Monthly Archives: July 2014

Pollution BOARD in motor 6% chauh la enfiah

Aizawl; Mizoram motor zinga 6.17% chauh meikhu an pekchhuah dan mihring tan a him leh that tawkloh endik a ni a, lirthei la enfiah loh te chu August thla chhung ngeia enfiah tum a ni a, hemi chhunga enfiah loh te chu dan anga hrem an ni ang.

Transport Department chhinchhiah danin Mizoram ah lirthei chi hrang hrang 91950 (kum 2013 angin) register a ni a, heng zingah hian lirthei 5677 endik a ni tawh a, an zinga 376 chu an meikhu pekchhuah mihring tana hlauhawm chin a pelh avangin siam tura hriattir an ni. Tunhnaia Transport Minister hova mi pawimawhte meeting chuan August 2014 ral hma ngeia lirthei zawng zawng enfiah nise, huntiam chhunga enfiah lote chu hrem nise an ti.

Mizoram Pollution Control Board a Member Secretary Er. Lalduhawma chuan lirthei meikhu enfiahna ‘Pollution Under Control Certificate’ chu lirthei neitu ten an ngai pawimawh tawk lo hle tih sawiin kum khat chhung lirthei enfiahna hun hawn anih chhung in mipuiin an pan tha lo a, chuvangin huntiam chhunga ti hmanlo te chuan an tawrh a tul tawh dawn tih a sawi a. Lirthei enfiah chu a tangkai hle nia sawiin, “Motor atanga khu dum tak tak a chhuah chhan hi Oil kang thalo vang a ni thei a. Kan enfiahna atangin a fello lai te kan hmuchhuak a, hengte hi awlsam tea siam theih te anih avangin motor tihthat nan a tangkai zawk a. Mi tam tak chuan lirthei kan enfiah sak avangin lawmthu min hrilh zawk a ni,” a ti. Lirthei neitu tam takin Mizoram ah Oil pawlhdal vangin a khu a nasa bik nia an sawi chu a diklo tih a sawi bawk. MPCB Secretary chuan September thla velah Aizawl khawpuia lirthei te chu Police leh Transport thawktute nen an enfiah leh dawn tih a sawi bawk a, district lam erawhchu a tahtawl deuha tih zel an tum niin a sawi.

  1. Mizoram Pollution Control Board hian Aizawl khawpui hmun pali New Secretariat Complex, Ngaizel, Bawngkawn leh Zemabawk ah te lirthei endikna hmun hi a bun mek.

  2. Lirthei enfiah hna hi December 2012 atangin Mizoram ah kalpui tan a ni.

  3. Lirthei kum 1 a upa chin te chuan Pollution Under Control Certificate an neih vek a ngai a, mihring tana hlauhawm chin chu siamtha tura tih thin an ni.

Facebooktwittergoogle_plusredditpinterestlinkedinmail

Maruti Car chesualah 3 thi

Aizawl; Zirtawp zan dar 9:30 vel khan Aizawl-Lunglei road, Zampuimanga thlan bulah Maruti Car MZ 01/F-4166 chu chesualin kawng thlangah metre 100 vel a lum a, a chuang mi 5 zinga 3 an thi a, 2 in hliam an tuar.

Thudawn danin Car hi Lunglei road atangin a thlang World Bank kawngah a insawh thla a, a hmun ah hian motor khalhtu Vanlalchhuanga (24) s/o. H.Thangmawia Ramthar Tlangveng leh Sammy Lalruatpuia s/o. Lalchhuanmawia Chhinga veng te chu an boral nghal a, hliam pakhat F.Roluanhpuia (23) s/o. F.Lalhmachhuana Ramthar Tlangveng chu Aizawl Hospital panpui anih hnuin a boral ve leh a ni. Car a chuang dang Rampanmawia (24) s/o. Lalzarliana Armed veng leh Brenda Lalruatdiki d/o. K.Lalrinawma Laipuitlang te chuan hliam an tuar bawk a, hliam te hi Aizawl Civil Hospital ah hruai an ni a, Brenda Lalruatdiki zawk hi a na deuh a, Civil hospital ah enkawl mek ala ni. Car chetsual chhan tak hi hriat a la ni lo.

Car hi Pu H. Thangmawia, Ramthar veng ta a ni a, a fapa Vanlalchhuanga leh a thiante hian naute birthday an lawm zo chu inlak thawven nan an tlan kual a, Melthum ah hian Zampuimanga Thlan thlenga va tlan a, chuta tanga kawng hnuai zawk World Bank Road a haw leh tum an ni a, kawi hnih vel chauha Zampuimanga Thlan an thlen dawnah an chesual palh ta a, car hi a insawh chhe hle.

Facebooktwittergoogle_plusredditpinterestlinkedinmail

Mizoram ah Dengue vei mi 13 hmu tawh

Aizawl; Kum hnih kalta chhung khan Mizoram ah Dengue natna vei mi 13 hmuhchhuah an ni tawh a, vanneihthlak takin he natna avanga thi erawh an la awmlo thung.

Kum 2012 chhung khan Dengue natna vei nia rinhlelh mi 90 thisen lak zingah mi 6 in an vei tih hmuhchhuah a ni a, kum 2013 chhung khan mi 96 thisen lak a ni leh a, heng zinga mi 7 chuan he natna hi an vei tih hmuh chhuah a ni leh bawk.Nikum 2013 chhung khan India ram pumah Dengue case 75454 awmin thi 167 an awm a, kum hmasa aiin kumin hian thi hi an tlem zawk a ni.

Dengue hi natna chikhat, thosi ‘Aedes Aegypti’ in an thlen a ni a, he thosi in mihring a seh hnu ni 5-6 ah khawsik angin a langchhuak thin a ni. He natna vei mihring hi thosi in a seh chuan mihring dangah a kai darh leh thin.

Facebooktwittergoogle_plusredditpinterestlinkedinmail

AMC buai chhanah Duhoma puh

Aizawl; Tunhnaia ZNP atanga chhuak a, Mizoram Nationalist Party dintu, AMC Councilor ve ve Hmingthanzami leh Lalrimawia te chuan Aizawl Municipal Council buai chhanah ZNP President Lalduhoma an puh.

Nimin khan Aizawl Press Club ah chanchinbumite kawmin Councilor pahnihte hian ZNP President chuan tum hnih AMC sawrkar chu tih chhiat a tum niin an sawi a. “Mahni thawhpui party leh mipui kutthlakna zahlova tih chhiat tum fo hi kan duhlova, kan awmna party atangin kan chhuaklo theilo a ni,” an ti. Lalrimawia chuan, “Congress party hian vawikhat mah an party a lut turin min la sawm chhin lova, nihna emaw tawktarh emaw eng mah kan bulah an nei hek lo, Congress ah lut duh ila emaw, lut dawn ta emaw ni ila, tawktarh emaw inthlemna a ngaih pawh kan hre hranlo a, kan hmalam hun tur erawh kan sawi theilo a ni,” a ti.

Hmingthanzami pawhin Councilor thenkhatin an party an chhuahsan vanga AMC chu buai ni lovin ZNP President in a thawhpui party thlak a duh vanga thleng niin a sawi a. “Municipal kan neih hmasak ber tichhetu nih hi kan duh lo a, corruption emaw a thawktute ah inremlohna a awm pawh ni lova AMC titlutu nih hi kan duh lo a ni,” a ti bawk.

Zawhna chhangin Councilor 2 te chuan ZNP atanga chhuah chu anni bakah Lalchhuanmawii pawhin a tum a, a phur ber a ni a, hming pawh a sign vek tawh a, mahse a dawn hnaihah a let leh mai niin an sawi a. ZNP Councillor pakhatin AMC buaina UD & PA Minister dawhkan atanga remruat anih theih thu a sawi pawh thu diklo niin an sawi bawk.

Facebooktwittergoogle_plusredditpinterestlinkedinmail

Sumo chesual ruang la hmu lo

Aizawl; Zirtawp zinga Sairang thlang Buichali lei bula Maxi cab chesuala mi pathum chin hriat lohte ruang zawn hna chu nimin thleng khan ngawrh taka thawh chhunzawm zel a ni a, he thu buatsaih lai thleng hian ruang hi hmuh an la ni lo.

Ruang zawn hna hi Sairang, Sairang Dinthar, Sihhmui, Lengpui, Mualkhang leh Khamrang YMA ten an thawk mek a. Buichali lei bulah Sairang Dinthar YMA te an awm a, Khuangchera kai ah Lengpui, Pawlhrang kai ah Khamrang leh Mualkhang ten an chang a, Durlui kai ah Sairang leh Sihhmui Branch YMA te an awm bawk. Tlawng lui ah hian tui a tam em avangin ruang zawn hna pawh hi duh angin a thawh theih loh a, ruang te hi ni 2/3 hnuah chuan a rawn lang chhuak mai tura rin a ni a, hei hi uluk takin an thlithlai mek a ni.

Sumo chesual AS 10/C-4564 hi Patharkandhi leh Saiha inkar service a niin a neitu chu Rahul Ahmed, Patharkandhi, Karimganj, Assam a ni a. Motor ah hian driver tiamin mi 8 an chuang a, Ningani tlai dar 5 khan Patharkandhi atanga rawn chhuakin Kawnpui leh Khamrang inkar kawng block vangin darkar 1 vel chawlin an muhil a, kawng a tlang hnuah Aizawl lam pana an rawn tlan chu Buichali atanga Sairang lam metre 300 velah kawng thlangah a tlanliam a, an zinga 1 chu lui thleng lovin a vawrh chhuak a, midang 4 chu lui atangin an inham chhuak a, driver Samsul leh second driver Mintu, Patharkandhi mi ve ve leh Silchar atanga chuang mipakhat a hming hriat lohte chu motor hian li ah pilpui ta a ni. He sumo chetsual chhan hi driver mutthluk vang anih rin a ni a, kawng sir a dai thui hle a, hliam te zingah hian an tlak lai hria an awm lo a, an mu thlu vek niin an sawi.

Facebooktwittergoogle_plusredditpinterestlinkedinmail

Mizoram khaw 730 zinga 657 ah pe tawh

Aizawl; Mizoram khaw 730 zinga 657 ah eng pek a ni tawh a, eng pek zat hi a percentage a chhutin 90% a tling a. Champhai leh Serchhip district chhungaah chuan khaw tinah eng pek a ni tawh a ni.

Power & Electricity Department chuan kum 2012-2013 chhung khan Mizoram atangin power 52.47 mega watt an siamchhuak a, heng te hi Diesel atangin 0.5mw, hydro atangin 29.05mw leh thermal atangin 22.92mw te an ni a, mahse thermal hi chu a tui (furnace oil) leina man a san em avangin tihnun a ni ngai meuhlo thung.

Kum 2012-2013 chhung vek khan transmission & distribution loss ah 30.22mw hloh (loss) a awm bawk.

P N E in DISTRICT LEH KHUA A A PEK ZAT
District Khua Eng pek %
Mamit 85 74 87.06
Kolasib 36 34 94.44
Aizawl 113 107 94.69
Champhai 89 89 100
Serchhip 35 35 100
Lunglei 163 147 90.18
Lawngtlai 140 113 80.71
Saiha 69 58 84.06
Total 730 657 90

Facebooktwittergoogle_plusredditpinterestlinkedinmail

Canada Vawk dahna hmun tur Selesih-ah; Vawk pa chi sawngbawlna peihfel

Aizawl; Nimin tlai khan AH & Vety Minister C. Ngunlianchunga chuan Selesih a vawk dahkhawmna a tlawh a, Vety department thawktute hmalakna a enpui.

A.H. & Vety Department in vawksa leh vawk note a intodelh theihna tura hmalakna te chu Minister hian tha a tiin thawktute inpekna pawh lawmawm a ti hle a. Nasa taka insangmara intodelh thei tura rahbi thar rah a ngaih thu uar takin a sawi a ni. He Scheme hnuaiah hian Mizoram pumpui hmun hrang hrangah Beneficiary thlan bik te hnenah vawk vulh tur pahnih zel a thlawn a pek an ni. Minister hian ‘Regional Boar Semen Station’ Selesih National Mission on Protein Supplement -RKVY hnuaia din chu a tlawh bawk a. He vawkpa chi kah raina atana hman tur sawngbawlna Laboratory, training hall leh set-up te hi peih tawh niin vawkpui vulhtu ten tangkai takin an chhawr mek a. Polar Genetics Canada atanga lakluh tur vawk chi tha chi a lo thlen huna hawng mai thei turin hmalakna engkim peih a ni tawh a. District Boar Semen Station District Headquarters tin a din tawh te nen Zoram pumpui hi vawk kahrai (AI) in tuamchhuah a tum dan te chanchinbu mite a hrilh hre bawk a ni.

Vawk kahrai (AI) hi India ramah hmundangah chuan Research Stage chauh a kalpui anih laiin Mizoram ah chuan kum 15 chuang field level ah hlawhtling taka kalpui a ni mek a. RKVY atanga thuamthat niin North Eastern State leh India hmun hrang hrang a mite pawhin training an rawn neih theih nan he hmun hi peihfel a ni tawh a ni.

Facebooktwittergoogle_plusredditpinterestlinkedinmail

Lecturer transfer order hal tum

Aizawl: MZP Headquarters Lunglei leh Lunglei Gov’t College Students Union te chuan Lunglei Gov’t College atanga Lecturer te transfer na order chu naktuk chawhma dar 11 hian hal an tum.

MZP Headquarters Lunglei leh Lunglei Gov’t College Students Union te hian Zirtawpni khan MZP Pisa Lunglei Venglai-ah Joint Meeting an nei a. Meeting ah hian tun hnaia Lunglei Gov’t College a Lecturer 3 transfer annih chungchanga hmalak dan tur sawi ho. Pawl pahnihte chuan Lunglei Gov’t College in Lecturer an in daih loh thu leh Department tam zawka Lecturer Minimum Requirement an phak loh thu te, kum tin zirlai lut thar an pun nasat zel avanga zirlaiten harsatna an tawh nasat thin thu bakah lecturer awmsa sawn chhuak lo turin vawi tam tak sorkar a lo ngen tawh tih an sawi a.

Hetih lai hian Mizoram sorkar chuan Lunglei Gov’t College Lecturer pathum Deptt. of English, Deptt. of Geography leh Deptt. of Botany ami te chu a sawnchhuak tih sawiin hemi chungchangah hian ni 8.7.2014 khan thuneitute hmuin ni 24.7.2014 ral hma ngeia heng Lecturer 3 te transfer na Order hi sut tur in ngenna lehkha an thehlut a, mahse thu lawmawm hriattur a la awm loh avangin Sorkar laka lunglawi lohna lan tir nan leh heng lecturer 3 te transfer Order hi sut a nih ngei theihnan ni 28.7.2014 (Thawhtanni) chawhma dar 11 hian Lunglei Gov’t College Campus-ah lecturer transfer na order halralna hun hman nise tiin a rel a ni.

Facebooktwittergoogle_plusredditpinterestlinkedinmail

JJB in Naupang humhalhna police hnenah thlen

Aizawl; Juvenile Justice Board, Aizawl chuan naupang thlalak thehdarh chungchangah a titu chhuichhuak turin Police ah FIR thehlutin JJ Act hmanga naupang humhalh an nih dan an sawifiah.

Thuchhuah an siamah Juvenile Justice Board, Aizawl chuan July ni 24,2014 a Aizawl Veng pakhat a School naupang hostel atanga tlanchhuakin scooty an ruk chungchang leh heng naupangte hming, kum, veng, school leh an thlalak te Facebook leh Whatsapp a thehdarhtu an awm tih sawiin he thil hi an ngai thutak hle tih an sawi a. Hetiang titu te chu ‘The Juvenile Justice (Care and Protection of Children) Act 2000’ Section 21-na angin Rs.25,000 thleng chawi tir theih ani, an ti a. July ni 24 zana thil thleng Social Media a theh darh leh naupang te nihna tih lan anih avang hian Police ah FIR an thehlut tih an sawi.

Facebooktwittergoogle_plusredditpinterestlinkedinmail

Sawrkar record dahthat- na hmunpui hmang tan

Aizawl; Mizoram sawrkar Department hrang hrangte thil pawi mawh (document) dahthatna tur Mizoram State Data Centre chuan hna a thawk tan tawh a, SDC hi kumtluanin 99.75% nung reng tur a tih a ni.

State Data Centre hi Ministry of Communication & IT hnuaia Department of Electronics & IT sum pek vaibelchhe 30.88 hmanga din a ni a, sum hmuh zinga vbc.11.75 hi grant in aid leh a dang vbc.19.13 hi Additional Central Assistance atanga hmuh tur a ni. He centre hi department zawng zawngin an data pawimawh dahthat nan an hman bakah mipui mamawh ervice hjrang hrang pekchhuah nana buatsaih a ni a. Department hrang hrangin a hranpaa data centre neih ngai tawh lovin in hmantawm tur a ni.

State Data Centre-ah hian sawrkar department-in an data leh information him tak leh tha takin an vawng thei tawh dawn a, Department-ten file hlui dah that nan hmun zau tak an mamawh thin kha mamawh a ni tawh lovang a, tin, department-ten mipui hnenah darkar 24 service an pe chhuak thei tawh ang. Tunah hian SDC hi Secretariat Annexe I building chhawng hnihna ah bun a ni a, a zau zawng hi 3600 sq.ft. a ni.

He project tihpuitlin nan hian consultant ah Wipro rawih an ni a, M/s Prithvi Information solution Ltd. leh an thawhpui M/s Payoda Technologies Pvt. Ltd te’n an enkawl ang.

Facebooktwittergoogle_plusredditpinterestlinkedinmail

Login

Lost your password?