Monthly Archives: July 2014

Sikul kai hun tih danglam a fuh em?

Mizoram sawrkar chuan Mizoram sikul kai leh ban hun sawn hma a tum a, thutlukna mumal erawh a la siam chiah lo. Mimal leh pawl anga duh lotute pawhin an awrawl an chhuah mek bawk a ni.

Tunlaiin naupang zan an meng rei tlangpui a, zing thawh an harsat thin a, thenkhat chu zing kar nei hman miah lovin sikul an kai hman tawk a, khaw eng hman dan a tangkai tawk lo fo thin. Naupangin mahni inthunun a zir theih beiseiin sikul kal hma hi rawt a ni pakhat a. Kan khawpui traffic tawt lutuk avangin mipui kan che hlei thei lova, sikul kai hun leh pisa kai hun a inang thin a, traffic tih thawlna atan sikul tan hun sawn hma hi rawt a ni bawk a ni. Heng rawtna hian tul lem lova sum luangral tur a ven theih a rinawm a, hlawk zawkin khaw eng kan hman theih beisei a ni bawk a ni.

Sikul kai hun sawn duhlo tute chuan sikul kalkawng a inchen loh avanga chaw ei hun bi a buai theih dante an sawi tawh a, sikul bana naupangin hun awl a neih tam tha an ti lo a ni. Traffic ngawr ngawr kan en chuan khawpui leh khaw te zawkah lirthei tam lam a inthlau hle tih a lang mai a, tun dinhmunah chuan khawpuiin an mamawh hi hmun dangah an mamawh lo thei bawk.
Hnam thenkhat chuan inthlak danglam an ngai thei lo hle thin a, hma an sawn hlei thei lo fo. Hetiang chiah hian Mizote pawh hian thil inthlak kan ngaitheilo fo thin. Sikul kai leh ban hun danglam tur pawh hi vawi lehkhata inthlak thut tur a nih avangin nunphung a nghawng dawn a, hei hi pawm har kan tih lai ber chu a ni. A thim zawnga thil kan thlir vek chuan thil theih a awm ngai dawn lova, sut pawp ngaih hun a awm thin.

Hetiang hi ni mahse theih ngang loh thil a awm a, heng hi sawrkarin bihchiang sela a tul a nih chuan hmathar a la mai tur a ni. Chhungkaw tam tak chu an vaia eizawnga chhuak, an fate sikul bang chiauau thei lo an ni a. Sikul ban a hma phei chuan awp lovin rei tak naupang an awm dawn tihna a ni. Sikul banah thil dang zir sela tih ngaihdan a awm a, hei hian inhnialna a chawk chhuak mek a ni. Mizote hi fate thuamhnawah kan huai viau laiin thil dangah kan kawm nia a lan chang a awm thin a. Nu leh pa thenkhat tun dinhmuna thei lo nia inngaite hian an tum tak tak chuan an theih mai a beiseiawm a ni. Eizawnna leh dinhmun a inan loh em avangin tlin thlawt lo an awm bawk ang. Sikul kai hma a tlu ta a nih pawhin mipui harsatna sukiang tur hian thutlukna siamtu chuan remruatna a nei turah ngai ila.

Eng pawh nise, sikul kai hun hi awmze nei lova sawn hma lutuk a awm thei a, sikul kai leh pisa kai hun inrual te pawh rilrua dah tel a pawimawh ang. Sikul kai leh ban hun hi sawn a nih chuan khaw eng kan hman dan a tangkai zawk ngei anga, tunah harsa hrih deuh mahse a rei hnuah chuan ngaiah kan neih mai a rinawm.

Facebooktwittergoogle_plusredditpinterestlinkedinmail

Press conf.

July ni 29,2014 (Thawhlehni) chhun dar 12 hian Mizo Zirlai Pawl hruaitute chuan Aizawl Press Club ah chanchinbumite an kawm dawn a, School tan hun sawn hma chungchanga an ngaihdan an sawi ang.

Facebooktwittergoogle_plusredditpinterestlinkedinmail

Lak theih

Indopui II na hunlaia sipai tang te leh ‘V’ force pasaltha ‘B’ te tan naktuk July 28,2014 atang hian District Sainik office, Khatla ah thla hnih lawmman lak theih a ni ang.

Facebooktwittergoogle_plusredditpinterestlinkedinmail

Nuai 79792

Mizoram a NLUP bultan leh kum 2008 atangin NLUP atan nuai 79792.31 hman a ni tawh a, heng zinga nuai 71886.78 hi beneficiaries te hnenah pek a ni a, NLUP special scheme ah nuai 119.60 hman a ni tawh tih tunhnaia session neih zawh takah Er. Lalrinawma zawhna chhangin Agriculture Minister R.Lalzirliana chuan a sawi.

Facebooktwittergoogle_plusredditpinterestlinkedinmail

Vawk 243 tihlum

Vawk natna chi khat Porcine Reproductive and Respiratory Syndrome avangin Mizoram ah vawk 243 tihhlum a ni tawh a, vawk 7621 thisen test a ni tawh bawk.

Facebooktwittergoogle_plusredditpinterestlinkedinmail

131 thi tawh

Kum 5 kalta 2010 atanga May 27,2014 inkar chhung khan Mizoram ah ruihhlo vangin mi 131 an thi tawh niin Excise & Narcotics Department chuan an chhinchhiah a, kumin bika thi zat hi 22 an ni.

Facebooktwittergoogle_plusredditpinterestlinkedinmail

Kan Hnam Rohlu a Him Zel Ang Em?

Pi leh pute atanga kan rochun thawmhnaw, thiamhnang leh la deh lama kan ro hlu neih chi hrang hrangte hi ngaihhlut nachang kan hre deuh deuh zel a, sumdawnna atan te kan hmang ve ta a, hnam dangte pawhin min hriatsak ve ta viau mai a. A lawmawm hle a ni. Mahse, hetia Mizo silhfen leh hmanraw chi hrang hrang khawvel hmuh tura kan pholan mek lai hian a humhalhna lampang hi kan hlamchhiah rei palh ang tih a hlauhawm khawp mai.

Kan hnam incheina/silhfen chi hrang hrang – ngotekherh, kawrchei, puanchei, hmaram, khumbeu leh a dangte hi hnam dang neih ve loh, kan ta liau liau a ni. Heng puan mawi tak tak rawng inchawih mawi em em mai te hian kan pi pute ropuizia a tarlang a, tunlaia kan phalrai viau takah hian company thenkhat chuan an lo hmu tai viau tawh mai thei a, sum hai luhna tha tur nia ngaiin a neitu nihna te hial an lo beisei reng tawh mai mai thei a ni. Chutiang chu hmun dangah pawh a thleng fo tawh nghe nghe. Mi tam takin kan khawtlang nun tihzalen an duh mai bakah sumdawnna lamah pawh inhawn zau ve tawh a, hnam dangte nena inchiahpiah tak tak tawh an duh lai hian kan hnam himna tur leh kan pi pute rohlu himna tur hi kan ngaihtuah thlen a ngai hle tih erawh hriat a tha.
Mihring thiam thilte hi dan hmang humhalhna a awm a, chu chu Intellectual Property Rights (IPR) an ti a. Chu dan (chanvo) hmang chuan miin ama thil hmuhchhuah/siamchhuahah neitu nihna an nei thei a, mi dangin an lo chuh ve ngawt thei lo a, a neitu thu lo chuan lo siam chhuah leh hralh chhuah phal a ni lo bawk. Intellectual Property Rights hnuaiah hian neitu nihna hauh theihna chi hrang pasarih a awm a, chungte chu – Copy rights & related rights, Trade marks, Geographical Indications, Industrial Designs, Patents, Layout designs of integrated circuits, Trade secrets (protection of undisclosed information) te a ni.

Hman kum lawk khan Indian Chamber of Commerce (ICC) chuan Naga Shawl leh Assamese gamosa te tan registration an dilsak thu chanchinbuah tarlan a ni a. Hetianga hmun pakhat huam chhung bika thil siam chhuah/thar chhuahte leh ram bial khata chengte thiam thil bik humhalhna hi Geographical indication (GI) hmanga neih theih a ni, Himachal Pradesh-a an siam Kulu Shawl te, Malabar thinghmarcha te, Assam maimaw puan (Muga silk) te pawh GI-ah ziah luh a ni tawh nghe nghe.

Kan hnam silhfen lar tak Thangchhuah kawr kan tih mai hi tualchhung handloom-a tah a ni a. Hman deuh lawk khan phai lama puantahna khawl tah, a rawng leh a zia ang chiah, hak nuam zawk a lo chhuak a, mi tam takin an ha sup sup a nih kha. Hei hian ngaihtuah a tithui khawp mai. Kan hnam puan chi hrang hrang, rawng inchawih mawi tak takte hi design nalh tak taka siamin hnam dangten sumdawnna atan an hmang mai ang tih te hial a hlauhawm tan ta. Chutiang chu a thlen lohna turin thuneitute leh a kaihhnawih pawl hrang hrangten hmalak thuai a ngai a, IPR (or GI) hmanga kan humhalh thei lo a nih pawhin sorkar laipuia Ministry of Textiles hnuaia dan awm sa hmangin kan hnam puante hi tualchhung handloom-ah chauh tah a nih a, phai lama khawl lian (Power loom) hmanga siam chhuah phal a nih lohna turin hma a lak a ngai ta a ni ber.

Silhfen lam thil mai bakah kan ram hmul (kan rama tualto thing, thlai leh hnim) chi hrang hrang damdawi leh thil dang atana kan hman thinte hlei hlei hi humhalh a hun. Mizoramah hian ramhmul damdawi (medicinal plant) tam tak a awm a, la hmuhchhuah loh pawh thahnem tak a awma ngaih a ni. Kan hriat tlanglawnho chauh pawh hi zir chian tham a ni. Thisen sang enkawlna atan Phuihnam/Sertawk mu kan hman te, pem enkawl nan thasuih, pum na leh kawthalo enkawlna atan ailaidum leh Sai thatzia te hi kan hre vek awm e. Heng kan tualchhuak damdawi hlu tak takte hi damdawi siamtu company-ten an la rawn hre fuh anga kan hriat loh laiin sumdawnna atan an hmang mai ang tih a hlauhawm hle a ni.

Kerela-a cheng, Kani hnamte chuan hun rei tak chaw ei mumal lo a awm chungin hna rim tak an thawk thei a, an taksa a chak reng tho tih an sawi thin a. Chutianga an awm theihna chhan chu ni tin thei chi khat ‘Aarogyapaccha’ an tih mai chu an ei thin vang a ni. Chu chuan Tropical Botanic Garden Research Institute (TBGRI) a thawk scientist-te beng a verh ta hle a. An han zir chian hnu chuan damdawi tha tak a siam theih tih an hmuchhuak a. Chu damdawi Jeevani siam phalna chu kum 1995 khan Arya Vaidya Pharmacy, Coimbatore hnenah pek a ni a, hmasang atanga chu thei neitu Kani hnam chuan an hriat loh karin an rohlu tak mai chu an chân ta daih mai a. Mi thahnemngaiten hma an lakpui chung pawhin tih vak ngaihna a awm tawh lo.

Keini pawh hian kan rama tualto, hmun danga awm ve lo thing leh hnim chi hrang hrang, pipu atanga kan inrochun te hi fing taka kan venhim a ngai tawh. Kan ramah hian hmun dang atanga lokal scientist an lo lang leh hlawl thin a, khualtha thlenin kan lo thleng fo a, an duh duhnaah an tei vel a, restricted area thlenga kalte pawh an awm thin. Hetia kan inphalrai viau lai hian kan thil neihte hi ngun takin an lo zir ru reng mai thei a ni. Ram danga atanga lokal mi thiamte laka kan ram leilung, nungchate, thing leh mau leh hnimte kan phalrai tawh lo ila a tha ngawt ang. UN hnuaia mi pawh nise, Japan atanga lokal mi thiam turu tak pawh ni raw sek sek an cham chhunga uluk taka vil reng a, kan nungcha leh thil dang an paipawn ruk leh ruk loh thleng a endik vek ni a tha. Chutiang chu bio-piracy venna atan ram dangah pawh an tih dan tho a ni.

Kan hnam nunphung, kan hnam ziarang, incheina chi hrang hrang, kan hnam lam te bakah kan tualchhuak damdawi hmakhaw-sang atanga kan inrochun chhawn zelte hi dan hmanga kan humhalh ve a tul ta khawp mai.

Facebooktwittergoogle_plusredditpinterestlinkedinmail

Sawhkhawk (July 27, 2014)

Spelling Mistake in ngah lutuk hi chu ninawm ngawt mai, ni tin chhuakho ai pawhin nangni kar khata vawi khat chhuak hian in ngah zawk, chhuahawm loh ve tak a ni. – 9862924656

Proof reading neih a tha, hawrawp dik lo a tam em mai! – Msv Pathlawi

Vawi hnih ka sawi tawh, vawiin thleng hian engati nge Zalen hi chhut sual a la tam em em, ngahhlelh man a awm lo. A awmze bo thakte a ni, khawngaihin proff reading hi lo ngai pawimawh hram teh u. – 9868578672

Pu Editor, Ka text, ‘Synod puipate….’ tihah khan .. ‘Upate hian Thawhlawm Ip hi Sunday Zing kan zing zu inna te inah rawn dah…..’ tih tur a ni e, ka lo type sual palh. A tluanin min lo tihchhuah leh la ka va duh em! – Anti-Synod

Om oma Pu khan zu hi sual tin reng bul Bible-in a ti em ni? Khawi laiah nge i hmuh? Tangka sum ngainat hi sual tinreng bul a ni tih a ni zawk. – 9436195371

Zu hi rui lova in hi an vang khawp ang. Rui kan teh dan azir mai mai a ni. A ruihna hi awm lo se tumahin an in peih ka ring lo. – 9856950562

Pawisa khelh chingte leh zu ruih hmang te, an hnena zu in tur hralhtu leh an hnena Zu ZAWRH PHALNA PETU nen HREMHMUNAH AN LIAM TA DIAL A. He hla hi a thleng dik dawn a nih chuan A VA RAPTHLAK DAWN EM!! – R.L.Tawna DT

CM LAL thanhawla hian tul leh mamawh ang zelin sorkar motor lei a tum zel bawk tih thu House a hrilh bawk a, heti a nih chuan engineer – EE leh SDO te motor turte hi lei ve se, office-a kawl mai mai tur lei teuh ai chuan anni hian an mamawh nasa si. Ram hruaitu fing leh nachang hria hi kan va mamawh tak em! – RAMHMANGAIHA

Zy hi a pawimawh khawp mai, a chhe lam leh a tha lam a tam sia, ngaihdan a tam khawp mai a, a duh leh duh lo inhnial ula, sorkar hian a tih tur ti sela, pawm mai ila a tha mai lo maw? Zu chauh lo pawh a thatna leh that lohna a tam tho sia. – 9612204561

He Mizoram, Kristian ramah hian Mizo Kristiante hian eng nge sual/tha lo kan tih bera kan huat ber tur hi le? Kan Bible-in sual/tha lo a tihte hi a then tha kan ti ang a, a then tha lo tiin kan lo thliar ve ngawt dawn em ni le? Bible-in sual/tha lo a tihte chu tangka sum ngainat te, ei ruk te, rinawm loh te, duhamna te, mahni hmasialna te, uire te, tualthah te, pawngsual te, zu te, chawhpawlh nun te leh a dang tam takte. Heng sualna chi hrang hrangah hian Mizo Kristiante kan fihlim felfai tak tak em le? Mizoram, Kristian rama sual ber leh sualna ber, khawtlang leh Kohhran tibuai bertu leh ram hmasawnna tur dal tlattu chu zu hi a lo ni e kan ti theuh mai dawn em ni le? Pathianin eng nge sual a tih ve le? – Tea, Azl.

Sikul tan hun chungchanga mi thiamte ti ti kha ka lo ngaithla a. Anni ang, retheihna hre thiam ve map lo tan chuan a tha phian mai thei, keini ang duang tan chuan fate ngaihtuah leh rilru hah ngawih ngawihin hun kan hmang tawh dawn a nih hi. Zingah exer te lain hotu (zirtirtu) te hnuaiah an zir ve thin a, tunah engmah tihna hun an neih tawh lo’ng. An hotute chhun lamah hna an thawh a ngai ve si. Chawhnu banah thil zirtir vena tur kan nei si lo. Keini ang hi Aizawla chengah hian za zela 80 vel kan ni dawn si a, tun atanga kum li/ngaah chuan khawikipah pawh sualna a pung dawn a ni. Azu an phalrai dawn bawk nen, rilru a va han hah tak em, kan rethei em a ni! Roreltute hmakhua thlir sual vang a ni e, tih hun a la thleng ngei ang. Lo ngai reng rawh u’n. – TC VARTE

Mizoramah hian eng hunah pawh an fate sikul kal se buai map lo tur hi zaah 10 vel hi chu an ni tawk ang. An fate sikul banah eng pawh zirtir se buai map lo tur. ZIr hun sawn hma avanga thiam phahna tur a awm lo va, thiam phah dawn ta se mi tinin an duh vek ang. Chuan maw, a tithei leh neinungte khan lo hre mawlh teh u’, sikul tan hmaa ban hma chuan nangni angin kan fate zirna tur dang pekna kan nei ve dawn si lo, eng nge an tih tak ang? Sualna puak chhuah mai lo chu. A hun pangngai pawh hian ven sen an har a nia, tihhma a nih chuan tun atanga kum nga velah chuan zir chhuak tak tak mang si lova hna thawk peih lo, chhungkua leh khawtlanga hnawksak an tam ngawt ang. Chu chu kan hotuten nu leh pate duh lo chunga ruahmanna in lo siam vang a ni thei ang. Chungte chu kan rah seng tur chu a ni e. – MIPUI AW

AMC-in A Sum hman tur hmang zo lovin Rs. Vbc 3 lai a ti lapse niin sawi a ni leh ta, a va pawi tak em! Kan Biak In bul step te, kawr te, side drain siam tur a tam tehlul nen. AMC?changtu Minister pawh hi sports lamah fak a phu viau laiin AMC lamah tan a lang a ngai niin a lang. – M2

Kan vengah chuan gas sem a nihin Local Council ten bur ruk zel quata an nei thin a an ti a. Gas semna hmun hi point li a awm bawk a, hmun liah gas sem a nih chuan bur 24 kawng a bo tihna a nia. Sorkar lah hian mipui hmakhua ngai nia insawiin special permit te, VIP quota te a titawp lawi sia; mahse, a ni lo lamah hetiang zat hi a liam leh tho si avangin bang chhak sahthlaka bang thlang bel an sawi ang chauh kan ni mai lo maw? – 8575321003

SAWHKHAWK of the day
AMC Chairman paih tuma an sawihona ka ngaihthlak atanga a bul tumtu ber nia ka hriat chu ZNP Member pahnihte an lo nih kha. Anni pahnih kha anmahni thlang tlingtu party chhuahsana party thar dina insawite kha an ni a, heng mi pahnihte hian an duh leh tum ram thlen ahnekin, an intheh dere zawk niin ka hria. AMC kaltluang lai an tihmelhem a, Chairman tha tak thlak a ngaih phah bawk. An thusawi dan phei kha chu anmahni mawng hlimna, upaten buichhia lai lova inpuang an sawi ang mai an nih kha.A pawi ta ber chu AMC sorkar hmasa berin an term hmang zo tura mipuiin kan duh leh beisei, kum khat emaw lek term an la neih hmang zo thei lova an awm hi a ni. Hetiang thil tenawm titute avang hian history tha lo hi a thlen nawn tawh loh ka beisei. Pu C.T.Zakhuma hi mi tha, dik taka thil ti thin, ka mi hriat chian a ni a, ka ui khawp mai. Dam reng rawh se. – Vanlalchhuanga

Facebooktwittergoogle_plusredditpinterestlinkedinmail

Sakhua (July 27, 2014)

Solfa Training
Aizawl; NEI UPC Kohhran zaipawl General Choir-te chuan Kolasib venglai Bial PYD Music-sub Committee-te sawmna angin July ni 17-19 chhung khan Solfa Training neih a ni a, General Choir conductor Upa K Lalngilneia’n Training hi a neihpui. July ni 20 khan General Choir-te hian ASC Home Khuangpuilam-ah rawngbawlna an nei a, Home naupangte tan thilpek an pe bawk.

Aizawl-ah Intodelh Seminar
Aizawl; Mizoram Thalai Kristian Pawl(MTKP) chuan kumin an thurel umzuina kal zelah-ah July 26-27, 2014 hmang hian Aizawl khawpui huapin Intodelh Seminar – City Church, Aizawl-ahan hmang dawn a. Programme hi nizanah tanin zanin thleng a awh ang. Seminar thupui chu ‘Thawhrimna’ tih a ni. He Intodelh Programme hi a thawhkhatna atan June 26-27 khan Hnahthial leh a thawh hnihna, July 12-13, 2014-ah Lawngtlai-ahte neih a lo ni tawh a, tun hi a thawh thumna a ni.

Tanpuina hlan
Aizawl; F Lalruata, Bungkawn Corps In, July ni 22 zing dar 2:30am vel a Geletine Bomb in a tihchhiat chu THQ chuan Rs.5,000/- in a tanpui. THQ aiawhin Major Muansanga Emergency Relief Secretary chuan he tanpuina pawisa hi an inah kalin a hlan a ni. Hetih lai hian, Robert VL Thlamuana, Treasurer TSAYC chuan Chhotagongrai Society Sipai Pawl Rubber plantation atan tanpuina Rs.20,000/- a pe a. Temple Corps Men’s Fellowship ten Central North Division huamchhung, Satarai-a thlanmual tur ram leina nan Rs.40,000/- an pe bawk.

Aluminium Mistiri Training
Aizawl; June 9 – July 23, 2014 chhunga Synod Social Front leh Freddy Enterprise inthurualin an buatsaih Aluminium Mistiri Training vawi 2-na chu tluang taka neih zawh a ni a, training kharna inkhawm hi Zirtawpni kalta zan khan Pi Zaii Hall, Synod Conference, Mission Vengah neih a ni. Training nei tur hian mi 20 thlan an ni a, Freddy Enterprise Building, Leitan-ah training hi an nei a ni. Training tan a nih atanga kar khat chhung chu theory-a inzirtirna hun atan hman a ni a, measurement lak dan leh thil dang pawimawh te zirtir an ni. Chawlhkar hnihna atangin tukverh frame siam hna an tan nghal a. July 7, 2014 atang khan an thil siam chhuahte a nihna turah an fit tan a ni.

Masihi Sangati Kendra thawktute Retreat
Aizawl; July 22 – 25, 2014 chhung khan Chanmari Kohhran Hall-ah Masihi Sangati Kendra thawktute Retreat neih a ni a, Speaker atan Upa Denghmingthanga, Kulikawn leh Tawng lettu atan Rev. R Lalthangvunga an hmang. Retreat-ah hian thawktu mi 164 an tel thei. Retreat-ah hian chawhma, chawhnu leh zanah inkhawm neih thin a ni a, zing karah Devotion leh Zan Inkhawm banah Fellowship neih thin a ni bawk.

Inkhawm aping hian Speaker hnen atangin thuchah ngaihthlak thin a ni a, Siyon Swaram, Aizawl West Area Standing Choir, Aizawl S/W Area Zaipawl, Mission Veng Masihi Sangati leh Chawnpui Bial Masihi Sangati Zaipawlte an zai bawk. July 25, 2014 (Zirtawpni) chawhnuah General Discussion neih a ni ang a, zan inkhawmah Rev. PC Pachhunga, Executive Secretary i/c Mission hnen atangin Pathian thuchah ngaihthlak a ni bawk.

TKP Day vawi 63-na hmang dawn
Aizawl; July ni 30, 2014 (Nilaini) hi Thalai Kristian pawl(TKP) din champha vawi 63-na a ni a. Hemi ni hi Mizoram pumah TKP member ten an hmang leh dawn a ni. MTKP atangin Progamme a hranpa-in siam a ni lo va, Unit tinin tul leh tha an tih angin Programme hi an siam turin a ti a. TKP Day hi Kohhran leh khawtlangin a hlawkpui theih nana hman tum theuh tur leh Social Service pawh neih ngei tum tur te, Unit tinin TKP Day pual Inkhawm buatsaihin, programme pawh uluk leh tha taka duang turin MTKP chuan a chah a ni.

Kumin TKP Day thupui chu ‘Krista leh Kohhran tan’ tih a ni ang a. Inkhawm thawhlawm awmin chu chu Bial kal tlangin MTKP Headquarters-ah thehluh tur a ni ang.

TKP hi hun engemawchen kohhrana thalaite puala rawngbawlna huang hran siam tura uluk leh fimkhur taka an ngaihtuah hnuah July 30, 1951 khan Serkawn-a Thalai rualte leh Kohhran Upate chuan kan Zosap Missionary-te duhsakna leh kaihhruaina hnuaiah Thalai Kristian Pawl hi an din a. Hruaitu hmasa te chu President Lungruala; Vice President Vanlalkunga; General Secretary K Lalliana leh Treasurer T Ropianga te an ni.

Facebooktwittergoogle_plusredditpinterestlinkedinmail

Ka Huang (July 27, 2014)

Kan tlangval ve hun laia Aizawl South lama nula tlangval khawtlanga inhman dan tlangpui chu ka sawi liam luam tawh a. Keini Mission Veng Presbyterian kohhran chuan mi harsa chawm an nei thin a, an zinga pakhat ka hriat reng thin chu Pu Thangbula a ni, Sunde Sikul naupangte hian an tlawh thin a, a chang chuan thawhlawm chung hnih khat lek te pawh an pe thin. Farnu pakhat, Pi Hangi kan tih mai a nei a, amah chu thutunga tawlh ringawr, tawng pawh fiah lutuk lo a ni. A farnu chu ka tleirawl laiin a thin a, thlan ka la lai lo, mahse intihtlangvalna ni maw? an inah chuan zan thum emaw ka riak ve a, Lianzoa nen. Tuium-hun bulah kan mu ve kak mai a, Pu Thangbula thlarau chu kan hlau hle lawi si! Engle khawle, kum 15 chu ka la tling lo tih chu ka hre thei. Zingah tuiumin tui kan zuk chawi ve nal bal mai. Tlangvalin thingte an phurhsak a. An khawngaihthlak lehzualna chu a mi ang zawkin a boralsan ta si a, a u Thangbula chu Mission-in a chawm ta ni berin ka hria. Mission Venthlang kawn (Vanlalropuia inhmun)-ah khuan di in te tak te an saksak a, hmeichhe thingphur, a in kal pelho chuan fak hnih khat lek an tinsak thin. Tui pawh thenawm tlawmngaiin an chawisak deuh ber.

Kum 1950 lam em ni ta, a damlo ta mauh mai a, Mission Veng nula-tlangvalin an/kan menpui ta ngat ngat mai a, kohhran upa, tlema la valai deuhte pawhin an rawn menpui ve bawk. Chutah chuan a ni, kan val upa Tawkruaia fakawm ka tih em ni. Zosap chawchhum a ni a, khawvara sapin thleng chu – chuti chung chuan chhuna mutna hun nei miah loin zan nga zuk tlaivar a! A chatthla mai thei si lo a, chhungte a nei mumal si lo, nula tlangvalin an buaipui tawp ta ringawt mai a ni. Ka kal ve tawh chuan nula tlangval 15/20 vel chu an lo awm ziah mai, a damlo berin that lam a pan si loh avangin a hnukchah hun nghah a ni ringawt mai a, tlaivar loh hleihtheih pawh a ni lo.

Damlo ka awmpui ve zinga mak ka tih em em pakhat chu Pi Lianluti a ni. Ani pawh a chat mai thei si lo, han dam tha leh chi ni bawk si lo, tlawmngaih chhuah loh theih pawh a ni lo. Zan engzah nge ka tlaivarpui ka hre chiah lo, zan khat chu Sapthlenga (Rinthanga) nen Zaua nen kan 3-in kan meng a, pitar chuan a khup vei lam tawmin a zangthal a, Sapthlenga chuan siam that pahin a tawm chu pawh char a han tum a, a lo khawng tlat tawh chu niin, a kereka vuana a han pawt chu a pum tawlh ta mai si, timar tur chuan tihluih nghek a tul si, a la thaw bawk si, a ngaiin kan dah ta ringawt. Chawlhniah a lamhnaite lo kalin (chhuatlaia mu a ni) pawn atanga ban zuia fanghmir tam em em insul zut zut mai mai an han hmuh chuan hrikhrah (tunlai thangthar chuan in hre tawh lo mai thei, hrikhrah chu (lice) a var a ni hrikpui, lua mi aiin a lian hret mai thei) taksa kua (pore) atang hian a lo chhuak mai a ang khawp mai, balh vangin) hi fanghmir a taksa lam atanga lo chhuak chuan an pu var nguai nguai mai a, a lut lam an inzui mup mup bawk a, chhuat hnuaia ban fanghmir lo chhohna chu vut sain an phul hual a, rei lo teah an insawn leh thin. Kha hrihhrah sang tam fe chu an hawnin ka ring.

Hrikhrah ka sawi laklawh a, ka zawm lawk dawn. Ni 31-3-1966 khan Zssam Rifles-in hostile manin kan Office atangin min man a, thawmhnaw ngai reng hain inbual miah loa quarter guard-a min hah dah chuan April 3-ah te chuan kap thak kan kawm ngawt ngawt a, kekawrte thuina velah hian hrikhrah kan man a, a tui a de tuar thei mai nia. Zah a dawn theih loh, mahni hrikhrah kan dak kan dap mai a ni. Taksa bal, hnawng, lum val atang hian a lo piang em ni tehreng ni; hrikhrah nei lo pawh zuk awm lo ia, zah thup nan ‘Hetiang huna hrikhrah nei lo chu mi ang lo’ te kan ti vel mai mai a ni.

Kha pitar kha kan awm lai ngeia thia kan duh tehlul nen a thi thei lo. Pi Daithangi (Aithulha nu) lah chuan tTawngreng (min koh dan), i pi khan sahuai thing vawn a phurh vangin a thi dai thei lo a nih kha, thih daihtir mai la, a chungah khan hmawlhte elh tliak la, a dai mai ang,’ min ti a. Keiin, ‘Ka thian ve lo, nang a tih dan hriain han ti mai la’ ka’n ti dek dek a, ‘Tualthahte ka duh emaw i tia lo?’ a ti vin teu mai bawk si, tlai lamah kan awm loh laiin a thi dai ta nge nge a ni.

Khang hun laia kan khawsa dan te kha tun atanga han thlirkir chuan mi â let tawp kan ni ber awmin ka hre lehling tawh. Tunah hi chuan engkim mai, nula tlangval tlawmngaih dante hi a fim kuau maiin ka hriatsak tawh mai. Tlangval tam tak chuan lu an men tlaivar leh a tuk thlan laih an awl ta mai emaw ni. Zualko awm tawh bawk si lo, lumen tlaivarpuitute lahin awhchiarte an pir nghe nghe emaw ni lawi ni, kan khawsak a sang ta a, kan changkang ta a, engkim mai hian chin a nei ta deuh vek emaw ni. Mi zawnte lah a awm tawh hek lo. Tungah chuan tlangval hna hi hmanlai lak chuan a tlem deuh ta hle ni maw ka ti mai thin. Nge ka hre ve thiam phak lo zawk? Tunlai nula tlangval chu vannei thlawtin ka hre thin, keiniho kha chu kan inâtsiak kha a ni ber mai a, thiante aia thawh tam tum vek kha an ni ber mai a, tumahin a thawh tam theik bik chuang si loh. Kha tak kha Mizo tlawmngaihna an tih hi a nih loh pawhin a teuh viauin ka ring thin. Hei khawi khawiah emaw hi chuan hlawhfa tih ang rengte thlan an laihtir ta, a changkang ngawt mai, kamding tam vengte pawh a ni ang e. MAHSE zing dar 5-7 vel hian thlan khat na na na chu laih zawh theih mai awm, dik tak chuan thlan khat laiha vawi li vawi nga luh nawn hi a har thin khawp kha. Office kal hmaa thlan laih hi chu kan val upa (YMA) te hian rawt sela chu kan tlin em em tho rihin ka la ring ve tlat nia. Dik tak chuan kan hun lai pawh khan thlan lut loa hawng leh ta kan tam fu tho thin. A?lut ngai sawmhnih khat hi an ni chawk mai. Tunah te hian eng tak ang maw?

Hmanah chuan lumen ngai mitthi an awmin tlangval hna chu – thlanlaih, zualko kal, tlaivar, mitthi in riah a ni tlangpui. Tunah hi chuan tlaivar, thlanlaih leh mitthi in riah. Zualko kal hi tunah chuan a ngai ta lo a ni ber a, sawi leh sawi hni veng khawimaw lai laiah chuan thlan laih pawh a ngai ta lo a nih ber awm hi.

Facebooktwittergoogle_plusredditpinterestlinkedinmail

Login

Lost your password?