Monthly Archives: May 2015

Naktip June ni 2,2015 chawhma dar 11 hian Public Accounts Committee chu an chairman K.Sangthuama hovin Assembly Committee Room ah an thukhawm dawn.

Facebooktwittergoogle_plusredditpinterestlinkedinmail

WNT Day

Vawiin May ni 31 hi khawvel puma zuk leh hmuam do ni ‘World No Tobacco Day’ a ni a, Pathianni anih vangin naktuk Thawhtanni chhun dar 12 hian Mizoram State Tobacco Control Society leh Indian Society on Tobacco & Health (Mizoram Chapter) bultumin Lal Thanhawla Auditorium-ah hman a ni dawn a, Chief Minister Lal Thanhawla khuallian a ni ang.

Facebooktwittergoogle_plusredditpinterestlinkedinmail

Tuitla

Nimin chawhnu dar 2 khan Chhimtuipuiah Sih tlang naupang 3 an tla a, an zinga 1 hi chhan hman a ni a, 2 an thi a, Ramthianghlima (12) s/o Lalengi leh Khawpuimawii (14) d/o Thangvela te an ni.

Facebooktwittergoogle_plusredditpinterestlinkedinmail

Pseudo Nuai 45 hu man

Aizawl; Nimin zing dar 9:45 khan Mizoram Excise & Narcotics Department, Anti-Narcotics Squad te chuan Edenthar -ah Pseudo-ephedrine mum 25,3736 (Kg 23.400) an man.
Damdawi hi Silchar lam atanga rawn lak, khawchhak lama hralh an tum mek lai a ni. Pseudo-ephedrine rual hian a neitute Lalbiakzuala (38) s/o Liankhawsaa (L), Tanhril Vengpui leh Lalliana (42) s/o Rosiamliana (L), Edenthar nia inchhalte man nghal an ni a, damdawi phurhnan a an hman motor Maruti Car (Wagon R) Regn. No MZ 01/G-7598 pawh hrensak an ni bawk. Damdawi te hi an zawrhna ang chuan a vaiin Rs. 45,67,248 man a ni.

Facebooktwittergoogle_plusredditpinterestlinkedinmail

Hmarchhak anga tan ho leh dik taka hnathawh

Union Minister of State for Home chuan kar kalta khan BJP sawrkar kum khatna a tlin thu leh hemi hun chhunga Central in hma a laknate Mizoram rawn tlawhin press mite a hrilh a. Central-a BJP sawrkar chuan hmasawnna kawngah theih tawp a chhuah thu a sawi a. North East mi a nih angin Central a North East Minister te nen tangrualin NE tan hma an lak nasat thu a sawi a. Prime Minister Modi an ni 15 danah Union Minister 1 talin thuthchilh reng turin a thu pe a, NE mamawh chu a hmuna kal chilh loh chuan a hriat a har thu in a khar a ni. Party sawi loa Hmarchhak state ruling party te nen thawhhona tha a duh thu leh Central a party leh state a ruling party te chu party inang ah awm lo mahse inkaih kuah tha a tih thu a sawi a. NE a hmasawnna hna dik taka kal pui a project pawisa dik taka hman a nih chuan a aia tam a awm theih tur thu uar takin a sawi bawk.

Rijiju-an a sawi te hi NE state te mawmawh a ni a, a ti tak tak a nih chuuan thil namai lo tak a ni a, Central a North East mi, Minister leh Member of Parliament bakah State 8 sawrkar an tanho theih chuan hmasawnna nasa tak a thleng thei a, inthuam thatna hun remchang a ni thei bawk a ni.

Hmarchhakah hian a tlangpuiin Project pawisa a nihna turin an hmang lo fo a, hna hralh chhawn a tam a. Hmarchhak siam that nana sum lokal turte phei chu a a tahtawla pek a ni a, a dawta sum lo kal leh tur a nghawng thei a, tha taka hnathawh a pawimawh. Sawrkar hnathawk leh hna lian thawktute chuan dik taka an thawh a pawimawh zual hle mai.
Eiruk emaw hna thawh mai maina hian kan ram work culture a luhchhuah thui tawha, tun sawrkar pawhin sawrkarna an lak theihna chhan chu eiruk tihreh an duh thu an tlangaupui vang a ni pakhat. ‘Ei rukna chu a zung chawpa phawi a phoro’ tawngkam te a lar phah hle.

Pawisa atchilhna leh pawisa a lei theih bungraw chauh hlutna (materialism) hi khawvel hmasawnna in a ken tel a ni a, chumi piah lamah Mizo ziaa dan ngaihzamna a lian a, thil kan indilpui leh insawi pui kan ching a, inhnar hreh leh inhmaizah vang te pawh a ni ang, a diltu chu a hlawhtling leh mai thin a ni. Hei hi hmasawnna daltu lian a ni a, inhnial thlak tawp a theih loh pawhin chin neih neih a tul hle. Lunglei leh Aizawl inkar World Bank kawng siam a nih lai khan media te’n an tlawh a. Hna tam tak chu sub contract a pek chhawn a ni. Lungchhia hman a ni nual a, hnalian khawihtu/ thawktu hnamdang company hnathawk te chuan ‘keini chu kal mai tur kan ni a, kawng hi in ro, in ta tur a ni a, a tha tak tak in duhlo em ni?’ tiin Mizo hlawhfa te chu an hau thin a ni. Hnamdang zawk pawhin chutiang chu min endan a nih chuan beng sika in enlet a tul hle mai.

Hmarchhak biala hmasawnna a awm theih nan ministry hran a awm hial a, tun hma atangin mi diklo te’n sum siam nan an hmang nasa a, DoNER pawh a fimkhur tawh a, mimal project nazawng a pe tawh lo a, chu chauh chu a nghawng chhuah a ni loa thangthar zawk, dik taka thawk duhte tan kawng an khar sak zawk a ni. Tun atang hian bul tan tha ang u.

Facebooktwittergoogle_plusredditpinterestlinkedinmail

Special state Category hamthatna tihtawp dawn?

Sorkar laipuiin India ram sum leh pai lama inrelbawl dan kalphung a tidanglam mek a, finance commission-in a rawt angin state pachhe zualte (special category states) hamthatna dawn thin pawh tihtawp a tum tak avangin hmarchhak a chief minister-te an lawm lo hle a. Tun thla (May) laihawl khan hmarchhak state pasarih leh Sikkim chief minister-ten a huho a thuchhuah siamin state hnufual zawkte hamthatna tur (special category status) tihtawp tuma sorkar laipui hmalakna reng reng dodal an tum thu an puang.

Special category status hi tihtawp a nih chuan sorkar laipui atanga hmarchhak state-ten sum an dawn thin tam tak a bo dawn tihna a ni a. Chu chuan harsatna nasa tak a thlen ngei dawnin a lang. Chief minister-te hian an thutlukna siam hi prime minister Narendra Modi hnenah an thawn nghal a. Hetia thuchhuah intawm an siam bakah hian chief minister thenkhatte hi chu na takin an tawng a, sorkar laipui an nawr zui bawk. Hmarchhakah hian BJP sorkarna state a awm lo a – Nangaland-ah NPF (BJP telna) an sorkar mek a, Assam, Arunachal Pradesh, Mizoram, Manipur leh Meghalaya te hi congress sorkarna a ni hlawm a, Tripura-ah CPM an sorkar a, Sikkim-ah SDF an sorkar bawk.
Special category status-ah hian tun dinhmunah state sawmpakhat an awm a, hengte hi state hnufual bik, sorkar laipuiin a bika a puih ngaite an ni a. Hmarchhak state pasarih leh Sikkim bakah Himachal Pradesh, Jammu & Kashmir leh Uttarakhand te hi chutiang dinhmunah chuan an awm mek a ni. A tirah chuan Assam, Jammu & Kashmir leh Nagaland te hi dah an ni phawt a. Chu chu kum 1969 kha a ni a, Fifth Finance Commission-in heng state pathumte hi an hnufual bik avanga leh harsatna an tawh avangin a bika tanpuina pek a rawt a. Chumi hnuah hun a lokal zel a, state dang pariat dah belh leh an ni ta a. Tichuan tunah hian vohbik (special category) state chu sawmpakhat an ni mek a ni.

Sorkar laipuiin special category state-te sum hman tur a pek dan hi ‘Gadgil formula’ an ti a, five year plan palina atanga hman tan a ni a, he formula duang chhuaktu Dr. D. R. Gadgil hi chutihlaia deputy chairman, planning commission chu a ni nghe nghe a. Chumi hnuah he formula hi siam danglam a ni a, kum zabi thar (2000-ah) pawh khan ennawn leh a ni a. Chumi tum chuan tanpuina pekna tehfung atan hian state hnathawh dan (‘performance’ by the respective states) tih chu telh a ni.

Special category state-te hnena sum pekna atana tehfung (Gadgil formula)-ah chuan mihring tam lam te, mi pakhat sum thawhchhuah zat te, chhiah lak zat leh sum hman dan te leh state-in harsatna an tawh mek te an hmang thin. A tawi zawngin sawi ta ila, sorkar laipuiin heng tehfung (Gadgil formula) hmang hian special category state-te hi pawisa a pek belh thin a. Mahse, chu chu tihtawp a tum ta a, chu chuan state pachhe zualte tan hian harsatna nasa tak a thleng thei a, a hmaa an dawn thin tanpuina a awm tak lohah chuan kawng dang dap an ngai dawn tihna a ni ang.
Awlsam taka sawi dawn chuan sorkar laipui atanga special category state-te sum hmuh thin dan chu 90:10 ratio a ni a, sorkar laipuiin 90% a tum laiin state sorkarin 10% a tum ve thin. Kan hriat dan tlanglawnah chuan kan state budget a sum mamawh zawng zawng za zela 90 hi sorkar laipui atanga dawn a ni a, chu’ng chu sorkar laipui nena chhiah intawm kan lak atang te leh thil dang atanga dawn thin a ni. Za zela 10 chu kan thawhchhuah ve tura ngaih a ni a, mahse, hei pawh hi hmarchhak state-te hian kan tlin meuh thin lo. Chutiang dinhmun a ding tan chuan special category status tihtawp tumna hi a nghahhlelhawm lo khawp ang. A bik takin sum hnar dang dap ngaihna hre vak lo kan sorkar ang chi tan phei hi chuan a huphurhawm zual awm e.

Hmarchhak state hrang hrang hruaituten thawm an neih mek lai hian sorkar laipui chuan a bika hamthatna an dawn thin hi sorkar laipui tih tawp ni loin 14th Finance Commission-in tihtawp tura a rawt vang niin an sawi thung. NDA sorkarin kum khat a tlin hma lawk May 23, 2015 khan union finance minister Arun Jaitley chuan special category state te hamthatna titawptu chu sorkar laipui ni loin 14th finance commission zawk hi a nih thu a sawi a. Chutiang chiah chuan minister of state for finance, Jayant Sinha pawhin tunhnai mai khan a sawi bawk.

A nihna takah chuan Modi-a sorkar hian state-te thuneihna sang zawk pek a tum a, sorkar laipui rinchhan lo a kal tum turin a fuih tan mek a. Chutiang a nih avang chuan sorkar laipui tanpuinaa innghat hlawm tawp state pachhe zualho pawh hian chu kalphung thar chu zui ve se a duh tihna a ni ber. Chu chu finance commission 14-na report-ah khan a lo lang chiang ta reng a, hmasawnna tura hmalak dan thiam deuh leh a ngaihna hre deuh, hnathawh tak tak tum state sorkar tan an inhawng viau ni pawhin a lang. 14th FC in a rawt angin chhiah lakkhawm atanga state sorkarte chan ve tur nasa takin tihpun a ni a (32% atangin 42% ah) a, state sorkar sum hmuh tur a pung dawn hle a. Heng special category state 11 te hnenah hian sum harsatna an tawh mek phuhrukna atan tanpuina (non-Plan revenue deficit grants) pek an ni dawn bawk. Heng hi kum danga an sum dawn thin nen chuan a inang chiah lo a, kawng hrang hranga harsatna tawk mek state hnufualte tan hian a hnemhnanpui tham kher lo ang. Sorkar laipui rinchhan rei tawh an nih bawk avangin vawikhata thlahthlam thut chu an dawl zo dawn lo tih a lang reng bawk. Chutiang karah chuan hmarchhak bial chief minister-te leh sorkar laipui hi an innawr chho zel dawn niin a lang.

Facebooktwittergoogle_plusredditpinterestlinkedinmail

Hmarchhak anga tan ho leh dik taka hnathawh

Union Minister of State for Home chuan kar kalta khan BJP sawrkar kum khatna a tlin thu leh hemi hun chhunga Central in hma a laknate Mizoram rawn tlawhin press mite a hrilh a. Central-a BJP sawrkar chuan hmasawnna kawngah theih tawp a chhuah thu a sawi a. North East mi a nih angin Central a North East Minister te nen tangrualin NE tan hma an lak nasat thu a sawi a. Prime Minister Modi an ni 15 danah Union Minister 1 talin thuthchilh reng turin a thu pe a, NE mamawh chu a hmuna kal chilh loh chuan a hriat a har thu in a khar a ni. Party sawi loa Hmarchhak state ruling party te nen thawhhona tha a duh thu leh Central a party leh state a ruling party te chu party inang ah awm lo mahse inkaih kuah tha a tih thu a sawi a. NE a hmasawnna hna dik taka kal pui a project pawisa dik taka hman a nih chuan a aia tam a awm theih tur thu uar takin a sawi bawk.
Rijiju-an a sawi te hi NE state te mawmawh a ni a, a ti tak tak a nih chuuan thil namai lo tak a ni a, Central a North East mi, Minister leh Member of Parliament bakah State 8 sawrkar an tanho theih chuan hmasawnna nasa tak a thleng thei a, inthuam thatna hun remchang a ni thei bawk a ni.

Hmarchhakah hian a tlangpuiin Project pawisa a nihna turin an hmang lo fo a, hna hralh chhawn a tam a. Hmarchhak siam that nana sum lokal turte phei chu a a tahtawla pek a ni a, a dawta sum lo kal leh tur a nghawng thei a, tha taka hnathawh a pawimawh. Sawrkar hnathawk leh hna lian thawktute chuan dik taka an thawh a pawimawh zual hle mai.
Eiruk emaw hna thawh mai maina hian kan ram work culture a luhchhuah thui tawha, tun sawrkar pawhin sawrkarna an lak theihna chhan chu eiruk tihreh an duh thu an tlangaupui vang a ni pakhat. ‘Ei rukna chu a zung chawpa phawi a phoro’ tawngkam te a lar phah hle.

Pawisa atchilhna leh pawisa a lei theih bungraw chauh hlutna (materialism) hi khawvel hmasawnna in a ken tel a ni a, chumi piah lamah Mizo ziaa dan ngaihzamna a lian a, thil kan indilpui leh insawi pui kan ching a, inhnar hreh leh inhmaizah vang te pawh a ni ang, a diltu chu a hlawhtling leh mai thin a ni. Hei hi hmasawnna daltu lian a ni a, inhnial thlak tawp a theih loh pawhin chin neih neih a tul hle. Lunglei leh Aizawl inkar World Bank kawng siam a nih lai khan media te’n an tlawh a. Hna tam tak chu sub contract a pek chhawn a ni. Lungchhia hman a ni nual a, hnalian khawihtu/ thawktu hnamdang company hnathawk te chuan ‘keini chu kal mai tur kan ni a, kawng hi in ro, in ta tur a ni a, a tha tak tak in duhlo em ni?’ tiin Mizo hlawhfa te chu an hau thin a ni. Hnamdang zawk pawhin chutiang chu min endan a nih chuan beng sika in enlet a tul hle mai.

Hmarchhak biala hmasawnna a awm theih nan ministry hran a awm hial a, tun hma atangin mi diklo te’n sum siam nan an hmang nasa a, DoNER pawh a fimkhur tawh a, mimal project nazawng a pe tawh lo a, chu chauh chu a nghawng chhuah a ni loa thangthar zawk, dik taka thawk duhte tan kawng an khar sak zawk a ni. Tun atang hian bul tan tha ang u.

Facebooktwittergoogle_plusredditpinterestlinkedinmail

Ka Huang May 31

Tun tum chu Mission Veng (incl. MSV thlang) leh Rahsi Veng (Thakthing Veng) leh Rahsi Venghnuai (Venghnuai) ka’n sawi pawlh nuai mai ang e. Kulikawn deptu veng a nih mai bakah insi reng leh inchawhpawlh an ni tlat bawk a.

Rahsi Veng (tuna Thakthing Veng hmingpu ta khi) a tir takah chuan Rahsi Veng tih a ni, a chhan chu tuna Venghlui kan tih tak – Treasury Square liama mi hi a tir chuan Rahsi Veng tih a ni a, Bawrhsapin Rahsiho dah nana a tih a ni awm e. Mahsela, ram vah an hrat si, sa an kah apiangin sa lu an lawm a, silai nen, tlang an tlir dur dur mai thin a ni awm e. Chu chu Bawrhsap chuan a ning leh si em ni tehreng, tuna Thakthing Veng kan tih takah hian a sawn ta hlawm a, chu chu kum 1905 thuar tham kha a ni awm e. A tir chuan Rahsi 7 vel an awm a, sawrkhar hnathawk lo chu awm an phal loh avangin tuna Venghnuai kan tih tak hi sawrkhar hnathawk ve loho chuan an bawm a. Rahsi Venghnuai hming a pu ta bawk a ni. Rahsi Veng hian biak in (Wales Mission) pawh Mission Veng biak in a tawm reng nghe nghe a, kohhran upa pawh ka hriat chinah pahnih – Upa Thanga leh Upa Zotuawnga te chu Mission Veng kohhran upa an ni. Tin, a mual lai, tuna Primary sikul emaw ni a hman saw Zawlbuk a ni thin. Saw vengah pawh sawn tin-zu (zu sawr) kan in nasa mai thin. Nula pawh ka rim nasa hle thin. Min ngaizawng an awm loh vang ni maw? Ngaihzawng bulfuk ka neih pawh ka hre lo.

Tum khat chu, Lalhmelthaa te nen Pu Tunga inah zu kan in a, Lalhmela chuan a ramvahnaa a them tlawzia a sawi a – Republic (kan tih tak)-ah khian kawr dunga thehlei chhuk lai ding chat hi kan kap a, ka thelh chiang khawp a, a tlan thla zawr zawr a; mahse, a ral lehlam atang chuan eng emaw hi a lo lir thla tawp tawp a, ka zuk tlan a, Varung hi a lo ni reng mai a tih thu hi a sawi a. Pu Tunga pawh chuan kei pawh hnai em em maiah chiang em emin Sakuh ka kap thelh a, “Kan feh hawng – Mualpui kawnah khuan kan thim chhawlh tawh a, sakuh hian min lo hrawk nasa mai a, a hmuh theih tawh si lo a, a hram ri chu chhui dawnin ka tin a, ka hnaih zel a, hnai tawk taa ka hriat avangin ka’n hmet a, a puak dawt mai a; mahse, ka silai ngul hnuaiah chuan a lo awm reng niin, ka silai ngul chu a do kang dawrh mai, a hnaih tehlul nen ka thelh nasa a nia,” a ti nia. Chawlhni tlaiah hian saw – LAD Directorate kawt zawlah sawn nula rual inbahnaah tlangval rual kan thawk pa/nu/u/nau/ni/pu/pi leh eng eng emaw lai thin a, bahpui leh phut tih ang chhuihkah nen, kan te re ru thin, nuam tak a ni nuam tak. Thlasik laiin zanah tui kan chawipui a, Rahsi Veng sawn tuikhur an pualin an nei lo a niang. Venghnuai thlanga Lungrem tuikhur an tih kha kan chawi thin. Lalchhingpuii (tuna Khatla), Rualchhingi (tuna Mission Veng), Kapthangpuii, Kungliani te ho nen khan tuikang nghah hi kan hrat hle. Tlangval tan chuan tui a kang nasat poh leh nuam kan ti a ni mai. Khawvawh lai a lo ni deuh ngei a, thingtang ilo fawm khawmin mei kan chhem a, ai a nuam teh a nia.

Tum khat – Sapthlenga (Rinthanga) nen, Bawra (Vanzama) nen kan pathumin Kungliani te kan han thawi puat a, tlangval dang pawh an tam mai, kan chiar nawk nawk a, thut pawh thu loin kan chhuak leh ta mai a, a hmaa ruah a sur avangin a diak deuh chuap a, Venghnuai peng kan thlen phei dawn chuan Sapthlenga chuan eng emawin min tai min tai mai tiin a ngal rek chu a zuk dap a le – laphiar sa zungza bawk vel leh phiar fung hian a ke a lo zem chu niin, laphiar hrui chu a la awm bawk si, kan chhui phei leh ta a, la chu la phiarah chuan kan leh hlum zel a, Kungliani te inah chuan kan chhui lut chat mai. Lahlum khan kawngka a kân ve theih loh avangin a vir a vir mai a lo ni. Kha phiar puitling thei tak maw!

UPC an din dawn vel kha ni ta berin ka hria – Pu Lianbuka, Accountant, DC office kha, (CHKI pa) inah khan Doveri ho khan an inkhawm thin. Tlangval eng emaw zat chuan inkhawm kha kan pelh lo a ni. Mahse, kan kal chhan ve kha nula leng lo, tukverh bawha ding, an hnung lama bawhchhawn ve tur zawng kha kan ni ber, Doveri pawh kha kan hmu meuh thin awm lo ve! Venghnuai hi chu Salvation Army thathnemna lam a ni. Chhang zuar an tam hle. Nula ka rim tam lo hle. Nimahsela, U Rokunga khan Khrismas Carol Party a ho thin a, Zokaii te unau, Biaknungi te unau, Ziki te nen chuan kan inkawmngeih hle tho.

Dam Veng hi, Khrismas leh Kumtharah chuan Venghnuaiah an bet thin. Kum 1951 atang kha chuan an veng bilin an ti hrang ve ta a. An tih hmasak ber kum chuan Sial lian fu an lei a, an ni hnih daih tur an dah a, a bak chu an hralh vek a, an hlawk phian, thawh loa Khrismas nawn an ni hialin ka hria. Ngaihzawng ka neih avangin (min ngaizawng ka ti lo a nia aw) Kumthar chuan ka tel ve ta a, Re. 1/- ka thawh a (khatih lai khan se sa kha serah duli (50 paise) a tling lo). Ngaihzawngte awmnaa zai chu, mahni veng ni mah suh se nuam tak a ni tho mai.

Dam Veng pawh hi tuikang an nghak tho mai. Thangthar tui connection neiten tuikang nghah tih awmzia a hriat a harin, a ho tih mai a awl ang. Van ruahtui, tuibel neiin an dawh a, khang hun laia kan tuibelte kha chu thin thlenga sang, feet 3/4 hawlh tlang a ni mai a, rei rin chi a ni hek lo, tuikhur tui kha rinrawla kan neih chu a ni ber. Dam Veng pawh chuan Lungrem tuikhur bawk an chawi ber thin. Nula tui-um 9 phur chu nula chak tak an ni chawk. Mipa (a rimtu) hi chuan um khatte kan put hawpui ve vau vau thin! Tuikhur bula nula leh tlangval 10 dawn dawn han inkherawlai vel kha nuam kan ti a ni ber ang. Nula, tuichawi lo thei loho lahin tlangval kan tel ve takah chuan an lo thlamuan phah ve leh bawk nen, hrehawm an tih chiam pawh ka hre bik lo.

Mission Veng, Dawrkai Veng leh Vengthlang a tel leng rih lo, a dawt lehah.

Facebooktwittergoogle_plusredditpinterestlinkedinmail

Sakhua (May 31, 2014)

HSLC tithate lawmpuina hlan
Aizawl: Nilaini chawhnu khan Synod Education Board chuan Synod Office Committee Room No.2-ah kum 2015 HSLC result-a titha Presbyterian English School zirlaite hnena lawmman sem inkhawm a buatsaih.
Inkhawm hi Pu Rozama Chawngthu, Secretary, Synod Education Board-in a kaihruai a, Upa D.P. Biakkhuma,
Presbyterian English School Supervisor hnen atangin reports ngaihthlak a ni. Upa H. Ronghaka, Synod Secretary (Jr.)-in thu a sawi a, Rev. P.C. Pachhunga, Executive Secretary i/c Education-in lawmman a sem. A duh apiang tan thusawina hun hawn a ni a, banah thingpui ruai kil ho a ni.
Kum 2015-a HSLC result tihchhuah takah khan Presbyterian English School 16 atangin zirlai 270 zetin exam an bei a, an zinga 28-in Distinction-ah passed-in first division 85 an awm a, second division-ah 93 passed-in third division 38 an awm. Compartment exam chance nei 7 an awm a, passed zawng zawng hi 244 niin pass percentage chu 90.38 a ni. Zirlai 85-in subject hrang hrangah letter an hmu a, subject zawng zawnga letter hmu vek zirlai 4 an awm. Exam zawng zawng passed kim vekna school 6 an awm a, zaa 90 chin chung lam passed phak school 2 an awm a, zaa 80 chin chung lam passed phak school 3 an awm bawk.
School titha ber chu Darlawn Presbyterian English School an ni a, anni hian lawmman atan Desktop Computer an dawng a. Pahnihna chu Serchhip Presbyterian English School niin lawmman atan pawisa fai Rs.12,000/- an dawng
a, pathumna chu Khawzawl Vengthar Presbyterian English School niin lawmman atan pawisa fai Rs.10,000/- an dawng. Heng bakah hian school pathum- Keifang, Saitual leh Durtlang Presbyterian English School-te hnenah Consolation Prize Rs.5,000/- theuh hlan an ni.
Zirlai naupang titha zual mi 28 hnenah Laptop Computer pek vek a ni a, a tha zual top 3-te hnenah Laptop tha bik pek a ni. Presbyterian English School zirlai zinga HSLC result-a titha ber chu Agnes Lalnunhlui D/o John Laldinthara, Keifang Presbyterian English School a ni a, ani hian Mark 446 hmuin HSLC Topper aiin mark 19 chauhvin a hmu tlem a. Subject
zawng zawngah Letter a hmu vek a ni. Pahnihna chu Lalrindiki D/o Lalramthara, Darlawn Presbyterian English School a ni a, Mark 445 hmuin subject zawng zawngah Letter a hmu vek bawk. Pathumna chu Rebeck Lalhruaitluangi D/o Lalteka, Darlawn Presbyterian English School niin Mark 440 a hmu a, subject pakhatah chiah Letter a hmu lo a ni.
%%%%%%%%%%%

Mission Orientation Prog. khar
Aizawl; Synod Mission Board chuan Mission Field-a thawk Pastor te puala Missionary Training College, Mission Vengthlanga Mission Orientation Programme a buatsaih chu Ningani khan khar a ni. Field Secretary 1 leh Missionary Pastor 17 an tel.
Orientation hi May 18 atanga tan kha a ni a, kharna inkhawmah hian Rev. Lalchhuanmawia, Synod Mission Board Secretary-in thu a sawi.
Cultural Anthropology & Christian Misssion – Rev. Dr. K.Lalrinkima; Evangelism & Church Planting – Rev. C.Chawngliana; Contemporary Theology of Mission – Rev. Remlalfaka; Mission Strategy – Pu R.Lalnun-tluanga; Social Justice & Civil Law – Sylvie Zomuanpuii; Administration & Personal Management – Rev. K.Lalpiangthara; Conversion Issues in India – Rev. Vanlalrova Khiangte; Practical Issues in Mission – Rev. C.Zorammawia; Missionary Life & Practical Challenges (Pastor Perspective) – Rev. Vanlalchhunga; Missionary Life & Practical Challenges (Missionary Perspective) – Pu R.Lalchhanhima; Language Learning Technique – Dr. Lalrindiki Fanai; Mental Health Awarness – T.Upa Dr. Hrekima; Account Training – Upa C.Lalmuakima leh SMB Office Matters – Upa Lalrinmuana ziahte an zirho a ni.
%%%%%%%%%%

Lunglei PBS tan
Aizawl; June 1, 2015, Thawhtanni atang hian Lunglei District Bible School, Pentecostal Bible School (PBS) chu tan a ni leh dawn ta.
PBS hi Lunglei District hnuaia Bible School niin Certificate course a ni a, kum khatah thla khat pum hlum chhungin Pathian thu zir thin a ni.
June 1, 2015 hian Registration tih tan a ni ang a, chawhnu lamah Orientation tih a ni ang. Kumin hian zirlai 23 awm turin chhinchhiah an ni a, 1st year zirlai 10 awmin, 2nd year 8 leh 3rd year zirtur mi 5 an awm bawk a ni.
Zirtirtu tur leh an subject lak turte ruahman nghal a ni a. Major Prophets & Eschatology chu Pastor K.Vanlalhruaia’n a zirtir ang a; Bible Doctrine & Pentecostal History chu Pastor K.Lalrokima’n a zirtir ang a; Leadership & Public Speaking chu Rev. C.Lalrintluanga’an a zirtir ang a; Major Religion chu Pastor Jerry Lalmuanawma’an a zirtir ang a; Church Administration (Manual-a zir tur) chu Rev. C.Lalrintluanga’n a zirtir dawn bawk a ni.
%%%%%%%%%

Edu. Board thu
Aizawl; May 26, 2015 khan UPC?North East India Aizawl East District enkawl Christian Education Center Board chu an thukhawm a, thu pawimawh tak tak an ngaihtuah.
He thutkhawmah hian kum 2016 – 2017 atang hian Class XI hawn ve tawh nise an ti a, District Board-ah thlen turin an ruahman a. Kum 2016 chu CEC School Silver Jubilee a ni a, a lawmna hun siam ve ngei nise an ti a, inbuatsaih nan District Board-ah Rs. 1,50,000/- dil nise an ti.
CEC Zirtirtute hlawh duang tura ruatten an duan an thehlut chu an thlirho nghal a, siam that ngai laite an siam that hnuah District Board-ah an pawmpui tura thlen nise an ti bawk a ni.
%%%%%%%%

Audit dawn
Aizawl: Assembly BCM Auditors-te chuan BCM Accounts hrang hrang an endik (audit) leh hnai ta a. Mission Field lam audit turinUpa S.Hmingthanga, Finance Director hoin naktuk Thawhtanni hian Shillong an pan ang a, Thawhlehni atangin Baptist House Shillong-ah audit an tan ang.
Auditors Team dang pathumte pawhin June thla hian audit an tan ve bawk ang.
%%%%%%%%%

Synod hotute zin
Aizawl: May 28 – 30, 2015 chhung khan Presbyterian Church Of Myanmar hotute nen Partnership chungchanga inbiakna neiin Zokhawtharah Rev. Lalzuithanga, Senior Executive Secretary; Rev. P.C. Pachhunga, Executive Secretary; Rev. Dr. R.Lalbiakmawia, Finance Officer; Rev. B.Sangthanga, Synod Secretary, Upa H.Ronghaka, Synod Secretary (Jr.) leh Upa Vanengmawia, Statistician-te an kal. Presbyterian Church of Myanmar hnuaia Synod tin aiawh 2 theuh an tel bawk.

Facebooktwittergoogle_plusredditpinterestlinkedinmail

Doctor ka zawhna (May 31, 2015)

Zawhna: Nu kum 43 mi ka ni a, kut leh ke hmawr sa ka nei thin a, a chang chuan a chawmawlh bawk thin. Ka inentir tawh a, vitamin te min chawh a, nerve tha lo i nei ani te min ti a, a reh hlei thei chuang lo. Zan lamah te hian a nasa zual thin a, mut a ti har thei hle bawk. Engtia han tih chi nge mawni dawn le? Min puih theih chuan ka lawm hle ang.

Chhanna: Kut leh ke hmawr sa emaw chawmawlh thin hi a buaithlak duh viau mai a, a reh mawh bawk a. A chhan hriat mai theih loh anih fo laiin natna thenkhat lan chhuah dan a ni fo bawk. I rawn sawi ang hian nerve lam fel lohna, medical term chuan “Peripheral Neuropathy” tiin an sawi thin. Chumi awmzia chu thazam fel lo, signal kal tha thei lo vang a ni thin a ni. A chhan hrang hrang a awm thei a, i han sawi dawn teh ang.

Zunthlum (Diabetes) nei te hian an nei duh hle mai. Zunthlum hian nerve a khawih buai duh hle a, blood sugar control tha lo ah phei chuan a lan chhuah dan common tak a ni. A dang leh ah chuan zu in nasat vangin a awm fo bawk. Zu in nasat hian vitamin tlakchham a awm fo mai a, a bikin Vitamin B tlakchham, “Dry Beri Beri” tiin an sawi a. Chu chuan hetiang harsatna bakah hian ke vung te pawh a thlen fo mai bawk. Ei leh in lam uluk lo, balanced diet ei loh vanga Malnutrition te hian a thlen duh viau bawk a, chu chu zunthlum nei leh zu in nasa te hian an nei duh hle a ni.
Thyroid harsatna nei zingah a awm duh viau a, hormones sang (Hyperthyroidism) leh a hniam (Hypothyroidism) hian a thlen thei ve ve a ni. Thazam lam natna anih theih vang hian kawngruh fel lo vanga nerve nekchep (compression) hian a thlen duh a, Sciatica nei te hian hetiang ang insawiselna hi an nei fo bawk a ni. Kut lama a awm chuan nghawngruh fel lo, a bik takin Cervical Spondylosis te hian a thlen thin.

A dang leh ah chuan cancer natna nei zingah a awm fo bawk a. Cancer damdawi Chemotherapy la lai te hian an nei duh viau bawk. Kawthalo damdawi a kan hman common tak Metronidazole te, TB damdawi zinga mi Isoniazid te, phungzawl damdawi Eptoin te hian a thlen thei a, Malaria damdawi Chloroquine ei nasa ah a awm fo bawk. HIV&AIDS natna nei te hian an nei fo a, a enkawlna damdawi ART hian a thlen fo bawk.

I inentir hian eng ang investigation nge an tih tir che i sawi hran lova. Kan sawi tak natna hrang hrang te hi i neih leh neih loh hriat a tha hle mai. Chuvang chuan blood sugar test (fasting leh PP ngeiin ti thei la), thyroid function test te, kawng/nghawng ruh x-ray te pawh lo ti thei la. I ei leh in lam uluk la, i rit lutuk (overweight) anih chuan diet control leh exercise te lo ti tel thei bawk la. Damdawi regular taka ei i neih chuan chumi vang te pawh chu ani tel thei a (kan rawn tarlan bak damdawi thenkhat hian a thlen ve fo theih avangin). Chung ang te i tih hnu chuan a result a zirin Medicine Specialist emaw Orthopedics doctor lo inentir la, anih loh vek chuan Neurologist te lo rawn thei la, i harsatna hi a ziaawm theih ka beisei.

Facebooktwittergoogle_plusredditpinterestlinkedinmail

Login

Lost your password?