Monthly Archives: June 2015

Vawk thi

June thla tir atang khan Aizawl hmun thenkhat ah vawk thi a awm a, heng vawk te hi engvanga thi nge an nih hriat a ni lo a, an thisen sample lain College of AHVety, Selesih an enfiah mek a ni. AH&Vety Department thawktute chuan mipuite chiai lo turin an ngen tih sawiin vawk thi te hi PRRS an nih pawhin mihring ei atan an hlauhawm loh niin Zalen an hrilh.

Facebooktwittergoogle_plusredditpinterestlinkedinmail

Hawng dawn

Mizo Zirlai Pawl (MZP) ten Eirukna laka Mizo Politician leh Mizo Officer thlanna an buatsaih tur chu naktuk chhun dar 12 hian MZP Pisa pui, Treasury Square ah MJA President Vanlalrema Vantawl in a hawng dawn.

Facebooktwittergoogle_plusredditpinterestlinkedinmail

Zin dawn

Chief Minister Lal thanhawla chu vawiin hian Kolkata panin a zin dawn a, June ni 23 ah Bengaluru a Mizoram house sak mek a enfiah ang a, June ni 24 ah Swachh Bharat Sub Group meeting ah a tel leh ang a, June ni 29 ah aizawl a lo let ang. CM awmloh hlan hian Home Minister R.Lalzirliana chuan Chief Minister charge a la ang.

Facebooktwittergoogle_plusredditpinterestlinkedinmail

Thukhawm dawn

Naktip Thawhlehni (June ni 23) chawhma dar 11 hian Assembly Speaker Hiphei hovin Business Advisory Committee an thukhawm dawn a, July ni 7,2015 atanga tan tur Assembly Session hun hman dan tur an duang ang.
Naktuk Thawhtanni chawhma dar 11 hian Committee on Estimates chu an chairman Lalrinliana sailo hovin an thukhawm dawn a. June ni 25 khian Public Accounts ommittee chu an chairman K.Sangthuama hovin Assembly Committee room-ah an thukhawm ang.

Facebooktwittergoogle_plusredditpinterestlinkedinmail

Ni rei ni

Vawiin June ni 21 hi khawvel hmarlam (Northern Hemisphere) a chengte tan chuan kum khat chhunga ni rei ni ber a ni a, Mizo upa te chuan ‘Lalmanga Nu lawm rawih ni’ tiin an lo sawi thin a, naktuk atang chuan ni reilo tial tialin zan lam a rei tial tial tawh ang.

Facebooktwittergoogle_plusredditpinterestlinkedinmail

Mi rikraptu man

Mi nu sawisa leh rikrap a puh Lalhlimpuia @Tommy, Thingdawl khaw chhuak chu nimin khan Thingthelhah man a ni. Thudawn danin Lalhlimpuia hian Ningani kalta khan Thingdawl khaw nu pakhat feh chu thlamah phuar betin khawih a tum a, a hnuah a tlanchhe leh ta a ni. He thilthleng hi Thingdawl VC te chuan an khaw thenawm te an hriattir nghal a, nimin zing dar 9 vel khan Thingthelhah man a ni.

Facebooktwittergoogle_plusredditpinterestlinkedinmail

Thisen pe

Nimin khan ECM, KTP New Saiha chuan a mamawh apiangte hman turin Saiha damdawiin ah thisen unit 35 an pe a, thisen petute hi mipa 29 leh hmeichhia 6 an ni.

Facebooktwittergoogle_plusredditpinterestlinkedinmail

In chim

Nimin zing dar 3:30 vel khan Aizawl Venglai a H. Ramtiama In, Assam Type chhawng 4 chu a chim a, mihring thi leh hliam an awm lova; bungrua erawh a chhe vek a ni. In chim hian a thlanga Saithangpuii In chu a delh chhe bawk a, vanneihthlak takin thi leh hliam an awm lo hlauh.In chim chhan hi lungrem that loh vang nia hriat a ni a, a hmun hi a awih a, lungrem hi a khi nasa a, a awn zel a, a chim ta mai niin an sawi. Nimin khan Aizawl Venglai khawtlang chuan chhiat tawkte bungrua senghawi hna an thawk a, vawiin lamah pawh bungraw senghawi hna hi thawh chhunzawm leh a ni ang.

Facebooktwittergoogle_plusredditpinterestlinkedinmail

Hlut tur dik in zirtir na ‘Eirulo ber thlan’

Tunhnai mai khan CM chuan Anti corruption building thar sak hawngin eiruk do kawngah hmasawnna a tam thu a sawi a, ACB thawkte chu Central Bureau of Investigation (CBI) mithiam te’n training an pek thu te sawiin eiruk thubuai chhui lai leh court-a vawmluh engngemaw zah an nei mek bawk. Eiruk do hi tawngkam lar tak a ni ta a, a chang chuan sawi chhuah a hlawh zin avangin mipui beng a thlep tawh em aw? tih theih a ni. Eiruk dotu pawl te an awm piang zel a hnapui bera nei an awm nual tawh a ni. Kar thar awm turah hian Mizo Zirlai Pawl (MZP) te chuan politician leh officer eiru lo ber an thlang dawn a, a thawm pawh a ring nghal viau a ni.

Kuttlingloa sum lak hi sawrkar danah pawh sual a ni a, pawikhawihna lian tak a nih bakah a hremna pawh a na a ni. Chhia leh tha hriatna hrim hrim atang pawhin eiruk hi thil tih chiah ngaih a ni lo nachungin khawtlang leh ram anga buaipui hlawh tak a ni lawi si a ni. Mi dang chanpual emaw dan kalha mahni thawh chhuah ni lo lakluh duhna rilru hian inchhung khurah pawh nghawng chhe tak a nei mek a, eiru rilru hian ken tel chhe tak tak a nei ngei ngei a, mahni inkil tawihnate, khawtlang laka hel duhna rilru puthmang te hi thil pangngai a ni ngai lo. Midang chanpual chhuh a nih avangin khawi lai lai emawah hlet a chhuah lo thei loa, midangin an tuara chu chuan sum pai inbuk tawklohna a hringa; thil chhe tam tak pawh a pian phahin a rinawm tlat a ni. Mahni mihringpuite chanpual chhuh duh hial khawp rilru aia rapthlak a awm lo.

‘Corruption’ hrim hrim hi tawngtlang lawn a ni ta der mai a, a thumal hmanna hrim hrim emaw a awmzia hian thil tha lam a kawk loa, a ri hriat a nuam lem lo, rilru tihnualtu a ni a, rik pawh a ri zinga thenkhat rilruah chuan awmzia a nei tawh lo niin a hriat rum rum thin.

Hetiang a nih laia Mizo Zirlai Pawlte’n eiru lo ber thlan an tum hi thil thleng zen zen lo a ni a, a tha lama incho chhuahna a nih a beiseiawm hle. Hmasawnna-in thil hlut zawng (value) a thlak fo thin a, sum pai in a lei theih chauh ngaihsannaah khawvel a lut fo thin ni. Kan ramah pawh ngaihsan awm tak tak te chawimawi an ni ngai lo a, tun hnuah zirlai ti tha te nasa takin chawimawi kan inzitir tha leh hnuhnawh a, hetiang lamah hian intlansiak ila, chu chuan khawtlang a siamthat a rinawm khawp mai. Eiru lo ber thlanchhuah hi hlut tur dik tak inzirtirna a ni a, rawngbawlna fawng chelhtu pawimawh a tling thei a, khawtlang siamthat kawngah nghawng tha tak a nei dawnin a lang a ni. Sawrkar hnathawk eiru lo an awm ta lo mai em ni? tih ngaihdan a awm lek lek tawh laia ri hriat nuam (positive approach) zawnga ngaihtuahna sengtute hi an fakawm hle mai. Eiruk huat inzirtir a tha em em a, eiru lo ngaihsan in zirtir nen a kal kawpa pawimawh ang.

Politician leh sawrkar hnathawkte hi hlawh neia thawk an ni a, a nihna takah chuan eiruloa hna an thawhin an tih tur an ti chauh zawk a. Mahse mihring hi chawhphur leh fuih ngai reng kan nih avangin thil tih that inhriat tawn sak a tul fo thin a, chumi atan chuan hetiang inelna hi hmanraw tha tak a nih beisei tlat ang u.

Facebooktwittergoogle_plusredditpinterestlinkedinmail

Dam lo enkawl dawnin

Kan zinga tu emaw hi eng tikah emaw chuan Hospital-a damlo riahpuiin kan awm a la tul mai thei. Chutih hunah chuan heng hi kan hre reng dawn nia…

1. Dam lo chu kan thlamuan tur a ni. Tar dam lo awmpui hian an hriatthiam ve phak loh Saptawng thumal eng eng emaw an bulah sawi fo loh tur. An natna hming emaw tiin ngaihtha lo takin an lo awm ru reng thei. Natna khirhkhan tak amah kan hriattir duh si loh anga ngaiin an lo mangang chiam thei.
A natna dik tak chu thup a tul a nih lem loh chuan, a hriatthiam theih ngei tura simple-in tha takin kan hrilh tur a ni a, an enkawl dan kalphung pawh hriattir a, a damdawi hnathawh dan pawh mawlmang taka hrilhfiah an tul thin.

2. Dam lo hriat theih loh tawk vela in biak ruk ser ser loh tur. Dam lo chau tak muhil ni-a kan ngaih kha a lo harh ru reng thei a. Tih harh hlauh avanga zawi te te-a ti ti ser ser hian a chungchang sawiah a lo ngai palh thei. Tul miah lohvah ngaihthatlohna kan inthlen chiam thei. Fimkhur a tha khawp mai. Ama chungchang ni lo, amah ang deuha na chanchinte hi sawi kher a tul loh chang a awm thin. A lo dam leh tak dan sawia amah thlamuan nana kan sawi a nih lem loh chuan.

3. Ngaihsak hluau a tul ber lo thei. A hma-a duat em em ngai lovin a lo dam loh tak avanga over khawpa duat hi a awm ve thei. A tawk a awm tih hriat tur. An mamawh tihsak a, an harh changa kawm hlim satliah hi a tawk viau.

4. Inthlahrungin kan siam tur a ni lo. Damdawi man to thu te, senso a hautak thute sawi chiam chiam loh tur. A theih phei chuan kan senso zat leh damdawi man hi hrilh kher loh a tha zawk. Min zawh luih tlat paw’n a tlem lam zela sawi hi a fuh zawk. Natna tawrh tawh baka inthlahrung taka la siam zui hi a tha lo a ni.

5. Beiseina kan neihtir tur a ni. Dawt hlang hlak hrilha beiseina beidawnthlak fah chiam a fuh lo a, chutih laiin a rem dan ang anga beiseina siamsaka thlamuan a pawimawh hle.

Facebooktwittergoogle_plusredditpinterestlinkedinmail

Login

Lost your password?