Monthly Archives: January 2015

MLPC ACT HMAN HNUAH; Case 84 ziah LUH NI tawh

Aizawl; Zu khuahkhirh na dan thar ‘The Mizoram Liquor Prohibition & Control Act, 2014’ hnuaiah thubuai 84 ziahluh a ni tawh a, heng zinga 71 hi Excise & Narcotics Department te ziahluh niin a dang 13 hi Police te case a ni.

Zalen thudawn danin Liquor vending retail shop diltu hi 5 an awm tawh a, heng zingah hian Mizoram sawrkar hnuaia Corporation 3- ZIDCO, MIFCO, MAMCO te bakah private 2 te an ni a. Bonded Ware House diltu pawh mi engemaw zat an awm a, dilna hi January 30,2015 thleng hawn niin hemi hnu hian dawr hawngtu tur hi thlan an ni ang a. March ni 2, 2015 (Thawhtanni) atangin permit neite hnenah zawrh tan tum a ni.

January ni 15,2015 atanga zu khuahkhirhna dan thar MLPC Act hman anih hnuah zu rui man te chu jail tan tir, chawi tir leh vantlang hmun tifai turin court chuan a hrem thin a. Court chuan Aizawl Civil Hospital, District Court, New Market leh Excise Office-te an tihfai tir thin a, vantlang hmun tifai tura hrem te hi Excise leh Police ten an vil zui a ngaih thin avangin a hma aiin an indaihlo hle nia thudawn a ni.
Mizoram Excise & Narcotics Department chuan zu in leh in lo enna ‘Breath Analyser’ 100 an lei tawh a, zu in nia rinhlelh te chu an thisen a zu awm zat (blood alcohol content) khawlhi ham tir thin an ni a, 30mg/100ml chin chung lam te chu dan anga hrem thin an ni.
MLPC Act hmanga hrem hmasak ber chu Lalremliana (26), Lunglei Venghlun a ni.

1. Breath Analyser hamna dawt chi 2, Filter leh Blow Straw a awm a ni.

2. Filter hi a khawl-ah a in vuah a, Filter hi thlak thin a ni.

3. Kum 2014 chhung khan Excise chuan MLTP Act hmang in mi 1,892 an man.

Thubuai 2,400 siam a ni.
30mg/100ml RAMRI
District hrang hranga Excise & Narcotics Department ten MLPC Act hnuaia case an ziahluh dan chuan Aizawl -31, Lunglei -6, Champhai -6, Kolasib -16, Serchhip -4 leh Mamit -8 te an ni a. Aizawl khawpuia Police Station ah Bawngkawn in 1, Aizawl 5, Vaivakawn 7 te an ni.

Facebooktwittergoogle_plusredditpinterestlinkedinmail

BENG ENKAWL DAN ZIRNA NEI

Aizawl; Zirtawpni khan bengngawng tih tlem leh inven dan chungchang zirhona Directorate of Health Services Conference Hall, Dintharah neih a ni. National Programme for Prevention and Control of Deafness hi kum 2007 atang khan India ram hmun thenkhatah chuan hman tan a lo ni tawh a, Mizoramah pawh nikum August, 2014 atang khan bul tan a ni a, district 3- Aizawl East, Aizawl West leh Lunglei District-ah te hman tan a ni.

India ramah hian bengngawng an la tam hle a, mi 100 zela 6.3% hi bengchhet/bengngawng niin mithiam ten an chhut a. He Programme in a tum te chu beng natna hrang hrang a hma thei ang bera hmuh chhuah a, enkawl dam a ni. Training ah hian beng lam Specialist Dr. Thanchungnunga, Dr. R. Lalnuntluanga leh Lalrinfeli, Audilogist and Speech Pathologist ten zirtirna an pe a ni.

Facebooktwittergoogle_plusredditpinterestlinkedinmail

ESTIMATE COMTT: Darzokai lei chimah contractor & PWD mawh

Aizawl; Tuipui ‘D’ khawbula Darzokai lei chim chhan chu lei dawhtu Contractor fimkhur loh leh inthlahdah vang bakah hnathawk viltu PWD in an vil uluk tawklo vang nia an hriat thu a hmun tlawhtu MLA rualte chuan an sawi.

January ni 13,2015 khan Darzokai lei chim hi Committee on Estimates chuan an chairman Lalrinliana Sailo, MLA hovin an tlawh a, lei siam zawh tep tawh nia sawi a chim chhan hi a hmunah an enfiah a ni. Committee on Estimates chuan an thil hmuh dan report an siamah lei chim chhan ber chu contractor fimkhur loh leh inthlahdah (carelessness and negligence) a ni tiin Public Works Department pawh hnathawh endik/vil uluk tawklo (lack of proper supervision) ah a puh bawk. MLA rual te report chuan hnathawh mek chu a muang in a zuai (slow and dwindle) nia sawiin hna pawh a tha tawklo an ti a. Lei dawhnana hman thing zai chu 2.1/2 inchis a chhah tur anih laiin a tlinglo an ti.

85% zo hman
Darzokai lei dawh hna hi M/s Guha Niyogi and Associates, Kolkata te chuan an thawk a. December ni 13,2014 chhun dar 12:45 vel khan chim thutin leia hnathawk mi 10 chu a chim hnan a, mi 1 a boral. Metre 200 a sei Lei dawh hna hi 85% vel zo tawha ngaih a niin contractor hian April 2015 ah zawh hman a tum a ni.

Facebooktwittergoogle_plusredditpinterestlinkedinmail

AMWF in AMC Chairmanah hmeichhia duh

Aizawl; All Mizoram Women Federation chuan Aizawl Municipal Council chairman ah hmeichhia dah turin party hrang hrang te an ngen.
Nimin khan Aizawl Press Club ah chanchinbumite kawmin AMWF hruaitute chuan AMC term leh ah chuan eng party pawhin sawrkarna chang se chairman ah hmeichhia dah ngei se an duh tih an sawi a. Assembly in a pass tawh ‘The Mizo Marriage, Divorce and Inheritence Property Bill, 2014’ chu hman theiha peih vat an duh tih leh Core Committee-PMSA ten 2008 a hmeichhe hamthatna tur leh ram rorelnaa tam zawk an tel theihna tura sawrkara an thehluh point hlawm 10 zinga la tih hlawhltinloh 7 pawh tih hlawhtlin thuai nise an ti bawk.

AMWF chuan sawrkarin hmeichhiate tan VC inthlanah seat a hauhsak vang leh Local Council ah pawh seat hauhsak tura hma a lak mek vangin lawmthu an sawi bawk.

Facebooktwittergoogle_plusredditpinterestlinkedinmail

Thla tin buhfai mt 132210 mamawh

Aizawl; Tun dinhmuna Mizoram in thlatin buhfai a mamawh zat chu metric ton 1,32,210 a ni a, heng zinga metric ton 52,210 hi Food Corporation of India atanga a lei a ni a, a dang metric ton 80,000 hi hmundang atangin lei a ni. Kum 2011 chhiarpui aia Ration Card tam ta lutuk chungchangah FCS&CA Department thawktute chuan ‘Chhiarpui hi kum 2009 vela data lakkhawm,kum 2011 a tihchhuah chauh anih avang te leh kum 2015 anih tawh avanga mihring tam tak an pun chhoh tawh avangin ration card hi a pung lo thei lo’ niin Zalen palai an hrilh.

Hriattheih chinah Mizoram ah hian ration pangngai la APL (above poverty line) chhungkua nuai 11 vel leh BPL chhungkua 42,000, AAY chhungkua 26,000 an awm a. BPL leh AAY te hian thla tin buhfai kg 35 an dawng a, BPL hian kg ah Rs.6.15, AAY in kg ah Rs. 3, APL in kg ah Rs. 15 in an la a ni. Mizoram sawrkar chuan FCI atangin APL buhfai hi thlatin metric ton 28,410 chu quintal ah Rs.830, BPL metric ton 14,700 chu quintal ah Rs.565 leh AAY metric ton 9,100 chu quintal ah Rs.300 hisapin a lei thin a. A indaihlohna metric ton 80,000 hi tualchhung atangin a lei thin a, Rem Rem enterprise atangin thlatin metric ton 61,400 chu quintal ah Rs.2575 leh Lawngtlai leh Saiha district tan FCI atangin thla tin metric ton 18,600 chu quintal ah Rs. 2981 in a leisak thin a ni.

 

Facebooktwittergoogle_plusredditpinterestlinkedinmail

Silai kawl zat software hmangin chhinchhiah tan

Aizawl; Mizoram ah phalna neia silai kawl zat tichiang turin National Data Base of Arms License(NDAL) software hmanga chhinchhiah hna kalpui mek a ni.

Aizawl DC office atanga thudawn danin, Mizoram a silai License nei hi a zat chiah hriat chian theih ani lova, thenkhat chu phalna nei, silai leina hmu leh mai silo, phalna renew leh thin an awm rualin, district thar pian belh hnuah a hrang theuha chhinchhiah anih zui tak avang leh awmna hmun a zira Lisence phalna district hrang hrangah transfer a awm bawk avangin hei hi tichiang turin Ministry of Home Affairs(MHA) chuan NDAL hmangin thun luta tichiang vek turin state tin a hriattir a, hemi hmanga chhinchhiah tur hian kumin October thla thleng hun pek an ni a, NDAL hmang hian MHA bakah Mizoram sawrkar chuan ram chhung leh state chhunga silai phalna kawl zat an finfiahin an vil reng thei dawn a ni.

Facebooktwittergoogle_plusredditpinterestlinkedinmail

2014 ah mahni intihlum 93

Aizawl; New Life Charity Society (NELICS) chhinchhiah danin nikum 2014 chhung khan Mizoram ah mahni intihlum 93 an awm a, heng zinga 69 hi mipa niin hmeichhia 24 an awm bawk.

NELICS chhinchhiah danin nikum chhunga mahni intihlum zingah hian a tam ber chu thalai an ni a, kum 15-45 inkar 67, kum 45 chunglam 19 leh kum 15 hnuailam 7 te an ni a. Heng zinga 43 chu tlangval, 22 chu pa, 13 nu, nula 8 leh nuapang 7 te an ni. Intihhlum chhan zingah hian rilru lam harsatna nei an tam ber a, a chhan dang zingah nupa inkar harsatna, nulat tlangval thil, chhungkaw boruak tha lo, ruihtheih thil leh retheih luat vang te an ni. Nikum chhunga intihlum zinga a upa ber hi kum 63 a ni a, a naupang ber chu kum 9 a ni thung.

Zalen in thalaite zinga mahni intihlum an pun chhan zawhna chhangin NELICS General Secretary Dr. Zawmsanga Sailo chuan, “A nuam leh awlsam lam kan inkawhhmuh tam a, harsatna hmachhawn dan leh chhel tura inzirtirna lam kan ngaihthah a. Harsatna a lo thlenin kan buai hma ta thin niin ka hria,” a ti. Dr. Zawmsanga chuan mahni intihhlum leh rilru lam harsatnate chu vantlang taka hmalakna chi nia a hriatloh thu leh mithiam hnena hruai vat chu thil tha ber nia a hriat thu a sawi bawk.

NELICS chhin chhiah danin 2005 -2014 inkar chhung khan Mizoram ah mahni intihlum 728 an awm tawh a, heng zinga 593 chu mipa niin 135 chu hmeichhia an ni.

Facebooktwittergoogle_plusredditpinterestlinkedinmail

HNA HMUH DAN KAWHHMUH; Thalai te tan Staff Selection Board

Aizawl; Nimin khan Staff Selection Commission (SSC) leh DP&AR tangkawp buatsaihin Vanapa Hall ah University, College leh Higher Secondary School naupang te tan Central sawrkar hnuaia Staff Selection Commission kaltlanga hna hrang hrang kum tina exam theih te inzirtirna hun ‘Awareness Campaign on Job Opportunities’ an nei.

Awareness Campaign ah hian Debolina Thakur chuan powerpoint presentation hmangin SSC kaltlanga hna hmuh theih hrang hrang te a tarlang a, heng hna dil thei tura thiamna ngai te, exam tura inbuatsaih dan tur zirlai te a zirtir a, zawhna leh chhanna hun hman zui nghal a ni a, zirlai kal ten an hlawkpui hle niin thu kan dawng.

Awareness Campaign hi Prime Minister’s Office thupek bawhzuia buatsaih niin SSC hnuaia hna lakna hrang hrangah hmarchhak state atanga tling an tlem thin avanga tih a ni a, thalai tam zawk ten exam tur hrang hrang te an lo hriata mi tam zawk an tlin theih nana ruahman a ni.Nimin prog. hi SSC Chairman A.Bhattacharya bakah central mi pawimawh dang ten an hmanpui bawk a ni.

Facebooktwittergoogle_plusredditpinterestlinkedinmail

Voters Day hmang

Aizawl; Nimin khan Mizoram hmun hrang hrangah National Voters Day hman a ni a, Aizawl ah chuan chawhnu dar 2 khan Vanapa hall ah hman a ni.

National Voters Day hmanna a khuallian Chief Electoral Officer Manisha Saxena, IAS chuan, “Election Commission chuan ram mipui, kum 18 tling chin te Roll a thun leh vote an thlak ngei theihnan nasa takin tan a la a, vote nei thei chin ten vote kan thlak ngei hi kan tih tur leh mawhphurhna a ni,” a ti. CEO chuan Special Summary Revision of Electoral Rolls neih zawh takah kum tling thar 15,930 thun thar niin 6,142 siamthat a nih thu a sawi bawk. Mizoram Peoples Front President Rev. Lalrinmawia pawhin inthlanna thianghlim leh fel a awm theihnan te, mi zawng zawngin vote an thlak theihnan te hma an la thin tih sawiin, “ramin hma a sawn theih nan leh rorelna tha a awm theih nan vote nei ten vote kan thlak vek hi kan mawhphurhna a ni,” a ti bawk.

National Voters Day hmanna inkhawm ah hian Aizawl district chhunga Booth Level Officer hna thawk tha mi 3- Rosangtuali, R.Zonunmawia leh C.Lalremruata te hnenah lawmpuina certificate leh Rs. 3000 hlan an ni a. Hei bakah hian 2014 MP inthlanpuia vote tlak thatna ber district Serchhip, Assembly bial vote tlak thatna ber Hrangturzo, Roll a inthunlut tam ber bial Palak hnenah leh EPIC nei thar mi 10 hnenah te khuallian hian thilpek a hlan a ni.

A bul thut
Kum 1950 January ni 25 khan Election Commission of India hi din niin an dincham hi kum 2011 atang khan National Voters Day ah puangin kumtin hman thin a ni a. Mizoram ah chuan Pathianni anih avangin nimin khan hman a ni ta a ni. Kumin NVD thupui atan hian ‘Easy Registration, Easy Correction’ tih hman a ni.

Facebooktwittergoogle_plusredditpinterestlinkedinmail

Thukhawm dawn

January ni 28, Nilaini chawhma dar 11 hian Subject Committee II chu Assembly Committee Room ah an chairman T.Sangkunga hovin an thukhawm dawn.

Facebooktwittergoogle_plusredditpinterestlinkedinmail

Login

Lost your password?