Monthly Archives: September 2015

Hlawh petu kut hap !

Sawrkar policy dodal chu sawrkar hnathawk te tan dan kalh a nih avangin inhnam hnawih loh turin thupek a chhuah a ni a, he thupek hi a zawm duhlo an awm a nih chuan hrem theih an ni nghe nghe a ni. Hetianga thuchhuah hi a vanga, mahse Veng pahnih khat huam chhunga zu dawr awm chu Veng mite’n duhloin zu dawr kawtah an pungkhawm deuh renga, sawrkar pawhin hriattirna chhuahin sawrkar policy do zawnga sawrkar hnathawkte chet a thian loh thu tarlan a ni bawk.

Kum tam buaipui leh er hlawh tawh ‘zu khap burna dan’ hlipa, ‘thununna hnuaiah zu zawrh’ dana thlak a nih hnuah Veng thenkhatin an huam chhunga zu dawr awm an duh loh thu an vawm darh a. Sawrkar pawhin corporation a neih te chu a zawrh tir a ngai ta a, boruak a dai tana mimal anga zu zawrh phalna mi tlemte hnenah pek a ni a, Veng lamin an do a, boruak a rawn ti sang leh a, sawrkar hnathawk a phusa pawl an awm a ni mahna, sawrkar chuan a hnathawkte chu an dinhmun a hrilh nawn niah a ngaih theih awm e. Zu dawr duhlotu Venga awmte ngei chu mi Venga zu dawr kawtah an intlar leh lawi si a, a thenin politikah an rin lut thu! A huhoa duh loh mimal anga pawm leh theih mai hi ze mak dangdai tak a ni a, hrilhfiah thiam te pawh a har deuh roh !

Zu chungchang kher nilo thil dangah pawh sawrkar hnathawk ni si, pawl (pressure group) a inhmang an awm fo thina, meizanghlaptu a lo tang ve ringawt, a chhawrtu policy kalh zawnga che ve mai an awm thluahin a rinawm. Tuna Mizoramin tlawmngai pawl a neih te hi thlir ila sawrkar mi leh sa an awm nuala, hetianga phusa tur hian phalna an la turah ngai ila. Eng pawh nise hman deuh kha chuan sawrkar hnathawk chung sia NGO hruaitu niha, chumi phen atanga sawrkar kher vak vak ching an awm thin a, chaw petu kut an hap pawp pawpa, inthlahrun a hnekin mimal hlawknana hmangchanga la te pawh an awm ta ve ang. Tunlai hian NGO lian deuh te chuan hruaitu atan sawrkar hnathawk lo an duh tan tawh a, a tha zawk a nih chuan inherrem mai a finthlak zawk a rinawm.

Mizo nihphungah society a mawhphurhna neiin ‘thawh’ (contribution) neih a tul fo thin a, chhiat ni thatni inngaih pawimawh sak te hi Mizo ti Mizotu chu a ni ngei mai. Inti liam liam ni mahila sawrkar hnathawk chuan a nihna ang rawt chuan kohhran leh khawtlang a dah pawimawh hmasa thiang lo a, sawrkar pawimawh tlansana pisa nghak hman lek loa kohhran emaw khawtlang thilachetchhuah chang a awm fo a, dan kalh ni mahse an hotute’n an hrethiam hram hram thin. Chumi chu tih ve dan reng ‘culture’ ah ngaiin nghet takin a awm tawh a ni. Pisa chhuahsan fo ho hian hna an thawk loa, thenkhat chu an hnathawh leh an hlawh inphu lo an ni nawk anga, hlawh laktur nei lo te pawh a awm theih awm e!

Tu party pawh sawrkar se a hnathawk te lakah a thik thu a chhe vak ngai loa, duh duh dana khawsa theiah hnathawk thenkhat an inngai niin a hriat a, an chanvo emaw a ti zaw mah emaw ni? Hnathawk tamtak chu sawrkar lakah an rinawm laiin tuna hetiang lehkha tihchhuah ngai hiala khawsa te hi a ruk tak chuan a letlingin an khawsa tih inhre mahse kohhran leh khawtlang phena awm an nih vangin khawih thiangah an in ngai lo a ni mai thei bawk.
Eng pawh nise tuna Sawrkar thuchhuah zawm tha loa policy kalh zawnga a chhawrtu bei zawnga khawsa an awm a nih zel chuan khauh takin hmalak ni se, mipui hian an thlawp em em ang.

Facebooktwittergoogle_plusredditpinterestlinkedinmail

Ram hmasawn nan hruaitu nge mipui?

Hmanni deuha PROMISE buatsaih workshop-ah khan he thupui sawi tur hian min sawm a, kalkhawmten ngaihtuahna zau zawk an neih theihna turin tawi tein hun ka hmang a. Sawihona tha tak a awm avangin a hlawk thlak ang reng viau. Sorkar inrelbawlna tha (Good governance) nei tur chuan mipui mawhphurhna a sang hle a, sorkar pawhin mipui thuneihna a pe sang tur a ni bawk. Ram hmasawnna chungchangah thung hi chuan mipui hmaah sorkar a kal a ngai a, ram hruaitute mawhphurhna a sang hle a, rilru a tih tak takna (political will) a ngai bawk. Tuna kan dinhmun hi han thlir ta ila, kan duh ang leh ram hruaitute sawi thin anga hma kan sawn loh avang hian Chemtatrawta thawnthu ang deuhin kan mawhpuh kual mek a, sorkar dem tawk te, mipui zir loh vanga ngai te kan awm a, inhnialna a tawp thei lo a ni ber.

Ram hmasawnna atan hian hruaitu nge pawimawh mipui tih chhanna tha tak ni a ka hriat fo chu Singapore chanchin hi a ni. He ram chanchin hmasa lam hi a ropui lem lo, tunhma chuan lawng suamhmangte chawlhhmun, chirhdum hmun, khawpui tawp tak a ni thin a. Nawhchizuar tamna, kutdawh tamna, mirethei tamna, pawikhawihna a hluarna hmun a ni a. Mahse, prime minister ropui tak mai an neih avangin rei lo te chhungin khawvela ram hausa ber pawl, khawpui thianghlim ber zinga mi a lo ni thei.

LKY (Lee Kuan Yew) prime minister a nih tirh khan tunlaia Mizorama kan harsatna tawh mek ang hi an harsatna a ni. Chenna in nei lo an tam a, thalai hna hmu lo an tam em em a, sorkar hnathawk leh thuneitute zingah eiruk a hluar hle a. Mahse, LKY hian huaisen takin hma a la a, nasa takin a bei a, a thawk rim a, a taima a…kihhnawk then tur a ngah tur zia kha kan chhut pui pha lo ang. Rei lo teah khawvela hmun ropui berah a siam thei. Kum 1959 atang 1990, kum 30 chhung hruaitu lu ber a ni a, nawmchen vanga hausak ngaisang lo tak a ni..’Ka thih hnuah chauh singapore-ah hian casino hawn a ni ang,’ a ti.

India ramah pawh hian state thenkhata an hruaitute hi chu an danglam bik. Mipui hamthatna tura nasa taka bei thin, eirukna laka fihlim, hruaitu taima leh thawkrim an awm ve nual mai. Hmarchhak state zingah pawh hian kan thenawm Tripura chief minister hi a zahawm fal bik chu a nih hi. Kawng hrang hranga an state hmasawn dan hi mipuiin an zir bik vangah an puh kan hre ngai lo a, chief minister rethei ber ni thei khawpa mahni tanghma hai lo a nih thu an sawi a, a mimal nun an fakna piah lamah hian an state hmasawnna atana a hmalakna hi a ropui.

Mizoramah chuan ram hmasawnna chungchang te, hlemhletna chungchang te kan sawi changin mipui zir loh vangah kan hruaitute hian an puh tlat thin. Sorkar thaah chuan ramin harsatna a tawhin thuneituten mawh an phur ngam a, hma an la thin. Hruaitu taima tawk lo te, hlemhletna a fihlim bik lo te, a ngaihna hre vak lote tan chuan mawhpuh tur zawn mai awl viau tur chu a ni. Chhuanlama an hman thin ‘Mipuiin an zir lo’ tih hi ram dangah chuan sawi ila min nuihzat maithei, leader nei lo society emaw min tih hial a rinawm. Kum nga chhung sorkarin a lo kalpui tawh NLUP pawh hian beisei a pha dawn loin a lang a, mipui thiam loh vekah an puh em lo ang chu maw..

Hmanlaiin ‘Lal huai khua chu an huai’ an ti thin a, lal zahmawh sawi hrat khua chuan zahmawh sawi an hrat te pawh an ti thin. Chuvangin, lal taka awm a, mipui che vel thlir mai mai tura inngai hruaitu kan neih chuan mipui chu kan hawihai mai mai dawn tihna a ni ang. Thufingin “Hruaitu tha chu mipuiin an hruai tur a ni lo a, mipui a hruai tur a ni” a tih angin hruaitu tha chu mipui hmaah a kal thin. Mipui ruala kal mai mai hruaitu ropui an awm ngai lo a, mipui hmaa kal thinte hi a ni hruaitu tha chu an ni. Hruaitu pawimawhna kan sawi uar avang hian mipuiin mawh an phur ve lo tihna erawh a ni lo ang. Ram hmasawnna hi sorkar leh mipui tanrualna atanga lo awm tur a ni a, a pawimawh zawk erawh an awm.

Kalphung nghet tak, tha si lo kan nei nual mai. Entirnan, insawipui te, ai kal lak te, duhsak zawng hna pek te, advertisement chhuah lo a hnalak/contract hna pek te leh a dangte. Corruption langsar tak a ni tih hi kan ngaihtuah ngai em? Hengte hi ram hruaituten mipui thiam loha an puh letna a ni fo bawk. Mahse, corruption hluarna ram Singapore kha LKY-a’n kum rei lo te chhungin corruption-a fihlimah a siam thei. Mizote hi hruai nuam tak hnam kan ni a, hnatlang thang, thahnemngai taka a huhoa thiltih thiam kan ni. Kalphung tha lo hi a thlak theih a, system tha lo thlak ngam khawpa thilti tak tak chi awm ta sela chuan mipuiin kan thlawp khawp ang.

Hetianga kan sawi avang hian tuna kan hruaitute hi kan dem bik tihna a ni lo a, tunhma atanga kan ram kalphung sawina a ni zawk. Mi tam tak chuan ram hmasawnna tih te, sorkar inrelbawlna tha (good governance) tih te hi hla taka awm, ram dangte chauhin an neih theihah an ngai thin a. Mahse, kan ban phak leka hnaiah a awm tih hi kan hriat a tha khawp mai. India sorkar kalphung a inthlak mek a, state rethei leh hausa kar te hi a zau tial tial dawnin a lang a, hruaitu nei tha apiangin hma an sawn chak mai dawn a nih hmel. Chutiang te a nih mek lai chuan kan hruaitute hian tan an lak thar sauh sauh beisei ila, an tum tak tak chuan mitthlaa kan hmuh thin raltiang ramah hian mipuite hi min hruai thleng ngei ang.

Facebooktwittergoogle_plusredditpinterestlinkedinmail

Dr. Hrekima Titi (Sept. 13, 2015)

Rilru na, nun beidawng leh mangangte’n thih daih an chak thu leh mahni intihhlum hial an duh thu hi min rawn hrilh thin a. Mahse hei hi chu a zia a dang thung.
%%%%%

“SAZU TUR KA PE MAI DAWN”
Inrinni tlaia ka chaw ei kham inkhawm tur insiam pah chuan ka phone chu kan kheuh hawng zuai a. Thuthawn a lo awm leh tuar tawh a. Inkhawm ka tum avangin chhan hmanhmawh ngai a awm em tiin kan bih kual thuak thuak a. Pakhat chu a danglam khawp mai. Ka dawn thin tam zawk hi chuan harsatna an tawh avanga rilru na beidawng mahni intihhlum mai an duh thu an rawn sawi thin. He hmelhriat loh nu mangang thu rawn thawn hi chu ka chan loh khanah a lo chhuak a, min barakhaih deuh thut a ni ber. A phalna ka lak thlap hnuah kan inbiak tantirh dan chu ka’n tlangzarh dawn a nih hi.
“Ka Pu, sazu tur hi engtiang chiaha hlauhawm nge ni ang le? Ka pasal hi tih ngaihna ka hre tawh lo.. a zu in turah ka telh ang a, a thi mai ang em? Zaninah?”
A rawn thawn hun chu kan en a, tlai dar 6.05 a ni. Ka chhiar chuan dar 6.40 a ni tawh. Sazu tur chu a nei sa nge a lei chawp dawn? A tlai zu in turah chuan a lo telh hman tawh ang em? Inkhawm kal pah chuan thu tawi tein ka va chhang zuai a. Min rawn zawhna tak erawh chu ka chhang lo.
“Engati ta nge? Enge tihngaihna i hriat tawh loh chu?”
Inkhawm ban veleh ka phone chu ka en nghal a. “A rui hi a sual lutuk, ka fate chungah a tuan zel si a..” a rawn ti a. Ka thaw huai mai. Sazu tur chu a la telh lo a ni ngei ang. Sazu tur hlauhawm dan leh a thih theih dan chu sawi zui ka tum miah lo. Min zawhna kha chu chhan chi a ni lo.
“I pasal chu remchangah rawn hruai la, zu nghei tir dante kan zawng ang a. A nih loh chuan Police-ah report mai rawh. I thil tih tum kha chu a tha lo,” ka va ti a. Sazu tur chu pawlhin lo thi ta se, tualthat a ni dawn a, police in an man ang a, a duat duh em em, hlim takin awm se tih a duh em em a fate pawh enkawl thei loin tan inah a tansan daih ang tih te, tuman lo hrechhuak loin zu ngawlvei pum naa thi angin mi zawng zawngin pawm vek mahse a damchhungin mahni inthiam lo leh rilru hah zawkin a nun a hmang reng tawh zawk ang a, vanram ah pawh kal tlak lo chatuan hremhmun chang tur a nih theih thute chu hrilh duah chiah ka ngai hrih lo.
Min rawn chhang ta lo a. A tuk nileng pawhin engmah a rawn sawi ta si lo a. Zanah chuan ka va be hmasa ve ta thung a. “Sazu tur chu i pawlh ta em? A thi ta em?” tia va zawh pawp mai kha ka chak viau a. Mahse sazu tur hi a thinlungah rik nawntir ka duh lo. Ka hriat duh chu ka hre thei tho ang.
“Engtin nge in awm tak zel? I rawn hruai thei ang em?” ka va ti ta zawk a. “A duh lo..keimah ka rawn leng ang, a rem veleh..ka lawm e, ka pu,” a rawn ti ta a. Ka thaw huai mai. A telh lo. A thi lo. Tual a la that lo e.
Mi nula ina awm tha hle hle, nu leh pa thlazar hnuaia thlamuang taka awm kha, ‘hmangaih a, enkawl a, rawngbawlsak turin’ kan va thlem chhuak a. Anni lahin patling tihtakzeta rawn rimtu, hmangaihna hmatheha si-ar lak hial chotu chu thlipui leh doral karah thlamuanpui thamah min ngaiin, mipa chak tak awm nghenga thlamuang taka zan mu an chhin theih beiseiin min lo pawm ve a. Lungmuang taka an awm mekna bu zawl chhuahsanin thlamuanna famkim zawk beiseina nen min han zui ta kha a ni a.
Ka rei maw! A tak ram chu a va mak si em! An sawi zu tha chi chu kan han in ta a, huat tur kan zawng a, phunna tur kan dap a, engkim kalsana min zuitu chu ngaihzawng neiah kan puh a, buangruain a tuar a, kan ngam sa reng hmeichhe awm nem chu kan tum thum ta dawt dawt mai a, kan rila rah kan fate muhil laite chu kan han phih tho ta awrh awrh zan tin ta mai thin a nia! Chhimthlipui hrang an sawi ang main patling zu tha in thiam lo chuan nu leh naupangte thinlung a nuai pherh zo ta a nih hi!
Sazu tur min pek mai hi a chakawm rum rum reng ang chu! Chatuan hremhmuna kal tih velte chu ngaihtuah phak a ni lo, a hla lutuk! Tuna an inchhung hremhmun an tawrh mek hi a rapthlak em a, hremhmun hnaivai zawk hi pumpelh dan zawn hmasak a tul ta zawkte pawh a ni ta ve ang!
Nupuiten sazu tura min hrai hlum hial an duh lohna turin pasal tha nih i tum hlawm tawh teh ang u!

Facebooktwittergoogle_plusredditpinterestlinkedinmail

Doctor Ka Zawhna (Sept. 13, 2015)

Zawhna: Ka pu, ka thianpa tan zawhna ka rawn zawt duh a. Kum 18 mi a ni a, kan inkawmngeih viau a, thian dang pawh a ngah viau tho. Ngaihzawng pawh hi pahnih chu a nei ve ngei tawh a, a virgin tawh lo tih min hrilh bawk. Ka rilru ti buaitu ber chu mipa dang itna ang deuh hi a nei leh tlat thin a, a pangngai viau chuan ka hre si a, tuai kan tih ang hi chu a ni hauh lo chuan ka hria. Hmeichhia ang zawnga han inchei danglam emaw han an chakna pawh a nei chuang lova, a aw te pawh hi mipa aw pangngai ang chu ani vek a, kan hmuhnawm tih zawng te pawh football, UFC tih te hi ani a. Keima lakah hi chuan chutiang zawng chuan a awm ngai lova, a kawm thin mipa dang laka a awm dan hi a dik lo leh deuh thin a (ka sawi fiah thiam chiah lo). Ka han zawh hian a pha viau bawk sia, engtia tih chi nge mawni dawn le? Puih theih dan te a awm em? Tih dan tur min hrilh theih chuan ka lawm khawp ang.

Chhanna: I zawhna rawn zawh hi chhan harsa ang reng tak mai a ni a, midang zawt ta la, kan chhan dan che pawh a in ang lo hial mai thei. Kohhran hruaitu, Pastor te zawt ta la, an chhan dan che pawh a dang leh viau mai thei bawk. Hetiang zawhna hi ka dawng tam lo khawp mai a, harsatna nei hi chu an awm ngei thung ani. Mipa mahni anpui kawp ching te tana program kalpuitu hi FXB NGO an awm a, an client te zingah hian nupui nei reng chunga an mipat pui kawp ru hi an awm nawk ani. Engpawhnise, keima hriatthiam dan angin chhan che ka tum anga, i la duh khawp lo anih pawhin Clinical Pyschologist te pawh i lo rawn dawn nia (Civil Hospital lamah hian an rawn theih reng a ni).
Mahni anpui kawp (homosexuality) hi khawvel inhnialna lian tak a ni a, USA ah meuh pawh tun hnai lawk khan inneih phalna an pe chauh anih kha. Chu pawh chu dodaltu an thahnem a, a bikin Christian community lamin an dodal nasa hle a ni. Kristian kan nih angin kan innghahna ber Bible thu kan en chuan Pathian phal loh chu ani chiang ngei mai. Mahse Pathian duh loh chu kawp chakna (tendency) ni lovin a tih tak takna (physical act) lai kha ani thung.
Mihring kan pian phungah hian kan lo thanlen chhoh hunlai hian mi tam tak chuan homosexual inclination (mahni anpui kawp theihna lam hawi nungchang) an nei fo niin mi thiamte chuan an sawi a. He kawp mai thei dinhmun a ding tam zawk hi chu an thanlenna boruak te, chhungkaw inkaihhruaina avang te in chutiang rilru chu kalsanin opposite sex lam an awn leh mai thin a. Chutiang ni lova an tisa chakna homosexual tendency lama a kal thui palh thung chuan an rawn kawp chho mai thin niin an sawi. Chenna environment hi factor pawimawh tak anih zia ti lang chiangtu chu Central Jail hmeichhe awmna ward lamah khuan tang hlim, a lo tang sa te’n mipa chei a an chei (an lo dawnsawn) fo chu hun engemaw hnuah chuan mipa zia an la thuai a, Patil kan tih ang hian an zia a inthlak hlauh thei a ni.

Kan society chuan a pawm lo khawp hrih a, hun rei tak chhung he zia nei te pawh hi an inthup reng bawk a. Tun hnaiah erawh chuan langsar taka rawn inpho chhuak an awm ta nuk mai a, kan media lam te pawh an demawm theihna lai a awm awm e (min haw lo se!). Kan hnam hi inbawl ching kan ni hi a pawi khawp mai a, tu emaw tawng nem deuh an awm chuan kan bawl tuai nghal fo mai zel a, hengte hian a ti hluar ani thei mai awm mange ka ti ve thin.

Kristian kan nihna atang chuan sual ani han tih tawp mai hi thil awm tak ani a, khawvel thlir dan atang erawh chuan mimal dikna (rights) lam a hawi leh daih thei thung a, chuvang tak chuan chhan thiam pawh a har viau reng a ni.
Engpawhnise, i thianpa hi i duhsak hle ani tih chu a chiang reng mai a. Amaherawhchu eng ang pawhin zawtin dawp mahla a sawi duh a rinawm loh. A lo kawp tak tak tawh anih phei chuan a inzep hlen ngei ang. A chhungte hrilh ta la an huat phah hlauh thei che a, chuvang chuan midang amah hre hnai tu chu hrilh lo phawt la. Amah dem emaw dawp ang zawng ni lovin hemi chungchanga a ngaihdan te leh a pawm dan te zawt chhuak turin titi pui tum chhin ta zawk la. Harsatna a neih chuan puih i inhuam thu leh pui theitu tur pawh i kawhhmuh theih tur thu te hrilh la, chutianga i tih chuan a sawi chhuak duh mahna. Tawngtaisak la, kawm serh phah chuang lo la, nula han rimpui te pawh tum ta la, a rilru te pawh i thlak sak thei mahna. A pawimawh ber chu hetiang nungchang nei te hian anmahni an inpawm a, puih an duh (acceptance and understanding) a ngai a ni. Sawi tawh angin hetiang lama Counseling service tha taka pe thei te hi kan la tlachham hle mai. Synod kohhran hian mahni anpui kawp chungchangah ngaihdan fel tak chu a nei ngei mai a, mahse harsatna tawk te lo puih dan tur, dawnsawn/kaihhruai dan tur te hi mumal takin duang thei se, chutiang ti thei tur trained Counselor te hi nei bawk se, mi tam takin an tangkaipui ngeiin ka ring.

Facebooktwittergoogle_plusredditpinterestlinkedinmail

Ka Huang (Sept. 20, 2015)

Thil engmah hi lutuk reng reng chu Tha a awm lo,’ tih hi, sawi leh sawi hnu, Sikulpui Hall bangah an tar thin a, naupan lai (1940-42) chuan sikul kal apiang hian chhiar loh theih pawh a ni lo. Nimahsela hei, upat lamah a pawimawhzia ka hmu chhuak dawn chauh niin ka inhria. Chung hun lai chu K’u Sena (P.S.Chawngthu) khan ‘Ka awih lo, a nih leh Pathian thu hi awih lutuk ila, a tha lo anga maw?’ tia min zawh hian ka dang leh thin, naupang thuchang.

Tunah hian la dam sela, ‘Pathian thu hi kan awih lutuk phak lo,’ tiin ka chhangin ka inring. Amaherawhchu, kan HRE lutuk thei chuan ka ring thung. Tunlai hian Pathian lehkhabu lehlin dan hrang hrang (version) chanchinbuah kan lo chhiar ve nial nual a, (NEL NUAL a ni lo) a sawi dan hrang hrangah thu kan inchuh lek lektein a hriat theih rum rum mai. Mizo hian, dik tak chuan Pathian thu hi khawvel pum puiah kan hriat ber ka ring thin. Tunah hian Khristian zingah a hnam ang zawngin inelna awm ta sela, Khristian 1000 zingah khan hre ngai miah loin 5 theuh min pawng thlan ta se (pick and choose), Pathian thu hrilah inel ta ila, inpuahchahna hun nei miah loin, Mizo Khristiante hian Gold Medal kan la ngeiin ka ring. Keini ang zawng turung mai mai pawh hian Pathian thuchang min tilunglengtu tih te kan nei ve nual phak a nia, ralkai chin chuan Pathian thu eng eng emaw kan hre ve tel tul mai a nih hlawm hi. Saphoin TV-a an sawi an han lehlinte hi, Senior department ngaihthlak tawk awm a ni lekfang thin, thu mawl tete vek a nih hi. Keini Mizo erawh hi chuan thu ril pui pui – khawimaw lai Thuthlung Hlui chang lar lo tak takte kan phulpui hlut thei zel a nih hi. Kan thian pakhat chu, ‘Inkhawm ang,’ tia an han sawm hian rang fahran hian, ‘Thu thar a awm em ni?’ tiin a chhang vat thin. Pathian thu chang lo, Pathian Hlate pawh hi a nawlpui hian kan hre viau hlawm a nih hi.

Amaherawhchu, Hriat tam ai chuan Nih nghet lam hi kan mamawh chu niin a lang. Dik tak chuan Mizo Pathian thu awih hmasa – Khuma te, Khara te angte khan keia hriat zat hi an hriat ka ring reng reng lo; nimahsela, an nih chanve chanve pawh hi niin ka inring si lo. Pathianin Lal Isua rin avangin min chhandam a nih an hria a, an ringa an ni tlat mai a ni ber a. Chu an nihna chu khawiah pawh an hmang tlat ngam a ni. Pastor Liangkhaia kha a tlangval laiin Pathian thu a awih a. Lal leh upain zanlaiah, ruahpui vanawn sur laiin an khua, Khandaih atangin an hnawt chhuak tih a nih kha. Khanglai khan Pathian thu eng tehchiam a hriat a rinawm loh. Mahse Pathian thu awih a nia, an khua atang chuan a chhuak mai a ni. Kum 1930 hma lama Mizo Pathian thu awihte khan an awih tak meuh niin ka ring thin. Ka pain Mizo Khristian hmasate awm dan leh nih dan tawite a ziaknaah chuan Chawlhni leha Lalpa Zanriah kil tur a nih chuan a hma kar khat chhunga nupa emawin intihthinrimna deuh neia an inhnial deuh chuan chu Lalpa Zanriah chu an kil ve ngam lo, kil ve tlaka an inngaih loh avangin. Keiniho, tunlaia mi hi chuan mithai ei mai mai niin a lang, rual u-te chuan an rin Pathian avang chuan lungawi an tum hram hram zel a, Pathian thu dal an hlau em em a nih chu. A tawi zawngin dah ila – an hre tam lo, Pathian thu awih an ni a, an nghet bur mai a ni.

Keini, tunlai Mizo Khristiante hi chu – Pathian thua rinawm tlatna lam aiin hriat tamah kan inel emaw tih mai turin Bible lehlin dan – chumi version, khami version kan ti a, pawl lah hi keini ang duang chhiar sen lah a ni tawh lo. Van mi, Krista pawl, tih ang reng kan kat nuk mai – pawl hming mawi lam a nih a rinawm loh. Stephana te angte khan Chanchin tha Johana ziak bung 3 chang 16 velte hi a chhiar pawh ka ring lo, a la awm pawh ka ring lo. Lal Isua kha Pathian fapa leh Chhandamtu a nih a ring nghet bur mai a, lunga an den laite khan, Lal Isua a hmu tlat mai a nih kha. I hre tam lo ang u ka ti lo – i nghet ang u ka tihna a ni zawk.

Han ngaihtuah ve mah teh, Mizoram hmar chan lam (ka hriat ve deuh lam)-ah hian 1890 velah Wales Mission an lo lut a, chuta tang chuan – ka hriat sual loh chuan Salvation Army a lo chhuak a, chutah Seventh Day Adventist, UPC (a ko chhuaktu berin rei vak loah UPC Sabath tih emaw ni a din thar leh a), IKK (sen leh var), UPC (NEI), Salvation lah Kolasib vel atangin Chhandamna Kohhran tih emaw ni, Mizo Kohhran tihte emaw ni pawh hriat sen chi pawh a ni tawh lo. Kan innghah tumna erawh chu Pathian pakhat a ni tho si. Kei ka mawl bawk a, Petera te, Matthaia te, Paula te pawh khan Trinity – Unitarian tih ang reng an khel vak pawh ka ring lo. Lal Isua hi Pathian fapa a ni a, min chhandamtu a nih ring chu chhandam a ni tih rin hi ni mai awm taka ni (John. 3:16).

Han ngaihtuah mah teh – Cheng nuai 5 nuai ruk hlawh chhuak pawhin an tu an fate tribal scholarship hmuh theih nan nuai hnih hlawh pha loa inziak duh kan phu lui lui ni maw ka ti mai, Kohhrana mi intitangkai tak ni siin. Eng emaw sawrkharin rethei leh harsa zawkte dawm kanna tur scheme a siam hlek leh kan bawh tlurh zel mai – BPL member tih ang rengte hi, a criterion tak ang ngat hian lak ni ta sela – chhawk tur kan tam awm. Heng thil, kan hmuh ve phak loh hmuh tuma ni lo puia inchhalte hi a ni lawm ni curruption an tih sek hi?

Hawh u, mawl takin, nghet takin Pathian thu hi i awih tawp mai ang u. Ka ngaihtuah thelh em ni lah ka hre lo – Kelkang simna dawhkana kûn hi nuai chuang ni tawhin ka ring – chung zinga sing hnih khat tal chuan chu simna chu rawn hawnin hmang sela chu – khua/veng thahnem takah, tuna lâm/bingbileh tih ang reng a lan ang hian lang vea mawi a niin i hre ve lo maw? Inkhawm uar/lâm,bingbileh te hi nun hlui zawk simna tura a bul ni se a lawmawm ngawt ang. Heng thu ka ziak laia ka theihnghilh theih loh chu, ‘U Lalbuai, zanin inkhawmnaah kan zaipawl a, ka tenor lehnghal a, ka tang lutuk a, ka aw a têng zo vek tawh, khawnge um chanve chauh min han thlit teh,’ tih type kha kan thahnem a niang a!

Facebooktwittergoogle_plusredditpinterestlinkedinmail

Synod-ah New Life Mission Church lut

Aizawl; Family Guidance & Counselling Centre chuan Thawhleh zan atang khan Synod Conference Centre-ah Church Leaders’ Intensive Residential Pastoral Care & Counselling Training vawi 23-na an buatsaih a, he training hi August 19, 2015-ah an zo ang.

Training hi Rev. Lalramliana Pachuau, Executive Secretary i/c FG&CC-in hawngin thuchah a sawi a.?Training-a tel tur hian Pastor Bial 8 – Lallen, Vairengte, Kawlkulh, Khawbung, Lunglei Venglai, Phullen, Khawzawl Vengthar leh Lungdai Bial chhunga Kohhrante koh an ni a, mi 28 an tel.

Training-ah hian Rev. R.Lalhmingthanga, Director, FG&CC; Rev. Zothansanga, Luangmual; Rev. C. Rosiama, Mission Veng; Rev. Vanlalchhunga, Tlangnuam leh Dr. Ruth Lalmuanpuii, Civil Hospital Doctor ten zirtirna pein an thuziak an ziho dawn a ni.

FG&CC hian tunah hian Counselling Centre paruk an nei a, client an neih tawh zawng zawng hi mi 13,131 niin, kumin 2015-ah hian client 1,996 an nei tawh bawk a ni.

Facebooktwittergoogle_plusredditpinterestlinkedinmail

Kohhranten Myanmar tuilian tanpui mek zel

Aizawl: Myanmar ram tuilian meka Mizo awmte chu Mizorama pawl hrang hrang bakah Kohhrante pawhin a tanpui mek zel a. Hemi chungchang hi Nilaini khan United Pentecostal Church of North East India kohhran hruaitute chuan an ngaihtuah tawh a, Mizoram Synod pawhin vehbur a khawn mek bawk.

UPC NEI hi General Headquarters Office, Mualpuiah an thukhawm a. Myanmar leh Manipur Chandel district, Chakpikarong tuilian tuartute Kohhranin a theih ang anga tanpui nise an ti a, a thawh khat nan Chakpikarong tan Rs. 50,000 leh Myanmar tan Rs. 1,00,000 pek phawt ni se an ti.

Hei bakah hian tun thla chhung hian sum leh pai, thuamhnaw leh ei leh in tur bakah an mamawh hrang hrangte tanpuina tur atan Kohhran mi leh a duh a piangten mahni remchan dan angin District Office tinah tanpuina pe tura sawm nise an ti.

Chandel district-ah hian Biak In leh quarters te chu a duh apiangte himna tura awmkhawmna hmunah siam a ni bawk.

Tuilian tuarte tan hian International lamah pawh?tanpuina tur dil an rem ti a. Tuilian tuar tute hi a hmuna han ena tlawh tuirn General Superintendent leh General Secretary kal turin an ti bawk.

Synod pawhin Myanmar rama fur ruahtui tla nasa leh tuilian avanga chhiatna nasa tak thleng meka Zo hnahthlak a tihbuai hi ngaihvenin harsatna tuar Zo hnahthlakte pualin vehbur khawn leh mahni remchan dan angin Kohhranhoten tawngtaipui nise tiin a rel.

Hemi atana Kohhran, pawl, mi mal tanpuina pe duh tan Finance Department, Synod Office-ah tun thla chhungin pekna hun an hawng bawk a ni.

Myanmar rama tui lianah hian hriat theih chinah mi 88 an thi tawh a. Ram dang atangin pawhin tanpuina a lut nasa a. Central YMA pawhin tanpuina a thawn tawh a ni.

Facebooktwittergoogle_plusredditpinterestlinkedinmail

Sawhkhawk (Sept. 20, 2015)

Sawhkhawk of the day
Thuampui, Bawngkawn, Chanmari kawn, Zarkawt kawn, Dawrpui Biak In chhak, Israel Point bul, Civil Hospital peng, Millenium Centre kawt, Bazar Bungkawn, AR Mandir bul, Salvation Temple Square, AOC Petrol Pump, Treasurey Square, Sikulpuikawn, Mission Veng leh Kulikawnah te hian kea kalte him nan leh traffic jam pumpelh nan kea kalten kawngpui an kanna turi flyover bridge siam a tul hle a. Tu pawh sorkar se, Mizoram sorkar hian tih makmawh, a ngaih pawimawh hmasak tur a ni. A hna chu tupwhin thawkin hlawkpui se, mipui tan a tul hrim hrim a ni. AR Mandir khi a hnawksak khawp mai, ‘AR sawn chhuah’ tihte kha eng nge a thu kal zel ni ta le? – 8731002757

Sunday tuk a lo her chhuah hi chuan Zalen chanchinbu chhiar a chakawm thin khawp mai. In columnist-te thuziah hian beng a tivar a, a nghahhlelhawm zual phah thin khawp mai. Doctor zawhna, Pu Hrekima, Pu Muantea leh Pu Chhuanliana te inziak ngaihnawm thin takmeuh e. – Sma

Zalen phek pawh a lo var leh deuh ta, hmanni deuh kha chuan a phek laiho kha chhiar a chakawm thlawt lo thin a ni. Han tang zel teh u. Chutih rual chuan a phek langsar pahnih, a hnung leh hma hi a tial (milem a tam kan ti dawn emaw ni) mah mah thin a, mi a hip rualin chhiar a a tichakawm lo lek lek mai. – Muankimi

In chanchinbu hi kar khata vawi khat chhuak chauh a ni bawk a, fakna a tlem ka lo ti thin a. Tun hnaiah hian a tam ta hle mai, a pawna awm teuh bakah a chhunga a la awm bawk. Kan lo nghahhlelh em em thin hi duh aiin chhiar tur a tlem phah deuh thin a, ka lo ui thei khawp mai. A enkawltute erawh sumdawng ve tho a ni a, hriatthiamna thui tak erawh ka nei tho che u. Tan la sauh sauh zel ang che u. Chhut dik loh pawh a tlem tial tialin ka hria a, a phek bal deuh thin pawh a reh leh tawh e. – Rpi

Hachhek Bial mipuite, lakhuihthei avanga in hlawhtlinnaah ka lawmpui a che u. Chief Minister kha tawngka leh lakhuihtheih pum hnih khat vel khan lawmthu hrilh ta ula, a bak zawng kha mi rethei leh chhuanchhamte hnenah sem ta zawk ula ka van ti em aw! Malsawmnaa vurtu tak tak che u Pathian pawh a va lawm dawn em! A thlum tui hmel ropui si a. – A.K.Ralte

Kelkang mipuite chuan, “Pathianin kan thlawhhma min sawnsak a,” tiin hna thawkah an inngai a. Zoram mipui pawhin, “Hna ropui tak,” thawkah kan ngai asin, ka pu! – 9774354495

Central-a BJP sorkar khuan Congress pachal Lal Thanhawla hi sum leh paiah a hrek vang nge, Mizoram sorkar hian sum indaih loh thu a sawi reng mai. Arunachal Pradesh Chief Minister tih dan khu copy-in, “Nangniin min pek loh chuan kan thisen zawmpui China khi kan dil mai ang,” ti mai sel, sum leh pai indaih loh thu sawi chhen hi a bo phah mai lo’ng maw?! – 8731002757

Central-ah pawh saipui kal lai chu uitang rualin an bauh ding zo bik lo a va ang ve! – 9774354495

Kan harhna chan mek chuan ze chi hrang hrang a chhuah mek zel a, darkhuang vuak lam pawh kan thleng ta. A vawtu kha tupawh lo ni rawh se, a chet dan erawh a Thlarau Thianghlim zia lo deuh em ka lo ti ve mai mai. Huaisen takin Thlarau Thianghlim chu a che tur ni awma ka lo ngaih laiin hlau chung chunga ti a ang tlat. Bible-a Thlarau Thianghlimin a hmante kha chu sorkar lamin an duh loh leh phal loh ni mah se huai takin tirh an nihna leh hmunah an kal maiin ka hria a. Tunlaia kan chan hi khatiang khan a thawk tawh lo a nih chuan thuhrun ni se, kei chuan darkhuang vuak dan kalhmang kha ka hrethiam pha chiah lo a ni. – MkSiama

Miin chhiat an tawk e tih vanga a hman hmanin thawhlawm kan khawn chawt zel hi i sim ang u. Ram zim te, thurual lo zet hmuhin min hmu mai ang. YMA kan ti, ZONET kan ti, eng concert emaw kan organise thul. Chutih laiin kan sorkarin ‘a lo um e,’ veleh bawk. Ram khat, hnam khat kan nih hriattir zawk ang u. – Suaka

Central YMA leh Synod tangkawpin ruihhlo ngaite puala camping a buatsaih hi a lawmawm ngawt mai. A hun chhung a rei dawn bawk a, hlawhtling taka an tlingtlak theih ka beisei a, ka tawngtaipui bawk e. Tharum leh mihring theihnain na takin kan nawr thin a, an sim thei lo, Pathian thlarau erawh chuan a simtir theih ka ring tlat a ni. A buaipuitute an fakawmin hlawhtlingna chang ngei teh se. – Hlui

Aizawl khawpuia zun in thenkhat hi a va tawp tak em! Mihring ek a awm hnuk zel mai a, Civil Hospital bula mi phei hi chu zunna chi hi a ni lo reng reng, Mizoram khawpui ve meuh si, a zahthlak khawp mai. – 9862877597

Zu leh thil dang hmang hian Kohhran hi kan sawt huai thin khawp mai. Tunlai Mizo Kristiante hian hmana min thlahtu, Kristian hmasate nun atang khan kan peng bo thui tawh viau mai niin ka hria. Kan Kristian hmasate kha chuan Kohhran sawisel hi thih hrehin an hreh a, a do zawnga awm kha an duh lo thin khawp mai. Tunah erawh chuan thangtharte hi kan fingin rem hi kan hre ta a, huai tak takin kan sel a, Kohhran kan zah lo ta khawp mai niin ka hria. Kan tih dan hi thil tha ber a ni em tih inenfiah a ngai khawpin ka hria a ni. – Eddie

Keini Mizo Kristiante hian kan inkhawm dawn apiangin he Bible chang hi kan thinlungah i vawng tlat ang u: I Timothea 2:8-10 leh I Petera 3:3,4. – SANGBOIHI

Lal Isua nei si lova i boral a nih chuan maw, ‘Khawngaihin kawng min hawn rawh,’ tap chungin dil mah la, Lal Isuan, ‘Tunge i nih ka hre ngai lo a che,’?tiin a la chhang dawn si che a. – 18 yrs girls Lungsum

Mahni fel leh tha kan intihna atang hi chuan kan nunah Thlarau Thianghlim hi a zalen thei dawn si lo va, mi tlawmte hnenah chauh Thlarau Thianghlim chu a zalenin a chang thin a, ringtu erawh kan nih a angai thung. – Hruaitea

Facebooktwittergoogle_plusredditpinterestlinkedinmail

Thalaite u, Rilru hah in tuar chhuak thei – H.Lalrindika

Rilru hahna hi a tawrhchhuah theih! Thalaite u, in rilru hahna kha intuarchhuak thei tih hi kan hriatpui che u, in kawngzawh lai aia tha zawk nunna kawng, vanram kawng zawh tuma in rilru insiam mek laiin hmelma pain nasa takin in rilru tihbeidawn a khawvelah hian dam ve tlak lo leh dam aia thih thlang zawk tura bum tum che uin, thih aia dam that zawkzia ngaihtuah hman lo turin a tibuai thin che u a, in chhiatna tura in rilrua thusawitu kha in hmelma a ni a, in hneh thei! In huaisenin in tuarchhel a, in hrehawmna kha in tuarchhuak thei!

I sual i sim vanga i tawrhna kha Lalpa’n i tawrh a phala vui thei i ni lo tih inhria la, tuar tang tang la, i tuar chhuak thei lutuk! Beidawng reng reng suh, I rilrua “I rilru a hah sia, intihlum daih rawh” tih thu lo awm kha i hmelma thusawi a nih kha awih reng reng suh! Khatiang rilru a lo luh veleh khan “Ka rilru hahna hi ka thih chuan ka siam tha thei dawn si lova, ka tuar hram hram anga ka tuar chhuak dawn” tiin i rilru tikhauh tlat la, i tuar chhuak em em ang. I thei lutuk, i theilo titu kha i hmelma a nih kha, i rilru hahna kha a tawrhchhuah theih! Dam la, i tuar chhuak ang! Mi dawihzepte chauh hian a ni mahni intihhlum tum thin! Nang chu i huaisen a, harsatna hneh thei i nih kha! I chhungte tihlimtu tur leh thlamuantu tura piang i nih kha, i hlu lutuk i hlutzia tilang zual zel turin dam a ngai, thi suh! Pathianin i hun tawp a ruat hma chuan khawvelah hian i tangkaia khawvel leh i chhungte tan hlutna i neih avangin Pathianin a damtir che a nih kha, lawm em emin dam takin awm reng rawh.

Nu leh paten mawhphurhna kan nei : Kelkang atanga Thlarau Thianghlim harhna zarah thalaiten nun kawng tha zawk, vanram kawng zawh tumin rilru an siam mek a, thalaiten an sual sim a, Lalpa lam an hawi hi Setana hian a hlau lutuk a, a kawtawpah tan a khawh a, thalaite tihbeidawna intihhlumtir a tum ngar ngar a; chuvangin, nu leh pate hian mawhphurhna kan nei nasa lutuk, tuman hau lo ila beiseina nung nei turin tanpui ang u, nu leh pa, nun kawng tha lo zawh kan awm a nih chuan insiam tha vek ang u, kan thalaite hi setana lak atangin i chhan ang u.

Sihal û leh ramsa hram dan hmangin ralkhel dar min vuak khum mek! Kan thenawmte muthilh hlanin an in kang ta sela, kan hmuh hmasak chuan kan hrilh ngei ngei ang, kan hrilh lohva an kanghlum a nih chuan mawh kan phur ngei dawn a ni. Chutiang chiah chuan mi tam tak thlarau lamah an muhil mek a, an muthilh mek laiin hremhmun meiin a kang tan mek a, an dinhmun hlauhawmzia mihring tawng pangngaia hrilhin an hre thei si lo va, Lalpa hmangaihna chuan an dinhmun an hriat theih nan ramsa hram dan hmangin ralkhel dar a vaw ta a, Sihal û, Ui bauh leh Zawhte ngiau hmangin koh harh a tum ta a, nula tlangval naupang thlengin a autir ta a nih hi. Ramsa hram anga hram vak vak hi an zak lutuk! mi tam tak Setana bumna avanga an inawhhluma, hremhmun meiin a kan ral ai chuan tiin zak chung chungin an û a, an bauh ta a nih hi hei hi setana’n a hlau em em a, tihbuai a tum ngar ngar a nih hi.

Khawlaia hnehna puanga ring taka an au hian kan Pathian hi a beng a chheta ring taka biak a ngai tihna a ni lo, inpeih loten an dinhmun hlauhawmzia an hriat theih loh nan Setana’n khawvel hi a ti bengchheng nasa zual sauh si a, chuvangin thima thu te’n an dinhmun hlauhawmzia an hriat theih nan ring takin au a ngai ta a nih hi.

Thlarau chaw tha pe turin kohhran a tan a ngai: Kan thalai thlarau thianghlim harhna chang thar, thlarauva bul tan te hian an harhna chan hi tisa a an zawh palh chuan kan ram hian kan chhiatpui nasa dawn si a, kan tanpui loh chuan Setana’n beidawnna hmangin a bei anga, an intihlum leh mai ang, an thlarau chan hi timit lova ti alh zual zel turin kohhran hi a tan a ngai, thlarau chaw tha pek an ngai.

Thlarau chaw tha pekna tha ber chu inkhawm buatsaih tam a, Pathian thu hrilh tam hi a ni, Pathian thu hrilh tam an ngaih rualin an dawn sawi chhuahna hun siamsak an mamawh! Harhna chang tharte hi Kohhran inthlahdah vanga beidawnna khura an luh palh chuan a pawi dawn em asin!

An mamawh lai taka thlarau chaw pek a ngai: Thlarau thianghlima harhtharna chang mek thalaite hi an than puitlin nan tun hi thlarau chaw tha pek hun a ni, kohhran hi a chet muan lutuk chuan thlarauva an riltamna a reh hman palh thei, thlarau chaw an ei chak tawh loh hnuah pek a tum leh si chuan ei duh lovin an kalsan mai mai tawh ang, chutih hunah chuan Kohhran hian mittui nen eitir tum ngial mah sela Ui puar koh ang chauh an ni tawh ang, tun hi thlarau chaw an mamawh lai, an ei duh hunlai a ni e.

Kan chawm puitlin theih nan an thlarau chan hi kan pawm phawt tur a ni, an zingah kalin an zawh tur kawng kan hrilh ang, an zawh tur kawng khawhmuh si lova, “An nunah hmuh tur a awm lo, an kal sual ngei ngei ang,” tia hmuhnawm thlira kan thlir mai mai chuan rorelna niah an thiam thu an la sawi ve ang. Harhna chang thar mekte hi Lalpa’n a rawngbawl hna thawk tura a buatsaih mekte an nih hi Kohhran hian a ngaihthah thiang lo ve!

An rah lawh kan tum hma lutuk em! Thlai chi kan tuh rualin a rah lawh nghal kan tum ngai lo, leitha leh tuia kan chawma, a ei chhe thei rannung laka kan venhim hnuah rah tha lawh tur a awm chauh ang hian thalaite nunah thlarau chi tuhin a awm chauh va, a rah lawh tur a la awm lo, thlarau leitha leh tuia kan chawma, a ei chhe thei laka kan venhim hnuah harhna chang thar mekte nunah hian rah puitling lawh kan tum chauh tur a ni, chawm puitlin phawt an ngai, an rah lawh kan tum hma lutuk chuan kan tibeidawng ang a, Setana’n a châng reng si a, a um hlum palh ang e.

Facebooktwittergoogle_plusredditpinterestlinkedinmail

Editorial : Ngaihsan tur dik mi dik (September 13, 2015)

Mizo politician leh officer lian (bureaucrats) ‘Eiruk’ laka fihlim nia mipuiin an hriat thlanna chu Mizo Zirlai Pawl in a huaihawt a. Mipui ngaihdan vote in khawn khawm a ni a, ngaihdan 2,000 dawn lai a luta, thlahchhuah politician 3 leh officer 3 te chu chawi mawina hun bik hman a ni tawh bawk a ni. Mipui thlanchhuah te hi han thlek zawk pawha ‘an awm hle mai’ tih tur an ni hlawm a, mipui pawhin an pawm tlang niin a hriat a ni.

Eiruk tih hian sum, in leh lo a kawk thin a, hemi piah lamah hian hetiang nilo hna a zirin eirukna a awm bawk a ni. Eirulo ber thlan zing ami Chief Secretary chuan sawrkar hnathawk te’n ‘hun’ an vawn dik loh a ngaimawh thu a sawi a, sumpaia hlawh petu chu sawrkar a nih vangin a chhawrtu in thawh hun chhung a bituk aia tlem thawkte chu ‘eiruknaa’ inhnamhnawih nia a ngaih thu a sawi bawk. Hemi piah lamah te thama ngaih mahse a tlinkhawma tam tak nisi, sawrkar ta han lak mai te pawh a huam tel tihna a ni a. Sumdawngin uchuak taka hlep a tumnate, mimal hnuaia thawk dik loa thil tih chingte leh midang pawisa lek loa mahni chauh inngaihtuahna thlengin ‘eiruk’ sawifiahnaah khung tur a ni ang. Hei hi chonaah lain ‘mimal’ angin inenlet theuh ila a duhawm hle mai.

Zoram khawvel hian a tha lam aiin a chhe lam a nei tam emaw tih mai turin thil rapthlak tak tak, thangkhat liam taa ngaihtuahnaa awm pha eih lote chu a ri zing ta malh malh viau a. Sual na leh rawng taka mi pawikhawihte, politik-a chhepui pui puia inbeihnate chuan mipui a chiah zawp hneh ta hle mai. Hetiang kara beiseina kaitho thei; a eng (positive) zawnga huaihawttu MZP an fakawm hle mai! Thil chhia ri tam lutuk kara ‘a tha lam a awm a ni’ tih leh ‘hmasawnna a ken beisei chunga ti’ an nih thu an sawi a, hriat a nuam khawp mai. Hei hian MZP hi mipuiah sang zawkin a vawrh dawrh a, an lawmpui awm hle a ni.

Midang chanpual chhuhsakna ‘corruption’ hian Zoram hi a fan chhuahna a rei tawh a, fihlim tura beisei te an inhnam hnawih tih hriat apiangin mipuiah beidawnna a thlenna, hneh hleih theih loh nia ngaihna lian tak chuan eiruk pawi tih lohna rilru a thlen a ni. Hei hian eiru theia thuneihna chelhtu politician leh sawrkar hnathawk lian te phek ena eiru tura ngaihna mipuiah a thlen thin. Ngaihdan piangsual – thil ti theite hnaih loh chuan engmah ti thei lo nia inngaihna a thlen phah a. Mahni inthiamchawp nan midang eiruk hmang te pawh awm theih a ni lehzel a. Sakhua chu thuhran, khawtlang/dan anga thlir pawhin eiruk hi sual a ni hrim hrim a, than ti thutu lian ber a ni a, a la ni thei zel bawk a ni. MZP in eirulo thlan an huaihawt hian a tha zawng in nghawng a neih a beiseiawm khawp mai. Eirukna beih let nan hmanraw tangkai tak a ni dawnin a lang bawk a ni. Eirulo nia mipuiin an thlanchhuah 6 te hi ram rawngbawlnaa thuneihna sang vuantute an ni lehnghala, sawrkar hnathawk zinga hotu lawk ber Chief Secretary eiru lo berah a tel mauh mai a, sawrkar hnathawkte khalh ngiltu a ni thei a, CS a nih laia he chawimawi na a dawn hi malsawmnaah a chan ringhlel lo ila. Hmasawnna hian ‘duh belh zelna’ a keng tel a; tam tak chu an tlan thui tawh hle a, sum bawih ah tangin tawp chin a awm thei loa, a vuak let a na duh khawp mai ! Chutih laiin mipui chuan a nuam lai chauh an hmuhsaka, chhungril an hriatpui tawh loh avangin an dinhmun chu an awta, an ngaisang fo a, hei hi thil nihphung dik tak a ni a. Eirulo thlante hi a dik chauh ti zel tura ngaih an ni tawh a, politician leh sawrkar officer lian dangte tan chona a tlinga, phurna thar a pek ngei a beiseiawm. Eiru lote hi ngaihsan tur dik an ni a, kan hlut tur an ni. Mizote hian engnge kan hlut ber le?

Eiru lo midik te hian thil dangah tlinlohna tam tak an nei a, mihring an nih vang a ni. Thil dik an duhna erawh kan thil hlut (value system) zingah telh a pawimawh hle a, kan mamawh lai tak a ni bawk. Kan ramah hian thil tha chauh ti thin tam tak an awm tih hre nawn ila, mipui pawh hian thil ‘dik’ kan duh tak tak em? tih te hi beng sikin ngaihtuah ve tawh sela. Thil dik ngaihsana, thil ‘dik leh tha’ titute hluta fuih sauh sauh hi ram siam that kawngah mitin mawh a ni bawk.

Facebooktwittergoogle_plusredditpinterestlinkedinmail

Login

Lost your password?