Monthly Archives: October 2014

BUdget Session duangfel

Aizawl; Zirtawpni khan Speaker Hiphei hovin Business Advisory Committee an thukhawm a, November ni 11,2014 atanga Assembly Session neih tura hun hman dan tur an duang fel a, November ni 26 thleng neih a ni ang.

Ruahman dan chuan session tanni (November ni 11) ah Finance Minister Lalsawta’n kum 2014-2015 Mizoram budget a pharh ang a, November ni 12&13 ah zawhna leh chhanna bakah sawrkar thil pawimawh ngaihtuah a ni ang. Zirtawpni (Nov.14) ah private member resolution sawiho a ni ang a, Inrinni leh Pathianni chawlin November ni 17&18 ah budget sawihona (general discussion) neiin ni 19 atanga ni 26 thleng Minister hrang hrangte demand sawiho a, pass tum a ni ang.

Session a ngaihtuah tur hian sawrkar atangin Bill 2 a luh beisei a ni a, paper lay tur 3 a lut tawh bawk. Zirtawpni thleng khan session a chhan tur hian zawhna (Starred question) 35 leh ziak chhan chi zawhna (unstarred question) 6 a lut tawh bawk a ni.

Facebooktwittergoogle_plusredditpinterestlinkedinmail

RTI hmangin sawrkarah zawhna 6571 lut tawh

Aizawl; Mizoram ah Right to Information (RTI)Act hman anih atangin mi 6571 in zawhna (application) an thehlut tawh a, kumtinin RTI hmangtu hi pung zelin nikum (2012-2013) aia kumin kum kal mek (2013-2014)September thla tawp thlenga hmangtu chu 33% in an pung a ni.

Zalen palaiin a kawm naah Mizoram Information Commission a Chief Information Commissioner Lal Dingliana chuan Mizoram mipuite chu an dikna leh chanvo hriat kawngah an harhthar zel nia a hriat thu a sawi a, RTI chu mi tam takin an hre thelh nia sawiin, “RTI hi mipuite hian inhekna ni lovin ram siamthatna leh corruption venna a ni tih hria se ka duh a. Mipuite hnena information pekchhuah hi kan tum ber a ni a, hei hian corrupt tur pawh a veng a ni,” a ti. Chief Information Commissioner chuan Bible letlingtuten ‘I vengte hek suh’ tia an dah chu a dik tawkloh deuh vangin mi thenkhat te RTI hman kawngah an tim deuh nia an hriat thu sawiin pawi a ti hle tih a sawi a. SAPIO, SPIO leh DAA te chu an mawhphurhna chelh mek chu hna chuangliamah ngai lo se a duh tih sawiin, “mipui leh sawrkar hi inhnai se kan duh a ni,” a tia. Tunhma deuha DAA (Departmental Appellate Authority) atan Under Secretary leh Deputy Secretary te an ruat thin chu an ngenna anga a aia sang Principal Secretary leh Secretary te an ruat avangin lawmawm a ti hle tih a sawi bawk.

Lal Dingliana chuan Chief Information Commissioner hna a chelh chhungin mipui leh sawrkar department hrang hrang tawi-awmna an dawn that vangin lawmawm a tih thu a sawi a, Mizoram Information Commission chuan theihtawpin hna a thawk zel dawn nia sawiin mipui zirtir kawngah te, website tih changtlun kawngah leh thildangah te nasa taka tanlak zel an tum tih a sawi a. Mizoram Information Commission chuan an hnena complaint lolut pending nei lovin an chingfel nghal zel tih a sawi bawk.

Right to Information Act hi May ni 11,2005 ah Parliament chuan passed in June ni 15,2005 ah President in hming ziah hnanin October ni 12,2005 atangin hman tan a ni.

MIC hi June ni 29,2006 ah din a ni a, Robert Hrangdawla, IAS (rtd.) chu CIC hmasa ber a ni.

October ni 5-12,2012 inkar khan Mizorama a hmasa ber atan RTI Week hman a ni a, tunkar chhung hian RTI Week hi hmanleh a ni dawn a, naktuk chawhma dar 10:30 ah he Week hi CM in Vanapa Hall ah a hawng ang.

Commonwealth Human Rights Initiative in July 2014 a report an tihchhuah ah Gujarat, Karnataka leh Mizoram Information Commission chauh te chu India ram puma annual report kum tin tichhuak leh website a dah awmchhun niin a tarlang a ni.
Kum Zawhna MIC a lut
2006-07 476 6
2007-08 371 9
2008-09 177 15
2009-10 695 13
2010-11 741 12
2011-12 1045 16
2012-13 1316 8
2013-14 1750 10
Total 6571 89

Facebooktwittergoogle_plusredditpinterestlinkedinmail

Mi rama awm dan thiam zir a pawimawh

Mizoram Youth Commission chuan June thla liam ta khan Skill Fest buatsaihin state danga vocational training provider 22 a ko lut a. Hemi in a tum chu Mizo thlai hna nei lo lehkha an zir san mila vocational training pek a ni a, an zirchhuak (pass) thei a nih chuan VTP te’n hna an hmuh sak dawn a ni. Tunlai hian training nei mek thenkhat chuan Mizoram sawrkar hriatpuia tirhthlak an nih leh nih loh an chian loh thu a darh mek a.

Nimin mai khan MYC changtu MLA leh official te’n chanchinbumi te kawmin hlauh thawn tur a awm loh thu te, training te chu an inhlangkai (pass) a nih chuan VTP te nilo in ram pum huapa khaikhawmtu National Council for Vocational Training (NCVT) zawkin certificate a pek tur thu mipui lamin hria se an duh tih an sawi a. NCVT ‘empanelment’ hmuh hi VTP te tan a khirh hle a, a hmu chin chu rintlaka ngaih an ni. Training a tirh thenkhat chu ruih an ching a, zirlai ngaihsak lote pawh an awm bawk a ni.

Hriatzauna kan tlakchham avang hian Mizote hi thil chik chiang mang loa phur hluai emaw phawklek emaw kan ching a. Finfiahna mumal awm loa thu theh darhah kan insum kar lo hle. Hetiang tih chingte hian pawi thui tak an khawih tih inhria se, a kal thui pheichuan court hial thlen theihna a ni. Tunah pawh hian nu leh pa tam tak an ngaih a tha lo a, VTP danga buaina tawk lem lo te thlengin an phawklek a ni, mi hma hun thlengin a chhiat phah thei a ni.

Mizoram Youth Commission-in a sawifiah hnuah hlauhthawnna tur a awm lohzia a lang leh nghal mai a; hetih lai hian finfiah hleih theih si loh state danga hnathawkte pahnih khatin an tawn tih darh ni ta vak sela tunai hian kan buai anga, mi tamtak hmakhua a nghawng thei khawp ang.

Harsatna te chu khawiah pawh a awm a, Mizoram chhung emaw a pawn pawh nise hlawhtling tur chuan tute pawhin an nunah harsatna an tawk vek a ni. Mizo thalai hmun danga hnathawk tam tak chu chhel takin an ti tang tang a, an hlawhtling fo thin. Mi rama zirlai/hnathawka awm te hian harsatna an hmachhawn fo dawn a, chu chu mihring nihphungin a ken tel a ni. Chutih rualin an hnathawhna emaw zirna lamin emaw an zir loh avanga harsatna an tawk a nih chuan Mizo thalaite hian thlavang hauhtu an nei reng tih inhre bawk sela.

Phaia khawsak thu hlaah hian Mizote rilru puthmang hi herrem ngai a tam a, phai emaw hmun dang a nih avanga hahdam taka eizawn theihah kan ngai niin a lang thin a. Eng hna pawh nise hlawhtling tur chuan taimak leh chhel a ngai khawp mai. Zirlai te pawhin an awmchhan an hre lo fo thin a, mi rama awm an nih chuan an tih dan zahsak tur a ni a, thuamhnaw inbel chungchangah a bikin hmeichhiate hi an fimkhur a ngai khawp mai. Hnamdang kawp hi thenkhat chuan intih theih nan an hmang emaw tih mai tur a ni. Inkawp satliah mai pawh ni lo inkhata cheng hote an awm lehzela, Mizoram chhunga an awm dan anga awm mai tura beisei an ni. Hetiang a nih vang hian anmahni chu hmun hlauhawmah (risk zone) an indaha, an mahni pawhin an duh miah loh tur an chungah a thlen phah thei a ni. Zu leh ruihhlo lakah pawh phaia awmte hi inthiar fihlim thei sela, an awm chhan an dah pawimawh tur a ni.
Eng pawh nise MYC hian training turte a tirh hmain mi rama awm dan tur te chip chiar takin zirtir thin sela duhthusam a ni a. Nu leh pate pawhin an fate hrechiang sela, an bula an awm ang hian an fate chu an khawsa kher lo tihte hi pawm thiam sela, fuih leh zilh mawlh mawlh a tul a ni. VTP leh sawrkar inkarah pawh thawhhona tha (co-ordination) zawk a awm theih chuan tuna kan buaina ang hi pumpelh theih a ni ngei ang.

 

 

Facebooktwittergoogle_plusredditpinterestlinkedinmail

AIR in PS Chawngthu Symposium

Aizawl; Hla phuahthiam hming thang Pahlira Sena Chawngthu pualin zirtawpni khan IPR Auditorium ah All India Radio chuan PS Chawngthu Symposium a buatsaih a, sawm bikte’n hun an hmanpui a, zaithiam te’n PS Chawngthua hlaphuah an sa bawk a ni.

‘PS Chawngthu hi AIR thawhpui thin a ni a, hlaphuah thiam tak a nih bakah writer leh poet ropui tak a ni. Symposium buatsaih pawh hi kan phur viau a ni,’ tiin khuallian, C Lalrosanga, ADG(P) NER leh DDK, Guwahati chuan pung khawm te a hrilh a ni.

Symposium hi PL Liandinga’n a kai hruaia, Sena chanchin leh a hlaphuah bihchianna ‘Script of PS Chawngthu’ chu Darrokima’n a sawifiah bawk a ni. PS Chawngthu hla thlan bik 4 chu Lalnunmawia, C.Sanga leh Laltlanthangi Pachuau te’n an sa bawk.

PS Chawngthu chhungte aiawhin a unaupa Chhuanliana, BVT an thu a sawi a, ‘Hetiang hla phuah thiam ho hi an rilru an lo kal thui thei hlein ka hria a, Sialsukl khua pawh la hmu miah lovin a phuah thei a. Ka pa Ch. Pasena kha Sialsukah sikul din turin tirh a ni a, lehkha a rawn thawn behchhanin he hla hi a siam a ni,’ tiin a sawi.

Panel of Expert atan Prof. Darchhawna, C Lalkhawliana, Dr. Zoramdinthara leh VL Hrimi te hman an ni.

Facebooktwittergoogle_plusredditpinterestlinkedinmail

Skill fest training zingah 88 in hna an hmu tawh

Aizawl; Mizoram Youth Commission leh LE&IT Department tangkawpin June 4-5,2014 a Aizawla Skill Fest an buatsaih denchhenin hna zawnglai mi 2855 te chu Vocational Training Providers (VTP) hrang hrangah an inziaklut a, an zinga thalai 1055 te chuan training nei mekin mi 88 in hna(placement) an hmu tawh.

Nimin khan Aizawl Press Club ah chanchinbumite kawmin Mizoram Youth Commission chairman T.Sang-kunga MLA chuan he thu hi a sawi a. MYC chairman chuan, “Kan nauten harsatna an tawh chuan kan buaipui nghal thin a, a hmunah te kalin an harsatna te kan en thin a ni,” a ti. MYC chairman chuan tuna training nei mekte chu a tlangpuiin an training na a tha nia an hriat thu leh training mek te pawh an lawm hle nia a hriat thu a sawi a Hetih lai hian mi 2/1 an hnaa tui vaklo leh prohibition pawna kal thiamlo an awm nia a hriat thu a sawi. Zawhna chhangin MYC chairman chuan Mizoram pawn mai nilo, tualchhungah pawh nasa takin tan an la tih a sawi a. “Kan thalai ten electric wiring, mobile siam, cement mitiri, puanthui leh thildangte an thiam theihnan hma kan la reng a. YMA nena tangkawpin Khawzawl leh Kolasib ah training kan nei tawh a, Champhai ah neih leh kan tum mek a ni,” a ti bawk.

LE&IT Department hnuaiah hian VTP 43 inziaklut tawhin heng zinga 29 chu state pawn lam a mi te an ni a. VTP te register an nih dawn hian department lamin a endiktu tur Inspection team a tir a, Skill Fest 2014 behchhana in register duhte phei chu uluk lehzuala endik vek an ni. Skill Development Initiative Scheme in inkaihruaina a siam dan chuan batch then chungchangah batch khatah mi 10 aia tlemlo, mi 33 aia tam lo an awm tur a ni a. VTP thenkhat trainees 100 chuang neite pawh hian trade hrang hrang – Beauty & Skin, Soft Skill, Hospitality, Retail, Aviation leh a dangte ah training an pek avangin SDIS inkaihruaina dan mil tur hian anmahni lamin batch an lo siam rem mai thin a ni.

VTP thenkhat a kal ten sorkar hriatpui lova kal anga inngai an lo awm nia hriat a ni a. Hemi chungchangah hian T.Sangkunga chuan LE&IT Minister hovin a pisa-ah uluk taka ngaihtuah leh sawiho a nih thu leh sorkar hriatpui VTP a zirte reng reng chu sorkar kaltlanga lak an ni lo a nih pawhin sorkar tirh leh buaipui turah pawm nise tia an rel thu a sawi a. Certificate chungchang ah assessing body ten certificate hmu tlaka thiam a an ngaihte chu National Council for Vocational Training (NCVT) in khawvel ram hrang hrangin an pawm mek Trade Certificate pek an nih tur thu leh hemi baka certificate dang duh belh tan chuan examination fee chawia exam pek leh phawt a tul thu a sawi bawk.

Facebooktwittergoogle_plusredditpinterestlinkedinmail

Mamawh te tan chaw chhawp

Aizawl; Salvation Army Youth, Temple Corps chuan Zirtawpni zan khan Vanapa Hall bul Taxation Office kawtah ei tur thahnem tawk tak a mammawh te tana ei turin an chhawp chhuak a, he hun hi Feed The Need tia vuahin 2006 atanga an tih tan niin ZALEN an hrilh.

“ Kum tin tum 5 emaw tum 6 kan nei thin a, kan tum ber chu khawlaia vakvel chaw pek a ni mai a, counselling pek kan tum phet loa, a duh an awm chuan kan kawm thin bawk,” tiin SAY, Temple Corps hruaitu chuan kan palai a hrilh. Salvation thalai ho sawi dan chuan Zirtawp zanah mi 100 bawr vel eitur chhawp chhuakin eitu an thahnem niin an sawi a, “Nun rahbi tleu tawhte, drug ngawl veite pek hi kan tum ber a ni a, zana an vah chuan an ril te a lo tam duh a, an ei bawrh bawrh thin a ni,” tiin hruaitu pakhat chuan a sawi.

Zan lama khawlai vak thin te chuan an he hun hi an hre lar tawh a, an pan mai bakah an thiante pawh an hrilh darh ve thin a ni. SAY?hruaitu chuan, “Hun reilote chhung kan bulah an awm a, chumi chhung chu kan lo kawm hlim a, thinhrikna kan nei lo tih an hriaa, reilote an hlim ringawt pawh keini tan chuan a hlu a ni,” a ti

Facebooktwittergoogle_plusredditpinterestlinkedinmail

Vaihlo sim zingah mipa aiin hmeichhia an tlem

Aizawl; Khawvel huapa meizial zuk chhiarpui GATS (Global Adult Tobacco Survey) atanga a lan danin Mizoram ah zuk leh hmuam sim zingah hmeichhia aiin mipa an tam zawk.

Kum 2005-2006 a Mizoram survey neih ah mipa za zela chhuta 78.3% chu zuk leh hmuam ti thin an nih laiin hmeichhia 60.8% pawh zuk leh hmuam ti thin an ni a. Kum 2009-2010 a zirchianna neih leh ah chuan zuk leh hmuam ti thin hi mipa ah tlahniamin 72.5% a ni a, hetih lai hian hmeichhe lamah chuan a sang zawnga kalin 61.6% ah a chho thung a ni. He zirchianna tarlan danin vaihlo ti thinte hian kum 15 atanga 19 inkar an nih laiin ti thar an tam ber a, 69.5% lai an tling a, kum 15 tlin hmaa mei zu thin 9.3% an awm bawk.

Zirchianna tarlan danin Mizoram mipuite chu midangte meizuk khu hipluh tam lamah India rama a sang ber nihna a hauh a, mipui 62% in midangte mei khu an hiplut nia chhut a ni. Hei mai bakah meizuk khu a that lohzia hre chungin mahni In chhunga meizuk phal tho 98% an awm tih tarlan a ni a, mahni inchhunga meizu 96.7% leh hna thawhna hmuna mei zu 64.6% an la awm nia tarlan a ni a. Mizoram ah mei zu mi 3,20,000 vel an awm nia hriat a ni bawk. Global Adult Tobacco Survey hi kum 2015 January ni 15 atangin Mizoram ah kalpui tan leh tum a ni.

Facebooktwittergoogle_plusredditpinterestlinkedinmail

Thu & Hla kutpui nei dawn

Aizawl; Mizo Writers Association leh Art & Culture Department ten kum thum dana an neih thin ‘Thu leh Hla Kûtpui’ chu naktuk hian Chanmari YMA Hall-ah hman a ni ang. Thuziakmi (writer) ropui pahnih B.Lalthangliana leh Revd. Chuauthuama te hnenah chawimawina Literary Awards hlan an ni ang a. Kumina MBSE hnuaia HSLC leh HSSLC exam-a Mizo subject Toppers te leh MZU hnuaia BA (Mizo Honours) leh MA (Mizo) te-a Gold medalist te hnenah Proficiency Prizes Rs 5000/- theuh leh Certificate sem a ni bawk ang. 2008 atanga MWA kumtin a lo tih thin Mizo Proficiency Prizes dawngtu tur te hi HSLC Mizo subject-a Mark hmu sang berte, Ch. Pasena Proficiency Prize Winners – Lallawmsiami d/o R. Lalbiakphunga, South Sabual; Lalrammawii Chhangte d/o C. Lalfala, Serkawn; Malsawmzuali d/o Hmingthanzuali, Chaltlang leh Gladys Lalhruaitluangi d/o R.K. Lalsangzuala Aizawl Venglai. HSSLC Mizo subject topper Lalmama Proficiency Prize Winner Lalnunpuii d/o H.C Zoliana, Electric Veng Aizawl; BA Mizo (Honours) Gold Medalist R.Buchhawna Proficiency Prize Winner Laltlanmawia S/o H.L Ramlawma, Hualtu leh MA(Mizo)-a Gold Medalist J. Malsawma Proficiency Prize Winner P.C. Zonunsangi d/o Lalzawmliana Durtlang North te an ni.

Facebooktwittergoogle_plusredditpinterestlinkedinmail

Mamit district ah PIC nei dawn

Aizawl; Press Information Bureau, I&B Ministry hnuaia Media Units hrang hrang – DDK, AIR, DAVP, DFP, Song & Drama Division, Mizoram Sawrkar leh Mizoram Journalists Association tangkawp buatsaihin Novemebr ni 29-31,2014 inkar hian Mamit district ah Public Information Campaign neih leh tum a ni. Ruahman dan chuan campaign hi khaw 3 Tuidam, Kawrtethawveng leh Darlak ah te neih a ni ang. Campaign ni hmasa ber Tuidam Community hall a neih turah hian Environment & Forests Minister Lalrinmawia Ralte chu khuallian a ni ang a, a ni hnihna ah MSIC a Chief Information Commissioner Lal Dingliana IFS (rtd.) khuallian niin a ni thumna ah FCS&CA Minister John Rotluangliana khuallian a ni ang.

Public Information Campaign-ah hian sawrkar laipui hmalak na Pradhan Mantri Jan Dhan Yojana (PMJDY), Saansad Adarsh Gram Yojana (SAGY), Swachh Bharat Abhiyan/Clean India Campaign, Digital India, Make in India chungchang mipuite hnenah puanzar tum a ni.

Facebooktwittergoogle_plusredditpinterestlinkedinmail

Mizofed in ‘Know Your Customer’ ti tha leh mek

Aizawl; Tunlai hian Mizofed chuan an huam chhunga gas consumer te hnenah KYC(Know your customer) an kalpui mek a, hei hi hmanrua (software) thar an hman vang leh IOC lamin ti tura an tih vang niin an sawi.

Zalen palaiin a biak naah Mizofed thawktute chuan tuna KYC an kalpui mek chu IOC hotu ten consumer te centralise an tum vang te, a hmaa KYC lo tih tawh chu a kim tawkloh vang ni te in an sawi a. Mi thenkhat ten KYC an neih tawh computer atanga an tihbo vanga ti nawn leh anga an sawi chu a diklo tih an sawi. Mizofed hian Aizawl khawpui a veng 10 bialin veng 4 ah KYC tihthat hna hi an zo tawh a, tunah hian hmabak veng 6 an nei mek a ni.

KYC hian IOC lam atanga titha tura hriattirna an dawn leh dawn loh Zalen in a zawhna ah Gas agent dang Suakchhunga leh Biakkungi te chuan IOC atangin a hlawmpuia KYC titha tura hriattirna chu an dawng velo niin an sawi a, mahse hetih lai hian KYC an tih tawha document famkim tawklo te, insawn vang te leh hmaihpalh engemaw awm ang chi ah chuan KYC hi an kalpui reng niin an sawi.

Facebooktwittergoogle_plusredditpinterestlinkedinmail

Login

Lost your password?