Monthly Archives: October 2015

Campaign khar

Aizawl: September ni 25,2015 atanga hman tanIndia ram puma faina leh thianghlimna ‘Nation-Wide Sanitation & Cleanliness Campaign’ Programme chu Zirtawpni khan kharna inkhawm, Chaltlang Y.M.A Hall Aizawl ah neih a ni.

Kharna hun hi Er. C. Lallunghnema, Executive Vice Chairman leh Superintending Engineer, PHE ni bawk in a kaihruai a. Er. Lalmuanzova. Chief Engineer, PHE Zone-I chu khuallian a ni. Resource Person Dr. Sangthuama Ngente, Chief Medical Officer, Aizawl ‘W in “Health concerns for youths” tih a sawi a, Er. Lalsanga, Executive Engineer, PHE in Power Point Presentation hmangin ‘Sanitation’ chung chang zirtirna a nei a, Malsawma, Hindi Propagation Officer (HPO) in lawmthu a sawi a ni.

Nation-Wide Sanitation & Cleanliness Campaign hi sawrkar laipui Ministry of Drinking Water & Sanitation in India ram pum a faina leh thianghlimna lama hma lakna atana Campaign ni 25.9.2015 – 31.10.2015 chhung atana a buatsaih a ni a. Hemi denchhen hian Mizorama District leh khaw hrang hrangah pawh theih ang ang a hman a ni.

Facebooktwittergoogle_plusredditpinterestlinkedinmail

ThISEN PE

Nimin khan Venghlui Branch KTP chuan Synod damdawi, Durtlang a damlo a mamawh apiangte hman atan thisen unit 36 an pe a. Synod damdawiin thawktute hian kal chilhin thisen lak hna hi an thawk a ni.

Facebooktwittergoogle_plusredditpinterestlinkedinmail

KANGHLUM

Khama (47), Halkha (Myanmar) lam mi, tuna Kawlthuama (L), Chanmari huan enkawltu chu Zirtawpni khan an huan Sesawng rama Tuirirumah kanghlum a hmuh a ni a, mi kut tuara kang nge a huan halin a kanghlum hriat a ni lo a, Bawngkawn police ten thil awmdan an chhui mek. Khama ruang hi post mortem anih hnuah a chhungte Zuangtui lam ami chuan la in vawiin lamah an vui dawn niin thudawnna chuan a sawi.

Facebooktwittergoogle_plusredditpinterestlinkedinmail

Thukhawm dawn

Committee on Subordinate Legislation chu November 4, 2015 chawhma dar 11 hian an chairman John Siamkunga hovin Assembly Committee room-ah an thu ang.

Facebooktwittergoogle_plusredditpinterestlinkedinmail

Zin dawn

Chief Minister Lal Thanhawla chu Nilaini hian chhim lam panin a zin dawn a, November ni 4,2015 hian Mara Students Organisation golden jubilee a hmanpui ang a, a tuk ah Mualcheng tlawhin Zirtawpni (November ni 6,2015) ah Lunglei Press Club a hawng ang a, Inrinni ah Aizawl a lo let leh ang.

Facebooktwittergoogle_plusredditpinterestlinkedinmail

Pawtsei

Mizoram sawrkar chuan Commissioner for Persons with Disabilies hna chelh mek B.Sairengpuii hnathawh hun chhung chu kum hnih dang, ni 23.10.2017 thleng atan a pawtsei.

Facebooktwittergoogle_plusredditpinterestlinkedinmail

Ei zawnna nge rawngbawlna?

Kan hma lawk hian Aizawl Municipal Corporation, Aizawl khawpui sawrkar kan tih leh Aizawl North III ah bye election a awm dawna. Inthlan puan a nih avangin party, sawrkar te chu Dan hmangin phuar an ni hriha, inthlan a thiang hlim zawk nan tum dangah pawh tih ziah a ni. Tunhma kha chuan politics hi eizawnna niloin rawng bawlna a nih thu sawi a ni fo a, mipui pawm dan a ni thin. Tunah chuan eIzawnna anga ngai an tam tawh a, hei hian ram a tichhia niin a lang a. Inthlan dawnah mipuite’n ramin deh chhuah a neih theih nana theihtawp chhuahtute hi hre reng sela a tha hial awm e. Inthlanah dan a khauh zel a, 2013 inthlan phei chuan a khauh tawh hle a, media a advertisement tih leh thuchhuahah pawh hriat loh avanga tisual an awm nual a nih kha. Tun tum pawh hian a ni leh tho dawna dan piah lama che duh emaw che ngam te chu hruaitu atan an tlak em? Tih ngaihtuah ila.

Ram hruaitute atan hian mi dik leh chak mipuiin a duh thin a, eng ang chin nge an huam, dik taka ti miten an dik avangin an tuar tawh em? Dikna duh tak takna hi ram mipui rilruah a awm teng em? tihte-in ngaihtuahna a kal a. Dik taka rorel tute chu party chhungah hian ngainat an hlawh meuh em? Dik taka dan anga theih chin chin kal thin hruaitute chu mipui tam takin an ngaithei loa, dinhmun hriat ta hiamna nei lo, ui kawm, intidik tih zawng zawng bel an ni leh si a. Mi chak chuan sel a tawk lo thei loa, hmun dangah pawh a ni.

Mihring kan famkimlo nachungin mi dik, mi chak, a ngaihna hria tunlaiah chuan kan mamawh a, chutiang mi chu mipuiin an thlang turah ngai ila.

Vawi tam tak editorial-ah pawh lang fo thin chu party worker te chinlem nei lovin an tal chia thin a, danin a khawih thei lo nia inngai an ni em ni? tih a awl rum rum. He zia hi eng dang ni lovin party hruaitute’n tawngkam an hmang na mah mah thin a. Kohhran in khak thin mahse a reh hlen thei lo.

Tun tum inthlanah pawh tawngkam buluk pui pui hmang ang chi hi chu thin hrik ngam ila. Mi diklo takzet chianna a awm a nih loh chuan a tak hrula dawt tel lakah fihlim chauh mipuiin melh sela a tha ang. Politic hi tunhma chuan tawngbawlna anga ngaih thin a ni a, tunah chuan eizawnna nghaihna nghet tak a awm a, hei hian party mi leh sa rilru a tichhia a, ‘ram hmasawnnaah he lai ah hian ka tangkaiin ka ring,’ tia rawngbawlna rilru puin an zuanglut thin a ni a, tunah chuan eizawnna engkim lennaah mipuiin an ngai a ni ta der a. Hemiah hian politic dik tak rilru ramin a put theih nan party te pawhin sawi tam se a tha ang.

Rawngbawlna rilru pu a nih chuan zahna a san phah a beisei awm a, eizawnna a nih chuan chin lem nei lo, mipui vanga sawrkar ding tih hre tawh lo ho tam tak hi an harhchhuah loh pawhin an tawmim deuh mahna.
MLA inthlan that leh AMC in thlan hi a inzawl thuak avangin boruak danglam a awm mek a, eng pawh chu nise inthlang tuemaw chu thlanchhuah a ngai ho tho a ni.

AMC-ah chuan kum 5 kalta chhunga an hnathawh anga an chungthu buk ni sela, Aizawl Khawpui hrechiang leh hmalam pen tumpuitu rilruah dah nise a thra ang.

Facebooktwittergoogle_plusredditpinterestlinkedinmail

Dr. ka zawhna (Oct, 29, 2015)

Zawhna 1: Ka vun thak hi November thla khan Civil Hospital-ah ka entir a, a dam duak a, mahse alo thak tha leh a. March thla khan ka entir leh a, an damdawi min chawhte ka hnawih zova, a ngaitein a rawn thak leh zel tho a, a dam hlen theih na min chawh thei em?
Chhanna: Vun thak i han tih hian a thak satliah nge a vual tel em, phuhlip ang te a awm em, a rawng a rawn danglam deuh em, khawi laiah nge a thak zual thin tih te han sawi tel thei la a chhan ni thei awm ang te a hriat awl theih hmel a. Engpawhnise, thil huat (allergy) engemaw ber anih a rinawm viau mai. Chutiang anih chuan a reh hlen mawh hle. A chhan hi hriat chian hmasak a pawimawh hle mai a. Ni em lai hmun, nghawng leh ban te anih chuan ni zung natna tia kan sawi mai ultraviolet radiation vang te ani thei a, chumi reh nan emaw a ziaawm nan chuan sunscreen lotion hman te pawh kan chawh thin a. Hmun biru deuh lai zakhnuai leh kap te anih chuan fungal infection vang ani thei a, heng ang hi thawmhnaw ro tha lo hak vang te in a awm duh a, thlan a insiam nasat vangin a awm thei bawk. Rulhut pai vang hian vun vual leh thak te hi a awm duh hle a, rulhut hlo te pawh kan chawh tel bawk thin. Vun natna hi taksa chhung fel lo vangin a awm fo thei bawk a, thisen test te a ngai thin bawk. Ruhseh (arthritis) thenkhat te, SLE tia kan sawi te pawh hian a thlen fo bawk a ni. Thin (Liver) tha lo ah te hian a awm duh viau bawk a, jaundice rawn lan chhuah dan te pawh ani fo bawk. Engpawhnise, investigation i la ti lo anih chuan blood hemogram, stool R/E te tal lo ti thei la, chumi result a zir chuan treatment dan te pawh a hriat theih deuh awm e.

Zawhna 2: Kapu, hmeichhia kum 38 ka ni a, ka pum hi a let but but a, ek chhuak ang deuh in leh ka luak a chhuak reng a ,damdawi ei tur min hrilh thei em?
Chhanna: I insawiselna avang hian doctor i rawn tawh em? Endoscopy leh blood test te i ti tawh em? Hengte hi i la ti lo anih chuan tih hmasak a tha hle mai. Pumpui/chaw kawng lawng vang te ani thei a, chutiang anih chuan endoscopy result hriat a tha hle. Gastro-esophageal reflux disease (GERD) tia kan sawi thin hi pumpui acid tui kha chaw kawngah a rawn fawk let a, chu chuan chaw kawng lawng a siam a, pumpui leh ril chet a ti buai a, luak chhuak, ra so te a thlen thei a ni. Ek chhuak ang deuha awm i rawn sawi tel avang hian i ril lam a khawih tel te anih duh hmel a, Irritable Bowel Syndrome (IBS) te pawh i nei ani thei bawk. Chutiang natna chu a chhan tak hriat theih si loh, an insawisel dan atanga diagnosis siam ani thin a. A reh mawh hle a, zan mut mumal lo te, chaw ei hunbi mumal lo te hian an nei duh viau bawk. Damdawi ei tur inchawh hmain endoscopy hi lo ti hmasa thei la, zuk leh hmuam i tih chuan insum deuh la, ei leh in hunbi mumal neih te, zan mut hunbi fel tak neih te a pawimawh tih i lo hre tel dawn nia. Engpawhnise, Ganaton Total tih damdawi hi zing thawh veleh pum ruah laiin mum khatin ni 10 vel han ei chhin la, chumi in a tih ziaawm chuan thla khat chhung ei chhunzawm la, anih loh chuan doctor mumal deuhin i lo in entir dawn nia.

Facebooktwittergoogle_plusredditpinterestlinkedinmail

Krismas Bazar atan

Vaiho kutpui pawimawh ‘diwali’ a hnai a, TV leh internet lamah sumdawngte infak mawina hmuh tur a tam leh ta khawp mai, kum tin an tih danin phai lamah chuan thil man an pawh a titlawm leh viau tawh a ni. India rama sumdawng liante hian an bungraw zawrh tihtlawm thin lai an nei zeuh zeuh a. A tlangpuiin tihpui lian tham – Kutpui, Krismas, Diwali, World Cup, etc., lai te hian thil man a tlawm thin a. Kutpui lawmna bakah mitinin hlim taka hun an hman theih nan leh mipui rilru inhawn lai a nih avangin sumdawnna lamah hlawkpui an lo tum thin vang niin a lang.
Kum rei vak lo kal ta atang khan diwali leh puja lai hian man tlawm zawka thil an zawrh thin avangin internet hmanga sumdawnna (online retail market) lam an hlawk hle thin a. Nikum October thla chhung khan internet hmanga sumdawng (e-tailer) lian zual Flipkart, Snapdeal leh Amazon te chuan nitin an Cheng vbc 600 man vel an bungrua an hralh thin. Kumin phei hi chuan an tang nasa leh zual a, an bungraw hralh leh an pawisa lak luh pawh kum hmasa lam a khum viau dawnin a lang. Tunhnai maia a lan dan chuan Amazon hi hmahruaitu a ni mek a, Flipkart leh Snapdeal leh Shopclues-ten an um mek a ni. Amazon thil zawrh zat hi maktaduai 18 atangin maktaduai 30 ah kai a, Snapdeal hian thil/bungrua maktaduai 15 vel an zuar mek bawk.
Hetihlai hian online market lian zel hian dawrkaite sumdawnna lam pawh a nghawng nasa hle a. Khawpui liana sumdawnna hmunpuiahte pawh beisei aiin thil hralh a har a, kum dang ngaihtuahin bazara thil lei an tam lo deuh niin zir chianna thenkhatah chuan an sawi. Hindu kutpui vanga e-tailer hoten an thil zawrh man an tihhniam lai hian thilsiam chhuaktu company-te, dawrkai lianhote pawhin man tlawm zawka lei theih turin offer an nei thin a, thlawhna chuan mante pawh an tihniam thin bawk.
Sahmulphah thla kan thleng leh ta a, thlasik rim a nam tan leh ta a, Krismas hla sak ri pawh hriat tur a awm tan ta bawk. Krismas laia thawmhnaw leh thil thar neih ngei tum thin kan nih avangin nu leh pa tam tak chuan tu leh fate thil leina tur an lungkham tan mekin a rinawm. Mizote hian sumdawnna lama kan entawn ber vaiho ze tha lo hi kan la nasa hle a – an sum duh lutuk te, bazaar-a an au bengchheng chul thin te, an chalak/phakar zia te, thil leitu bum an chin te, bungrua/thil a nihna aia nasa a fak chiam te, leh a dang te hi vaiho zia a ni a, kan pi pu atanga kan hnam ze dik tak a ni reng reng lo a nia.
Hunpui inher lai kan hmachhawn mek lai hian vaiho mai ni lo, khawthlang ramte pawhin an uar em em sumdawngten hunpui laia man tlawm zawka thil an zawrh thin ang hi Mizoram (a bikin Aizawla) sumdawngte hian ti ve se a duhawm ngawt ang. Mizote rilruah chuan Krismas leh Kumthar tluka hun ropui a awm lo a, hetih hun lai na na na hi chuan sum leh pai pawh kan hmang nasa kum tin thin a nih hi. Rilru zau tak sengin, Kristian rilru tak pu chungin ngaihtuah vang vang ta ila, sumdawngte hian an rilru put hmang hi thlak ta daih se Krismas bazarpui lai hian thawmhnaw leh thil dang man hi titlawm thin se la chuan a rethei apiang an lawm ang a, mi tin tan hlimna a thlen ngei ang.
Rei lote chhunga sum hai luh teuh tum hi sumdawng tan chuan a chakawm viau ang a; mahse, uchuak taka hlep vak mai te, thil a man leh a hlutna aia sang daih a hralh tum talh mai te hi chu mi puitling zia chu a ni chiah lo deuh, sumdawnna tlo duh tan phei chuan hlawk thut hi a him lem lo, dikna leh rinawmna nena sumdawn hi a tlo ber. Kan sumdawngten lo haw lo se, tuna an tih dan phungah hi chuan Krismas bazar hun lai hian thawmhnaw lam man hi an tisang vak a (phai lam rate hre tan phei chuan chek tlawk tlawkna tham a ni thin), Khawpui pawn lam mite haw rem hnu Mas urlawk ni velah a man a tlahniam leh a, kumthar lamah phei chuan a tlahniam rawih rawih thin a ni.
Sorkar lam hian sumdawngte vilna dan lek tur an nei lo a ni mai thei a, a lo nei reng a, an hmang ngai lo pawh a ni thei tho; mahse, mi mamawhna denchhena hlep uchuak taka thil zawrh te hi chu khuahkhirh theih tur chu niin a lang. Chuvangin, Krismas bazaar a thil man sang uchuak thin lutuk hi thuneitu lam hian vei ve deuh se, eng emaw chen chu tih theih an nei ngei ang. Kan ramah hian inrelbawlna tha (good governance) a awm loh vangin kawng hrang hrangin kan tuar a, mipuiin kan chanvo kan hriat loh avangin kan tawrh dan pawh hi kan hre vek lo zawk a. Inrelbawlna tha a awm chuan sumdawnnaah pawh dikna leh rinawmna a awm anga, hlep tur tawk aia sang hlep avanga mipui tawrhna pawh a bo ang.
Engpawhnise, Hunpui inher lai, kumtawp bazarpui kan hmachhawn mek lai hian mitinin hlim taka Masi kan hman a, naupangten thil thar an neih theuh a, hlim taka Kumthar kan lawm theihna turin sumdawngte pawhin ngaihtuahna thar seng ta se la. Kumin Krismas chu kum dang zawng aiin bazaar-ah thawmhnaw leh thil dang man han tlawm zawk ta se la, Kristian kan nih ang leh khawvel Chhandamtu lo pian cham lawmna tur a nih ang ngeiin ‘Christmas Offer’…’Christmas Sale/Discount’ uar ta ila chuan kum dang zawng aia kan hlim ber kum a ni thei hial ang. Ngaihtuah zui ang aw…

Facebooktwittergoogle_plusredditpinterestlinkedinmail

Ka Huang (Oct. 29, 2015)

Vai hnam anga hnam tha leh hnam chhiaa pianphung atanga pianpui reng anga ngai loa kan han piang hi Mizote vanneihna a va han ni chiang em. Tun hnaia India ram chanchinbu al khawpa thil thleng – Dalit hnam tute emaw in an halsaknaa naupang pahnih hal hlum a, V.K.Singh-an tehkhin thua tute’n emaw ui an vawm avangin sorkar laipui mawhphurtua puh theih a ni lo tih thu a sawi avanga chanchinbu tin deuhthaw maia kha chanchin an sawite khan kei ve tehlula rilru pawh nasa takin a kai tho a, thil hlui eng eng emaw ka hre chhuak a ni.

Jagjivanram-a Dy. Prime Minister a nih lai khan, tam takin a Prime Minister an ring a, kei chuan an thlang teuh lo em mai, hnam chhia a ni tlat ka ti thin a, kha – an thlang ta lo reng a nih kha. Mizote hi chuan hnam chhia leh hnam tha vaiin an tih ang hi kan hre (feel) phak lo nasa mai. Vaiho hi chuan an hnam kalphungah an hnam (chi leh kuang?) hi pianpui niin an ngai nghet tlat a lo ni. Kan naupan lai, 1930 chho velte khan Vai (Gorkhali)-ho khan Lushai Kuki tiin min ko thin. Tui connection-te a la awm lo bawk a, Vai hmeichhe Veng vai nuho khan Mission Veng leh Vai hmeichhe veng inkara luang Vai lui kama Darnam tuikhurte khu an rawn chawi thin. Kawng lah ram kawng satliah mai mai, inpelh awl tak ni lem lo vek a ni. An tui chawi hawng kan intawha an sari emawin min hrut tel vaih chuan an tui chhipchhuan an bun vek a, thinrim hmel deuh mai hian ‘Jatha’ min han tih khum a, tuikhur an pan leh vang vang phah thin nia. Chuti khawp chuan an hnam tha leh hnam chhia chu kar zuk hlattir a! Assam Regiment kan nih ve laite pawh khan Chawchhum kha chu Gorkhali baje an ni a, an chawchhumna lam bik kha chu an pung dang leh chhawng a, kan luh an phal lo. Kan thianpa Lalaua pawhin Ghee tina mi a spoon-in a suak hlawih mai a, pawnah a tin chu, a chanve lai la awm chungin an paih daih mai, keiniho lahin ‘Chhura duh loh Naa’n nei nangeh’ kan tia, kan chu lui lui mai, barrack-ah kan la thla sauh sauh a, chaw ei dawn apiangin kan duhtawkin kan suak zel mai.

Hnam chhia an hmuh dan hi an pum mai hian chhiain an hmu ni berin a lang. Hnam chhiaa pianga an hriat kha chu an pum chhiatah an hmu a niang. Khi – tuna Gorkhali sikul thlanga in lianpui khi Khuptuaha (kan tih mai) in hmun a ni a, tum khat pawh an nupui neihnaah Domai hnam baja ham turin an sawm ve a, kawmchhak lei chhuatah an thuttir a, ei tur an pek pawhin kutin an hlan lo, leiah an dah phawt a, chu chu an lo la chhawng chauh zuk nia, inneihnaa sawm theuh theuh kar hla tak a ni.

He thu ka han sawi luam nachhan chu, kan indipenden tum, min man ta kha Silchar jail atangin Nowgong Special Jail lamah kawl bun chungin min hruai leh ta a. Kei chu, ka sawi ang khan sipai camp hospital-ah ka la awm a, ka thiante Mashimpur atanga Silchar jail-a an thawn vek takah chuan min rawn pawm nawk nawk a, motor-ah min load a, Silchar jail min panpui ve ngawt mai a – dam e, damlo e an sawi tawh lo, an truck atanga ka chhuk phei chu, ka la chak lo nasa sia, ka thu thla hnawk mai. Tichuan Silchar jail-ah chuan Jail Warder phakar tak tak karah kan han khawsa leh ta a ni. Ka thiante Mashimpur-a an awm lai khan dil (luang chhuak lo, pukri)-ah an lo inbual vek a ni awm a, kei chu sipai damdawi ina ka awm avangin March ni 31 atang khan ka la inbual ta lo – kha April thla tawp lam a ni tawh hial ang a. Tichuan inbual tur an rawn ti a, bucket tam ni khatah an phal lo mai ni loin bucket pakhatin mi 2 zel inbual tur an ni a, kan phun nasa mai, a tawpah bucket pakhat zel hman theih a ni ta. Tichuan, bal zual an thlang a, ngaihtuah ngai miah loin kei chu bal BER ka ni nghal mai, bucket khatin ka inbual ve ta a ni.

Vai hnam chhia leh hnam tha ka sawi lai a ni sia, ka thil tawh Nowgong jail a ni daih sia, kan indipenden lam kha ka kân vak ang a, a dawt leh lamah ka kir leh poh a niang chu. Kum 1967 a ni tawh hial ang, Nowgong Spl jail-ah pawh kan tlangnel hle tawh a, khawii emaw lai laiah tui pump chhuah chi hi 4/5 a awm a, chhunah chuan keini Security prisoner hi chu hnathawh an phal si lo a, a lum sia, kan inbual sek mai thin. Tlai khat chu tui luanchhuahna chu ka hnawh sauh sauh a, tui tlingah chuan taksa chanve pil hian ka lo inchiah dai e ka tih laiin, lung in tang ni lo, jail chhunga hnathawka an chhawr pa pakhat berh deuh mai hian insil a rawn tum a, kei chu ka tho lawk a, tui pump-na chu ka chelh lawk a, insil turin ka hrilh a, tui chu ka pump haw tur tur mai a. Ani chuan a lo duh ikhaw lo mai a, Ralleng (Naga) rama ka awm laia ka kutcha-assamese (Nagamese)-in ka thiam ang angin ka bia a, kei chu chhuak tur ka ni ve lo a, rei tak ka inchiah duh tih te ka hrilh pawhin, ‘Hmang zo zet rawh’ a ti mauh mai a. Ka tui tihtlinna puan hnawh chu ka phawrh a, ‘A nih ti khan insil tawh le, keiin ka’n pump ang e,’ ka’n ti leh a, a duh chuang ta reng reng lo mai a. ‘Ka pu, nang chu mihringa piang i ni a, eng emaw vangin i tang laklawh mai a ni. Kei chu hnam chhia, mihring hnuaia mi ka ni. I tui pump chhuaha insil phak ka ni lo,’ a ti ta bur mai a. Ka theihtawpa mihring ve ve kan nih thu ka’n hrilh ngial pawhin ka thu hrilhin eng kori mah a tu thei ta lo. Tih ngaihna dang awm ta hek lo, ka tlawm ta zawk a, ka hawnsan ta ngawt mai a ni.

Heti khawp hian hnam hniama piangte chu an hniam ngawih ngawih mai a lo ni. Keini hi chuan feeling-ah neihin kan nei pha lo reng reng let tawp mai a lo ni. Kei Security prisoner-in tui ka pump chhuah saa inbual phak lo khawpa inngai hniam tlatte zuk awm a maw le! Keini chu mi hausa leh nihna chelh sang kan zah ve deuh e tih mai bak chu kan nunah hleih neihna a awm ve lo, a hriat pawh kan hre thiam lo. PATHIAN VANGIN KAN NIHLAWH TAK MEUH A NI.

Facebooktwittergoogle_plusredditpinterestlinkedinmail

Login

Lost your password?