Monthly Archives: March 2015

Press Conf.

MPSC Chairman Andrew Lalherliana chuan naktuk chawhnu dar 1 hian a office ah Press mite a kawm dawn a, tunlaia mi thenkhat ten an puhna chungchang a sawifiah dawn nia hriat a ni.

Facebooktwittergoogle_plusredditpinterestlinkedinmail

Speaker zin

Assembly Speaker Hiphei chu meeting pawimawh hmangin New Delhi-ah a zin mek a, April ni 1-ah a lo haw ang.

Facebooktwittergoogle_plusredditpinterestlinkedinmail

Pawtsei

Mizoram sawrkar chuan Aizawl Municipal Council-a Chief Executive Officer hna chelh mek M. Zo-hmingthangi hna-thawh hun chhung chu thla 6 dang (30.9.2015) thleng atan a pawtsei.

Facebooktwittergoogle_plusredditpinterestlinkedinmail

Larsap ban

Mizoram Larsap Dr Aziz Quereshi chu sawrkar laipui chuan a ban a, West Bengal Governor Keshari Nath Tripathi chu a hna pangngai bakah Mizoram Governor hna hmui tura tih a ni.

Facebooktwittergoogle_plusredditpinterestlinkedinmail

ALC en dik

Bar Council of India a Inspection team te chuan nimin leh vawiin hian an hotupa Apurba Kumar Sharma hovin Mizoram Law College an enfiah a, Law College building thar tur, Luangmual ami pawh a hmunah kalin an enfiah bawk. BCI hian January ni 15,2004 pawh khan Aizawl Law College leh Liandingpuia Law College te an lo enfiah tawh a, an pawmna tello chuan Advocate a nih theihloh a ni.

Facebooktwittergoogle_plusredditpinterestlinkedinmail

HIV/AIDS do ngawrh tul

Health Minister Lal Thanzara chuan Assembly Session kal mekah Mizoram chu HIV/AIDS vei ngah ber dawttu (Pahnihna) niin a sawi a; HIV/AIDS a lo luhna a la rei lo ang hu a hetiang dinhmun kan rap ta mai hi a rapthlakin a thlamuan thlak loh hle a. HIV/AIDS do te; a laka invendan inhrilhhriat thawm te a rin ang huin a sang filawr pawlah kan awm ta chu a ni a; hetiang deuh tho hian cancer leh zial zukah pawh a sang filawr kan ni bawk. Nupui pasal piah lama inkawp satliah hi HIV/AIDS ti darhtu ber pakhat a ni a; sakhua anga ngaihtuah phei chuan a zahthlak ang renga; rawngbawltute tan inenletna ram ram tham a ni.

Ram inrelbawlnaah chuan sual reng reng hi ‘0’ (nil/zero) in a dah theih loa, a te thei ang bera daha thunun (control) thin a ni a; HIV/AIDS a kan dinhmun en hian sawrkar ngei pawh a lungawi bik a rinawm loh a, hei aia nasa zawka tan lak a tula; thiamna hman mek te thlengin ennawn a ngai a nih pawhin a ti mai tura ngaih a ni. Kristian sakhua vuan kan ni deuh vek tih hi sawi nawn ngai loa chiang sa a ni a; chu a chhapah mahni kohhran theuhah luankhawmna kan nei vek bawk a, ‘kohhran’ kan tih hian hemi hi a kawk fo thin reng a ni. Hemi bakah hian kan ram danglamna vawi duai lo kan sawi tawh thin a, chuta langsar tak mai chu kohhranin ram inrelbawlnaa ‘aw’ lian tak a nei hi a ni. Tunhma khan khawthlang ramah chuan ram inrelbawlna leh kohhran hi chawhpawlh a ni fo thin a; chu chuan thil diklo tam tak a hring chhuak a, kum zabi 16-na leh 19-na inkarah khan ram tam tak chuan Sawrkar leh Kohhran inzawmna chu an chhu chat tawh a; hmasawnna an hmu zawkin an hria a, inthlan politic ah kohhran tam tak chu an la inrawlh tho a, ual au takin an duhzawng campaign pui te pawh an awm.

Tunlai khawvelah chuan kohhran hruaitu lawk te ngaihdan chu ramhruaitute chuan zahderna nen an ngaihthlak sak thin a; an thu zawm erawh batah an ngai hauh lo. Tun dinhmunah hi chuan kan ramah hian state sawrkar inrelbawlna thenkhatah kohhran a inrawlh nasa hle a; a dodal hial a tih theih bawk ang. Zu khap burna dan hlih tumna a awm khan thuchhuah siamin kohhran chuan a aw a chhuah tawh a, MLTP hlih a nih loh nana tawngtai rual te pawh a huaihawt tawh hial a nih kha. Titi leng vakah chuan khami zan tawngtai pawh khan dil dan a inang lo hlawm hle a; thenkhatin kohhran in zu awmzia a hriatthiam theih nan te, zu zawrh a hlawhtlin nan te, zu zawrh a hlawhtlinloh nante leh adt. nen a in chawhpawlh nuaih a nih kha!
HIV/AIDS do kawngah hetiang chiah hian kohhran hi hma la hlei thei lovin a awm a, insum theih tluk a awm loa, a thei lo tan condom hmang turin helama hma latute chuan an zirtir a. Hri chhia a darh loh nan condom hmang tura NGO te’n an sawi ang hi Kohhran chuan a sawi ve thei tlat lo a, a sawi tur pawh a ni lo. Chutih rualin kohhran mite vek chu HIV kai leh a thehdarhtu an ni lawi si a, a tak ram hmachhawn mai hi a tha tawh mai lo maw? tiin ngaihdan a awm ta hial mai! Kohhran hi thil inzirtirna dawhsan tha ber anga ngaih a nih rualin sim tur khawp chuan a mi leh sa te a thuin a dah thei si lo leh condom hman a fuih theih loh avangin tunah hian dinhmun ‘lai’ takah a awm a ni.

HIV/AIDS vei zinga a tam zawk chu thalai an ni a, nungchangin a zir loh avanga kai ni lo vanduai vang liau liau a kai an awm nual a. Hetih lai hian a tam zawk chu ‘sex’ a fimkhur loh rah chhuah a ni a; thalai zingah kawppui 2/3 nei an tam bawk a ni. Kohhranin a thunun hleih theih loa an khawsa zel a nih chuan he hrik hi a darh zel dawn a. Tuna HIV vei thalai te hi nakin lawkah chuan liam mai tur a ni a, midanga a darh lohna turin zirtirna pek uar sauh a pawimawh a ni. Eng pawh nise a theih chin chinah tun aiin kohhran hian hma la uar sela, rilru zau zawk a put thiam a pawimawh hle. He natna vei zingah thehdarh zawnga khawsa an awm nual a, HIV/AIDS kai tawhte chu an mawhphurhna kohhran hian hrilhin fuih mai thin sela hma kan sawn ngei a beisei awm.

Facebooktwittergoogle_plusredditpinterestlinkedinmail

Launghauka-ah Lawngtlai Work Camp

Aizawl; Synod Home Mission South, Tuithumhnar Pastor Bial chhunga awm, Lunghauka khuaa Presbyterian Kohhranah March 24-26 chhung khan Lawngtlai Bazar Kohhran chuan Work Camp an nei. Work Camp-ah hian Kohhran Member 17 Upa R.Lalchhuana, Ramthar Committee Chairman ho in an kal.

Lunghauka Kohhran Biak In ban 8 chu Tlumpiin a ei chhiat avangin an thlaksak vek a, hei bakah hian Biakin Vestry an saksak bawk.

Lunghauka khua hi Bru hlang awmna niin in 100 vel an ni a, Kohhran 5 an awm a, Presbyterian Kohhran hi in 39 awmin member 223 an awm a, he khuaa Kohhran lian ber an ni.

Lawngtlai Bazar Kohhran hian thawktu mi 2 an dah mek a, Aizawla Zarkawt Kohhran ten thawktu pakhat dah bawkin, thawktu 3 an awm mek.

Facebooktwittergoogle_plusredditpinterestlinkedinmail

Gen. Hrqs. luah tan

Aizawl: NEI UPC General Headquarters Office chu March ni 25 khan luah luh a ni. Official hawn hun erawh chu May ni 15-ah neih tura ruahman a ni. Office hi duhthusamin la peih chiah loh a ni nain General Official room leh office staff room turte chu peih fel a ni tawh a, Office luah lai a tawt leh chep tawh em avangin a theih anga inthiarlutin luah a ni ta a ni.

Facebooktwittergoogle_plusredditpinterestlinkedinmail

Chanvo siamrem

Aizawl: Salvation Army Western Division-a DYS nilai Major Chhuanliana chu Enna In Officer Incharge-ah dah a nih avangin, Western Division-a DYS thar ni turin Capt. T Zothanmawia chu DYS ni tur leh Capt. Vanlalfaki Renthlei chu DSWM ni turin vawiin hian Diakkawn Corps, Kolasib-ah lawmluhna neih a ni ang. Hemi rual hian Major Tualhmingthanga chu DHQ Asst. tura lawmluh nghal a ni bawk ang. He lawmluhna Ceremony hi Major C.Thanhranga DC in a nei ang.

Facebooktwittergoogle_plusredditpinterestlinkedinmail

Tahan-ah Hmeichhia hotute zin

Aizawl; Presbyterian Women Joint Committee (PWJC) Inkhawmpui, Khampat Calvin, Tahan, Myanmar-a neih turah Central Kohhran Hmeichhe hruaitu, H Lalpianthangi, General Secretary; Sailuti, Asst. Secretary; C Lalhmangaihi, Ex-Chairman leh Zoremmawii (Soloist) te chu March ni 24, 2015 khan an kal. Inkhawmpuiah hian H Lalpianthangi’n Bible Study ‘Petera Lehkhathawn 1’ a neihpui ang a, Inrinni zan atanga Pathianni zan thlengin Sailuti leh C Lalhmangaihi ten ‘Krista thuhretu’ (Tirhkohte 1:8) tih thupui hmangin Pathian thuchah an sawi bawk ang.

Facebooktwittergoogle_plusredditpinterestlinkedinmail

Login

Lost your password?