Monthly Archives: November 2015

Tinreng feature : Mami i hmel a tha, Bus ah i chuang dun ang…….

Mipui rawngbawltu pawimawh tak an ni tih pawh in hre lovin nitin Bus chhungah an chuang nileng thak thin a, thenkhatin mawl leh sual an ti a. Nilenga Bus chhunga an din avangin kawngna them thum chuan a zaidam tir thei lo a, pawisa nawi neih loh nen passenger te tawngkam mawi lo taka han vin mai chang pawh an nei fo thin. An pawimawhna leh an tih tur pawh an hriat chian loh rual hian an hotute lam chuan an pawimawhna hrilhin an zilh fo a, zilh loh fa an ni bik lo.
Aizawl khawpui chhungah hian Aizawl City Bus 261 a awm niin Aizawl City Bus Owner Association Office staff te chuan Zalen an hrilh a. Bus Driver leh Conductor pawh 261 bawr vel ve ve an awm thu an sawi.
Aizawl City bus Driver leh Conductor ni tur hian driving licence emaw Conductor licence neih ngawt a tawk lo a, Aizawl City Bus Owner Association office-ah in register phawt a ngai a, dan leh dun an neih angte zawm thei tura thu an tiam phawt a ngai a ni. Bus Driver leh Conductor te hi an service chhunga zu leh ruihtheih thil dang an ti emaw passenger laka mawi lo taka an awm a, comlpaint a awm chuan rang taka action la a, suspend thin an ni.
Bus conductor ni a rilru nei taka in khawl chho bek bek a tun hnua mi chhawr ni mai tawh lo a Bus neitu ni thei an awm rual hian City Bus Conductor emaw Driver an nih hma a tlangval fel tak te kha he huang chhunga an luh hnua zu ngawl vei a chhuak ta pawh an awm teuh thung a, mipui thuhmun miau hek lo le.
Aizawl City Bus Owner Association Office staff te chuan Bus Conductor passenger laka mawi lo taka khawsa thinte chu an hrem thin thu Zalen an hrilh a. Mipui lam atanga complaint awm chu a rang thei ang bera action an lak thin thu sawiin, pawl anga action la nasa leh la rang ber an nih hial an rin thu Zalen an hrilh.
City Bus-a chuang thinte chuan tawngkam kan hriat zin ber chu ‘Pawisa nawi a awm loh thu’ a ni a. Pawisa nawi avang hian Conductor te pawh an buai fo reng a, hemi sukiang tur hian ACBOA office staff te chuan Bank-ah pawisa nawi an thleng ve fo thin a ni. Conductor thenkhat chuan pawisa nawi nei reng chungin hlep an duh avangin an neih loh thu an sawi a, passenger te pawisa nawi an kir lo fo thin a ni. ACBOA office superintendent Vanlalruata chuan an naute zingah dawt sawi ching an awm leh zauh thin thu Zalen hrilh in,”Passenger te hian pawisa nawi hi dil let hram hram ang u, thenkhat chuan nei rengin kir tur nei lo angin an sawi thin a ni,” a ti.
City Bus chhungah bungraw theihnghilh a awm fo a, thenkhat in an hmuh let rual in hmu let ta lo a bo hlen a awm teuh thin a ni. City Bus Driver leh Conductor te chuan an bus chhunga passenger te bungraw theihnghilh an hmuh chuan ACBOA office ah an dah ngei tur a ni tiin dan duan a ni a, ACBOA office ah hian bungraw theihnghilh dah khawm a awm teuh reng a ni. ACBOA office staff te chuan Bus chhunga thil theihnghilh tam tak chu hmuh let a nih bakah office ah dahkhawm a nih thin thu an sawi a, an naute chuan an ruk ngam loh thu an sawi. Bus chhunga thil bo tam tak hi chu rukru thenkhat bus chhunga chuang ve tho te ruk a nih thin thu an sawi.
Kum upa leh pianphunga rualbanlo te chu Bus chuan man la lo thin turin Conductor te chu hrilh an ni fo thin a, thenkhatin an zawm viau rualin thenkhat hotute thusawi ngaipawimawh miah lo an awm thin bawk.
ACBOA Superintendent Vanlalruata chuan City Bus Driver leh conductor te chu mipui rawngbawltu pawimawh tak a nih avanga an nung chang uluk turin zirtirna an neih fo thin thu Zalen a hrilh a,’Conductor thenkhat hi chu aw nem taka zilh theih loh vin ngai an awm rualin, thenkhat erawh lehkhathiam mahni bus khalh leh enkawlte an nih angin an mize mila dawnsawn thiam ngai tak a ni’ a ti a. Tun hma lam ai chuan an changkang fe tawh thu a sawi bawk.

Facebooktwittergoogle_plusredditpinterestlinkedinmail

LADC-ah CONG; 25 SEATS – CONG 16, MNF 8, IND 1

Aizawl: MDC 25 awmna Lai Autonomous District Council ah chuan Congress party in sawrkar an siam leh dawn a, nimin a vote chhiar ah Congress in seat 16 an la a, MNF in seat 8 leh Independent in seat 1 an la bawk.

Congress MDC thlan tharte hi nimin tlai khan an thukhawm nghal a, an hruaitu (CEM) atan Lawngtlai Vengpui bialtu V.L Hmuaka an thlang a, Chairman atan V.Zirsanga (Paithar bialtu) an thlang bawk.

LADC huam chhunga bial 25 ah hian November 26,2015 khan vote thlak a ni a, voters 45,757 awm zingah 38,993 in vote an thlak a, a pumpuia Vote tla zat hi 85.22% a ni. Sakeilui bial chu chu vote tlak thatna ber niin, Vote awmzat 3067 atangin vote 2884 tla in 94.03% a tla a, Vote tlak tlemna ber chu Lawngtlai-III bial niin Vote awmzat 2042 ah 1527 tlain 74.78% a tla a ni.

Facebooktwittergoogle_plusredditpinterestlinkedinmail

Hawla’n Kohhran hmun 1-a awm a duh thu sawichhuak

Aizawl: Chief Minister Lal Thanhawla chuan Kohhran hote hmun khata luanza ho theih a duh thu leh chumi hawi zawnga ke pen tul a tih thu a sawi.

Nimin Tanhrila Academy of Integrated Christian Studies (AICS) hmuna Shekina Hall-a ‘A History of Ecumenical Movement in North East India : With Special Reference to the North East India Christian Council’ tih lehkhabu Rev. Dr.M.Thangkhosei Haokip, Associate Professor, AICS ziah a tlangzarhna ah he thu hi sawiin Chief Minster chuan sawrkar leh koh hran te chu inpawh taka thawkho tur an ni, a ti.

Chief Minister chuan, “Zofate hi Pathian lakah vohbik kan ni a, hmun hrang hrangah khawsa mahila, A thu kan zawm phawt chuan kan ding chhuak thei a ni,” a ti a. “Sum leh pai leh ei leh barah intodelh a, hnam zahawmah min siam a duh a, chumi dinhmuna ding turin sawrkar chuan hma ala chho mek reng a ni,” a ti bawk.

Lehkhabu tlangzarh tak ina a tum ber chu hmarchhak a kohhran hrang hrangte inpumkhatna kawnga hmalaknate leh a than chhoh dan, leh kohhran hrang tam lutukin khawtlang nuna nghawng a neih dan te a ni.

Facebooktwittergoogle_plusredditpinterestlinkedinmail

Ruihhlo-ah Heroin hluar ber

Aizawl: Central YMA hnuaia ruihhlo do pawl Supply Reduction Service (SRS) hruaitute chuan Aizawl chhehvela ruihhlo ti thin te zingah heroin a hluar ber nia an hriat thu an sawi.

SRS Secretary Zomawia chuan heroin chu Zokhawthar kaltlangin a lo lut tam ber nia an hriat thu leh Sumo driver te chu a phurtu ber nia an hriat thu Zalen a hrilh a. Heroin chu November thla tir atangin a pung lehzual nia an hriat thu a sawi bawk. SRS Secretary chuan tun hmaa Proxyvon leh Parvon ti thin te chu heroin ah an inlet deuh vek niin a sawi a. Tleirawl zingah ti thar an tam nia sawiin bial zaipawl leh sande sikul zirtirtu zingah pawh heroin ti thin an awm niin a sawi bawk. Heroin hi a ti thin ten zawrh pahin an ti a, hetih lai hian Meth erawh Mizo thalai ten an ti vaklo nia an hriat thu SRS hruaitute chuan an sawi bawk.

SRS hian nimin thleng khan heroin hawng 119 an man tawh a, can leh chhinsen engemaw zat an man tawh bawk. No.4 hawng khat hi Aizawl ah Rs. 55,000 vel a ni a, ruihhlo tawlhtute hian Zokhawthar atanga Aizawl thleng hawng 1 ken manah hian Rs.3000 atanga Rs. 5000 te a kengtute hnenah an pe thin a ni. SRS te hian ruihhlo kaihnawih ah mi 1035 man tawhin 39 chu home ah an dah a, Excise ah 58 leh Police ah mi 24 an pe tawh bawk.

Facebooktwittergoogle_plusredditpinterestlinkedinmail

Ministerin AMC Sawrkar thar thawh puiah sawm

Aizawl: UD&PA Minister Zodintluanga chuan Aizawl Municipal Corporation (AMC) -a sawrkar thar chu duhsakna a hlan thu sawiin state sawrkar tha taka thawhpui turin a sawm nghal.

Nimin khan Lawngtlai ah chanchinbu mite kawmin Minister chuan, “UD&PA department changtu ka nihna angin AMC hi kan chan a ni a, kan awm loh hlanin Aizawlah sawrkar thar a lo piang a. Sawrkar tha tak dina state sawrkar tha taka thawhpui turin ka sawm a, Aizawl hmasawn nana tha taka thawk turin duhsakna ka hla nghal bawk a ni. Councillor tling thar zawng zawngte duhsakna ka hlanin ka lawmpui a ni,” a ti.

Minister Zodintluanga chuan Lai Autonomous District Council (LADC) inthlana Congress in sawrkarna a chang leh chu a lawm thu sawiin mipuiin Congress party a rinna an la nghat tih a hriat thu leh duhsakna a hlan thu a sawi chhuak bawk a ni.

Facebooktwittergoogle_plusredditpinterestlinkedinmail

MSU in Person with Disabilities Commissioner-ah Sairengi duh lo

Aizawl: Mizo Sudents’ Union chuan Mizoram sawrkarin Commissioner, Persons with Disabilites(PWD) atan B.Sairengpuii chu kum 3 a rawihnawn hnuah kum hnih dang (October 2017) thleng atan a ruainawn leh chu an hrethiam lo tih an sawi a. Rawih nawn lehna tura notification chhuah tawh chu sut leh tura sawrkarah thlen an tum thu sawiin a tul ang zela bawhzui an tum. MSU chuan sawrkar hnathawk pension tawh pawhsei leh rawihnawn awm thin avang hian an hnuaia hnathawk te leh Mizo thalai sawrkar hna a luh tum tam tak ten harsatna an tawk thin niin an sawi bawk.

Facebooktwittergoogle_plusredditpinterestlinkedinmail

CMOnline hmangtu an tlem

Aizawl: Website leh SMS hmanga Chief Minister zawhna zawttu leh CMOnline hmang tangkai an la tlem hle a, a hawn tirh atangin mi 30 vel chauhin zawhna an la zawt.

Press Secretary to Chief Minister LR Sailo chuan zawhna lo lut te chu endik anih hnuah a changtu department lamah thawn thin a ni tih Zalen a hrilh a. Department thenkhat email nei mumal lo leh hmang tangkai tawklo te an awm avangin duh angin chhanna an dawng tha tawklo niin a sawi a. Department hotute tan IT lam inhrilhhriatna workshop neih tum mek anih thu a sawi bawk.

ICT Secretary C.Lalhmachhuana chuan mipui ten CMOnline an hmang tangkai tawklo chu pawi a tih thu Zalen a hrilh a. “Mahni vei zawng leh sawrkar kalphunga thil diklo awm nia kan hriat te hi a thlenna tur dik tak ah hian thlen thin ila, hmalak nghal zel anih vangin Tv leh chanchinbu a kan veizawng te tarlan thin aiin a sawt zawk a ni,” a ti bawk.
CMOnline ah hian phone number 9248006202 ah sms thawn tur a ni a, sms thu tirah ‘CM’ tih tarlan zel tur a ni.
Zawhna lut hi CMOnline software hian a lo dawng ngei a ni tih finfiah nan sms reply a rawn thawn a,reference number pawh rawn thawn tel nghalin hei hi chhuizui zel nan a tangkai dawn a ni.

Hei bakah hian comonline.mizoram.gov.in ah zawhna hi thawn theih a ni.

Facebooktwittergoogle_plusredditpinterestlinkedinmail

HLAWH Central in sum a la pe lo !

Aizawl; November ni 6,2015 a School Education Minister in Hindi zirtirtu mi 1305 te hlawh tur Rs. 37,75,37,191 a nawrchhuak chu sawrkar laipuiin sum a la pekchhuah loh vangin Hindi zirtirtute hian an la dawng thei hrih lo. School Education department chuan sum pekchhuah thuai anih theihnan hian hma an la reng niin Zalen palai an hrilh.
Education Minister hmalakna avang hian Ministry of Human Resource Development chuan Hindi zirtirtute thla 10 hlawh tur a pe chhuak phawt a, thla hnih dang hlawh chu RE atanga pek leh a ni dawn a ni. Hindi Teacher te hlawh hi Mizoram sawrkar dil angin tihpun a ni dawn a, tun dinhmunah hian thla khatah M/S Teacher ten Rs. 15,000 leh H/S Teacher ten 19,000 an hlawh a, hei hi tipungin Rs. 29,000 an hlawh tawh dawn a ni.

Facebooktwittergoogle_plusredditpinterestlinkedinmail

AIDS day

Naktip December ni 1,2015 hi International AIDS day a ni a, Health Department huaihawtin Lal Thanhawla Auditorium ah hman a ni dawn a. Chief Minister Lal Thanhawla khuallian a ni ang a, Finance Minister Lalsawta khual zahawm a ni ang.

Facebooktwittergoogle_plusredditpinterestlinkedinmail

RD Fair

Rural Development department huaihawtin December ni 1-11,2015 inkar hian Assembly building ah Regional SARAS Fair neih a ni dawn a, he fair hi naktip Thawhlehni chawhma dar 10 hian R.Lalzirliana, Rural Development Minister in a hawng ang. Fair neih chhung hian Self Help Group hrang hrang ten an thil siamchhuahte an pho dawn a ni.

Facebooktwittergoogle_plusredditpinterestlinkedinmail

Login

Lost your password?