Monthly Archives: September 2015

Tinreng Feature : Bawng ek gas

Bawngek leh mihring ek emaw hnimhnawih tawih hmanga Gas alh theia siam (BioGas) chu Mizoram hmun hrang hrangah hmang tangkai an tam hle.

Bawngek gas tia sawi thin hi a siamna hmanrua AH&Vety deparment lam atangin loneitute hnenah pek chhuah thin a ni a, kumtin mi 50 hnenah Biogas siamna hmarua hi pek chhuah thin a ni. Kum 1982 atanga Mizorama hman tan Biogas hi hmang tangkai an tam hle a, eirawngbawlna gas a van avanga chhungkaw tam tak an buai lai hian, bawngek gas hmang tangkaitute erawh an buai lo mai ni lovin chhungkaw thenkhat phei chuan an thenawm hnai te hial an pe chhawng ve thei a ni.

AH&Vety department hotute’n Zalen an hrilh danin Bawngek gas siamna atan hian chhungkaw khatah hmanrua atan Rs. 16,700 man hu pek chhuah thin a ni a, sum faia pek chhuak lo in hmanrua Holder, Gas Stove, even Pipe, Barel, cement leh Balu te pek thin an ni. Biogas siamna hmanrua an pek te hi KVIC a nih avangin kum 5 aia rei a daih loh avangin chhungkaw thenkhat hmang tangkaite chu kum 5 ral hnu ah hmaraw thar pek nawn an ni leh thin.

Thangzuala Zemabawk venga khawsa Bawng vulha eizawng chuan BioGas chu an hman tangkai thu Zalen hrilhin, “Bawng êk gas hi kan tangkaipui khawp mai, kan chhungkua mai bakah kan vai chhawr te nen kan hmang tlang vek a ni,” a ti a. Bawngek gas siamna khur chu hmun hnih an neih thu sawiin, nipuiah phei chuan an hman sen loh thu an neih thu leh a aia nasaa hmalak tum tih a sawi.

Tlabung Chawnpui venga mi B.Duhlaia chuan, kum 2011 khan AH & Vety department hnuaia BioGas siamna tur hmanrua a dawn hmangin bawng êk te chu a sâwngbâwl a; bawng êk up tawih atanga gas siamchhuah te chu inchhungah pipe hmanga lalûtin tangkai takin an hmang a, vawiin thlengin chatlak lovin Biogas hi daihzâi takin an la hmang mek. Bawngek gas hi hmang tangkai viau an awm rual hian a nihna dan tur dik tak anga hmang lo pawh thanhnem tak an awm a, Vety department atanga hmanrua an dawn barel te chu tui dah khawlna atana hmang ta mai te awmin, thenkhat chuan Gas Stove an dawnte pawh an hralh thung bawk a ni.

AH & Vety department-a thawktute chuan BioGas hi loneitute’n an hmang tangkai em em rual hian Central Jail leh Hostel thenkhatah pawh an hman tangkai thu Zalen an hrilh a. Central Jail leh Hostel-ah hi chuan a tir ah Bawk ek dah hmasa in a hnu lamah chuan mihring ek hmanga gas hi siam chhuah a ni a, eirawngbawlna atana an mamawh thenkhat chu a phuhru hle a ni tiin Zalen an hrilh. Gas siamchhuak tura bawng êk sâwngbàwl hi a hautak lo hle a. Gas siamchhuahna zémah bawng êk chu dah a nih hnu-ah tui nena chawh kâwi phawt thin a ni a, chumi hnu-ah bawng êk inup chuan Gas a siamchhuak thin. Gas a siam chhuah tawh hnu-ah bawng êk te chu lei tha a nih nghal avangin thlâi chîn na’n tangkai takin a hman zui lehnghal theih nghe nghe.

Facebooktwittergoogle_plusredditpinterestlinkedinmail

Chhiah tisang

Mizoram sawrkar chuan September 16,2015 atanga hman tan turin vaihlo atanga chhiah a lak thin chu 20% atangin 30% ah a ti sang. Vaihlo atanga chhiah lak tihsanna tur hi August ni 20,2015 a Caouncil of Ministers thukhawm chuan a remti tawh a ni.

Facebooktwittergoogle_plusredditpinterestlinkedinmail

Sawrkar hnathawk pawl President in sawrkar hnathawk duat a duh

Aizawl: Mizoram sawrkar hnathawk inzawmkhawm pawl Federation of Mizoram Government Employees & Workers President Er. R.Lalrammawia chuan Mizoram ah sawrkar hnathawkte chu economy innghahna an ni tiin duat a, an chanvo te pek zel tul a tih thu a sawi.

Zirtawpni kaltaa Census of Govt. Employees & Workers, Aizawl District 2015 a tlangzarhna ah he thu hi sawiin FMGE&W President chuan tunlaia sawrkar hnathawkte dem vak vak ching an pung chho nia sawiin hlawh chungchangah pawh central a an tlukpui te aia hlawh sang zawk laa sawina awm chu a diklo tih a sawi a. “Central leh state dang hnathawkte dawn thin Transport Allowance leh Children Educational Allowance te pek kan ni lova, LTC pawh kum 10 kan hmang tawh lo bawk a. DA kan lak mek 113% atangin a takin 41% chauh kan lak bakah a hman tanni tura ruat dik taka inper a awm ngailo bawk a. MR nawmchen nan leh diklo taka hmang anga min puh te hi na kan ti hle a ni,” a ti.

FMGE&W President chuan mi ramah chuan economy innghahna te an duat thin nia sawiin Mizoram ah pawh economy innghahna, 70% vel thawkchhuaktu sawrkar hnathawkte chu duat an tul tih a sawi a. “Service sector kan hrek vak vak hian kan economy hi a thalo zawngin a kal thei a, a tuartu chu sawrkar leh mipuite an ni zel a ni,” a ti.

Facebooktwittergoogle_plusredditpinterestlinkedinmail

Cigarette company te’n ‘tactic’ an vawrh tan

Aizawl: Kumin chhung hian vaihlo kaihhnawih natna vanga in enkawl nan Sawrkar chuan a hnathawk te tan Nuai 8,800 a seng tawh a, zuk leh hmuam ti thin tam berna hmun Mizoram in chhiah a san nawn hnuah cigarette company te chuan an beihletna an tilang tan tawh a; hetiang hi ni mahse Sawrkar chuan vaihlo leh a kaihhnawih khuahkhirhna dan COTPA tih chak nan dan bawhchhia te chu police ‘constable’ te man theihna a pe bawk.

Chhiah hi vawi 2 san a ni tawh a, 13% ni thin chu 20% (2014) ah Sawrkar chuan a tipung a, kumin August thlaa Cabinet Meeting chuan 30%-in chhiah san turin an titlu a; ni 2 a liam chauh tihah cigarette company 1 chuan chhiah tihsan chu a thalo zawk tiin zirbingna document nen Finance Minister Lalsawta chu an hmu a. ‘State dangin chhiah an pek dan te leh pawimawh dang te zirin a tha zawk tiin Cabinet-in niminpiah maiah a titlu a ni a, Sawrkar hi he thil leh a kaihhnawih enzui zela bawhzui turin zirchian a ni tawh a, ‘Sawrkar chuan tihsan chhan a hre tawk kan inti’ tiin ka lo chhang, Finance Minister Lalsawta chuan Zalen a hrilh. ‘Meizial company palai te chuan theihtawp an chhuah tak meuh a, mahse sut tumna kan neih loh thu in kan inthlah liam ta a ni,’ tiin kan palai a hrilh bawk.

Chhiah san hnu bawk hian meizial company thenkhatte chuan Chief Minister Lal Thanhawla chu hmuh tumin nasa takin an che tawh a, CM chuan hmuh an tumna chhan a hriat avangin a hmuh theih loh thuin a lo hnawl tawh niin thudawnna chuan a sawi. Mizoram chhung ngeiah official te luhchilhin company mi leh sate chuan an lo vau zauh zauh tawh a, Minister te’n tir anga insawiin dawtin official te bum an lo tum tawh a, mahse a tlawlh ta hlauh a ni. Kum tam tak vaihlo doa hmala tawh Lal Riliani chuan hmalak zel an tum dan Zalen zawhna chhangin ISTH(M) President ni bawk chuan kohhran thenkhatin beihpui an thlak lawmawm a tih thu sawiin, ‘Kohhran leh khawtlang hian vaihlo ti rem tura inzirtirna dawhsan an nei tha si a, hei hi tun aia tangkai zawkin hmang se hmasawnna kan hmu lehzual ang’ tiin zawhna a chhang bawk. Thianghlimna ah pawh rilru chauh ni lo taksaa pawimawh tih inzirtirna a tam theih chuan thangtharah zial zu an tlakhniam a beisei thu Zalen a hrilh bawk.

Mizoram Anti Tobacco Day liam taa ‘Cigarette a mala lei khapna thupek’ tihchhuah chu sawifiahin COTPA Section 6 chuan vaihlo zawrhna bawmah pictorial warning chuang tur a nih laiin a mala hralh chuan a awm thei loa, dan kalh a nih avangin khap a nih thu Dr Jane Ralte, Nodal Officer, MSTCS chuan ZALEN a hrilh a, ‘India rama state puala Anti-Tobacco Day nei awmchhun kan ni a, a hluar ema chhiah pun chu doletna tha tak nia sawiin 10% a pun zelin 4-5% in leitu an tlem’ tih a sawi.

MIZORAM- Kum 5 danah Global Adult Tobacco Survey (GATS) neih thin chu tunlai hian buaipui mek a ni a, GATS hnuhnung (2011) berah Mizoram chu khawvel zuk leh hmuam tamna ber a ni a, GATS 2015 hi zawhfel chiah la nilo mahse zuk leh hmuam ti thin hi an tlem zawk a beiseiawm niin Zalen chuan thu a dawng. 2001 atanga zuk leh hmuama No 1 la ni char char Mizoram chuan kum 2 kalta chhungin 2,500 cancer a neih belh a, 1,300 in cancer an thihpui bawk.

I tun lai em?
Meizial siamtute hian tun hma atangin ‘changkang’ leh meizial hi faknaah an thlun zawm tlat a, chu chuan ngaihtuahna a hruai sual thin. Vaihlo aia him zawk angin e-cigarette an vawrh lar leh tawh a, vaihlo industry in tactic thar a hmen mek a ni a. Meizial ngawl vei tir theitu ‘nicotine’ chu bur te reuhte ah dah a ni a, battery in a ti saa an hip ta thin a ni. E–cigarette hi thalai, mei nghei theilo leh nghei tum te’n thin let a nat lutuk loh nan an hmang bawk a. Helamah hian cigratte company te chu an in el mek a, online ah an inzuar nasa hle a ni. Cigarette angin a hlauhawm tih chu zirbingnaah an nemnghet tawh a ni.

ITC
India mezial industry a 82% lai hauhtu, kum 102-na hmang mek nunna latu tam ber Imperial Tobacco Company ni thin, tuna India Tobacco Company (ITC) tia hriat lar tak chuan beihna a tawk nasa a, infak nana a hman thin media hmangin sawisel a tawk nasa hle a, ‘Kum 100 chhungin ITC in nunna maktaduai engzah nge a lak? tih a darhchak hle a, ITC siamchhuah zial zutu 50% chuan an thihpui bawk a ni. ITC hian a environment humhim campaign a neih chu hmaiphihna chauh ah activist te chuan an ngai a, note book Classmate company hmingin a siam a, chumi ah chuan ITC logo a lang veka, nitina naupangin an en chuan an puitlin hnuah ITC siam meizial an thlan theih nana hnuhluh tumna hmanruaah vaihlo duh lo te chuan an sawi bawk.

KHAP
Control of Tobacco Products Act hi 2004, 2nd Oct. atanga hman tan a ni. Puipunna hmun te, lirthei khualzin phurah te meizuk a khap a, vaihlo zawrhna hmun leh a bawma a hlauhawmna milem tarlan a phut bawk. Vaihlo company sponsor leh infak khap tlat a ni a, kum tlinglo hnenah vaihlo hralh khap niin zirna in hnaihah vaihlo zuar awma khap bawk.

Facebooktwittergoogle_plusredditpinterestlinkedinmail

Fisheries- Sangha chi Nuai 32 hralh tawh

Aizawl: Fisheries department enkawl Lengpui Fish Seed Farm atangin sangha chi (a note) nuai 31.09 hralh a ni tawh.
Nimin khan Lengpui Fish Seed Farm hi chanchinbumi ten an tlawh a, K.Lalsanglura Farm Maneger chuan kum 2012 atangin sangha chi hi an hralhchhuak tan tih a sawi a, sangha chi hi kum 2012-13 ah nuai 10.25, 2013-14 ah nuai 12.84 leh 2014-15 ah nuai 8 te an hralhchhuak niin a sawi a. Kum 2014-15 ah hralhchhuah a tlem chhan hi tum 2 lai misualin an Farm an khawih vang niin a sawi a, farm khawihtute avangin nasa takin an sangha tharchhuah a tlem phah avangin dil siamtute hnenah pawh an duh khawp an pechhuak thei lo niin a sawi bawk.

Lengpui Farm ah hian sangha chaw siamna ‘fish seed mill’ din a ni bawk a, he mill ah hian ni khatah sangha chaw quintal 2 a her thei a, heng sangha chaw te hi man tlawm zawkin sangha khawitute hnenah kg khat Rs. 23 in an pechhuak leh thin a ni.

Facebooktwittergoogle_plusredditpinterestlinkedinmail

Lo zawh runpui zo; lo haw

Aizawl: Agriculture Minister R.Lalzirliana hovin Ratu ah lo zawh runpui neih a ni a, Zirtawpni khan hmangin nimin khan an lo haw.

Lo zawh runpui puala programme tawite buatsaihah thusawiin Agriculture Minister chuan khawvel changkang zelah Mizote khawsak phung pawh inthlak danglam zel mah se kan pipute hun atanga kan eizawnna pui ber lo neih chu tun thlengin a la pawimawh reng a. Mahni intodelh chu ropuina a ni tih leh kuthnathawh ngaihsanna nachang hria, mi taima heti zatin an thawh rah malsawmna an seng thei chu a lawmpui takzet thu a sawi. Minister chuan tunlaia saza thi a awm fo thin chu a chhan chhui chian mek a nih thu leh natna hrik virus chi khat vang nia mithiamte’n an hriat thu sawiin mihring tan pawha hlauhawm thei nia a lan avangin saza thi an hmu a nih chuan khawih lo tur leh E&F thawktute hnena report thuai turin mipuite a chah a ni.

Facebooktwittergoogle_plusredditpinterestlinkedinmail

Khawvel tui harsa zingah India; Zoram tuihna kang mek

Aizawl: India ram chu khawvela tui harsat na ram zingah chhiartel a ni tawh a, Mizoram ah a kum telin tuihna a kiam hret hret tih mithiam ten an sawi.

Our water, Our life tih thupui hmanga sawihonaah mi thiamte chuan tuihna a kim chhan bul ber chu ramngaw tih chereu vang a ni tih an sawi a. Hei bakah hian mihring pung zelin leilung an tihchereu vang te, thilsiamna hmuna tui hman nasat vang leh sik leh sa inthlak vangin tuihna hi a kiam tih tarlan a ni.

Mi thiamte chhut danin kum 2001 khan Mizoram chuan tui 0.76 bcm (billion cubic metre) a hmuh theih laiin kum 2025 ah chuan 0.59 bcm chauh a hmu tawh dawn a. Hetih lai hian kum khat chhunga ruahtui kan dawn 12km2 atangin 0.03km2 chauh kan khawl nia tarlan a ni. PHE thawktute chuan hmun tam taka tuilakna an siam chu an siam hun laiin tha viau thin mahse a hnarah te ram theh leh lonei an awm chuan a hna a kang duak duak zel nia sawiin ‘sum tam tak hmanna ho mai maiah a chhuak leh thin a ni’ an ti a. ‘Mizo ten kan ngaihtuahna (mindset) kan thlak loh chuan Mizoram hi hun reilote ah thlaler hmunah a chang thei a ni,’ an ti bawk a ni.

Facebooktwittergoogle_plusredditpinterestlinkedinmail

RTI hmang r’u-CIC

Aizawl: Chief Information Commissioner Lal dingliana chuan mipui tana sawrkar hmalak na hrang hrang te dik tak leh fel taka thawh a nih theih nan RTI hmang tangkai theuh turin mipui te a sawm.

Central YMA, Mizoram Information Commission leh Mizoram Legal Services Authority tangkawp huaihawtin ‘Right to Information (RTI) Act and Legal Awareness Campaign’ chu Khawruhlian Community Hall ah Zirtawpni khan neih a ni. He hun hmanpuitu CIC chuan RTI chu mipui thuam chakna, mipui ham that nana sawrkar hmalakna khalh ngiltu leh hlemhletna vengtu hmanrua tangkai tak a ni tiin sawrkar hna thawk leh mipui ten an hriatchian a pawimawh hle tih a sawi.

Facebooktwittergoogle_plusredditpinterestlinkedinmail

Winery in grape qtls.3000 her

Aizawl: Mizoram a winery pahnih Hnahlan leh Champhai winery te chuan kumin hian winery a her turin grape quintals 3000 an lei tawh a, grape lei hi an duhtawk tawh dawn.

Zalen palaiin a biak naah winery thawk tu te chuan Mizoram sawrkarin MLPC Act a kalpui hnuah an thilsiam chhuahte hralh a harsa sawt tih an sawi a. Hnahlan Grape Growers Society hruaitute chuan Zawlaidi ringawt lo deuh, Brandy thlenga an siam theih thu sawiin thildang siam dan an zawng mek niin an sawi a. Tunlai hian sawrkar dawr mekin phalna an hmuh chuan thildang pawh siam an tum tih an sawi.

Champhai Grape Growers Society hruaitute pawhin ‘Zo wine’ bakah September ni 4,2015 atangin ‘Champ Wine’ an siamthar tih an sawi a. Champ wine chu hralh a kal deuh nia sawiin case 400 an tiral tawh tih Zalen an hrilh. Champhai winery hian Radiant Company, Guwahati nen inremna siamin grape tui an hralh thin a, tun financial year chhung hian company hian litres 64,000 an la dawn a, a hmasa ber atan July 2015 khan litres 16,000 an la tawh a ni.

Facebooktwittergoogle_plusredditpinterestlinkedinmail

Pawm

Mizoram sawrkar chuan Bethany Hospital, Mission veng chu tunhnai khan a pawm (recognise) a, he damdawiin a inenkawlna te sawrkar ah a bill let ve theih tawh ang.

Facebooktwittergoogle_plusredditpinterestlinkedinmail

Login

Lost your password?