Monthly Archives: June 2014

Tawi Nawi

GNM hruaitu
Green Mizoram Network (GMN) chuan nimin khan khawmpui neiin kum 2014-2016 chhung atana heng mite hi an thlang : President-ah Vanlalruata Tochhong, Vice President-ah VL Neihthangi (Nunu-i), Treasurer-ah HC Sanglura, Gen. Secretary-ah Rothuama Sailo, Jt. Secretary-ah C Vanlalsanga (C.Sanga) leh Fin. Secretary-ah K Lalngaizuala.

PUC HOSTEL HAWNG DAWN
Pachhunga University College a hmeichhe hostel sak thar chu naktuk Thawhtanni zing dar 8 hian CL Ruala, Lok Sabha MP in a hawng dawn dawn a, MZU Vice Chancellor Prof. R.Lalthantluanga chu khual zahawm a ni dawn a, Robert Romawia Royte in technical report a pe ang. He hostel hi NECS in a sak a ni.

Remna Ni
MNF chuan India sorkar nena June ni 30, 1986-a inremna ziah ni champha vawi 28-na chu Mizoram pumah urhsun takin an hmang dawn a. MNF Hqrs hruaitu mi 70 zet te chuan Mizoram hmun hrangah Remna Ni an hmanpui ang.

MSSC OB thar
Infiamna discipline 32 inthlunkhawmna Mizoram State Sports Council (MSSC) Vice President-ah John Kima leh Joint Secretary-ah Lalrinfela te thlan an ni.

Free Clinic
39 Assam Rifles chuan Mizoram Remna Ni vawi 29-na, June 30, 2014 pualin Lammualah hun an hmang dawn a, a thlawna inentirna hun leh ralthuam pholanna an nei ang. Remna Ni lawmna hi chawhma dar 10 AM-2PM neih a ni ang.

PAC?MEETING
Mizoram Legislative Assembly hnuaia committee peng pawimawh tak, Public Accounts Committee chu July ni 1, 2014 (Thawhlehni) chawhma dar 11 hian an thukhawm ang.

STASTICTIC DAY
July 1,2014 chawhma dar 11 hian Economic & Statistics Department huaihawtin Synod Conference Centre ah ‘Statistic Day’ hman a ni dawn a, he hunah hian Speaker Hiphei chu khuallian a ni ang.

Facebooktwittergoogle_plusredditpinterestlinkedinmail

Kaladan kawngpui sialnaah thlan 83 sawn

Aizawl; Kaladan Multi Modal Transit Transport Project (KMMTTP) in a paltlang tur huamchhung a awm thlan 83 chu tun thlengin sawn a ni tawh a, hetihlai hian zangnadawmna phuttu mi thenkhatte vangin kawng laih hna hi chawlhsan a ngaih phah fo thin a, hei hian hnathawh a tikhaihlak a, hnathawh a muan phah ni a thudawn a ni.

KMMTTP in a paltlang tur Lawngtlai III, Electric veng thlanmual a thlan 55 chu nikum khan hmun dangah sawn alo ni tawh a, thlan sawn tur hmabak la awm 80 chu kawng laitu contractor leh veng mipuite inkarah buaina neuh neuh a awm avangin sawn mai theih ala nilo a, vengchhung VC leh YLA te hmalakna a inrem a nih hnu ah heng thlan 28 chu tun thla bullam khan khan sawn a ni.

KMMTTP hi Lawngtlai atanga Myanmar ramri, Zochalui thleng Mizoram PWD enkawlna hnuai ah RDS Project Ltd. leh ARSS Infrastructure Ltd ten chan in insem kawng laih hna hi thawh a ni a, kawngpui thui zawng hi Kilometres 99.830 tur a ruahman niin, kawngpui chu nitin Motor lian rit phur 1000 pawhin an zawh pawh a dawlzo tur, Highway Grade sang taka siam mek a ni.

KMMTTP kawng chhuat zau zawng hi Metres 12 niin, Blacktop chin zau zawng tur chu Metres 7 a ni a. Kawng hi kum 4 chhung a hmantheih a peihfel hman tur a tih an nih thu te, tuna senso zat tur a ruahman chu cheng Vaibelchhia 4800 chuang a ni.

Tun dinhmun ah he lai kawngpui laih mek hi hmun thum atangin laih a ni a, Lawngtlai atanga KM 38 inkar chu RDS Project Ltd ten KM 38 atangin Lawngtlai lam hawiin an lai a, Lawngtlai lam atanga laih muan a nih nachhan hi Thlanmual sutchhiat tur a awm vang leh mimal thenkhat zangnadawmna pek tawh, lungawilo an awm vang a ni.

Nikum 2013, April thla tawplam khan KMMTTP Land Owners Association in zangnadawmna chungchang vanga kawngpui laih chhunzawm an remtihloh hnu ah Mizoram sorkar chuan sipai thahnemtak tirlut in, sipaite venhimna hnuaiah hian kawngpui laih hi chhunzawm alo ni tawh a ni.
KMMTTP: Sittwe (Myanmar ramchhunga lawngchawlhna hmun lian khawpui) atanga Kaletwa (Myanmar ramri chin) thleng Kaladan luidung ( km 200 vel) lawng kal thei tura siam that a ni ang a. Kaletwa, Myanmar atanga Lawngtlai, Mizoram chu motor kawngpui lian a thlun zawm a ni ang.
Kawngpui hi peih fel anih hunah Kolkata – Sittwe – Kaletwa – Lawngtlai – Aizawl hi tuna kan hman mek kawng Kolkata – Siliguri – Guwahati – Silchar – Aizawl ai hian mel za tamtak in a tawi zawk dawn.

Mizoram leh he kawngpui chhawrtu state dang tan chuan India ram khawpui lian viz. Kolkata, Chennai bakah Singapore leh khawchhak lam khawpui lian te nen sumdawnna kawng a inhawng dawn.

Facebooktwittergoogle_plusredditpinterestlinkedinmail

GSM hruaitu thar

Nimin khan Geological Society of Mizoram chuan Pachhunga University College ah general body meeting hmasa ber an hmang a, hruaitu thar an thlang nghal. Nimin GSM meeting ah hian chawhma lamah rorel inkhawm neiin chawhnu lamah C.Laldinkima ziah ‘Mizoram leilung dinhmun’ zirhona hun an hmang bawk. GSM hian heng mite hi hruaitu atan an thlang.

President: Dr.Victor Zochhuana Ralte (MZU)
Vice President : Pu C.Laldinkima (OIL)
Gen. Secretary : Pu Laldinpuia (PUC)
Asst. Secretary : Pu ZD Laltanpuia (MIRSAC)
Treasurer : Dr.C.Lalmuankimi (MZU)
Fin.Secretary: Dr.J.Malsawma (MZU)

Facebooktwittergoogle_plusredditpinterestlinkedinmail

Pa eisual

Lalchia (50), Lawngtlai AOC veng a khawsa mek te chu pa eisual vangin nimin khan damdawiin panpui a ni. Thudawn danin Lalchia te hian an kawta pa chu an ei a, a hnu lawkah dam lovin damdawiin panpui nghal a ni a, damdawiin thlenpui anih hnu lawkah biaktheih lohin a awm nghal a, Lawngtlai damdawiin atang hian Lunglei lamah refer nghal a ni a, he chanchin ziah lai hian an dinhmun ala tha vak niin an sawi. Lalchia te chhung hi 7 an ni a, pa hi an nupa bakah an monu in an ei a ni. Nimina an pa ei te hi Aizawl ah rawn thawn phei nghal a ni a, Dr. Pachuau Lalmalsawma hovin endik nghal tura tih a ni. Hmanni a Sentetfianga pa eisual sample pawh tunah hian endik turin Aizawl a lo thleng tawh bawk.

Facebooktwittergoogle_plusredditpinterestlinkedinmail

Forests leh Selam inbe dawn

July ni 11,2014 hian Forests Department hotute leh Selam khawtlang hruaitute chu Champhai ah remna zawngin an inbe dawn a, he inbiakna ah hian Champhai DC leh SP pawh an tel ang. Forest Department leh Selam khawtlang inhmuhthiamlohna kal zela man Selam khawtlang hruaitu, baila a chhuah mekte chu July 11 khian Court ah an inlan leh dawn a ni.

Facebooktwittergoogle_plusredditpinterestlinkedinmail

Tleirawlte Ni hmang

Aizawl; Nimin khan Tlangnuam Village Level Monitoring & Supervision Commmittee on ICDS & SABLA huaihawtin Kishori Diwas (Tleirawlte Ni) chu Tlangnuan Community Hall ah hman a ni a, he hunah hian mi 260 an kalkhawm a ni.

He Scheme hian a tum ber chu hmeichhe tleirawl kum 11 atanga kum 18 inkar te dinhmun chawikan leh an hamthatna tur kawng hrang hrang a tanpui leh tih chak a ni. Tlangnuam Monitoring & Supervision Committee hian chak leh tha ber lawmman an dawng tawh a, kum 2013 chhungin Kishori Diwas an hman kim theih vawngin lawmman pawh an dawng tawh a ni.

Facebooktwittergoogle_plusredditpinterestlinkedinmail

July-ah Bru te chhawm dawlna pek hman tum

Aizawl; Tunhnaia Tripura atanga lolet Bru (Reang) chhungkua te hnenah July thla laihawl velah chhawmdawlna pek hman beisei a ni.

Bru laklet thawhrukna, tunhnaia neih zawh takah khan chhungkaw 173 an lolet a, Zomuantlang Facilitation Centre kaltlanga lo lut Tuikuk hi chhungkaw-33, Member-174 awmna a ni a. Kanhmun Facilitation Centre kaltlanga lolut te chu chhungkaw-140, member-709 awmna an ni thung.
Mamit DC office atanga thudawn danin Mizoram a lolet Bru te hi Mizoram mi leh sa an nih leh nihloh endik an ni tawh a, mahse July 7-9,2014 inkar hian AO ten khaw tinah kal chilhin an endik nawn (cross verify) leh dawn a, a lo lut zat dik tak hriat theihnan ‘head count’ an nei ang a, Mizoram mi dik tak te chu chhawmdawlna chhungkaw pakhat tan Rs. 87,500/- zel pek an ni dawn a ni.

Thulakna tarlan danin tun tuma Bru lolet te hi a ruk a rala transit camp chhuahsan te an ni a, a then chu tuichawi tur anga chhuak a, belah an thawmhnaw lo dah ru te, a then chu bazar tur anga chhuak te leh a then chu an hotu ten an phal dawnlo tih an hriatsa vanga laklet hun hmaa transit camp lo chhuahsan te an ni.

Kum 2009 hnulamah Bru laklet hi thawh 6 neih a ni tawh a, hemi chhung hian mi 6511 laklet an ni tawh.

Facebooktwittergoogle_plusredditpinterestlinkedinmail

10% chiah skill: T.Sangkunga

Aizawl; Mizoram Youth Commission chairman T.Sangkunga chuan nimin khan Nehru Yuva Kendra(NYK) ten ni 14 chhung awh Training on ‘Prospects of important Horticultural crops in the context of Mizoram’ kharna hun, Youth Hostel, Luangmual a neih chu a hmanpui. Training ah hian Mizoram chhunga district 8 atangin NYK member 58 an tel a, Krishi Vigyan Kendra(KVK) leh Ministry of Youth Affairs & Sports te chuan mithiam te chhawr in NYK member te hi Horticultural kaihhnawih leh eisiam chungchang ah te zirtirna an pe a ni.

T.Sangkunga chuan India ram mipui zinga hnathawk thei leh chhawr tlak zinga 10% chiah skill worker tia chhal ngam an nih thu sawiin khawvel ram changkang zawka hnathawktu 60-96% lai te chu thiambik leh thiam thil nei chhawrtlak hnathawktu an ni thung a ni a ti a. India in skill Labour a tlakchham dan ti ziaawm turin Ministry hmasa in Skill Development Initiatives chu kum 2008 khan a lo kalpui tan tawh tih a sawi a, “Sawrkar hmalakna tha tak hi Mizo thalai hna hmulo leh zawng mek ten kan belhchian a kan hman tangkai a ngai a ni”, a ti. MYC Chairman chuan state pawn atanga hnathawktute rawn lut vak thin pawh Mizote mamawhna avang tih sawiin, “Mizo thalaiten an thiam ang zawng zawng hi thiam vek ila hnathawh tur an nei lo ang a, an rawn lut lo mai dawn a ni,” a ti a. Thalaite chu eizawnna kawng an dap laiin khawtlang leh thildanga inhman dan tawk thiam turin a chah bawk.

Facebooktwittergoogle_plusredditpinterestlinkedinmail

Everest lawnchhuaktu hming chawia sak kawng hawng

Aizawl; Nimin khan Aizawl Municipal Council leh UD&PA sum hmanga siam Republic Veng Local Council-in an veng mi Everester, David Zohmangaiha hming chawia ‘Zohmaa Road’ tia an puan chu AMC chairman CT Zakhuma’n a hawng.

He kawng siam nan hian AMC atangin nuai 5 leh UD&PA deptt. atangin Rs. 240,000/- hmuh a ni a, hei bakah hian vengchhung mi thahnem ngai ten tha leh zung tam tak an seng a, hnatlangpui pawh vawi 5 neih a ni. Kawng hawn inkhawm Republic Veng Community Hall-a neihah thu sawiin AMC chairman chuan, kawng hming putu in chona amaha awm hre ran leh a result tur hriaa chakna petua a hmang chu zirlai zir mek te tan pawh chona ni thei se a duh tih sawiin, “Mizo thalaite ruihtheih thil avanga an thih zel chuan hnamdang thuhnuaiah Mizoram chu a awm mai a hlauhawm”, a ti.

Facebooktwittergoogle_plusredditpinterestlinkedinmail

Leilung zirchianna Centre sa dawn

Aizawl; Nimin khan Industries Minister H.Rohluna chuan Geological Survey of India in India hmarchhaka Field Training Centre hmasa ber a sakna tur lungphum chu Durtlang ah a phum. Minister H.Rohluna chuan training centre chu hman theiha sak zawh a nih hun chuan India hmarchhak leh a bik takin Mizoram tan tangkaina tam tak a thlen ngei a beisei tih a sawi.

Mizoram leilung zirchianna kawngah leh, chhiatrupna thleng thei laka inven dan kawngahte hmasawnna tha tak a awm a beisei tih Minister hian a sawi bawk. H&TE Minister R. Romawia pawhin Field Training Centre chu Mizoram leilung chungchang zir mai bakah hnam ziarang hrang hrangte inzirtawnna leh inpumkhatna thlentu anih a beisei tih a sawi. Lungphum inkhawm ah hian Par. Secy. Joseph Lalhimpuia leh GSI Director General Dr. S.K.Wadhawan pawhin thu an sawi bawk.

Field Training Centre hi Ministry Of Mines hnuaia Geological Survey of India-in India chhung hmun hrang hranga leilung chi hrang hrang zirchianna atan centre a siam 12 zing ami tur a ni a. Mizoram leilung awmdan te, leimin, lirnghing leh leilung hausakna leh thil pawimawh dangte zirna hmun tur a ni. Kum 2010 atang khan Mizoramah UPSC paltlanga GSI hnuaia officer te tan training hi kalpui tan tawh a ni a, Field Training Centre hi sak zawh a nih hunah phei chuan chipchiar zawka zirna pawh kalpui a nih ngei beisei a ni.

Facebooktwittergoogle_plusredditpinterestlinkedinmail

Login

Lost your password?