Monthly Archives: October 2015

Tinreng feature : NLUP – Per capita In come a pung

Aizawl: Mizoram ah New Land Use Policy (NLUP) kalpui tan a nih atangin chhungkaw tin sum lakluh ‘Per Capita income’ chu nasa takin a pung a, kum 2010-2011 a Rs. 50,956 chu 2014-2015 ah Rs. 90,015-in a pung chho a ni.
Tunhnaia NLUP Implementing Board in Media mite tana NLUP chungchang zirhona an buatsaih ah he thu hi Planning mithiamte chuan an tarlang a. Kum tina Per Capita Income punna hi 19.16% niin kum 2010-11 atanga 2014-15 a punna hi 76.65% a ni. Mizoram sum dehchhuah ‘Gross Domestic Product’ (GDP) pawh nasa takin a pung niin an sawi a, kum 2010-11 a GDP chu vbc.6,387.88 anih laiin 2014-15 ah chuan vbc.12,498.69 a ni a. Kum 2014-15 a Mizoram economy thanna chu 8.46% a niin a thanna hi a sang hle a, a chhan lianber zingah NLUP a tel niin an sawi bawk.

NIB mithiamte sawi danin NLUP chungchang zirchiangtu Mizoram University (MZU) mithiamte chuan kum 4 chhungin thingtlang loneih chu 45.5%-in a tlahniam a, thingtlang lo nei chhungkua pawh 20% a tlahniamin thingtlang loneihna area pawh hectare 6102 (22.52%) in a tlahniam niin an sawi a. Lo neia eizawng hi kum 2010-11 ah chhungkaw 68,433 an awm laiin 2012-13 ah 58,751 in a tlahniam a. Hetih lai hian leilet a eizawng (WRC) chu nasa takin an pung thung a. Kum 2009-10 a WRC hectare 11,198 chu 2013-14 chu 16,170 hectare-in a pung a, a punna hi 44.4% a tling a ni. MZU mi thiamten Serthlum (Mandarin Orange) bik an zirchianna ah chuan kum 2017 ah Serthlum tharchhuah hi 17.25%, 2017-20 ah 59.64% leh 2010 ah chuan 100%-a pung turin an chhut a. Kum 2012-13 ah Serthlum tharchhuah hi metric ton 24,100 anih laiin 2014-15 ah chuan 55,960 mt a ni.

Facebooktwittergoogle_plusredditpinterestlinkedinmail

CANDIDATE PUAN; Cong-MPC & MNF in naktukah; NDA?

Aizawl: November ni 26, 2015-a Aizawl Municipal Corporation inthlan loawm turah naktuk hian Congress-MPC tangrual leh MNF Party chuan an candidate tur te hming an puan beisei a ni a. Hetih lai hian ZNP-BJP tangrual NDA chuan an la tihfel loh avangin an puan hun tur a la chiang lo thung.

Congress leh MPC thawhhona turah hian MPC-in seat 5 changin Congress in seat 14 an chang thung dawn a. Bial chan zat ah inremna awm tawh mah se party pahnih bial chan turah engemaw sawifel ngai a la awm avangin MPC lam chan tur bial hi tihfel a la ni lo a, nizan khan MPC thuneitu sang chu an party hruaitu Col. LC Sailo inah thukhawmin thutlukna hi siam hman an tum. Zalen thudawn danin MPC lam hian ward IV, VIII, XII, XII leh XVI te chu an party chan ah an duh deuh nia thudawn a ni.

MNF Party chuan AMC-a an party candidate turte hi nimin zing khan an tifel a, naktuk dar 11 hian Hnam Run chhung inkhawmah party President-in a puang ang.

Hetih lai hian ZNP leh BJP thawhhona NDA chuan an candidate tur hi an la tifel lo a. Zalen-in a biak naah ZNP President Lalduhoma chuan, “AMC seat chuh kim vek kan tum a, vawi khat chiah kan la thutkhawm vangin kan la inpeih lo a. Ward tina mi tha leh candidate awm mite kan thlir mek a ni,” a ti. ZNP President chuan Aizawl North III bye election pawh NDA hminga chuh an tum tih a sawi bawk. 

Facebooktwittergoogle_plusredditpinterestlinkedinmail

Zoram titiah khawtlang sualna ven dan sawiho

Aizawl: Nimin khan Vanglaini chanchinbu buatsaihin Aijal Club ah ‘Khawtlang sualna- Engtia ven tur nge?’ tih thupui hmangin Zoram titi hun buatsaih a ni a, he huna thu sawitu tam ber chuan khawtlang sualna veng turin chhungkua a tanlak a pawimawh ber tih an sawi.

Nimin Titi hun buatsaih ah hian tlawmngai pawl, Kohhran hruaitu, Magistrate, zirlai pawl, chanchinbumi, Ukil leh milar engemaw zat an tel a, kalkhawmte chuan ruihhlo hluar,aia upa zahna tlahniam, dan pawisaklohna, social media hmansualna te chu ngaimawhawm an tih thu an sawi a. Sualna hrang hrang a ziaawm theih nan chhungkua a inzirtir tam, mahni kuta dan lek mai lova dan zawm thiam, dan siamtu leh kengkawhtu lam tihchak tih te chu an sawi pawimawh zual te an ni.

He huna tel ve Magistrate pakhat sawi danin ruihhlo kaihhnawih a man te an tan rei theihlohna chhan chu Doctor ten medical certificate an ziahsak thin vang a ni tih a sawi a. “Tha deuh nia kan ngaih pawh Doctor-in thi lek lek anga an ziah chuan kan chhuah lo thei lo a. Hetianga certificate nei zingah hian Khehpuam case an tam bik a ni,” a ti bawk. Magistrate chuan rukruk case a tam nia sawiin hei hi damdawi nen a inkungkaih deuh vek niin a sawi bawk.

Facebooktwittergoogle_plusredditpinterestlinkedinmail

Nov-ah FSA hman tum

Aizawl: Food, Civil Supplies & Consumer Affairs Department chuan November 2015 atanga Mizoram ah Food Security Act kalpui tan tumin tan an la mek a, mahse buaipui ngai a la tam deuh avangin FSA hi November thla atang chuan kalpui tan hman a ni lo mai thei nia thu dawn a ni.

Veng/khaw hrang hrangin FSA hamthatna dawng tura an thlante list hi anmahni bialtu DCSO-ah an thehlut hlawm tawh a, mahse Selection Committee siamthat lehna veng thenkhat la thehlut ve thei lo an awm bawk.

Food Security Act hnuaiah lian ‘A’, ‘B’ leh ‘C’ list te siam a niin list ‘A’-ah hian AAY chhungkua dah an ni a, veng/khaw hrang hrangah thlan theih zat bituk a ni a. List ‘A’ a thlan chhungkua te hian thla khatah buhfai kgs 35 chu Rs.3 hisapin an lei thei dawn a ni. List ‘B’-a awmte hian mi pakhat zelin thla khatah a man tlawm, Rs.3 hisapin buhfai kgs 5 leh a man pangngai, Rs.15 hisapin kgs 3, a vaiin kgs 8 an lei thei ang a. List ‘C’-a awmte hian tuna a man pangngai Rs.15 hisapin kgs 8 an lei thei bawk ang.

Mizoram a FSA kalpui nan hian thla tin buhfai metric ton 6600 mamawh a ni dawn a, heng zinga metric ton 3804.41 hi sawrkar laipuiin a rawn tum ang a, a bak metric ton 2795.59 hi state sawrkarin a tum ve thung dawn a ni. Thla khata buhfai kgs 35 la thei, AAY chhungkua hi 26,100 an awm a, a then a zara a man tlawma la thei (priority B) hi mi 5,78,182 an awm bawk.

Mizoram sawrkar chuan tun dinhmunah thla tin buhfai 106,120 qtls. a lei a, heng zinga 56,120 qtls hi FCI atanga a lei niin tualchhung atangin 50,000 qtls a lei bawk. Buhfai lei nan hian thla tin Rs.16,55,74,950 a hmang a ni.

Facebooktwittergoogle_plusredditpinterestlinkedinmail

Vbc 9 thubuai neih huaisar zawk -Patea

Aizawl: Aizawl North III MLA bye election a Congress candidate Lal Thanzara chuan ‘huaisar’ nia sawina chhanglet in vbc 9 thubuai neih chu a huaisar zawk nia a hriat thu a sawi. MPCC Nomination Committee in ding tura an ruat avang leh Aizawl North III bial Congress Special Block Conference in ding leh ngei tura an ngen avanga ding leh a nih thu Zalen a hrilh bawk.

MLA candidate a nih leh chungchanga MNF President-in ‘huaisar’ tia a sawi chu Lal Thanzara chuan, “An lo haw hnu reilotea vaibelchhe 9 neih vanga thubuai rip tak neih hi huaisar ka ti a, hnam sipai leh martar te zah lohna ah ka ngai a ni,” a ti.

Zalen palaiin a biak naah Lal Thanzara chuan, “MNF hruaitu tha tha ten an hnial thlak vek hnu a Pu K.Vanlalvena an pem buhbel hi ka lainat hle a ni,” a ti a. MLA leh Minister atanga a ban chhan chu MNF Thalaiten dawt muhluma an puhna Mizo mipuite hriata finfiah a ngam zia lantir nana bang a nih thu a sawi nawn bawk.

Aizawl North III a MNF Candidate K.Vanlalvena hi Zalen palai chuan a ngaihdan zawh a tum a; mahse, a be tlang thei lo a ni.

Facebooktwittergoogle_plusredditpinterestlinkedinmail

A ruala vote chhiar duh

Aizawl: MNF Party chuan Aizawl North III MLA bye election leh Aizawl Municipal Corporation vote chhiar chu a ruala neih an duh thu ECI ah an thlen.

MNF Party hian Zirtawpni khan Election Commission of India-ah lehkha thehlutin bye election vote chhiar hun atana ruat November ni 24, 2015 tuk lawk November ni 26, 2015-a AMC inthlan a nih chuan nghawng tha lo a awm thei dawn nia sawiin AMC leh Assembly bye election vote chhiar hi a rual (ni khat)-ah neih nise an ti a ni.

Facebooktwittergoogle_plusredditpinterestlinkedinmail

Man tlawmin ran chaw kg. 29,000 Vety-in hralh

Aizawl: Animal Husbandry & Veterinery department chuan Animal Feed Plant, Ramrikawn atangin kum 2013 atanga kumin September thla thleng khan ar, vawk leh bawng chaw kg.28,996 an herchhuak a, heng te hi ran vulhtute hnenah man tláwm zawkin an hralh chhuak leh thin.

Animal Feed Plant atang hian kumin chhung bikah January atanga September thla thleng khan ar chaw kg. 3335, vawk chaw kg.3220 leh bawng chaw 6724 a her chhuak tawh a. Khawl lian hian ni khatah ran chaw ton 50 a her thei a.Feed Mill tih len a nih chuan tuna nikhata a her chhuah theih let aia tam a her chhuak thei dawn a ni.

AH&Vety department hotute chuan ar chaw chu kg. khat Rs. 5 leh vawk leh bawng chaw Rs. 3-in company dang siam chhuah aiin an titlawm zawk niin an sawi a. Company thenkhat in quality chhe zawka an zawrh chhuahna man aia tlawm deuha an zawrh thin chuan an tih chhiat deuh thu sawiin, an siam chhuah erawh ran tan chaw tha tak quality tha tak a nih thu an sawi.

Animal Feed Plant enkawltute chuan Bawng chaw hnimhnah dahthatna tur project kalpui chho tan a nih thu Zalen palai hrilhin, ranchaw (Fodder) te chu silage Drum chhungah boruak tel lova up hmin-in ni reilo te hnuah fodder quality tha tak a nih theih dawn thu an sawi a.Silage Drums te hi engemaw zat lei tawh a ni a, Aizawl leh a chhehvel a Bawng vulhtu tam tak ten an chhawr tangkai thei hle tur a ngaih a ni. Heng Silage fodder te hi ranchaw hnim hring van hun a tan a fodder dah that dan tha tak a nih tur thu an sawi bawk.

Facebooktwittergoogle_plusredditpinterestlinkedinmail

Kum KHAT chhungin MPSC-in hna ruak 231 hnawh khat

Aizawl: Mizoram Public Service Commission (MPSC) chuan kum 2013-2014 chhung khan hnaruak chi hrang hrang 231 an hnawh khat tawh a ni.

MPSC Annual Report (Twenty Third) tarlan danin kum 2013-14 chhung hian hna thar lakna tura dilna mi 15,831 hnen atangin an dawng a, 343 chu hnawl niin tum 12 Exam an buatsaih a. Mi 3567 ten written exam beiin 333 ten interview an hmachhawn a ni.

Hemi hun chhung vek hian MPSC hian Department hrang hranga hna/post ruak 1084 hnawhkhah dilna a dawng a, chung zingah chuan Mizoram Civil Service (MCS) atan tum hnih exam buatsaihin (Departmenal exam atangin) mi 13 lak an ni a, Mizoram Police Service atan mi 4, Mizoram Finance & Accounts Service ah 3lak an ni.

Facebooktwittergoogle_plusredditpinterestlinkedinmail

Thlasik laia petrol & gas chatlak loh nan John-an hma la

Aizawl: FCS&CA Minister John Rotluangliana chuan nizan hmasa khan Silchar Mizoram house ah Indian Oil Corporation (IOC) hotute kawmin zanriah a kilpui.

Minister chuan IOC hotute chu furpui liam ta leh rel kawng siam len vanga Mega block chhunga harsatna lutuk awm lova Mizorama LPG leh POL an pek avangin lawmthu a hrilh a. Thal, Krismas leh Kumthar lo thleng chho turah pawh a theih anga tha a tan la leh turin a ngen a. Mizoram ah Oil Depot hmantlak a awm loh avangin thil engemaw thleng hlekah petrol control ngai nghal khawpin a harsa a, a rei deuh phei chuan harsatna a awm thin tih sawiin sut kian dan awm thei se a ti a. Mizoram hmun hrang hrang a LPG Distributor leh POL Retail Outlets tam zawk hawn theih nise tiin rawtna a thlen bawk.

IOC hotute pawhin Mizoram nena thawh hona a tluan avanga an lawm thu leh theih anga thaa mipui mamawh pek zel an tum thu an sawi a. Borkhola LPG Bottling Plant ah storage lian zawk 60,000 Metric Tonne dawng thei chu November, 2015 chhung hian hawn hman tum a ni a. Tluang taka hawn a nih chuan Mizoram chuan LPG an hnianghnarin an dawng tawh ang an ti a ni.

Facebooktwittergoogle_plusredditpinterestlinkedinmail

Hruaitu thar

Youth Hostel Association of India, Mizoram State Branch, kum 2015-2018 chhung hruaitu tharte
Chairman : Zothanmawia, Director, Sports & Youth Services. President : Dr.Lalbiakmawia Ngente, Principal Architech & LEAD Fellow; Vice President : Vanremsanga Hmar Varte, Chhinga Veng & Lalhmingmawia Colney, Khatla ‘S’ Treasurer : Zodinsanga Thakthing.

Facebooktwittergoogle_plusredditpinterestlinkedinmail

Login

Lost your password?