Monthly Archives: November 2014

Minister 2 demand

Mizoram Legislative Assembly session neih mek chu nimin leh vawiin an chawlh hnuah naktuk chawhma dar 10:30 hian an thukhawm leh dawn a, zawhna leh chhanna hun hman zawhah Minister pahnih R.Romawia leh John Rotluangliana te demand sawiho a pass tum a ni ang.

R.Romawia chan
Department Amount (Nuai)
Land Revenue & Settlement 1999.25
Parliamentary Affairs 53.43
Higher & Technical Education 17542.65
Art & Culture 1606.50
Total 21201.83

John Rotluangliana chan
FCS&CA Department 26536.49
Transport 4475.56
Tourism 1538.54
Total 32550.59

Facebooktwittergoogle_plusredditpinterestlinkedinmail

Guest house rate thar

Mizoram sawrkar chuan tunhnai khan State Guest House, Aizawl a riahman leh hall hman man chu a hnuaia mi ang hian a siam tha.

Rate hlui        Rate thar (Rs.)

1.Suite Official              600                 1000
Non-official                   700                  1500

2. VIP Deluxe Official 500 800
Non-official 600 1200

3. Deluxe
Official 400 600
Non-official 500 900

4. Halls 2,000 3,000

 

Facebooktwittergoogle_plusredditpinterestlinkedinmail

Tuikuk inhnamhnawihna in rukbo vawi 17 thleng tawh; Kidnap tu misual 10 man tawh

Aizawl; Tuikuk te awmna lailawk tur siam a nih hnuah inrukbona um 17 a thleng tawh a, inrukboah hian Tuikuk thenkhat an inhnamhnawih ngei nia ngaih niin khawthlang lam boruak thlir thlai reng a ni.

“Kanhmun-ah hmanni deuh khan hel nia hriat te’n kawng an kan tih an sawi a, khulai vela mi tam tak chu an hlauthawng hle” tiin Mamit khawtlang hruaitu pakhat chuan Zalen a hrilh a. “Tunkar khan sawrkar sum kengin Tumpang lui bawrah sawrkar mi leh sate an kal a, ramri bul a ni bawk nen security nen an zin a ni,” tiin thulakna dang chuan a sawi bawk.

10748552_744370238979216_1533890302_n

Hnuchhuitu te’n ZALEN an hrilh danin Tripura-a Tuikuk awmlai lailawkna hmun (transit camp) siam a nih atanga chhutin Mizoram chhungah Tuikuk te inhnamnawihna inrukbo tum 17 a thleng tawh a. Mizoram khawthlang lama sawrkar hnathawk thenkhat chu Tuikuk hel pawl leh misual thenkhatte rikrapna avangin kumin May thla vel khan an awmna tlan sanin hmun him lam an pan tawh bawk.

Tripura Bru Transit Camp- ah Camp 6 a awm mek a, chungte chu Naisingpara, Asapara, Hazacherra, Damcherra, Hamsapara, Kaskau leh Khakchangpara te a ni a. Election Deptt-in a chhinchhiah danin camp 6-ah hian vote nei 11,346 an la awm mek a, heng zingah hian Mamit District ami tam berin voter 8,799 an awm.|

Transit camp atanga thudawn danin, heng camp 6-ah hian mi 30,000 chuang tun thleng hian an la awm nia hriat a ni a, an ei leh bar leh an nitin mamawhte chu central sorkar ruahmansak angin Tripura sorkarin a buaipui a ni.

Zalen in a biak naah Mamit SP Lalnunmawia chuan tunhnaiah hel pawl chetna thar an hre lemlo tih a sawi a. Khawthlang lama boruak ralmuan leh ralmuan loh chu a sawi-lawk theih vakloh tih sawiin Police te chuan patrolling an nei reng tih a sawi bawk.

Facebooktwittergoogle_plusredditpinterestlinkedinmail

CM in chhiah pe tha turin mipui a ngen; SERCHHIP District park hawng

Aizawl; Nimin khan Chief Minister Lal Thanhawla chuan cheng nuai 241 senga siam Serchhip District Park a hawng a, mipuite chu tha taka chhiah chi hrang hrang pe thin turin a ngen.

Chief Minister chuan, “Mizote hi hnam bal tak kan la ni tih kan inpawm a ngai a. Kristian kan nih angin fai hi kan tih tur a ni tih kan hriat a ngai ni,” a ti. Sawrkarin thawhchhuah a neih tlem avangin hmasawnna hnathawh kawngah hmalak chak a harsa nia sawiin “mipui ten sawrkara chhiah chi hrang hrang kan pek thin electric, tui bill leh a dangte kan pek that a ngai a ni,” a ti a. Chhuan lo la awm zel turte tan Mizoram chu chenna tlaka siam turin sawrkar, kohhran leh tlawmngai pawlten tih tur an nei vek tih sawiin Park hawn tak chu a tha leh tangkai zawng hmang turin mipuite a ngen bawk.

Park hawnna a khual zahawm LAD Minister PC Lalthan- liana chuan, “Sawrkarin sum harsat thu kan sawi rualin hmasawnna hnathawh a kal reng bakah NLUP sem reng a ni a. MNF hunlaia sum tam thu Assembly House a an sawi thin lai aiin tun dinhmunah hian hmasawnna hnathawh a thuanawp chuang lo a ni,” a ti. LAD Minister chuan Serchhip chu district vannei tak leh hmasawn ber pawl nia a hriat thu a sawi bawk.

Nimina hawn tak Serchhip District Park hi Serchhip leh Keitum inkar, Dawngzawl rama awm a ni a. Park siam hna hi kum 2008 atang khan thawh tan niin 22.19 bigha a zau a ni a. A siam nan hian Rs.2,41,39,547 sen a ni a, park chhungah hian swimming pool 2, dil 1, cottage 1, conference hall leh pawimawh dang thahnem tak dah a ni.

Nimin Park hawnna inkhawm hi K.Lalmuana, Additional Secretary, LAD in a kaihruai a ni.

Facebooktwittergoogle_plusredditpinterestlinkedinmail

CESS ATANGIN NUAI 233 HMU AWH

Kum 2011 atanga November ni 10,2014 thleng khan Building & Other Construction Workers Welfare Board hnuaiah ‘Cess’ Rs.23,38,19,064 hmuh a ni tawh. Assembly session neih mekah Lalruatkima MLA in ziaka zawhna a siam a chhan naah LE&IT Minister Lalrinmawia Ralte chuan Cess te hi Department leh Company hnuaia contractor te hnen atanga lut vek a ni a ti a. Heng te hi department 26 leh Company 8 te niin a sawi. Joint Director LE&IT, District Labour & Employment Officer, Labour Officer leh Assistant Welfare Commissioner te chu sawrkarin Cess collect tura a ruat te an nih angin an collect (lakhawm) thin tih a sawi bawk.

Facebooktwittergoogle_plusredditpinterestlinkedinmail

MLPC atangin Nuai 1000 luh beisei

Aizawl; The Mizoram Liquor (Prohibition and Control) Rules, 2014 hman anih hunah sawrkar chuan zu atangin kum khatah nuai 1000 vel lakluh a beisei.

RTI hmanga Zalen palai zawhna an chhan naah Excise & Narcotics Department chuan MLPC hi tun sawrkar kum kal lai chhungin hman tum a ni a ti a. Zu dahthatna hmun (godown/ware house) pawh siam tum a niin a zat tur erawh a la sawi theihloh niin an sawi. MPLC dan hman tum anih avangin hmanrua leh bungrua engmah lei thar a la awm lo niin Excise &?Narcotics chuan an sawi a. Mizoram Excise & Narcotics department hnuaiah thawktu 528 an awm niin a tarlang bawk a ni.

Facebooktwittergoogle_plusredditpinterestlinkedinmail

Sangha 50 qtls. cage culture in man

Aizawl; Fisheries Department chuan Serlui a sangha khawi dan thar ‘cage culture’ hmangin kumin ah sangha quintals 50 an man tawh a, quintals 100 chuang man leh tur a la awm dawn niin an sawi.

Fisheries Department in Zalen an hrilh dan in cage culture hi hmarchhak bialah chuan Mizoram hi a ti hmasa ber state niin a hlawk hle a, Serlui a dah tak cage culture ah hian department chuan a chi leh a bawm an tumsak a, a enkawl hna chu farmers te kutah dahin chaw pek leh venhim hna an thawk thin a ni.

Kum 2013-2014 chhung khan Mizoram chuan sangha dil atangin sangha metric ton 5540 a tharchhuak a, sangha note nuai 260 tharin a chi nuai 325 semchhuah a ni bawk. Hriattheih chinah Mizoram ah hian sangha khawia eizawng/ sangha dil nei chhungkaw 12425 an awm mek a, NLUP leh RKVY hnuaiah kumin hian mi tam takin dil an siamthar leh bawk.

Facebooktwittergoogle_plusredditpinterestlinkedinmail

Bawng chaw channa sem

Aizawl; Nimin khan AH&Vety Minister C.Ngunlianchunga chuan Feed Mill, Selesih Farm ah chaff cutter (bawngchaw channa khawl) mi 20 hnenah a sem a, chaff cutter dawngtute hi NLUP hnuaia bawng lian dawngtute an niin a dang zawng chu Vety Farm a hman turin pek chhuah a ni.

Minister chuan bawngchaw channa chu Mizoram bawng vulhtuten an hman vawi khatna tur nia sawiin, “state changkang zawkah chuan an bawngchaw te uluk takin khawl hmangin an chan sawm vek a, bawng tan pawh ei a awlsam in an hnute pawh a tam phah a ni,” a ti. Minister chuan bawng chaw tur hnim hring 90 % chu ran in a ei thei tawh dawn tih sawiin paih a awm tawh dawn lo tih a sawi bawk. AH&Vety Minister chuan NLUP thlangtute chu thingtlang khaw kel tak takah an awm avangin bawng kahraina programme in a thleng phak ve lo a, hei vang hian a thlahtu tur bawngpa 28 chu Orissa atanga lei a ni tih a sawi bawk.

Facebooktwittergoogle_plusredditpinterestlinkedinmail

Nikum aiin kuminah ruahtui tla tlem zawk

Aizawl; Nikum aiin kumah ruahtui a tla tlem a, kumin chhungin ruahtui 1792.80 milimetre a tla tawh a, kumin chhunga ni khata ruahtui tlak tam ber chu September ni 19 niin hemi ni hian 78 mm a tla a ni.

Science & Technology Department chhinchhiah danin kumin ah hian January thla tihloh thla dangah chuan ruah hi a sur ziah a, February thla ah ruah sur tlem berin 15 mm a sur a, September thla ah sur tam berin 414.10 mm a sur a ni. Chhinchhiahna atanga a lan danin nikum 2013 khan Mizoram ah ruahtui 1950.10 mm a tla a, nikum ah hian January, November leh December thla ah te ruahtui tla record a awm lova, thla dangah chuan a tla vek a ni. Nikum chhung khan May thla ah ruahtui hi tla tam berin 458.40 mm a tla a, a tlak tlem ber February ah 3.30 mm a tla thung. Nikum chhunga ruahtui tlak tam ber ni chu May 9 niin 64 mm a tla a ni. Kum 2012 khan ruahtui hi 2484.50 mm a tla niin record a ni a, hemi kum hian December thla tihloh ah chuan ruahtui hi a tla vek a, ruahtui tlak tam ber thla June ah chuan 505.50 a tla a, a tlem ber February ah 7.30 mm a tla bawk a, a tlak tam ber ni chu November ni 7 niin 74.5mm a tla a ni. Kum 2011 khan ruahtui hi 1900 mm a tla a, November leh December ah te ruahtui tla record a awm lova, a tlak that ber thla August ah chuan 412 mm a tla a, a tlem ber February ah 0.70 tlain nikhata a tlak tam ber September ni 21 ah 82.2mm a tla a ni.

Sik leh sa chungchangah kuminah hian November leh December te ziahluh a la nihloh avangin a average hriat theih a la ni lo a, mahse thil inthlak danglam nasa a awm dawn lo nia hriat a ni. Kumin ah hian a lum ber chu April 22 niin a lum lam hi 34.6 degree Celcius a ni a, a vawh ber chu February 18 niin 5.9 degree a ni. Nikum 2013 a khaw vawh lama chawhrual (average) chu 16.73 degree celcius a ni a, a lum lam chawhrual chu 24.53 degree Celcius a ni a, khaw lum ber chu March 11 niin 34.5 degree a ni a, a vawh ber chu January 11 niin 5.6 degree a ni.Kum 2012 a khaw vawhlam chawhrual chu 17.16 degree a ni a, a lum lam chawhrual chu 26.34 degree a ni thung. Khaw lum ber April 3 ah 33.3 degree a ni a, a vawh ber January ni 14 ah 5.6 degree a ni thung.

Mumal taka chhinchiah tan kum 1998 atanga nikum 2013 thleng khan ruahtui tla zat hi 27,934.02 mm nia chhinchhiah a ni a, heng kum 16 chhung hian 2010 ah ruahtui hi a tla tam ber a, 2628 mm a tla niin record chuan a tarlang a, a tlak tlem ber 2000 kumah 1509.90 mm a tla nia record a ni bawk. Kum 16 chhung chhinchhiahna atanga a lan danin khaw vawh ber January 14,2012 ah temperature chu 5.6 degree Celcius a ni a, a lum ber April ni 8,2001 a tempareture chu 35.4 degree Celcius a ni.

Kumin ah hian ruahtui tla a mumal loh avangin loneitu tam tak chuan harsatna an tawk a, a bik takin Sihphir a Iskut chingtu ten an thar chhiat bakah kumdang an phaklo nasa hle a. Champhai leh hmun thenkhat a leilet siamtu ten harsatna an tawk a, a hun taka buh an phun theilo a ni.

Facebooktwittergoogle_plusredditpinterestlinkedinmail

Lunglei district ah PIC

November ni 26-28,2014 inkar hian Lunglei district ah Public Information Campaign/ Jan Soochna Abhiyan on Programmes neih a ni dawn.

Campaign hi Mualthuam North, Ramlaitui leh Kanghmun South ah te neih a ni dawn a, Nov.26 a Mualthuam ‘N’Community Hall a neih turah LAD Minister PC Lalthanliana khuallian a ni ang a, Ramlaitui a neih ah Lunglei DC Ashish Madhao More IAS khuallian a ni ang a, Kanghmun ‘S’ a neih ah Hrangturzo bialtu MLA Vanlalawmpuii Chawngthu khuallian a ni ang.

Facebooktwittergoogle_plusredditpinterestlinkedinmail

Login

Lost your password?