Monthly Archives: May 2015

Feature L: Pangpar in ti eizawnna a tling meuh maw? Eizawnna a tling meuh a maw

Aizawl nu thenkhat chuan in chung zawl remchangah Pangpar an chinga, an pangpar chin te chu zuar in kum khatah cheng nuai 10 aia tam te sum an la lut thin.

Pangpar ching te hian Pangpar huan hran bik nei lo in, in chung zawl leh remchang laiah pangpar hi an ching mai thin a, in chung zawl nei zau deuh te chuan Green House an siam thin a. Pangpar te chu in lamah an zawrh bakah inrinni bazar-ah te an thut puiin, tuk khatah cheng sing chuang sum an la lut thin.

Aizawl nu thenkhat pangpar ching thinte hian 1979 atang daih tawh khan Mizoram Florist Association an lo din tawh a, he pawlah hian mi sangkhat aia tam an tel tawh a ni. He pawl a tel thenkhatte hi chuan Pangpar huan lian tham tak an neih rualin, thenkhat erawh nuam an tih avanga mahni in bul hnaia pangpar chingte an ni thung. Green House lian tak nei leh huan siam kher lo te pawh hian Pangpar an chin atang hian sum an la lut vek a, sum an lak luh tam dan erawh a in ang lo hle thung. Thenkhat chu hna tak taka nei an nih avangin kum khat cheng nuai 10 aia tam lalut an awm rualin thenkhat erawh chuan hna bera an neih loh avangin cheng nuai khat atang nuai hnih bawr vel la lut te pawh an awm bawk. A enga pawh chi nise eizawnna a nih loh pawhin sum hnar pakhat; sum khawlna tha tak chu a ni tawh tih a chiang phawt.

Vanlalthari Ramthar chuan Pangpar chin chu an in tih hmuh chho zal thu sawiin,’thenkhat hi chuan eizawn nan taka hmang lo a nuam an tih avanga ching te pawh an awm a, Fair a awm chuan an zuar chhuak ve chauh thin’ a ti a. Thenkhat erawh eizawnnan tak taka hmanga kum khata nuai 10 ai tam la lut an awm thu a sawi.

Pangpar ching zinga sum la lut hnem pawl tak Latei Ramthar chuan pangpar buaipui chu thil hauh tak a nih thu a sawiin,’balu leh bawng ek lei nan ringawt pawh sum sen a tam ve khawp mai, bakah thlai dang ang lo taka enkawl thiam ngai a ni bawk sia buaipui ve viau chu a ngai a ti a. Chhungkua in kan buaipuia hlawhfa te kan la a, eizawnnan ber kan hmang tawh a, in lamah an rawn lei bakah bazar kan zuar chhuak bawk thin a ni a ti.

Pangpar te hi sik leh sa a zirin hralh tam bik an neih thin thu an sawi a. Mizo pangpar Zamzo leh derhken chu hralh tam ber pawl a ni.

Thenkhatin Aizawl nu inbengbel tawh te’n an hlawkpuia a bak awmzia awm tak tak lo niin an sawi fo thin. Chutih rualin berh te atanga bul tana hlawhtling an awm tho tho a, sum lakluhna chu a ni phawt maia, sum lut na na na chuan tangkaina mual chu a neivde ang. Pawngpar buaipui tak tak sum lu neih tam loh avanga an duh anga hmasawn theih lo te hian sawrkar lamah puihna an dawng a ni thei a, chutihrualin tunai hian chhawmdawlna lian zawk an mamawh khawp ang. NLUP ah thu ni tase a fuh theih ang em? Ngaihtuah chhunzawm ve teh u !!
%%%%%%

Facebooktwittergoogle_plusredditpinterestlinkedinmail

Sikul timing: Central ah Edu. Minister hek tum

Aizawl: Sikul tan hma duhlo a chaw nghei mek te chuan School Education Minister H.Rohluna chu central ah hek an tum a, tunkar chhung hian an hekna hi thawn hman an tum.

Sikul tan hma duhlo pawl hian Zirtawpni khan School Education Minister hi a pisa ah hmuin an inkawm a, hmasawnna awm lovin an inthen. Zalen-in a biak naah sikul tan hma duh lo pawl hruaitute chuan sikul tan hma anih avangin zirlai tam takin an tlai phah thu te, an awmna a hlat avanga sikul tha zawka lut theilo an awm thu te, sikul naupang bang hmain damdawi an khawih thu te, chaw eipuar hmanlo a sikul an kal thu leh economic thleng pawha a nghawng thu te Minister hnenah hian an thlen tih a sawi a. Mahse Minister chhan danah an rilru a na hle tih an sawi bawk.

Sikul tan hma duh lo pawl hian MSU Regional Office, Lungleiah a hma anga sikul tan a nih leh phutnan chaw ngheiin an nuar mek a. Nimin thleng khan mi 12 in chaw an la nghei a, May ni 25 atang khan Doctor check leh tlawh pawh an duh tawh lo a, an thilphut a hlawhtlin hma chuan chawnghei pawh bansan an tum lo niin an sawi.

Facebooktwittergoogle_plusredditpinterestlinkedinmail

Vawk chi vawnthatna hmuchhuak

Aizawl: Dr.H.Lalzar-liana, Regional Boar Semen Station, Selesih a thawk mek chuan vawk chi (semen) hun rei zawk vawnthatna a hmu-chhuak a, a damdawi hmuhchhuah hmang hian vawk chi chu ni 5 chhung thlengin vawnthat theih a ni.

Vawk kahrai (artificial insemination) na tura vawkpa chi lakchhuah hi vawnthat a nih loh chuan hun reilote chhungin a chakna hlohin hmantlak lovah a chang mai thin a. Mahse tunah damdawi hmuh-chhuah thar hmanga dahthat/vawnthat anih chuan ni 5 chhung thlengin vawkpa chi hi hmantheih a ni dawn a ni. Dr. H.Lalzarliana chuan enchhinna an kalpui tawhah Artificial Insemination hmanga vawk an kah zingah mipui vawk chu 60% an rai a, farm a enkawl te erawh chu 78% an rai tih Zalen a hrilh a. Farm a vawk rai an tam zawk chhan hi uluk taka enkawl an nih bik vang nia a hriat thu a sawi bawk.

Vawk kahrai (artificial insemination) chu vawkpui tan pawh a hrisel tih sawiin, “Vawkpain a nu a pawl hi chuan natna hrang hrang kaidarh a ti awlsam a, vawk kahrai erawh chu a damdawi hi laboratory ah thianghlim taka vawn anih avangin a him bik a ni,” a ti a. Vawk kahrai hmangin vawkpuiin no 8-12 te an nei thei tih a sawi bawk.

Facebooktwittergoogle_plusredditpinterestlinkedinmail

Kelkang pantu an pung zel

Aizawl: Kelkang Harhna chhima pantu chu a ni telin an pung zel a, tunkar chhung khan mi 7500 velin an chamchilh nia thudawn a ni.

Kelkang Kohhran Secretary Upa Chawithanga chuan an harsatna ber chu tui leh riahna a ni tih Zalen a hrilh a. “Tui chawi nan Pu F.Kapsanga te chhungin tank lorry min pe tawp a, a tui man hi kohhran in kan tum ve thung a, heti chung hian tui hi kan la harsa hle a. Hei bakah mikhual an tam avangin hall, sikul leh biakin ah te riahtir an ngai a, riahna tur tha kan pe theilo hi hrehawm kan ti hle a ni,” a ti. An hmalam hun zel chu Pathian kutah an nghat tawp tih sawiin Upa Chawia chuan, “Chhunzan zawmin mikhual buaipui a ngai a, ram hna thawk hman pawh kan ni lova. Mikhual tin hunah engtin nge kan awm dawn tih pawh kan ngaihtuah lo a, a nih nih kan ni tawp mai ang kan ti a ni,” a ti.

Mikhual chungchang sawiin, “Kan khaw mihring let 14/15 te mikhual kan nei thin a, kan tan chuan han buaipui ngaihna a awm lova. Thlarau thinghlimin a tul angin engkim min thawhsak vangin vawiin thlenga mikhual hi buaipui thei chauh kan ni,” a ti a. Zoram mipuiin an tawngtaisak thinna avanga hetiang hun thleng thei an ni tih a sawi bawk.

Facebooktwittergoogle_plusredditpinterestlinkedinmail

GAS: Mipuiin an tuar-MCU

Aizawl: Mizoram Consumers Union chuan Gas Distributor tam zawkin sawrkar thu chhuak leh company guidelines an zawm duh loh avangin Consumer ten an tuar mek niin an sawi.

MCU thuchhuah tarlan danin Distributor ten sawrkar leh company dan an zawm loh nia an sawi te chu Consumer Card-ah Gas lak ni (delivery date) an ziak ngei tur a ni a, Cash memo an issue ngei tur a ni a. Consumer Card Xerox copy an phut (demand) tawh lo tur a ni. Consumer ten pawisa (subsidy) an dawn loh pawhin Cash Memo leh Consumer Card a ziah hi a tangkai dawn a, document anih bakah ‘mandatory’ a nih avangin an issue ngei tur a ni. Central sawrkar thu angin chhungkaw khat in LPG connection pakhat chauh ‘subsidy’ atan phal a ni a, a pahnih/pathumna etc chu non-subsidy category ah dah in Form-5 hmang a register tur a tih a ni. Hei hi nakin zel atan pawh ala tangkai dawn a ni. Heng hi Distributor ten an consumer te an hrilhfiah tur a ni.

Consumer in LPG Consumer No. leh Account No. te Form 3 leh 4 hmangin (Adhaar Card nei tawh chuan Form 1 leh 2 hmangin) an tih fel hnu ah, National Payment Corporation of India kaltlangin Permanent Advance Rs. 568/- consumer Account ah a lut tur a ni a, consumer in Gas a lak apiangin ni-hnih khat chhungin ‘subsidy-na’ Account ah a lut tur a ni. A lut lo anih chuan Distributor-ah Consumer No. leh hming leh Mobile No. te ziakin thlen nise, MCU office-ah a copy pek zel tur a ni, an ti a. Gas la si lova Account ah subsidy a luh chuan consumer lak ai midang hnenah pek a ni thei a, gas hi kumkhat chhungin bur 12 chauh subsidy-na pek theih a ni a, a bak chu subsidy pek theih a nih loh avangin a manto a lak zel tura ruahhman a ni, an ti bawk a.
Central Policy angin Gas hi Mobile leh IVRS hmanga book ve ngei anih theih nan IOC Ltd. hian Mizoram ah Distributor te tihhlawhtlintir ngei turin MCU chuan a phut tih an sawi a. Card holder a thih vang te, chhungkhat ni thin fapa emaw fanu emaw unau te indan/in hrang chang te hnenah gas connection hmingthlak in pawisa chawi a ngai lo niin an sawi a. voter ID nena hming inmil lo, hnam hming dah loh vang etc. te a consumer card-ah KYC Form hmang a correction siam tur a ni a, pawisa chawi a ngai lo tih sawiin harsatna nei chu MCU office-ah Consumer No. leh hming, Distributor hming leh mahni contact No. leh Address te, pawisa chawitir zat etc. nen thlen zel turin an ngen bawk..

Facebooktwittergoogle_plusredditpinterestlinkedinmail

ilcharah inbumna; fimkhur a tul

SAizawl: Silchar Mizoram House hnathawkte chuan inbumna a tam avangin sumdawng leh thil dang tia kalte chu fimkhur lehzual turin an duh. Kum 30 chuang chei that (renovate) tawh loh ni mahse 2014-2015 khan pawisa lakluhah an target an khum a, a vaia belh khawm chu Rs Nuai 54 a chuang a ni.

Inbumna hi a la awm deuh renga, motor lachhawng mi pakhat chu a thlenna hotel ah mutna damdawi hnamdang a thawhpuite’n an pek avangin Rs Nuai 3 an laksak tawh a, a harh chuan rawk a ni tih a hre chauh a ni. Bungraw danga sumdawng te pawh bum an ni fo tawh a, cash memo felfai tak nen lo chuan sumdawnna ti lo turin House a thawkte chuan mipui an rawn a, a pumpelh nan Mizoram House leh Synod Compound chhung chu a him ber niin an ngai. “Mizo te hi mi ring hma chi kan ni a, phone-ah tha takin an bia a, an innel hnuah Silchar lamah sumdawnna hlawk a awm thuin an thlem a, an bum ta thin a ni,” tiin an sawi.

Silchar Mizoram House hian room rent atangin Rs Nuai 10 leh ILP atangin Rs Nuai 50 chu 2014-2015 ah target ah an neih a, room rent ah Rs 13,30,692, ILP ah 40,91,301 an hmu bawk. Silchar chu thlawhkhum ni mahse ramri bawra awm leh ei leh bar lakluhna kawng ber a ni renga, hnamdang leh Mizo intihthiam loh thulhah palai hna thawktu ber an ni bawk a, Silchar leh a chhehvela Mizo chengte humtu leh Mizo ti hmingchhe zawnga khawsate buaipui leh thawnhaw thlengin House a thawk te chuan an hnaah a tel niin an ngai a, theihtawp an chhuah thin thu thu dawnna chuan an sawi.

Facebooktwittergoogle_plusredditpinterestlinkedinmail

‘Kau Tlabung MNF hunlai’ -Congress

Aizawl: Congress Party (MPCC Communication Department) chuan thuchhuah siamin Engineer te thubuai neihna chhan Kau Tlabung mini hydel project chu MNF sawrkar lai a ni an ti.

Nimina thuchhuah an siamah MPCC chuan Kau Tlabung chungchangah hian Pu Hawla tih hmingchhiat tumin mi thenkhatin nasa taka beiin, Supreme Court-ah an zual ko va, mahse court chuan thiam a chan tir a. Mahse tunhnaiah MNF hruaitu zingah sawizawm phet tum an awm leh nia sawiin he project hlawkpui ber tu nia rin chu mipuiin an nei niin an sawi a. Engineer ho thubuai neihna chhan chu Kau Tlabung hi kum 1999 a zawh fel vek tawh ni si kum 2001 khan engineer te hian nuai 1470 laiin Revised Estimate an siam leh a, hei hi Pu Zoramthanga CM lai leh Power Minister anih hunlai a ni a. Hnathawh tur zawng zawng thawh zawh vek hnu, a thawktu Engineer te pawh an sawn darh vek hnu a Revised estimate cheng vaibelchhe tam tak siam nawn leh tu hi he Project hlawkpuitu ber chu a ni ngei ang, an ti.

Facebooktwittergoogle_plusredditpinterestlinkedinmail

Edu Options 2015- Zirna leh hna petu

Aizawl; Edu fest huaihawttu te’n kum danga pawha an huaihawt thin 13th Edu Options 2015 chu June 1 leh 2 hian Assembly Annex, Opposite Tennis court ah buatsaih a ni dawn a, zirlai leh nu leh pate tan a hlawhtheih a, 11AM ah tanin 5 PM thleng neih a ni ang.

University leh college tha sawmkhawm 40 zetin he Edu Options hi an rawn mawi dawna, a thlawnin counselling dawn theih a nih bakah college leh university a thawktu tak tak te chauh an lo kal dawn avangin spot admission pawh a theihnghal a ni. College tha phochhuah te chu duh duh thlan theih a ni dawn a, he hun hi a tangkai thei ang bera hmang turin organiser te chuan zirlaite an chah a ni. AMITY, Sharda University, Residency Bengaluru, IMS Unison, NITTE, Manipal, DIT Dehradun, American Centre te chu lo kal tur langsar zual a ni. Lo tel turte hi zirna in rintlak tak vek, UCG, NAAC, AICTE, MCI leh a tul dangtea recognised leh affiliation nei vek a ni a. ‘In phutna a awm a nih chuan an affiliantion certificate te hi tarchhuah a ni ang,’ tiin huaihawttute chuan an sawi. Kumin hian zirna in lar tak AIMS pawh beisei a ni.

” Edu Fest atanga admission ti ka ni a, Kolkataa ka zir zawh hnuah tun hian Health Department, Ayush ah Programme Manager hna ka thawh theih phaha, ka zirlia puite’na tangkaina hre zel sela ka duh a ni,” tiin sawrkar hnathawk hming tihlan duh lo chuan a sawi. He education fair atang hian thalai sang tam takin zirna tha leh man tlawm an hriat theih phah a, an zir zawh hnuah Zoram pawn emaw foreign thengin hna an pe theih a, Mizo thalai an tel nual tawh a, Mizoram sawrkar a hnahmu an awm zel bawk a. “A tangkai a ni tih hi mipuiin hre zel sela kan duh a ni,” tiin a huaihawttu Lynchpin chuan a ti.

Edu Options hi luhman a awm lo a, lucky draw neih a ni dawn a smartphones leh pendrives vawr an nih leh ang. Tihdan pangngaiin a mantute chu an thil man nen thlalak tarchhuah an ni leh ang.

Medical, Engineering, BBA, BCA, MBA, Designing, MBBS, Engineer- ing, Fashion, Air Hostess Training, Management, Bio-Technology leh a dangte an ni. Kum dang ang lo takin kumin hian Master Degree zirna zawng te tan pawh duhthlan tur a awm nual a, a duh tan ngaihven theih a ni bawk. Edu Options buatsaihtu Lynchpin hi National leh International leverl ah buaipuitu hlun an ni kum 10 chuang Mizoramah sulhnu tha an nei tawh bawk.a ni.

Facebooktwittergoogle_plusredditpinterestlinkedinmail

Halral dawn

June ni 10 chhun dar 12 khian Mizoram State Tobacco Control Society in vaihlo leh a kaihhnawih an mankhawm te chu State Referral Hospital, Falkawn ah Aizawl DC Dr. Franklin Laltinkhuma hovin an halral dawn.

Facebooktwittergoogle_plusredditpinterestlinkedinmail

Meeting

Naktip Thawhlehni chawhma dar 11 hian Chief Minister Conference hall-ah State Level Committee on Green Mizoram chu an chairman Chief Minister Lal Thanhawla hovin an meeting dawn.

Facebooktwittergoogle_plusredditpinterestlinkedinmail

Login

Lost your password?