Monthly Archives: March 2015

HPC (D) ten 3 kap hlum; 6 AN hliam

Aizawl: Nimin zing dar 9 vel khan Mizoram Legislative Assembly hnuaia Committee peng pakhat Assurance Committee member MLA pathum RL Pianmawia, Lalthanliana leh Vanlalawmpuii Chawngthu te chu Tuiruang lui bul, Tinghmun leh Zokhawthiang inkarah HPC(D) nia hriat ten silai hmangin an lo lambun a, mi 3 thiin hliam 6 an awm bawk.

Zalen thudawn danin MLA 3 te hi Sub Centre endik tura kal an ni a, Tuiruang lui kamah hian HPC(D) nia hriatte hian lo kapin anmahni vengtu Sakawrdai OC, SI Zoramthara Khawlhring, Driver Lalchuailova MRP leh Hmangaihmawia MAP te chu a hmunah an thi nghal a, Zarzoliana MPS, SDPO Sakawrdai, Hav.Vanthuama, Constable Lalhmangaiha, Constable Lalkhawngaiha, Lalchhuanawma Driver leh Zohmingthanga ten hliam an tuar bawk. Hliamte hi nimin tlai khan helicopter hmangin Aizawlah phurh thlen an ni a, thite hi motor hmanga Aizawl panpui niin vawiin zing dar 8 hian sawrkar chawimawi-na famkim nen 1st Bn. MAP hmunpui, Armed Vengah vui an ni ang.

Mizoram sawrkar chuan thu-chhuah siamin Assembly Assurances Committee member, ram hmasawnna atana ruahmanna en tura kal HPC (D) nia hriatten an lo lambun a, anmahni vengtu Police 3 lai kaphluma mi 6 lai an hliam chu a dem tak zet a. Sawrkarin inbe rem tura theihtawpa hma a lak laia hetianga tharum thawh a ni hi a demawm chauh ni lovin, a huatthlala tak zet a. Mizoram rorelna sang ber Assembly Session hnuhnung berah “Zofate inpumkhatna daltu chu engmah tih ni lo rawh se” tih lungrual taka pass a nih laia hetiang tualthahna kan ram chhung ngeiah a thleng hi pawi a ti tak zet a, pawi khawi-tute hi Mizote leh Mizoram hmelmate an ni a, sorkarin a dim lo vang, a ti. Mitthi chhungte sorkarin a tuarpui tak zet tih sawiin zangnadawnna pangngai bakah chhawmdawlna awm thei ang ang sorkarin a ngaihtuahsak dawn tih a sawi a. Hliam tuarte pawh an that leh thuai a beisei a, hliamte inenkawlna tur pawh sorkarin a ngaihtuahsak zel tih sawrkar thuchhuah chuan a sawi bawk.

INKAP HLUM- ENGNGE AN SAWI
Nimin thilthleng chungchangah hian University zirlai pakhat chuan, “Tharum hian engmah a sawifel theih loh a, chu a chhapah hmeichhe MLA kan neih chhun pawh an thliarlo hi chu HPC ka dem khawp mai,” a ti. Aizawl chhimlama cheng dawrkai pakhat chuan HPC leh sawrkar inkar politics chu a nin thu sawiin tun tum chu sawrkar thiamloh a ni tiin, “Sawrkarin a inhrosak khum lutuk a, chumi rah chu ni ah ka ngai a ni,” a ti a. Sawrkar a chet loh chuan mipuiin an dem a rin thu a sawi bawk.

Congress Thalai (MPYCC) pawhin Assembly Assuarance Committee te chunga thilthleng chu an dem tak zet tih an sawi a.Remna leh muanna hnuaia Mizoram sawrkarin chak taka hmasawnna a kalpui mek tihbuai tuma silai nena MLA te lambun an ni hi hmasawnna kallai tihthuanawp duhna leh remna leh muanna tihchhiat duhnaah MPYCC chuan a ngai a ni, an ti bawk.

Facebooktwittergoogle_plusredditpinterestlinkedinmail

T. SAILO VUI LIAM

Aizawl: Lung tha lo vanga Zirtawpni kaltaa thi Chief Minister hlui Brig. T.Sailo chu nimin khan ropui takin vuiliam a ni.

Brig. T.Sailo vuina inkhawmah hian Mizoram sawrkar aiawhin Chief Secretary Lalmalsawma chuan thlahna thuchah a sawi a. Hei bakah hian rorel lai Congress aiawhin Home Minister R.Lalzirliana, MNF President Zoramthanga, ZNP President Lalduhoma, MPC aiawhin Dr. Kenneth Chawngliana leh FLAM aiawh KL Rochama ten thu an sawi a. Hemi hnu chhun dar 12-ah bialtu Pastor Lalsangbera chuan thlamuanna thuchah sawiin, a nupui Pi Thansiami leh a fapa Pu Lalsangliana Sailo ten chhungkaw aiawhin thu an sawi a, hemi hnu hian an chenna in kawtah phum a ni.

Mizoram sorkar chuan Brig. T. Sailo hi ni 3 chhung (March ni 28 thleng) sun an nih tur thu a puang a, hemi chhung hian hnam puanzar chu a ngul chanvea zar a ni ang a, intihhlimna lam hawi eng programme mah buatsaih a ni dawn lo bawk.

Prime Minister Narendra Modi chuan Chief Minister hlui Brig. T.Sailo thi chu a ui thu a sawi. Thuchhuah a siamah Prime Minister chuan Mizoram tana Brig. T.Sailo hnathawh leh mipui tana thil tha a lo tih tawh te chu hriat reng a nih tur thu a sawi a, a kalsan tak a nupui leh a tu leh fate chu a tawrhpui tak zet tih a sawi.

Facebooktwittergoogle_plusredditpinterestlinkedinmail

SIKUL CALENDER THAR KHAUH; Zawmlote-ah action lak tum

Aizawl: Mizoram sawrkarin school calender thar a siam chu zawm anih leh nih loh enfiah a ni dawn a, zawm lo school te chu an permission suspend leh withdraw thlenga hmalak tum a nih thu School Education Department thuneitute chuan an sawi.

Nimin Aizawl Press Club-a chanchinbumite an kawmnaah Education department hotute chuan academic session thar 2015–2016 atana school tan hun April ni 1 chu zawm vek turin school zawng zawng an hriattir tih an sawi a. Session tharah chuan zing dar 8-ah sikul tanin Primary chu chawhnu dar 1-ah an bang ang a, Middle School chin dar 2-ah an bang ang a, Secondary leh Higher Secondary School te 2:30-ah bantir an ni ang. School timing sawn hma chuan thalaite zingah hun hman tangkai kawngah nasa taka a puih an beisei tih an sawi a. “Kan ramah ni a chhuah hma avang-in ni eng kan hmang tangkai rei thei ang a, hnathawh hun chhung a rei ang a, thawhchhuah a pung ang a. School banah zirlaiten hun thawl an ngah zawk ang a, infiamna leh thil tha hrang hrang zirna hun an ngah zawkin, nu leh pate an tanpui tam thei ang a. Zirlai thenkhat remedial teaching/tui-tion mamawh tan en laiin an ti thei ang a, naupang him nan a tha zawk dawn a ni,” an ti a. Zirlaiten harsatna an tawh loh nan City Bus Owner leh Transport dept. lam pawhin hma an la dawn tih an sawi.

Fee chung-changah pawh rualkhai taka tih anih theihnan an bithliah tih Education hotute chuan an sawi a. Academic session thar 2015-16 atana sawrkarin syllabus leh text book a siam chu school zawng zawngten an hmang tur a ni tiin sawrkar duan bak belh phal a ni lo tih an sawi.

Zawhna chhangin session thar atang chuan Class I&II, Mizo leh English medium ah zirlaibu 3- English, Mizo leh Maths chiah subject a awm dawn a. Class IV&V ah chuan Mizo medium ah English, Mizo, Maths leh EVS te an zir ang a, English medium-ah English, Mizo, Maths, EVS bakah Hindi subject chauh an zir dawn tih an sawi a. Session khat chhunga zir hun tur chu darkar 1200 tal a ni tur niin an sawi bawk.

Facebooktwittergoogle_plusredditpinterestlinkedinmail

Civil Hospital tihchangtlunna PATEA’N ACH LUNG PHUM

Aizawl: Nimin zing khan Health Minister Lal Thanzara chuan Aizawl Civil Hospital tihchangtlunna tur zinga pakhat Semi Private Room Block leh General Ward sakna tur lung a phum.

Health Minister chuan Civil Hospital hnuaia department hrang hrangte Falkawn lama sawn phei an ni mek chungin Civil Hospital chu a tul anga thuam changtlun zel a nih thu a sawi a. Trauma Centre leh quarters sakna turte pawh sum awm vek tawhin kumin chhunga bultan tum a nih tur thu te, Falkawn-a Medical College dinna turah seat 100 siam tur leh hostel seat 100 siam turin chak taka hma lak mek a nih thu te a sawi bawk.

Semi Private Room Block & General Ward hi cabin bulah sak tur niin general ward, cabin, consultation room, library/seminar room, autoclave room, CT Scan, motor parking etc te dah tura ruahman a ni a. A building thut-hmun 298.50 sq. mtrs ah chhawng 5-a sak tur a ni a, sum sen tura rua-hman chu Rs 7,54,-60,000/- niin contractor chu R.Sangkhuma a ni a, thla 18 chhunga sak zawh tur a ni.

Facebooktwittergoogle_plusredditpinterestlinkedinmail

MZP-in NIOS chhui turin FIR thehluh tum

Aizawl: Mizo Zirlai Pawl (MZP) chuan Mizorama National Institute of Open Schooling (NIOS) te chhuichiang turin naktuk hian Aizawl Police Station-ah FIR thehluh an tum.

Nimin khan Aizawl Press Club-ah chanchinbumite kawmin MZP hruaitute chuan Mizorama NIOS kalpui zingah diklo taka thil ti thin leh zirlaite hnena sum laksak thin an awm thin tih an sawi a.School thenkhatin thahnemngai taka zirna an kalpui laiin, Southern Higher Secondary School, Sikulpuikawn chuan zirlaite hnen atanga zirna senso tam tham tak an laksak hnuah Marksheet lem siamin Result nei miah lo hnenah Result lem leh document lem an pe chhuak tih an sawi a. Zirlaite buma result dik lo siam ching Southern Higher Secondary School (AI No. 300018) chu khar nghal turin thuneitute an phut thu leh zirlaite senso zawng zawng pawh rul leh vek turin an phut tih an sawi.

MZP chuan Southern Higher Secondary School in result lem a siamsak hi hriat chian theih chinah mi 28 an ni tih sawiin zirlaite hi admission fee, exam fee leh tul dang atan School thuneitute hian Rs.5000/- zel laksak in, zirlai thenkhat phei chuan Rs.5000/- an pek bakah exam fee Rs.1500/- tum hnih ngawt an chawitir tih an sawi bawk a. School thuneitu thenkhat chuan exam laiin a chhanna dik SMS hmanga hrilh an nih tur thu sawiin, zirlai tha-hnem tak hnenah SMS man tur Rs.500/- zel an laksak tih an sawi a. Open School dangte kalphung ah pawh thil fel tawklo a awm theih avangin MZP chuan a tul anga chhuichian zel a tum tih an sawi bawk. Southern HSS hian marksheet hlui thenkhat chu computer-ah siam danglamin an duh zat zat mark an pe a, marksheet bakah provisional leh migration certificate pawh an siam niin MZP chuan an sawi bawk.

Facebooktwittergoogle_plusredditpinterestlinkedinmail

APEX Bank in locker hmang tan

Aizawl: Mizoram Cooperative Apex Bank chuan Zirtawpni khan Bank Safe Deposit Locker hmasa ber chu main branch Teasury Square-ah an hawng.

MC Apex Bank Safe Deposit locker thar hi Apex Bank Chairman T. Lalmuanpuii chuan a hawng a, Safe Deposit Locker chu mipui ten tangkai taka an hman ngei a beisei thu sawiin, Mizo ten document pawimawh leh thil pawimawh dangte dah that na chang hriat tawk loh avanga harsatna awm thin chu safe deposit locker avang hian a reh a rin thu a sawi.

Apex Bank-in Safe deposit Locker an hawn thar tak ah hian thil hlu dah a nih hun ah Locker hmangtu te’n Locker-a an thil hlu an dah fel veleh Safe Deposit Locker chu kalhin, chahbi an kawl nghal dwn a, an remtihna chauha hawn theih a ni dawn a ni. Safe Deposit Locker-ah hian ro leh thil hlu a dah theih dawn a ni.

Apex bank hotute chuan, Safe deposit Locker thar chu Document, in hmun lo ram pass, LSC, thurochhiah leh lehkha pawimawh hrang hrang bakah bungraw hlui, incheina rangkachak leh lunghlu in lama kawla him lo te him taka dahna atana hman tura ruahhman a nih thu an sawi.

Safe deposit Locker hi State Bank of India, Dawrpui Branch chuan an lo nei tawh a, tuna hawn thar tak Apex bank hi a pahnihna a ni.

Facebooktwittergoogle_plusredditpinterestlinkedinmail

Patea’n lei 2 hawng

Aizawl: Zirtawpni kalta khan PWD MInister Lal Thanzara chuan Chhingchhip-Hmuntha Road a Tuikum lei leh Chhingchhip-Thentlang Road a Tuikual lei a hawng.

Lei hawnna inkhawm Tuikum lei bula neih ah thu sawiin Lal Thanzara chuan intlawhpawhna kawng a awm mumal loh avanga Tuikum ral khua te ‘Nghawngkawl Area’ ti a sawi thin tihtawp a ni dawn ta chu lawmawm a tih thu leh Chhingchhip khaw mipuite inpekna fakawm a tih thu a sawi. Khualzahawm Er.Lalrinawma, bialtu MLA ni bawk pawhin Tuikum bial ten fur leh thalah pawh buaina tawk tawh lovin an thawhrimna rah, an thlai thar te leh thildang te hmunpui lamah an hralh ve reng thei tawh dawn a ni tiin bial chhung hmasawnna tur compensation phut miah lova mi inphalte hnenah lawm thu a sawi bawk a ni.

Tuikum leh Tuikual leihi NLCPR Scheme 2006-2007 a Ministry of DoNER in a sanction atanga thawh a ni a, heng hna pahnih te hi tender koh niin Mechfab Engineering Industries Pvt. Ltd., Guwahati hnenah pek a ni. Tuikum Lei Built-Up Girder Bridge hi metre 45 a sei niin a loading capacity chu 24 tonnes (IRC Class 24R) a ni a, November ni 21, 2007 khan lei sak hna hi thawh tan niin March ni 7, 2015 ah sak zawh a ni. Lei sakna work order hi Rs. 157.76 lakhs niin sak zawh anih thleng hian Rs. 83.49 lakhs (52.80 %) chauh hmuh a ni a, Contractor hian ama sum hman belh bakah sum remchang dang dapkhawmin lei hi a sak chhunzawm a ni. Tuikual lei Built-Up Girder Bridge hi metre 40 a sei niin Tuikum lei atanga metre 450 a hla, Thentlang kawnga Tuikual lui chungah sak a ni a, a loading capacity chu 24 tonnes (IRC Class 24R) a ni a, November ni 21, 2007 khan thawh tan niin October ni 18, 2014 ah sak zawh a ni. Lei sakna work order hi Rs. 184.62 lakhs niin sak zawh anih thleng hian Rs. 158.62 lakhs (85.90 %) chauh hmuh a ni a, Tuikum lei ang bawkin Contractor hian ama sum hman belh bakah sum remchang dapkhawmin a sa zo a ni.

Facebooktwittergoogle_plusredditpinterestlinkedinmail

Malaria do palai lo zin

Aizawl: Mizoram-a nunna tam tak lo suat tawh thin natna chi khat malaria damdawi hnimhnah chi khat Artemisia chu Mizoram hmun hrang hrangah chin darh tum a ni a, he hnimhnah chi khat hi malaria hrik paiin nitin no 4 zel a tui sawr an in chuan kar khat chhungin a dampui theih a ni.

Khawvel hmun hrang hrang Malaria vei tamna hmuna Hnimhnah chi khat Artemisi-a Malaraia umbo tum tu pawl Bye Bye Malaria Society chuan hnimhnah chikhat Artemisia hmangin Mizoram-ah malaria um bo theih ngei in ring in hma an la chho mek a, an pawl President Stuart Spani chu he thil buaipui hian Mizoram a cham mek a ni.

Stuart Spani chuan Mizoram-a Malaria hri awm chu 2016 November thla ah umbo theih a nih a rin thu a sawi a, malaria umbo nan hian hnimhnah chi khat Artemisia chu Darzo khuaah tun thla atang hian chin tan a nih tur thu kan palai a hrilh.

Stuart Spani chuan Artemisia chin darh tura a rawn ken chu Science thiamna hmanga tihdanglam tawh(Hybrid) anih avangin a chi chhuak leh chhawng chu a tih tlak loh avangin a kung peng phun darh chu a rawn kalpui dan anih thu a sawi a, Mizo te chu thingpui in hnam an nih avangin malaria pai apiangin he hnimhnah tui hi kha deuh mahse nitin no 4 zel an in chuan kar khat chhungin nghawng thalo dang thlen lova an dampui thin tur thu leh kum 2018 November thla ah chuan Mizoramah kung nuai 2 tal phun darha Malaria chu Mizoram atanga umbo theih a in beisei thu a sawi.
Bye Bye Malaria Society President chuan Artemisia chu sawifiahin hnimhnah chemical 242 pai a ni a,heng zingah hian Malaria do thei chemical 10 neiin,damlo 90% ten an dampui ngei ngei theihna anih avangin hmun tam tak leh ram rethei ten an thatpui hle nia sawi.

Facebooktwittergoogle_plusredditpinterestlinkedinmail

Kut thlirlet dawn

Naktuk chawhnu dar 1 hian Chief Minister Conference hall-ah Chapckar Kut Organising Committee an thukhawm dawn a, Chapchar Kut hman zawh tak an thlirlet ang.

Facebooktwittergoogle_plusredditpinterestlinkedinmail

Thu dawn

Assembly Committee peng pakhat Subordinate Legislation chu naktip March ni 31 chawhma 11 AM hian John Siamkunga hovin Assembly Committee room-ah an thukhawm dawn.

Facebooktwittergoogle_plusredditpinterestlinkedinmail

Login

Lost your password?