Monthly Archives: December 2014

Thukhawm ang

December ni 17,2014 chawhma dar 11hian Committee on Estimates chu Assembly Annexe Committee room ah an thukhawm dawn a, November 3-5 inkar chhunga Kaladan Multi Modal Transport Project an tlawh chungchang an sawiho ang. He Committee ah hian Lalrinliana Sailo chu chairman a ni a, member te chu Vanlalzawma, T.Sangkunga, R.Vanlalvena, Vanlalawmpuii Chawngthu leh Dr. Ngurdingliana te an ni.

Facebooktwittergoogle_plusredditpinterestlinkedinmail

Ruat thar

Governor chuan Gauhati High Court Judge hlui Justice BP Katakey chu Mizoram State Consumer Disputes Redressal Forum Chairman atan a ruat thar.

Facebooktwittergoogle_plusredditpinterestlinkedinmail

Khap

Mizoram sawrkar hmun pawimawh New Secretariat Complex alo him leh thianghlim zawk theih nan GAD Commissioner chuan complex huam chhunga hlimhlawp/intawllenna lam chi reng reng huaihawt bakah kawng dunga private motor park te a khap.

Facebooktwittergoogle_plusredditpinterestlinkedinmail

Bial fang mek

Assembly Speaker Hiphei chu a bial fangin a thang mek a, naktuk hian Aizawl a lo let beisei a ni.

Facebooktwittergoogle_plusredditpinterestlinkedinmail

Charity fund

Mizoram Journalists Association in kumin atana Charity Fund an thawhkhawm chu nimin thleng khan Rs. 17,460 a tling tawh a, Charity fund thawhtu zingah hian MJA member nilo Lalruatkima MLA (Rs. 4000), H.Laldinmawia, Lian Sangluri, PB Lianthangpuii, K.Lalmuansanga, Zodinpuia te an tel a ni. Charity fund hi aduh apiang tan December ni 19 thleng thawh theih a ni a, pawisa tlingkhawmte hi Aizawl Civil Hospital tan hlan a ni ang.

Facebooktwittergoogle_plusredditpinterestlinkedinmail

KRISMAS THLIRLAWKNA

– K.L.Rochama

“Kan ei kan in Krismas se” tiin ruai nen Krismas chu kan lo hmuak leh ta mek a. Hlim taka Krismas hman theih loh hlauvin Kohhranhote chuan sum tam tak sengin Camping-te kan buatsaih a. Mahse, kum dang ang bawkin, “Camping Harhna” chuan Krismas pawh a ban phak leh dawn ta lovin a lang a. Kumin kumthar tuka ka inkhawmnaa thusawitu, an Kohhran Chairman chuan, “November thla leh December thlaah camping kan nei a. Mahse, zing tawngtai inkhawmah pakhat mahin kan pung chuang lo va. Kohhran Upa thlang thei khawp pawh kan inkhawm thei lo a nih kha,” tiin duhthaw takin a sawi a.

He Kohhran Upa thusawi hian ngaihtuahna a tithui hle. Krismas leh Kumthar ruai sachhumna mei a mih rualin Biak In lamtual a ruak leh nghal ang a, ruai thehna nawi inchuha ui insual thawm a reh rualin zaikhawm khuang rite pawh a lo reh leh tawh ang a; politic khel fuh, NLUP Pheichham mantute pawhin an pawisa dawn chu TV leh Mobile Phone lei nante an lo hman zawh tawh avangin contract leh therhlo dang dilin Minister chenna bathlar leh Party Office-te bel takin an zawh leh ang a, nula thenkhat urlawk zan lo hmang âm deuhte chuan an thla tin “Period” a khaihlak dawn em tih thaw dep depin an ngaichang ang a, nu leh pa tam takte chu an fate sikul sdmission fee leh uniform buaipuiin an hmanhlel leh dawn a ni. Thenkhat chuan nghakhlel taka an lo thlir Krismas chu anchhelawh tak an nap dawn a ni.
Heti taka kan ngaih ropui, kum tin cheng vaibelchhe tam tak senga awmni khama kan lawm thin Krismas hlimna hian engati nge thla khat em pawh a daih theih loh chu le? A chhan zawnchhuah i han tum teh ang.

1. Thutak aia phurna kan ngaih pawimawh zawk vang: Mizote hian rilru fim taka thil ngaihtuah chet chet kan peih lo hle a. Ngaihtuah peih lo chuan thil tha a ngaihtuah chhuak ngai lo. Ka la hrereng a, 1978-a Berlin khawpuia World Congress on Evangelism an neih dawn khan German Theologian pakhat chu thumal 800 hmanga thu ziak turin an thlang a. Khawmpui neih hma thla 6-ah lehkha an pe a. He Theologian hian, “Hun min pe tawi lutuk,” tiin a theih loh thu a hriattir a. Hmanni lawk khan ka thian pakhat chuan an party khawmpuia ngaihtuah tur Economic, Social and Political Resolution ziaksak turin min rawn ngen a, zan khat chiah hun min pek avangin ka hnial a. German Theologian leh ka thianpa rilru put hmang atang hian Mizote hian zir tur kan nei tih kan hre thei awm e.

Rilru phur theihna hi Pathianin min pek a ni a. Rilru phurna chuan min tihlim thei a, min tilungngai thei bawk a. Mahse, phur lutukna chuan rilru fim min hmantir theih loh avangin mi tam takin an kalsual phah thin a ni. Lal Solomona chuan, “Hriatna nei lova phur viau hi a tha lo,” a lo ti nghe nghe a ni (Thuf. 19:12) . Hei vang hi a ni ang Greek-ho zinga Stoic-ho chuan rilru phurna nei lo turin mi an zirtir thin a. Miin thutak an hriat theih nan phurnain a khawih chet zawh loh rilru nghet an nei tur a ni an ti a ni.

Khawvel finna leh Bible zirtirna tluantling dawng pha lote hi a tlangpuiin chawh phur an awlsam a. Hei hi remchang a lain politic hruaitute leh evangelist te chuan thusawi thiamnain mi an au phur thin a. Thutak aiin thu pawnlang leh thil mak danglam chanchin hi mi mawl zawkte tan a ngaihnawm zawk avangin chhia leh tha hriatna pawh hmang thei lovin an bawh ruak ruak thin a ni. Isua’n chhangper 5 leh Sangha 2-a a hraipuarte chuan chhangper leh sangha thlahlelin Isua chu eng emaw chen an zui ve a. Mahse, Isua’n thutak “Nunna Chhang” thu a han hrilh chuan, “Hei hi thu khirh tak a ni, tunge hrethiam thei ang?” tiin an kal bosan leh mai a ni. (John 6:16).

Romania ram chu hun rei tak Communist sawrkarin a awpbet tlat a, Kristiante chu nasa taka an tihduhdah avangin Pastor-te pawh ngawah te an biru thin a. 1989 Krismas dawn zanah Pastor Laszlo Tokes chu a bihrukna atangin a lo chhuak a, a Kohhranah thu a sawi a. Kohhran member-ten Isua pian thu sawi tura an beisei laiin Lal Heroda’n nausen kum 2 hnuai lam zawng zawng tihhlum vek tur thu a pek changthlanin awpbehna (oppression) leh tharum thawhna (violence) atanga mihring zalentir turin Isua hi khawvelah a lo kal a ni tih uar takin a sawi a. A tuk khua a lo var chuan, “Communist sawrkar a tla a, President Ceasescu pawh man a ni,” tih radio-in a rawn puang mai chuh! Hun rei tak hlau leh thlaphanga lo awm thinte chu hlim em emin kawtthlerah an lâm a. Krismas leh Kumthar pawh hlimtakin an hmang ve ta a ni. Dikna palzut vanga hrehawm taka awpbeha awmte chhanchhuah hi Isua mission, Nazaret Manifesto (Lk 4:18) a ni tih Mizo Kristiante hian engtikah tak hrethiam ve tak ang i maw?
2. Zirtirna aia thuhril kan uar zawk vang: Thuthlung Thar ziaktute hian zirtirna hi an ngai pawimawh hle a. Thuthlung Tharah hian “Zirtir/Zirtirna” tih thu hi vawi 200 chuang kan hmu a ni. Kohhran ding tir pawh kha “Tirhkohte thu zirtir ngaithlaa inpawl khawmin, chhang phel leh tawngtaiin an awmho thin a” (TT 2:42) Jentail zinga chanchin tha a thlen hmasakna ber Suria rama Antiokei khuaah pawh, “Thuhriltu leh zirtirtute an awm” tih Luka chuan a sawi a ni (TT 13:1).

Mizoramah hian thuhril kan uar a, zirtir erawh kan ngaihthah a. Hei vang hian Pathian thuhriltu kan ngah a, Pathian thu zirtirtu erawh chu kan nei tlem a ni. Hman deuh khan Evangelical Fellowship of India hruaituten “Expository Sermon” zirna inkhawm Aizawlah an buatsaih a. Expository Sermon chu Bible bung leh chang, thu mal tete leh sentence leh paragraph te a hauhuk kaia sawifiahna a ni. He inkhawm chhimtu hi an tlem hle a. Mi thiamten an zirtir laiin thenkhat an lo muthlu leh ta nghal a. Pastor pakhatin, “Thutak han zirtir cheu ila, in muthlu zel a, khuang a rik veleh chawngkawr ang maiin in lu intun leh he si a,” tia mihlim lâm thinho a zilhnate pawh hei hian min hriatchhuahtir a ni. ‘

Bible zir peih lo chuan a zirtir peih lo va. Zirtir peih lo chuan Kohhran a chawm puitling thei ngai lo. Thusawi thiam ringawt lawm, Bible zirtirna ngaithla peih si lo Kohhran chu rinnaah an puitling thei lo va, an ding nghet thei bawk hek lo. Hei vang hian tawngtai dam thei nia an sawite an pan hut hut thin a nih hi. Mizorama Kohhranhote hian thilmak aiin thutak zirtirna kan mamawh zawk a, thusawi thiam aiin zirtir thiam kan mamawh zawk. Israel fate kha Pathianin thilmak tam tak a hmuhtir a; mahse, Pathian an ring thei chuang tlat lo. Isua zirtirte pawh khan Isua thilmak tih tam tak an hmu a; mahse, an thilmak hmuh chuan Isua kha Pathian a ni tih a rintir thei chuang hauh lo. Heta tang hian thilmak hian rinna a siam lo va, rinnain thilmak a ti zawk thin tih kan hre thei awm e.
3. Kohhran inpumkhat loh vang: Aizawla kan awm tirh chuan kan awmna veng Tuikhuahtlangah chuan Kohhran pawl sawi lovin a veng huapin Krismas leh Kumthar kan hmang thin a. Krismas kan lawmnaah hian hetih laia Mizoram Chief Minister Brig. T. Sailo te lai lai infiamnaah an tel ve dawrh dawrh thin a, a va hlimawm em! Mahse vawiinah chuan khawhar takin kan hun tha liam tawh chu kan thlir vawng vawng ta a ni. Tunah chuan Presbyterian Kohhran te, Baptist Kohhran te, UPC te, Catholic Kohhran te, 7th Day Adventist te, Salvation Army te chu, “Mahni seh seh mual hranah” tiin Pathian pakhat ringtu ni si Krismas leh Kumthar kan lo hmang darh ta nuai a. Khawtlang titi pawh a rual hlei thei tawh lo a nih hi. Ringtute inpumkhatna hi Kohhran neitu Lal Isua chuan a ngai pawimawh em em a, a tawngtainaah pawh “pumkhat an nih theih nan” ( John 17:11 ff) tih hi vawi 4 zet a sawi a ni. A neitu thu awih lo leh engmaha ngai lo Kohhran hi engtin nge thinlung taka kan hlim theih ang? Chhungkaw pa ber a faten a thu an awih loh avanga a thinrim chuan tu chhungkua nge hlim thei ang? Kohhranhote hian Tisa rilru puin Kohhran neitu theihnghilhin keimahni intihhlim kan tum thin a. “Heng zawng zawng chunga thuneihna leh ropuina hi ka pe ang che, ka hnena pek a ni tawh si a, ka duh apiang hnenah ka pe bawk thin a ni,” (Lk 4:6) tia Pathian fapa meuh thlem ngamtu Diabola chuan tisa hlimnate hi min pe thei em em a. Mahse, chatuan hlimna leh lawmna min pek theih loh avangin Krismas leh Camping hlimna chuan a daih rei thei lo a nih hi.

Kan sawi darh ta deuh nuai a. I han khai khawm dawn teh ang. Thutak aia rilru phurna kan ngaih pawimawh zawk avangte, Pathian thu kan zir peih loh avangtein rinnaah kan puitling thei lova, kan ding nghet thei lo a ni. Chu bakah Kohhran inthendarh nuaina hian Kristaa hlimna leh lawmna tak min neihtir thei lo va. Hei hian Khawtlang inpumkhatna pawh a nghawng chhe mek a ni. Kohhran neitu Lal Isua Krista thu kan awih hma chuan chatuan daih hlimna leh lawmna kan nei thei ngai lovang. Hawh u, kumin Krismas ah tal hi chuan Kohhran pawl hrang hrangte hian lungrual takin “Krista Ruai” dik tak thehho turin hma i la teh ang u.
He thu chhiartu zawng zawng Krismas leh Kumthar chibai ka buk a che u.

Facebooktwittergoogle_plusredditpinterestlinkedinmail

HMASAWNNA & RETHEIHNA

Tunlai khawvel hi ‘Thalaite khawvel’ tiin an sawi thin a, kawng hrang hrangah thalai rualte hawi zawng leh an nun danin kawngro a su thui em em a ni. Mizote phei hi chu pi pute hunlai atang tawha thalaite a innghat hnam kan ni nghe nghe a, a bikin eizawnna leh khawtlang venhimna thilah te phei chuan thalaite hi vauchher ber an ni thin. Mahse, kum za sawmhnih chuang hnam dang awpna hnuaia kan awm chhung hian hun inthlak danglam nasa tak tak kan tawng fo a, chungte chuan kan hnam nun pawh nasa takin a nghawng a ni. Tunlai khawvela kawng hrang hranga hmasawnna thli tleh mek hian kan hnam hi a nuai petek nawk nawk a ni ber a, kan hnam ze mawi tam tak kan hloh a, hnam dang ze duhawm lo pui pui kan la lut teuh a nih hi.

Hmanlai atanga thalaiten khawtlang (chhungkua leh ram pum thlengin) a hum pawimawh tak an luah thin ang kha a ni ta lo. Tuna kan dinhmunah hi chuan thalai tam zawkte hi chhungkaw khai dingtu kan ni tawh lo a, chu ahnehin chhungkaw tana phurrit kan tam tawh khawp mai. Chuvangin, engtinnge thalaite hmang hian kan ram hi kan siam theih ang, tih hi ngaihtuah tak tak a hun ta.

Tunlai chhuante hi ‘lehkhathiam generation’ tia chhal ngam khawpin (zirlaite hian) zirna peng hrang hrang pawh an daidar ve ta viau a. Zirna hmun tha tak tak atang zir chhuak sawi tur an awm ve ta nawk mai. Tun hmaa lehkhathiam tehna atan matric pass chin tih pawh tunlaiah chuan college zo chin tal tiin kan thlak mai tawh em? Hetiang lehkhathiam degree nei sang tak takte hi hman tangkai dan zawn a, thalaite chakna leh finna leh thiamna hmang tangkai zawnga hmalak a hun khawp mai, thalaite thahrui hmanga ram hmasawnna beihpui thlak a tul hle tawh a nih chu.

Lehlamah chuan thalai zingah sualna a pung tih hi zep thu a awm lo a, zu leh ruihhloah tam tak an talbuai a, chhungkua leh khawtlang tana hnawksak an tam hle. Zan lama kawngpui dunga tei raw lai mai mai tawk leh khawlaia tal kual mai mai an tam khawp mai. Pawikhawihna leh dan bawhchhiatna chi hrang hrang a hluar phah leh zel a. Hetianga hnathawk lo thalai an tam zel avang hian hnam thatchia ang hiala min puh tawk an awm phah a nih hi. Mahse, thalaite hian an kawng daltu harsatna hrang hrang kan nei tih erawh ngaihtuah thleng pha ila. Hmanlai hunah kha chuan nasa taka hnathawh ngei ngei a ngai a, chhungkua an intodelh a tul avangin an taima lo thei lo. Hetia khawpui atanga kan duh anga kan thlir liam puat lai hian tun thleng hian thingtlang lamah pawh thalai zingah engmah thawk lo a tei raw lai mai mai an vang khawp.
Tun laiah hi chuan hna-thawh tur tha, eizawnna tling khawpa hlawk a van tak em avang leh thawkrim lem lo hausa tak tak an tam tak avang hian hnathawh hlutna a tlahniam nasa a, thangthar lo chhuak zelte rilruah hna-thawh hlutna a bo phah a ni.
Thalaite tana thawh tur siamsak hi thuneitute mawhphurhna a ni tih pawh kan hre ta lo, khawi ramah pawh hna vang vanga harsatna (Unemployment problem) a awm reng rengin sorkarin mawh a phur thin a, hmalak dan tur an ngaihtuah vat vat thin. Sorkar hna siam teuh hi ram tan a him lo a, eizawnna peng dang siam a, kawng kawhhmuh hi tihtur a ni. Ram danga intir bo zawnga thalai mithiamte fuih hi ram hruaitu tih tur a ni chiah lo ang, he ramah hian thalai, mithiam zawkte hmang tangkai zawnga ruahmanna siam a ngai zawk.
Thalaite hmakhua kan sawi thin hian zirna chungchang hi ngaihtuah tel a ngai khawp mai, kan rama thingtlang leh khawpuia zirna inthlauhzia te hi chhutchian a, a tul anga siamthat a ngai hle a ni. Zirna tha kan neih loh vang a kan hotu lu ber atanga a thei fa apiang chuan ram pawnah tu leh fate an zirtir zel a nih hi. Retheih vang leh dinhmunin a zir loh vanga zir chhunzawm thei lo sawi tur an awm nual a. Zirlai thiam filawr thluak tha tak tak, zirna hmun tha a luhtir chakawm an awm teuh bawk. Hengho tan hian ngaihtuahna zau tak leh changkang tak sen a hun ta khawp mai.

Khawvel hmasawnna zar kan zo a, thil chi hrang hrangin min chim mek lai hian keini thalaite leh rual u zawk (nu leh pa, pi leh pute) inkar a kak zau tial tial thung tih kan ngaihtuah ngai em? He generation gap avang hian chhuan hrang hrang karah inhriatthiam lohna a thleng a, kan hnam pawh hian a tuar thei a ni. Rual u zawkten naupang zawk te an hmuh dan a dik lo a, thalai/naupang zawkten rual u ho an ngainep chuan inpawisak loh tawnna a hring ngei ang.

A tawpna atan chuan thalaite khawvela kan chen tawh avangin ram hmasawnna hna thawhnaah an tel ve zel a tul a, thalai rualte tel lo chuan kan ram hi a dingchhuak ngai dawn lo tih kan chian a pawimawh khawp mai. Sorkar inawpna leh ram rorelna kalphung fel loh vang leh hlemhletna vanga kan tawrhna zozai te, kan ram hmabak te hi ngun taka kan thlir a hun ta khawp mai. Chuta tang chuan kan ram dinchhuahna tura hmalak tak tak a theih dawn a ni. Indopui pahnihna zawh hlim a ram tam tak an lo dinchhuah theihna chhan kha an ram hruaituten thalaite fuih thara, thiam taka hma an lak vang a ni. Indopui vanga chhe tak Japan ram te, independence hmu hlim tualchhung innghirnghona vanga then hran South Korea te, khawchhak ram hrang hrang bakah Latin America ram thenkhatte hi sorkar tha tak an neih vang leh an thalaite thiamna leh an tha an hman thiam vang chauhin ram changkang leh hmasawn chak ber ber ram an lo ni thei a ni. Engtin nge kan tih ve tak ang le?

Facebooktwittergoogle_plusredditpinterestlinkedinmail

Doctor ka zawhna (Dec. 14, 2014)

Zawhna: Ka pu, râwn che ka duh a, hmeichhia kum 16 mi ka ni a, ka kâwng leh tai zawn hi a na thin a, ka nâk thleng te hian a rawn na thin a, kal a ti harsa a, ka kal tha hlei thei lo thin. Ka thi neih chu a buai lova, mahse thi neih hi ka la na ve hrim hrim thung. Ka na sawi erawh hi chu ka thi neih lai lo pawhin a awm tho mai a. Khawngaihin engtia tih tur nge min hrilh thei em? Ka rai te ani thei ang em? Ka chhungte hriat ka hlau viau bawk. – No thup

Chhanna: I la naupang hle mai a, i chhungte hriat i hlau bawk si a, i harsatna hi eng ber pawh chu nise i hrilh hmasak chu a pawimawh hle mai. Rai i hlau anih chuan ka hrethiam viau, mahse chu pawh nise a pui thei tur che chu i chhungte an ni tho tho a ni. Chuvangin tunah hian puih dan kawng kan ngaihtuah rual hian i chhungte tu emaw ber chu hrilh tel tho thei la a that ber ka ring.

I insawiselna hi nâk zâwn nâ a tel vangin i kal emaw zun kawng lam a ni thei a. Khawsik i neih tel leh tel loh i sawi lova, engpawh chu nise, i zun test ngei a ngai dawn a. Chubakah chuan ultrasound hmangin i zun kawng lam fel lo a awm leh awm loh i en ngei a ngai ang. I lo rai palh anih pawhin ultrasound hian a hmu nghal thei dawn a ni. Chubakah chuan zun kawnga lung awm i nei palh thei bawk a (i kum ang rualah erawh an awm tam vak lo), chutiang anih pawhin ultrasound tho hian a hmu thei bawk ang. Ultrasound leh zun test report te hi surgeon i lo entir dawn nia.

Kâwng leh tai nâ hi i zun kawng harsatna anih loh chuan chhul leh chi bawm fel lo vang ani leh thei bawk a. Thi neih la na chi i nih vang hian ultrasound chu ti ngei thei la a tha ber ang. Chi bawm bawk te hi i kum ang rualah hian an nei fo a, a then chu chhul lam fel lo kaihhnawih Endometriosis te pawh a ni thei bawk. Chung te chu hmeichhe doctor enkawl an ngai thin.

Rai chungchang hi uluk taka i ngaihtuah a ngai. Rai i inrinhlelh tel chuan invenna tel lovin sex i hmang tawh tihna ani a. Chu chuan ken tel tam tak a nei a, nau neih te, natna tha lo kai te (STI leh HIV te thlengin) nen. I lo inhmang tawh a, i hmang lo thei lo anih bawk si chuan invenna condom hman a pawimawh hle; a him ber a ni. Naupai hi rilru inbuatsaihna fel tak nei lo chuan tih mai mai chi a ni lo. Nangmah mai a ni lova, i fa kha a kaihhnawih tel vek a ni. CHuvangin sex hman loh theih loh chuan heng te hi ngaihtuah tel ngei tluk a awm lo a ni.

Facebooktwittergoogle_plusredditpinterestlinkedinmail

Ka Huang (Dec. 14, 2014)

Tun Thawhtanni (8-12-2014)-a chhuak Vanglaini-ah khan ka rin loh tak maiin B.LALNEMA h/o Saikhumi, kum 1921-a piang, kum 1991-a chatuan ram pan ta, a fapa B.Lalhmingthanga’n an nupa thla nen meuh an ngaih thu a rawn chhuah a. An veng/khua pawh a rawn telh lo nain, U Lalnema hmel ka han hmuh meuh khan kum 1945 kum tantir lam ka hre vawng vawng mai a. A thlalak ka han en atang chuan ka hriat ve U Lalnema, kum 1945-a Assam Regiment Clerk rawn zawm kha ni ngeiin ka hria. Kum sarih tlawngin ka phak lo na a, ‘U Lalnem’ tiin ka ko thin. Naupang zawk daih mah ni ila, ka in-enroll hmasa a, ka hriat reng nachhan tak chu – Sylhet (tuna Bangladesh) atanga Shillong a rawn panin CC Co. (Commercial Carrying Company Bus)-ah a lo chuang chho a. Chutih laia Shillong panna bus lun ber an ni. An bus station inte pawh chu a ban thing tei mai mai vek a la ni. A chuanna bus a chhuah dawn chuan a ban (ding lam ni tain ka hria) bus pawnah a lo dah chhuak a ni awm a, bus chuan U Lalnema chuanna lam thing van chu a hrut lo chauh a, U Lalnema ban dah chhuah kha a tawt em emin a hrut chilh ta a, a ruh khawih chhe loin a banpuam chu bus bang leh thing ban karah chuan tawt em emin a hrut chilh chhuak thak ringawt mai a ni awm a, Karen line, Happy Valley, Shillong-a Clerk a rawn zawm chuan a ban chu min hmuhtir a, dam thar hlim a nih avangin a ban chu a rang ruai mai. U tak tak ang maia ka en a nih avangin a kan awmho chhung zawngte chuan ka nel teh thin a nia, a zaidam em em mai a ni. Kha U Lalnema ka tih kha B.Lalhmingthangan Vanglaini-a a rawn chhuah kha ni ngeiin ka hria a, ka lung a tilengin kan Adjutant, Capt. D.S.Elwell-a hlaua kan tlanchhiat thin laite kha a thar uar uar mai a ni.

Thu dang dang sawi ka tum. Presbyterian Kohhran Nilai zan thupuia NUNTLANG tih kha (12-11-2014 zana zir) TLANG tih thluk dan kha a thluk fuh loin ‘ka ban tlang’ tiha tlang (through) anga ngai an lo awm nual emaw ni, Champhai khawi maw lai atangte pawhin min rawn zawt hial a. Ni e, kan tawng hi THLUK-in a hril em avang hian ngaih sual theih apui a tam reng a ni. Heta TLANG tih hi chu FIAN thluk anga lam tur a ni. Nuntlang – nun tha, dam (fair minded) tihna a ni ber ang chu.

Kum 1985 atang khan kan kohhranin thuhriltuah min ruat ve a, tling lo chung chungin ka awm ve ta tauh tauh a, kumin 2014 hi kum 30 a pumhlumna a lo ni ve ta reng mai, Pathian zar takmeuh a ni. 2015 atang chuan ka chawl ve dawn ta ni awm tak a ni. Ni e, Pathian leh kohhran zarah kum 30 lai ka awm ve thei hi KA LAWM TAK MEUH A a ni. Tichuan, thuhriltu list-a ka awm chhunga ka thuhril hnuhnung ber chu Chawlhni hmasa (7-12-2014) khan chhunah ka hril a (he ni hian kum 85 leh thla 9-a upa ka ni) Kan kohhranin thuhriltute chu kumin chhungin tum khat tal RINAWMNA tih hi thupuia hmang turin min ngen a, a hmain ka sawi tawh naa, ka vei zawng tak a nih avangin RINAWMNA bawk chu thupuiah ka hmang leh a, Mizote hian kan mamawh ema ka hriat avangin. Ka thuhril tlangpui chu a hnuaia ka ziak ang lam hi a ni. RINAWMNA tih hi Mizote hian kan mamawh em ema ka inhriat avangin KA HUANG-ah ka rawn ziak ve ngawt mai a ni. Ka thlir ve dan atang chuan Mizo Khristiante hian a tlangpui thuah kan Pathian hi kan HNAIH LO niin ka hria. Israelho kha chu Pathian chungah an rinawm a, an rinawm loh pawhin Pathian chunga rinawm lo niin an inhre tlat thin. Mihring chung kha chu a VE chauh niin an hria. Fapa tlanbo (Luka 15) khan, “Ka pa, Vana mi chungah leh nangma mithmuhin thil ka tisual e,” a ti. Vana mi kha a pakhatnaah a dah a, a pa chu a ve chauhah a dah a ni. II Samuela bung 12-ah khan Davida’n Bathsebi a uire a, a pasal Uria ral kuta a thahtira Zawlnei Nathanan a zilh khan Davida chuan, “Lalpa chungah thil ka tisual ta a ni,” a ti. Sam 51:4-ah phei chuan, “I chungah, i chung chauhah thil ka tisuala,” a ti tawp mai. Uria chhungte hnenah ngaihdam dil tur ni awm tak, Pathian chunga tisual an nih an hre zel. Mizote hi chuan Uria chhungte chungah ngaihdam kan dil chauhin a rinawm. Fapa tlanbo leh Davida te hi chuan Pathian chunga thil tisual niin an inhria a ni. Pathian an hnaih bik niin an lang.

Genesis bung 39-a Josepha chanchin phei hi chu – a rinawmna a lantirna hi PATHIAN HNENAH a ni, Pathian nen an inhnaih tak meuh niin a lang. NGE Josepha hian Pathian a hnaih tak meuh? Pharoa officer, Potifara nupui, han ngaihtuah mai pawha milian nupui, awl em em, mipa duh ngawih ngawihin muangleiah a han thlem a nia, keiniho hi chu ni ila a thlem hmasatuah kan tan loh pawhin kan it thlawn hle ta ve ang! Khata Josepha mutpuia a han thlem khan eng danga chhang loin, “Ngai teh, ka pu chuan he inah hian ka hnenah eng nge awm a hre si lo a, a neih zawng zawng ka kutah a dah vek a; he inah hian ka aia lian zawk tumah an awm lo a; a nupui i nih avangin nangmah chauh lo chu ka lakah engmah ui a nei hek lo; chutichuan engtin nge he sual lian tak hi tiin Pathian chunga thil ka tihsual theih ang?” a ti khalh mai a nih hi. Keini chuan hnial tehreng pawh ni ila, “Engtin nge ka pu Potiphara chungah thil ka tihsual ngam ang?” kan tih ka ring, kan hnial phal a nih pawhin.

Ka inhmuh danin keini Mizo Khristiante hi chu – ka han sawi tak, Fapa tlanbo, Davida leh Josepha dinhmuna ding ni ta hlawm ila – fapa tlanbo pa, Uria chhungte, Potiphara te kha kan thinlungin Pathian aiin a hmu pawimawh zawkin ka ring a ni. A chhan chu:

(1) Khristian inti si heti em ema corruption kan ngam hi. Dik tak chuan Tuirial Hydel Project heti taka a khawtlai chhan pawh hi compensation UCHUAK vang a nih kha.
(2) Heti tak maia compensation hui theihna remchang kan zawn kan dap dan te.
(3) Sawkar buhfai heti tak maia a pelhe hi.
(4) Gas cylinder kan chin pawr dante hi.
(5) Buk tling loa thil zawrh kan hreh loh dante hi.
Chhiartu duh tak, ngaihtuah belh teh mah – Khristian inte ve si Pathian chunga thil tisualah kan inngai phak lo a ni lo maw? Pathian chunga thil tisual/tisual turah kan inngai ngai lo a, chuvangin hetiang sual hi a tam niin a lang. PATHIAN I HNAIH BER PHAWT MAI TEH ANG U.

Facebooktwittergoogle_plusredditpinterestlinkedinmail

THI HUL INHNIALNA

A fiamtu leh a ngaithlatu dang tana hlimawm viau hi a tuartu tan a hlimawm loh fo tih hi ka hre thin naa ka tisual leh thin! Ka insum hleithei ta thin lo pek a, ka dai baw ta fo mai.
—————-
Kum 40 kan han pelh nupa tak hnu khan kan inti upa fiamthu ve nasa thin a. Miin, “KTP i over tawh maw?? In nu pawh kum 40 tling tawh maw? In la naupan hmel si..In nu pawh a la nalh zaih hi..” tia kan lawm tawka min han chhaihte khan kei lah pek chuan, “Kan tar tawh, kan nu pawh a thi a hul tep tawh,” te kha ka’n tifiam ta thin a! Awih lo zet hian an nui nasa thin a.
Mi tihnuih nana nupuite fiamthu thawh nana han hman kha nuam ka ti riau pek a! Nakina kan nupa kan la inhauhna tur a nih lam reng ka rilruah a lang pha ngai lo. Ka nupui pawh kha a nui ve mai thin a, mahse a lo lawm hauh lo mai a!
A hnu deuh lawkah chuan thla thum zet thi a nei ta lo pek a! Thi hul tur em chuan a la naupang si a. Kei lah pek chuan, “I thi a hul dawn tawh a nih chu,” ka’n tihliamsak leh puat a! A vawrtawp a thleng ta le! Kan inhau chu a ni ta reng mai a! “Nangmah vang a ni, thi hul pawh la hun lovah min tawngchhiat a niang. I tawng puat puat a, fiamthute hi tawk chin a awm a,” a ti ta a. Kei lah chuan, “Thi hul leh hul lohah tawngkam mai maiin engmah a control phak lo ang, in tawngchhiat chi pawh a ni lo vang,” ka ti ve thung. “I tawng pawlawh thei lutuk reng reng,” min la ti hram a.
Kei lah chuan, “Chutia tawngkam mai maiin thi neih a control phakte chuan kan sawi ‘nei’ leh ang che anga a ni mai alawm..Ka nupui hi zawng a la naupang a nia, than thi a nei dawn tan chauh alawm,” ka’n ti leh ta vel a! A lawm phah tawh chuang hauh lo! Mahse a hnu lawk chuan tha takin thi chu a nei ve leh ta mai a. Ka sawi ‘neih’ leh tak a nih tak tak erawh chu ka ring chuang lem lo a.
Thi neih mai maiah intawngchhiat a awm tak tak leh tak tak loh lam chu ka hre hauh lo a. Mahse fiamthu te, tawngte hi chu uluk a lo ngai viau mai tih erawh ka hriat phah. Kan nupuite pawh kan lo fiam rilru hah der alawm. Ka fiam sual a ni.
Mizote hi fiamthua insawisak ching kan ni a, a sawisatu tan leh mi dang tan a hlimawm viau thei a, mahse a tuartu tan erawh mi dangin an nuihpui tluk vela hlimpui ve chu a har viau dawn a ni.
Tawng hi fimkhur a ngai e. Mizo upa rengin tawngkam an lo uluk a, fimkhur pawh an lo fimkhur thin e. Thil tha lo eng emaw han sawi deuh ngai a awm pawhin, “Tawng khaw lo ni suh se la,” emaw, “Kan tawng sulin zui lo se la,” tih te, “Miin an beng lo chhu ngawng sela,” emaw te an ti hram hram thin reng a ni.
Zir tur hi ka va ngah em! Thi hul inhnialna episode hnu pawh hian ka tisual leh teuh tawh! Ka dai baw leh nuaih thin a nih hi maw!

Facebooktwittergoogle_plusredditpinterestlinkedinmail

Login

Lost your password?