Monthly Archives: April 2015

Motor-in chilhlum

Zirtawp tlai dar 5:30 vel khan Lalthianghlima (45) S/o Vanlalchhunga, Vairengte Kawngthar veng chu Cachar lam atanga lo chho Ashok Leyland Tipper AS-11/DC 3900, Noor Ahmed (27) s/o Jahur Uddin, Derabagh Part-I, Sonai, Cachar khalh chuan a chil a, Aizawl panpui a nih laiin zan dar 7:30 vel khan Bilkhawthlir ah a hliam tuar lovin a boral a, motor khalhtu hi man nghal a ni.

Facebooktwittergoogle_plusredditpinterestlinkedinmail

Boxing training center 12 siam dawn

Mizoram Boxing Association (MIZBA) chuan Mizoram hmun hrang hranga traning center 12 nei turin hma an la mek a, hemi hmalakna hmasa atana hian nimin atang khan tun hnai maia hawn Ramhlun boxing training center-ah coach/trainer refresher course neih a ni. MIZBA hian tuna an tum ang chuan Aizawl bikah hian center panga hawn an tum a, Ramhlun-ah hian pathum hawn tumin, Hawla Indoor Stadium-ah pakhat dahin SAI hmun Mission Vengthlangah center hi hawn an tum bawk. Heng mai bakah hian a tul angin district tinah training center hi pakhat theuh hawn an tum bawk a, an hawnna tur khua tak erawh hriat theih a la ni lo. Nimina refresher course a kal te pawh hi heng center an neihna hmuna zirtirtu tur an ni a, he hunah hian coach/trainer 14 an kal a, boxing lam mi thiam bik ten zirtirna hi an pe a ni. he hunah hian coach/trainer 14 an kal a, boxing lam mi thiam bik ten zirtirna hi an pe a ni.

Facebooktwittergoogle_plusredditpinterestlinkedinmail

Chhiat rupna lian tham thleng ta se!

Tunhnai mai khan Mizoram chu thlipuiin a nuai vak a, bungraw chhia a tam a, nunphung a tibuai hle a ni. He thlipui hi khawthlang lama intanin hmar lam panin a tleh a, kan thenawm ramte pawhin an tuara, nunna chan tam tak an awm bawk a ni. Mi ram angin tuar nasa lo mahila chenna in a tihchhiat te leh bungraw dang a khawih chhiat te chu pawisaa a hlutna chhut chuan man tam tak tur a ni a; nunna chan awm lo mahse a nghawng a na a; hun engnge maw chhung chu cheihlei thei loin ram pum a siam a ni. Thingkung tlute pawhin electric bante vaw thluin hruipui a chat nual a, ram pumin eng nei mumal lovin kan awm a, hna tam tak chawlhsan lailawk a ni a, chanchinbu te pawh chhuak thei loin a ti khaihlak hial a; a tawi zawngin sawi ila nitina kan nunna bet tlat mihring mamawhte chu che thei loin a siama engkim a ding tawp a ni.

Electric enkawltute PNE Department chuan theih tawp chhuahin chhum lo chat loin ban tlu, hrui chat leh a tul dang te ngawrh takin an siam tha a, an beih nasat em avangin mipuiin an tuar rei lo hlauh zawk a ni. Tunah chuan ngai kan awh leh tan tawh a, PNE hnathawkte fak an phu khawp mai.

Hemi chhiatna lo thleng thut hian ngaihtuahna a ti kal thui lo thei loa, a aia nasa lo thleng ta se engtia tih tur nge ni ang? Thawktu indaihloh a rik reng lai hian chhiatna lian zawk in min nuai palh ang tih a hlauhawm hle. Mizoram chu lirnghing hlauhawmna hmuna awm a nih thu sawirik fo a ni a, na thama a la nghin loh avangin engtik lai pawha tawlhphut thei chungah thlamuang takin kan mu zan tin a nih ber hi. Hei bakah fur-pui hmachhawn tur a la awm a; chhiatna tenau min nuai chho ang. Kawng tamtakah sawrkar pawh a inpuahchah a rinawm a, lei min duhna lai bik a awm thina chungte chu vil uluk an ni thin a, nunphung a ti khaihlak tam lo mahse a khawma chhut chuan a man a to khawp ang.

Hemi piah lamah hian a thlen duhna hun leh hmun chu sawi loh in ralrin hmaa chhiat rupna lian tham a awm leh a, lirnghing na tak te, thlipui na tak te, thunun theih loh khawpa kang mei chhuak leh adt. a huam awm e. Ram changkanga mithiamte pawhin tihnghaihna an hriat loh khuanu chhiatna a thleng fo thin a, inralrin a theih loha, a thlen laia insaseng emaw a zawh hnua seng hawi leh chhanchhuah hna lamah tan an la nasa a; bungrua pawh a tha ber leh tunlai thiamna hmanga siam te a ni deuh ber. Hemi kawngah hian Zoram hian hma a sawn mek a, bungraw hman dan te pawh a bika zirtir nei tawhin an inral ring a ni.

Keini ram pachhe tan chuan heng ang bungrua hi neih tam te a har a, mahse political committment a awm chhung chu theih loh tak tak a awm lo tih hi kan pawm tlandan nise a va tha em.

Mihring an pun ang zelin chenna in te pawh a pung ve zela chenna in te chu insi deuh thawin tlang pangah a bet deuh vek a ni. Lakluh mila khawsa thiam lo tam zawkna a ni bawka, chenna in tur sak chungchangah pawh mithiamte duh dan hmanraw tha hmang ngam loin a lang thei chin zawng nalh taka tuam mawi thlang zawk kan ni tlangpui. Mipui pawhin kan luchungah meiling kan chhekkhawl tih kan inhriat a hun ta ngawt mai. Lirnghing na tham phei chuan kan khawpui hi a mam fai hial thei anga, do dan a awm loa hmachhawn tawp mai loh chu tihdan a awm tehchiam lo. Tih theih awm dan chu chhiatnaa zirin a thlen lai leh a hnu zela awm dan lo hriat lawk hi a ni deuh mai.­­

Eng pawh nise a nei zo te hi chuan hmun him laiah hmanraw tha hmangin in sa lui hram hram sela; chhiat tawh pawha tawm him theihna tur (bunker) te, chhan chhuah hna thawhna tur hmanraw tangkaite leh ei leh in thlengin chhek khawl thei chuan inral ring sela; chu chu mimal anga tih theih a ni.

Sawrkar lam pawhin chhiat a thlen laia awm dan tur te tun ai uar hian hrilhhriat hna bei zel sela, chhiat thlen hnua insenghawi dan in hrilhhriat leh chhanchhuah hna tibuai lo zawnga hnathawktute an tawiawm theih dan mipui tun aia nasain zirtir sela a tha ber ang.

Facebooktwittergoogle_plusredditpinterestlinkedinmail

Pen leh notebook nen Shimla-ah

– Zoa Tlau

Delhi atanga Km 380 zet Bus driver mize dangdai tak khalha tlan tur kan la ni tih pawh inhre chang tawh lo ang hialin Aizawl Journalist 10 rual leh Aizawl enkawltu Aizawl Municipal Council official pahnihte chuan Rajdhani train-ah chuan Kolkata atanga Delhi chu April ni 7 chawhnu herah kan chhuahsan a. Mahni Whatsapp group awmna hrang hranga train-in state dang a luh apianga BSNL, Airtel leh service dangin min lo welcome-na update zel peihte kan la awm mek a, April ni 8 chawhma dar 10 a lo rik meuh chuan Delhi kan thleng fel ta der mai. Bus pakhat chuan kan tum ram ‘Queen of the Hills’ chu chawlh awm eih lovin min panpui ta nghal a, hemi ni la la-a lut tur kan ni. Kum 1863 te kha chuan British in India a la awp a, khatih laia an Viceroy of India, John Lawrence khan Calcutta atanga Mel 1000 chuang zeta hla Shimla hi an nipui khawpui ni turin kum khatah tum hnih zet he zinkawng thui tak hi a lo zawh ve thin a. An ‘mode of transportation’ ngaihtuah chuan a hautak viau awm asin!

Phai kawng ngil thui tak tlan nin hlui tawh hnuah Lailapur atanga Mizoram lawn tur ang maiin tlangram kan lawn ve ta a, thim thet thet a ni tawh nghe nghe. Zawng an tam hle tih lohah chuan Mizoram nen a danglamna sawi tur a vang hle mai. Zan a thim tawh takzet a, kan thleng dawn hnai ta, ‘Saw le Shimla chu, Aizawl nen ava inang tehreng em!’ tih thawm a rawn ri tan ta, hahipin Shimla khawpui leh Mizoram khawpui inan thute sawi mekin, kan zinga DDK palai phei chuan an Station ang chiah tlangchhipa eng va va chu min kawhhmuh hlawm a, kan hnaih tial tiala kan lut ta hlawl mai. Shimla a lo ni hauh lo! Solan khua zawk a lo ni, Shimla khaw bul maia awm Municipal Corporation hranpa nei khua Sai leh Sai inpawt Fevicol siamna hmunpui, Zu siamna hmun lar tak lo ni rengin! Heta tang hian hun tam kan seng tawh lova Shimla khawpui chu a takin kan lut ta ngei mai a, Aizawl nen a inang lehzual niin kan hmu. Khaw tawntirh atanga kan hmuh chu hotel tam em em a ni ringawt mai, India ramah hotel ‘rank’ ah number one an lo ni reng a. Khualzin (tourist) te tlawh tam lamah ‘top ten’ an lo ni bawk.

Inchung hring leh sen: Khua a lo var a, chu khawpui kan hmelhriatna hmasa ber chu an inchung rawng chu a hring leh a sen vekin an lo hnawih mek a, chu chu an Municipal Corporation thupek a ni. April thla chhunga hnawih vek tura tih an ni a, kan awm lai hian an hnawih mek. Khua kan chuana an kawngpui leh kan kawngpui zau zawng a inthlau lo, keini aiin a zim mah. Mahse kawngsira motor park an khapa a remchanna apiangah parking an siama tlemin an zia, mahse traffic erawh a jam ve viau tho. “Parking leh traffic jam hi kan harsatna tawh nasat ber pakhat a ni,” tiin Shimla Municipal Corporation in Mizoram team min enkawl tura an lo ruat Engineer pension chuan a lo sawi ve mek a, Multi Storeyed Parking lamah hma an la chho ve mek.

Kum 1806-a Nepal lal Bhimsen Thapa-a’n a lo run tawh Shimla khawpui enkawltu Municipal Corporation hian kum 164 hmel a hmu mek a, chuti chung chuan an la induhkhawp bik lem lo. Khawpuia mipui enkawl an harsat zia chu min kaihruaitu sawi ber pakhat a ni ve tho mai, Solar City-ah an puan thu sawiin, “In tinah tui lumna tur Solar power khawlna dah vek tur kan ti a, mahse hei hi thil harsa tak a ni ve tho,” a ti a. Chenna in sak zawhna Certificate chu Corporation in an pek hma chuan Tui lakna, Eng lakna leh Ek paihna pipe vuah an phal lo bur, “hei pawh hi thiltithei fal an awma a taka chantir ala har hle mai,” an la ti ve cheu! Mahse hmasawnna hmel chu an hmu mek niin a lang. An state-a lirthei lo lut atangain Municipal hian state dang lirtheiah pawisa Rs 300 chu Green Card tiin an lo khawn thin a, mahse chu pawh chu High Court-ah ‘discrimination a ni’ tiin an khing a, an khawn thei rih lo, khin let an la tum ve cheu bawk. An hmalakna leh High Court hi a inhnaih viau zel niin a lang a, mipui khawih thil a nih avangin subject hrang hrangah an inkhing fo tih a hriat theih.

Septic tank paih a ngai lo ve: Aizawl Daily newspaper ads-a kan hmuh tam em em chu ‘Septic tank khat kan paih thei’ tih hi. Municipal hian chak taka hma lain an khawpui In zaa 80 lai mai chu Septic tank ngai lovin pipeline-in an zawm veka chu chu a paihna bikah pipe hmang chuan an paih a, an Sewarage system hmunpui hi kan tlawh ta chiah lo nain thil ropui tak chu a tling ngei mai le!

Nepal lal atanga British East India Company-in Anglo-Nepalese War (1814–16) atanga a neih let, Hindu pathiannu ‘Shyamala Devi’ tih atanga a hming lak Shimla hi ‘chimral’ hlau hlei thei lovin an awm ni ngei tur a ni. “State pawn atangin In rawn nei an tam hle a, abik takin Delhi lam atangin an tam hle, tualchhung mite hian a tirah chuan an helh deuha mahse tunah chuan ngaiah an nei tawh,” tiin state pawn lam atanga he khawpuia in neih dodalna emaw, Municipal lamin khapna a awm chiah lo a ni awm e, kan Liasion Officer in min lo hrilh danin. Tualchhung mite aiin pawisa an hmang huaia an income hmuhna pawimawh tak pakhat a ni nghe nghe.

Keini aia tlang sang, nitin tui 35 Million Litre per Day vel mamawh an ni a, tui hi lui atangin an pump ve tho a, an mamawh khawpa an ngaih an pump chhuak zo bik lo, nitina an mamawh chu 40 MLD a ni a, an Mayor Sanjay Chauhan chuan mipui mamawh khawp tuipek chu an tum ber pakhat a nih thu Mizoram Journalist te hi a hrilh bawk a. Tui pump chhuah hi State sawrkar department tum a ni a, a semdarh, meter leh billing erawh Municipal kut a ni thung. Electric lamah thuneihna an la nei thui viau lo, streetlight tih vel chu an thuneihna a ni ve chauh thung. An sum lakluhna hnar lian ber chu Property Tax a ni a, British hunlai atanga an lak tawh niin Aizawlah pawh Property Tax hi lak tuma hmalak mek a ni (Hei hi chu AMC leh MJA lamin nakkin lamah chiang zawkin an la rawn phochhuah beisei ila)

The Tudor & Gothic Revival: Kum zabi 19-na vela rawn lar thar leh em em British in sak dan Gothic (jigsaw) leh kum zabi 20-na chhova British ten in sak dan an uar thar Tudor chu Shimla khawpuiah hmuh tur a tam em em a, hei hian an khawpui a tiropuiin a tihluzual tak zet.

Lord Dufferin-a’n kum 1888-a a sak zawh Shimla Observatory Hills-a awm, Viceregal Lodge khu an khawpui rohlu a tling, British, India, Pakistan lo pianna kawnga hmun pawimawh Vice Roy chenna hmun ropui tak a ni a. Heng bakah hian hmun hlui rohlu (heritage) tam tak a awm a, he khawpui te tak te tiliantu leh tihlutute an ni. Heng ‘heritage’ hrang hrangte hi Municipal enkawl leh an kuta awm vek a ni a, nitin maiin tlawhtu an awm a, a tlawhtute tlawh man tlingkhawm chu Municipal kutah hian a lut ve leh thin.

Bawlhhlawh: Polythene khapna leh Smoke Free City hlawhtling taka kalpui Shimla khaw tinuamtu ber an market Mall Road bik chu lirthei kal khap a ni a, kein an kal suau suaua helai hmun bikah phei hi chuan bawlhhlawh paih khap bur a ni a, chil chhak eih pawh phal a ni lo. A khat mawi tawkin bawlhhlawh bawm an dah a. Shimla Municipal Corporation chuan In tina bawlhhlawh khawn leh paih hi Society kutah an dah a, anni hian an motor-a bawlhhlawh chhungkhawmtir lovin In tinah an khawnkhawma a paihna hmunah an paih thin. Thla tin In tinin Rs 50 an chawi a, chu chuan an inenkawl theia Municipal sawrkar hian sum a chawibelh ve lo, Aizawlah chuan In tinin kan chawi hi zaa 20 a ni a, a bak zaa 80 hi AMC hian min la chawi sak rih. A paihna hmunah hian Company pakhat Hanjer Bio-Tech Energies Pvt. Ltd chu investment tihtirin bawlhhlawh sawngbawlna khawl chu anni hian an bun a, tawihthei leh thei lo chu khawl hmanga lo thliarin tawihthei chu Re-Defined Fuel-ah siamin lungaihthei aia hman theiha siamin kg khat Rs 230-in an hralh thei a, tawihthei chu leitha (manure) ah siamin Kg 25 chu Rs 250 zelin an hralh, state dangah an hralh tlangpui. He an hmalakna hi bultan ve chauh an la ni a, Company lam hian hralhna lamah harsatna tawk lo mahse tunah rih chuan hlawkna an la nei lo niin an insawi ve mek.

Shimla khawpui hi tihthianghlim an tum hle a, an City Mayor Sanjay Chauhan kan kawm chuan, “Shimla khawpui a lo thawla boruak a lo thianghlim nan tun atanga kum thum hnu velah chuan khawpui daiah lirthei inhung tawh ang a, ropeway-in khawpui in lut tawh ang,” a ti. Chu chu an project lian tak pakhat a ni a, tourist hipna pawimawh tak a ni dawn bawk. Tourism department hian hma an la nasa viau a, Placard thenkhatah “Tourist Helpline” tih intara phone number inziak hmuh tur a awm nual a, an market lunlaia tuithianghlim in mai tur an dahte pawh a tangkai hle, Aizawlah pawh hei hi kalpui mek a ni.

Shimla khaw chhehvelah lo neihna hnuhma a awm lova, an eizawnna lian ber chu sawrkar (government) leh tourism a ni a, zirna a thain a tlawma Education leh Horticulture chu an eizawnna lian zingah a tel phak bawk. He khawpui pawimawh leh tlawh leh zen zen theih tawh loh tur kan tlawh theih nana Mizoram Journalist Association (MJA) hmalakna tipuitlintu Aizawl Municipal Council chungah lawmthu ka sawi a, hetianga a zirchiangtu kan ni hi AMC-in hmasawn kan duh zia tilangtu a ni. Ka zinpui Journalist-te inpekzawhna leh midang chunga an thatna ka fak a, abik takin AMC official pahnih min hruaitu Vanlalsawma Khiangte, Executive Officer leh H. Lalruatliana, Superintendent-te an fakawm takzet, an tlinin an hriatna a zau mai bakah YMA hruaitu hlun an lo ni bawka an tlawmngai em em a, kan nihlawh phah hle a ni.

Facebooktwittergoogle_plusredditpinterestlinkedinmail

ZU LEH HMEICHHIA (Doctor Ka Zawhna, April 26, 2015)

Zu avanga harsatna tawk hi an tam tial tial a, doctor pan tam zawk hi mipa an ni a, hmeichhia zu avanga harsatna tawk erawh a tlai fe tawh hnua doctor pan, inentir an ni fo mai. Tin, zu hian hmeichhia a khawih chhe hma zawk bawk a, chungte chu ngaihtuah ngun a ngai viau mai. Hetiang harsatna nei damlo hi ka en ve ta fo mai a, Medicine lam Specialist te phei chuan sawi tur an nei teuh ang tih a rinawm. US Department of Health and Human Services hnuaia National Institutes of Health leh National Institute on Alcohol Abuse and Alcoholism te chuan uluk takin zirchianna an lo nei tawh a (http://www.umassmed.edu/PageFiles/63961/WomensBrochure.pdf). Hei bakah hian internet lamah link – “http://www.everydayhealth.com/womens-health/effects-of-alcohol-on-women.aspx” hi a en thei chuan lo chhiar bawk se, tangkaipui kan awm takin tih thu ah zawhna chhanna lam kan kalsan lawk dawn a ni.

Zu hian hmeichhe taksa ah hna a thawh dan hi mipa aia a danglamna pawimawh tak tak a awm a, chumi zingah chuan hmeichhe taksa a tet zawk vang te, tihrawl an neih tlem zawk vang te, taksa a tui (body water) a tlem zawk vang te hian zu hi an taksa in a chawk ral (metabolize – ka sawi fiah thiam dan) muang zawk a, chu chuan thin (liver) leh thluak a khawih hma zel a ni. In zat in ang rau rau ah pawh blood alcohol level hi hmeichhia ah a sang zawk zel a, an sawi danah phei chuan mipa aia an in tlem zawk pawhin an ruih dan a inchen thei a ni. Chutiang avang chuan mipa aiin thin tha lo te, lung lam fel lohna (heart disease) te, thluak lam chak lo (memory loss) te pawh an nei hma duh bik a ni. Damlo ka lo en ve tawh ah te pawh hian an in rei zawng hi mipa aiin a rei lo deuh zel nia.

Hmeichhia in zu an in (an buaipui) chhan hi mipa nen a in anna lai awm fo mahse ngaihzawng emaw an pasal te nena an inkar harsatna avang hian an in phah duh bik niin an sawi a. Pasal nei har, pasal then te hian zu vanga harsatna hi an nei duh zual niin an sawi bawk. Pasal te kutthlak tuar thin leh sex lam zawnga diriamna/kutthlakna tuar thin (sexual and physical abuse) te hian zu an buaipui duh hle bawk. Zu in tan tirh hun lai pawh hian an zirchianna atanga a lan danin hmeichhe tleirawl zu in tir te hi mipa aiin an in tam zawk deuh zel niin a lang. Chu chuan an dinhmun a ti derthawng a, pawngsual leh remchang a lo la duh an tawng phah fo reng a ni.

Zu hian kan tarlan tak angin hmeichhe taksa ah harsatna a thlen hma bik a. Thin tha lo ah pawh hian an dam muang bik a (slower recovery), lung vung leh thisen zam zim te a thlen hma bawk a. Nau pai an harsat pheh thei a, naupai laia zu an in nasat phei chuan naute in an tuar fo bawk. Rilru lam harsatna depression te pawh an nei hma bawk a, thluak lam chak lo leh fel lohna an nei hma zel niin an zirchianna chuan a tarlang bawk a ni. Cancer, a bikin hnute, chawkawng leh lu leh nghawng cancer a thlen hma bawk niin an sawi.

Society tam berah hian hmeichhia leh zu hi kan hmuh dan a he deuh zel a. Hmeichhe zu in chu nikhua lo, lak tlak lo, lepchiah ang te in kan hmu nghal deuh mai zel. Mipa zu in nena kan en dan chu a inthlau hle a ni. Hemi avang tak hian hmeichhe zu in tam tak chuan an thup a, a rukin an in a, harsatna an neih pawh hian doctor an pan har phah thin a ni. Ka damlo lo en ve te pawh hi an history a pawimawh vangin thin lam fel lohna an neih chuan zu an in leh in loh ka zawt thin a, chhan an hreh tlangpui zel a ni. Mahse inentir hian doctor hnenah zep nei lova chanchin hrilh kilh kelh hi a pawimawh em em bawk si a, zai ngai te phei chu an zep avanga hnimhlum zo lova operation table a chatthla der te pawh an awm phah fo reng a ni. Hemi piah lamah hian zu vanga harsatna hian zan mut that loh te a thlen a, chumi vang chuan mutna damdawi te leh thil dang damdawi ruihtheih an khawih tel fo bawk a. Hetiang anih phei chuan inentir hunah zep nei lova hrilh chian hi a pawimawh tak zet zet a ni.

Zu avanga harsatna hi hmeichhe tan thil sawi nuam lo ber pawl anih a rinawm a. Amaherawhchu inenkawlna kawngah doctor te chiang taka hrilh hriat hi a pawimawh em em a, damdawi dang ruih leh addict theih an khawih tel phei chuan hrilh ngei ngei tur a ni. Mutna damdawi te leh khuh damdawi khawih thin te phei chu kan tarlan tak angin zai ngai (surgery) an nih chuan doctor hnenah hrilh ngei ngei tur a ni; chuti lo chu thih thut a hlauhawm hle a ni.

Facebooktwittergoogle_plusredditpinterestlinkedinmail

Dr. Hrekima (April 26, 2015)

Dam loh mangan tak tak lai hian rilru fim put a har fu. Damna tur a nih phawt chuan engmah tih hreh loh mai pawh hi awl tak tur a ni.

%%%%%%%%%

TAWNGTAIDAMTHEI SEXY
Nu pakhat thil min hrilh hi a mak ka ti khawp mai. A hrisel loh avangin damna a zawng nasa. Daktawr tam taka a beidawn hnuah tawngtaidamthei pakhat an pan ve a. A mut zangthaltir a, a natna dam nan chuan a chunga a rawn bawh a ngai ta miau si a! A rawn dung bawh hnua a chet zui leh dan atang chuan han dawh zui zel chi niin a hre lo a, a nem tho zawk mai a! Dam chu a duh. Mahse damna tura a paltlang tur chu a dikin a hre lo a ni.
Chupa lah chuan, “Thlarau a zalen lo,” te a la tizui ta a ni awm asin! An kal laia kal ve tlairawl pakhat chu a bawh rei khawp mai a, a mawngbawrte chu a tiche vel a ni awm e! A sawi zel dan phei chuan chhul cancer te phei chu va ‘hawlh’ kher a ngai a ni awm e! Tawngtaidamthei sexy tak a nih awm hi!

Daktawr tih ni ta se chu mipui kan pungkhawm ang a, an inchung kan vawm ang a, kawngte zawhin, ‘haw rawh se’ te pawh kan ti leh hial ta ve ang! Hmanah pakhat chu kan um haw tawh kha! Mahse ‘thlarau’ thil a nih chuan tuman kan sawisel tha ngam si lo! Pathian thu chhuanlama thlarau hmatheh a nih tawh chuan kan pawm thui thei fu. Sawn thianghlim leh khurbingte pawh an awm nawk thin em kha? Thlarau dik chin sawi ngam khawpa huaisen hi a har fu a niang, kan puithiamho lah hi an ngawi thuap zel mai si!

Tawngtai dam theihna hi a va hlu em! Ka dam loha ka pa’n min tawngtaite hian ka ngaih a tha hliah hliah a, ka dam sawng sawng thin. Ka fanu damlo mangangin, “A pa, tawngtai rawh,’ a tih tuma hnukulh teuh chunga ka tawngtai hnu lawka ka fanu muhil ta siai siai maite kha aw! Mangan vawrtawpah chuan Pathian bak hi pan tur an vang khawp!
Tawngtaidamthei pawh ka pawm. Pathian hian hmanrua a ngah em! Mi hman bik te, hmun hman bikte pawh a nei ngei ang. Daktawrte hrilhfiah phak rual loha Pathianin tawngtaidamthei hmanga a tihdam tawhte an tam. Rin loh ngam chi a ni lo. Awih loh phal chi a ni lo. Daktawrte beidawn tawhna leh a neih zawng zawng senga damna zawnga la dam chuang lo hmeichhe thiput kha Tidamtu khan a tidam chiang em!

Damna kan duh luatah hian khaw hmu lo leka kal erawh a hlauhawm. Mi sawi apiang, mi pan apiang, mi fak apiang, a mak apiang, mahni inzuar tlawr thiam apiang pan ngawt hi a fuh loh tum a awm thei ang. Daktawr kan pan tur pawh hi ‘a dik em?’ tih hi chhui lawk fo a tha. Thianpa Jacob-a khup zaitir tur rengin a zir uluk hmasa nasa em! Doctor inti zingah hian doctor lem an awm thei. Khawia zir nge, eng ang thiamna nei nge tihte hi chhui hreh lo teh ang u. Inzuar uar tak, ‘doctor’ tih hming pu pakhat hi mi pakhatin, “He pa hi, matric pawh a pass lo,” tiin min hrilh a. Tak tak ni maw?

Daktawr hna hi Medical Council-in an thiamna a pawmpui, thiam tawka an ngaih, thawk tlaka an chhinchhiah chin chauhin an thawh a thiang. Thiamna reng reng hi eng Council-in emaw, eng University-in emaw ‘a thiam e’ a tih chin hi pawm a ni thin. Chutiang sawi tur mumal awm lo ‘mi thiama inchhal’ hi an hlauhawm thei. Daktawr hoin an pawm loh ‘daktawr lem’ te pawh an awm fo reng a ni. Mi mangan leh buai remchanga chuha ‘remchang’ lo zawng ve rengte pawh an awm thei mai thei asin!

Tawngtaidamthei hi a ‘tehtu’ an awm ve lem hlei lo a. Council tih ang reng pawh an nei ve bawk si lo! A tehna ber tur chu ‘an tih dan, an nungchang, an rah chhuah’ atangin a ni mai ni awm tak a ni! Hmana ka hmelhriat pakhat chu tawngtaidamtheiin, ‘khawnvartui thirfian khat ni tin in turin’ a chawh pek a. Ka phalsak lo ve tawp! Nawalh bawk tiat lek DDT ineitirte pawh ka hria!

Hman deuh khan Doctor lem an tih mai, nula saruaka thla lak sak thin an sawi tawh kha maw le! Mi nu lo veh thlem mai thin te pawh an awm kha. Tidamtu ‘lungte phum ching’-te pawh an sawi thin kha! Hmeichhe chhul tha loa inngai ho lah hian an pan duh phian zel an ti! An lo zen ril deuh pawhin ‘chhul lam a nia’ tiin a turah kan ngai tho si a ni awm e!

Kha nu thil min hrilh atang khan ka’n titi zui ta mai mai a nih hi. Damna kan zawnna lam hi a dik em tih hi ngaihtuah fo a tha. Daktawr tha lo leh a lem an awm thei ang chiah hian tawngtaidamthei sexy deuhte pawh an lo awm thin si a!

Facebooktwittergoogle_plusredditpinterestlinkedinmail

Ka Huang (April 26, 2015)

Mahni huangah na na na chuan mahni duh dan danin ziak mai ang aw. Tu pa emaw pawhin tu nu emaw pawnfen a leisak a, a hnu deuhah a sual vak mai a, a hlawhtling thei si lo a, chu nu chuan Lal leh Upa hnenah a report a. An han zawh chuan, “Mahni huana mi na na na chu kan duh leh kan phun a, kan duh leh kan phawi theuh maih a ni lawm ni?” tiin a zawt let a. Upaho chuan, “Ni e; mahse, i huan em ni?” tia an han zawh let chuan, “A hungna ka lei a nia, ka hung vek alawm,” a ti nget mai an ti! Kei pawhin KA HUANG-ah na na na chuan ka duh duh ka’n chhim thal bekang puahpui leh pawp pawp mai ang e.

Kum 16 leh thla khat vel ka nihin tum lawk pawh awm loin sipaia tan ka tum ve phut mai a, Inrinnia intlar tur a ni a; mahse, Chite lui vuak tumin Kangtek kan lo thel vek tawh a, Zirtawp zana den dih turin in kan thlen vek tawh bawk si. Mahni inthiam nan, “Mi an hmu daih lo ang,” te kan ti vel a. Sangha chu kan vaw ta tho a. A tuk, chawlhni chuan kan va kal hrim hrim a, tuna Assam Rifles Commandant bungalow-ah hian an thleng a. Civilian clerk kan va hmu a, “Kan la khat vek tawh a; mahse, Shillong-ah chhuk ula, an la em em ang che u,” min ti a. Sipai rawn latute chu Hav. Chalchhunga leh Naik Sailothanga an ni a, an lak zawng chu Thawhtanni chuan tlang dung kawngah Shillong panin kein an chhuak ta a. Keini chuan Thawhlehniin kan zui ve ta a.

Hetih lai hian ka pa chu Sialsukah MAV Sikul hmasa ber hawng tura an sawn avangin ka U nupui leh a fanu nen Mission Vengah kan awm a. Ka pate an awm loh avang chuan min phal ngam lo a; mahse, ka tum ru nasa mai si. Kekawrbul leh kamit ka hak lai bakah interview-a ka hak tur kekawrbul bawk leh kamit pakhat leh puanhlap pakhat ka keng a, ka kal lui ta a. Dak Inpuiah post card-in ka pa hnenah, “Hei sipaia kal ka tum a, K’u Liani mawh miah suh ang che u,” ka ti a, ka thlak a, tlang dung kawng lamah, a hmaa kalte umin kan chhuak ta a (mi pathum kan ni). Hav. Chalchhunga ho kha 150/160 emaw lai an nih avangin sipai rest camp tinah (bangla kar ang deuh mai tho a ni a, di in, lei chhuat, malkalh mau banga sak a ni hlawm). Nilainiin Serkhan velah (?) kan umphak a, lak tawhho nen chuan kawnglaka ration dah lawk ring chuan kan tel ve ta zel a ni. Kolasib thlang, Rengtekawn an tih maiah khuan Good Friday kan hmang a, tun hnu deuha Republic Venga khawsa ta, Ziona khi a tel bawk a, engmah ngaihtuah loin, “Ziona nen kan zai awn awn mai dawn e, chu lo chu Zion a awm lo e,” tiin kan zai a, Ziona chu a lâm fiam vak vak thin. Kan kal zel a, Silchar rest camp kan thleng a, rel boogie indaih loh avangin batch 5-in emaw kan inthen a, a kal hmasa chuan Sylhet (tuna Bangladesh khawpui pakhat ni ta) rest camp-ah min lo nghak zel a. Ka la theihnghilh theih miah loh chu Meitei, uithak vei kutdawh pakhat hian kut a rawn dawh a, kan thian pakhat Thingdawl mel 8 khua chuan a ten hle ni tur a ni, vai tawng hian ka hau e a ti a, “Kal bo rawh,” tih tum ni awm tak hian lunga tin ur chungin, “MOT JAO,” a ti a, a va hnaih deuh khan vawm tumin a tin ur mai si, a tawngin, “KAL SUH,” a ti bawk si, kan nuih vak vak mai nia!

Sylhek khua hi independent hma kha chuan Mizoho Shillong kawngpui ber a ni, a khawpui laili laiah luirung a luang tlang a, Lei turu tak a awm, chumi kamah chuan kuhva leh vaiza kung thelh karah sipai rest camp di in hlir, BOR (British Other Ranks) leh IOR (Indian Other Ranks) tan inthenawmin an sa teuh mai. Choka phei chu a inri reng mai. Sap sipai pawh kha an chhuak an lut reng mai ni tur a ni, an tam reng mai.

Keiniho kha, no leh thleng takngial pawh nei lo kan ni a, dut bur ruak hi, thirzaiin a beng kan siam chawp a, kan pai ve fur mai, chung chu kan intawm mai! Chaw ei dawn chuan Hav. Chalchhungan tlangval vaiza hnah han thlak teh u, thlengah a ti mai a, tlangval sawm vel khan an han hlukchawm chho bawrh bawrh a, an rawn thlak a, thlengah kan hmang zel mai. Khati ang vel kha Sap sipaiho chaw ei tur intlar khan hmuhnawm tiin mak ti tak hian min thlir thin. April thla a ni a, a lum si, kekawrbul bak kan ha peih lo. Sap sipai min en dan kha MAK min ti hian ka hre thin khawp a, Chawlhni tlai khat chu kan buk pakhatah, Hawaian guitar (pum tuk chi kha) tumin kan vai mai chuan, ‘Lungrukah duhthu ai ang sam ila’ tih hla kha kan sa vak mai a, kan tingtang strum dan leh kan hla thluk kha a western ta em em mai si a, Sap sipaiho kha tukverh leh kawngkaah mak ti em emin an lo dak hung mai a, chuta ka induk rilruk zia chuuh! (hre thiam mai teh). Ni khat dan lek lekah CC Company (Commercial Carrying Company) bus khat lek lekin Shillong min thlen mai si a, Sylhet-ah kan awm khawtlai rei khawp mai. Chutih hun chuan Nongpoh lam khu kawng a ni lo ka tih kha, Sylhet atangin Dawki lui kanin Pynurshula through-in Shillong kan kal thin a ni, Upper Shillong-ah kan lut hmasa thin.

Shillong kan han thleng pawh Clerk hna ka tum avangin ka kalpui Clerk-a in-enroll-ho zingah barrack-ah ka tel ve zel mai. Aizawl leh Shillong karah kan thang rei bawk a, Shillong-a ka in-enroll meuh chu 17-4-1945 a ni duai mai. Thla chanve lai kan thang a nih chu; mahse, nuam kan ti.

Karen Line-a ka han interview ve ni chuan, Commandant H.E.Madge, Adjutand D.S.Elwell leh Record Officer (Assamese) Jubeswar Chetia te an ni. Kan intlar pat mai a, saptawngin min bia a, Ngurkhuma leh kei chu te ber e ti loin Pawl VII Shillong-a pass kan lo ni kawkalh a, min be thei deuh bik nge kan tet vang, Lt. Chetia chuan, “I’ll have these two boys,” a ti a, min din hrang ta daih mai. Kei lah la in-enroll pawh la ni lo, a rang a rangin Regimental Medl. Officer hnenah ka kal a, ka hming min zawt a, chutah chuan kei lah pek chuan, “18 years Sir,” kan ti ngawt mai a (amah chu Bengali Captain a ni). “Daw suh,” min ti a, kei chuan, “18 hnuai lam chu sipaiah an duh lo a,” ka’n ti a. “Pawi ti suh, kum 17-ah ka dah ang che,” min ti a, len zawng ilo teh turin a orderly (ardali) hnenah min tir a, chutih lai chuan fit 5 leh inches 2 emaw ka ni a, ka awm len lam chu inches 31 vel chauh a la ni ang. Vanneihthlak tak maiin Medl. orderly chu Damveng tlangval, Biakliana a lo ni hlauh mai a. Ka san lam chu fit 5 leh inches 4 tiin a’n report a, ka awm len lam lah 34 inchi a ti leh hmiah mai a, RMO khan a lo ziak zel mai a, ka tilte pawh a chawi lo; tichuan, kan duhtawk a ni ta mai…. (zawm zelah le)

Facebooktwittergoogle_plusredditpinterestlinkedinmail

Sawhkhawk (Aptril 26, 2015)

SAWHKHAWK of the day
Central YMA-in ruihhlo a do leh ta hi a lawmawm hle mai. Mi thenkhatten tun hmaa an hmalak tawh dante sawisel thin mah se ruihhlo do tak tak tur hi chuan kan sorkar mi rawihte pawh hian an tluk zo chuang lo. An hruaitu pakhatin, “Hna kan thawh chuan kan bal tur alawm,” tia hmana a sawi kha ka rilruah a awm reng a. Hna kan thawh chuan kan bal thin a, bal miah lova hnathawk chu ‘zelthel, thatchhia’ tiin kan puh thin kha. YMA pawh hian ruihhlo dovin ram leh hnam tan a thawk a, a lo bal ve deuh va, chetsual zauh zauh chang an lo nei ve a ni mai. Tunah tha tharin an tan leh dawn ta a, han ti leh tak tak se, kan kawngpui dungte hi len vel nuam takin han awm leh teh se. – YMA tan em ema

Zalen hlutna hi Pu Chhuanliana huang hi a niin ka hria. Keini thalaite tan hian hmanlai Aizawl chanchin veng hrang hrang chanchinte hi a tam thei ang ber rawh ti se kan hlakpui berin kan hria. – Mamawii

Pu chhuanliana’n hmannia inthlahrung taka chawlh mai tum ang deuhva a insawi kha ti tak tak suh se. A thil ziah hi ngaihnawm ti lo an lo awm a nih pawhin an tam lo vang, thangtharten kan hriat phak tawh loh thu ngaihnawm tak tak, a tak tak ni ngei bawk si a ziah hi a ngaihhlutawm ka ti a. Inthlahrung suh se, kal zel rawh se. – Chhuantei

In chanchinbu a ngaihnawm thei khawp mai, hetiang chanchinbu, chhiar tur tam hi a latute tan a hlu riau ka ti. Chanchinthar piah lamah vantlang tana tangkai tur hrang hrang hi a tha ka ti a, mi tibengvar thei mi thiam thu ziah a awm teuh bawk si a. Pu Chhuanliana lahin a chanchin leh thil hlui, ngaihhlutawm tak tak a ziak reng thei bawk si a, ka la lo vang tih ka hlau hle a ni. – Rinawma

Pawl chhuak chuan anmahni an inhre ngei ang. Kohhrana inkhawm a awm laia hmun danga inkhawmte hi pawlah buai lovin Krista chanchin kan buaipui zawk a, van thilpek vawi khat tem tawh hnua tluksan leh mai lovin, pawla la buai hi chu i tawngtaipui zawk ang u. – Pawla buai lo

Keima sawisel ni lovin, Pathian thuin a fak lo a ni zawk. Pathian hla sak laia a inchei dan thenkhat hi chu a mawi lem lo hle mai. Lengzem leh lenglawng sa chu ni se a pawi lem lo; mahse, Pathian fakna hla sa a ni tlat si. Chuvang chuan engpawh ni sela, a awm dan chu Krista chanchin tha nen inmawi phawt rawh se. Mizovin kan hman culture-a inchei dan kan nei a, Mizo hnam culture kha chawisang ve se a that ka ring. Sapho chu an hnam culture ang khan lo inchei mah sela kan sawisel phak a ni reng reng lo; mahse, chu pawh chu hmeichhiain mipa thawmhnaw inbel a mawi lo va, mipain hmeichhe thawmhnaw inbel a mawi lo a ti si a ni. A lo ngaisangtute mit a khup a, kan beng a thlep hlawm a ni. – Mawitea

Kelkang harhna chhim kan awm ve tawh em ka hre lo va, kei pawhin ka la chhim bik chuang lo. A kal tawhte atanga report han ngaihthlak atang chuan a nawm hmelin a ropui hle mai. Hetiang Pathian hnathawh ropui tak, ram pumin a buaipui hi kan tawng khat ta khawp mai. An sawi atanga ka lo hriat dan chuan a khaw mipuite an fakawm ka va ti em! Presbytery Inkhawmpui pawh thleng ngam lo thinin a mi sing tel an han mikhual a ni a, kei chu Pathian hnathawh mak tak ka ti lo thei lo. Duh leh mi chuan ‘Kelkang kal kher kher’ lo ti mai mai rawh se, ‘a kal thei chu kal zel rawh se,’ ka ti zel zawk dawn. – MkSiama

HManni deuh khan, tunge a nih ka hre ta chiah lo, he Sawhkhawk huangah hian Kohhran hruaitute sawisel hi a tha lo tih lam hawiin rawn chhuah a ni a. Ka thlawp zawng tak a ni. A bikin Presbyterian Kohhran hi Inkhawmpui leh rorelna hmanga kal an ni a, mi pakhat thuin thil an ti lo va, an hmalakna avanga tu emaw bik lo sawisel chiam chiam hi a tha lo. Tin, Kohhran chu kan pi leh pute khan an sawisel ngam ngai lo kha a ni a, thangtharte hi kan fingin kan huai ta mah mah a, an rorel dan kan duhkhawp chiah lo a nih pawhin a pawnga puia sel leh rel chiam chiam hi sum a tha khawp mai. Mi tinin ngaihdan hrang hrang kan nei a, kan ngaihdan lo deuhva kal chang a awm pawha ngawih mai hun a awm a, mahni vei zawng apiang au chhuahpui pawp pawp chi hi mi rawn an tam lo a nia. – Kohhran mi

Hna a vang, hna a vang,’ an ti hi chu pawm harsa ka ti thin. Rim taka hnathawka eia in turin kan Pathian pawhin min ti a. Eng hna pawh thawk ila, rinawm tak leh taima taka kan thawh phawt chuan chutah chuan malsawmna a awm a, hahdam taka hnathawh tum kan tam ta deuh a ni lo maw? Miin huan lo ram an siam pawhin rim tak leh taima takin an thawk a, kum tawpah rah duhawm tak an seng thin. Hawh u, kan phak tawk theuhvah hian rinawm leh taima takin eng hna pawh i thawk suau suau ang u hmiang. Mi taima tan chuan hnathawh sen loh a awm reng si a. – 8415052704

Lawm nachang hre lote leh mi sualte chungah a ngilnei si thin a. He thu hi ka thinlung lairilah a cham reng a, mi zawng zawng hian hre fiah thiam ila, hmelmapa sual Setana hi kan titlawm chiang ngawt ang. Mahse, a then pawh kan hre lo tih ang deuh hian PATHIAN?thu tak la hre fiah thiam lo tam zawkna khawvel a la ni bawk si. Buh seng tur a tam, sengtu tur an tlem si. – Chhuanpuia

Zuk leh hmuam i vei hi chu a tha thlawt alawm, zuk leh hmuam that lohzia i vei ang tluk zet hian ei ruk that lohzia hi han vei phei la chu a tha ngawt ang. Zuk leh hmuam that lohzia i sawi i sawi a, ei ruk that lohzia pawh hi sawi ve thin la maw le! Nge, in ei ru nasa lutuk a, i sawi ngam lo zawk? Mihring hian kan fihlim lohna thil hi chu kan sawi ngam lo thin reng a ni. Ei ruk chungchangah hian in chhungkua fihlim ula chu i sawi ve thin ngei ang. In fihlim loh vanga sawi ngai lo mai niin i lang. Chubakah zuk leh hmuam hian Pathian thinurna a tawngbaw lo reng reng bawk a, ei rukna thil hi chuan Pathian thinurna a la tawngbaw dawn a ni. Zuk leh hmuam hi ka fak a ni lo, Pathian thu-ah pawh a that lohzia kan hmu a, kei pawhin ka fak a ni bik lo, tha ka ti bik hauh lo. – This Generation

Zu in, khaini, Sahdah hmuam, tualthat te,, rukru, uire, KS te, sual te leh lian Pathian mithmuhah chuan a awm chuang lo va, mihring hian sual te leh lian kan lo thliar hrang vel mai mai a ni, kan ngaihtuah chiang lo thin a ni. Chutih rual chuan Pathianin ngaihdam theih loh a nei lo kan ti leh lawi a, Bible kan chhiar chuan heti hian kan hmu a ni, Johana 8:24-ah, ‘Chuvangin, in hnenah in sual nei rengin in thi mawlh ang,’ tih kan hmu a, amah a ni tih kan rin loh chuan eng thil sual mah ti lo mah ila Lal Isua Pathiana kan pawm theih loh chuan sual renga thihna a ni si. – A.K.C

Facebooktwittergoogle_plusredditpinterestlinkedinmail

Lungphum phum

Aizawl: Zirtawpni khan Guwahati-a UPC kohhran rama building sakna lungphum phum turin UPC kohhran hruaitute an zin chhuak.

Guwahati chhungah hian kum 2014 khan ram tha tak leiin Biak In, Quarters, Lodge leh Guest house sak tura ruahman a ni a, sakna tur Lungphum phum turin Rev. V.L Dika Sailo, Gen. Supdt., Rev. Zohmingthanzama, General Missions Director, Rev. V.L Tluanga Sinate, Gen. Missions Secretary te chu an kal ta a ni.

Niminah Lungphum phumin a lawmna programme buatsaih a ni ang. Sak tan mai theih turin buaipui ngai tifelin a hmunhma pawh siam fel tawh a ni.

Facebooktwittergoogle_plusredditpinterestlinkedinmail

PYF Confe.

Aizawl: May 1 – 3, 2015 chhung hian Presbyterian Youth Fellowship (PYF) Biennial Conference vawi 21-na, Khliehriat Presbyterian Church (KJP Synod Mihngi) an neih a ni dawn a, thupuiah ‘Youth, the aroma of Christ’ (II Cor. 2:15) an hmang ang. He PYF Biennial Conference-ah hian KTP aiawha palai turin Central KTP hruaitute, Mizoram Synod Choir leh Palai ruat sa nen an vaiin mi 100 vel kal tura beisei an ni.

Facebooktwittergoogle_plusredditpinterestlinkedinmail

Login

Lost your password?