Monthly Archives: October 2014

MLA rualin Kolasib tlawh

Aizawl; Zirtawpni khan Subject Committee 1 te chuan an chairman Chalrosanga MLA hovin Kolasib District Transport Office leh District Disaster Management and Rehabilitation hnuaia Emergency Operation Center te an tlawh a,an hmalakna leh dinhmunte te an zirchiang.

Committee chairman Chalrosanga chuan heng hmun an tlawhchhan chu an chanpual Department te hmalakna te, an dinhmun leh harsatna tawh hrang hrangte zir chianga enfiah tur an nih thu a sawi a. An zir chianna leh enfianna atangin Vairengte-a Transport Department tan Weighbridge neih ngei ngei a pawimawh thu sawiin heng an zirchianna te hi sawrkarah an la thlen tur thu a sawi bawk a ni.

Facebooktwittergoogle_plusredditpinterestlinkedinmail

Kerala MLA

Kerala Legislative Assembly hnuaia Committee on Local Fund Accounts member mi 7 leh anmahni zuitute chu vawiin hian zan hnih riakin Mizoram an rawn tlawh dawn a, an cham chhungin Speaker leh sawrkar mi pawimawhte an kawm bakah Aizawl khawpui hmun hrang hrang fanpui an ni ang. Kerala MLA rualte hi Varkala Kahar chuan a rawn ho dawn a, October ni 28 ah Aizawl chhuahsanin Guwahati an pan ang.

Facebooktwittergoogle_plusredditpinterestlinkedinmail

Lifetime Award

December ni 5,2014 hian Saikuti hall, Lunglei ah Vulmawi Award sem a ni dawn a, he hunah hian Chief Minister Lal Thanhawla hnenah Lifetime Achieve -ment Award hlan a ni dawn a, Award semna inkhawm ah hian MJA President Vanlalrema Vantawl chu khuallian a ni ang.

Facebooktwittergoogle_plusredditpinterestlinkedinmail

Heroin man

Nimin khan Mission veng YMA North Branch Kumpuan duty te leh Excise tangkawp chuan Vanlalngheta (21) s/o Vanlalrawna, Mission veng kut atangin heroin cane 3 an man a, amah hi thubuai siamsak a ni.

Facebooktwittergoogle_plusredditpinterestlinkedinmail

Tlawh dawn

Mizoram Legislative Assembly hnuaia Committee on Estimates chuan November ni 3-5,2014 inkar chhung hian Sainik School Chhingchhip, Tourist Lodge Serchhip leh Kaladan Multi Modal Transit Transport Project hnathawh mekte a hmunah kalin an enfiah dawn.

Facebooktwittergoogle_plusredditpinterestlinkedinmail

Azl-Silchar bus

Transport Department chuan naktip Thawhlehni atang hian Aizawl leh Silchar inkarah MST Bus, Air Conditioned a tlantir dawn a, bus hi kar tin, Thawhlehni, Ningani leh Inrinni tlai dar 3-ah Aizawl atangin Silchar a pan ang a, Thawhtanni, Nilaini leh Zirtawpni tlai dar 3 vekah Silchar atangin Aizawl a pan thin dawn a ni. Bus chuan man hi mi pakhat tan Rs. 273 a ni ang.

Facebooktwittergoogle_plusredditpinterestlinkedinmail

Oilpalm Mill

Godrej Agrovet Ltd. in Bukvannei a Oilpalm Mill an din chu October ni 28 chawhnu dar 1:30 hian Chief Minister Lal Thanhawla chuan a hawng dawn a, Mill hawnna hunah hian Godrej Company chairman Nadir B.Godrej leh Home Minister R.Lalzirliana pawhin thu an sawi ang.

Facebooktwittergoogle_plusredditpinterestlinkedinmail

UN NLUP sum hman danah Zoram hmalam innghat

Ram zawng zawng khaikhawmtu United Nations chuan Mizoram sawrkarin NLUP a kalpui dan chu tha a tihpui hle a, a hlawhtlin theih nan Cheng vaibelchhe 25 sawrkar hnenah a pein ziahfel nghal a ni. UN hian hetiang anga sum tam tham hian thurualpuia nei ngai vak lo. Chief Minister pawhin United Nations hnung kan zui zawh loh a hlauh thu a sawichhuak hial a ni.

Kan ram hruaitu lu berin a sawi hi a dik khawp mai a, Mizote’n NLUP kan hmuh dan hi a fuh tawh lo a, siam that a tul a ni. Inthlan dawnah NLUP hi hmatheh ber a ni thin a, Congress party chuan kum 5 dang sawrkarna a lak theihna chhan pakhat a ni. Inthlan hnuhnung ber campaign boruak han en khan mi tam tak tan thil itawm a ni a, dawn ngei an duh a ni. NLUP dawngtu tam tak chuan a hmanna turah an hmang lo tih a chiang a, inchhung bungrua, lirthei leh mahni awhzawng lei nan sum tam tak a luangral a ni. Eng vangin nge mipui hian hetiang rilru hi an put?

Inthlan dawna zawrh a nih lai khan a zuartute an tan ulh deuh vang a ni thei a; mipui kan thuhmun fo thei lo a, a thenin dinchhuahpui nan an hmanga, a then te chu bul tan ve uk-a a tawp thlenga umzui peih lo an ni, a thlawna dawn a nih vanga duh ve hrim hrim an awm bawk ang. Hei hian NLUP hlawhtlinna tur thui tak a ti thuanawp a, 100% beisei chi a ni lo.Hemi bakah NLUP dawngtute’n an hman dan lam hi official lamin an vil uluk tawk lo a, ‘monitoring’ lamin tan an lak a pawimawh ang. NLUP tha taka hmang tute hi dawm an ngai reng a, nawrkal an ngai a, ‘trade’ an thlan azirin an tangkaipui tur ‘thiamna’ hrilh hriat a pawimawh a ni. Hemi lamah hian sawrkarin hma la uar sela, tha thlah loa a tan kawh reng a ngai ang.

Eizawnna a inang lo ang bawk hian pawisa lo let chak dan a inang lo bawk a, deskstop publishing (DTP) phei chu tih takna a tel chuan reilote chhungin sum a haw nghal mai a. Lehlamah thlai chingtute erawh chuan thla tam tak an enkawl a ngai thung a, chu mai ni lovin mihring siamchawp ni lo ruahtui tlak tlem leh tam leh khawkheng te chu hmalakna tichhe thei an ni ve bawk. NLUP lam pawh hian ti tak tak a ti, vanduaina vanga hlawhtling mai thei lote hi kawng dap sak thei se a va tha em!

Engpawh nise, UN ina hetiang zat puihna sum Zoram tana a pe hi a lawmawm a, kan hruaitute hnathawh hah rah a ni a, a chhawrtu tur chu mipui kan ni. NLUP ina a thil tum hi Mizote hian thinlung taka an pawm a ngai dawn a, chumi a nih loh chuan hlawhtlinnna fumfe kan hmu lo palh ang tih a hlauhawm rum rum e. Mithiamte zirnaah chuan mi rilrua thil tuh dan awlsam ber chu ‘ chatlak awm loa hrilh nawn tlut tlut’ (continous repitition) niin an ngai a, hemi kawngah hian sawrkar pawhin tan la leh zual zel a, a hnathawkte’n an hrilh hneh dawn loa, hmanraw tha ber tur chu media a ni.

Tun tum NLUP phei chu ram intelkhawm pawl lian ber UN in Mizoramah rinna a nghata, chetziain a tilang bawk a ni, an beisei kan pha leh si lo a nih chuan NLUP hi a hlawhchham a ni ngawt dawn loa, UN rin kan kai loh phah thei a, khawvel pum huapin kan ram a mualpho thei a, kan hlawhtling a nih chuan hmingthat mai bakah khawvel huapa mi thil tithei te’n kan ram hi an ngaihsak phah thei a ni. Ram hruaitu, NLUP-a hnathawk, a dawngtu leh mipui an tanrual a pawimawh hle a. He programme a kalchhung na na na hi chuan party dah thaa Zoram tan rilru kan put a va pawimawh em.

Facebooktwittergoogle_plusredditpinterestlinkedinmail

Hnathawh lama Rilru put hmang dik

Mizote hi hnathawh chungchanga kan ngaihdan a inang lo zungin a rinawm. Thenkhat chuan kan hna/eizawnna hi chhungkaw chawmna a nihna chauh kan ngaihtuah maithei a, a then chuan sum lakluhna a nih vangin thahnemngaihna pawh nei lem loin kan thawk maithei a, chutihlaiin, mahni hnaa tui em em, phur tak leh thahnemngai taka thawk pawh kan tam ang. Eizawnna mumal la nei chiah lote pawh kan ngaihdan a inang lo hlawm viauin a rinawm. Chuvang chuan eizawnna/hnathawh chungchanga kan rilru put hmang, sap tawnga ‘work ethic’ an tih leh a kaihhnawih thil hrang hrangte hi ngaihtuah ngun a ngai hle a ni.
Eng hna nge kan thawh?

Tlangval pathum hian quarry-ah hna an lo thawk mawlh mawlh a. Chutih lai chuan pa pakhat a lokal a, a mal te te in, “Enge i thawh a?” tiin a zawt theuh a. Pakhat chuan, “Hei i hmuh ang hian lung kan la a nih hi,” a ti mai a. A dang leh chuan, “Hei ka inhlawh a, kar tawpah Rs 1,200/- ka hlawh dawn asin,” tiin a chhang a. Pathumna chuan, “Ti hian heng lung hmang hian Biak in tha tak ka sa mek a nih hi,” a ti thung.

Tlangval pathum zinga a hmasa ber hi chuan a hnathawh mek lai chauh a ngaihtuah a, a hnu lamin a rilru a luah pha lo. Pahnihna hi chuan a thawhhlawh tur a ngaihtuah a, rim taka a thawh vanga pawisa a dawn tur a hrechiang em em a, inrinni lo awm tur a lungkham hle a ni. A hnuhnung ber thung hi chuan tuna a thawh mek lai chauh a thlir lo a, a pawisa hlawh tur chauh a ngaihtuah hek lo. Zawhna a chhannaah pawh tuna a thawh mek lai te leh pawisa a hlawh tur te ai chuan a thawhrim vanga nakina Pathian biak in ropui tak lo ding tur chu a rilruah a lian zawk hle tih a lang.

Kan hnathawh chungchangah hian a khawi ber khi nge kan rilru put hmang ni ve ang le? ‘Hnathawh hi Kristiante tih tur a ni’ tih rilru pu chunga thawk thinte chuan hlawhtlinna hmel an hmu thin. Chutiang tho chuan ‘Nitin hna kan thawh hian rawng kan bawl zel a ni’, tih hi Kristiante zirtirna ziding a ni bawk tih hi Mizote hian kan hriat thar a tha khawp mai.

Work Ethics chu
Eng hna pawh thawk ila hlawhtling tur chuan – taimakna te, rinawmna te leh inpekna te bakah mahni hnaa tuina hi a pawimawh hle a, hengte hi ‘work ethics’ zepui pawh a ni hlawm. ‘Work Ethics’ chu hnathawh chungchanga rilru put hmang dik sawina a ni a, a tawi zawnga sawifiah dawn chuan ‘Mahni hnaa inpekna tak tak rilru leh thawhrimna inkawp’ tih a ni mai awm e. Mi tam tak chuan hna tha teh na’n sum leh pai hi an hmang fo thin a, sorkar hna leh hna dangte pawh hi a thawktu hlawh zat leh a behbawm hamthatna awm thei atangin kan ngaihluin kan ngaihlu lo mai thin. Mahse chutiang ngaihdan chu ngaihdan pawnlang tak a nih mai bakah work ethics nen a inkalh tlat a ni. Eizawnna/hna tinreng hian eng kawngah emaw tal hlutna an nei vek a, mahse a thawktuin a ngaihhlut thiam dan azirin a hluin a hlu lo mai zawk a ni.

Mahse fimkhur a ngai
Hnathawh hi kan dam chhunga kan tih tur a ni a, mahse, mihring dam chhan ber erawh a ni lo. Mihring taksa leh rilru hian nitin chawlh hahdam a mamawh a, chumi chu ngaih pawimawh tel a tha khawp mai. Khawvela hnam fing leh taima ber pawl Japanese-ho hi an hnaah an inpe thei hle a, khawl ang maiin an thawk mawlh mawlh mai thin a, an taimak rah an seng a, ram hausa ber pawl an nih phah reng a ni.

Mahse, thawhrimna hian nun hlimna a thlen vek bik lo aniang Japan ram hi khawvela mahni intihlum tamna ber pawl a ni reng thin. Chumai a ni lo a, mahni hriselna pawh ngaihtuah chang lo khawpa hnathawk nasa, hna thawh rim luat tuar lo a thih phah an tam hle a. Chutiang thihna chu ‘Karoshi’ an ti a, ‘Thawhrim vanga thihna’ tihna a ni a, kumtin an rama thihna langsar tak a ni ve ziah thin. ‘Karoshi’ hi an sorkar leh corporation te pawhin an buaipui hle a, hnathawktute chu tlai lama hnathawh ban ruala mahni in lama haw nghal turten an ngen a, mihringin chawlh hahdam kan mamawh zia te an puangzar thin. An taimakna leh an inpekna hi fak loh rual a ni lo.

Engpawhnise, mihringte hi rim taka hnathawk tur kan nih rual hian hriselna lam ngaih pawimawh tel hi thil tul tak a ni a, nitin chawlh hahdam kan mamawh ziah thin, chu chu Pathianin kan taksa a siam dan atang pawh hian a hriat awm e. Thawhrim leh hahchawlh hi a inkawp tlat a ni.

Kristiante rilru put hmang tur chu (Christian Work Ethics)
Protestant Kohhran hruaitu hmasate khan hnathawh leh taimakna hi an ngai pawimawh viau a, hei vang hian khawtlang ram hrang hrang zinga protestant kohhranho tamna apiangte hi hnathawh uar ram an ni a, ram hausa leh hmasawn chak ber berte an ni hlawm. Sociologist ropui Max Weber ngaihdan chuan ‘Protestant ethic’ avang hian Europe khawmualpuia siamthat kohhran tamna ram apiangin hma an sawn chak bik a, ram hrang hrangte an insumdawntawn tan tirh lai vel atanga hlawhtling ber berte pawh heng ramte hi an ni, a ti.

Mizoram hi kristian hlang deuhthaw awmna ram a ni a, chutah pawh chuan protestant kohhran tamna a ni leh zel bawk. Chutihlaiin, kan hna a kan inpek dan te, kan taimak dan te leh kan thawhrim dan te hi han chhut ta chiah ila hmun danga siamthat-kohhran zia ang kan la pu lo hle tih a chiang awm e. Chuvang chuan mahni hna theuhah rinawm a, inpekna tak tak nen taima taka thawh hi kristian kan nihna atang pawhin kan duty a ni tih hriat a tha.

Kohhran leh khawtlang hlamchhiah chuang loin
Work ethic kan sawi ruala pawimawh tak mai chu thawhrimna leh taimakna kan buaipuina lamah hian kohhran leh khawtlang rawngbawlna (Inkhawm, chhiatni thatni, etc.,) hlamchhiah zawngin kan infuih palh hlauh ang a, Pathian thu aia hnathawh/thawhrimna ngaisangtuten ‘Work is worship’ (Hnathawh hi Pathian biakna a ni) an tih te hi changchawiin kohhran rawngbawlna hrang hrangte hi hnawk kan ti anga, hmasawnna daltuah puhin kan sawichhe palh mai ang tih erawh a hlauhawm khawp mai. Mizote hi pi pu atanga khawtlang inawpna fel tak nei a, a huhoa inpeizawn dial dial thin kan ni a, YMA leh kohhran zarah chu ze mawi tak ‘Zonunmawi’ chu kan la vawng nung reng a, a lawmawm hle a ni.

Hetiang ang khawtlang nun nuam tak mai kan nei hi kan vanneihna a ni tih hre reng ila, vawn nun zel tum ila, khawtlang kan inbuaipui luai luai thinte hi hmasawnna daltu ang hiala sawi awm thin mahse kan work culture leh kan work ethics nena insu buai lo a kalpui zel dan zir ila. Khawvel hmasawn zelah leh kan hnam nunphung inthlak danglam zelah inher rem ngai leh inthlak danglam ngai a awm zel tih erawh hria ila. Chutih laiin, sakhua leh hnam zia vawnnun zel aia hnathawh dah pawimawh hi mihring nun tibuai theitu a ni a, kan hnam tan pawh hian a him lo ang.

Facebooktwittergoogle_plusredditpinterestlinkedinmail

Ka Huang (Oct. 26, 2014)

Tutein emaw Aizawl leh a chhehvel ram loa neih dan leh a ram neitute ramri lamte han ziak teh min ti a; mahse, heti lam hi chu ka lo chiang vak lo hlein ka hria a, chuvangin tun tum hi chuan thil dang anga ka ziak pawr pawr theih loh avangin ka ziak rih (NOT hrih) lo mai ang a, hun dangah muang mara ngaihtuah theih huna ziakah ka khek ta zawk mai. Ka rilrua awm ve – ka thil tih tak loh, tuna ka ui leh em em hnuhnawh ka rawn ziak ve leh tawp rih mai:-

Aizawl pahoin Tlawng khu Kahsamar (Blue Stone) mound 2 (kg 78)-in vuak an tum a, khatih lai khan kahsamar mound 2 chu Rs. 320/- man a ni. Mi pakhatin Rs. 4/- zel thawh an ti a. A kal tura te ka han hriat hian an tawinawkin an chhangchhe dawn ema ka hriat avangin tel ka tum ve lo a, K’u Zuala chuan Tlawng kal hrat ka nih avangin tel se min ti em em a, “Ka thawh kep mai ang che,” a tih pawhin ka duh tlat lo a, “In chhangchhe em mai, engmah in ang lo ang,” ka ti tlat a. A thinrim lek lek a, kan len tha chu ken a tum a. Kei chuan, “In khar thlangta ber thlangah khar dang ka siam ang a, ru tui hlau sangha tlanchhia man ka lo tum ve ang chu,” ka ti a, a lungawi vak loh avang chuan khar thlangta ber pawh chu a sawi thlang khawp mai! Tichuan keini unau leh kan kawmthlangte unau nen Ninganiin kan chhuak ta a, Suardarh thlang daiha li lian ve tak kawng lam daidulah khar kan ping ve ta a. Rawthing 2 vuak zawma khar chu fit 6 zeta sang tur hian kan ruahman a, zawngbilhin kan tah tlat mai a, khup thleng lekah hian kan ping ta a, ngar kan hem phei thluah bawk a ni. Tlang vuakho chuan Reiek kai chhakah khuan rusum, Zirtawpni zingah an rawn thlak a. Sangha tlanchhia chuan kan khar chu Inrinni zing khawvar hma deuh atangin a rawn nek tak tak ta mai a, kan paliin kan zuang lut a, kan man theih dan danin kan kutin kan man nawk nawk mai a, khata sangha tam ang kha ka la tawng ve ngai lo. Kharin a dan tlat avangin khup/malte chen lek vela thukah kan innek nuai nuai mai a, a nal si a, kutlawnga man mai chu a har si, kan ri nawk nawk mai. Engtin tin emaw kan pali chuan em chu kan kalh ve hram thei chauh a ni. A chhakah kan khar dang lo siamin, sahthlak mai theiin lo siam ila, khati taka an rawn nuk hnu deuh khan khar chhakta chu sat thlain chho leh thei loin siam tlat mai ila chu – BEL CHHUNGA SA ni mai tur. Chuti a nih loh pawhin kan khar khawimaw lai kha ti-awngin bawm lian deuh lo dawh tal ila chu phurh sen rual loh kan man ngei awm sia tih hi tun kum 60 hnuah pawh ka ngaihtuah thin zuk nia! Phur 4 emaw chauh kan man si! Ui tak ka ni hnuhnawh.

Kum 1962 thal lai khan tuithum kamah thlanvawng tlan Sakhi ka chang a, Hnahkiah kungah ka thu a. Ni tlak hma daih hian Nghalpui no hruai hi a lo tla phei sun sun mai a, ka maniature-ah chuan Remington long, hollow point an tih kha ka load sa vek a. Ka chhukna changel hmunah chuan a pui chu a ding ta chat mai a, changel kung karah chuan kutphah tiat lek hian a pang dum tha zet mai chu a lang a. Changel hung chu pel hret se chiang em ema lang tur leh duh lai taka kah theih tur a ni. Tin ran chungin ka nghak ran mai a, ka silai mu hollow point mah ni se .22 mu te chu a te si a, a thih mai loh hian a uiawm dawn em a, tih ka ngaihtuah avangin ka tin reng ringawt mai a. Khatia a din chaih atang khan a note ri sup sup pawh kha a reh diak mai, pakhat mah ka hmu lo. Tichuan ka chhukna hnu rim chuan a tihlau a niang chu, a kir hmang mai a, an lo kal lam thawm a nat tehlul nen an kir lam chuan thawm reng an nei lo, a bo diak mai a ni. Kha sanghal pang dum ka hmu kha thelh rual loh khawpa hnai a ni sia, hollow point a ni bawk sia, kah mai awm tiin tin thleng hian ka ngaihtuah thin. A dar emaw, a nak emaw ni awm takin ka hmu a, kap ta ila chu thi nghal lo mah se chhui theihin a awm ngei awm sia tihte hi ka ngaihtuahna kal zel zuk ni ta mai mai a!

Hmanni lawka ka sawi, Thaidawr nula (lengleh)-in Tiau luia Nghaleng dawipuiah min sawm ka tih kha. Kum 19 emaw lek ka la nih avang khan min sawm nasat tehlul nen ka han tihhlawhtlinsak ngam ta lo kha – sex lam te a tel nge tel lo pawh ka hre lo, chu lam chu ka ngaihtuah pawh a ni lo, an tih dan phung hrim hrim kha – “Bawm ka keng ang a, nangin lung i phawk ang a, sangha keiin ka lo man zel ang,” a tihte kha engtin nge a man zel ngawt theih dan tur tihte leh a sawi ang khan paw hawngin an chhuatah nghat ta ila, a pa khan eng ran nge a talh teh reng tih te kha tawnhriat atan a that tehreng nen, ka’n ngam tlat lo mai kha tunah te hian ka UI VAWNG VAWNG mai nia. Tunah lah “min sawm a” tih bak sawi tur reng reng ka nei mawlh si lo, ka dawihzep lawmman hi pawi tak a ni!

Facebooktwittergoogle_plusredditpinterestlinkedinmail

Login

Lost your password?