mahse nangmah mamawhtu leh hmangaihtu, i thih aia thih duh zawk hial tur, i thih aia i nuna lawm leh hlim em em tur an tam asin. I nu leh pa leh unau te, i thiante, i ngaihzawngte kha… Fa i nei tawh em? I fate tan khan khawvela an pa /nu neihchhun i ni asin, i va hlu si em! I thiha an lawm zawk i ring maw? Han zawt teh! Engahnge i zawh ngam loh? Thutawp siam hma hian thil hi chian kelh law law ila, a huaisen thlak alawm.

En teh, ni a lo chhuak a, thli fim a lo thaw a, vanah chhum a leng delh delh mai. A va mawi em. Khai a, ruah a lo sur ta, ni leh ruah an indona kara chhimbal zam kual nalh em em mai saw i hmu em? Dam man a va awm em!

Han thlir kual teh, hlimna tur a va tam em! I nuna thil pakhat a buai avang khan engkim a buai zo ta vek a ni hleinem. I rilru hahna thil chauh i ngaihtuah a nih kha. Mithiamte chuan, “Kan damchhung nunah hian 90% vel hi chu duhthusamin a kal a, 10% vel hi chu a buai ve thin,” an ti chauh asin. 10% lek chu i thihpui zawk ang maw? Hawh teh, 90% avang zawk chuan i dam dun zel zawk teh ang. Khawvela awm kan ni a, tlem azawng buaina han tawh hi chu a awm lo thei lo tih hi i pawm mai mai teh ang.

Nunna kha nangma inpek em ni? A petu pawh kha a zahawm alawm maw le. Han be phawt teh. Nunna a pek che kha tihtawp mai i duh tih han hrilh teh. A phalna la hmasa lote chuan maw le.. Kha, a ngawih reng kha. Engmah sawi lovin thil a hrilh teuh che a nih kha. I hrethiam lo maw? Lo kal teh, ka lo hrilhfiah ang che.

Lo ngawi lawk teh. Han nghak hrih lawk teh. Tuna tih vut vut nghal kher a ngai hleinem! Darkar 24 han nghak leh hram la, kar khat tal han nghak leh phawt teh. Thihna hi chu a tawpna a nih avangin a hmanhmawh thlak loh reng reng. Thil zawng zawnga beidawn hnu, kawng dang pakhatmah a awm tawh loh hnuah, nunna hian a tlin tawh ngang loh chuan kan thi tho tho. Chutih hunah chuan chelh tum teh mah ila, a ngaihna a awm chuang lo. Chumi hun chu hlim deuhin i nghak mai mai zawk ang aw!

Nangmah ang hi khawvelah tumah dang an awm lo a nia aw! Thil vang hi a hlu tih i hria em? I hlu teh mai a nia! Nangmah la mamawh ngawih ngawih hi an awm ngei ang. Tanpui duhtu che an awm asin. Zak lovin zawng la, pan rawh.

 

Facebooktwittergoogle_plusredditpinterestlinkedinmail

Ka Huang (June 1, 2014)

Mahni huang e ti lovin tu tu te’n emaw an hriat châk zawng chhuah turin min rawn ngen si a, tun tum chu CHAWNGKHUM DAN TLANG HUAT LOH tiin thu zangkhai lam ka’n chawhchawrawi teh poh a ni ang che.

1. Kan ni Rualkhumi, Venghnuai khan tawng dan lamdang tak a nei ve tlat mai a. “Pasena te inah ka han leng a, a nupui Chawntuahi’n thingpui min lo pe a, AN NO-IN,” zu ti kher thin a.

2. Thawhlehni sawrkhar chawlh a nih avangin U Lalropuia (LDC, DC Office) khan Thawhtannia office ban atangin, a tuk chawlh alawm tiin zu a in vak mai a, a in tam deuh a niang, a tuk office chawlh, Thawhlehni chu a mut bo thak mai a, Nilaini zingah a harh chauh mai a, Thawhlehniah a ngai mai si a, a chawl mai a. A tukah chuan office-ah a va kal a, Head Clerk U Vandailoa khan, “Lala, niminah engati nge i lo office loh?” tiin a’n zawt a. U Lalropuia khan Thawhlehni a mut bo tih hre hek lo MAK ti em emin, “Nimin a awm em ni?” tiin a zawt let heu mai maw le.

3. Tuk khat chu Pu Zatluanga CI kha office a tlai a, Head Clerk chuan, “I lo kal dawn ta lo emaw ni tiin Pu Uisakawta (Wiscot, Khasi SDC) hnenah Attendance Register ka lo putup hman tawh asin,” a ti a, ngawi rengin Pu Zatluanga chu Pu Uisakawta pindanah lutin Attendance Register chu a keu mawlh mawlh a, 10 AM tih a ziak mai a, Uisakawta kha a lo lungni lo nasa mai. “Pu Zatluang, tunah dar 11 engah nge min dil loa i ziak mai, tunah dar 11 pel tawh,” a’n ti a. Pu Zatluanga chuan hmanhmawh lo zet hian, “A! he lehkhabu hi chu dar 10 leh dar 4 bu alawm,” a tihsan a, a dang der zawk mai.

4. Pi Lalsangi pawh – a fapa Dawnga an inchungah a lawn a, a far phah ang tih hlauin chhuk turin a ko a, a duh lo a, a tlan vel a, a thinrim chuan hming lam meuha hauh a’n tum a, a fapa hming chu a theihnghilh ta tlat mai si, vanvadakin thinrim sen teuh chungin, “Masang ka tih a ni si lo,” a ti vak mai nia (Masanga chu a tupa a ni a). Amah chu tlu tawp tawpin a la nui lehnghal.

5. Dr. Thanliana kha District Family Planning Officer a nih lai khan Inrinni hi half holiday-a hman a ni thin kha a nia, Inrinni tum khat chu, mi dang zawng zawng an hawng tawh a, a clerk pakhat Hminga a chhawr a, chawhnu her a nih tawhte pawh chuan a la chhawr ta ngat ngat mai a, Hminga hawn ve châk tawh chuan, “U Than, vawiin chu Inrinni a nia, half holiday a ni sia,” a’n ti dek dek a, U Thana chu MAW? Hminga chuan, “Ni e, hei mi dang pawh an hawn zawh vek tawh hi.” Dr. Thanliana chuan, “Ka awih law,” zuk tia le!!

6. Chhim lam mi, Hauhthang hmingthanga te pafa thum khan tuilian an kân dawn a, an pa ber Hauhthanga chu tuilian chuan a la ta mai, a fate pahnih chuan an dai kai hram a. A naupang zawk chuan, “Ka U, i zuk pui tawh mai ang,” a’n tia, a U chuan, “Khu lai kawi khu han liam zet rawh se,” a ti. An chhan hmain eng tin tin emaw a kai ve ta hram a, a lo chhoha an hnen a rawn thlen chuan engtin mah, engmah sawi chuang loin an hawng ta mai. Ngaihsam ve tak an nih hmel.

7. Mizo District Bawrhsap (Superintendent of Lushai Hills) McDonald kha ICS lai e ti loin lamdanna riau (accentric) a nei roh a. Dr. Thanliana pa, Pu Thanga patea kan tih mai kha chu a ngam ngai miah lo. Lehkha lo lut petuah khan a tang a ni awm a. Lehkha pakhat lo lut hi a dawhkanah chuan a va pharh dek dek a. McDonald-a chuan eng kaw sawi loin chu lehkha chu a tham chuar tawp a, a paih ta mai a, Pu Thanga chuan a chhar a, a khup chhanah chuan a zut mar a, a va dah leh mai a, Bawrhsap chuan Pu Thanga chu a melh khui khui a, lehkha chu a tham chuar leh tawp a, a paih leh mai a, Pu Thanga chuan a hma ang bawkin a chhar a, a zut mar a, a pe leh mai a. Chuti ang chuan tum thum ngawt an ti dun a, a tawpah Bawrhsap chuan, “Ngati nge ka paih i rawn dah leh thin?” a ti a. Ani chuan thate hian, “Ka pu, ka hnathawh chu i hnena lehkha an rawn thawn i hmaa lo dah zel hi a ni a, he lehkha pawh hi Bawrhsap hnena thawn a ni a, engmah i la tih si lo a, ka pe leh thin che a ni, chu chu ka duty alawm,” a ti sam mai a, Bawrhsap chuan lehkha chu enin instruction te a ziak ta nge nge zuk tia!

8. CI, Rahsi tih ang reng kha pa pui tak tak, dik tak tak an awm nuk a ni chawk ang. Kan Pu Suakhnuna pawh khaaa… Bawrhsap (Chaprasi) zawng zawngin office-a an hnathawh diary-ah an ziak vek ang a, thla tin office-ah an thehlut tur a ni tiin. Chungho chu Table Diary a pe vek theuh a. Thla tawpah chuan Bawrhsap chuan a han en a, kan Pu Suakhnuna diary-ah chuan (Table diary a ni tih hriat reng tur) MONDAY zawnah Vawiinah pisa ka kai, a tul apiang ka ti. A hnuaia TUESDAY zawnah ————do————-, A hnuaia WEDNESDAY zawnah ————do————-. Chuti ang chuan Zirtawpni thlengin ————do————-. A kar leh MONDAY zawnah Vawiinah pisa ka kai, a tul apiang ka ti. TUESDAY ————do————-. Chuti ang chuan thla pum chu a lo ziak a. Bawhsap a thinrim a, “Han ko rawh u.” “Rahsi, engati nge i hnathawh i ziah loh?” tiin a hau rawk mai a. Ani chuan, “Ka pu, he lehkha them te takteah hian pachang nileng hnathawh a ziak sen loh,” a ti bur mai a. Bawrhsap chuan, “Eng nge i thawh chu?” a ti rawk mai a. Ani chuan, “Ka hnathawh chu ‘Rahsi, ka pu, Sainghinga ko rawh, ka lo thleng chauh a, Rahsi, Buchhawna ko rawh. Ka lo thleng leh dek dek a, Rahsi, Head Clerk ko rawh. Ka lo thleng chauh a, Rahsi, Dawrpuia Zungtawia (Ram Guti Dutta & Sons (?)) hnenah a bain Grand National Sikret bawm hnih va la rawh. Ka lo thleng leh dek dek a, Rahsi, Bangla-ah kal la, i pi hnena mi thingpui va la rawh, i ti a, thut pawh kan thu hahchawl hman eih hleinem. Chuvangin hetiang zungpui hmet lek lehkhaah hian pachang nileng hnathawh ziak sen rual a ni lo.” Bawrhsap dang lutuk chuan, “He DIARY hi Assam rama diary tha ber a ni, a frame siam ula, pisaah tar rawh u,” a ti tawp mai zuk tia.

9. U Lalropuia (LDC) bawk kha mikhualin dilna a type-tir a, khawl chhut kha a lo thiam ikhaw si lo a, tlar khat emaw chhut hnuah a ngawi ta veng veng mai a. Mikhual chuan, “Ka pu, i zo dawn tawh em?” a’n ti a. U Lala chuan, “Thianpa, F ka hmu zo tlat lo,” zuk tia!!

Facebooktwittergoogle_plusredditpinterestlinkedinmail

Sawhkhawh (June ni 1, 2014)

Zalen-ah hian movie rawn chhuak tur vel tar lan ai chuan thil offer leh sale lam te, hna ruak tih angte hi rawn chhuah theih ni zawk ta sela, a chhiartute tan a manhla zawkin ka ring. – 9612531747

Thaduha, Aizawl inti kha Congress sorkarin class hniamte hnenah pawisa a pe tih i mitin i hmu em? Ka ring lo, i rilrua awm ang ang kha lo sawi ve ringawt suh. Congress vote-tuten an tuar chu ka va ring lo em! I rin dan kha a dik vek kher lo a nia, Congress puhchhiat nan dawt thu thang a tam kha i lo hre ve ang ti raw? – 8414095471

Lalchhuana Renthleiin MNF President Pu Zoramthanga’n EVM chungchanga a thu sawi avanga Open Letter a thawn kha a dikin a tha ka ti. Tun lai thalaite hi kan mawl tawh lo, kan politician-te hian mipui ngaihdan tibuai zawnga thu sawi hi sim rawh se. Kha Open Letter lo huatpuitu chuan dikna an duh lovah ka ngai. ZALEN hian huaisen takin miin thu dik an ziah hi han chhuah zel teh u, kan lo chhiar zel ang. – Lalthawmvunga, Aizawl

Tlawmna nun kan neihna atang lo chuan kan Pathian hi hmuh fiah a har awm mang e! Ringtu nun reng reng han en ila, chapo taka awm hi kei chuan ka hmu miah lo. Tin, ringtu chapo a awm ngai si lo va. Kan Lal Isua lam han en ta ila, thuhnuairawlh leh rilru inngaitlawm tak a ni bawk si a. Dawta sual tinrenga an hek lai pawh khan kan Lal Isua khan kam khat mahin an helna zozaite kha a chhang ve si lo. Nang leh keiin nun kan neih nana Krawsah mualpho takin hrehawm tinreng tuarin a nun a hlan ta zawk a nih kha. Kan Lal Isua tawrhnate chu tawmpui vein a hniakhnung zuitu rinawm tak kan ni ve zawk dawn a ni. – 8415052704

Congress sorkarin keini thingtlang mi rethei leh harsa zawkte politics khelh nan (political ball)-a min hmang hi chu ka rilru a na ve thin. I?harh ve tawh teh ang u. – ZORE FANAI

Pi leh Pu atanga Presbyterian ruhkawl ka ni. Kan Kohhranah hian Kohhran Committee Member leh Sunday School Department hrang hranga zirtirtu, a hmei a pain zu in ru thin ka hre nual asin. Chuvangin, huai takin zu hi thlah zalen mai rawh se. – No. leh hming thup

Zu hi i khap rem chuang lo mai thei e, ti hian ka’n tih te’ng: kan sorkar chak tak hian a rate siam se sumdawnna tlak lovin, litre 1 cheng khat aia tova lei chuan eng zu pawh ni se, chumi khamiah a zuartuten rawn report tur, cheng chuti zat a chawi ang, a tih duh hma chuan a rem ka ring lo, a rangkachak tawh tlat, te ka ti ve mai mai. – Phone No. thup

Chun nun harsa takin min hring chhuak a, Pathian zarah ka lo sei lianin ka lo puitling chho va. ‘Ka nu, zu ka in avanga min hauhnaah khan engmah thiamna ka nei lo, ka tihpalh a ni e. Ka nu, ka hmangaih che, ka tan zan tin min tawngtaisak thin tih pawh ka hria. Ka nu, ka lawm e. Sual hian min thlem reng si, ka do hneh si lo. Ka nu, ka hmangaih che. – Zo Thug n Famillias

Tukin chu chawlhni tuk a ni bawk a, kan inkhawm hlawm chek ang a, hun hmangtute tawng dik lo sawi leh teh ang. Vawiin ni tih hi chu sawi nawn ngai lova chiang sa a ni a. Tawngtainaa i hnenah lawm thu kan hrilh a che an ti leh nulh ang chu. Thupuangtuin chiang sa reng pawh ‘turah ngai ila’ a ti leh bawk ang. Malsawmnaa inkhawm tintuin, ‘In zaa hnenah’ ti lovin, ‘kan zaa hnenah’ a ti leh ngei ang. Thenkhat chuan, ‘Isua hming ka dil a che’ ti lovin, ‘Isu, i hmingin ka dil a che’ an ti leh bawk ang. Inkhawmnaa kan tawng hman hi fimkhur a ngai hle a ni. – 9856835945

MSU hi Pawl negative tak, MZP er hrim hrim, an er bera te lah er tham loh. Intihlar nan issue a dapa, dap chawp, sorkar thiltih, eng sorkar pawh ni se a engamah hmaa dodal tum nghal pawl, MZP ang bawka vai dawrkai leh supplier te laka an pawisa khawn khawma an pawl leh an hotute hi inchawma intungnung an ni. Isue a dapa dap ta reng reng chu tih thatte pawh an nei ve zauh zauh ang. Eg. Saikhumphai, tuna Selam an rawn dinpui erawh hi chu mipui leh a bik takin thalaite rilruah ‘Rule of Law’ aiin ‘Mob Rule’ dah pawimawh zawkna leh ‘Dan Rorelna’ ngaihnepna leh ‘A Haw Haw’ zawnga thiltih duh mai zelna a tuh ang tih a hlauhawm. Intihlara intihpawimawh ve an duh a nih pawhin Mizoram leh Mizoten kan that tlanna tur leh hmasawnna tur issue te hi dinpui ve tawh zawk thin se. – Ngaisanglova

New Capital Complex hian gas kan va dawng khat em em ve, kuminah vawi hnih chiah kan la dawng. Hma latu tur an awm em? M&B hian an cistomer-te min chawm zo thlawt lo a ni e. – Zimatula

Hydro Power kan mamawh a, kan duh em em a. Tunah compensation tih velah kan innawr thar leh ta maw! Kan ram leh hnam dinchhuah ve nan hian compensate beisei loh ngam a va hun tawh em! Tuirial compensation dawn beisei au thawm hi Zoram tan a ninawm zozai mang e! – 9862372482

Central-ah AICC-IN MP candidate an siam dan dik loh vanga tla nia Pu Hawla’n a sawi newspaper-ten an ziah kha Pi Sonia leh Congress hotute khuan engtin tak ngai an maw? Congress CM, an fachuam, an laka tlatlum leh an mi rin nia an sawi thin Pu Hawla hian a sahmim tipuar thin AICC a tlak chhiat takah chuan a sahmim tipuar turin BJP?laka tlaktlum dan zawngin khatiang thu kha a sawi ta mai a va ang em! Mahni awmna party hotute sawi chhiat hi mi rinawm lote chin dan a ni a, hetiang tite chungah party-in action a la thin. AICC hotute an insiam that loh chuan an dinchhuah a rin loh thu a sawi te, Congress ni lo central-a an sorkar apiangin North East miten duhsakna kan dawng zawk nia a hriat thu a sawi phei hi chu AICC hotute tan a na lehzual ngawt ang. Pu Hawla hian Congress bansana BJP zawm a rilruk a, hatiang thu hi a sawi ta mai niin kei chuan ka ngai. – Omoma Pu

SAWHKHAWK of the day
Assam-in kan ram chhung ngeia in leh thlam kan sak pawh an rawn vaw thiat ngam a, Assam ram pawh ni lo, kan ram chhung, Saihapui (V) ngeia Assam school rawn sak pawh kan vaw thiat ve ngam lo. Selam khua chiah ngam sorkar hi tu nge ngaisang thei ang? An duh a nih chuan engtik lai pawha vuak thiah tuah lutuk tawh kan ram chhunga Assam school rawn sak khu ralthiam famkim nen vaw thiat ang hmiang! Selam khua ngam em ema Assam lakah chuan ningnel lutuk, nau sawngnawi ang lek, zah pawh a zahthlak! Assam-in an hre reu reu ang tih pawh a hlauhawm, tumah hrilh suh u! – Maenga, BVT

Facebooktwittergoogle_plusredditpinterestlinkedinmail

Login

Lost your password?