Monthly Archives: July 2015

MIN AWT BIK HAUH LO – Dr. Hrekima titi

Nula senior mangang pakhat nena kan inbiakna kal zela a thu rawn thawn hi ngaihtuahzui tham a ni. Rilru hahna tam tak a neih kara a thil nin pakhat, “Nula/tlangval senior fiam lutuk pawh hi tawk chin nei tawh se a tha khawp mai! Tu paw’n mahni phu tawk kan hmu vek! Mahse neih duh loh chhan chhuanlam sawi chhuah ngam si loh kan nei a ni mai! An nupui an pasal kan awh loh fe fe an ni ve tho asin!”

Le le le! Nula senior leh tlangval senior fiamthu thawh nana hmanga nui uar uar thinho khan ngaihtuah teh ang u le! Kan fiam nula tlangval senior-ho hi an puitlin em avangin kan fiamthuah hian a hlim ber niawm tak hian an lo nui ve thin a ni mai thei e; mahse, an thinlung chhungril chu a lo nui lem lo a lo nih fo dawn hi. Kan hlim an duh avangin an lo tuar! Kan hlim an duh avangin an hlim der!

Tu paw’n mahni phu tawk chu kan hmu vek! An hmuh zawh loh vanga nei lo emaw tia kan nuihzatho hian an ex list siam dawn ta se an lo tlar ve duah thei dawn a nih chu! Pathian hi a tha khawp a. ‘A kawppui awm mi ka siamsak teh ang,’ titu kan Pathian hi a tha khawp a, a fing khawp a, kan kawppui awm tawk hi chu a lo siam vek ngei ang tih hi ka ring ta riau! Nupui pasal nei hmel pu vaka ka hriat loh thenkhat hian an nei tlat zel. He nu thusawi hi a dik ka ring. Nei duh tan chuan an awm khawp ang.

Neih duh loh chhan chhuanlam sawi chhuah vek chi lem loh an nei a ni mai. Ngaihtuahna hmang mang lova ‘chak ve’ avang mai maia innei ve tawp, inneihnain mawhphurhna a ken phur ngam leh chuang si lova hui leh pup pup si keini ho hi min lo nuih ru ve zawk thei tlat. Nupui chawm dan tur lam ngaihtuah miah lova kan ruk leh chawt thin si avang hian ‘keini ang mi mawl leh kan nupuite’ min chawm thei turin an lo lengtul ngamte hi a lo ni mai thei asin! Nu leh pa tar tawh takte pawh ngaihsak zo tawh loa tlangval kan um dawr dawr avang khan a ni chuan a nu leh pa chu tlansan ve duh loin, fiamthu thawh nana hman luih luih tur pawh pawisa zo loin a lo senior ta a lo ni daih thei!

Nupui pasal a neih loh chhan pawh hre hawt lova a neih loh avang ngawta lo fiam chiam hi a finthlak ber lo ang. A nunah eng harsatna nge a tawh tawh pawh kan hria em ni? Huaisen taka a paltlang mek harsatna hi kan chunga thleng ni zawk ta se hruizen kan chuh tawh zawk mai thei asin! Ani chuan a tuarchhuak a, kan fiamthu a la nuih luihpui thei cheu zu nia! Tunge ropui zawk tak tak le?

An nupui an pasal kan awh loh fe fe an ni ve tho asin, a la ti ta deuh deuh. Kan kawppui mekte hi an lo duh loh hnute pawh a lo ni zaw lel thei a nih pek chu! Min thik lo khawp ang! Nupa nun awhawm loh fe fe chu kan awm ang maw le! Kan invua a, kan inhau a, kan inruihsan a, kan intitlan a, kan inko kawi a, kan inuire ruk san a! Mo sual, chhungkaw tikeh chhetu leh tidarhtu te leh makpa tawmkai lo, thlamuanpui aia tithlabartute hi an hmu ve vek! Kan nupui pasalte chu an awh loh em avangin thlamuang zawkin an lo la senior ta zawk a nih chu! An hlim zawk daih mai thei reng a ni.

Nula/tlangval senior, mahnia inchawm zo, nu leh pa thachhang dawl tlat, u leh naute zawng zawng thlamuanpui, chhungkaw enkawl mawhphurhnaa laa senior ngam hi zah ila, ngaisang ila, nuihza siam nan hmang hauh suh.
A ni tin pocket money a a hman ral zat pawh hlawh pha ve loin kan lo fiam ve khanglang a, thla tina a pawisa khawl zat pawh la hlawhchhuak ngai lo khan kan lo chhaih nawmnah satliah ve mai mai maw?

Keini ang ve mize hniam lutuk nena rizai pawh sawih ai chuan Siamtu hnena ‘hawn loha thawn kir leh’ tura senior kha a grade a sang zawk mah mai thei tak asin! Tumah hi han inhmusit tur kan lo awm lo e. Fiamthu thawh nan kan hman, a kan nuihpui hluah hluah nula/tlangval lengrei ho hian min awt bik hauh lo nia!

Facebooktwittergoogle_plusredditpinterestlinkedinmail

Ka Huang (July 26, 2015)

Zalen-a ‘Ka huang’-ah hian tum 300 chuang meuh chu thu tangkai lem lo, keima chanchin nawi tete tih mai mai ka chhuah thin, DAWT ni chuang lem lo, thu tangkaina nei lem lo hlir ka chhuah tih chhiartuin in hriat hi. Thu tak, siam thatna tur lam emaw, fuihna lam emaw hi 19-7-2015 (Chawlhni hmasa)-a mi chauh lo kha chu ka la chhuah ngai lo.

Tun tum chu – Khristian inti deuh vek kan ni bawk a, a thak thaka thak, a den den deng tur thu ka’n chhuah duh deuh a ni. Chhiartu duhtak, ngaihnawm lem lo mah se nangmah leh Mizo tan tangkai tura ka ngaih a nih avangin inngaihtuah nan hman theuh i tum ang u.

Bible-ah chuan, ‘Sum ngainat hi sual TINRENG bul a ni,’ tih leh, ‘He ram (Pathiana innghahna ram)-ah hian awm la, rinawmna um zel rawh,’ tih a awm kha. Hei hi ka changthlan a ni. Pathian thu kan awih inti hlir kan ni; mahse, chu ramah chuan kan awmin rinawmna kan um zel hlawm em? Sum hi kan NGAINA lo em? Sawrkhar hnathawkah han tan ila – Engati nge curruption hluara kan sawi – tih tak emah chuan sawrkhar sum loah chuan surrupt harsa deuh tur asin. Office hun vawn dik chungchangte hi engati nge an sawi sek? Puitling ve tawh lem chuan thawh hun chhung chu in hre vek lo em ni? Hlawh in lak hian kim mang loin pe che u sela in duh bik em ni? Vanglaini-ah Khumtea Pu khan a rawn ziak nual kha, sum kan mamawh avangin sawrkhar hna kan thawk a, kan thawhna tura ruatah kan awm tha duh lo a, thenkhatin ‘AIKAL ka la e,’ in ti a, in lamah sumte in la dawng ta dah rual a. Aikal siam hi a thu hrimah a dik lo. NANGMAH kha a ni an lak chu. In hotute tilungawiin AIKAL siam thei mah la, PATHIAN i bum thei lo, a lungawi chuang lo ang. Kei pawh ka thawk ve tawh, ka hotute aiin office kal leh hawn hun ka vawng dik zawk. Sawrkharin hna, a sang emaw, a hniam emaw min pe a, sawrkhar hnathawk kan inti a; mahse, sawrkharin kan puala a dahah khan kan RINAWM em, sawrkhar hnathawk i nih khan i hun leh sawrkharin i tih tura a dah chu HLAWH a pek che avangin rinawm taka i tih mai tur a ni tih hi Khristian i nihna hian a vawn diktir che em? Engvangin nge sawrkhar office-ah SURPRISE CHECK tihte a ngaih? Pathian thu awih lo zinga tih awm lek a ni lo maw?

Ka tum ka sawi zo hman dawn chuang lo bawk a, karleh lamah ka chhunzawm zel mai ang; chuvangin, detail deuh zawkin ka’n sawi ang e. Ka thianpa, tunah chuan chatuan ram min pansan tawh, nen office khata kan thawh dun laiin officer pakhat an rawn transfer a, a zawm hma niin office a rawn telephone emaw ni, keini pahnih chu nileng awm siin a ri lo or a ri kan hre miah lo mai a, a tuk chuan a rawn join dawn a. ‘Niminah engati nge office-ah in awm loh, ka phone che u a, min chhang lo, in chanchin hi ka hre lawk a, office-a awm ngai mang lo in ni tih ka hria,’ te a rawn ti phiar phiar nghal mai a, keini’n, ‘Kan chhuak lo, eng emaw vangin a ri lo a ni ang,’ kan ti a, a awih lo kher mai. Ka thianpa thinthawk chuan, ‘Chhuanliana nen hian office attendance-ah na na na chuan kan rinawm. Hun a lo kal zel ang a, i hre mai ang,’ a ti ngut mai a. Kan han thawkho ta ngei a le – ka thianpa sawi ang ngei chuan hnain daih vak hek lo, office-a awm reng mai chu a lo peih reng bik awzawng lo mai a, ngawi renga chhuah chu dikin a hre bik si lo a, a chhuah dawn apiang hian lame excuse siamin, ‘Min min rawn lam leh – chumi khami office-ah chuan pawimawhah a kal,’ in lo ti mai dawn nia a ti ta zut mai a ni. A sawi ri leh tawh ngai lo na a, min hauh ni kha a hre vawng vawng thinin ka ring.

Khumtea Pu sawi ang khan kan thawhpui ni chuang lem lo vui te, inneih lawmpui te chu swkhar office ni (at the expense of Govt.) chuan kan bengvar khawp mai tih pawh hi ka prove tawh pek. Pari, kan office-a LDC fel deuh mai khian Dr. C.Biakmawia pasalaha nei dawn a. An inneih ni tur chu office holiday a ni hlauh mai a. An inneih dawn ni tlai chuan office-ah, ‘Thiante u, Pari pasal neih ni (naktuk) hi office chawlh ni mah se kan thawhpui ngei a ni si a, i kal hram ang u aw, Leibata leh kei erawh chu – hei kan hotuten hna hmanhmawh thawk turin min ti si a, kan kal ve thei dawn lo a nih hi,’ tiin ka chah ve bawk a. PAKHAT MAH AN KAL LO. Office kai nia hmelhriat (thawhpui pawh ni lem lo) vui/inneih lawmpui nia min dila a rem lo kan tih chuan VUI CHI TINRENG a ni mai.

Khawii emaw office-a ka thawh lai pawhin eng harhna (?) emaw vang khan kan hotu leh kan peon pakhat chu chawhnu dar 2-3 hian khawi lai hmunah emaw tangtai rual an nei ziah mai bawk a. Kan peon chuan chhuah chu min dil ve ziah mai a, a tawpah chuan, ‘Nangmah hi i inhlawhfa ni ta la, ni tina darkar 1 aia rei mai a chawlh ziah hi i phal ang em?’ tiin ka zawt a. Chuta tang chuan min dik ngai ta lo.

Mizote hian sawrkhar hi kan hmu sual em ni ka ti deuh thin. Sawrkhar hna kan thawh lai a nih phawt chuan chu sawrkhar tikaltu zinga mi chu ka ni tih hi peon atanga Chief Secretary hian hriain hmang ila chu – attendance register tih angreng mai mai hi a tul lo tur.

Chuvangin nang sawrkhar hnathawk, i te emaw, i lian emaw – he ram (Pathian thu awih)-a awm i nih avangin rinawmna um zel rawh. Mi hriat leh hriat loh a ni lo, nangma tan – Vanram kawk raih khawp a ni tih hria ang che.

Facebooktwittergoogle_plusredditpinterestlinkedinmail

Zofate Arsi Lian A Her Liam ta

Kum 5 lai a lo liam ta, kar tin chanchinbu kan enkawl lai khan kan thianza hoin thil ropui deuh mai kan rawt chhuak a. Mizoramin zalenna a sual laia a khaipa la dam kan hriatte hming kan la khawm a, June 30,2010, Remna Ni tak khan heng kan pute ho hi kan sawm khawm a, ‘Mizo Nationalism Chungchang Sawihona’ tia hming vuahin Chanmari YMA committee room-ah chawhnu pum hun kan hmang ho a. An duh zawng an sawi a, keinin zawhna kan zawt a, kan hriat thiam loh thilte min hrilh fiah a. A nuamin a hlawkthlak hle a, kan lo hriat ngai loh thil tam tak kan hriat phah nghe nghe a ni.

Anniho kum 50 dawn lai kal ta a huaisen taka Zofate zalenna sualtute hi tunlaia mi tam tak hi chuan kan ngaisang kher lo ang a, politics thila inbeihna hmanraw tuihnai lo taka hmang duh tawk te an awm tak fo avang pawh hian kha hnam thlipui tleh kha mi thenkhatte at-sona ang leka ngai tawk pawh kan awm tawh hial maithei. Mahse, 1960 chho vel a pa rawnkai tling pha leh thalai lehkhathiam rualte khan an hun lai khawvel politics inlum let dan kha an thlir pha ang tih a rin theih a, Kristian ram ni chunga hindu tlimpui zinga awm reng kha dik theiin an hre lo a, Sapho lo luh hma anga tuma awp beh loha awm leh kha an chak a, awp behna hnuaia hmuhsit leh en hranna an tuar thin kha an la na ngawih ngawih bawk a.

Indopui zawh atanga independent ram lo piang sup sup leh hmun hrang hranga sorkar thar thar insingsa mup mup karah khan India ram dinhmun hniam zia pawh kha an hmuh hmaih hauh lo ang a. Kum 1960 a United Nations Resolution 1514 (Declaration on the Granting of Independence to Colonial Countries and Peoples an tih mai, ‘UN Declaration on Decolonization’ tia hriat ni bawk) te khan, Crown colony-ah lo awm lo zo tawh mah se khatih laia Mizo thalai lehkhathiam rualte rilru a chawk tho hle bawk. Tichuan, zalenna sual kha tihmakmawhah ngaiin an pen chhuak ta a ni berin a lang. India awp behna hnuaia mahni dikna chanvo pawh hauh ngam lo hnam nih ai chuan huaisen taka zalenna lo sual ngam tawh hnam nih hi inchhuanna tham a tling tih hi thangtharte hian kan hre chiang tial tial ang. Khawvel history-ah hian ram leh hnam tana beitute chanchin aia ngaihnawm a awm lo a ni.

Zofate zalenna atana beituten mual an liam zel a, an hotu lawkte phei chu an tlem ta pharh mai. Thawhtanni (July 20,2015) chhun khan signatory pakhat Pu R. Thangmawia a thi leh ta a, zep thu a cheng lo, ngaihtuah a tithui khawp mai. Ani hi lehkhathiam hmasa a ni a, a eizawnna kalsan a ram leh hnam tana feh chhuak niin, Mizoram sorkar lailawk (Provisional Government of Mizoram) ah khan 1965 atangin Senator a ni a. Pa fing, thluak fim taka thil thlir mi a nih bakah, ram leh hnam tana ngaihtuahna seng nasa tak a ni a, hruaitu ropui tak a nih zia chu kum 1988 atanga a kaihhruaina hnuaia ZORO hmalakna hrang hrangah hian a hriat viau a ni.

Zofate zai khata kan luan khawm leh theihna tur leh mahnia ro inrel (self determination) a kan awm theihna turin document hrang hrang an la khawm a, India sorkar leh sorkar lian dangte an dawr a, awp beh ramte tana zalenna kawng hawnsak thintu UNO-ah vawi duai lo an palai bawk. Chutianga ZORO hmalaknaa an hruaitu ber Pu R. Thangmawia a liam ta mai hi Zo hnahthlak zawng zawngte tan channa nasa tak a tling. Chutihlaiin, UN buatsaiha tualto hnam tenaute chungchang sawihona ‘Eighth Session on Expert Mechanism on The Rights of Indigenous Peoples’ a Zofate aiawha a kalna hmun Geneva khawpui kher a a thi hian ngaihtuah a tithui a, a dam chhung zatve aia tam zawk Zofate tana beihna hi a thihchhilh ta ti pawhin a sawi theih ang.

Kum 2010-a ‘Mizo Nationalism Chungchang Sawihona’ kan buatsaih tum a ama chanchin a sawi dan chuan kum 1960 vel kha Shillong-ah MZP president a ni a. Chutih hun lai chu Mautam lai vel kha a ni a, zirlai hruaitu a nih angin Mizo District Council hruaitute nen pawh an sawiho thin a. Heng hun lai atang hian Hnam chungchangah a mit a keu tan tawh niin a lang. “Mizo Nationalism din chhuah kha kan tum ber a ni a. ‘Kan ram Krista kan pe,’ kan ti a, Pathian leh kan ram tan kan inpe bawk,” tiin a sawi a. An hun laia Mizo Nationalism kha Christian principle a innghat a nih thu uar takin a sawi bawk.

Mi tam tak tan chuan ZORO-in an buaipui Zofate insuihkhawmna leh mahni a ro inrelna chungchang hi a nuihzatthlak viau maithei a, a taka thleng thei lo tur, duhthusam ram buaipui mai a ngai pawh an tam reng a ni. Kelkang harhna chhim ve lo leh inbingbilailet chang ve lote tan hriatthiam a har ang deuh hi a ni mai awm e. Mahse, sawi tawh angin kan pute ho hi kum 50 vel zet kal ta a lehkha thiam rualho kha an ni a, an hun laia Mizo zinga thluak tha ber ber leh chhiar zau ber berte kha an ni hlawm a. An thluak a fim a, an rilru a nghet a, an hmalak chhoh danah hian national politics piah lamah international politics an man hle tih a lang reng. An tum a ruh a, zalenna kawl lo eng tur hi an thlir lui reng a, an beidawng duh lo mai a ni lo a, beiseina sang tak an la nei reng a. Zo hnahthlakte insuihkhawm dan tur an dap a, mahni a ro inrel Zoram a lo pian theihna turin an thiamna leh finna zawng zawng an hmang ral mek a. Thangthar zingah an hnung zui tur an lo chhuah hlan an nghakhlel hle a ni.

Chutianga pa danglam tak tak fuankhawmna, Zofate kuahkhawmtu pawl lian ber hotu pa chu kan vui liam mek a ni. ZORO dinhmun atanga thlir chuan an hruaitu thih hi a la hun lo tak zet a, patling leh putar rual huikhawm tur hian amah anga leadership nei tha, hriatna leh thiamna lama mi chungchuang hi an awm ang em? Upain ‘Sakawlin sakawl a hring’ an tih kha maw.

Facebooktwittergoogle_plusredditpinterestlinkedinmail

Vaihlo leh Ringtute – Lalchhandama Colney

Vaihlo that lohzia chungchang thuah hian kan hriat theuh angin ram pumah campaign a nasa hle a, Mizoramah ngei pawh Indian Society On Tobacco & Health, Mizoram Chapter, bultumin lehkha tar te, lecture te, squad drive , etc. te neih thin a ni a. Tunah phei chuan a do pawl thar, Tobacco Quiters’ Association te pawh kan lo nei ve leh ta a, a lawmawm hle mai. Hetia beihpui thlak a nih hnu hian tun hma ai kha chuan vaihlo hmang thin hi a tla hniam zel nia hriat a ni. Kohhran thenkhatte phei chuan an rawngbawltu atan hetiang laka fihlim lo chu an ti hial tawh a ni. Heng pawl hrang hrangte bakah hian mi mal thahnemngai, celebrities, etc. ten a rem chang apiangah an sawi reng bawk a. Heng an campaign-na zawng zawngte hi mipuite pawhin kan bengkhawn viau vawiinah hian a pawimawh hle awm e. Duhthusamah chuan office hrang hranga squad drive an neih thinte pawh hi hei ai hian ti zing thei deuh se, kum khatah tum 3/4 vel tal ni thei se a duh awm ngawt ang. Awle, tun tumah chuan ringtute nen kan inzawm tlat si dante han thlurbing tum dawn ila a tha awm e.

Kristian ringtu kan inti a, a tam zawk hi chuan a awmzia pawh kan ngaihtuah chiang ngai awm lo ve. Ringtu chu Pathian nung betu, Isua zuitute, Bible zirtirna pawmtute kan ni a. Ringtu chuan tih tur a nei ve a, chu chu chanchin tha hrilh darh a ni. Kan hre theuh ang a, Pathian thu hril ngawr ngawr bakah hian tih tur, ken tel a nei a – a mamawhte ziak leh chhiar zirtir te, naupang lehkha zirtir te, ni tin khawsak dan tha zawk hrilh te, hriselna lam pawh a bik taka zirtira enkawl nghal te etc. a huam thei awm e. Hei bakah hian tanpui ngaite tanpui, mahni hna theuha rinawm te, biak ina kal ve fo te, tawngtai leh Bible chhiar ve thin te. Tin, ringtu chu a taima tur a ni a, a taksa pawh zu, zuk leh hmuam, etc. lakah a fihlim ang a, mi dangte tan,t unlai tawng takin “model” nih a tum tur a ni. Hetiang taka tha a nih lai hian a inngaitlawm hle ang a, mi dangte tan hnawksak, huphurhawm a ni chuang tur a ni lo. A tawp berah chuan ringtu chuan a hrehawm leh nuamah pawh mi dangte tan a inpe zel thei tur a ni a, a taksain a tibawlhhlawh tur a ni lo.

Khawvel hian vaihlo hi a hmelhriatna a rei tawh hle a, keini Mizote pawh hian kan pi leh pu atang daih tawhin kan hmelhriat tawh a ni. Tun hma chuan a tha lo a ni tih hre tho mah ila, khawvel hian chuti em emin a la hnualsuat hran lo va, cigarette kawm vela ”Smoking Is Injuries To Health,” han tih mai kha a duh tawk mai a. Tun hnuah erawh mi thiamtena an han zir chian tak tak hnu hi chuan mihringte zing atanga um bo hi a tulin a lo ngai ta a ni. Cancer ringawt pawh hi chi hrang hrang pariat chuang lai min lo thlen thei reng a ni. Heng natna hlauh awm tak tak – heart attact, thisen sang, stroke, chuap natna, T.B., zunthlum te pawh hi min thlen thei reng a ni. Vaihlo han tih hian a zuk chi te, hmuam chi te, ei chi te etc. a huam vek a, vaihlo product reng reng kha chu a tel vek a ni. A ei chiho hi tunlaiah chuan kan tleirawlte zingah khan a hluar hle thin a, pawi pawh a khawih nasa hle a ni. A hmuam chiho hi a bik takin hmeichheho zingah a hluar hle a, an hmuam mawlh mawlh reng mai a ni. A zuk chi ve thung hi mipaten an uar hle a, rawlthar lam phei chuan an zu deuh vek a tih theih ang. A chimawm bik hle nghe nghe a, a zuk khu hi a zutu mai bakah a bul hnaia mite tan a pawi hle bawk a ni.

Hriat dan hnu hnung berah chuan Mizoram mipui 60% vel hian zuk leh hmuam kan ti thin a, a awmzia chu Mizote zingah zuk leh hmuam laka fihlim chu tlem te chauh an nih chu. Kristian ram 100% Kristian kan inti a; mahse, heti lam kawngah hian kan hmai a lo bal hle. Kan tih nasatzia chu thalai pawl lamte phei chu a ti mi an ni deuh fur hlawm mai. Chutiang bawkin kohhran hmeichhe lam leh kohhran hruaitu lamte pawh. Engvanga heti taka ching mai nge kan nih tih chu han inzawt dawn ta ila. Thalai lam chuan heti hian an tih ka ring – “Ka thianten an zu/hmuam a,ti ve rawh,” min ti a, emaw “Ka pa/nu hian a ti thin a,” tih a nih ka ring. Puitling lam hian han sawi ve leh ta sela – “Ka tlangval/nulat lain ka zu/hmuam thin a; tichuan, ka lo ching chho hlen ta alawm maw le,” an ti ngei ang. Kan zuk/hmuam chhan hi a dik tak chuan chhan tha pakhat mah a awm lo, “Ti ve rawh,” min ti a etc. tih vel mai mai a ni. Chuvang chuan vawiinah ngaihtuahna fim tak kan hman a, kan inngaihtuah chian a hun ta hle mai.

Saptawng/tualchhung chanchinbuah te Mizoram chu a mi cheng parcentage-a lakin India ram leh khawvelah pawh cancer natna vei tamna ber a ni tih te, hei hi a chhan ber nia an zir chhuah chu vaihlo leh a kaihhnawih vang a ni tih thu te kan hmu thin ngei ang. Keini lo, India ram hmun hrang hranga mite pawhin an lo hmu ve ngei ang. Hetih lai hian Kristian state a ni tih pawh a hriate chuan an hre ngei bawk ang. Kohhran leh thahnemngai dangten hmun hrang hrangah missionary te pawh kan intir thin a; mahse, kan mi tirhte hi heng lakahte hian an fihlim em, an fihlim loh chuan a dik tak chuan a fel lo hle ang. Zoram chhunga kan khawsakpui hnam dang zozaite pawh hian engtin nge min tih ang aw, ngaihtuahna chu han seng deuh hlek seng chuan, ”…chhi. .chhi..,” min ti mai lo’ng maw? Inkhawmpui hmanga zuk kal thinte pawh hi mak an ti riau thin a nia, a chhan chu inkhawm banah sahdah, meizial, kuhva te an ei a, an khu luai luai thin a ni awm e. Mizote hi chu kan fel viau a, tlawmte kan ngai thei a, kan hlim thei a; mahse, zuk leh hmuam chungchang thuah hian engtin nge hnam dangte hian Mizo, Kristian, ringtu intite hi min hmuh ang aw…? A ni tak a, vaihlo hman chu kan inthlahchhawnte pawh ti ila a mak chuang awm lo ve, sawi tawh angin kan zu nasain kan hmuam nasa hle mai. Hetih lai hian a that loh zia hriaa titawp duh ngawih ngawih tan pawh a buaithlak tawh hle thin. Hei vang hian kan tu leh fate hnenah pawh zirtirna kan pek ngun a ngai hle. Addict theih, hriselna atana pawi thei em em si a nih avangin ringtute tan hian ngaihzam mai mai chi a ni em aw.., tih hi ngaihtuah tham tak tlingin ka hria.

Facebooktwittergoogle_plusredditpinterestlinkedinmail

Dr Hrekima titi (July 26, 2015)

Nun hlimna daltu sual thenkhatte:
Mi dangte nen a inkhaikhin emaw intehkhin: Mi dangte nena intehkhin hian hlimlohna min thlen duh khawp mai. Kan intehkhinna te kha kan tluklo deuha kan hriat chuan itsikna tepawh a kaichhuak theiin mahni insitna inferiority complex an tih hi a neih theih a ni. A leh lamah chuan mi te ai a tha zawk leh fel zawk ni a inhriatna khan chapona te a thlen thei bawk a ni.

Mi thenkhatte, thil tha sawi ngai lo leh sawisel reng mai te bula awma an thusawi ngaihthlak sakthin: Thil tha sawi tur nei miah lo te bula kan awm fo chuan mi chanchin thalo emaw diklo emaw an sawi lo awih mai hi a awl duh khawp mai. Chubakah han belh emaw han sawi ve mai tepawh hi awl tak a ni. Chuvangin heng mite bula awm tam loh hi a him ber a ni.

Mi dangte insiamthat ngaia tlata hriatna: Mi dangte diklohna va hmuhsak hi thil awlai tak a ni. Mahni diklohna hmuh erawh chu a harsa viau thei. Midangte diklohna hmu thei viau mi chuan mahniah diklohna kan ngah duh khawp mai. Mahni aiin midangte tha zawka ngaih theih hi thil fing tak a ni fo.

Lawmthu sawi theihnghilh: Kan hamthatna neihte, hriselna that leh chhungkaw duhawm tak neiin hna tha tak kan vuan a ni thei a. Heng kan malsawmna kan dawn te hi a tur reng emaw tih mai hi a awl hle a ni. Englai pawha kan dawn, boruak thianghlim, ni eng leh ruahsur man lova kan dawn te hi lawmthu sawi fo kan ba a ni.

nun hlimna tur:

Lawmna chang hriat: Miten an chunga an thiltihsak lawmthu hrilha lehkha thawn ziak ching mi chu mi hlim thei tak an ni duh hle. Tin, an thiltihsak an lawm avanga lehkha thawn tur ziaka thawn ta lem lo te pawh hi nun hlim mi an ni tih fiah a ni.

Lawmawm zawnga thlir thiam mi: A tha zawnga thil thlir thiam mi te hi chuan chhiatna leh harsatna nasa tak karah pawh lawmna an hmu zel thin.

Malsawmna dawnte chhiar fo rawh: Mi thenkhatte, chawlh kar tina malsawmna an dawn pathum tal rinawm taka ziaka dah thin te chu an hlimin an lawm bik tih hmuh a ni.

I chakna nia i hriatte hmang tangkai rawh: Mahni thiam zawng leh tihtheih zawng hmang tangkai thiam mi chu mi hlim thei tak an ni thin tih fiah a ni.

Ngilneihna lantir rawh: Mi harsa zawkte leh tanpui ngaite tanpui a sum leh pai ui lo va pe thin mi chu a nun a hlim bik thin tih fiah a ni.

Facebooktwittergoogle_plusredditpinterestlinkedinmail

Chawitir dawn

Aizawl Municipal Council chuan ni 1 August 2015 atangin dinna bik Stand nei Commercial Vehicle zawng zawng te an Stand pek ni lova ding/chhuak te leh eng Vehicle pawh Parking fee leh an chawi tur te, Dan ang a pe/chawi duh lo te chu The Mizoram Municipality Act, 2007 (As amended in 2009), Sub-Section (1) of Section 374 angin Rs 500 (Cheng zanga) chawi tir an ni ang.

Sd/-
M. Zohmingthangi
Chief Executive Officer, Aizawl Municipal Council.

Facebooktwittergoogle_plusredditpinterestlinkedinmail

Revenue Deptt. sum nuai 13 a bo

Aizawl: Land Revenue & Settlement Department hnuaia, Assistant Settlement Officer, Champhai chuan leiman (revenue) khawn atanga an sum hmuh nuai 13.71 chu an ti chingpen niin CAG report ah tarlan a ni.

Tunhnaia Comptroller & Auditor General (CAG) in report a tihchhuah a tarlan danin kum 2008-2012 inkar chhung khan Assistant Settlement Officer, Champhai hian chhiah cheng nuai 113.49 an la (collect) a, heng zinga nuai 99.78 chauh hi sawrkarah chhunglutin a dang nuai 13.71 hi a awmna chin hriat a ni lo niin a tarlang. CAG tarlan danin kum 2008-09 ah ASO Champhai hian nuai 27.86 hmuin sawrkarah nuai 8.99 an chhunglut a, kum 2009-10 ah nuai 17.30 hmuin nuai 22.02 an chhung lut a, 2010-11 ah nuai 31.09 an hmuh atangin nuai 33.40 an chhung a, 2011-12 ah nuai 37.24 atangin nuai 35.37 an chhunglut niin a tarlang.

Zalen chuan Revenue Department hotu lute be pawpin a zawtfiah a, ‘Kan hria a, kan chhui zui mek a, kan lut ril viau tawh,’ tiin an chhang a ni.

Revenue khawih
Chhiah lak, sum lalut hnem ber ni tura hmalak huan tur ram leh chenna tur ram thenfel leh vil, ram record vawn, land reforms. Sipaite’n huani/lo/ mimal bungrua an tihchhiat zangnadawmna buaipui sak. Dan te peng 14 hmanga inrelbawlna kalpui. Tribal te ram humhim, mipui awlsam nana computer hmanga ramri chhinchhiah.

Facebooktwittergoogle_plusredditpinterestlinkedinmail

RTI : 33% in pung; 17850 zawhna lut

Aizawl: Mizorama RTI dan hman a nih tan atangin a kum telin zawhna lut a tam tial tial a, hei hi mipui hnena inzirtirna pek tam vang niin Mizoram State Information Commission hotute chuan an sawi.

Mizorama RTI dan hman tan tirh 2006-07 khan public authority (sorkar office) ah RTI zawhna lut zawng zawng chu 476 a ni a.Kum 2010-11 ah chuan zaw-hna 741 lut tawh in a hma nena khaikhinin RTI hmang 25.93% in an pung a ni. Kum 2011-12 ah RTI hmanna 41% in a pung zel a, zawhna lut zat pawh 1045 a ni a. Kum 2012-13 ah chuan zawhna lut zat chu 1316 a ni a, a hma kum aia hmasawnna chu 25.93% a ni a,Kum 201-14-ah zawhna 17850 lut in kum hmasa aia hmasawnna chu 33% a ni.

Kum 2006 atanga 2014 inkar chhunga RTI hmanga zawhna lut zawng zawng chu 7571 a ni a, zawhna zawttute duhdan ni lo a department-in a chhan avanga Mizoram state information commission hnena comlaint lut zat chu kum 9 chhung khan 89 lai a tling a ni.

RTI dan hi parliamnment chuan May 11, 2005 khan a pass a, October thlaa a taka kenkawh a ni. He dan hian ‘official secret act, 1923’ chu nasa takin a thlahdul a ni.

Mizoramah chuan RTI rules 2006 siamin hman ve nghal a ni a, kum 2010 khan rules tihdanglam a ni. Kum 2011 atangin kum tin district zawng zawngah ‘RTI week’ hman chhoh a lo ni ve ta a. RTI week hman a nih atang hian Mizoram RTI hmanna chu hmuh theihin a pun phah niin chief information commissioner (CIC) Laldingliana, IFS (Rtd) chuan a sawi.

Facebooktwittergoogle_plusredditpinterestlinkedinmail

Selection exam phal a ni lo : Mahima

Aizawl: Nimin khan Tuipuiral Zirlai Pawl (TZP) chuan I&PR Auditorium-ah Fresher’s Social an hmang a, he huna khuallian Joseph Lalhimpuia, Parliamentary Secretary, School Education chuan, “Board Exam-ah sikul thenkhat in selection an nei thin hi phal loh a ni a, zirlai admission leh monthly fee engkim chawi te chuan school hmingin Board exam hi an hmachhawn vek tur a ni,” a ti.

Joseph Lalhimpuia chuan, kum 2015 chhung ngeiin Mizoram sorkar hnuaia zirtirtute chu training pek vek an tum thu a sawi a, zirtirtu ni tur in Degree neih san ngawt piah lamah zirtirna kawngah thiam bik an nih a ngai a ni a ti a. Hna dang tam tak chu Graduate nih hnua dila hmuh theih nghal a nih rualin zirtirtu ni tur erawh chuan graduate hnu ah zir belh tur tam tak a la awm a, zirtirtute pawimawh zia leh hlut zia a ti lang a ni a ti. Mizo thalai phaia lehkha zirte’n nasa taka lehkha an zir leh hlawhtlin tuma tih tak zetna rilru an pu anga Mizoram chhunga zirlaite chu tih tak zeta zir turin a chah bawk.

Tuipuiral Zirlai Pawl buatsaiha Fresh-er’s Social hun hi Lalsailova, Vice President in kaihruaiin, TZP huam chhunga zirlai titha te an chawimawi bawk.

Facebooktwittergoogle_plusredditpinterestlinkedinmail

Jan to Jun – thubuai 1241 ziaklut

Aizawl: Mizoram police te chuan January atanga June,2015 inkar chhungin thubuai 1241 an ziaklut a, thubuai ziahluh zingah rukruk case a tam ber.

CID (Crime) chhinchhiah danin January-June inkar chhung khan tualthahna tum 19 a thleng a, pawngsual tum 42 a thleng bawk. Hemi hun chhung vek hian Police te chuan tualthah tum (attemp to murder) case 9 an ziaklut a, ruk ruk (theft) case 371 ziaklutin thubuai ziahluh tam ber a ni a, mi rawk (burglary) case ziahluh 280 in a dawt a ni. Police chhinchhiah na tarlan danin hemi hun chhung vek hian thihna thleng, lirthei chetsualna tum 29 a thleng a, thihna thlenglo accident 12 a thleng bawk a. ND&PS hnuaiah thubuai 32 leh MLTP/MLPC Act hnuaiah thubuai 31 ziahluh a ni bawk.

Mizoram Police te hian tualthah thubuai hi kum 2011 ah 27, 2012 ah 28, 2013 ah 27 leh 2014 ah 41 an ziaklut a. Pawngsual thubuai hi 2011 ah 77, 2012 ah 102, 2013 ah 89 leh 2014 ah 95 an ziaklut bawk a ni.

Facebooktwittergoogle_plusredditpinterestlinkedinmail

Login

Lost your password?