Monthly Archives: August 2014

AMC Pisa kai tur dan tum; Thawhtanni chawhnu ah inbiak beisei

Aizawl August 30; Pawl hrang hrang telna Joint NGO Coordination Committee chuan AMC Licensing Regulations duh loh entirnan naktuk hian AMC pisa kai tur chu dan an tum a, hetih lai hian naktuk chawhnu lamah AMC a sawrkarna siam mek MNF, MPC leh ZNP hruaitute leh NGO hruaitute hi remna zawngin inbiak an tum.

Joint NGO te thilphut chungchang hi Zirtawpni khan MNF, MPC leh ZNP party hruaitute chuan an sawiho a, ‘tlawmngai pawlte nen inep chu a tha lo e’ tiin NGO te duhdan anga kal mai nise an ti a, an thutlukna hi Zirtawp zan dar khan Joint NGO Chairman Lalbiakzuala hnenah an thlen nghal a ni. Party pathumte thil thlen chungchang ah hian Joint NGO lam chuan meeting koh nan hun a tepter tawh bakah ruahmanna thui tak lo kalpui tawh anih avangin AMC pisa kai tur dan chu a hmaa lo rel tawh angin kaltlang pui phawt nise, Thawhtanni chawhnu lamah party aiawhte nen hian Thuampui Branch YMA Committee room ah inbiak nise, thu tlukna a zirin pisa kai tur dan hi tihtawp nise an ti nia thudawn a ni.

Zalen palaiin a biak naah Central YMA President leh Joint NGO Chairman ni bawk Lalbiakzuala chuan party aiawhte chu a inah an lo len thu leh an inkawm thu a sawi a, ‘Keimah chuan thutlukna ka siam mai theih loh thu ka lo hrilh a ni,’ a ti. CYMA President chuan naktuk AMC pisa kai tur dan naah hian CYMA OB, CEC, Sub-Committee te bakah Aizawl hmarlam Branch te duty turin an ruat tih a sawi a. Anni bakah hian zirlai pawl leh midang pawh an duty ve dawn tih a sawi bawk.

AMC Chairman Zarzoliana chuan Joint NGO te duhdan anga sawrkara thu thlen chu an hreh lo tih leh an thu a nih loh thu Zalen palaiin a kawm naah a sawi a. “Joint NGO te thilphut chungchang hi hmanni lawkah kan sawiho tawh a, mahse a tlang loh avangin hun remchang dangah sawi leh nise kan ti a, ngaihtuah leh kan tum lai tak a ni,” a ti. AMC Chairman chuan Joint NGO te chu an do lo tih sawiin, “NGO te thilphut hi kan duh lo bur a ni lo a, mahse Board of Councillor meeting in a pass ngai a ni a, mahse a tlang loh avangin eng mah kan ti thei lo a ni,” a ti bawk. Thawhtanni ah Pisa kai an tum leh tum loh zawhna chhangin AMC Chairman chuan, “Office kal hi kan duty a ni a, kan kal theilo anih erawh chuan kan sawi thei lo,” a ti bawk.

Party 3 hruaitute ruahman angin AMC hian NGO te thilphut ngaihtuah tur hian special meeting koh an tum a, tunkar hian meeting hi neih hman tum a ni. Joint NGO te hian AMC Licensing Regulations ah hian Mizo Tribal Certificate, EPIC of Mizoram leh Permanent Residential Certificate te thil tel an phut a ni.

Facebooktwittergoogle_plusredditpinterestlinkedinmail

Serchhip District a NLUP dawng tu mi 23 te insawifiah turin ti

Aizawl; Serchhip DC Juhi Mukherjee chuan an district chhunga NLUP dawng tu 23 te chu insawifiah turin an ti tih a sawi.

Chanchinbumite nen an inkawmnaah DC chuan NLUP chu January ni 14,2011 khan Serchhip district ah bultan a ni tih a sawi a,district hlawhtling ber ni turin tan an la mek tih sawiin Agriculture hnuaia chhungkaw 10 te chu hmalakna mumal hmuh tur a awmloh avangin insawifiah turin show cause notice pek an ni a, an intiamkamna ang ngeia an pawisa lo dawn tawh te pawh rul let turin hma an la mek tih leh Soil & Water Conservation hnuaia chhung kaw 13 te pawh show cause notice an pe leh tih a sawi.

Serchhip DC chuan Line Department dangte pawh an beneficiaries te hnathawh dan enfiah sak a, ti tha duhlo te chungah action la turin an hriattir tawh niin a sawi a. “Chhung-kaw tam tak chuan NLUP hi malsawmna hnar a ni tih hriain nasa takin tan an la a, an thawhrim rah an seng mek a ni,” a ti bawk.

Serchhip district a chhungkaw 9491 chuan NLUP an dawng tawh a, Horticulture trade thlangtu an tam ber a ni.
Agriculture 2100
AH & Vety 1711
Env.& Forest 144
Fisheries 200
Horticulture 2931
Industries 1458
Sericulture 209
Soil & WC 738

Facebooktwittergoogle_plusredditpinterestlinkedinmail

Damdawi man tlawm zawk ‘Generic Drugs Store’ hawng hnai

Aizawl; Mipui nawlpui leh mi harsa zawk ten man tlawm zawka an lei theihna tur ‘Generic Drugs Store’ chu kumin chhung hian Aizawl Civil Hospital compound chhungah hawn hman tum a ni a, hemi atan hian thil tul awm ang angte buaipui mek a ni.
Generic Drugs Store hi mipui tan a tangkai dawn avang leh sum tam tak kalral tur hum anih dawn avangin Chief Minister Lal Thanhawla leh Health Minister Lal Thanzara te chuan neih anih theihnan nasa takin sawrkar laipui ah tan an la a, an hmalakna azarah India ram state a a hmasa pawl ni turin he dawr hi hawn thuai tum a ni a, tunah hian license buaipui mek a ni. He dawr hi Aizawl Civil Hospital main building bula mitthi dahna in ah bultan phawt a ni ang a, a hnuah cabin bula building sak zawh anih hunah sawn tum a ni.

ACH Hospital a Medical Superintendent Dr. Rosangluaia chuan Generic Drugs Store a zawrh turin sawrkar laipui chuan item (damdawi) 361 a thlanchhuah/phal a nei tih a sawi a, mahse bultan tur an nih vang leh damdawi zawng zawng an mamawh vek dawn loh avangin mamawh zualpui chauh an zuar hrih dawn tih a sawi a. An damdawi zawrh chu Doctor te chawh turin an tilui dawn lo tih sawiin, “Doctor te chuan an duh leh thaa an hriat apiang an chawh thei dawn a, hmanglui turin kan ti dawn lo a ni,” a ti. Dr. Rosangluaia chuan Generic Drugs Store chu a bultan nan Aizawl Civil Hospital ah hawn phawt a nih tur thu a sawi bawk.

Damdawi hi Company ten an siam zawhah packing titu (Company dang) ten la in an hnen atang hian stockist/wholesale ten an la chhawng a, chumi hnu ah damdawi zuartu ten an la chhawng ve leh a. Heng te hian hlep neia thil an tih vek avangin damdawi man a to phah thin a. Tuna Generic Drugs Store neih turah hi chuan damdawi siamtu Company te kha direct in dawr an ni ang a, tuam mawi leh pawlhdal awm lovin a nihna ang angin zawrh a ni dawn a, damdawi pawhin hna a thawk chak zawk dawn a ni. Dawr hi peih anih hunah chuan tuna damdawi Rs. 100 man vela mipui ten an lei thin hi Rs.20 vela lei theih beisei a ni.

8 Generic Drugs Store hi Ministry of Chemical & Fertilizers hnuaia Department of Pharmaceutical hmalak na a din tur a ni.
8 Generic Drugs Store hi Rajasthan leh Gujarat ah te hlawhtling taka kalpui a ni tawh a, tunah hian Maharastra state ah bultan leh mek a ni.

8 Damdawi te hi sawrkar laipui in a man a bithliah zat ang chiaha hlep awm lova hralh tur a ni a, an hralhna atanga 15% chu a zuartu ten an hlawh ve dawn a ni.

8 Damdawi dawr hi sq.ft.120 aia te a ni tur a ni lo a, thawktu 3 tal a awm a ngai a, ni khatah darkar 12 chhung tal hawn tur a ni.
8 Generic Drugs Store a damdawi te hi tuna damdawi dawr ami aiin 70% vela tlawm zawk tura beisei a ni.

Facebooktwittergoogle_plusredditpinterestlinkedinmail

Rohluna leh OIL inkawm

Aizawl; Geology & Mineral Resources Minister H. Rohluna chuan Zirtawpni khan Oil India Limited Director (Exploration and Development) S. Mahapatra leh OIL (NEF)-a hotute chu a pisaah kawmin, Mizorama oil laihchhuah hna thawh mek a an thlenchin leh thawhho zel dan turte an sawiho.

Industries Minister chuan Mizoram sorkarin a theihna zawnah OIL hnathawhna chu tanpui a inhuam reng thu a hrilh a. Chutih rual chuan tuna OIL hnuaia thawk mek Mizo thalaite chu dah ngheh theih dan ngaihtuahsak turin a duh thu a sawi. Corporate Social Responsibility (CSR) hnuaiah OIL chuan tanpuina tha leh tangkai tak tak an pek thin chu lawmawm a tih thu sawiin, a dawng tur awm thlan kawngah a kaihhnawih department kaltlanga sem thin ni se, a ti bawk.

Parliamentary Secretary Joseph Lalhimpuia pawhin Mizorama OIL project hnuaia thawk tura Mizo thalaite duhsak bik ni se tih Sorkarin a duh thu chu sawiin, contract mai nilo, regular staff a Mizo thalaite chhawr an nih zel theih nan OIL hotute chuan hma la se a tih thu a sawi bawk.

Facebooktwittergoogle_plusredditpinterestlinkedinmail

Kawngpui sian nan $ Mtd 107

Aizawl, August 30; Mizoram sorkar leh World Bank hotute chuan Mizoram kawngpui siamthatna tur The Mizoram State Roads II – Regional Transport Connectivity Project ah inremna thuthlung August ni 28, 2014 khan an ziak. He project kalpuina atan hian World Bank hian Mizoram sorkar chu US Dollar maktaduai 107 a puktir dawn a ni.

World Bank Website in a tarlan danin he project hmang hian Mizoram leh Hmarchhak state dangte inkal pawhna bakah then-awm ram Bangladesh, Nepal, Myanmar leh Bhutan nena inkal pawhna kawngpui siam a ni dawn a, Mizoram chhunga inkalpawhna kawngpui awmsa Tla-bung kaltlanga Lunglei atanga Bangladesh ram ri Kawrpuichhuah thleng km 91 a thui te, km 27.05 a thui, Champhai atanga Zokhawthar inkar kawngpui leh Chhungkhum atanga Chawngte North leh South inkar km 41.07 a thui te thuamthat a ni dawn a, hei bakah hian km 330 a thui kawng thar siam a ni dawn a, he project kalpuina atan hian World Bank hian Mizoram sorkar ah US Dollar maktaduai 107 a puktir dawn a ni.

Mizoram kawngpui siamthatna tur the Mizoram State Roads II – Regional Transport Connectivity Project inremna thuthlungah hian finance ministry atangin Joint Secretary, Deptt. of Economic Affairs, Ministry of Finance Nilaya Mitash, Mizoram sorkar aiawh Resident Commissioner Ranbir Singh, leh Onno Ruhl, World Bank Country Director of India ten hming an ziak a ni.
Nilaya Mitash, Deptt. of Economic Affairs, Ministry of Finance chuan, Mizoram, Bangladesh leh Myanmar ram pathumte insumdawn tawnna tur kawng chu he project hian nasa takin a hawng zau dawn niin a sawi.

Facebooktwittergoogle_plusredditpinterestlinkedinmail

Tui in a lak ruang hmu

Aizawl; Zirtawp tlai ruahsurin a lak R.Lalremsiama (40) s/o Lalluaia, College veng ruang chu mi tlawmngai ten zan dar 10:30 velah an hmu a, tlaivar pui anih hnuah nimin chhun dar 12 khan vui a ni.

Thudawn danin R.Lalremsiama leh a thian 2 te hian tlai ruahsur lai khan College Veng leh Bethlehem inri-na lui, Pu Nghaka lui an tih chu an dai a,mi pahnih dang an chhuah hnuah Lalremsiama hi a awm rei fal a, chutih lai tak chuan tui alo lian thut a, tuilian chuan a la ta a. A thiante pahnih chuan tuilianin an thianpa Hume Pipe a khawhlut lai chu an hmu a, veng chhung mite hrilhin College veng YMA leh veng thenawm atangin mi tlawmngaiten an zawng zui nghal a ni. Ruang hi zan dar 10:30 vel khan a tlakna luiin Chite lui a zuk fin hma deuh lengkir hnuaiah thiin hmuh a ni a. A lu velah pem a awm nual a, kawr a lo ha tawh lova, kekawr erawh a lo la ha a ni. Zan thim hnuaia lui khawkrawk leh ram chhengchhe taka a ruang hmu hmasatute hi State Disaster Response Force (SDRF) te leh Adventure Club te an niin thu dawn a ni.
——–

Facebooktwittergoogle_plusredditpinterestlinkedinmail

39th Assam Rifles chuan operation

Zirtawp zana neih naah US pawisa tam tham tak an man a. 39th AR te chuan an thudawn bawhzuiin Intelligence hote ten Zanlawn khaw daiah TATA Sumo registration number MZ-01 J-6391 a chuang Khuplianthanga s/o Ginzakama, Champhai inti hnen atangin US dollar 48,700 an man. US pawisa an man hi India pawisa chuan cheng nuai 30 chuang a chhut a ni a, a hnen atang hian Myanmar mobile number engemaw zah awmna mobile phone man a ni bawk. Mi man hi court ah an hruai a ni.

Facebooktwittergoogle_plusredditpinterestlinkedinmail

Press kawm dawn

Thawhtanni dar 12 hian Joint Action Committee on Innerline Reserved Forest chuan Aizawl Press Club ah chanchinbumite an kawm dawn.

Facebooktwittergoogle_plusredditpinterestlinkedinmail

145 in Mit pe

Aizawl Civil Hospital, Eye Department chhinchhiah danin Mizoram ah midangte tana mit pe 145 an awm tawh. August 25 atanga September 8,2014 inkar hian Eye Donation Fortnight hman mek a ni a, he fortnight hi September ni 8 chawhnu dar 1 hian Aijal Club ah khar a ni ang.

Facebooktwittergoogle_plusredditpinterestlinkedinmail

BSF in dincham

Border Security Force, 42nd Battalion chuan naktuk Setember ni 1 chawhma dar 11 hian an awmna hmun Tuirial Airfield ah an dincham vawi 49-na an lawm dawn a, Chief Minister Lal Thanhawla chu khuallian a ni ang.

Facebooktwittergoogle_plusredditpinterestlinkedinmail

Login

Lost your password?