Monthly Archives: February 2015

MHIP-in Hawla chawimawi

Aizawl; Nimin khan MHIP Sub Hqrs. Champhai chuan Venglai Community Hall-ah Chief Minister Lal Thanhawla chawimawina hun an hmang a, he huna thu sawitu CM Hawla chuan, “Mizo inneih leh inthen thulha hmeichhia te tana chanvo siam hi hmeichhiate tan mai nilo, kan zavaia tana hamthatna tur leh nakin hun lokal zel tur thleng kan tangkaipui tur a ni,” a ti.

Chief Minister chuan MHIP ten amah an chawimawi chu dan siamtu MLA mithiam rual te an chawimawi tih a sawi a. “Dan hi dik taka hman chuan ram leh hnam chawikangtu pawimawh tak a ni a. Dan hi kan hamthatna tur bakah kan him tlanna tur a ni a, dik taka hman kan tum tur a ni,” a ti bawk. MHIP Sub Hqrs Champhai hian CM nupui Lal Riliani, President, ISTH,Mizoram Chapter pawh Mizote hriselna ngaipawimawha, hriselna tichhe theitu zuk leh hmuam dona kum 25 chuang a lokal pui tawhna ah chawimawi tlak tiin, vakiria khim tirin tawlhloh puan an bih tir bawk.

MHIP Sub Hqrs. Champhai te hian sorkarin Mizo hmeichhiate dinhmun chawikang a, inneih leh inthen chungchanga hmeichhia ten ro an khawm ve theihna tur chanvo siam sak a ‘The Mizo Marriage and Divorce Act, 2014’ Legislative Assembly a an passed avangin lawmthu sawinan Chief Minister hi chawimawina thuziak (citation), ipte chei leh thangchhuah diar an hlan a ni.

Chawimawina inkhawm hi MHIP Sub Hqrs Champhai President V.L.Rochhari’n a kaihruai a. Chief Minister hi Lalrinmawia Ralte, Minister of State, T.T.Zothansanga, Parliamentary Secretary, R.Vanlalvena, MLA leh T.Sangkunga, MLA & Chairman, Mizoram Youth Commission ten an tawiawm a ni.

Facebooktwittergoogle_plusredditpinterestlinkedinmail

Scho theihnghilh vang

Union Tribal Affairs Ministry-a Secretary ni lai Dr. Hrusikesh Panda chuan Mizote tan project tha a awm a nih phawt chuan tihhlawhtlin a inpeih reng thu ZALEN palaiin a kawmnaah a sawi a. “Eng hna pawh nise hnathawh hi a sang leh hniam a awm lo a, mahni inchawm zo nih a pawimawh ber,” tiin Mizo thalaite chu taima turin a chah tih a sawi bawk.

Ni 3 cham tura lo zin Panda chuan zirlai scholarship Central sawrkarin za a za (100%) a tum loh chhan ZALEN zawhna chhangin a sawifiah a, state dangah chuan 75:25 kalpui a nih laiin Hmarchhak state tan 90:10 ni turin kum hmasa lam khan hman tan tawh tura duan a nih daih tawh thu a sawi a. “Policy inthlak thil a ni a, kum hmasa lama hman tawh tur a nih laiin theihnghilh palh vang chauhin a hnuhnung berah Central chuan 100% a la tum chauh zawk a ni,” tiin kan palai a hrilh a ni.

Project tha a awm chuan Tribal Affairs ministry in a tihlawhtling thei reng niin a sawi a, “Mahnia project tha ngaihtuah chhuah a pawimawh a ni,” a ti bawk.

Intodelh tum bur chu Mizoram tana tha ber nia a hriat thu sawiin “Thawnchhuah tham law lawa thlai leh sangha hi thar theih a ni a; kum khat daih chauh niloin sangha vulh leh tihpun dan kimchang kuthnthawktute chu zirtir an nih chuan thawnchhuah tham tharchhuah theih a ni,” a ti a. Thalai te’n hetiang hi an tih hunah chuan khawtlang tibuaitu ruihhlo pawh a rem phah a rin thu a sawi bawk.

Tehkhinthuah Punjab state hmangin buhfai thar chhuak hnem ber ni thin chu an thalaite’n hna zahawmlo niin an ngai tlat a, tunah chuan an tlakchhiat phah niin Panda chuan ZALEN a hrilh a bawk a ni.

“India ramin sum leh paiah harsatna a tawk fo thin a, 1996 leh 2004 inkar chhung zawng khan inremchen thu tbhupuiah neiin zia lam a pan theih chauh a ni,” a ti a. Panda chuan VC/LC ah pawh hmeichhia tam zawk awm thei sela thil tam tak a inthlak a rin thu a sawi a ni.

Facebooktwittergoogle_plusredditpinterestlinkedinmail

Ziak leh chhiarah hmeichhia aiin mipa an tam zawk

Aizawl; Mizoram mipui zingah hmeichhia aiin mipa lehkhathiam (ziak leh chhiar thiam) an tam zawk a, chawhrualin Mizoram mipui 91.33% chu ziak leh chhiar thiam angaih an ni.

StatisticalHandbook Mizoram, 2014 tarlan danin Mizoram a hmeichhia 89.27% chu ziak leh chhiar thiam an ni a, mipa zinga 93.35% chu ziak leh chhiar thiam an ni bawk. District zingah Serchhip chu ziak leh chhiar thiam tamna ber niin 97.91% in an thiam a,Aizawl district chu a dawttu a ni bawk a. Lawngtlai District chu a tlemna ber niin 65.88% chauh ziak leh chhiar thiam nia chhut a niin Mamit district chu a tlem ber dawttu a ni bawk. Chhinchhiahna tarlan danin kum 6 chin chunglam mihring 8,48,175 ziak leh chhiar thiam zinga 4,38,529 chu mipa an ni a, 4,09,646 chu hmeichhia an ni thung.

Zalen thudawn danin Lawngtlai leh Mamit district a ziak leh chhiar thiam an tlem chhan hi hnam thenkhat pem kual thin an awm avang te, inkalpawhna a that tawkloh vang leh lehkha zir ngaihsak tawkloh vangtea ni bawk.

Facebooktwittergoogle_plusredditpinterestlinkedinmail

Police training 662 pe tawh

Aizawl; Chhiatrupna lo thlen thulha chhanchhuahna hnathawk turin police 662 bakah YMA 52 hnenah training pek an ni tawh tih DM&R Minister C.Ngunlianchunga chuan a sawi.

Zirtawpni khan Disaster Management & Rehabilitation Minister hian ni 5 awh Disaster Management training, ATI Conference Hall ah a neih a kharna ah he thu hi sawiin training chhuak te chu an thil zir chhuah te theihnghilh lova a tulna apiangah hmang tangkai a, anmahni theihna ang tawka inzir belh zel turin a chah a. State pawnah kal chhuakin training mumal zawk an neih theihna turin sorkar chuan hma a la mek tih a sawi bawk.

Tun tum training a tel te hi Ist Battalion MAP, 2nd Battalion MAP, 3rd Battalion MAP, Ist IR Battalion, 2nd IR Battalion, 4th IR Battalion leh 5th IR Battalion atangin police officer 41 leh District Organizer 4, an vaiin mi 45 an ni. Kharna inkhawm hi ATI Director Ramdinliani’n a kaihruai a, ATI Head Faculty Dr. Lalrokima Chenkual leh trainees aiawh mi pahnih te’n thu an sawi a ni.

Facebooktwittergoogle_plusredditpinterestlinkedinmail

Lirthei 30,000 chuang Pollution board in endik

Aizawl; Mizoram Pollution Control Board chuan November thla tawp thleng khan lirthei 30685 te chu Pollution Under Control test a neihsak tawh a, heng zinga 24126 hi Aizawl khawpui chhung amite a niin a dang 6559 hi district dang a mi an ni.

Mizoram Pollution Control Board thawktute hnen atanga thudawn danin lirthei test te hian a tlangpuiin PUC hi an paltlang a, paltlang zolo te hi a tlangpuiin lirthei hlui tawh an ni a. Heng mite hi an lirthei siamthat nan ni 7 chhung hun pek an ni a, an siamthat hnua tling leh an tam a. Atlangpuiin test paltlang zolo te hi oil vang ni lovin carburator thalo a ni tlangpui tih an sawi bawk. Aizawl khawpui bika test zingah hian passed 23457 an awm laiin test paltlang zolo 669 an awm bawk a, a percentage a chhutin fail hi 2.77% chauh a niin MPCB chuan a ti.

MPCB hian PUC Certificate test nan hian two wheeler ah Rs. 50, 3 wheeler ah Rs. 70, LMV ah Rs. 100, MMV ah Rs. 120 leh HMV ah Rs. 150 te a la thin a. November thla tawp thleng khan an test na atang hian Rs. 3,19,125.00 chu sawrkar ah revenue an chhunglut tawh. MPCB hian Aizawl khawpui hmun 4 Ngaizel, Bawngkawn, Zemabawk, Secreta- riat Complex ah te test na hmun an nei a, an office Tuikhuahtlang ah two wheeler tan a test theih bawk a ni.

PUCC test hi Aizawl ah January 2013 atangin neih tan a ni a, kumin October thla atangin Saiha, Lawngtlai, Lunglei leh Serchhip ah te bultan leh a ni a. November atangin MAmit leh Champhai ah bultanin December thla tir atang khan Kolasib ah bultan leh a ni bawk.

Facebooktwittergoogle_plusredditpinterestlinkedinmail

Nauban hmanna tur hre lo

Aizawl; Mizoram Nauban te chu mi thenkhat ten la in khawchhak lamah an hralh thin a, heng nauban te hi eng atan nge an hman tih an hriat bik loh thu Environment & Forests Department thawktute chuan Zalen an hrilh.

Environment & Forests Department a nauban lam enkawltu (Orchidologist) Chawngthantluanga chuan Wildlife Protection Act hnuaiah nauban te chu humhalh tlat an ni tih sawiin thu awihlo a la lui te chu man a chawitir bakah lungin tan thlengin hrem theih an ni a ti a. Nauban chu eng atana hman nge anih an hriat leh rhiat loh zawhna chhangin, “An hmanna tak hi kan hre bik lo a, nauban latute ngei pawhin damdawi emaw thildanga an hman leh hman loh an hre bik lo a, man to zawka an hralh theih vangin an la mai niin an sawi a ni,”a ti.

Tunhnai mai khan Khawzawl Group YMA hruaitute leh Khawzawl Forest Department Staff te chuan nauban kgs 65 an man a. Sangau YLA te pawhin Phawngpui tlanga nauban latu khawchhak lam mi an man bawk a ni. Thudawn danin nauban te hi khawchhak lamah an hralh thin.

Facebooktwittergoogle_plusredditpinterestlinkedinmail

In kang

Zirtawp tlai dar 3:30 vel khan Khawlailung Bunghmun veng a Laltanpuia in Assm Type chu bungrua engmah chuh hman lohin a kangral vek a, in kan lai hian tumah in ah an awm lo a, a kan chhan pawh hi hriat a ni lo.

Facebooktwittergoogle_plusredditpinterestlinkedinmail

704 pui

Nikum 2014 chhunga Civil Hospital Aizawl a damlo harsa zualte tanpuina Poor fund) atana sum thawh tlingkhawm chu Rs. 9,18,564 a tling a, he sum hmang hian damlo harsa zual vawi 704 an ni. Civil Hospital Medical Superintendent chuan mi inphalte sum thawh avang hian mi tam takin damna an chang nia sawiin sum thawhtu zawng zawng chungah lawmthu an sawi a. Hei bakah hian thisen petute eitur leinan mi inphal ten Rs.43,970 an pe tih a sawi bawk.

Facebooktwittergoogle_plusredditpinterestlinkedinmail

Officer kaisang

Dr. Lalrozama IAS tuna ATI Director hna chelh mek chu Special Secretary, Land Revenue & Settlement leh DM&R hna chelh tura tih a ni a. MCS Officer R.Lalramnghaka leh Lalzirmawia Chhangte te chu MCS Supertimegrade’B’ ah an kaisang a, R.Lalramnghaka hian a hna pangngai Director, Land Revenue & Settlement a chelh ang a, Sports & Youth Services Director Lalzirmawia Chhangte chu Addl. Secretary School Education ah a awm ang. ATI Joint Director Ramdinliani chu selection grade ah kaisangin Director ATI hna a chelh ang.

Facebooktwittergoogle_plusredditpinterestlinkedinmail

CM zin

Chief Minister Lal Thanhawla te nupa chu Champhai-ah an a zin mek a, ruahman dan chuan naktuk hian a lo haw ang.

Facebooktwittergoogle_plusredditpinterestlinkedinmail

Login

Lost your password?