Monthly Archives: April 2015

Feature : Heroin in zung a kaih nghet zel

Aizawl: Ruihhlo chi khat Heroin, No 4 tia sawi chu tunlai hian Aizawl ah a hluar hle a, Excise & Narcotics Department chuan kumin January atanga March thla thleng khan Gram 824 an man tawh.

Excise & Narcotics Department hotute chuan Heroin hi gram khat Rs.3500 man bawr vel a nih thu sawiin, thla 3 chhunga an man Gram 824 chu Rs. 28,84,000 man hu vel a nih thu an sawi. Aizawl khawpuia drug addict pung hluai chu nu leh pa tam tak timangangtu a ni a. Damdawi hman sual zingah heroin chu tunlai hian a lar hle a ni. Drug ti thin tlangval pakhat chuan tunhnai hian kum naupang zawk No 4 tih ching thar an tam hle thu a sawi a;”kum 14 atanga 20 inkar high school naupang leh college kal tan tir te No 4 ti thar an tam hle a, heng ho hi chuan injection lovin a khu an hip mai thin a ni,” a ti a. No 4 chu a man a tlawam lai tak a nih thu sawiin, Rangvamual ah zu aiin No 4 zuar an tam zawk hial a rin thu a sawi bawk.

Heroin hi Aizawl khawpui chhung hmun ualau lai ah erawh chuan lei tur a awm loh thu No 4 ti thinte chuan an sawi a. Zodin Fly Over Bridge-a ruihhlo lei tur zawng thin pakhat chuan hetiang hian No 4 chungchang Zalen a hrilh.”Hman deuh kha chuan Zodin, Bazar pui leh Bawngkawn velah te lei tur a awm mai thin a, tunah chuan heng lai hmun hi SRS an din chhoh leh hnu chuan a vang tawh lutuk a, mahse, veng hrang hrangah erawh a hluar hle thung a ni,” a ti.
No 4 kan tih hi khawchhak lam atanga lo kal a ni ber a, No 4 ti thinte chuan Champhai lam hi an pan thin nia thu dawn a ni. MSACS hnuaia thawk Champhai khua mi pakhat chuan, Champhai chu ruihhlo tawlhrukna kalkawng a nih angin No 4 addict an tam hle thu a sawi a. Pu Mama chuan Aizawl atang leh hmun dang atangin No 4 laa zuar chhawng tur leh No 4 ngai tawh te an kal thin thu a sawi a,”Tun hnai hian Champhai-ah pawh No 4 ti thar hi an tam hle a, rin phak bakin No 4 ti thar te hi an naupang hle a ni,” a ti. Samaritan Society of Mizoram enkawl Drop in Centre-a OST la mek pakhat chuan No 4 ti thar an tam lutuk chu an vei hle thu sawiin, “kum naupang zawkte hi chuan ti ve lo se kan duh viau a, mahse a man a tlawm in a tam nasa mai si a, in tih hmuh teh ah an nei a, ti an tam khawp mai,” a ti a. Heroin tih rem nan sawrkar leh CYMA anga hmalakna nasa taka kalpui theih nise an duh thu a sawi a.”Keini pawh No 4 ngawl hi kan vei laklawh tawh a, tal chhuah a harsa em em a, la ti ve ngai lote chuan ti ve chhin lo se kan duh hle a ni,” a ti a. No 4 zuar an tam thu sawiin, “zuar an tam lutuk a, an in tam chhuah hi a ni ber mai,” a ti.

Zalen thu dawnna in a sawi danin, No 4 hi Aizawl khawpui lun laiah chuan zuar ngam chiah lo mahse khawpui daifem-ah zawrhna hmun bik a tam hle a. Rangvamual leh World Bank road chu No 4 zawrhna hmun lian zual bik ni a sawi a ni.

Thudawn danin No 4 zuar te hi standing-a zuar an awm rualin thenkhat chu taxi ten an zuar kual thin nia hriat a ni a. Taxi Driver pakhat chuan, a taxi chu No 4 zawrh kual nan an hman sak thin thu sawiin,”No 4 zuar nu pakhat hian nileng in ka lo hmang che tiin min dawr a, chu nu chu ka phur kual a, drugs addict ni awm tak bul kan thlen in kan ding a, an in pe ru a kan tlan leh nghal mai thin a ni,” a ti a. Taxi Driver chuan taxi hmanga No 4 zawrh chu tunhnai mai ni lo hun liam tawh atanga khan chin thin a nih thu a sawi.

Heroin no 4 tia hriat lar hi Aizawl khawpui leh Mizoram hmun thenkhatah a hluar chhoh em avangin tunhnai khan CYMA hnuaia Kumpuan Committee te chuan SRS an din thar leh hial a, SRS din thar hnu hian tunhnai khan Ruihhlo ti thin te hi vai hna thawh a ni tawh a ni. Samaritan Society of Mizoram a thawk pakhat chuan No 4 rawn lar leh ta hluai chu pawi an tih thu sawiin, hemi ti rem tur a sawrkar leh tlawmngai pawl leh kohhran ang te a tan lak a ngaih hle thu a sawi a. No 4 ti thar rawlthar duhdawm tak tak te hian a ngawlveia an tal buai tak tak hma hian sim tir theih dan ngaihtuah hi mitin mawh a ni tiin a sawi bawk a ni.

Facebooktwittergoogle_plusredditpinterestlinkedinmail

VC thlan turah polling station ven uluk ngai 21

Aizawl: April ni 30,2015 a Mizoram District 6 a Village Council leh Local Council thlan loawm turah Polling Station ven ngun bik ngai 21 a awm a. Zirtawpni thleng khan State Election Commission (SEC) chuan Model Code of Conduct bawhchhiaa puhna, complaint 5 a dawng tawh bawk.

Polling Station venhim ngai bik te hi Kolasib district ah 8, Mamit district ah 6 leh Lunglei district ah 7 te an ni a, Champhai leh Serchhip district ah chuan Polling Station venhim ngai bik hi a awm lo. Polling Station venhim ngai bik (sensitive polling station) 21 zinga 2 hi hlauhawm lehzual (hyper sensitive) niin N.Thinglian leh Meidum an ni. Sensitive polling station te hi Hmar helpawl leh Tuikuk (Bru) helpawl te chetna hmunte an ni. Hetih lai hian hel pawl nia hriat mi thenkhatte vauna avangin Aizawl district chhunga khaw 25 leh Kolasib district chhunga khaw 6 ah chuan nomination file an awmloh vangin inthlan hi neih a ni dawn lo a, heng khaw 31-ah hian a vaiin VC seat 123 a awm.
Commission chuan Zirtawpni thleng khan Model Codeof Conduct bawhchhiaa puhna (complaint) 5 a dawng tawh a, heng zingah hian Horticulture-in Meidum a NLUP an sem chu titawp turin a hriattir a, department pakhat in Engineer te awmna a siksawi pawh inthlan puan hnua tih a nih vangin sut leh turin a hriattir dawn nia thudawn a ni bawk.

Chuhtu awm loh vangin member 7 awmna Mission Vengthlang Local Council leh VC 8 ah te chuan inthlanna neih a ni dawn lo a. Chuhtu awmlo (uncontested) a VC tlinna te hi Chhanchhuahna Khawpui (Congress 1), Dilkhan (Congress 1), Kolasib Electric Veng (MNF 4 & Ind.1), Selam (Congress 5), Hrianghmun (Congress 2 & Ind.1), Teikhang (Congress 4 & Ind.1), New Hruaikawn (Congress 3), Zawngtetui (Congress 3) te an ni a. General bikah Congress-in seat 12, MNF in seat 4 leh Independent in seat 2 an la tawh a. Reserved ah Congress in seat 5 leh Independent-in seat 1 an la tawh bawk.

Aizawl khawpui ah hian Local Council 83 awmin seat 536 a awm a, chuh tuma hming pe mi 1,264 zinga 937 chu general seat chuh tumte an ni a, mi 327-te chu hmeichhe tana seat hauh chuh tumte an ni. AMC huamchhungah hian In 52093 leh voters 192382 an awm a, heng zingah hian Zemabawk ah voters 5902 awmin an tam ber a, voters 362 awmna Chite ahan tlem ber thung. Local Council inthlan loawm turah hian Congress party atangin general-ah 361 leh reserved seat-ah 136 chuh turin hming an pelut a, MNF-atangin general-ah 343 leh reserved-ah 125, ZNP atangin general-ah 136 leh reserved-ah 37, MPC atangin general-ah 57 leh reserved-ah 14, BJP atangin general-ah 12,independent-a chuh tur general-ah mi 28 leh reserved seat-ah 9 an awm bawk.

Facebooktwittergoogle_plusredditpinterestlinkedinmail

SIKUL KAI HUN INREM; Thla 3 ral hmain enfiahtu din tiam

Aizawl: Mizoram sawrkarin school kai hun a sawn hma that zawkna leh that loh zawkna te zirchiangtu tur State level leh district level-ah din a ni dawn a, a enfiahtu tur committee hi thla 3 chhungin din a ni ang.

Mizo Students Union (MSU)-in School tan hun sawn hma an duhlohna kal zelah nimin khan School Education Minister office ah sawrkar lam aiawh leh MSU aiawhte hi inbiain inremna an siam thei a. An inremna ang chuan ‘sawrkarin school tan hma chungchanga ruahmanna thar a siam chu tun Academic Session kal lai mek chhung atan hman phawt nise, chutih chhung chuan a that zawkna leh thatloh zawknate uluk taka enfiah a, kum lokal zel tur atan ruahmanna siam nise. Thla thum chhungin a enfiahtu tur MSU aiawh telna state level leh district level-ah sawrkarin a din ang’ tih a ni. Sawrkar leh MSU ten inremna an siam theih tak avang hian April ni 28, 2015-a MSU-in Aizawl a kawng zawh neih an tum leh April ni 29 & 30-a Total Bandh neih an tum pawh an thulh nghal.

Nimin vek khan MSU hruaitute chuan Aizawl Press Club-ah chanchinbumite an kawm a, sawrkar nen an inremna avangin MSU a tlawm tihna a ni lo tih an sawi. Lalrinhlua chuan, “MSU chuan school tan hun sawn hma hi a duh lo reng a, thuneituten min ngenna zahawm kan tih avang leh a enfiahtu tur ah MSU aiawhte kan tel dawn bawk avangin hetiang hian thutlukna kan siam ta a. Mipui tan theihtawpa beih zel kan tum a ni,” a ti.

Sawrkar aiawh leh MSU inbiakna ah hian sawrkar lam atangin School Education Minister H.Rohluna, Parliamentary Secretary Joseph Lalhimpuia, Addl.Secretary, School Education Lalzirmawia Chhangte, School Education Director K.Lal- thawmmawia te an tel a. MSU lam hi an President PC Lalrinhlua’n a ho a ni.

Facebooktwittergoogle_plusredditpinterestlinkedinmail

Chhiat hmachhawn turin inpeih

Aizawl: Aizawl District Disaster Management Authority hotutute chuan, khuarel chhiatna a thlena senghawi hna thawhna turin bungrua an neih that thu an sawi.

Zalen palaiin a biaknaah DDMA thawktute chuan an bungraw neih baka bungraw dang an mamawh a nih chuan department thenkhat atangin an bungrua an hmansak mai thin thu an sawi a, thawktu indaih lohna a awm in State Disaster Response Force (SDRF) te chu an pun thin thu an sawi. DDMA hotute chuan DC-in order a pek angin Emergency Centre-ah an duty reng tih an sawi a, tun hnaia thlipui leh ruahsur avanga chhiatna a thlen lai pawh khan Emergency Centre-ah hian darkar 24 chhung duty-in che chhuak tura an in peih reng thu an sawi. Khuarel chhiatna a thlen hian Department of Disaster Management & Rehabilitation te chu a buaipuitu ber an nih rual hian an hnuaia awm District Disaster Management Authority te chu a che ber an ni thung.

DDMA hotute chuan DMR atangin bungrua an hawh thin thu an sawi a, heng bakah hian anmahni pawh hian hna an thawhna turin bungrua an lei thar ve reng thu an sawi. Aizawl District Disaster Management Authority hotute hnen atanga thudawn danin DDMA thawktute chu thlipui tleh leh a kaihhnawih chhiatna thleng thinah hian Community Disaster Committee te chu an hnathawh a fakawm hle thu sawiin, DDMA buaipui ngai lo in thenkhatah chuan an mahni veng chhungah an lo chin fel thin thu an sawi bawk a ni.

Facebooktwittergoogle_plusredditpinterestlinkedinmail

Aizawl fur tui lakna tur May-ah peih hman ring

Aizawl; Fur tui tam laia Aizawl khawpui tana tui lakna tur ‘Harvesting of rain water during rainy season for Aizawl Water Supply Scheme’ chu May thla chhunga zawhfel hman beisei a ni.

Public Health Engineering(PHE) Department hotute hnen atanga thudawn danin Hlimen leh Lungleng inrina Serlui atanga Dihmunzawl thlenga Pipe phum hna hi kalpui mek ani a. Tun dinhmunah KM 7 a thui pipe phum hna hi kalpui mek niin, Serlui tuikhuah erawh zawhfel ani tawh a ni.

Harvesting of rain water during rainy season for Aizawl Water Supply Scheme atan hian Special Plan Assistance hnuaiah cheng vaibelchhe 9 ruahman a ni a, he lui hi luite anih avangin fur tuitam laia Tlawng a nut nasat laia Gravity hmanga Dihmunzawl thlenga tui lakna tur anih bakah Tlawnglui atanga electric hmanga tui pump thin chu a chhawk zangkhai hle beisei ani.

He tuilakna hna kalpui ah hian mimal huan 23 chu pipe Diameter 450 a lian in a tantlang a, heng huan a tantlang ah hian mi pakhat tih loh chu Compensation tumah in an phut lo nia hriat ani a, Pipe phum tur hian pipe hi lirthei liana phurh thlak zel a ngaih avangin huan thlai a tihchhiat tur Compensation phut awmchhun Pu Rualkhuama , Hlimen chuan a phut zah a sawi mumal lova harsatna a siam avangin a huan hi cancel sak ni a thudawn a ni.

Facebooktwittergoogle_plusredditpinterestlinkedinmail

Malaria thihpui la awm lo

Aizawl: State Vector Borne Diseases Control Programme (SVBDCP) Statistic-a a lan dan chuan kumin March ni 15 thleng khan khan mi 43,898 te thisen endikah mi 1928 ten Malaria an vei tih hriat a ni a,heng zinga 1612 te hi Malaria PF an ni a. Vanneihthlak takin kumin chhung hian Mizoramah Malaria vanga thi an la awm hriat a ni lo.

Nimin April ni 25 kha ‘World Malaria Day’ a ni a, Health Department huaihawtin he ni hi zing dar 7:30 khan Govt.Mizo High School Field, Mac Donald Hill Zarkawt-ah hman a ni a, Health Secretary Lalhmingthanga, IAS chu khuallian a ni.

World Malaria day pual inkhawm hi Dr.Rohmingthanga Ralte, Director of Health Services in kaihruaiin kalkhawmte lawmna thutawi a sawi a. Dr.K.Ropari, Principal Director hnen atangin Malaria dona kawnga zirtirna thu ngaihthlak a ni bawk. Khuallian Health Secretary Lalhmingthanga chuan Malaria dona kawnga mipuite nena thawhho that a pawimawhzia a sawi a. Kum 2010 chhung khan khawvel pumah Malaria avangin mi 6,60,000 an thi tih a sawi a. Tunah hian Mizoram chhunga malaria dona lam thawktu State Vector Borne Diseases Control Programme te leh an hmalakna thlawptu NGO hrang hrang te zarah malaria vanga thihna pawh a tlem tak thu sawiin, ‘Tunah hian Sentinel Surveillance atan Aizawl leh Lunglei chu Central in an rawn thlang tawh a ni,’ a ti.

Kumtin Malaria do beihpui hi vawi hnih, March thla atanga April thla inkar leh June thla atanga July thla thleng neih a nih thin thu a sawi bawk. Health Secretary hian DDT kah leh Damdawia Thosilen chiah hmang hian kumin chhungin mipui 80% tuam chhuah tum an ni tih sawiin “Malaria dona kawnga sawrkar hmalakna thlawp hi mipui ten kan chanvo a ni tih i hre thar leh ang u” a ti bawk.

Nimin World Malaria Day-ah hian Aizawl Thunder te chuan malaria dona kawng zawh (Motorcycle Rally) an nei a, Rally hi khuallian in a vai liam a. Aizawl Thunder te hian High School Field atangin Bawngkawn an pan a, Ngaizel-ah an tawp a ni. He Rally-ah hian Aizawl Thunder member 100 chuang an thawkchhuak a ni. World Malaria Day hi nimin khan Lawngtlai ah pawh hman a nih thu dawn a ni.

Facebooktwittergoogle_plusredditpinterestlinkedinmail

MJA Meeting

Naktuk Thawhtanni chhun dar 12:00 hian Aizawl Press Club Conference Hall ah MJA Executive meeting neih a ni dawn a, May 13&14,2015 a Kolasib a General Conference programme an duan bakah agenda an
thlifim ang.

Facebooktwittergoogle_plusredditpinterestlinkedinmail

Vety Day

Aizawl: Nimin khan Central Agricultural University, Selesih chuan World Veterinary Day, 2015 denchhenin Vety College-ah Free Animal Health & Vaccination Camp a buatsaih a, Dr. Gaj Raj Singh, Ex-Dean, Vety College-in a hawng. Ui a hri danna (anti rabbies) chu Ui 100 chuang hnenah pek a ni a, ran damlo 200 a thlawn a en an niin damdawi pawh a thlawn a sem a ni a, ran 4 zai nghal an niin gynecological case pawh ran 12 hnenah pek an ni.

Ran damlo entirna leh Ui a hri danna pek bakah World Veterinary Day, 2015 denchhen hian Vety College Auditorium-ah “Rannung/Ran atanga mihring a kaichhawn theih natna hlauhawm” tih thupui hmangin Seminar neih a ni a, Dr. S.Borthakur, Asst. Professor, Dept. of Parasitology, Vety. College paper ziah chu zirho a ni bawk.

Facebooktwittergoogle_plusredditpinterestlinkedinmail

Khawmpui

Mizoram Government Doctors Association chuan May ni 7,2015 hian Aijal Club ah conference vawi 32-na an hmang dawn a, Chief Minister Lal Thanhawla chu khuallian a ni ang. MGDA hian kum 2015-2017 chhunga an pawl hruaitu tur an thlang nghal bawk ang.

Facebooktwittergoogle_plusredditpinterestlinkedinmail

Zin dawn

Assembly Speaker Hiphei chu naktuk hian a bial chhung khaw hrang hrang tlawhin a zin dawn a, May 5 ah Aizawl a lo let leh ang.

Facebooktwittergoogle_plusredditpinterestlinkedinmail

Login

Lost your password?