Monthly Archives: January 2015

HERO CORP IN THLANG

Hero Motocorp Ltd. chuan India rama Market Quality Survey for Karizma R & ZMR nei tur dealer 4 an thlan zingah Khaia & Sons an tel. Hero company aiawhte hian tunhnai khan Aizawl hi tlawhin customer te nen an inkawm a, an harsatna te ngaithla in rawtna leh thurawn te an ngaithla a ni.

Facebooktwittergoogle_plusredditpinterestlinkedinmail

ATS in meizu man

Nimin zing khan Lawngtlai District Anti-Tobacco Squad chuan vantlang hmuna meizu an vai a, dan phallohna hmuna meizial zu mi 32 an man. COTPA hmangin pawisa chawi tir an ni

Facebooktwittergoogle_plusredditpinterestlinkedinmail

Tuirihiau tlawh

Zirtawpni khan Social Welfare Minister PC Lalthanliana chuan Buangpui khaw bula tuikhawthla hmuhnawm leh zin veivak ten an tlawh nasat tak ‘Tuirihiau’ a tlawh a, khawtlang hruaitute nen nalh zawka chei dan tur an enho. Tuirihiau hi hun reilote ah chei tum anih thu Minister hian a sawi.

Facebooktwittergoogle_plusredditpinterestlinkedinmail

Symposium

College of Veterinery Sciences & AH, Selesih chuan January ni 28-30,2015 inkar chhung hian an College ah ranvulh leh enkawl chung chang huamzau taka inrawnkhawmna National Symposium an buatsaih dawn a,he hunah hian mithiam hrang hrang ten thu an sawi ang.

Facebooktwittergoogle_plusredditpinterestlinkedinmail

Tlangzarh ang

Economics & Statistics Department in ‘Statistical Handbook of Mizoram 2014’ an siamthar chu naktip Thawhlehni chawhma dar 10:30 hian Planning Minister Pu Lalsawta chuan a office ah a tlangzarh ang.

Facebooktwittergoogle_plusredditpinterestlinkedinmail

Republic day

Naktuk Thawhtanni, January ni 26 hi India in mahnia ro a inrel champha’Republic Day’ vawi 66 na a ni a, India ram hmun hrang hrangah ropui taka hman a ni ang. Aizawl ah chuan Lammual ah he ni lawmna hun hi hman a ni dawn a, Larsap Dr. Aziz Qureshi chu khuallian a ni ang. Larsap hian National/ State Award lawmman dawngtute hnenah a hlan ang a, chhun dar 11 ah sawmbikte pualin Raj Bhavan ah thingpui a buatsaih bawk ang.

Facebooktwittergoogle_plusredditpinterestlinkedinmail

Ram hmasawnna – II

Ram hmasawnna awmzia hi mithiamten kawng hrang hrangin an hrilhfiah thin a, zirna huanga hrilhfiahna tam berin a kawh chu hmasawnna lo thleng thut a tawp leh daih tur ni lo, daih rei tak, mihring nunphung (living standard) chawisanna te, awp behna hrang hrang laka zalenna te, mipui rilrua mahni induh tawkna neihtir te hi a ni a. Kawng hrang hranga mihring hmasawnna te, hmasawnna kipui/ruhrel (Infrastructure) din te, retheihna um bo te, hriselna lama hmasawn te, mipui himna te hi a tum ber a ni. Sawi tawh angin, mi tlemte hmasawnna hi ram hmasawnna a tling lo a, thiltithei zualte hlawkpui tur chauha hmalakna hi ram hmasawnna tichhetu a ni zawk.

Hmasawnna tehfung chi hrang hrang mi thiamten an sawi zingah Human Development Index hi a dik bera ngaih a ni a, chu chu mihring nunphung leh dinhmun tehna a ni a, chumi atana tehfung pawimawh chu ziak leh chhiar thiam zat (literacy rate) leh mihring dam chin chawhrual (Life expectancy) te hi a ni. Heng tehna pahnihte hian ram chhung mipui dinhmun a hril a, an nunphung changkan dan te, eizawnna leh sum lak luh dan te leh khawsak phung hrim hrim pawh a tarlang a ni, an ti.

India ram hmasawnna tura ruahmanna siamtu leh bawhzuitu Planning Commission chuan kum 30 kal ta chhunga India hmasawn dan a zir chiang a, kum 2000 hnu lama chhuanawm khawpa a than nasat viau lai hian hmasawnna hi hi a kairual tawk lo hle a, a zarzo pha lo tam tak an awm avangin Plan sawmpakhatna (Eleventh Five Year Plan 20) ah khan thupui atan Huapzo hmasawnna (Inclusive growth policy) an hmang ta a. Keini pawh hi han inngaihtuah ta ila, ram hmasawnna kan sawi thin hian thlawh khum a nei nual tih hai rual a ni lo, hmalakna lian pui puiah hian rethei dinhmun phet laklawhte hnen thleng pha lo hmuh tur a tam hle a nih hi. Hlemhletna chi hrang hrang vangin thingtlang miten an chanvo tur an chang lo a, sorkarin buaipui viau mahse miretheiten lei rem an rap hlei thei lo a, loneitute an ding chhuak thei lo a nih hi. Huapzo hmasawnna hi hmasawnna dik chu a ni.

Sorkar hmalaknate hi a hlawkpuitu leh a tuartu an awm thin a. Hmun thenkhatah chuan hmasawnna hmingpu hmalakna avangin miretheiten an in leh lo, an eizawnna bulpui an chan fo a, mi tam tak an vakvai thin. Chutiang chu ‘Development induced displacement’ an ti a, India hmarchhakah mai pawh hian tuikhuah lian pui pui (Mega dams) vanga an chenna hmun atanga um chhuah sawi tur leh hmuh tur a tam hle. Hetiang lakah hian keini pawh hi kan him reng bik lo maithei a, ngaihtuahna sen ve pawh a hun ta khawp mai.

Chumai a ni lo a, hmasawnna hnathawh hrang hrang vanga environment-in a tawrh dan pawh hi ram dangah chuan an buaipui fe tawh bawk. Kum zabi tharah hian leilunga chhiatna chi hrang hrang lo thleng avang leh khawvel lum zelin harsatna a thlen avanga vakvaite (Environmental refugees/migrants) hi an pung zel dawnin an sawi lehnghal. Keini tana chutiang ang thlen theihna hnaivai ber chu kan thenawm Bangladesh hi a ni. Khawvel lum zel avanga tlang sang vur tui zel avangin tuifinriat tui chim hi a sang zel dawn niin an sawi a. Tun atanga kum 50 ah chuan tuifinriat chim chin hi metre 1 vela a san belh an ring a, chuti a nih chuan Bangladesh ram pumpui hmun thuma thena hmun khat hi tuiin a chim pil anga, mihring maktaduai 20 atanga 30 inkar vel hian in leh lo an chan dawn, an ti. Chutih hunah chuan vakvai (climate change refugees/environmental refugee) chutiang zat chu chenna tur zawngin an kiang hnai (India hmarchhakah) hi an rawn pan khawm maithei a ni.

Ram hmasawnna kan buaipui viau laia ngaihtuah tel tur pawimawh em em mai chu hnam himna hi a ni. Tunlai hunah mi tam takin hnam bing rilru put a hun tawh lo tiin an sawi thin a, ‘Nationalism’ tuipuitute pawh an hmu thing tan mek bawk. Mahse, mahni hnam vei tul tih loh hi a him lo hle zawk a, hmasawnna atana hmalakna reng rengah hnam himna ngaihtuah tel reng tur a ni zawk. Sorkar laipui leh hmun dang atanga tawktarh itawm tak tak hmanga min rawn vehthlem emaw hmasawnna hmingpu thil chi hrang hrang min barh luih an tum emaw a nih chuan kan hnam tan leh mipui nawlpui tan a him leh him loh ngaihtuah chian phawt nise a tha ngawt ang.

A hma lama kan lo tarlan tawh ang khan tualto hnamte (Ram neitu dik tak ni si, sorkar lian awpna hnuaia hnam tenau zawk anga awm, ‘indigenous people’ ang chi) hi ‘fourth world’ ti a sawi an ni a. United Nations pawhin ‘indigenous people’ te hi venhim ngai an nih hriain a buaipui hle thin a. Keini pawh hi tunhma zawnga la inawmpawlh ngai lo leh hnam hrang hlakte nen ram khatah kan awm khawm a, hnam lian zawkte karcheh a awm, sorkar lian tak awpna hnuaia thuneihna sang tak nei lem lo kan nih avangin hnam derthawng tak kan ni mek tih hi hre reng ila. Chutihlaiin, kan zinga mi thenkhat chuan hmasawnna hmingpu thil chi hrang hrang an tuipui vang leh chumi behbawm sum leh pai leh therhlo ringawt an ngaihtuah avangin ILP/ILR hlih hial te an sawi mawi tan tawh a, inhawn zau huau a hnam dangte nena inchiahpiah ve tak tak tawh an chak thu pawh an sawi thin. Chutiang aia hnam himna ngaipawimawh zawkte chu hlauh ngah leh ‘Thliarkar rilru pu’ ah an chhuah fo thin bawk.

Anih loh leh ram hmasawnna thlen theitu apiang mai hi lawm takin dawngsawng zel ta ila, kan ram leilung hausakna te hi phur em emin hai chhuahtir chur chur ta ila, hnam dang sumdawngte leh hnathawktute lo lut ruih ruih ta mai se he hnam hian a daih rei ngut ang em? Kan zinga mi tlemte hian an hlawkpui anga, a rah tel tawkte chu an nuamsa viau ngei ang. Mahse, mipui nawlpui hi chuan hlawkpui a hnekin kan tuar mai long maw? Kan chhehvela mite dinhmun atang mai pawh hian inchimral hlauhawm zia te, hnam dang nena inchiahpiah a la him loh zia te hi hai rual a ni lo ang. Bangladeshi (vai) pem lut tam vangin Assamese te, Tripuri te, Cachari te, Bodo hote leh a dangte hi anmahni rama chimral leh nekchep an hlawh tawh a nih hi.

Chutihlaiin, hmasawnna hrim hrim dodal erawh a dik lo ang. Nungchate tichereu zawnga hmalakna a nih loh a, hnam tana pawi thei tur a nih loh a, mirethei zawkte thleng phak tura hmalakna a nih chuan bawh huam huam zawk tur a ni ang. Chutianga hmasawnna him leh tlo chu kan mamawh tak zet a, thuneitute pawhin an buaipui ber tur pawh a ni ang. Mipui pawh hian chak zawka hmasawnna thlentir turin ram hruaitute lakah beiseina kan nei thin a nih hi. Chumi hre reng chuan ram leilung hausakna haichhuahnaah te, hmasawnna kipui leh a ruhrel dinnaah te, loneitute dinhmun siamthatna kawngah te, eizawnna thar siam tura hmalaknaah te hian ruahmanna (development policy) tha tak siam a tul hle a ni. Ram hmasawnna thlenna atan hian mipui aiin ruahmanna siamtu (policy maker) te hi an pawimawh zawk nghe nghe.

Facebooktwittergoogle_plusredditpinterestlinkedinmail

Doctor Ka Zawhna (Jan 25, 2014

Zawhna 1: Nau neih hnua period zui loh (awl vang vang) lai hian a rai theih tho niin ka lo hria a, enge a chhan le? Indanna e.g. Copper T or a ei chi hmang kher lova inven dan a awm em?

Chhanna: Nu in nau an neih hnu hian thi an neih leh hun a in ang vek lova, a thenin an nei har a, a then chuan rei lovah an nei leh thei bawk. Chutih rual chuan naute hnute pek hian thi neih leh a, naupai theihna lakah a veng tha viau mai a. A chhan pawh nu hnute insiam tur tana taksa tuihnang pawimawh tak Prolactin Hormone hian chi (ovum) insiam tur a ven that vang a ni. Chutiang avang chuan naute hnute pek hmanga naupai laka invenna “Lactational Amenorrhea Method (LAM)” hi invenna him tak niin an sawi thin reng a ni. Mahse chumi tur chuan he method chungchangah hian hriat tur pawimawh tak a awm a, chungte chu:
1. Naute hian nu hnute chauh an hne tur a ni. Chu mai ni lovin hnute sawr aiin naute in natural a a fawh chhuah kher hian Prolactin insiam hi a chak a, naupai lakah a veng tha zawk bawk a ni.
2. Nu hnute chauh naute hian a hne tur a ni. Bottle feeding hman zeuh zeuh te leh, thil dang pek belh hian naupai theih laka a venna chance hi a tihniam bawk a ni.
3. Naute hi khaw en laiin darkar 4 danah hnute pek tur a ni a, zan lamah chuan darkar 6 danah tal pek ngei tur a ni bawk.
4. Naute hi thla 6 aiin a sen tur a ni. Thlaruk hnu lamah chuan nau pai theihna chance a rawn sang leh tawh thin.
5. Nu hian nau a neih hnu atanga ni 56 hnuah mumal takin thi a nei tur a ni lo. Ni 56 hma lamah hi chuan thi chhuak zeuh zeuh a la awm theih vang a ni.
Hetiang ang thlapa nu in a tih theih chuan LAM hian naupai laka venna chance 98% lai a nei ni a sawi a ni. Chutih rualin naupai chance tlem te la awm avang hian mahni inrinhlelhna neih chuan in check up tho a pawimawh a. Zun test hi nu hnute pe laiah hian a rintlak nep avangin naupai leh pai loh confirm nan chuan ultrasound a hman chi ber thung. Chu chu a invenna hmanrua Copper T emaw oral pills ei lova inven dan kawng awm chu ani deuh ber.
Kan hriat tur chu thi neih chungchangah hian nei mumal leh mumal lo an in ang lo thei viau. Naupai hmaa thi nei mumal lo tan chuan kan sawi tak LAM hi a rintlak dan a nep deuh thin. Thenkhat chu nau neih hnu lawk atanga thi nei nghal mai an awm thin a, a then phei chuan rei tak chhung thi an nei chhunzawm fo bawk. Chuvangin doctor te thurawn lak theih hi a tha ber a, eng invenna nge hman tha ber ang tih chungchangah pawh hian i dinhmun azirin i tana tha ber tur an chawh thei zawk ang che. Ka han belh leh hram duh chu thiante emaw hmelhriat te tana tha hi i tan a tha ve kher lo thei ani tih hi.

Facebooktwittergoogle_plusredditpinterestlinkedinmail

ZU NGHEI ZUI DAN TUR

Zu nghei tawh tam takin an in leh fo mai. Chhuanlam nawi te te an nei fo. Tihfuh tawk lo an nei thin. Zu ngheina ‘magic’ a awm lo. Tan zui reng a ngai a, awmze neia ‘fight’ a ngai.
—————-
Zu nghei turin duhthlanna i siam ta maw? Zu nghei tuar nasa zual chi phei chu damdawiina inenkawl ngei a tha. Zu mana inseng hreh hauh si lo, damdawi lei dawn leh damdawiina awm dawna ‘a to si’ tia kut zum leh tlat an awm thin. Kan chhiatpui zawk zu man atana ni tin pawisa tam tak kan sen ral ngam chuan kan hrisel nan hian a let pawh sen huam zawk tur a ni.

Hrisel man hi a to teh a nia. Hrisel hi a man a to tih pawh hre thei lo khawpin Pathian malsawmna kan dawng a. Kan hriselna hi roh na chang pawh hre loin kan intichhe mai mai thin reng a nih hlawm hi. Hrisel nan hian inseng hreh lo mai teh.

Zu nghei tir inenkawlna a zawh hnu hian zu nghei zui zel a la ngai dawn ta chauh. A tir kar hnih khat han nghei mai hi a harsa lem lo. Nghei zui zel hi a harsa thin khawp. Zu hi awm tawh miah lo se kan in tawh dawn lo ni mai tur a nia! Khawilamah! A la tam dawn chauh. In duh dang an la tam em a, in duh kan awm chhung chuan a awm reng dawn tlat. Thiante’n an lo la in a, tun hmaa uikawm fu thinte kha zu han nghei veleh hian an thilphal leh ta riau zel a, min khilai duh hi an awm ta tlat zel leh nghal! Zu chakna a reh mai si lo a, zu ruih nawmna kan la theihnghilh chuang bawk si lo.
Thlemna a tam a, mihring chak lo tan hian insum a har thin si. Mahse buai suh! Chutiang karah pawh nghei zui duh tak tak tan chuan zu in ngamlohna damdawi ei zui tur a awm e. Chu damdawi chu amaha ei mai chuan a hlauhawm lem loh. Mahse chumi ei chunga zu in chuan taksaah ‘tur’ a lo insiam a, luak, chau, pum na, taksa sa leh hrehawm dang tam tak a lo thleng thin. Zu in pawlh chu ngam chi a ni lo. Miin zu an in thei lo a, an in ngam ta lo a, an nghei zui zel rih thei phawt. Thla thum atanga thla ruk chhung vel ei tur a ni a.

Chutia zu in ngam loh lai chuan nunphung kha lo thlak hman tur a ni. Zu zawrhna kawng zawh thin khan Biak In kawng zawh tawh zawk ila. Hmeithai zu zuar rim nana kan hun hman thin kha nupui fanaute bula tawlh nan kan hmang tawh zawk ang. Zing zu in tura chhuah ai khan zing tawngtai inkhawm turin kan chhuak ang a, thenawm khawveng tlawhin, mitthi ral leh tul dang thawh nan zing kar hun tha chu hman zui tawh zawk tur a ni. Tlai ni nem zu chak hun thinah khan chhungkuain hun nuam a hman theih ta a. Ni lenga ruih ai khan kan inchhungkhur lo tlabal tawh thawmthain kan hmanhlel tawh ang a, kilh that leh thawm that ngaite buaipuiin ‘in thar leh chhungkaw thar’ kan din dawn ta a ni.

Zu nghei tum satliah ringawta nunphung kan thlak chuan si loh chuan engemaw niah in leh nge nge a awl khawp. Kan duh tawh loh hi chu hnaih zui tawh loh tur. Ngaihzawng then ang a ni; inthen ti sia in ‘text’ zuk zuk reng tho chuan sihhnip leh a awl thin kha!

Zu i nghei a nih chuan i kalkawng letling thawk law law rawh. Inkhawm rawh. Inthlahrung bik suh. Nimina piangthar leh hman atanga lo ring tawhte chanvo hi ‘duli’ vek tho a niang. Kraws lera piangthar pawh kha vanramah tho a ni a awm dawn. Kohhrante hi misual sim awm khawmna a ni mai a, zu ngawlvei sim duh tel vena tur awm tak a ni sa! Zah tur bik pawh an awm lem lo.

Zu zawrhna hmun te, lo in thinna hmunte hi kal loh tawp a him. Lung an tileng leh thei. Zu la in thin thiante pawh thlah ngam a ngai. In chhungah zu bur ruak leh zu min ngaihtuah chhuahtir thei awm miah lo se a tha. Tui leh thil dang dah nan pawh zu bur hman loh tur.
Zu zunzam hi a chak em a, min tilungleng leh hma thei khawp mai. Mahse patling zu in duh lo hi chu eng zunzam mah hian a zem thlu tur a ni lo ang.

Facebooktwittergoogle_plusredditpinterestlinkedinmail

Ka Huang (Jan 25, 2015)

Ralleng ram, Noklak out post-a Lower Division Clerk hna ka thawh lai chuan ASC (Agency Service Corps) (porter) ho chu thla a ral zet loh chuan an acquittance roll siamsak phal a ni lo. Thla ralah kan siam a, HQs Tuensang-ah kan thawn a, hlawh an lak ve meuh chu ni 15 hnu lam a ni ziah thin. Ni 23-10-1954 (Inrinni) khan thuthar a lo thleng a, “Ni 20 thleng an thawh tawh chuan an bill siama HQs-a thawn theih,” an rawn ti a. Porter 50 chauh nei kan ni bawk a, ka siam mawlh mawlh a, kan dak runner PAMPAN leh Porter KONGKHAU chu kan tir ta a. Chumi zan chuan Chingmei-ah riakin a tuk chawlhni, 24/10/54 chuan Tuensang HQs chu an pan leh ta a.

Chu chawlhni chuan kan Base-a Supdt. Zothangseia, Primary Zirtirtu – Obang Temjen Ao (Naga), Jem Damar Bahadur MC, OC Noklak out post, 3rd Battalion, Assam Rifles leh kei chuan an sipai perimetre chhunga OC quarters-ah chuan lehkhaden dengin kan inchawi vel a, kan chawi chuan Rallengho behlawi rahte kan lei a, kan chhumtir a, kan ei hawng hawng mai! Chung lai chuan thil lei tur engmah a awm lo takmeuh a ni. Ni tlak hnu, khua a la thim hma chuan sipaiho chuan, “Kukra, kukra,” tiin an ri ta khut khut a, an arpa pakhat chu a khuang a lo ni awm a. An puithunaah chuan ni tlak hnu, khaw la thim hma sia arkhuang chu thil tha lo lettawp a lo ni awm a, an man a, an OC quarters chu vawi thum an vawm khum a (a thawi na a ni awm e). Chu ar khuang avang chuan ‘thil tha lo tak a thleng dawn a ni,’ an ti a, Obanga pawh chuan keiniho AO-ho pawh hian thil tha lo lo thleng tur hril-lawkna a ni kan ti a ti ve bawk a. Kei, inti-Khristian tak mai chuan, “Khristian kan ni tawh a, hetiang puithuna hi ho mai mai a ni,” ka ti vel a, thimah kan tin ta a.

A tuk, Thawhtanni zing deuh maiah chuan Wireless transmission-in FLASH ngei maiin HQs thu a lo thleng a, hetiang deuh hian, “PAMPAN D/R KILLED BY MISCREANT NEAR KUTHUR VILL. AND KONGKHAU SERIOUSLY INJURED” tiin. Chuta tang chuan Tuensang District-ah chuan hel pawl an pawng ta hlut mai a ni. Ka sawi duh zawk tak chu: Kha chawlhni (Sunday) tak khan a engamah hre loin hlim takin kan indeng a, Pampana an thah hnu lawk ni awm takah arpa kha khuangin sipaiin an um ta chum chum mai a, thil tha lo a thlen an hlauh avangin. A thleng chiah mai a lo ni reng bawk si. Kha ar khan min hrilh nge ni ang a, thleng rual ta chu sapin co-incident an tih ang lek hi ni ang tih hi tun thleng hian ka ngaihtuah leh thin. Thil thleng kan hriat hma kha chuan Khristian tan chuan rin chu a ni lo tiin ka Naga thianpa pawh ka hrilh e ka ti vel kha a nia (He thil kher kher hi chu a bik em avangin a tahrik nen lam ka note buah ka lo dah hlauh a ni).

Heti ang thil ka ngaihtuah lai hian, ‘Kan thih hun hi eng eng emaw avangin a pumpelh theih ang em?’ tihte hi ka ngaihtuah fo thin. A chhanna tuma sawi theih ni mah suh se – theih loh a nih mai theihna awm chanchin pakhat ka’n ziak leh ang e. A kum ka hre thei ta miah lo. Ka hriat theih ber chu Upa Rokunga ina Khrismas hman a ni tih ka hre thei. A chhan chu: Upa Laia hoin Khrismas sa tur 24 December-ah Saza kan zawng a, kan kap nghe nghe a. Tuna Nursery Veng an tih tak lam atangin Mission Veng lam kan rawn pan a. Chutih lai chuan Chhura rual ngawpui tak meuh a la ni. Kan veng lan theihna kan thlen chuan hlado chham kan ngen a; mahse, Sazain hlado a nei lo an tih avangin Khrismas-na tur ina mite hriat kan duh bawk si a, tlang kan tlir ta a. An hre ngei a niang chu, Vai lui kan kân hmain min hmuak tur nula tlangval leh naupang kan tawk ta a. Chuta kan hriat hmasak ber chu, ‘Tlangvala Awka a inawkhlum palh’ tih a ni (Hei ka aia naupang deuh thenkhat ka han rawn a, 1947 emaw 46 emaw a ni ang an ti). He kan ram chhuah thu ka’n sawi kai duah nachhan chu Awka thih kan hriatna hmasa ber kha Vai lui ral a nih vang a ni.

Khata thu a than dan kha tak tak ni maw, an sawi hmangin Awka (Pi Dengziki, Dawrkai Veng nuta pa)?khan a makpa J.Lianchunga truck kha Sairangah thil phurin a khalh thin a. Kha December 23 zan khan a mumangah sâr (Sâr hre tawh lo in tam mai thei a, SâR chu chhimbal ang, a sen tawite hian vanah a zam thin, upa chuan sâr a zam chuan sarthi an awm an ti thin) a lo awrh a ni awm a, chuvang chuan zing thawh atangin Chunga hnenah, “Nizan ka mumangah sâr ka lo awrh a, chuvangin motor khalhin Sairang ka kal lo mai ang e,” a ti an ti. Tichuan, chumi ni chuan engmah ti loa awm tur a ni ta a. A hma pawha ka sawi tawh Lalduha (Pu Zakunga fapa, Pu Kawltluanga nupui – Vani nau) nen khan Awka chu an inkawmngeih em em a, tuma pawi sawi lo hian an indem vel a, mak tak tak hian an tawng thin. ‘Sarkar’ tiin an inko a, Pu Lalkhuma thih – kan riahpui tum pawhin Duha chuan Awka hnenah, “Sarkar, tukin chu ka harh a la reh lo,” a’n ti mauh mai nia. Chuti reng renga fiamthua inkawm thin chu an ni. Tichuan, hna dang nei ta lo chu – Awka leh Duha chu inbual turin Sakhisih hnuai Luipui lamah an liam thla ta a ni awm e. Awka chuan .22 maniature rifle a keng a. A hnua Lalduha min hrilh danin – an insuk lai chuan Sakhisih chunga Saisiakah chuan Varalthi hi a hram a hram a ni awm e, hnai deuh te mai a ni. Awka chuan kah tumin a han veh a. Sih tuikhur hi zawl hi zau fe a ni a, hnuai lam atang chuan a lang thei lo. Silai chu a ri thak a, a reh ta vang vang mai a, Duha chuan a han au thin a, chhanna reng reng a awm loh avangin a han chho a, tuikhur zawl a han thlen chuan Awka chu a lo let reng mai a ni awm e. Duha min hrilh dan chuan, “Ka han hmu phut mai chu ka mur sung sung mai a, tih tur ber pawh ka hre lo,” a ti. “Vanneihthlak takin U Chalhlira (Biakdiki pa) tuichawi tur a lo chhuk hlauh mai a, ani nen kan buaipui ta hlauh zawk a ni,” a ti

Ke thu ka’n sawi nachhan chu – Awka khan a mumangah sar a awh avangin a motor khalh thin khalh loin a chawl a, thihna a pumpelh dan lam a ngaihtuah ni ngei tur a ni. Mahse, nunna chân khawpin a inkap palh leh tho mai a, pumpelh a tum kha a sawt chuang lo em ni tihpalh a awl em avangin ka rawn ziak mai mai a ni. A thian ta ber Awka’n a boralsan tak avang khan Lalduha khan a khawhar thu min hrilh fo thin, amah tak pawh kha khawngaihthlak tak a ni. Kan thih ni hi pumpelh theih a ni lo a niawm asin!!

Facebooktwittergoogle_plusredditpinterestlinkedinmail

Login

Lost your password?