Monthly Archives: February 2015

AIZAWL HMASAWNNAN – I

Aizawl hi Mizoram khawpui ber leh sorkar hmunpui a nih avanga Mizoram mipuite tana a pawimawh dan hi sawi tur a tam khawp ang. ‘Ka sakawr pa tek pa tek, Aizawl kan thleng hman lo ang e,” tih hi thingtlang naupang zawng zawngten inkhualtelem nan an hman thin a; mipa naupang tam berte duhthusam pawh Lammual ngei a inkhelh hi a ni thin. Chumai a ni lo, Zofate khawpui ber hi Israel fate rilrua Jerusalem a pawimawh tluk zetin khawvel hmun hrang hranga cheng chhinlung chhuakte rilru luahtu leh an lung tilengtu a ni bawk. He khawpui ropui tak hian engtik lai pawhin lang thei lamah nasa takin hma a sawn reng a, mahse, (hmuh theih leh) hmuh theih loh lamah harsatna namen lo a tawk thung si.

Ram nitla seng lo a roreltu Kumpinu sorkarin 1890 atang khan Aizawl khawpui hi Zofate awpna hmunpui atan an hmang tan a. Chumi kum chu mei mit lo a Aizawl a awm tan kuma pawmin 1990 khan centenary pawh lawm a ni nghe nghe. Sapho hian khawpui ni turin an ruahman chiah lo a, mahse sipai hmunpui leh sorkar hmunpui a nih miau avangin mipuiin an bawh a, sorkar phal lo chung pem lut an awm zel a. Rei lo teah khawpui lian tak a lo ni ta hial a. Zirna hmunpui leh sumdawnna hmunpui a lo ni ta a, kohhran leh tlawmngai pawlte leh politics hmunpui a ni zui ta zel bawk a. Sapho haw hnuah pawh he khawpui bawk hi India-in Mizoram awpna hmunpui atan a hmang zui ta zel a ni. Mizo history a hmun pawimawh em em, sapho hun lai atanga puipunna hmun pawimawh ber la ni reng Aizawl Lammual pawh hi 1890 atang khan Mizote ta a ni ta lo a, min awptu hnam dangte thuneihna hmun a ni zui ta zel a ni.

Aizawl hi tunhma chuan khawpui tenau ‘town’ a ni reng a, mahse kum 15 vel kal ta atang khan khawpui lian ‘city’ anga ngaih niin, inrelbawlna lamah pawh India ram khawpui lian (city) te kalphung ang zuiin July 2008 atang khan Aizawl Municipal Council din a ni a, kum 2010 November thla khan Municipal Council member inthlan hmasa ber neih a ni. Zep nak emaw, mipui thlan AMC hmasa ber hian mipui beisei a pha chiah lo deuh, sorkar lai inpaihthlak tum hnih a thleng hman a, politics ball a hmang an awm thin avangin an kal fuh tawk lo deuh ni pawhin a lang. AMC hian thuneihna chin an nei thui vak lo a, a nihna takah chuan state sorkar thu anga kal mai tura duan te pawh a ang zawk mah. Aizawl hmasawnna tur chuan tun aia sorkar lak atanga thuneihna sang zawk an neih pawh a tul mai thei a ni.

Khawpui than chhoh danah hian ruahmanna fel tak a awm lem lo a, mumal lo takin he khawpui hi a thang chhe zel a ni ber. In sak danah te, bawlhhlawh leh tui chhe paih danah te, inkalpawhna leh kawng siam danah te mipui himna tura ruahmanna (Safety measures) ngaih pawimawh a ni ngai lo a. A chenga te hian harsatna an tawk mek a, an la tawk nasa tial tial dawn ni pawhin a lang. Kum 2005 khan Aizawl a insak dan buaipuitu tur Aizawl Development Authority (ADA) dinna tur dan siam a ni a, 2008 atang khan dan thar (Aizawl Development Authority Building Regulations) chu hman tan a ni bawk a. Mahse, he dan hi mipuiin an zo meuh lo niin a lang a, a hnu lamah phei chuan thuneitu lam pawhin an thlah dul zui ta mai reng a ni.

Rambuai avangin mi tam tak khawpuiah an pem lut a, sorkar hmunpui a nih vang leh hmun dang aia sum leng vak a tam avangin mi tam takin an bawh a, zirna hmunpui a nih avangin khaw tin atangin thalai tam tak an fuankhawm reng bawk a. Chhiarpui hnuhnung bera a lan dan chuan Aizawlah hian mihring 1,091,014 an cheng mek a, chu chu Mizoram mipui za zela 27 vel zet a tling. A nihna takah chuan zirna vang leh thil dang vanga khawsate nen phei chuan engtik lai pawhin mihring nuai hnih atanga nuai thum hi chu an awm rengin a rinawm. India hmarchhakah hian Aizawl hi khawpui lian ber pawl leh mihring tamna ber pawl a ni a. State capital-ah phei chuan mihring tam lamah Guwahati, Imphal leh Agartala a pha lo a; Shillong te, Silchar te aiin mihring an tam zawk tihna a nih chu.

Tlangram chhengchhe tak, kham leh hmun awi tak tak a awm avang hian khawpui chhungah hian chenna atana hmun him lo tak tak a tam hle a. Hmun zim leh chep taka in inzawm titih sak a tam hle a, hmun awl zau tak a awm lo a, ke a inkalpawhna leh lirthei tlanna kawng a zim hlawm hle bawk. Kan vannei a Pathian zarah chhiatna lian tham a la thleng lo hlauh a, engmaw changa vanduaina lo thleng – kangmei leh leimin ilo ah pawh kan hmunhma chep lutuk hian harsatna a thlen fo thin a ni. Vanduaina leh chhiatna rapthlak zawk a thleng ang tih a hlauhawm khawp mai, kan buai dan tur hi sawi mai aiin a nasa daih ang.

Mizoram economy innghahna bul, sumdawnna leh zirna hmunpui, sorkar leh politics bu zawl, kohhran leh tlawmngai pawlte inbenbelna ni bawk, Mizo mipui hmun li a thena hmun khat aia tam chenna Aizawl khawpui hmabak hi vei tak te a vei a hun ta khawp mai. Mipui dinhmun inthlauhzia te, mi retheite dinhmun chhiatzia te, eizawnna tling hna a vanzia leh hnathawh tur mumal nei lo tamzia te, khawpui bawlhhlawh paihna leh a sawngbawl dan that tawk loh dan te, ei leh in, ni tin mamawh leh tui harsatna te leh a dang pawh sawi belh tur a tam ang. Mihring pung zel avang leh inrelbawlna that loh vangin harsatna kan tawk fo a, zu leh ruihtheih thil hluar zel vang te, khawtlang leh chhungkaw nun tlahniam zel vang te hian suahsualna a pung zel bawk. Hmuh theih lamah hian thang chak viauin, in ropui tak tak ding khir iah uaihin, lirthei chi hrang hrang pung zelin, thil changkang tak tak hmuh tur awm thar zel mah se he khawpui hian hmasawnna kawng dik a zawh thuai loh chuan khawpui tawp tak leh khawpui him lo tak a ni thuai dawnin a lang a. Chuvangin, ngaihtuahna kan sen zel theihna turin Aizawl hmasawnna tur chungchang hi kan sawi chhunzawm zel ang.

Facebooktwittergoogle_plusredditpinterestlinkedinmail

Dr. Hrekima Titi (Feb 22, 2015)

Kar hmasa titi kha a nawi fu! A chhan a awm. Sawi fiah ve a ngai tlat.
%%%%%%%%%

VAWI KHAT ‘CLICK’ SUAL!
Chhiar tlaka thu ziak tur hian hun a hek khawp mai. Rilrua lo awm apiang ka’n ziak thla pawr pawr a. Vawi tam tak ennawn a ngai. A bul atangin ka’n en tha leh a, paih ngai paihin belh ngai ka’n belh a. Rilru a kal fuh tum chuan duh aiin a lo sei a. Paih tur lai ka hriat mang loh pawh hian Pu Tuna’n, “I thuziak hi ka chhiar peih tawk vel a ni,” a tih kha ka hre chhuak leh thin a. Chhiartu pakhat hloh ai chuan chhiar peih tur tawk vela tihtawi ka duh a.

Zarkawt pa ropui, Dr. Zorammawia’n, “I thuziakte hi hmeichhe pawnfen an sawi ang, ‘Mit la tawk vela chhing, a pawimawh chin fun kim sia sei’ a ni e,” min rawn tihte kha thinlungah hian a cham a. Thu ziah mawlh mawlh laite hian tleirawl pawnfente hi mitthla an ngai leh rih a!!

Zirtawp zan hi chuan engthawl lo zetin rilru a ‘zalen’ a ngai si a. Kar hmasa pawh khan ka inpeih meuh chuan zan dar 1 a lo ni vung tawh mai a. Internet ka’n thlunzawm a, ka thuziak dahkhawmna phek chu kan en thla zar zar a, thupui hrang hrang intlar thla duatah chuan ka thawn tur nia ka hriat chu kan ‘click’ ta zauh a, a inthawn fel a, ka indah fel a, ka mu ta a.

Pathianni tukah rilru zalen takin Zalen chu ka’n bih ta ale! Biang a sa phut phut mai a, ka bing deuh chuk chuk a. Thu awmze nei lutuk lo, hawrawp chhut dik lo nasa tak, a kar leh atana ka ‘draft’ zawk, la ennawn miah loh, ka theihnghilh ka hlauh avanga ka lo chhinchhiah lawk mai mai rih, dah that dawna thupui pek ngai ve si, ka thawn tur zawk nena thupui inang tak mai zawk kha a lo chhuak ta mai a! Ka thawn dawn khan ka lo ‘click’ sual a nih kha!

“I titi ka lo chhiar ve thin,” “Ka chep thla a ka dah tha zel,” “Min chawmtu a ni,” “Ka hlawkpui thin khawp,” tia min han fuih phur thiam thinho kha mitthlaah an lo lang a! Sawi fiah nghal vek theih nise ka va ti tak em!

Thil tihsual tawh chu tihdik theih a ni tawh lo. A sual ang ang khan a liam zo tawh. Zan khaw tairek thlenga ka hahpui zawng zawng kha vawikhat ‘click’ sual khan a chawk chhe vek a. Chawlhni tukah a sang tel hnenah duh loh zawk a darh ta vak mai a nih kha.
Tichuan hengte hi ka ngaihtuahzui phah ta a. Hun leh tha tam tak senga kan neih tawh sa hi vawi khat tihsual hian a tikhawlo vek thei. Mahni phak tawkin nun hi uluk ve hram hram mah ila, vawi khat ‘click’ sual zauh hian min tichhe thei dawn a lo ni. Piangthar hlim pawh hi vawi khat ‘click’ sualin a tida leh fo. Vawi khat ‘click’ sual zauh hian hri tha lo a kai theih a, kum 30 pelh thlenga ruihtheih thil khawih hauh lo, vawi khat ‘click’ chhin avanga ngawl vei ta te pawh ka hria.

Lal ropui Davida chanchin sawi apiangin a tlai khat ‘click’ sual zauh kha kan sawi tel lo thei lo zel chu a nih hi. Pa chak Samsona pawhin a vawi khat ‘click’ sual chu thihpui zui ta a nih kha.

Ka thu thawn tur ka en lai khan a hnuai kha lo zuk en thleng zauh ila, ka tisual hauh lo ang. Hmuh hmasak apiang mai ‘click’ ngawt zel mai hi a finthlak loh khawp mai. Duhthlanna siam dawn hian kil tin en kim a tha fo reng a ni. Han thlir zau deuh ila, han en kual deuh ila, kan tihsual tur tam tak hi chu kan tisual lo ang maw le!
Uluk deuhin nun hi hman tur a lo nih hi. Vawi khat ‘click’ sual hi a pawi thui thei thin si a.

Facebooktwittergoogle_plusredditpinterestlinkedinmail

Doctor Ka Zawhna (Feb 22, 2015)

Natna Hlauhawm ‘Septicemia’
Septicemia hi Septicaemia tih zawk tur ni awm tak a ni a; mahse, tun tuma kan article atan chuan Septicemia kan ti mai ang a. Mizo nu emaw pa valai tak takte pawh a suat zauh zauh tih chanchinbu lam atangtein kan hmu a. Septicemia hi natna tihbaiawm tak, awlsam te a thihpui mai theih nimahsela a natna awmzia hriat thiam chuan ven leh chhan theih tak a ni.

Septicemia awm theih dan chu kan taksa khawilaiah emaw natna hrik a lo lut a, bu an khuar a, an lo pung vak a (infection), thisen zamah an lo lut a, khatia thisen an infect tawh chuan thisena tur awm (blood poison) emaw sepsis an ti a. Khawsik emaw BP hniam vak vak (septic shock) te leh rilru buai a lo awm thei a. Hetiang a nih tawh chuan a chak em em mai a, damdawi ina damdawi tha tak nena enkawl vat a nih loh chuan thihpui mai a awl em em a ni.

Taksaa a lo luh dan hrang hrangte:
Taksa pem leh pan pun, zun kawng infection ( urinary tract infection, UTI) hi he natna siamtu tam berte zinga mi a ni. Damdawi ina inzaina hmuamhma, pan pun atangte leh kaw chhunga a bu khuarna hriat mai theih loh atangte pawhin a awm thei. Damdawi inah emaw, mahni inchhung lumah emaw damlo chau tawh takte leh upa chau lam tawh te tan vei a awl bik.

Rannung seh huamhma pun atangin a awm thei bawk. A bik takin maimawm seh atanga hetianga thi hi sawi tur an awm nual a ni. Rannung sehna hmuamhma a lo pun a nih chuan saphihrik emaw, tuhrik seh emaw pawh ngaihthah mai mai tur a ni lo.

Cellulitis an tih hi vun pem emaw runnung seh vang emaw a lo pun (infection) lo awm hi a ni. Cellulitis hi khup hnuai lam chinah a awm duh bik a. A lan dan chu vung bawl sen deuh tuak hian a lang a. Vun thuah chhungril zawk lama natna hrik a luh tawh chuan rang takin an pung thei a, an tawh khirh em em a ni. Antibiotic chi hnih chi thuma hun rei tak enkawl an ngai thin. Enkawl dam thuai a nih loh chuan natna hrik, a bikin bacteria lo pung zel kha zawi zawiin thisen zamah an luta chu chuan septicemia a siam thei a ni.

Facebooktwittergoogle_plusredditpinterestlinkedinmail

SIKUL TAN HMA HI

– Chhingdailova

Kan ram hruaitu te, Cabinet Minister te chuan sikul kai hun sawn hma tur thu an titlu ta rup mai a. Mi tam tak chuan sikul kai hun sawn hma hi kan thatpui an ring viau a. Mahse, khawnge sikul tan hma that tawk lohna nia ka hriat mawl tete-in ka’n lipse ve dawn teh ang.

Sum leh pai a khawih dawn: Sikul tan hma chuan chhunchaw ei hun a hma ngei a ngai ang a. Chhunchaw an ei hma chuan zanriah ban hman lo tam tak te, an sikul bâna an riltam inhnangfakna tur ei leh ina sum sen tur ngawt pawh hi thil tam tham a ni. An riltam hma avangin zanriah chaw ei hmapui ngawt dawn se la, office lam timing a tawlh ve si lo va, a ei hmapui ngawt theih dawn loh a ni. Tin, thingtlang lama feh an haw hma ve ngawt a rem dawn si lo va. Naupang riltam inhnangfakna turah pawisa tam tak a luanral a ngai dawn a ni.

Hunawl hman that loh kan zir ang: Sikul an bân hma chuan hun awl an ngah dawn thung a ni. Mi tam tak chuan, “An sikul bânah thil tangkai an zir thei ang a” te an ti a. Aizawlah pawh hian sikul bâna fate tuition leh an tuina zirtir thei hi chu mi tlemte chauh an ni. Heng an hun awl neihah te hian naupangten thil tangkai ni lo, thil tangkai lo tam tak an zir chhuah phah a hlauhawm. Thingtlang thil zir tur nei ve lo, zirna pawh awm hlei lovah phei chuan sikul an bân hma chuan tih tur nei hek lo, dai hnaiah an vak rawlai ang a, sava veha chhuakin kan nungchaten an tuar leh dawn a nih hmel. Aizawlah pawh tlai len leh thiante in vela tei mai mai an pun phah dawn a nih hmel. Tunah pawh hian a dik tak chuan sikul kal hun pangngaia an exam chawlh te, thlasik leh nipui chawlha hunawl hmang tha lo, an nu leh paten an buaipui, sikul lut leh vat vat se an tih hi an awm nual reng a ni.

Kan zing kar life hi ka ui: Mi tam tak chuan in vairam nen kan ram hi kan tehkhin fo thin. Mahse, hei hi kan hriat reng a tul awm e. Vaiho hlawhtlinpui hi kan hlawhchhampui tamzia en hian vaiho tih dan a dik a dawk pawh thlu hlei lova lak ve ngawt hi thil tih chi a ni ber lem lo. Vai ramah chuan an tho hlawt a, breakfast an ei a, office kal tura insiam a ngai a. Sikul naupang phei chu thlasik lai phei chuan khawvar hmaa sikul tura kal chhuah a ngai hial a ni. Anni chuan zingkar life an nei ve lo. Mizote hi zingkar life nei hnam, zing kar hmang tangkai em em hnam kan ni a. Zing kar hnatlang te, committee, leh inhmuhkhawm leh zing len chhuah ching hnam kan ni a. Chu chu kan khawtlang inawp dan leh kohhran thil tihah pawh thil tangkai tak a ni reng a ni.

Tuna sikul tan hma kan tih hian kan zing kar life hi a bo zo dawn a ni. Zing karah engmah kan ti hman lo ang a. Tun din hmuna dar 9/9:30-a sikul tan tur hian zing dar 7:30 atanga dar 8-a chaw kan ei lai hian zing dar 8 kan tan chuan zing dar 6:30-ah chaw kan ei a ngai tawh dawn a ni. Chu chuan kan nung phunga pawimawh tak, zing kar life chu a um bo tawh mai dawn a ni. Pa ber office kal tur tan chuan chaw ei kham a thut muan paha thingpui sen hâng han dawm pah a rem rualin an rilru luahtu ber an fate/naupangte nunphung vangin kan Mizo society-a thil pawimawh tak chu kan um liam ang a. Tlai office ban hun an sawn ve loh avangin zing kara kan tih hman loh chu tlaiah kan ti hman leh chuang dawn lo a ni. Thil uiawm taka a va ni em!

Aizawl chauh hi em ni Mizoram?:
A dik tak chuan thingtlang lama awmte hian, “Aizawl chauh hi emaw Mizoram in ti thin,” tiin an sawi thin a. Hei hi a dik nachen pawh a awm viau awm e. Sikul tan hma lo chhuahna an sawi chu office hun laia motor tawt lutuk vang hi a ni ber awm a. Office-a kal te ai hian sikul naupang kan tam zawk a. Office-a kal thin chhungkua aiin Mizoramah hian a kal lo chhungkua kan tam zawk bawk a ni. Chutiangten, a bikin Aizawla traffic tawt avanga Zoram pum office pakhat pawh awm lohna, sorkar in leh lo chu sikul chauh awmna thlenga kan her danglamsak hi chu a pawi tak zet a ni. A bikin sikul tan hma vanga awlsamna kan neih tur hi mipui za zel 30 pawh an ni pha lo va. Aizawlah pawh traffic tibuai lova lam hnaia sikul kal hi a tam zawk an ni bawk a ni. Khawpui danga sikul kal hun laia traffic buai hi buaipui tham a nih hmel bawk si lo va. Tun hnai sikul kai hma kan tih hian in Aizawl chauh hi em ni Mizoram in tih an ti leh ngei a rinawm.

Hmeichhiate an bet nawn leh dawn a ni:
Tun hma lam chuan Mizo hmeichhiate dinhmun kha a hrehawm em em a. Zingah buh den leh tui chawi a ngai a. Khaw en hmain chung thilte chu an tih a ngai thin. Tun hnuah buh den leh zing tui chawi a ngai ta lo va, Mizo hmeichhia dinhmun pawh an ziaawm tawh tak zet a ni. Amaherawhchu, sikul tan hma kan tih hian in lama ei rawngbawltu kan Mizo hmeichhiate an dinhmun a hrehawm thar leh dawn a ni. Zing takah thawh a, ei rawngbawl a ngai leh dawn a. Kan Indian Standard Time pangngai (kan awmna atanga darkar chanve chuang a tlai) kan la rin miau avang hian thlasikah phei chuan khaw en hmain nu a thawh a, sikul kai hla deuh phei chu khaw en hmaa chaw eipui a ngai ngei dawn a ni. Sikul tan hma hian kan Mizo dinhmun a hnuk hniam nawn leh dawn a ni.

Facebooktwittergoogle_plusredditpinterestlinkedinmail

Kan Work Culture bawk hi

– Jruatea Kawlni

Pialral kan ngaih nachhan pawh thawk lova faisa ringa khawsak kan duh vang a ni ber awm e. Kan pu Chhura zawhna fing pawl tak pawh hreipui khuaitu thei kha “Tha a ngai em?” tih a ni. Mizote hi kan thatchhe viau lo nain, hnam taima tak erawh chu kan ni chuang awm lo ve. Min kaihruaitu azir a ni. Chumi tifiahtu chu hmanlai LAL neih hunlai atangin Lal remhria leh taima khua chu khamkhawp thar leh khaw indodelh an ni tlangpui.

Hnathawh hun: Tunlai kan ni tin hnathawh hun chhung hi a tlangpuiin tukthuan eikham atanga tlai lam zanriah kil hma zawng hi a ni deuh mai awm e. Kan kawmthlang mai Silchar te pawh hi han en ila, keini ai chuan hna leh sumdawnna hi an ti tak deuh emaw ni chu aw a tih theih. Thim hnuah hian han bazar ila, nghathu zuar atanga in sak zuar, lirthei showroom changkang tak leh damdawi ilo thleng khuan an la inhawngin an la dawr theih vek mai. Keini kan khawpui berah hi chuan ‘a uih zawn ang’ vut vut maiin thimhmulah hi chuan mahni in lam kan pan a, eichawp dawr zan men chhung thleng inhawng tlang tur tih lo chu dawr theih aram kan awm lo nghal ringawt mai chu a ni. Kan thenawm vaite hian zan inkhawm leh hla zir, khawhar inlenpui, hnatlang te keini aia an neih tlem vang ni pakhat mah se, hnathawh hi keini aia an lak runthlak vang a ni ber zawk awm e.

Zingkarah hian Aizawl atanga sumo chhuak tur tamna Zarkawt leh Dawrpui pheiah te leh Vanapa Hall kawt bawr velah kawngsir mipui kalna tur behchhana rem leh rem lova hunsawn theih thingpui dawr siamte hi an hlawk ngawt thin ang. Tam tak thawh hmain sum an hailut fe awm e. Veng hrang hrangah thlabia sumseng meuh a dawr luah si hi ‘Mizo thingpui dawrah ngei’ pawh ti ila dawr tur mumal an awm har khawp. Chutih rualin Vai thingpui dawrte erawh vengtin ah a dawr hawng hma leh ei tur nei hmasa an ni thei lawi si.

Time zone leh sikul tan hma: Chanchinbu lamah pawh Time zone chungchang hi ka phak ang tawkin tum hnih khat chu ka lo thai lang ve tawh. Sikul tan hunsawn hma te hian kan work culture-ah nghawng a neih chho dawn avangin leh kan khawsak phung leh nunphung hrim hrimte a her danglam deuh dawn avang leh inzawmna leh nghawng chhuah tur pawimawh tak a neih tlat avangin tlem chu i’n sawi zawm leh teh ang.

India hi ram lian tak a ni a, chhim leh hmar a ni emaw, chhak leh thlang zawng emaw pawhin khawvel ram lian berte zinga mi a ni. Chuvangin a ram khawchak kil leh a khawtlang tawp hun inthlauhna chu darkar hnih lai a tling. Keini India hmarchhaka awmhote hi chuan ni chhuak hi India ram hmun dangte aiin kan hmu hma tihna a lo ni a. Entirnan :Kohima-ah 4 a.m.-ah khua a var chuan Mumbai-ah 6 a.m vel bawrah kawl a eng dawn tihna a lo ni a, darkar 2 vel zet zawt in kan inthlau, heti chung hian India ram hian Sana khat, hunbi khat. (single time zone) ram pumah kan la hmang reng. Kan ni tin hun hman dan Chaw ei hun, Hnathawh hun darkar, mut hun zawng zawng hmun dang nen inang tho a kan kal avangin North east lam hi kan tlai phah bik ta vek mai a, he hun chuang hlu tak darkar 2 bawr vel hi ni tin maia kan paih tlingkhawm hi kum khatah chuan kawng tin renga hnufumna tham a ni, India hmarchhak state tan hi chuan.

Hman ata tawh tun thlengin India hmarchak hi mahnia inmual vawm hran duh avanga hel tamna la ni reng a ni a, N.E. tan inlakhran leh zualna (alienation) thlentu a ni thei ang a, hei ringawt pawh hi Central sorkar tana siam ngam awm lohna tur a nih hmel. Tin, Productivity hi ni eng (sunlight) neih belhah a innghat em? Rilru leh kan work culture zawk hi a ni em tih te pawh ngaihtuah tel a pawimawh awm e. Chuvang chuan tun dinhmunah Mizoramin hma kan nan kan NE state dang emaw sorkar laipui te pui leh pun lova kan tih nghal theih tur thil eng nge ni ang? Kan hnathawh hun leh thawh dan phung thlak hi a ni thei mai ang em? Pisa tan hma leh ban hma emaw, naupang sikul tan hma leh ban hmate hi ti chhin ila, daylight saving pawh chawp leh chilhin a awm nghal ang a, mi dang tibuai lova state rem hre tak nihna a ni mai lo maw? Chuta tana tun sorkarin sikul tan hma an rel thlu pawh hi thenkhat tan chuan kan tih ngai miah loh a nih avangin a huphurhawm viau rih ang, an hriatthiampui awm rualin han tih chhin chu a that hmel viau. Thil dangah sorkarin sum leh pai tam tak sengin enchhinna leh programme dang a kalpui fo laiin sikul tan hma hi chu Sorkar sum heksakna awm miah lova zing thawhhma ringawt hmanga en chhin mai theih a nih avang hian ruahmanna tha tak a ni thei.

A nghawng tur: A tha zawngin sikul tan hma hian nghawng chhuah a nei nghal fur ang a, kan hman thiam phei chuan sikul chang ni lovin pisa kai hunte thleng pawh hian sawn a fuh zel zawk thei bawk.

Ram tam tak chuan DST an tih mai, Day light Saving Time hi an ngai pawimawh a, an sana darkar khat emaw aia tamin an herh hma a, a daih zai thei ang berin an ni eng hmuh chhun an hmang a, chu chuan thar chhuah a ti tam a, Ni lan laia hnathawh tam chuan kawlphetha (power) a save bawk a ni.

Kan thenawm mai Banglasdesh pawhin DST hi 19th June 2009 atangin ahmang tan a, a sana darkar khata her hmain (Bangladesh standard time), a mean Longitude 90 E ni si kha 105 E-ah a set tak avangin darkar 7 laiin GMT aiin a hma a, darkar 1½ laiin India aiin a hma ta thung a, chumi awmzia chu keini India hmarchhak aia ni eng darkar chanve vel laia hmu tlai zawk si kha keini zing 10 (IST)-ah Pisa kan kai chuan Bangladesh pa chuan darkar 1½ lai hna a lo thawk tawh tihna a nih chu.

Tuna sikul tan hma ringawt pawh hian a tha zawngin nghawng a nei ang a, zing naupang hruai taxi inhlawkna an hmu hma ang a, tiffin pai tur siamtu thingpui dawr thlengin inbuatsaih hmana tham a lo ni zel ang, chung chuan thil dang zuar te a nghawng zel ang a. Naupangin tlai lam hun thawl an neihte hi suahsual rawngbawl nan hmang mai turah kan ngai deuh thin, hmanlai pawhin sikul naupang hi nu leh paten an fehsan a, an sikul bang lo chiauan tur an awm chuang miah lo, an sual tak viau phei chu kan hre chuang lo. Tunlai khawvel changkang leh thiamna sangah phei chuan an ni tin sikul zirtirtu te leh an Sande sikul zirtirtute hian tlai lam hun thawl an hman tangkai dan turte an va ruahman thiam dawn em. Eizawnna zawng pawhin naupang chawhnu hun awl hmang thiam tak tak an lo chhuak ang a, kan sawisen loh leh tuna music zirna sikul emaw infiamna lam a coaching an kal piah lamah hian khawpui ah kher lo pawh mahni khawsakna hmun mil zelin a lo awm chho ang a, tuna suangtauh thiam mai lo thlengin tih tur leh hun awl hman thatna tur chu a lo piang zut zut mai ang.

Tlai lam hun hman daih zai kan thiam ang a, vantlang tana kan inhmanna hla zir, meeting, mitthi ral leh hnatlan hun thlengin a lo danglam ang a. Pisa kai hun sawn ni phei se chuan pisa hun chhunga Mitthi ral, mitthi vui leh inneih programme etc. zawng zawngte pawh min dawrtute tibuai lovin chawhnu lamah sawn a lo ni fur ang a. Kan sawisen loh leh tuna kan ngaihtuah theih mai piah lamah kan hun hman dan inthlak thlengin hmasawnna rahbi min tuksak thei. Hmasawn tur chuan tih dan phung leh kal dan ngai thlakthleng a tul chang a awm, chumi atan chuan mi tin inpuahchah a fuh awm e.

Facebooktwittergoogle_plusredditpinterestlinkedinmail

Sawhkhawk (Feb 22, 2015)

SAWHKHAWK of the day
Zu an thlah zalen ta, ‘Keimahah chuan a pawina engmah ka hre lo; mahse,’ tih tawngkam lo awm ve kher hian ngaihtuahna chu a va tithui si em! Bul an tan dek dek a, khuahkhirhna a tha khawp mai ti tawk kan awm nuk mai. Mahse, kawngpui kama awm ve lo, zu ina chhungkua a tihbuaite hi kan va la tam dawn si em! Kan sipaite hian ni tin leh zan tin veng kilkhawr tak takte kalin an dap reng thei dawn em ni le? Kawngpui sira buaina siam leh zu rui kal tuang tuangte mai chauh hi mi kan mana kan hrem dawn ni le? Zu ai chuan khawtlang ai chuan chhungkuaah buaina a thlen zawk lo em ni? Zu zawrh duh site chuan zu ruihte chu phal law law awm tak hi a nia. – Keimah Hlua Khiangte, Vengnuai pa

Engati nge Zalen chanchinbu hi sawiselna a tam tawh tehreng nen hawrawp chhut sual a la tam em em mai le? A thu awmzia bo thak khawpa chhut sual hi chhiar a tihrehawmin a timanhla lo zo vek. Chanchinbu dang pawh phek 8 lai ni tin a chhuak a, chhut sual a awm kan hre ngai lo. Sawiselna hi in chhiar liam ringawt a, insiam that phah nan in hmang lem lo chu a nih hi maw! Tan han la thar teh u khai! – 9436147753

Kan Minister chak leh zahawm tak Pu Lalsawta’n Bhavan-a a sawi dan kha chuan an motor thar leite kha an hman tur a lo ni reng reng hlei nem, official-ho hman vek tur alawm lo ni! Mizo politician-ho zingah chuan principle neia ka ngaih a lo ni thin a; mahse, tunah chuan a ni tawh lo. – 9832136235

NLUP sum central atanga kan hmuh dan leh a lo kal dan hre chiang duh chuan Pu Lalhmingliana, MNF MP hlui (Rajya Sabha) kha lo zawt mai rawh u. Parliament session-ah starch question NLUP sum kan neih dan hi a zawt a, DR Asuani Kumar, Finance, Science & Technology Minizster-in a zawhna chu ziakin a chhang a. Chu a chhannaah chuan chiang takin a hriat theih e. Mahni ngaihdan leh zeldin thu lo rakpui chiam chiam chi a ni lo. MPCC hian kan hai hauh lo. – 9856631588

NLFT hi Tripura sorkar laka hel awm tak si, engvanga Tripura sorkar laka pawi khawih ngam si lova Mizoram sorkar laka huangtau ngam viau nge an nih le?” tih hi zawhna lian tak a ni. Mi an kidnap a nih pawhin tlanna sum hi Tripura sorkar laka phut tur ni awm tak an nih laiin Mizoram sorkar laka an rawn phut teh daih thin hi hriat thiam a harsa, tu laka hel nge an nih ber le? – 8731002757

Kolasib damdawi ina thisen mamawhtu, a hun taka pek loh avanga nu pakhat a thih hnuah Health Minister zahawm takin thisen mamawhtu apiang, thisen sawngbawlna man nei lote pawh thisen pek tur thupek chhuah a nih thu a sawi hi a lawmawm hle laiin thisen sawngbawlna man Rs 550 lak tur thupek chhuah a nih lai khan a mamawhtu apiangten thisen an dawn theih tur thu hi sawi tel ni se, nun chân kan awm lo tur. Thusen sawngbawl man lak thuah hian Health Minister hian step a rap sual a ni deuh ber e. – Aizawl pa

Durtlangah chuan kum 2013 hmalam kha chuan mi sing chuangin motor pakhat tui chawi kan intawm thin kha a ni a. Tunah chuan tui connection te a awm ta a, a nei lote pawhin pip leak chawi tur an nei zel a, tuikang chuha tlaivar a ngai ta lko, a va lawmawm tak em! Hei lo liama goild of water hi a awm thei dawn em ni? – 8794495291

AMC sorkar inthlak kual sek hi zahthlak angin lang mah se thaah i ngai ang. Party hrang hrang worker-hovin contract hna an hmuh phah diat diat a, AMC hian ram hnuk tak tak pawh an khawih pawhin ka hriat loh bakah ram hmangaih tak tak an awm hmel lo bawk a, buai buai teh se. – Scholes L.S.Khawlhring

Hospital-ho paih ke bung chhar a ni, a mak khawp mai. A zahthlak a, a tenawm bawk si, inenkawl dan tenawm tak a ni. Sorkar mualphona tawp a ni. Mawhphurtute hi tan tawh lovin hrem ngei ni se. – Lalsangliana, College Veng

Chanchinbu pakhat, Feb. 7, 2015-a chhuaka mi, ‘Ui a awm, fimkhur rawh – J.Lalramnghaka (Jeru-a)’ ziak kha a tha hle mai. Kan vengah hian ui vulh an tam si a, kawtlaiah an e a, naupangin an hlau va, dawra thil lei tur pawhin an kal ngam lo va, a then chuan mi seh an hmang bawk a. Mi dangte tan harsatna nasa tak an thlen a ni tih ui vulhtute hian hria se, sawiseltute hi an la haw lehnghal a, mi sawisel hawtu chuan thlung sela, tha takin enkawl rawh se. An uiin mi a sehin a enkawlna an pe hreh leh hle si a. Kan chhungkaw zinga mi han seh teh se, ka ngaidam lo vang. – Ui vulh duh lova, Khatla

Uirena, tualthahna, rukrukna,?zu ruihna etc. te hi kan chenna khawvelah hian kan Pathian hian awm ve turin rem a ti a, awm ve tur an ni, zu pawh. Heng tihrem tum hi engtikah mah a hlawhtling lo vang. Ringtute chuan heng thilte hi kan pumpelh mai tur a ni, chu chu kan rin Pathian duh dan a ni e. Zu khap duh leh duh lo inhnialnaah Pathian thu tanchhanah hman phet i tum tawh lo ang u!! – Teacher

He Mizoram, Kristian rama Kohhran Pathian khawpuia roreltute leh hruaitute hian tisa thil takin nge ro an rel thina thlarau lam thil takin? Tisa thiltihte thlarauvin an tihlum zo ta lo em ni, beramte dan ang chauhva kan inkhawm tak le? Thenkhat phei chu dan ang pawhin kan inkhawm peih tak loh le, berampute nge mawhphur ta le beramte? Kan inpuhtawn vel mai mai dawn em ni le? – Tea, Azl.

Mizote hian kan rin thuhmun ti siin Kohhran hrang hrang, thurin hrang vek nei kan ni a. Mahni Kohhran lo phei chu van kai lo turah kan inruat hlawm a nih hi. Meh, hei hi i hria ang u: Rorelpui hunah chuan lalpa hmaah kohhran kan sawi dawn lo. – 8413061091

Sorkar hian a leibate hi kum tharah a pek a ngaih hmel a, chuti a nih chuan budget tharah chuan a bain kal a ngai ang a, chutiang zel chuan a inkahpupchaw zut tawh mai hmel a ni e. – 9774354495

Krista chanchin tha hi Zoramah ngat phei chuan kan sawi nasain kan hre tam hle a ni a tih theih awm e, chu lo pawh nise in tin deuhthawhah Bible kan la nei thei zel bawk a. Chutichung pawha sual lam kawng la zawh zel duh i nih chuan tihluhlula awm te, tha duh hauh lo kan tih te tihna a ni a. Hre reng chunga zawm duh lote baka awih lo fa an awm chuang lo.Sam 37-na hi kan chhuang hle a ni, thil tha lo titute avangin kan intilungngai dawn reng reng lo. – Hruaitea

Facebooktwittergoogle_plusredditpinterestlinkedinmail

Valentines pualin thisen pe; Kum 6 chhungin unit 3217

Aizawl; Nimin Hmangaihte Ni (Valentines Day) pualin a thlawna thisen pek runpui chu Govt. Mizo High School Hall leh Mizoram hmun dangah te neih a ni a. Kum 6 kalta (2010 atanga 2015) inkar khan Valentines Day pual hian thisen unit 3217 pek a ni.

Nimin Aizawla thisen pek runpui ‘Blood for your Valentine’ hmanna hi Dr. Lalmalsawmi Sailo, Project Director MSACS chuan a kaihruai a, khuallian Parliamentary Secretary Joseph Lalhimpuia chuan thalai mi eng emaw zat sual kawng zawha tlan an awm laia mi tam tak midangte tana thisen pe tura an pungkhawm thei chu lawmawm a tih thu leh intihhmuh zel chi nia a hriat thu a sawi. Khuallian chuan Mizoram chu India rama state fai ber ni turin hmalak mek a ni tih sawiin sawrkar leh tute emaw tih tura dah mai lova, mi tupawh tan la theuh turin an sawm tih a sawi bawk.

Association for Voluntary Blood Donation General Secretary, C.Lalnunnema report tarlan danin nimin Valentines day pualin Aizawl, Lunglei, Saiha leh Serchhipah te thisen pek runpui hi neih a ni a, a vaiin unit 598 lak a ni. Thisen hi Aizawlah unit 418, Lungleiah 116, Saihaah 48 leh Serchhipah 17 lak a ni.

Valentines Day pual hian kum 2010-ah thisen unit 146, 2011-ah unit 350, 2012-ah unit 425, 2013-ah unit 757 leh 2014-ah unit 940 te pek a ni.

Facebooktwittergoogle_plusredditpinterestlinkedinmail

CM-in Dept t data dik lo ngaimawh

Aizawl: Mizoram sawrkar department ten statistic an thehluhah dik lo tam tak a awm avangin Central atanga sum lo kal tam lam a nghawng theih thu leh sum harsatna siamtu pakhat a nih thu tun kara Mizoram State Planning Board thutkhawmah Chief Minister, Lal Thanhawla chuan a sawi a, hmalak a tul chuan tih mai tha tih chang a awm thin niin a sawi.

Finance Minister Lalsawta pawhin data uluk lohin nghawng chhe tak a neih thu a sawi bawk a, “Mi nun a chhiat vek phah thei a ni,” a ti.
“Department thenkhatin data an namnul thin avangin a kum leh funding a chhe zawng-in nghawng a, statistic leh data tlawhchhana fund chhut a ni thin a, Planning Board ruahmanna siam chu awmze nei lovah a chang thei a ni,” tiin CM chuan a sawi bawk Sawrkarin sum harsatna a tawh sutkian nan MP Fund kum tina Nuai 500 awm chu tangkai zawka sawrkarin hman a tum thu leh rawtna sawrkarin a pawm reng thu CM chuan a sawi bawk a. NITI Ayog hawnnaa tel thu sawiin Central sawr-kar chuan state te chu hmasawnnaah a ruala thantir a tum thu bakah, “Prime Minister chuan sum, thiamna leh hriatna a puih a tum a, state tam tak suma harsatna tawk mekte chu nakum lamah chuan zia lam an pan beisei a ni,” a ti bawk.

Sawrkarin plan a siamin civil society chu a tam thei ang ber tel tir sawrkarin a tum thu a sawi a, chhunzawm zel tha tiin sawrkar chu venpui turin mipui a sawm a bawk. Work culture chhhe tawh siamthat kawngah harsa a tih thu sawiin beidawng thiang lo an nih thu leh kalpui zel a nih tur thu CM chuan a sawi bawk a ni.

Facebooktwittergoogle_plusredditpinterestlinkedinmail

Tun karah lei peih tum

Aizawl; Sihhmui leh Lengpui inkar, National Highway 44-A-a Tlawng lei dawh that hna chu tunkar hian peih hman tum a ni.

Tun dinhmun ah hna hi 85% zo tawh anga ngaih a ni. PWD hotute hnen atanga thudawn danin tluang taka hnathawh theih anih chuan tunkar tawpah hian lirthei chi tin kal theih turin lei hi peih hman tum a ni a, hna hi chhun zan zawmin an thawk a ni.

Tlawng lei hi October ni 31,2014 khan a chim a, dawh that anih mek laiin December ni 8 khan a chim nawn leh a, hemi hnu hian lei chim chu kah buna, a dawhna hmanraw thalai lak khawm a ni a, a hmanrua hi a tam tawk loh avangin Kolkata-a Garden Reach Ship Builders & Engineers Ltd. atang-in cheng nuai 11 chuang man chah belh a ni a, hengte hmang hian ngawrh takin hna hi thawh tan nghal a ni.

Facebooktwittergoogle_plusredditpinterestlinkedinmail

NLUP – Dept head koH khawm tum

Aizawl: Sawrkar flagship policy a hlawhtlin theihna tur chuan Department hruaitute inkarah inpawhna leh thawhhona (coordination) a pawi-mawh ber a tih thu Lal Thanhawla Chief Minister chuan a sawi.

“Department hotute chu kohkhawma sawipui kan tum a ni,” tiin Mizoram State Planning Board meeting tun kara neihah a sawi a. Thawhhona tha a awm tawk loh thute leh a ngaihmawh thu sawi chhuakin ‘beidawng thiang an ni lo’ a ti.

NLUP leh sawr-kar programme a hlawhtlin theihna turin coordination tha sawrkar department hotute inkara a awm pawimawh tih a sawi a, “NLUP a kal that chuan a aia tam sum hnar a awm zel a, Ratan Tata Trust atangin Nuai 200 hmuh tur awmin hnathawh that dan azirin sum hnar a awm zel thei,” tiin PL Thanga, Member Secretary chuan meeting-ah a sawi bawk.

Facebooktwittergoogle_plusredditpinterestlinkedinmail

Login

Lost your password?