Monthly Archives: November 2014

Dincham lawm dawn

Tobacco Quitters Association of Mizoram chuan November ni 27,2014 zing dar 7:30 khian Millennium Centre kawtzawl ah an dincham lawmna hun an hmang dawn a, he hunah hian Health Minister Lal Thanzara chu khuallian a ni ang. TQM chuan an rising day pual hian zuk leh hmuam ti thin zawng zawng te chu nghei tura an ngen bakah hemi ni chuan insum turin an ngen.

Facebooktwittergoogle_plusredditpinterestlinkedinmail

In hlauhawm 21

Aizawl khawpui ah hmunhma hlauhawm taka in sak 21 a awm a, heng zinga 19 chu thiah an ni tawh tih DM&R Minister C.Ngunlianchunga chuan a sawi. Minister chuan in hlauhawm la thiah loh zinga 1 chu Gauhati High Court in stay order a chhuah vang a ni a, a dang pakhat chu in neitu nihna chungchang court case kallai anih vang niin a sawi bawk.

Facebooktwittergoogle_plusredditpinterestlinkedinmail

Road Safety

Zoram Drivers Union (ZDU) chuan November ni 25 atanga 30 inkar hian Fimkhurna Hapta ‘Road Safety Week’ an hmang dawn a, he hapta hawnna inkhawm hi November ni 25 zing dar 7:30 hian ZDU Office, Bawngkawn ah neih a ni dawn a, Zorammawia IPS, IGP chu khuallian a ni ang.

Facebooktwittergoogle_plusredditpinterestlinkedinmail

MEDICO LEGAL ADVISER THAR RUAT

Mizoram sawrkar chuan Dr. Lalringmaia MD, Forensic Medicine Specialist chu Medico Legal Adviser cum Police Surgeon atan a ruat thar a ni.

Facebooktwittergoogle_plusredditpinterestlinkedinmail

Thisen pe

Nimin khan a mamawh apiangte hman turin Dawrpui Branch KTP chuan thisen unit 51 Aizawl Civil Hospital ah an pe a, thisen petute hi miap 44 leh hmeichhia 7 an ni. Aizawl Civil Hospital tan hian Mary Jones school in unit 11 leh Dinthar bial PYD ten unit 5 an pe bawk. Nimin vek khan Hunthar Branch KTP ten Synod Hospital a hman turin thisen unit 29 an pe a, thisen petute hi mipa 24 leh hmeichhia 5 an ni.

Facebooktwittergoogle_plusredditpinterestlinkedinmail

Nawrh titawp

Tupui ‘D’ lei dawh hna muan lutuk avang a S.Vanlaiphai Group YMA leh YLA Sub-Hqrs Sangau ten an huamchhunga zirna In leh pisa zawng zawngte ni 2 chhung an khar hnuah Zirtawpni khan NGO hruaitute leh lei dawh hnathawktu M/S Guha Niyogi Associates & Engineer Kolkata Ltd. hotute chu Tuipui ‘D’ khuaah an inbia a, Contractor-te hian December ni 20 ral hma ngeia lei dawh hna hi an zawh tur thu leh hemi atan hian sawrkar-in pawisa a pek belh tawh lo a nih pawhin anmahni pawisa hmanga an thawh zawh ngei tur thu an sawi avangin NGO te hian lungawilohna an lantir chu tiamchin awm lovin an ti tawp ve nghal.

Facebooktwittergoogle_plusredditpinterestlinkedinmail

Sawrkar hnathawkte hnathawh phung thlak

Mizoram Assembly neih mek a ni a, sawrkar hnathawk sulhnu fel tawk loh avangin zawhna leh chhanna inmillo a awm a, hei hian sawi zui a hlawh a, Chief Minister-in bawhzui a nih tur thu a sawi tawh bawk. Sawrkar hnathawk thubuai nei laite hming, nihna leh a chhan sawichhuah a ni bawk.

Kan rama hna pe tam thei bertu chu sawrkar a ni a, hemi vang hian hlut a hlawh a ni. Kan ‘budget’ pawh sawrkar hnathawk leh sawrkar enkawl nan a kal ral deuh vek a, hmasawnna tur (development) atan sum a tam vak ngai lo. Department thenkhatte chu Central sawrkar-a zawm pui nei fumfe lem lo an ni tawh a, Central sawrkarin scheme a siamsa hmanga department nawr kal an awm ta nual mai. Prime Minister Narendra Modi a chuan sawrkarin hna a thawh that theih nan sawrkar tih tet a, mimal (private) kuta hna thenkhat dah a duh hial tawh a ni. Hetiang a nih laia rorelna sang ber Assembly-ah meuh hnathawk inthlahdahna rah a lang hi a pawi hle a, ‘action’ lakzui ngei a nih beisei ila. Eiruk emaw hnathawh that loh emaw vanga thubuai neih phei chu zahthlak tawp a ni.
Sawrkar hnathawkte hnathawh danah siamthat ngai a awm nuala, mahni inthununna an tlachhama, hnathawh dan kalphung a mumal lo tlangpui bawk a ni. Taima taka thawkte awm bawk mahse tam tak hi chuan an nawr liam mai mai deuh niin a lang thin. Hetiang ang hian rei tak an lo kal tawh a, hnathawk tharte pawhin tihdan pangngaiah an neih ve mai thin. Department hotu thenkhat te chuan ‘work ethics’ a awm theihna turin hma an la tawh thin a, mahse thawhpui harsa a sawi an ni daih thung a, a letlingin thil a kal a ni ta der mai. A huna pisa thlen, tha taka thawh a, a huna haw leh mai hi thil har niin a lang tehchiam lo. Hnathawkte inthlahdahna hi suma chawi tur ni se chu Mizoram hi a chawi hnem pawl a ni ngei ang.

Kan ramah mihring kan la tam lo a, thu chhia a tha inhriatpui tawn tham lek kan nih avangin inhriat thiamna thui tak Mizo rilruah a awm sa a. Sawrkar hnathawkte’n hetiang hi an seng lut a nih chuan ‘work culture’ tha neih a har khawp ang. Chutih rualin kan hnamin a ken tel, Mizo te chhuan em em ‘phut let nei loa midang tana malsawmna nih tlawmngaihna’ hi sawrkar hnathawk te’n an eizawnna lamah an hlamchhiah leh si a nih chuan Mizo ze dik tak an phawrh kim lo tihna a ni a, duh lai reh buna a remchang lai lak vawng ngawt zawng thil tih rei chi a ni lo. Sawrkar hnathawkte hian Mizo-na zephung hi eizawnnaah keng tlang sela ‘work ethic’ tha tak a pian mai a rinawm a. Hnam nihphung piah lamah taima taka mahni eizawnna thawh hi mihring nun phung pangngai a ni hrim hrim.

Sawrkar hnathawkte’n inthununna (discipline) an tlakchhamna chhan pakhat chu a lu berin a zir loh vang a ni fo thin. Sawrkar hnathawkte hi danin a phuar thui hle a, thawk tha lo emaw dan bawhchhiate chu hremna awm sa a ni a; thil tisual te chu hrem lohin an awm fo thin a. Hei hian a thawk mek leh thawk zel turte ah ngaihzamna a siam thin niin a lang a ni. Hnathawk tam zawkin ‘property return’ an tarlang lo ringawt pawh hi hmalakna lian tham a tling der a. Inhriatthiamnaa department hnathawkte an kal zel chuan tih dan phung tha lo a piang zel dawn a, chu chuan a chhe zawngin nghawng a nei bawk ang a, thang tharte hma hun a chhiat phah thei bawk. Inthunnuna lek ngam hruai tu emaw hotu kan mamawh ta hle mai a, department hotu leh ram hruaitute pawhin kengkawh sela mipui hian an dem dawn loa, an thlawp zawk dawn a ni.

Facebooktwittergoogle_plusredditpinterestlinkedinmail

SESSION ATANGA NGAIHTUAHNA

Mizoram roreltuten thlasik thutkhawm an nei mek a, a tir lamah budget pharh a ni a, hun awl nei deuh tan chuan kan thlan lal MLA rualte thupui hlapui vai vel hi a hmuhnawmin a bengvar thlak khawp mai a, zawhna leh chhanna te, private resolution sawihona te pawh a ngaihnawm viau thin. Ram hruaitute hian an che vel hi mipuiin an thlir thup tih an hre chiang tawh viauin a lang a, chet sual palh hlek leh tawngkam chheh sual palh zauh pawh a mualphothlak thei a ni tih pawh an haiin a rinawm loh.

Assembly session laia MLA ten ‘Ka bial’ tih an lam thin hi an bial mipui tan chuan a lawmawm duh viau a; mahse, thenkhat chuan an lam zing mah mah deuh thin. U.S. President hlui John Quincy Adams kha pa dangdai tak, ram hmangaih em em mai a ni a.

Massachusetts atanga senator a thlan a ni a, a chet dan phung kha a dangdai khawp a, ram tana tha tur nia a ngaihah chuan an party leh midang ngaihdan tur dawn loin a kal tawp mai a. Ani ngaihdan chuan a bial aiin ram pum huap U.S. Senator a nihna a pawimawh zawk a, amah thlangtu Massachusetts mipuite lawm zawng aiin ram pum tana tha tur a ngaihtuah zawk avangin Senate-in dan an siam tumin an duh loh lam a tan tlat mai a, rei lo teah a tlak phah ta nghe nghe a. Lansarh duhna leh lal leh tlin zel duhna hrim hrim rilru pu ni se a bial mipuite duh dan a ngai pawimawh ber ang; mahse, chu ai chuan U.S. senator a nihna a dah pawimawh zawk a, a tlak phah ngam a ni. Hun a lo kal zel a, ram hmangaihtu tak tak a ni tih an hria a, President hial a ni leh ta tho a, vawiin thlengin ram dang nena inkungkaihna lama thawhhlawk ber zinga ngaih a ni a, ram hmangaih ber pawla sawi a ni bawk.

Kan MLA rualte hian an bial nge Mizoram pumpui an dah pawimawh zawk ang? Ram hmasawnna vei tho si hian an bial bil chei a, an dinhmun insawhngheh zel hi an ngai pawimawh ber a nih chuan an nihna an hai a ni ang. Bial pakhat MLA an ni lo a, Mizoram MLA an ni. Chutiang rilru an put loh chuan ruling MLA nei lo bial apiang an ro mai dawn a ni. Tunhma khan ruling MLA neih leh neih loh a inthlau tih a ni thin a, tunah pawh hian a la ni tho maithei. Hman atang tawhin sorkarin ruahmanna pawimawh a siam hian CM bial te, minister bialte hian duhsak an hlawh bik deuh a ngaih tur thil a awm zeuh zeuh a, a pawi khawp mai. Hmasawnna kai rual loh chhan ber pawh hmun thengreng zawk leh kilkhawr zawkten ngaihsak an hlawh loh vang a ni ber.

Ka ngaihtuah fo thin chu kum tin a sorkar laipui leh hmun dang atanga Mizoram hmasawnna tura sum lokal te hi dik takin, a nihna tur takah hmang ta ila… chutiang bawkin thingtlang hmasawnna tura ruahmanna hrang hrangte pawh hi dik taka hman thin ni ta se la chuan vawiinah hian Mizoramah hian mi rethei an awm mang lo hial ang a, thingtlang mite pawh an lungawi viau ang. Mahse, thingtlang hmasawnna tur sum lokal tam ber hian thingtlang mite a thleng pha lo thin thung, hei hi a veiawm khawp mai. Tun hnai lawka Zamuang khuaa kan kal tumin an khaw pa pakhatin huan neituten an sum dah thatna tur bank an mamawh thu min hrilh a. Sorkar hian thingtlang mite chawikanna tur leh lo neitute hamthatna tur zawng hian ngaihtuahna zau zawk sen a ngai khawp mai. Aizawla Rural Bank an din thar sup sup mai a, thingtlang mite hamthatna tur bank ni si hi khawpuia chengte hian an hlawkpui ber mai lo’ng maw? Aizawlah hi chuan commercial bank hrang hrang, multinational bank thleng a tam tawh viau lai hian thingtlang lama bank din belh zel turin thuneitute pawh hian tanla zel se.

Tun tum Assembly thlasik thutkhawm chu thal laia an thukhawm ai chuan a ngaihnawm ta deuh a, an chhangchhe lutuk ta lo a, kohhran te deuh indang ang mai kha chu an ni tawh lo. Ama’rawhchu, eptu lam MLA an tlem mah mah a, an intam hneh lutuk deuh hi mi tam takin an duhkhawp lo deuhin a lang a, chu achhapah an zinga pahnih khat bak hi chu session atan hian an inpuahchah tak tak vak lo emaw tih mai tur an ni leh zel a. Democracy-ah chuan sorkar tha tak a awm theihna atan eptu lam an that a ngai a, sorkar kal dik lohna lai te, thutlukna tha lo an siam ang chi te phawrh chhuak a, a tul anga mipui thinlung chawk tho zawnga an kalpui thiam chuan sorkar pawh a fimkhur phah thin. Eptu MLA zingah mipui pawhin an fak deuh langsar bik an awm a, anni hian Assembly session hi an awi nung hram hram ti zawng pawhin a sawi theih awm e, pakhat phei chu ruling MLA lakah house leader pawhin a thlavang hauh deuh nghe nghe kha. Eptu MLA te hi tun ai hian tang leh zual ta se a, sorkar hmalakna hrang hrangte zir chiang leh zualin, sum dinhmun leh sorkarin a enkawl dan te hi zir chiang thin se, nasa zawkin sorkar hi han lepse ta se a hlawk thlak leh zual ngei ang.

Tun session-a ha hawlh zak pakhat chu ‘Compensation hnam kan ni’ tih chungchang kha a ni. Mahni hnam kan hmuh dan hi a inang lo tlang awm hlawm viau awm e, keinin rinawmna hi kan hnam ze pui a ni a, hnam dangte pawhin kan pi pute an ngaihsan chhan a ni a, chu zia chu kan la hloh vek lo a, hruaitu tha takin min hruai se hnam rinawm ber pawl kan nih theih kan rin laiin thenkhat chuan hnam hmusitawm ber pawla min ngai tawk an awm a ni mai thei. Kan CM-in, ‘Compensation hnam kan ni’ tih a sawi khan ngaihtuah a tithui viau a, mi tlem te chauhin (za zel a pakhat pawh tling lo turin) dik lo taka compensation an lak avanga compensation buaipui luai luai hnam anga min puh kha hriatthiam a har khawp mai. Kum 2009 pawh khan hetiang chiah hian a lo sawi tawh a, mahni buaina hi hnam pum buaina emaw kan ti pawh a ni maithei e.

Ram hruaitu thenkhat thusawi a ngaihnawm viau laiin thenkhat thusawi han ngaihthlak kha chuan an thu khel ber a an man chiah lo tih a hriat a, ngaihdan hlui pui pui nei pawh an awm leh zauh thin. Kawngpui tha chungchang sawitu pakhatin kawngpui tha nei tur chuan hnam upa tak (european-ho ang) nih a ngai ti zawnga a sawi kual chiam te kha a zia lo deuh. Lengpui airport runway tha tak a siam theih chuan he ramah hian kawngpui tha tak pawh a siam theih tur chu a ni. Hman atang tawhin kan kawngpui chhiat chhan hi chu, zep thu a awm lo, corruption vang a ni. Ram buai hmaa kawngpui leh tunlai kawng khaikhin chiam ai chuan hei hi pawm ngam tlang ila, kawngpui siamna sum chingpen nasa lutuk hi vei tlang ila, insiamthat tum ila kan tha mai ang.

Finance minister-in kan sum dinhmun that loh zia a tarlan te, kumin chhunga pung neia sum puk (WMA) tamziate ngaihtuah chuan tun assembly session atang hi chuan inrenchem taka kal a, dik tak leh fel fai taka sum hman a tulzia a lang a. Sorkar laipui kalphung inthlak mek zei zia thlir chunga hmasawn zawng a kal thiam a ngai dawn tih a lang reng a, chumi hre reng a kan hruaituten min hruai chuan kan hmabak a eng viau thei a ni.

Facebooktwittergoogle_plusredditpinterestlinkedinmail

Ka Huang (Nov 23, 2014)

Tun tum chu Mizo tam zawkin kan chhiar peih vak loh leh ngaihnawm kan tih loh zawng, thil tul nia ka hriat si ka’n ziak leh reng reng teh ang.

Ningani (Nilai-thawhtan ni loin) zan lai vel khan LIR a nghing a, ka mu nghet hle a niang, ka hre ve lo. Saphoin Earthquake an tih hi keini Mizoho hian LIRNGHING kan ti tlangpui niin ka hria. Ka dictionary neih chhun ka’n en den den a. Remkunga chuan LIR tiin Mizo tawng dictionary-ah a ziak a, DIK CHIAHIN ka hriatpui. J.T.Vanlalngheta chuan LIR chu short form of lirnghing a ti bawk. Mi dang Z.T.Sangkhuma te, Pu Buanga te chuan lirnghing tiin an dah. Ni e, LIRNGHING ti hian kan sawi tlangpuiin kan hmang na a, sentence kan siam hian LIRNGHING A?NGHING ti loin LIR A?NGHING tiin LIR chauh chu noun-ah kan hmang a, NGHING chu verb-ah hmangin chu LIRNGHING (noun leh thil hming nia kan sawi mai chu) kan then sawm leh si a. Lirnghing hi thil hming pangngaia hmang kan nih chuan lirnghing a nghing tih tur ni awm tak a ni. Mizo hian thil hming kan phuah dan tam tak hi hrilhfiahna ang deuha kan phuah deuh fo avangin he tawngkam hi a buai duh deuh a ni chek ang. Hawh u, LIR i ti tawh mai ang u hmiang.

Sawi takah chuan Saptawnga EGG pawh hi ARTUI kan ti thla rawk a, TUI?chauh ni awm a ni. Sangha tui, Sava tui, Rul tui te han sawi hian egg a ni tho si a, egg hi artui tihna a nih hrim chuan Sangha artui, Sava artui, Rul artui tih tur a ni mauh si. Zirlaibu siamtute hian naupang zir tirte tan tan tha leh se a tha phian lawng maw le.

Chhiartu duhtak, he thumal pahnih (noun) LIRNGHING leh ARTUI hi lo ngaihtuah ve teh mah, mak angreng tak a ni, i ti ve em?

Tun tum kan roreltute thukhawm hi TV-ah ka lo en ve zauh zauh thin a, Delhi-a vaiho MP?thukhawm nen chuan a danglam zar mai. Kan MP-ho thukhawm khu chu fel thekthawka thu sawi thei an awm pawh ka hmu mang lo, a buai nuai nuai ni ber maw ka ti mai. Congress hun lai phei kha chuan an insual lo chauh hi a ni reng mai maw ka ti thin! ROREL THEI LOIN AN TILTIAK tih kha a tam em em mai a nih kha! Kan MLA-te thukhawm thung hi chu a mawiin a zahawm, a chang chuan an tawngkam an titha thupuifun lu mah mahte hian ka hre mah mah. A mawi lo ka tihna ni loin hun an khawhral phah nasa mah mah a ka hriat vangin, Pu Hipheia’n bell vawi hnih a hmeh hnan te an ni nawk mai a. Zawhna zawttuin a zawh hnua a chhangtuin a zawttu zawhna a sawn nawn leh deuh ziah te hi bân sela chu hun an neih rei phah ngei ang. Tuna kan MLA-te tawngkam hman (session laiin) hi chu a thuhnuairawlhin a thlum dam lu mah mahin ka hria. Speaker an address tawh kha chuan chumi khami zawhna No. han tihkual leh duah khan hun tam tak a paih lo maw? Ka hriat sual loh chuan India, Republic of India kan nih atang khan heti ang tawng hawihhawm lutuk ‘Honourable’ tih ang reng, Your most honourable tih ang reng, I?have the honour to be tih ang rengte hi tih tawh loh tur tiin ka hria. Chu bakah Coolie tih hi bâna Mazdoor tih tur ti bawkin ka hria. Hetia sawi takah chuan sapho kha chuan a hawihhawm thei ang ber kha an hman dan kha a ni a. British General Wellington-a pawh khan a hnuaia General dang pakhat suspend order a han ziak a, a tawp khar nan ‘Your obedient servant’ tih a tul tlat mai si a, niin a hre thei mawlh si lo a, ‘Your most abedient servant (which you damn well know that I am no)- Wellington tiin a sign ta e an ti!

Bung lutuk leh chungtlak lutuka tawngkam hman chu a mawi lo teh meuh ma, mahsela thlum, hawihhawm leh thuhnuairawlh lutuk hi chu a awmin ka hre lo ve tlat; hun leh hmun tihek lutuk khawpa tawngkam hman hi a leh lutuk a ni. An sawi fiamthu fo thin: An fanu tleirawlun zanriah chaw a chhum a, “Ka pa, chaw chu tui ka leih belh ang em?” tiin a pa a zawt a. “I?leih belh chuan i nu feh a lo hawng ang a, chaw a duh rum sia, ‘In chaw chhum chu a va nem dei duai ve, buhhawp ang chauh mai, puar theih ngaihna a awm hleinem,’ a rawn ti ngei ang a, i leih belh loh chuan kei, i pa hi kawchhung na a ni ti i hria a, ka ei lo thei si lo ang a, ka pum a han na leh ngei ang a, kawmthlangte chingal emaw zana dil a tul leh ngei ang a……” a ti duah mai a, leih belh tur nge tur loh tih pawh a chhang lo e an tih ang mai deuh khan a awm theih bawk a ni.

Mawi hnai tawk chu a awm. Thlum teh dum lutuk lo deuh hian sawi ni ta sela, an hun neihah an sawi tur an sawi tam zawk hman lawng maw?

Facebooktwittergoogle_plusredditpinterestlinkedinmail

THAU (RIH BELH) HI ENG VANGTE NGE? ENGE TIH TUR Nge?

Mihring kan in an loh avangin a then thau chak ngawih ngawih an awm a, chutih laiin thenkhat thung chu cher chak ngawih ngawih an awm ve leh bawk. Taksa rih zawng hi kum a zir te, san zawng a zir te, khawsak phung a zir te pawhin duhthusam ti a han sawi theih a awm hran lova, mi thiam te’n tehna an hman common tak, “Body Mass Index – BMI” pawh hi a tha ber “ideal BMI” an tih hi mipa leh hmeichhia leh kum a zir te pawhin a dang thei viau bawk. Engpawhnise, thau hrisel lo chu mahni in a hriat ber an ti thin. Chumi teh nan chuan kawng chho leh step kal te, chet vel hrim hrim ah kan inthazo em tih hmang hian a inteh theih a ni. Chhhan hrang hrang avangin rihna hi a rawn sang thei a, i ei leh in bakah, i nitin khawsak phung danglam chuang silova i rihna a san zel chuan a chhan hrang hrang ni thei te chu:

1. Zan mut that loh – Zan meng rei chi i nih chuan chaw ei tawh hnu si, zan lamah i ril a tam fo anga, snacks/chips ei mai a awl bawk. Mut that loh hrim hrim hian thau a ti zual duh viau bawk. Chuvangin i mut theih loh chhan hi hriat a, enkawl i ngai thei ang.

2. Taksa/rilru hah lutuk hian stress a siam nasa a, chu chuan taksa rih zawng a ti sang thei. Hahchawlh dan i thiam a ngai hle tihna a ni.

3. Damdawi thenkhat – thisen sang, zunthlum leh rilru lam enkawlna (antidepressant) thenkhat te hian taksa rih zawng a ti sang thei a. Hetiang i ei hnua i rih zawng a rawn sang anih chuan i doctor rawn ngei ang che.

4. Steroids – heng damdawi hi a tangkai em em a, chutih rualin fimkhur taka ei a ngai thung. Burma lam chhuak damdawi thenkhat ah hian a awm niin a lang a, a composition hriat theih loh phei chu ei reng reng loh tur a ni. Chaw ei a ti tui a, taksa ah tui a khawl duh bawk a, vawi leh khata tawp san thut phei chuan harsatna a thlen fo a ni. Doctor chawh anih loh chuan heng damdawi hi ei reng reng loh tur a ni.

5. Hmeichhia bikah hian naupai venna damdawi Oral Contraceptive Pills thenkhat hian taksa rihna a ti belhchhah thei bawk a. Tin, thi hul chhoh hun lai hian thau a insiam belh fo bawk. Amaherawhchu a rei lo thung. Ei leh in lam insum hret chuan a reh ve leh mai bawk; exercise a pawimawh hle a ni. A dang leh ah chuan Polycystic Ovarian Disease an tih, chi bawm bawk insiam pung hian a thlen fo bawk a ni.

6. Thyroid natna “Hypothyroidism” hian weight gain hi a thlen duh hle a. Ke vung te pawh a awm tel fo bawk. Cushing’s Syndrome an tih mai natna nei te ah a awm duh viau. Asthma, ruhseh leh lupus (SLE ang chi te) vanga steroid damdawi ei lai te hian he syndrome hi an nei fo bawk a ni.

Inenkawlna lamah chuan a hnuaia kan tarlan te hi hriat a tha hle:
1. Damdawi ei lai i neih a. chu chu i rih belh chhan nia i hriat chuan nangma thuin ei lo ngawt suh. Doctor rawn hmasa la, a dose tih hniam emaw, a tlukpui damdawi danga thlak te pawh a lo chawh thei ang che.

2. Ei leh in insum vak hi a tha ber lo. Insum rau rau ah chuan mawm, leh thau tam, sa leh chi insum hi a pawimawh. Balanced diet ei a pawimawh hle a, fimkhur loh chuan malnutrition leh vitamin tlakchham te a thleng thei a ni. Fast food leh snacks/chips lam erawh insum tluk a awm lo thung.

3. Exercise lak chungchangah fimkhur a tha. Over taka tih thut hian taksa in a zo duh lova, kum 35 chunglamah phei chuan infiamna (badminton ang te) hmanga exercise tih thut loh hi a tha hle. Kawng nat phah an tam a ni. A tawk te a exer lak thiam a pawimawh a ni.

Facebooktwittergoogle_plusredditpinterestlinkedinmail

Login

Lost your password?