Monthly Archives: September 2014

Chakma te hi indigenous an ni lo – Tawnluia

Aizawl; MNF Senior Vice President Tawnluia chuan, “Mizo te hi he ram leilung fa, a neitu dik tak (indigenous) kan ni a, Chakma te hi indigenous an ni lo,” a ti.

Zirtawpni kalta khan Lengte khua ah he thu hi sawiin MNF Sr.Vice President chuan Congress hruaitute chu Mizo Nationalism a an chian loh avangin Indigenous awmzia an hre pha lo niin a puh a.Tun ah phei chuan United Nations (UN) in Declaration siamin ‘The Right of Indigenous People’, Sept. 13, 2007-ah a passed tawh a. India pawh a pawmpuitute zingah a tel nia sawiin, “hemi hmang pawh hian kan dikna leh chanvo kan au chhuahpui zel a remchang ta a ni” tiin a sawi a.

“MNF chuan he hnam rilru hi a keng nung zel dawn a. Kan hnam a dam nan kan theihna zawng zawng in Pathian leh kan ram tan kan thawk zel dawn a ni,” a ti bawk.

STEE Cat 1 a Chakma te MZP in paih an duh; indigenous ah an pawm lo.

MZP in Aug 12 ah Chakma paih turin lehkha H&TE ah thehlut.

Sept 25 a Cat 1 ah Mizo chauh dah turin inrem.

Sept 26 ah MZP in indiginous chu Mizo (native of Mizoram) hrilhfiahna rawtna a thehluh a ni.

Facebooktwittergoogle_plusredditpinterestlinkedinmail

Ngunchunga’n vawkte sem

Aizawl; Nimin khan AH&Vety Minister C.Ngunlianchunga chuan Champhai a chhungkaw 81 te hnenah Myanmar atanga lakluh vawkte a sem.

Vawkte semna hun, District AH&Vety Office, Champhai a neihah hian thu sawiin Minister chuan, “India ram hmundang atangin vawk note lakluh kan tum a, mahse a phurhluhna a hauhtak dawn avang leh an hriselna in a tawrh dawn avangin hmun hnai zawk atanga lakluh dan kan ngaihtuah a. Tun tuma kan sem hi vawk hrisel, test engkim paltlang a ni,” a ti. Minister chuan vawk vulhtute chu an ranvulhte taima leh hmangaih taka enkawl tura chahin thawhrimna nen umzui turin a ngen bawk.

Nimina sem tak vawkte te hi chhungkaw 81 hnenah 6 zel pek a ni a. Vety Department-a ran natna enfiah thiam bik te’n laboratory-ah computer leh PRRS test naa enchhin an ni a, an vaiin a him niin Department chuan an sawi.

Facebooktwittergoogle_plusredditpinterestlinkedinmail

Sum dawn hnu ni 5 chhungin RNTCP Mizoram-in district-ah pe hman

Central sawrkar-in state hnena sum kal tir dan a tih danglam avangin TB dona RNTCP sum chu H&FW Department chuan a dawn tlai phah a; RNTCP Mizoram account-a a luh atanga ni 5 chhungin district TB Society te pek hman an ni tih Zalen-in document a dil chhuahah tarlan a ni. He sum hlawm hi hnathawk hlawh atana Central in a pek thin niin contract hnathawk thla 6 hlawh la tawh lote’n tunah chuan hlawh an dawng kim thei tawh a ni.

Document in a tarlan zel danin RNTCP sum 2014-15 1st installment Rs Nuai 334.23 chu June 30, 2014-ah Directorate of Health Services, Central TB Division atangin sanction order a chhuak a. Centrally Sponsored Scheme (CSS) ni mahse budget sum kal thin dan anga sawngbawl tur a ni tawh a, RNTCP Mizoram account niloin Mizoram State Finance ah chhunluh a ni phawt a ni.

Mizoram sawrkar Finance Department chuan August ni 4-ah hman turin a chhep hrang (allocate) a, H&FW Secretariat in September ni 2-ah hman phalna pein Aizawl North Treasury atangin September ni 5-ah cheque dawn a ni leh a. Health Department chuan September ni 8 khan Mizoram State Health Society bank account-a a thun hnuah September ni 18-ah SHS in RNTCP account-ah chhung a, ni 5 hnuah district TB Society te hnenah pek chhuah hman vek niin document chuan a tarlang.

Document zir chian chuan RNTCP Mizoram account-a sum a thlen hnu leh district TB society pek a nih chhung chu kum dang aiin kumin hian a muang loa a chak zawk a; kum dangah chuan ni 10 atanga ni 30 te a nih laiin kuminah chuan ni 5 chauh a duh a ni.

“Kum dangah chuan Central HS Directorate chuan ‘direct’ in RNTCP bank account-ah a chhung mai thin a. Mahse Central-in kalphung a thlak a, 2014 atang hian State Budget kaltlanga pek chhuah a ni tawh a, allocation siamin budget sum ang thlapin Treasury a paltlang a ngai a, a kal kawng a thui ta em a ni,” tiin Dr K Ropari, Principal Director, H&FW chuan Zalen zawhna a chhang a ni.

Central (GOI) in Mizoram sawrkar account-ah a chhung.

Finance Dept in a dah hrang.

Health Dept Secreta- riat -ah a lut.

Sect. in hman phalna a pek ngai.

Treasury in cheque in a siam leh a ngai.

H&FW in MSHS bank account-ah a thun

MSHS in RNTCP
account ah a dah leh tur a ni.

RNTCP in District Society ah a pechhuak.

Facebooktwittergoogle_plusredditpinterestlinkedinmail

Mizo lal dam rei ber boral

Aizawl; Mizo lalte rorelna chelhtu zinga la dam awmchhun nia hriat, Lalrokhama chu kum 91 mi Inrinni zing dar 12:10 Zirtawpni zanlai) khan a chenna hmun, Vaphai khuaah a boral.

Vaphai Ex-chief Lalrokhama hi, Thatinchhuma fapa niin, kum 1923 November ni 17-ah piangin, pianpui unau mipa 3 leh hmeichhia 1 a nei. Kum 1942-ah Khuangleng Lal Vaihleia fanu Kapmawii nen inneiin, fa mipa 4 leh hmeichhia 7 an nei. Kum 1996 khan a nupui Kapmawii’n a boralsan tawh a, tu 34 leh tuchhuan 37 a nei.

Kum 11 mi chauh anihin (1937) a pa in a boral san a, a pa aiawh turin Lal nihna chu a hminga dah a ni. Upa min pahnih leh Khawnbawl Upa 4 ro relpuiin, rorelna a kuta dah a nih atangin Mizo Lal ban thleng (1937-1954, kum 17 chhung) ro a rel a ni. Mi fing leh fel, rorel thiam tak a nih bakah pasaltha, ram vachal a ni a, sa 205 a kap. Mizo Lal ban an nih hnu-a Village Council inthlan tum hnihna atangin Vaphai VCP hna a chelh chho leh a, term 5 (kum 15) chhung VCP a ni.

Indopui 2-naah ‘V- Force’ Pasaltha’B’ah tangin Champhai leh Vaphai inkar a awp thin a. A hnathawh that leh rorel thiam vangin British sorkarin chawimawi nan Laiphir (DBBL) a pe hial a ni. Zirna lamah Lalrokhama hi Vaphai khuaa lehkha thiam hmasa a ni a, Lower passed hmasa ber a ni. Hriatrengna tha tak a nei a, thil chhinchhiah a peih hle bawk. Dairy pawh Sept. ni 11, 2014 thleng khan a la ziak a ni.

A ruang hi Vaphai khawtlang chuan Mizo LAL te zinga tlangchang la dam zinga mi a nih a vang leh chawimawina lantir nan a lu men an dil a, a chhungte pawhin remtiin, vawiin chawhma dar 10 hian Vaphai-ah vuiliam a ni ang.

Facebooktwittergoogle_plusredditpinterestlinkedinmail

IAY sum hmuh tur nuai 92 Central in hreng – CAG

Aizawl; Comptroller & Auditor General of India 2012-2013 khai khawmna ah chuan Mizoram district 6 tana Indira Awas Yajona (IAY) sum hmuh tur dilna (2nd installment) chu Mizoram sawrkar in a theh luh tlai vangin sawrkar laipui chuan cheng nuai 92.57 a hrensak niin a tarlang a. IAY khawih tu Rural Development department chuan dilna thehluh tlai chhan chu Internet chiankuan loh vang niin ZALEN an hrilh a ni.

RD department lam chuan, “Mizoram ah internet connection a chhiat em avangin duh angin thiltih a harsa a. Aizawl district ah chuan report hi a hun takah peih a ni chungin district dangah chuan internet a chhiat avangin a hun takah report pek theih a ni lo a, hei vang hian report kan pek tlai phah,” tiin RD lam chu an insawifiah a ni. “Kumin atang chuan internet ni loin a hard copy in report pek kan tum tawh,” an ti.

CAG report hian IAY thlan dan pawh a buarchuarin ranking/seniority ngaih pawimawh a ni lo a, khaw thenkhat ah phei chuan ‘waitlist’ a awm miahlo te pawh pek nia a tarlan chu sawifiahin “IAY dawng tura thlan zingah hmun danga pem te, hamthatna dang dawng te, thenkhat an dinhmun lo ziaawm tawh avanga dawng thei tawh lo te an awm a, list angin a kal a har thin khawp mai” tiin zawhna a chhang a. Chubakah khuarel chhiatna a awmin list a awmlo te pawh pek chang a awm niin an sawi bawk.

IAY la tute’n loan pung tlem chi an lak theih puanzar that a nihloh thu CAG in a tarlan chu chhangin, RD chuan Bank chu puang zar tha turin an hrilh a, loan rulh thatloh hlauh vangin an tlang zarh tha duh lo nia an hriat thu ZALEN an hrilh a ni.

Facebooktwittergoogle_plusredditpinterestlinkedinmail

MRB, Treasury Br. in din cham pualin zirlai 2 pui

Aizawl; Nimin kha MRB din cham 31-na a ni a, hemi pual hian MRB, Treasury Square Branch chuan zirlai 2 an zirna senso an tumsak tur chu R.Lalramnghaka, Director, LR&S leh Dr. Andrew Vanlaldika, Joint Director, FCS&CA ten a dawngtu te hnenah an hlan a ni.

Treasury Square Branch chuan dincham pualin an office ah hun an hmang a, report pein kum kalta chhung khan an branch hian hlep nuai 113 an nei a ni. MRB, Treasury Square Branch hian tun dinhmunah deposit Vbc 20 neiin loan Vbc 12 an pechhuak mek a, Account nei 8476 an awm mek bawk. MRB, Treasury Square Branch hi September ni 24,2004 khan khatih hun laia CS Haukhum Hauzel in a hawng a, tunah hian thawktu mi 4 an awm mek. MRB hian Branch 76 a nei mek a, Branch tin hian zirlai harsa, an zirna chhunzawm theilo te a thlawnin an zirna senso a tumsak thin a ni.

Facebooktwittergoogle_plusredditpinterestlinkedinmail

Kum 1 tling lo lirthei check luih tir man chawi lo

Aizawl; Social media a kum 1 tling lo lirthei khu pekchhuah enfiah luih tir nia tarlan chu Mizoram Pollution Control Board chuan an mahni lamah tihluih theihna an neih loh thu ZALEN an hrilh a, Traffic leh MVI lam chuan kum 1 tlinglo thenkhat chu check turin an tir liam niin an sawi.

“Keini chuan tumah kan tilui thei lo a, mahse kum 1 tling lo pawh nise, an duh a nih chuan lirthei khu chu en tir theih a ni,” tiin C Lalduhawma Secretary MPCB chuan Zalen zawhna a chhang. Hetih lai hian kum khat 1 tlinglo lirthei te pawh MVI leh Traffic Police te chuan enfiah tura an tirh liam thu an sawi a. MVI hotute chuan mipuiin awareness an neihnan kum 1 tling lo thenkhat te chu test turin an tir liam a, pawisa erawh an chawi tir loh thu Zalen an hrilh a ni.

MPCB chuan, “Mizoram ah chuan lirthei hi boruak tibawlhhlawhtu ber anih bakah dan in a phut avanga test mai kan ni a. A khawl man hi a to a, tuna test man kan lak hian kan senso pawh a phuhru pha lo a, chawibelhin kan test zawk a ni,” an ti bawk.Pollution Under Control Certificate hi lirthei tinin a nei tur a ni a, tun thla chhunga PUCC nei lo te chu khauh takin hrem tum an ni.

MPCB Secretary chuan an sum hmuh chu test-na khawl enkawltu 2 hlawh leh certificate manah an hman thu a sawi a. “ Transport ah a vaiin kan chhung thin a ni, keini chuan khawl leh hnathawk enkawl na chauh kan la,” a ti bawk.

Facebooktwittergoogle_plusredditpinterestlinkedinmail

2015-ah VC Election Boycott tum

Aizawl; Serchhip Kawnpui South NGO te telna VC Demand Committee chuan thuthar lakhawmtute kawmin, kum 2007 atang VC thar nei tura an nawr tawh chu a hlawhchham dawn chuan an Demand Area-a awm chhungkaw 253 te hnenah signature campaign neiin kum 2015 VC inthlan lo awm tur chu boycott an tum thu an sawi.

Heti anga inthlan boycott an tum nachhan chu Serchhip khawpui chhunga VC 6 awm thin chu VC 10 a tihpun tumna sorkara kalpui mekah, kum 2007 atanga an lo nawr tawh VC thar ruahmansak an ni ve lo nia an hriat vang niin an sawi a, nasa lehzuala nawr an tum tih an sawi bawk.

Facebooktwittergoogle_plusredditpinterestlinkedinmail

Power-a mipui bum tumah puh

Aizawl; ZNP chuan thuchhuah siamin, Mizoram sorkar (P&E Deptt) chu Durga Puja, Sept. 28 atanga Oct. 7, 2014 chhunga zantin Tripura State hnena Mizoram chanai kawlphetha 25MW pek tur thu a puanzar chu mipui bum tumna mai niin an sawi.

Hmarchhak State-a power plant lian ber, June 2013-a commission tawh, 726.6 MW neitu, ONGC Tripura Power Company (OTPC), Palatana Power Plant an tih bawk, Tripura sorkar ta atangin hmarchhak state hrang hrangah Tripura sorkarin kawlphetha 196MW a semchhuak mek tih ZNP thuchhuah chuan a tarlang a. Heta tang hian Mizoram pawhin 22MW kan chang ve tih sawiin, Mizoram chanai 25MW Tripura hnena pe anga Mizoram sorkarin thuchhuah a siam chu sum leh paia harsatna namen lo a tawh vanga mipui bum tumna lian takah ah ngaih thu an tarlang a. Insawifiah turin sorkar an phut a ni.

Facebooktwittergoogle_plusredditpinterestlinkedinmail

Khawmpui thleng turin Ratu an inpeih

Aizawl; Mizoram a tlawmngai pawl lian ber Young Mizo Association (YMA) khawmpui ‘General Conference vawi 69-na’, September ni 30 atanga October ni 2,2014 chhung a neih turah khawmpui thlengtu tur Ratu khua chu an inpeih tawh.

Khawmpui neihna atan hian Ratu khua chuan an khaw field-ah pandal ft. 150×120 a lian an sa a, pandal hming atan hian ‘Puma zai Run’ tih an phuah a ni. Zalen palai zawhna chhangin Organising Committee Vice Chairman Lalrinawma chuan ‘Puma zai Run’ an phuah chhan chu ‘Puma zai larchhuahna anih vang’ niin a sawi. Nimin khan Ratu khua chuan pandal thenfai leh a tul ang ang thawkin khawtlang pum huap hnatlang an nei a ni. Kumin hi YMA hruaitu thar thlan kum a nihloh avangin Ratu khua chuan palai an tam vak an beisei lo a, mi 2000 atanga 4000 inkar vel an beisei niin an sawi.

Kumin YMA General Conference ah hian Health & Family Welfare Minister Lal Thanzara chu khuallian a ni dawn a, khuallian hi October ni 2 a vantlang inkhawm ah thu a sawi ang. Kumin khawmpui a ngaihtuah tur hian a chunga agenda te hi chhawpchhuah a ni. Kumpuan atan rawtna pahnih Ram leh hnam humhalh tih leh Intodelh tih chu buk a ni bawk ang.

Facebooktwittergoogle_plusredditpinterestlinkedinmail

Login

Lost your password?