Monthly Archives: June 2015

Taxation Dept. in ` Nuai 22,700 la luthmalakna thlir let; Revenue ngah berin thawktu indaih lo

Aizawl; Taxation Department chuan sawrkar kum kalta 2014-2015 chhung khan chhiah leh a kaihhnawih atangnin Sawrkar pawisa bawmah Rs Nuai 22,729 a chhunglut a, kum hmasa lam aiin Nuai 227 in a tam a. Hetiang hi ni mah se thawktu indaih lohna avangin duh angin hna an thawk tha thei lo nia an inngaih thu Zalen-in a dawng.

“Kaisang emaw post ruak engngemaw zah a awm a hnawhkhah hleih theih a ni loa, Inspector 25 kan mamawh laiin tunah hian 10 lak turin MPSC lamin a buaipui mek a ni,” tiin Kailiana, Dy Commissioner, Taxation Department chuan a sawi a. Post tul zualpui tal kan hnawhkhat thei a nih chuan chhiah atanga sum lo lut chu a pung dawn niin a ngai a ni.
Zalen-in document a kawlin a tarlan dan chuan 2014-2015 ah 53% chu VAT atanga lut niin a tam bera, professional taxah Rs Nuai 1442 a lut a, entertainment tax-ah Nuai 97.83 lakluh niin kum hmasa a khum a ni. 2013-2014 ah chuan Proffesional tax atangin Rs Nuai 1,427 lutin VAT hmangin Rs Nuai 13,064 chhun luh a ni a, entertaiment tax-ah Rs Nuai 48.17 a lut bawk.

Kan thulakna chuan tunah hian entry tax lak a nih theihna turin hmalak mek a nih thu a tarlang a, ‘Sawrkarin supplier a nghah a, sum hrawm pawh a na a, sawrkar indawrna a nih avangin chhiah a lak theih si lo a, dan thar hi hman theih a nih chuan kan rama company hnathawkte chuan an mamawh chu ram pawn nilovin tualchhung ami an lei tul dawn a, sum hnar tha tak a ni thei,’ tiin a tarlang a. Entry tax a awm chuan phaia bung-raw lak kher chu a tlawm phah tawh dawn lo a, way bill hlutna tla hniamin tual chhung market a that phah beisei a ni.

Facebooktwittergoogle_plusredditpinterestlinkedinmail

Bazar enfiah, him lo

Aizawl: Nimin zing khan AH & Vety department leh Trade & Commerce Department tangkawp chuan Bawngkawn leh Ramhlun Bazar an tlawh a,mipui ten sa hrisel leh thianghlim an hmuh theih dan tur an enfiah.

Bzar tlawhtu Department pahnih te chuan thawhhona tha zawk an neih theih nan hma lak dan tur hrang hrang an sawi ho a, Trade & Commerce hnuaiah Bazar hi awm mahse sa thianghlim leh hrisel mipuiin an lei theih nan mithiam bik an mamawh a, Vety Department te nena thawh ho a tul zia department hotute chuan an sawi. Bazar hmun tawp leh thianghlimlo lai te a hmunah kalin an en fiah a, hmalak dan tur an sawi ho nghal. Sa zawrhna tih changtlun a nih theih nan Rural Development Infrastructure Fund atangin heng bazar te hi thuam that a tul thu an sawi a, tun din hmuna sa talhna bik leh zawrhna bik te chu a thianghlim tawk loh leh a that tawk loh avangin Bawngkawn area tan Slaughter House siam a nih tur thu te, Bawngkawn leh Ramhlun Bazar sa zawrhna te chu RKVY sum hmanga thuam that hna chu a taka thawh a nih thuai tur thu an sawi a ni.

Facebooktwittergoogle_plusredditpinterestlinkedinmail

YOGA hmang dawn lo

Aizawl: Vawiin June ni 21 hi International Yoga Day a ni a, sawrkar laipuiin state tinte hmang turin hriattir mahse Mizoram ah chuan a hranpaa hman a ni dawn lo a, Health Department hnuaia AYUSH huaihawtin Tv ah Yoga chungchang sawihona neih a ni ang. Zalen palaiin a biak naah Dr. C.Lallunghnema, Deputy Director AYUSH chuan Yoga chu sakhuana nen a inzawmlo tih a sawi a. Mi thenkhat ten an do chhan chu an hriatthiam tawkloh vang nia a hriat thu sawiin Mizoram ah phei chuan exercise chauh tih an tum niin a sawi bawk.

Mizoram Larsap Lt.Gen.Nirbhay Sharma chuan vawiin International Day of Yoga denchhenin Mizoram mipui te hriselna tha, hlimna leh hlawhtlinna te nei tur in duhsakna a hlan. Larsap chuan Yoga hmangin remna leh muanna tha zawk leh hnam inunauna duhawm zawk a thlen tih a sawi a. Yoga hmang hian taksa leh hriselna a thlen thei niin an sawi bawk.

Facebooktwittergoogle_plusredditpinterestlinkedinmail

Talo Rosanga a thi

Aizawl: Nimin zing dar 3:35 khan Kolkata Mizoram House-a Additonal Resident Commissioner hna chelh mek Talo Rosanga (49) s/o. Rev. Rokhuma, Mission Vengthlang chu CMRI, Kolkata-ah HLH natna avangin a boral a, a ruang hi nizan khan Kolkata-ah tlaivarpui a niin vawiin hian Aizawl thlenpui a ni dawn a, vui nghal a nih dawn leh dawn loh a la chian loh thu Mission Vengthlang YMA hruaitute chuan Zalen an hrilh.

Talo Rosanga hi kumin April thla vel khan a nawmsam theih loh avangin Kolkata a AMRI leh CMRI hospital ah te enkawl a ni a, a natna an hmuhchhuah theih mai loh avangin May thla tir lam khan Delhi an pan a, AIIMS ah enkawl a niin, a natna hi HLH a ni tih an hmu chhuak a. June 15, 2015 khan Kolkata ah an haw chho a, an thlen hnu hian a nawm loh zual leh tak avangin June 18 zing khan CMRI Hospital-ah admit leh a ni.

Talo Rosanga hi 1966 May ni 18 khan Along, Arunachal Pradesh ah a piang a, a pa Rev. Rokhuma hi missionary in sikul ah a thawk a, Along khaw hotu chuan Kristianna thehdarh tumah puhin hnawhchhuah a tum a, mahse he khaw pa ho te chuan eng emaw chen chu a thlavang an hauh thei a. An khaw hotuin kum 1967 tawp lama a hnawhchhuah dawnin Along khaw pa ho chuan inhriatreng nan an fapa chuan Talo tih hming a pu zel tur a ni an ti a, a pu zui ta zel a ni.

Facebooktwittergoogle_plusredditpinterestlinkedinmail

Revolutionary Democratic Party piang

Aizawl: Nimin khan Political Party thar Revolutionary Democratic Party (RDF) chu a ding thar tih The Grand Hotel, Chanmari ah puan a ni a, Robert Hrangdawla IAS (Rtd.) chu President a ni.

Party ding thar Revolutionary Democratic Party (RDP) hian party flag atan rawng eng, a laiah party symbol ‘Buhvui’ awm an hmang dawn a. Party thupui atan ‘Ram hi Lalpa ta a ni: Huai takin awm la, ti mai rawh’ tih an hmang dawn a, Party innghahna atan Mipui rorelna Democracy dik, Ram leh hnam humhalh leh Zofate insuihkhawmna leh inpumkhatna neih tih an hmang ang. Revolutionary Democratic Party ah hian Vice President chu Hmingthanzami niin General Secretary 2- C.Lalthanmawia leh Vanlalhruaia te an ni.

Party thar din anih thu puangtu RDF President Robert Hrangdawla chuan, “UT kan nih tan atanga chhutin kan budget punna hi a let 3155 a ni chungin BPL kan pung a, sualna a pung bawk a. Ei leh bara ah thla 2 ei daih pawh kan thar lo a, siamthat kan ngai,” a ti.

“Dan kan zawm that chuan mi corrupt a awm theih dawn loh a, ACB pawhin tihtur an nei dawn lo a ni,” tiin RDF chuan tharum tel lova Mizoram hmel tih danglam a tum niin a sawi.

RDF Vice President Hmingthanzami chuan ram leh hnam himna chu an ngaih pawimawh ber a ni tih a sawi a. Hnam inpumkhatna, tualchhung rorelna fel, chhungkaw tin eizawnna ngelnghet neih tir, hmasawnna rualkhai te chu an party thil tum a ni tih sawiin ‘Thil danglam, thil thar, thlakthleng thlentir’ chu an tum ber a ni tih a sawi bawk.

Facebooktwittergoogle_plusredditpinterestlinkedinmail

Shillong MSU-in fee sang ti

Aizawl: Shillong Mizo Students Union chuan Higher & Technical Education department in Shillong-a hostel fee a biathliah chu a sang lutuk deuh nia hriain tihniam leh tura sawrkar nawr an tum.

Shillong MSU hruaitute hnen atanga thudawn nikum 2014 khan Admission fee hi Rs.3000 niin ei leh in man pawh October atangin Rs. 2500 a ni a. Mahse tunhnai khan Higher & Technical Education department chuan hostel awm man hi admission fee-ah Rs. 6300 leh ei in man pawh Rs. 2500 ah a tipung a, hei hi a san lutuk bakah zirlaite tan phurrit a tling nia hriain tihniam leh tura sawrkar ngen hi an rel ta a ni. Mizoram sawrkar chuan Shillong ah hian Boys hostel 2 leh Girls hostel 1 a nei tiin thulaknain a sawi.

Facebooktwittergoogle_plusredditpinterestlinkedinmail

Thing nuai 15 phun; 50% duah

Aizawl: Thing phun tur a tiak sa Green Mizoram denchhenna phun thinte chu a chanve bak a nung lo a, district 2-ah chuan 20% aiin a hniam a ni. Kum 20 zet zawt chu Green Mizoram hi hman a ni thin a, hemi hunchhunga an sulhnu thlir letin State Level Committee Chief Minister hova thukhawm chuan district bitum neih mai a rel thlu bawk.

Thing phun nung zo lo ngah ber chu Champhai niin 14.5% an nung pha tawk a hmun 5 niin phun tur 321379 sem chhuahah 4713 chauh a nung. Tlawmngai pawl YMA, MUP, H/S MHIP, Government, VC, Kohhran, MCHP, MJA, VC leh khawtlang te chu a phuntu ah Green Mizoram chuan a ruat thin.

“Thing nung thei lo hi a chhan kan zir mek a, sik leh sa inmil lo thingphun vang a ni thei a; rannung leh pesticides chuan an tichhe nasa,” tiin Forest Department mithiam chuan ZALEN a hrilh. Serchhip district a phun thar a thi tam bawk a, 205,847 an phunah 53, 787 (21%) a nung bawk a ni.

Thingphun nun loh chhanah kangmei a tam ber a, kawng thar laih leh siamthat hnain a tithi thin bawk a. Leilung sik leh sa mil loh vang a ni bawk a ni.

Chu bakah chuan Forest hruai tute chuan phun tur leh hmarua an dawn thin chu quality a that vak loh vangin thing phun thi a tam niin thu dawn a ni. Thingphun nung zah chu avaiin 50% dawn a ni an duah that thu dawn a ni bawk.
District zingah Aizawl thu ti tha bera khawpui chheh vela a hlawma ohunna tur awl a awm loh avangin kumin ah chuan Hmuifang ah phun a ni. 88% aia tam hlawhtlinpuiin thingphun tur 385,874 phun a nia 340, 379 chu an thang duang hle. Hmun 18 ah thingphun a ni tawh.

Saiha ah chuan 205, 847 phun an ni a 53787 (75%) a ni a. Lunglei (54.4%) leh Kolasib (53%) a in zawl thuak a, Lunglei’ tlawng, Bukpui kaltlangin 456,776 phunah 248, 965 an nunga a tha chho zel dawn niin Zalen chuan thu a dawng. Mamit (42%) leh Lawngtlai (47%) te chuan 50, 960 leh 16, 754 an phun a, a chanve an phun nung lo hret a ni.

Facebooktwittergoogle_plusredditpinterestlinkedinmail

Bairabi thleng rel kawng zauh March 2016 ah zawh in beisei

Aizawl: Rajya Sabha MP Ronald Sapa Tlau chuan Lumding atanga Bairabi thleng rel kawng zauh hna chu nakkum March 2016 ah chuan zawh hman a beiseiawm tih a sawi.

Zirtawpni kalta khan Aijal Club ah chanchinbumite kawmin Rajya Sabha MP chuan rel kawng zauhna atana phase I Lumding-Budarpur chu zawh a ni tawh tih a sawi a. Phase II, Badarpur atanga Bairabi inkar hna chu October 2015 ah thawh tan a ni dawn nia sawiin tluang taka hna thawh theih anih chuan March 2016 ah chuan zawh a beiseiawm tih Press mite a hrilh.

FCI atanga buhfai bothlau awm thin chungchangah Mizoram chuan a titha hle niin MP chuan a sawi bawk a. “FCI lam ten buhfai bo thin 0.15% an ngaihhnathiam (awm tura ngaih sa) theih laiin Mizoram ah chuan buhfai bo (kimlo) hi 0.12% chauh a ni a. Thubuai nei pawh kan awm lova, a lawmawm hle a ni,” a ti. MP chuan Mizoram ah FCI thawktute an indaihlo hle tih sawiin an harsatna hi Union Minister hnenah pawh a thlen tawh tih a sawi a. “Indaihlohna ti ziaawm tur hian staff engemaaw zat lakbelh kan tum a, hetah hian ram leilung fa, transfer dil dil velo tur a tam thei ang berin thawk se kan duh a. Central lam mi pawh an lokal duh nan kaisan tir ‘one step up dan’ hman kan tum a ni,” a ti a. Mizorama FCI Godown ah te CCTV dah vek an tum tih a sawi bawk.

Facebooktwittergoogle_plusredditpinterestlinkedinmail

Sakhua (June 21, 2015)

SMTC-a computer zir zote thlah
Aizawl: Synod Multipurpose Training Centre (SMTC) chuan Ningani chawhnu dar khan Certificate in Computer Application (CCA) Course batch 15-na zir chhuakte thlahna inkhawm an hmang a, Rev. Lalramliana Pachuau, Executive Secretary i/c SMTC-in a hmanpui.
CCA zirzote thlahna inkhawm hi Upa Vanlalhuma, SMTC Office Assistant-in a kaihruai a, Rev. Lalramliana Pachuau, Executive Secretary-in zir chhuakte hnenah Certificates leh lawmman semin thu a sawi a. Zir chhuakte (trainees) aiawhin Tv. Lalhnehzova’n thu a sawi a, zirlaite atangin fakna hla ngaihthlak a ni bawk.
Synod Multipurpose Training Centre-a Computer (CCA) zirna hi Synod Executive Committee (SEC) remtihin October 15, 2007 atanga kalpui tan a ni a. Zir hun chhung hi thla 6 a ni. Zirna atan hian Registration Fee Rs. 100/- leh monthly fee Rs. 50/- lak a ni a. Tluang taka zir chhuakte (80% kal chin) hnenah incentive cash prize Rs. 1,200/- pek thin a ni bawk.
Tun tuma SMTC Computer course batch 15-na zirchhuakte hi mi 23 an ni a, Computer Course zirna hawn a nih atanga tuna zirchhuakte nen hian mi 327 laiin tha takin an zir chhuak tawh a ni.
SMTC hi Mission Vengthlanga awm niin computer zirna bakah hian thil dang – puanthui, pheikhawk chhe siamna leh a dang dang pawh a awm a. Eizawng tlaka zir chhuak an awm \euh tawh a ni.
%%%%%%%%%%%

Kohhran hmathlirah inrawnkhawmna
Aizawl; Mizoram Synod chuan June 30, 2015 nileng hian a rualin Mizoram hmun hrang hrangah Kohhran hmathlir chungchanga inrawnkhawmna a buatsaih dawn a. Synod lehBial-a puipate bakah Kohhran tin aiawh zel an tel dawn a ni.
He inrawnkhawmna hi kum 2014 synod Inkhawmpuiin Kohhran Hmathlir chungchang inrawn khawmna neih a rawtna kal zel a ni a. Inkhawmpui hian Synod Executive Commitee (SEC) bawhzui tura tiin SEC hian a tul anga lo bawhzui turin Officers’ Meeting a ruat leh a. OM chuan ruahmanna a siam ta a ni.
Inrawnkhawmna hi Aizawl district tan Mission Veng Kohhran Biak Inah; Champhai district tan Champhai Vengthlangah; Serchhip district tan Serchhip Kawnpuiah; Chhim Area tan Lunglei Chanmari-ah; Kolasib district tan Kolasib Diakkawnah leh Mamit district tan Mamitah te neih a ni ang.
Inrawnkhawmnaah hian SEC member, Pastor, Pro. Pastor leh Minister zawng zawng; Presbytery Moderator leh Secretary; Bial Inkhawmpui Chairman leh Secretary; Kohharan tin aiawh pakhat zel leh a thlengtu Kohhran Committee member-te an tel dawn a ni.
%%%%%%%%%%

Nepal-ah Presbytery hawng
Aizawl; June 12, 2015 khan Presbyterian Church in Nepal Presbytery pakhat zawk, West Presbytery thar chu Kathmandu Bial Lalitpur Kohhranah Mizoram Synod Executive Secretary i/c Mission Rev.P.C.Pachhunga’n a hawng.
A hawn ni hian chawhnu lamah Special Presbytery Rorel Inkhawm neih niin, Rev. Lalrintluanga Ngente hnenah Moderator nihna a hlan a, rorel inkhawm neih a ni a. Presbyterian Church in Nepal chu Church Court nei a ni ta nghal bawk a ni.
Presbytery thar hawnna inkhawmah hian West Presbytery huam chhunga Pastor Bial hrang hrang atangin thawktu an kal tha hle a, ringtu 150-200 vel an pung khawm a ni.
%%%%%%%%%

Thianghlimna beihpui thlak
Aizawl; District Conference Vawi 65-na rorel thu passed angin, 2017 atanga rawngbawltu zawng zawngten Zuk leh hmuam ti lova Pulpit-ah Pathian thu an sawi theih nan bial hrang hrangah Thianghlimna leh Ramlak beihpui an thlak mek.
Bial tinah Thianghlimna Committee din felin heng Committee hian chak takin hma an la mek zel bawk.
Hmalak dan tlangpuiah Thianghlimna awareness neih a nih bakah zuk leh hmuam nghei turin campaign ngawrh taka neih a ni. District hmalaknain Kohhran la din lohna leh hmalak tawhna thenkhatah chak lehzuala hma lak thar niin mi thar pawh eng emaw zat neih belh tawh a ni.
%%%%%%%%

Baptist thawktute siksawi
Aizawl; Tun hnaia Administrative Committee leh Pastoral Committee chuan thawktu thenkhat awmna a siksawi a, June 15 atang khan an mahni awmna turah an insawn an awm tawh.
Thenkhat chu insiam rem nan hun an mamawh avangin an la insawn lo thung. Upa C.Lalbiakthanga chu Lawngtlai H.A atangin Chaplain-ah; Rev. Ram-thianghlima, Khawzawl bial atangin H.A, Lawngtlaiah; Pro Pastor Rosang-zuala, Thenzawl bial atangin Khawzawl bialah; Pu K.Rotlinga (UDC) chu Archives-ah; Pu V.Remkunga (LDC) chu Archives atangin Jubilee Bible School-ah; Pu B.Malsawm-kima (LDC), Despatch atangin Communication & F.O.D-ah; Tv.C.Zonunsanga (Driver) chu Despatch etc.-ah; Pi R. Lalnunthari (LDC), F.O.D/Communication atangin LDC-Administrative Dept (Gen. Secy Office)-ah te sawn an ni.
%%%%%%%%%

CYMA tan Councellor
Aizawl: Central YMA-in ruihhlo avanga harsatna tawk an man Councelling pe tura Synod Social Front an ngen angin Jacob
Vanlaldinsaka, Social Front Outreach Worker chu Councelling pe thin turin Social Front chuan a tifel a, June thla tir atang khan Councelling hi neih tawh a ni.
%%%%%%%

Pastor Quarters sa dawn
Aizawl: Mizoram Baptist Property Committee chuan kumin (2015-2016) chhung hian Pastor bial palia Pastor Quarters sak zawk hman a tum a. Heng Pator bialte hi sak nan tanpuina pek a ni ang.
Pastor Quarters sak turte hi Leite Bial; Phawngpui West Bial; Zobawk South Bial leh Sakawrdai bial Pastor Quarter te an ni.
%%%%%%%

Archivist
Aizawl: Upa Bonny Lalrindika, Asst Coordinator, Synfo, Synod Office chu SEC 256 chuan Archivist turin a ruat thar a, June
16, 2015 khan a hna thar hi a zawm a ni.

Facebooktwittergoogle_plusredditpinterestlinkedinmail

Sum dahkhawl mamawh phuhruk nan – CM Hawla

Aizawl: Chief Minister Lal Thanhawla chuan, “Sum kan dah khawl te hi kan mamawh phuhruk nan leh in tha tak sak nan te a hman theih a ni,” a ti.

Zirtawpni kaltaa East Bungtlang khuaa Mizoram Rural Bank (MRB) Branch 78-na a hawn naah he thu hi sawiin Chief Minister chuan, “Bank te hi mipui tana tangkai tur chuan mipui ten thawhchhuah kan neih angai a, bank ah dah thain kan khawl tur a ni a. Hengte hi bank chuan mipui tan hamthatna siam ve in kan in chhawr tawn thin a ni,” a ti. CM chuan Bank atanga loan lakte tha taka rulh chu mitin tih makmawh a ni tih a sawi bawk.

Mizoram Rural Bank hian kum 2000 hmalam khan hlawkna an nei ngai lo a, hloh zawng hlira an kal avangin branch 18 lai tih tawp a ni nghe nghe a. Kum 2006 ah recruitment tharte siamin, kum 2009 khan leiba an neihte an rul fai thei chauh a ni. Kum 2011 atangin hlep an nei chho tan a, tunah hian bank hmasawnna tehfungah ‘Categoy II’ ah awmin, an credit deposit ratio pawh 10.38% a ni.

Facebooktwittergoogle_plusredditpinterestlinkedinmail

Login

Lost your password?