Monthly Archives: August 2015

Chawimawi tum

Thawhtanni chawhnu dar 1 hian MZP chuan eirukna lak ata fihlim Officer leh Politician thlanchhuah te chawimawina Synod Conference Centre, Mission veng ah an nei dawn.

Facebooktwittergoogle_plusredditpinterestlinkedinmail

Apex Bank

Apex Bank Board of Directors meeting tunhnaia an chairman T.Lalmuanpuii hova neih chuan anmahni dawrtu ten foreign exchange an khawih ve theihna turin Bank dangte nen thawhho dan zawn nise an ti a. Myanmar tuilian tuar tanpuina atan Rs.50,000 leh India aiawha badminton khel tura thlan T.Vanlalruati sponsor nan Rs. 1,50,000 hlan nise an ti bawk.

Facebooktwittergoogle_plusredditpinterestlinkedinmail

Thisen pe

Nimin khan Khawbel Students’ Union te chuan a mamawh apiangte hman turin Aizawl Civil Hospital-ah thisen unit 16 an pe a, thisen petute hi mipa 13 leh hmeichhia 3 an ni. Nimin vek khan Champhai Vengthlang Pastor Bial KTP chuan a mamawh a piangte hman turin Champhai District Hospital-ah thisen unit 39 an pe bawk.

Facebooktwittergoogle_plusredditpinterestlinkedinmail

Sual do kawngah thawhho tum

Aizawl khawpui chhunga YMA Branch 5- Venghlui, Khatla, Dawrpui, Tuikual North & South te chuan an huamchhunga hmun pawimawh tak tak City Park, Tennis Court, Treasury Square, Zodin Square, Canteen kual, Temple Square te chu a lo thianghlim zawknan hmalak an tum.

Zirtawpni kalta zan khan hmalak bultanna hun hi Vanapa hall kawtah hman a ni a, he huna khuallian leh joint operation hawngtu Aizawl SP C.Laldina chuan sual do kawnga Police te hmalakna tawiawm tura veng 5 an penchhuak chu lawmawm a tih thu a sawi a. “Kan khawpui hi rui leh kawhmawh bawlte awmna tur ni lovin mitinte thlamuang taka an awmna tur a ni a. Misualte thianfai tur hian theihtawp kan chhuah zel dawn a ni,” a ti. SP chuan YMA Branch hrang hrangte chu dan chhungah zel hma la thin turin a chah bawk. Veng hrang hrang YMA te hian ngawrh taka duty kalpui zel an tum.

Facebooktwittergoogle_plusredditpinterestlinkedinmail

Deptt atangin hna ruak Employ- ment Exchange hriattir a tlem

Aizawl: Employment Exchange hotute chuan, kum liamtaa post ruak 136 hnawhkhah ah department 14 chauhin dan anga hna lakna report an thehluh thu Zalen an hrilh.Department atanga hnaruak hriattir an nih loh fo vangin lak zat chiah hriat har an tih thu an sawi bawk.

Aizawl District Employment Exchange chhin chhiah danin,kumin January atanga July thla thleng khan sawrkar department 3-ah post ruak 11 hnawhkhah tawh a ni a. Department 3 post ruak hnawhkhahna te hi Director of Agriculture (Crop Husbandry) post 2, Directorate of Trade and Commerce post 4 leh Chief Scientific Officer, Directorate of Science & Technology-ah post 2 te a ni.

Exchange thawktute’n Zalen an hrilh danin kumin January- July inkar ah department hrang hranga Post ruak hnawh khahna tur atan hian mipa 242 leh hmeichhia 248 te thawn a ni a. 2014 January atanga December thla thleng khan sawrkar department a post ruak 136 hnawh khah tawh a ni a.

Employment Exchange chuan January-December 2014 chhunga post ruak 136 hnawh khahna atan hna zawnglai thalai mi 3160 chu department-ah an thawn a, post hrang hrang ruakte chu sawrkar hnuaia mi deuh vek a ni a,corporation hnuaia thawk tur tlem azawng a tel bawk niin Zalen palai an hrilh.

Aizawl District Employment Exchange chhinchhiah danin, kumin January atanga July thla thleng khan thalai hna zawng inziak lut mipa 3857 leh hmeichhia 2189, an vaiin mi 6046 an awm.

Facebooktwittergoogle_plusredditpinterestlinkedinmail

DM&R Special Secy.-in tlawh

Aizawl: Zirtawpni khan DM&R Special Secretary Dr. Lalrozama chuan Champhai Kanan Veng leitawlh thinna hmun tlawhin, tanpuina hmuh atanga hmalakna te a enfiah a. DM&R Special Secretary hi Champhai DC H. Lalengmawia leh official dang ten an tawiawm a ni.

Champhai district thuneitute hian kumin fur chhunga chhiatna nasa zawk pumpelh nan DM&R atanga an sum hmuh atangin Kanan leitawlhna hmun hi rangva leh silpauline hmangin an khuh a, hei vang hian leitawlh pawh a ziaawm phah nia an hriat thu an sawi a. Mahse tuna hmalakna hi fur khat atan chauh a nih avangin daihrei tura hmalakna puitling tak neih a pawimawh tih an sawi.

Facebooktwittergoogle_plusredditpinterestlinkedinmail

Rs Nuai 1000 – Disaster inven nan; Force hmantlak 1000 chuang; Sikulah tan la

Aizawl; Chhiatrupna a thlena midang pui tura hrual hran leh a taka hmantlak tura ngaih State Disaster Response Response Team (SDRF) atan mi 1,000 chuang ‘train’ chhuah an ni tawh a, CYMA thawhpui bakah district thlanbik 2 a sikul 200 laiah zirtirtute train niin sikul naupang te zirtirna pek an nih mek thu Zalen in a dilchhuah document ah tarlan a ni a. Invenna lam sensoah sum bawm hran siam dilna Central lamah buaipui mek niin thudawnna chuan a sawi.

Armed police battalion 8 zinga 7 ah chhiatrupna hmachhawn turin State Disaster Response Force Team (SDRF) din leh training tum 13 DM&R chuan a neihpui tawh a; tunah hian mi 724 te chu chhiatrupna lo thleng hmachhawn turin thiam bikna nei \ha tawk niin thudawnna chuan a tarlang a, mi zawn, chhanchhuah, medical aid pek training an paltlang leh tawh a. 5th IR Bn. Hqrs, Lungverh ah thla 1 awh training tum 2, DM&R hian an zawhpui tawh a, Search & Rescue ti turin mi 108 chu rin ngam an nih thu tarlan a ni bawk.

‘National Disaster Management Authority in a duan angin chhiatrupna palha zirlaite himna ngaihtuahtu National School Safety Programme (NSSP) kalpui phalsak state tlemte zingah Mizoram thlan tel a ni a. Aizawl leh Serchhip te chu district thlan bik 2 ni lehin sikul 200 chuangah inven/ himna training zirtirte pek mek an ni a, zirlai naupang te chu mock drill neihpuiin insaseng dan leh first aid hman dan zirtir an ni mek,’ tiin thulakna chuan a tarlang.
Mihring siam chhiatrupna laka invenna sum chheh hran a awm loh vang leh Disaster Act 2005 hmanga sawrkarin sum a kawl avangin hnathawh a mumal zawk nan State Disaster Mitigation Fund (SDMF) chu thla khat kalta khan SDMA chuan a remti a, sawrkar remtihna hmuh a nih chuan Mizoram chu a nei hmasa ber a ni ang. 2015-16 atan Rs Nuai 1,000 dah tum a ni bawk.

Aizawl Veng hran hran a\angin ‘volunteer 700’ chuang training pek an ni a, kumin hian CYMA nen training neih ho a nih bakah district hrang hrangah training pek a ni bawk.

Facebooktwittergoogle_plusredditpinterestlinkedinmail

e-Certificate 18581 pe

Aizawl: Thla 2 chhungin E-district hmangin certificate chi hrang hrang 18581 pekchhuah a ni tawh a, hmun kilkhawr thlengin an tangkaipui niin VLE hnathawk te’n an sawi.

Zalen thudawn danin e-district kalpui tura thlan VLE (village level enterpreneur) te hian July, 2015 chhung ringawt khan certificate chi hrang hrang 18581 an pechhuak hman a, VLE awmna khua atangin DC thuthmun kal kher lova chinfel theih anih avangin mipui tan a zangkhai phah hle niin an sawi. ZENICS thawktute chuan certificate pekchhuah ah harsatna a awm lo nia sawiin certificate diltute chu an certificate a tak anih leh nihloh sms hmangin a finfiah theih vek tih Zalen palai an hrilh a. Certificate chuan digital sign a nei vek tih an sawi bawk. July thla chhung ringawt khan Aizawl district a VLE 35 awm ten certificate (transaction) 5400, Lunglei VLE 14 in 2097, Champhai VLE 26 in 6609, Serchhip a VLE 10 in 1337, Kolasib a VLE 7 in 1419, Mamit VLE 4 in 120, Lawngtlai VLE 1 in 595 leh Saiha a VLE 1 in transaction 4 te an khawih hman a ni. VLE kaltlang hian Income, Tribal, Residential Certificate leh Inner Line Permit te lak theih a ni.

Zalen palaiin Lawngtlai district chhunga VLE pakhat a biak naah an district atanga transaction a tlem chhan chu DC office a digital signature khawihtu/petu in Bualpui NG atanga lut chauh a pawm vang niin a sawi a, sawrkar in VLE atana a ruat ni si an hnen atanga lut a pawm veloh chhan a hriat loh thu a sawi bawk. VLE kaltlanga certificate lak chu a awlsam tih sawiin darkar 3 chhungin an peih hman niin a sawi bawk.

CM Lalthanhawla chuan VLE hi June ni 2, 2015 khan a lo hawng tawh a ni.

Facebooktwittergoogle_plusredditpinterestlinkedinmail

Ka chhia & tha hriatna a thiang – Patea

Aizawl; Felfai taka chhui anih nan leh dikna hailan kawnga hnawksak a nih loh nana Minister leh MLA atanga bangta Lal Thanzara banna chuan sawizui a hlawh zel a. Zalen in sawrkar document a dilchhuah ah preferential rules 1994 chuan tualchhung industry te chu 15% thlengin tender chhang to mahse ‘duhsak’ zawk tur an nih thu a tarlang a. Lal Thanzara chuan ‘thudiklo chu a tlo ngai lo tih ringtu’ a nih thu Zalen a hrilh.

‘He thu hi sawi nawn ka duh leh a, min puhna hi finfiahna a awm a nih chuan ‘jail’ tan ka ngam tih hi mipuiin min hriatpui se ka ti hle,’ tia sawiin Patea chuan, “Sunshine Overseas ah hlawkna cheng 1 pawh ka tel tih finfiahna a awm lo a, hei hi Chunglamin min hriattpui a, ka chhia leh tha hriatna pawh a thiang vak a ni,” tiin kan palai a hrilh.
The Mizoram Preferencial Purchase Rules 1994, No. 8 Preferences (2) ah chuan ‘tualchhung factory/industry te chu tender chhanah pawn lama bungraw lakluh aiin 15% in chhang sang mahse duhsak bik tur an ni,’ tih a tarlang a. HP Food hian a la chhang hniam ber ziah a ni tih tarlan a ni bawk. Kum 20 liam ta 1995 atangin Lal Thanzara hian Anganwadi biscuit a supply tawh a, 2000 kum khan HP Foods hi Zuangtui-ah dinin anganwadi biscuit factory, Mizoram a awmchhun niin ‘a supply ah hna a thawk tha,’ tiin remark pek a ni.

‘HP Foods leh Sunshine hi a thlingbaw hawkin sawi law law ila, Lal Thanzara eizawnna chu HP Food a ni a, MLA a nih loh hunah pawh a eizawnna tur tho a ni a, nge ni MLA a nih chhung zawng hian factory khar se kan ti,’ tiin MPCC G/S pakhat chuan kan palai a hrilh a. “Mizoram chhung leh state dangah pawh MP/MLA sumdawng/factory, manufacturing unit nei an awm fur a, power of attorney in midang kutah an dah mai a, a neitu chu MLA/MP tho a ni a, a nihna takah chuan lehkhaa ziahfel ang chauh a ni. Tuna an beihna hi chu character assasinate tumna, a hmai tih mawksak tumna ngawr ngawr a kawk zawkin ka hria,” a ti bawk.State dangah pawh Office of Profit hi inhnialna titamtu a ni a, Constitution in sawifiahna a dah lo niin thudawnna dang leh chuan a sawi.

“Puhchhiatna a awm vang ringawt pawha Minister leh MLA atanga a bang ngam hi a bial ah chuan a that phah sawt zawk ka ring a, a rilruah inthiam lohna awm lo tih a lanna chu kan pu hi a huai em em tlat mai a,finfiah a nih chuan jail a tan ngam thu a sawi te hian a lakah mipui te’n rindan an nei thiamin ka ring tlat a ni,” tiin Aizawl North III a Local Council hruaitu pakhat chuan a sawi bawk.

Facebooktwittergoogle_plusredditpinterestlinkedinmail

Mizoram Buddhist pung chak ber; Kristian 87%

Aizawl: Kristian zaa za (100%) awmna nia sawi thin Mizoram ah chuan Kristian 87.16% an awm a, sakhaw vawn mumal neilo 1.2% awmin Buddhist chu a percentage a lakin an pung chak ber.

Census of India hnuaia Directorate of Census Operations, Mizoram in tunhnaia kum 2011 chhiarpui a sakhaw hrang hrang dinhmun a tarchhuah ah chuan Mizoram ah Kristian sakhaw betu mi 956331 an awm a, an zinga 476464 chu mipa niin hmeichhia 479867 an awm bawk a, Kristian sakhaw vuantu hi Mizoram pumpui mihring atanga chhutin 87.16% an ni. Buddhist sakhaw betu chu Kristian dawtah hian tam berin mi 93411 an awm a, heng zinga 47970 chu mipa niin hmeichhia 45441 an awm bawk a, Buddhist sakhaw zuitu hi 8.51% an ni. Mizorama sakhaw awm zingah Hindu chuan tam lamah 3-na hauhvin mi 30136 an awm a, mipa 20013 leh hmeichhia 10123 an ni a, mihring awm zat atanga chhutin 2.76% an tling. Heng bakah hian Muslim 14832 (1.35%), Sikh 216 (0.02%) leh sakhaw mumal neilo leh hriat chian loh mi 4772 awmin 1.2% an ni. Census thawkte chuan sakhaw vawn mumal neilo te hi sakhaw tlem leh chhiar pui neih laia sakhaw thil vanga inziaklut duhlo te an ni tih an sawi. Kum 2011 chhiarpui ah khan Mizoram ah mihring 1,097,206 an awm a, heng zinga 555,339 chu mipa niin hmeichhia 541,867 an awm bawk.
2001 chhiarpui-ah mihring 888,573 awmin heng zinga 459,109 chu mipa an ni a, hmeichhia 429,464 an awm bawk. Kum 2001 a sakhaw hrang hrang dinhmun chu Kristian 770,127, Buddhist 70,411, Hindu 31,491, Muslim 12,945, Sikh 324, Jain 179, Sakhaw dang 2,437 leh sakhaw vawn neilo 659 te an ni.

Facebooktwittergoogle_plusredditpinterestlinkedinmail

Login

Lost your password?