Monthly Archives: June 2014

Mahni intihhlum ven dan zirho

Aizawl; Nimin khan Thingsulthliah Pastor bial KTP chuan Thingsulthliah kohhran ah half yearly meet an nei a, he hunah hian Dr. C.Lalhrekima sawmin mahni inthlum ven dan zirhona ‘suicide prevention campaign’ an nei.

Zalen palaiin a biak naah Thingsulthliah Pastor bial KTP Secretary R.Lalhlimpuia chuan Mizoram hmundangte ang bawkin an bial chhungah mahni intihlum an awm zauh zauh tih a sawi a, hei hi rilru lam harsatna vanga thleng thin nia an hriat thu sawiin, “mahni intihlum chungchang leh a ven dan hi thalaite ah inzirtir ila, a ziaawm theih kan rin vangin kan buatsaih a ni” a ti.

Facebooktwittergoogle_plusredditpinterestlinkedinmail

HPC hnenah Mizoram mau metric tonnes 20,000 hralh tum a ni

Aizawl; Environment & Forests Department chuan Hindustan Paper Corporation hnenah Mizoram Mau metric ton 20,000 hralh a tum a, hemi atana thil pawimawh awmte buaipui mek a ni.

Zalen thudawn danin Mau te hi Bairabi leh Kanhmun ah depo siamin helai hmun atang hian HPC hian an lei dawn a, heng depo 2 atang hian metrict ton 10,000 ve ve hralh tum a ni. Ruahman dan chuan Mau hi metrict ton 1 Rs. 770 zela hralh a ni dawn a, sawrkar sum hmang lovin a lakkhawmna leh senso tul dang chu HPC hian a tum dawn a, a sum hi advance in Environment & Forests Department hnenah a hlan dawn a, ruahman anga thil a kaltluan chuan Mau hralhna atang hian nuai 136 hmuh beisei a ni.Mau puitling chu metric ton khat ah pum 197 vel a ni a, Rawthing leh Rawnal chu pum 100 vel a ni. CCF Lalthangliana Murray chuan Mizorama bamboo based industry te chu an ngaih pawi mawh number 1 an ni reng dawn tih a sawi a, mahse an hman senloh avangin state dangah sum hmuh nan hralh an tum mai zawk niin a sawi.

Tunhnaia tlawmngai pawl thenkhatin Mau no sah leh thawnchhuah an ngaimawh chungchangah Chief Conservator of Forests Lalthangliana Murray chuan VC pass, Periodic patta leh LSC nei te hnenah chauh permit an pe tih a sawi a. Huan neitu thenkhat ten an huan chu Oil palm chinna atan hman an duh avang leh thenkhat chuan an huana Mau chu a puitlin tawh avangin hralh an duh a, chung mite chu Department chuan a hnar ngawt thei lo tih a sawi bawk. CCF chuan Kolasib leh Kawrthah Division chu Mau thatna hmun a ni tih sawiin, “Mautam hnua Mau te chu an lian tawh a, sah theih an ni tawh a. Kum 4 tling chin te chu sah kan phal a. Mipui tan tiin Mau 1 a Rs.2 kan lak thin pawh duli (Re.50) chauh kan laksak a ni”, a ti bawk.

Facebooktwittergoogle_plusredditpinterestlinkedinmail

SAAB in project lian audit turin chhawpchhuak

Aizawl; State Audit Advisory Board, Principal Accountant General Office, New Secretariat-a thukhawm chuan Mizoram chhunga sawrkar hmalakna thenkhat enfiah mek chu thlir hovin pawisa tamna department leh project lian kal mek thenkhat te chu audit turin an chhawp chhuak a ni.

Zirtawpnia SAAB thukhawm te chuan Principal Accountant General in a la audit loh project lian leh department thenkhat audit turte an sawiho a, hemi atan hian 12 thlang chhuakin PAG in a bawhzui turin an dah a, thutkhawm leh hunah an sawiho leh ang.

SAAB thukhawm hi Lalramthanga Tochhawng, Principal Accountant General chuan a kaihruai a, Tourism Department, Disaster and Rehabilitation, Total Sanitation Campaign, National Bamboo Health Mission, ZEDA leh Power Purchase Agreement te chu tuna Principal Account General in a audit mek thu sawiin, ‘Department pawisa khawih te chu Accountant General in audit tura a ngaihpawimawh te an ni a, a hlawma lokal pawisa lokalna scheme leh mihring tlemna department pawisa tamna ni si te pawh ‘risk’ tamna anga ngaih a ni,’ tiin a sawi.

Comptroller and Auditor General (CAG) of India hi Indian Audit and Accounts Department hotu a ni.

PAG office hi 2007 khan Mizoram-ah hawn a ni a, Audit leh Accounts Wing a then a ni.
AG hian Chakma, Mara leh Lai Autonomous district te audit in a enfiah thin.
AG hian sawrkar department leh sawrkar sum virna office te audit in a enfiah thin.
SAAB hian Mizoram chhunga audit tur rawtna a siam thin.

Facebooktwittergoogle_plusredditpinterestlinkedinmail

Kum 2013-2014 chhungin NREGS ah ni 78 inhlawh

Aizawl; Kum 2013-2014 chhungin ni za inhlawhna tia hriat lar ‘Mahatma Gandhi National Rural Employment Guarantee Scheme’ hnuaiah chawhrualin Mizoram mipuite chu ni 78 an inhlawh a, nikum 2012-2013 ah khan chawhrualin ni 89 an inhlawh bawk a. Kum hmasa lam aiin kum kalta ah hian ni 11 in an inhlawh tlem zawk a ni.

Kum 2013-2014 atan hian sawrkar laipui atangin sum Rs.2,553,400, 440/- hmuh a ni a, Lunglei district chuan hmu tam berin Rs. 487,298,208 a hmu a, Saiha district in hmu tlem berin Rs. 195,422,312 a hmu a ni. MGNRES ah hian Champhai district chuan inhlawhna siam tam berin ni 87 inhlawhna an siam a, Kolasib district chu siam tlem ber niin ni 71 inhlawhna an siam a ni.
Kum 2014-2015 a MGNREGS atan hian Central chuan sum hmahruai atan nuai 1176 a rawn pe tawh a, he sum hman phalna hi Rural Development chuan Planning leh Finance Department ah a dil mek a, pekchhuah anih hunah inhlawhna hi tan thuai tum a ni. Thudawn danin Central chuan MGNREGS sum pek chhuah dan kalphung chu ti danglamin kum danga CSS anga a pekchhuah thin chu kumthar atang hian budget ah a khung tawh dawn a, a hmaa RD Secretariat lamin an buaipui thin chu kumthar atang chuan Rural Development Directorate in an buaipui tawh dawn a ni.

Kum 2013-2014 chhunga NREG
Ditrict Sum hmuh (Lakhs) Inhlawh
Aizawl 3778.53236 80
Lunglei 4872.98208 78
Saiha 1954.22312 78
Champhai 4299.831 87
Kolasib 2042.85708 71
Serchhip 2078.87512 83
Lawngtlai 3475.59236 73
Mamit 3031.11128 84

Facebooktwittergoogle_plusredditpinterestlinkedinmail

World Cup laiin TV hralh a kal

Aizawl; World Cup Football vangin Aizawl khawpui leh Mizoram khawpui dangah te Television hralh a kal hle a, TV zuartu dawr hrang hrangte pawh thla dang ai chuan an inhralh tha zawk vek. TV ah hian Sony leh Samsung chu mipuite lei tlanglawn ber a ni.
Zalen palaiin dawr hrang hrang neitute a biak kual naah TV zuartute chuan World Cup dawn hnai leh tunlai thlengin an TV zawrh chu hralh a kal hle tih an sawi a. TV leitute hi a tam ber chu Aizawl khawpui chhung ami an ni tih sawiin thingtlang lam pawh engemaw zat an awm tih an sawi bawk a, a tlangpuiin Rs. 30,000 man bawr vel chu mipui nawlpui lei phak tawk anih avangin an hralh tam ber anih thu an sawi.

Sony Exclusive Showroom, Chanmari chuan ni danga TV an hralh let 3 vel World Cup bawrah an hralh tih an sawi a, June thla chhung ringawt pawhin TV 200 chuang an hralh tawh niin an sawi bawk a. An hnen atanga zawrhchhawn tura TV la thin ten tum danga TV 30 bawr vel an lak laiin tunhnaiah chuan 100 te an la a, an hralh zo nghal deuh zel niin an sawi bawk.

Samsung Plaza, Sikulpuikawn pawhin tunlai hian TV an hralh tha hle tih an sawi bawk a. Dawr dang ang bawkin 32 inchis chu an hralh that ber a ni a, a leitu zingah hian Aizawl khawpui mi an tam ber a ni. D-3 Business Enterprise, Ramhlun North pawhin ni dang aiin an hralh tha tih kan palai an hrilh a, TV leitu zingah khawpui mi an tam zawk tih an sawi.

Facebooktwittergoogle_plusredditpinterestlinkedinmail

Naupang puih ngai case 565 dawng

Aizawl; Naupang tanpui ngaite tanpui tura din Childline chuan an dintirh March 2011 atanga June thla laihawl thleng khan naupang tanpui ngaite tanpui tura ngenna case 565 an dawng tawh.

ZALEN palaiin Childline thawktute hnen atanga thu a dawn danin naupang tanpui ngai tam ber hi nu leh pate kutthlak (physical abuse) an ni a, mipat hmeichhiatna case (sexual abuse) pawh engemaw zat a awm tih an sawi. Childline thawktute chuan an case dawn chu a thu a zirin Child Welfare Committee leh Juvenile Justice Board kutah an hlan thin tih an sawi a. Mipui ah inhrilhhriatna (awareness) awm that tawkloh ngaihtuahin mipuiin an chhawr tangkai hle niin an sawi a. “Tlang titi atanga kan hriat zawng zawng chu kan khawih seng lo a, complaint lut chauh kan khawih a ni,” an ti a. Complaint an dawn tam ber chu Aizawl khaw chhung ami a ni tih sawiin a bikin veng tlabirh lamah a tam zual tih an sawi bawk.

Physical abuse ah vuak leh in atanga hnawhchhuah a tlang lawn ber a ni a, a bikin nuhrawn leh pahrawn ten an khawih/kutthlak chu a tam ber.

Sexual abuse ah hian a khawihtu chu chhungkhat hnai emaw naupang in a nel te an ni tlangpui a, hmelhriat ngailoh chu an tam lemlo a ni.

Naupang harsatna tawk te tan Ph.No 1098 ah landline leh mobile (BSNL leh Aircel) hmangin darkar 24 chhung biak theih a ni a, biak man a awm lo.

Facebooktwittergoogle_plusredditpinterestlinkedinmail

CYMA in rukbo an dem

Central YMA chuan NLFT hel nia hriat ten, Mizoram khawthlang lam Rajiv Nagar leh New Kawnpui inkara hnamdang sumdawng mi 2 an rubo chu thalo an ti tak zet tih an sawi a. ‘Mizoram remna leh muanna tichhe zawng leh hmasawnna kal zel tur ti thuanawp zawnga, State dang hel ten Mizoram chhunga pawi an rawn khawih thin leh pawisawilo an rubo thin hi kan dem tak zet a ni’ an ti. CYMA chuan rukbote chu intiamkamna awm lova chhuah nghal an phut tih sawiin, hetiang thil a thlen nawn tawh lohnan Mizoram sorkar chu chak taka hma la turin an beisei tih an thuchhuah ah an tarlang bawk.

Facebooktwittergoogle_plusredditpinterestlinkedinmail

Bekang eisualte sawrkar lamin chhui chiang mek

Aizawl; Tunhnaia Bekang eisual nia rin vanga mi 3 in nunna an channa hmun, Lawngtlai District a Bungtlang South chu Zirtawpni khan damdawi lam thiamten an tlawh a, endik hna an thawk nghal. Bekang ei nia hriat nghawng kal zelah mi engemaw zatin insawiselna an neih avangin heng an harsatna te enfiaha a tul anga hma la turin Health Deptt. chuan Integrated Disease Surveillance Programme hnuaiah damdawi lam thiamte hi a tir a. IDSP Team te hi State Nodal Officer Dr. Pachuau Lalmalsawma’n a ho a, Lawngtlai CMO, Pu Thangkima’n a lo tawiawm bawk.

Mithiamte kaihhruaina hnuaiah hian Bungtlang South PHC-ah Mobile Health Clinic neih zui nghal a ni a, Lawngtlai Civil Hospital atangin Dr. Lalmalsawma, Dr.Lalduhsaka leh thawktu dangte bakah Dr.Jimmy Lalnunpuia Bungtlang PHC leh thawktu dangten damlote an en a. Bekang ei sual ni a inhria mi thahnem tak te pawh an natna lanchhuah dan te ngun taka zirchiangin damdawi an pe nghal zel a ni. IDSP hotute hian mithi chhungte pawh tlawh nghalin mithi te chanchin chiang zawkin an zirchiang nghal bawk a, Bungtlang South Village Council, NGO hruaitute bakah Kohhran hrang hrang hruaitute pawh an titipui a, mipuite chu thlaphang lo tur leh chi-ai lo tura chahin theihtawp an chhuahpui dawn tih an hrilh a ni.

May ni 9 a Bungtlang South Presbyterian Kohhran Hmeichhia ten sum tuak nana Bekang an zawrh ei vanga thi nia sawi te hi Lalnunpuia (28), PC Lallianzuala (40) leh Lalmuansangi (23) te chu an thi a ni.

Facebooktwittergoogle_plusredditpinterestlinkedinmail

Kumin chhungin Mission Veng YMA branch pahnih inchhunfin tum

Mission Veng YMA North leh South branch chuan kumin chhung ngei hian branch khata inchhunfin an tum thu YMA Day, Synod Conference Centre-a an hman ho zanah an sawi chhuak a. Khawtlang hruaitu kalchhuaktate chuan thu an sawi a, YMA branch pahnih inzawmkhawm chu Mission Veng KTP hmalakna nia sawiin Mission Veng chhungah Presbyterian Kohhran chu pahnihah a awm loh avang leh NGO dang te pawh branch pahnihah a awm loh avangin YMA pawh a hrana awm a remti loh thu Lalringliana MYMAS Ex- President chuan a sawi a.

Vanchungnunga, MYMAN Ex-President chuan “Ngaihdan lakkhawmah pawh 84% zetin YMA hi pakhata luan ho kan duh a, hmun khata awm hi a tuah tawh zawk a, impumkhatna hlado chhamin kumin chhung ngei hian inpum kan tum a ni,” a ti a. Thalai tam zawkin branch khata inchhunfin chu an duh zawk a, inunauna a that theih zawk nan te, eizawnna leh thil danga talent phochhuahna hun remchang a tam theih zawk ringin indaidanna bang chu hruaitu hlui te pawhin thiah an duh phah ta niin a sawi bawk.
Mission Veng YMA hi an inchhungkhawm thei a nih chuan member 3500 chuang an awm dawn a ni.

Facebooktwittergoogle_plusredditpinterestlinkedinmail

Mobile tower radiation mihring tan a hlauhawm lo : Monitoring

Aizawl: ‘Mobile tower in chakna zung (radiation) a pek chhuah chuan mihringah cancer a thlen lo,’ tiin Mizoram-a cancer specialist awmchhun Dr Jeremy Pautu chuan hemi chungchang seminar neihnaah a sawi a, telecom lama mithiam te pawhin Aizawl-a mobile tower te’n mihring tana hlauhthawnawm turin radiation engtham mah an pek loh thu an sawi bawk.

Mizoram State Cancer Institute Director Dr Jeremy chuan, ‘Zirna hnuhnung berin a sawi dan chuan mobile tower leh phone in Electro Magnetic Field (EMF) hmanga chakna zung a pek chhuah chu kawng luanna alkatra leh aloe vera in chakna zung a pekchhuah te nen a intluk vel chauh a ni,’ tiin a sawi.

He sawihonaah hian TK Paul DDG, Telecom Enforcement, Resource and Monitoring Cell (TERM) chuan ‘Mobile tower leh phone in radiation a pekchhuah chu mihring taksa a paltlang tur khawpin a chak lova, heng hi non-ionizing radiation an ti a, a hlauhawm loh chi a ni a, mobile tower hi mihring hriselna tichhe khawpin hlauhawm lo mahse ‘tower’ awmna bulhnaia chengte awm hlat theih zawng bithliah siam a ni,’ tiin kalkhawmte a hrilh bawk. India sawrkar chuan kum 2013 khan mobile tower in radiation a pekchhuah zir chiang turin committee a din tawh a, IIT, AIIMS, ICMR, Department of Science and Technology leh midangte telin an report-ah chuan World Health Organisation (WHO) leh IARC chuan mobile tower-in Electro Magnetic Field (EMF) a pekchhuah chuan hriselna a tihchhiat loh gthu a tarlan niin a sawi bawk.

He zirhona hun hi ICT Minister Lal Thanzara’n a hmanpui a, ICT Secretary C. Lalhmachhuana chuan programme a kaihruai a ni.
Electro Magnetic Field (EMF) hi chi 2 a then a ni. Ionizing ah chuan UV light Gamma Rays, X Rays te a huam a; mihringah natna a thlen thei. Non-ionizing ah chuan Radio , TV, Mobile phone leh tower, satellite te a ni.

Facebooktwittergoogle_plusredditpinterestlinkedinmail

Login

Lost your password?