Monthly Archives: November 2015

Thuthar awmlo

Election Commission of India chuan Bru te tan special revision neih leh chungchangah thuthar engmah a la nei lo. Bru te tana special revision neih hi Political party leh NGO te chuan dodalin official kal turte pawh kal theilo turin dan an ni.

Facebooktwittergoogle_plusredditpinterestlinkedinmail

Thisen pe

Nimin khan Zonuam Pastor Bial KTP te chuan a mamawh apiangte hman turin Civil Hospital tan thisen unit 32 an pe a, thisen petute hi mipa 29 leh hmeichhia 3 an ni.

Facebooktwittergoogle_plusredditpinterestlinkedinmail

MLA in hawng

Zirtawpni khan Dampa bialtu MLA, ZIDCO Chairman ni bawk Lalrobiaka chuan W.Phailengah BADP sum hmanga sak Community Hall leh YMA Run a hawng. Community Hall hi nuai 30 senga sak a ni a, YMA Run hi Rs nuai 6 senga sak a ni.

Facebooktwittergoogle_plusredditpinterestlinkedinmail

Dec.10 ah

Tunhnaia AMC Councillor thlan tharte chu December ni 10,2015 (Ningani) khian Aizawl DC in rinawmna thu tiam tirin a lalut dawn. MNF Party chuan nimin khan an party Councillor te hi meeting an neihpui a, Mayor leh Deputy Mayor chungchang an sawipui nia thudawn a ni.

Facebooktwittergoogle_plusredditpinterestlinkedinmail

BRU ISSUE- HUN THA ANGA NGAIH A THA

Mizoram a tlawmngai pawl inzawmkhawm chuan Bru electoral roll a thun an nih loh nan Central Sawrkar-a Home Minister of State Kiren Rijiju chu hmuin hmalak a lo tiam a. Thla khat awrh liamtaah khan Home Minister, Lalzirliana chuan Delhi-a meeting an neihah Tripura chhunga refugee camp 6 a awm Bru te chu electotal roll atanga paih an nih tur thu a lo sawi tawh a. Home Minister, GoI Rijiju pawh hian Mizoram a rawn tlawh hnuhnun ber tum khan Bru laklet thua media zawhna chhangin lo kir duh loh chuan tih luih a tul lo nia a hriat thu a sawi tawh a ni. Hmarchhak atangin Central Sawrkar-ah Minister an awm nuala, Hmarchhak rilru nei thiau nia ngaih an ni a, intel khawmin NE tan tan an la thin tih a hriat theih mai awm e. Mipui tan chuan a thlamuan thlak ang reng khawp mai.

Bru raltlan buaina hi a rei tawh hle a, Mizo te finkhalha Central-a insawi thiamah kan tluk lo nia sawi a lar thin a, mahse an hmalakna ang chu tih theih reng nimahse kan tum lo em ni? tih rum rum a awl thin. Hun a kal zela, tunah chuan Mizo te pawhin tharum nilovin hmunpui pana hmachhana indawr nachang kan hre tan a, hmalakna kal zelah hei hi vawn nun zel tlak a ni. Thiamna sang zawkin Information Technology huang a hauh zela, ngaihdan changkang tha zawk a piang zel bawk a; kan hman thiam bakah dawn sawn dan pawh thiam a tul ta hle mai. IT hre lo chu tunlai khawvewklah chuan an thleng thui tawh lo a tih ngam mai awm e.

Bru buaina hi thangkhat lian zet zawt a liam tawh a, hmawrbawk hleih theih ni lova a lan chang a awm tawh a, thenkhat chu an beidawng niin a lang. Camp-a awm tlemte chu an awmna ngaiah an let leh tawh a. A tam zawk chu vawi engnge maw zah lak let tum an ni tawh a, a hun leh hmun siam thin ni mahse pakhat mah kir tumin an inlan duh lo. Lak let an nih theih nana Central ruahmanna pawh a tlawlh fo tawh a ni. Election Commission chuan Tripura Bru awmte chu roll a ziak lut turin thu a pe a, tunhnai mai khan EC palai te chu lo kalin khawthlang lamah NGO te’n an dang a, duh angin an che hlei thei lo a ni. Bru te hian sum, ei leh bar, adt phutin tiam an nih hnuah pawh a dang an phut belh zela, Central sawrkar pawhin chhawmdawlna tihbelh/ tihsan a ngiat chu a pawmsak tawh lo a nih kha.
A nihna takah chuan Bru ho zingah politic a awm avangin tam tak let duh mahse an let thei mai bik loa, invauna leh a inkhapna a tam hle a, pawi sawilo nu naute’n an tuar a, mi tlemte in hamthatna an um luatah hetiang dinhmun ah hian an la awm phah a ni. Chutih rualin Mizoram chhunga awm ngai lo Bru tam tak electoral roll ah ziah luh an nih chuan ramin kawng hrang hrangin a tuar dawn a, intelkhawm hruaitute’n inthlan dawna politic hamthatna kar nan leh thil tha lo dang atan hmanrua a nih thei a ni.

Eng pawh nise Bru lak kir hi Central lam chuan ngaihtuahna sen that a tumin a lang a, NGO te pawh in an seh ta rau raua a tawp rat thleng sela a tha ber ang. Mipui hian kan tlawmngai pawlte hi ‘issue’ a lo awmin an sel uchuak em ni? tiin ngaihdan a awm thei a; an hnual rawih theihna turin mipuiin an nawr nasa mah mah nia a lan chang a awm hial ang. NGO te kal dik lohna lai a awm chuan mipuiin an sel hi a awm a; chutih rualin inhrikthlakna leh induhsak insel erawh dawnsawn dan a hrang hlak thung. Tlawmngai pawl te’n hma an lakna zing ah Hnam leh Ram khawih chi phei chu an hruaitute beng thleng tura fuih an ngai tih mipuiin hriatpui se, fuihna thu fah mawlh mawlh a pawi mawh a, mipui mawh tih hriat a tha bawk e.

Tunhmain Delhi ah Zoram in ‘aw’ a nei lian thei lo nia ngaih a ni fo thin a; tunah hian a danglam chak hle a, Central Sawrkar-ah Hmarchhak MP leh Minister an awm nual a, party indaidan tir lovin thawhhonaah Hmarchhak an dah lian thin a. Heng mite hi kan neih chhun an ni a, NE state anga tanrual thiam a ngai dawna, state dangte nen inlaichinna tha leh nghet zawk Sawrkar leh khawtlang hruaitute ang pawhin a awm a tul hle mai. Sawrkar & NGO hian state dang Sawrkar leh khawtlang hruaitu NGO te kawm ngeih tum sela; sawrkar pawhin chutiang hawi zawng chuan hma la se. A tul chuan Mizoram hi hmalatua tan hreh lo sela a tha hlei hlei a, Hmarchhak in hma a sawn a rinawm a, kan ram chu a rah teltu zingah a awm thei mai ang. Hun tha (opportunity) hi awm zen zen a ni loa, chal dawmin kan thlir liam palh thei tih hriat nawn a tha a; kutthlak zui nghal a fuh a rinawm.

Facebooktwittergoogle_plusredditpinterestlinkedinmail

AMC Inthlan result leh a behbawm

Aizawla chengten a vawi hnihna atan khawpui enkawltu turte kan lo thlang zo leh ta a. Inthlan hi mipui kutthlakna a nih avangin a hlu a, a bikin political party tan phei chuan inthlan aia pawimawh zawk a awm lo. Tunkar kalta khan khan Aizawl North-3 MLA bye-election vote chhiar a ni a, hneh takin INC candidate Pu Lalthanzara thlan tlin a ni a, vote tla zawng zawng zatve aia tam (56.57%) a hmu a. Bye-election hun tur leh vote chhiar hun tur election commission-in a puan hnuah Mizoram state election commission-in municipal corporation inthlan hun tur hi an puang ve leh a nih kha. Chuvangin, hetia inthlan hun inhnaih chilh taka an ruahman leh bye-election result puan sarhu municipal corporation inthlan a awm leh nghal mai te hi sorkar lai party duhsakna ang hiala ngaih theih pawh a ni.

Engpawh nise, AMC inthlan tluang taka zawh fel a ni a. Sawi leh sel theih eng eng emaw neuh neuh chu a awm ang a, sorkarin sum harsatna a tawh mek avangin duh anga felfai tawk lo sawi tur pawh a awm nual awm e. Inthlan buatsaihtute sawi dan chuan he inthlanna atan hian sorkarin Cheng nuai 60 chiah a pe thei a, a buaipuitute tan chuan a beitham mah mahin a rinawm. Inthlang ram kan nih avang mipui aiawh hruaitu tur inthlan hrim hrim hi a pawimawh vek a, political party tan phei chuan a pawimawh leh zual a ni. A bik takin Aizawl mipuite tan AMC inthlan hi a pawimawh hle a, thlan tharte hi kum nga chhunga khawpui inawpna leh hmasawnna tura thuneitute an ni dawn a. A hmaa mi anga political party kaihbu mai mai an ni tawh lo turah ngai ila, thlan tharte hian nihna leh therhlo vanga party uire san chingte hi mipuiin an ngainep tih te hre tlang ta se.

Inthlan result kha ngun taka chhut chuan Aizawl mipui suk thlek leh rilru put hmang thui tak a hmuh theih awm e. Politics-ah neutral a awm theih tak tak loh, party tan zawng bik kan nei ru vek, tiin an sawi thin. Mahse, tun hnai chho a MLA, MP, LC leh AMC inthlanah hi chuan Aizawl mipui tam ber hian party rilru pu loin vote an thlak thin tih a chiang a, a bikin local council leh municipal corporation inthlanah hi chuan bial chhung a zim deuh bawk a mimal (candidate) an pawimawh hle a, party tinte pawhin hei hi an hria a, mi hmingtha deuh, chhungkaw hung deuh, khawtlanga mi langsar deuh an sawm lut fo reng a ni. Chutiang chu tun AMC candidate zingah pawh khan an awm nual a, a then chu an tling nghe nghe a nih kha.

Aizawl North-3 MLA inthlanah khan candidate pakhat khan ‘mipui court’ tih kha a sawi fo a, khata a sawi tum ni a lang chu inthlanna hi mipuiin mi dik leh dik lo, mi tha leh tha lo an thlanna a ni a, mipuiin an thlan tlin hi chu dan bawhchhiaa puhna lakah a fihlim, a tihna a nih hmel. Mahse, chutiang chu a ni thei ngawt lo ang. Mizoram inthlan awm tawhah rorel lai party candidate an la chak zel a, chuvangin, rorel lai party mi, minister ni leh nghal mai tur chiang sa thlan tlin a nih khan an puhna zawng zawngah mipuiin an thiam vek tihna a ni hauh lo ang.

Engpawh nise, MLA bye-election result puan hnu lawk a Aizawl khaw mipuiin tanrual pui nei lo ber, eptu party MNF AMC a rorel tura an thlang tling daih hi politics inlumlet thlirtu leh inthlan boruak tuipuitu tan chuan a tuiawm viauin ang. Inthlan hi kil thum atanga inbeihna angin a sawi theih a, MNF party an mal din a, MPC leh congress party an tangdun a, NDA hmingpuin ZNP leh BJP an tangdun bawk. Tangrual pakhat zawk NDA atang hian inhnukdawk pathum an awm a, titi lengah leh social media lama an sawi dan chuan inhnukdawkte hian tangrual pakhat zawk hi an pui a ni awm e. Mahse, heng party dang zawng zawng tanrualna ni a sawi ward pathumah hian MNF candidate an tling vek a, ruling party a inhmang ve pakhat sawi ang deuhin inthlanah chuan ‘Tanrual hi chak lohna a ni’ e.

Aizawl a inthlanah hian tling tur sawi lawk a har tial tialin a lang. Tunhma angin inthlan campaign thawm ri luih luih leh flag tar tih vel a awm tawh ngai lo a. MPF din tak hnu atang phei chuan boruak dai duk hnuaiah vote thlak a ni thin tawh a, thawm nei miah lo a inthlang na na na chu a tling zawk tura rin an tla leh nawlh a, rin loh lamin seat an hmu leh teuh thin a nih hi. Tun tumah pawh hian MNF party hian ward 11 an la a, congress leh MPC tang dunin ward 8 an la bawk a, ZNP leh BJP tangdun erawh an tla vek thung, hetianga lo ring lawk dik chat hi an vang viau maithei a ni. Congress party atang hian hmeichhia 5 leh mipa 2 an tling a, MPC atangin mipa pakhat a tling. MNF party atanga tling zingah hian hmeichhia pakhat a tel a, a bak zawng chu mipa an ni hlawm.

November 2010-a AMC hmasa ber inthlanah khan ZNP leh congress party an tangdun a, MNF leh MPC an tangdun thung a, independent-a ding leh BJP leh NCP atanga ding tlema zawng an awm bawk a nih kha. Kumin AMC inthlanah hian MNF hian an bial hlui hum zawh tak loh pahnih (Ward I & VIII) an nei a, congress party-in an chang ve ve a. Congress party thung chuan MNF lakah an chakna sa bial thum an chan thung (Ward X, XII & XIX). 2010 khan MPC in ward 4 an la a, ZNP pawhin ward 5 an la bawk. Mahse, politics thli chhia a tleh chhen a, sorkar an inthlak zak zak a, a tawp lamah phei chuan party te zawk ZNP leh MPC phei chuan an councillor-te hi chan a lawi an nei tawh lo hial a nih kha.

Tun inthlanah hian political party-te chhe pui puia an inbeih a, an inchirhtheh luai luai lai hian Aizawl mipuite vote thlak danah kawngro a su vak lo tih a lang awm e. MLA bye-election neih zawh hlim hlawlna Aizawl North-3 bial mipuite pawhin AMC ah chuan an vote thlak dan a dang leh daih a, ward pahnih a awm a, MNF pakhat leh congress pakhat an tling. A pumpuiah mi tam tak rin aia MNF an chet that chhan hi eng ber nge niang? Thawhpui nei lo awm chhun an nihna hi an hlawkpui a ni thei a, tanrualna leh thawhhona a that tak tak loh phei chuan party tandun hi chhiatpui theih tak a ni.

Kan hriat angin kum 2013 kum tawpah MLA inthlanah Aizawlah congress an che tha hle a, a kum leh 2014 kum tir maiah MP (LS) inthlan a awm leh a, mipui hawi lam a inthlak leh daih a, bial tinah congress party candidate an chak lo vek a. Kumin kum tirah local council inthlan a awm leh a, congress party leh MNF an inbei tawk hle a nih kha. Kum tawp lamah inthlan hautak zet mai AMC inthlan a awm leh ta a, Aizawl mipuiin MNF sorkar turin an thlang tling leh ta a ni. Heng zawng zawng han chhut hian, sorkarna chang mekte aia eptu lam mipuiin an thlan zawk chhan lian tak pakhat chu sorkar lai ninna (anti-incumbency factor) vang a tih theih ang. Aizawl veng tinah hian party ruhkawl hi za zela 5 pawh an awm tling kher lo anga, mi tam ber hi chuan tha ni a an hriat an vote mai mai thin niin a lang a. Chuvangin, Aizawl voter-te hi neutral rilru pu tak tak an ni hlawm ti pawhin a sawi theih ang. Heng zawng zawng ngaihtuah hian AMC inthlan result hi a mak vak lo e.

Facebooktwittergoogle_plusredditpinterestlinkedinmail

Ka Huang (Nov. 29, 2015)

Chawlhni hmasaa ka sawi lan, U Satthuama kha inbuan chak vanga Bawrhsapin police-a a hnim luh a ni. A inbuan chakzia kha chu a buanpuite’n an hre chek ang. Thil dangah pawh chak tak, chak tak a ni ringawt mai. Kum 1951/52/53, eng kum ber emaw, Republic Day chawlh denchhenin Tuirialah sangha bomb turin U Haudalla (Dawrpui) jeep-in kan kal a, mi 7 aia tlem lo kan ni. Ka farnu Chawnglianchhungi (L) leh Pastor Chhuahkhama fanu Ramthangi, nula tirte pahnih kan hruai bawk a. Tuirial (Champhai lam kai) chhakah khuan riahbuk kan sual a, hna reng reng kha U Satthuama kut a ni vek mai. K’u Zuala a kal ve a, ‘El phak miah lo mah la, a hnung hi zui zel ang che, mi dang chu engmah kan nih loh lehzual hi,’ min ti a. A tlangval awm chhun chu jeep driver nen chuan kan ni mai a, ani lah tlangval chaw chaw, lian lo tak a ni ve mai a, hna hram thawk chi ni pawhin a lang bik lo. Thing, rawngbawlna tur leh ai lum tur fawm a tul ta a, U Satthuama chuan, ‘Kal rawh Chhuana, lei hnuaiah khan thing ro ka hmuh kha,’ a ti a, chem pawh keng lovin kan chhuak dun ta a. Lei hnuaiah chuan Belphuar tuai tlukar tui lian rawn len, vaukama tang hi a lo hmu niin, a zar chu chawn tiat dawn dawn a ni a, a kung tlawh chung chuan a kuai bal hmawk hmawk mai a, keiin a tangte ka lo bal zel a, a bal zawh chuan a zung ther fer fur nen chuan a pu tawrh mai a, a chho vang vang mai, kei chuan a zar pathum vel emaw chu ka pu ve vau vau thei chauh a ni.

Tichuan, a tlai a tlaiin bomb kan tum a, puum hlui deuh hi a awm a, ‘Kha, tlangval nen khan lo thawm rawh u, a hnarah ka han kal ang a, puum thar ka han tuk ang e,’ a ti a. Tlangval pakhat nen chuan kan lo thawm a, mau thar 4/5 emaw kan sat a, kan tawn tha a, lipuia ka kar phei chuan U Satthuama pawh chuan 30 puum emaw hi a rawn kar thla ve ti tih mai nia, a thar hlak. Ngharilah leh luite kawnghram nguntang emaw lek lek 10 emaw chauh kan vawm hlum avangin kan tum hnih chawhmeh emaw lek a ni. A tukah ziingah Tuirini lam kam pana Sesawng pa kan han rawn a, a tel ve ta nghe nghe a. Bomb kan tum chu li dung sei eet puk pawh awm lo a ni. Nghahrah puitling hian ho hrang hrangin nguntang, kutphah, kakchhun te te leh nghate dang lengphar, tih ang tete hi a hrang hrangin an ho a, an tleh dal dal mai a, chu li kamah chuan awmhmun kan khuar nghal a, bomb pathum indawta vawm tur a ni. A mawng berah U Satthuaman a vawm ang a, a puaka thi phak lo, lo tlanchhia nang turin keiin a laiah ka vawm ang, ka bomb a puah hnu deuhah K’u Zualan a hnarah a tawp a khar ang tih a ni. U Satthuama bomb a tlawlh ta hlauh mai a, rawn um chhoh nan lungin a deng vak vak a, chutah keiin ka han vawm ve a puak dawp a, a lo lang chiai mai a, rei rial loin K’u Zuala chuan a han paih ve a, a mawng lama tlanchheho kha a nangching a ni chek ang, a puak dawp a, a lo lang chuai mai thung. U Satthuama bawk khan puum a tuk leh a, ka pui ve niap niap a. Sangha lang zawng zawng chu puum atangin U Haudalla leh K’u Zuala ten (Coastal Command) an chhar vek a, keini pahnih chu liluh tur kan nih avangin tel min lo chulh nasa mai a, meipui kan ai bawk a, January thla luite dunga huihchhuk thli vawh dan chu sawi thiam a harsa. Tichuan, coastal command-in a lang an chhar zawh chuan kan hun a thleng ve ta a. U Satthuama khan kawibawm ang lian deuh, tung deuhin a tan a, lung lian deuh deuh thun sa.?Chu chu hruiin puum nen kan thlun zawm tlat a, pum atangin kan khai sawn mai thin. U Satthuama a lut hmasa a, keiin puum (chaw ka chhum thluk a nih avangin u ka dah dawbawl) ka lo veng a, a nghate man chu bawmah a khung zel a, a thawchham tawpah a lo chhuak a, thaw a la leh vak a, a lut leh a, chuti ang chuan tum 4/5 a ti zawn a, chutah kei ka lut veleh a, chuti angchuan kan inchhawk a ni. U Satthuama tum khat luhah nghate 12/15 te a thun hman thin. KEI VE chu 9/10 te thithunama ka tanin ka thun ve hram thin.A?vawt em em tih piah lam a ni, kan hnap dawk pawh kan inhre miah lo. ‘Kha i hnap a dawk’ kan inti tawp zel mai. Chuti ang chuan kan theihtawp kan lut a, kan khawng luat hmain vaukamah min pawt chhuak a, mei lum em em, Sesawng pa lo buaipui kha kan va kap dawrh a, kan hmeichhiate khan an shawl-in min khuh a, thingpuisen min pe nghal a, mak deuh mai chu vawt kan tih tak tak hian kan khur tawh lo zawk a lo ni. Thingpui lum kan han lem a, meiin min han tilum deuh tihah le – kan han khur ta tak tak mai thin a, min dawm bet lai lai zel! Kan khurh a reh a, tel kan inchulh leh vek zawhah kan va bei leh thin. Chuti anga kan theihtawpa kan tih hnuah pawh – a mawngah chuan a te zual chu a la de iar uar mai. Mahse, khua a tlai tawh avangin kan hawnsan ta a, Sesawng pa inah kan insem a, kg 10 emaw theuhin kan insem.

U Satthuama ka ter lohzia kha, pachang leh naupang kum10 velin hna thawk dun ta se – chu ang vel chu kan niin ka hria. Thing a thiamzia te kha – “A bul leh lei a inzawm te chuan,” a ti mai. Kelsih House, Republic Vengchung biak in ni ta thlanga Khawipui thang chhuah pawh kha a lawn thlak ni tain ka hria. Khati ang pa tlawmngai, chak kha dam hlenah a awhawm takmeuh mai. Amah kha chuan Bawrhsap MacDonald-a a hneh lohzia kha min hrilh thin. Ka ziak seng lo.

Facebooktwittergoogle_plusredditpinterestlinkedinmail

Dr. Hrekima Titi (Nov. 29, 2015)

Tleirawlte harsatna tam zawk hi inngaihzawnna leh sex chungchang a ni tih hi kan puang dum teh ang! Pastor-te kamkhat tawk lo tur tawk vela fimkhurin aw…! Kan dai baw em lo’ng chu maw!
&&&&&&

TLEIRAWL SEXY
“Kum 15 ka ni a, bialpa nghet deuh ka nei a, vawi tam tak sex hmanpuiah min sawm a, ka duh lo tang tang a, mahse a tawpah chuan kan hmang ta a, a hnu lawkah ngaihzawng dang min neihsan leh si a..thih daih ka duh..amah kha ka dam chhan ve ber a nia..” tih thu chu ka chhiar a.

A dinhmun ka ngaihtuah hian ka lainat a, a mawl reuh em avang hian ka khawngaih a. Thil dik lo a duh lo ve tang tang thin kha ka ngaisang zet a, mahse a duh leh tak avang khan ka haw leh a. A at em avang leh tleirawl kum 15 lek a lo sexy ve viau avang khan ka dem a. Hetiang dinhmun hrehawm zeta bum luttu a bialpa chu ka hua a, ban phakah awm se a chala chil hnawm ania ka duh ni!

Nun hlimna atana hman tur inngaihzawnna leh sex hi kan tahpui tam khawp mai! He tleirawl sexy nen hian kan titi dun tawh a, ani chu a ngaihtuahawm tawh loh. Mahse hetianga bum ve theih tleirawl sexy ve chak an lo awm palh ang tih ka hlau a ni. Inven nan, thu kan chah hlawm ve ngial ang e:

Tleirawl duhawm tak takte u,
Ngaihzawng nei thei tura duan leh din kan ni tehmeuh mai. Mahse ngaihzawng neih leh hmangaihna thu buaipui vel hi hmanhmawh lul lo teh u. Hmangaihna lipui hi a thuk em a, hleuhna tur li tha hmu nia in inhria a nih pawhin ‘dive’ ngawt suh u. Ngaihzawng leh hmangaihna lipui nawm hmel tak chhungah hian hmuh phak loh thil inphum ru a tam em em a, kum a tam deuh huna luhchilh a finthlak fo tih hi hria ang che u. Naupang tha chak lo tan chuan tlak hlum a awl lutuk a nia aw! In ngaihven ve tan duh a nih pawhin tleirawl lai hi chuan ‘star’ leh ‘tha tih satliah’ neih a tawk hrih! Tleirawl chhuah tirha bialpa nghet deuh neih tawhte hi a changkang ber lem lo.

In ngaihzawng hmasa apiang, ‘Ka dam chhan,’ in ti a, in inthen leh a, ‘A tel lo chuan khawvela awm zui zel ka peih lo,’ te hi in ti mai mai zel a. In va la hre tlem em! Tun ang rualah in dam chhan in la tawng teuh lo! I ngaihzawng hmasa ber a ni satliah ringawt tih hi pawm la. Tam tak i la nei zui dawn tih ngaihtuah nachang hria ang che. Ngaihzawngte hi kan dam chhan ber tur pawh an ni hek lo. Mai mai!

Ngaihzawng i nei ve duh tawh maw? I nu leh pa dil rawh. “Ngaihzawng neih hi sual a ni em?” tih min zawt fo. Ngaihzawng neih hi sual a ni hauh lo, mahse nu leh pa thuawih loh hi sual a ni thung! Ngaihzawng neihte hian nun a tihlim ve thei. Mahse hna bera neih chi a ni lo.

Ngaihzawng in nei a nih pawhin in khawih in khawih kher suh u. Inkhawih dan hrisel hi a awm ngei e. Inchibai te, daktawrin damlo mar a dek te, hmangaihtuin hmangaihte damsam lo pang a dap leh an luak tur chal a dawmsak angte hi! Non-sexual touch hi dam sawng sawngna a ni ve asin! Mahse, chi leh kuang inhnaihna nei reng reng lo, mipa leh hmeichhia, chin lem nei loa indap vak vak mai erawh hi chu a hrisel chiam lo tlat! Mipa leh hmeichhe taksa innawk vel hi a thawk na thei teh a nia! Thianghlimna ramri a kang ral duai duai thei a, insumtheihna a tituiral thuai thei thin. Ngai awh leh tawh ngai loh turin tihchhiat a nei zui thin asin!

“In-kiss chu a pawi hlei nem,” in ti a. “Kawng chung lam chu a him tho,” in ti zel a. Mipa kut tuihal hian tawp chin a nei thiam tawh thin lo a. Hmeichhe hmangaihna thlahlel hian hreh a nei lo fo thin si a. Hmangaihna chhuanlamin in indap kim a, ‘engkim kan inhlan e’ in ti a, in hlim har har nen khan maw! Thla khat hnu lawkah in hlim zan avang khan in tap leh si a, “Beidawngte puitu kha tute nge kha?” tiin Inrinni chhuak Vanglaini phek hma in bih leh duk duk si ang maw le! Pui duhtu che pawh chu tawng ta la, siam that theih loha chhia a lo tam hman viau tawh si ang em?
Ngaihzawng in neih pawhin chil puah bomb kamna phaizawl kal anga inngaiin pen fimkhur ang che u. Puithiam hmaah rangkachak zungbun thawlh luh zan paha ‘dam dun chhung atan’ tia thu in tiam hma chuan puak dura inthen thei reng in ni tih hre ranin inngaizawng rawh u. Pumhlan hmangaihna tih velte hi chu inneih hnua inthawina tur a ni ngai e. Inpumpek nan khua a tlai dawn lo. Kar leh lawka ‘saw saw ka ex’ tih theih reng in ni tih inhria ula. In inthen leh palh hlauh pawha mi dang ngaihzawn leh tlakin fimkhur ang che u. Chuti lo zawng, “Ka thianghlim tawh si lo, tuman min duh tawh chuang lo ang, Pathian pawhin min ngaidam thei lo ang,” tiin masacara luang dum nguaiin in tap leh palh si ang e!

“Dam ka peih tawh lo,” tiin kum 15 lekah hruihrual fei chi in melh in melh loh nan hei hi chhinchhiah teh u. Nunna hi a hlu a, dam hi a nuam asin! Ngaihzawng leh hmangaihna tih vel hi dam reng chunga hlimpui tur thil a ni asin. I lo chesual tawh a nih pawhin thih tum kher suh. Misual thi tlawn reng ai chuan misual sim dam lai hi an hlu fe zawk! Sex te hi in hre ve kur a, sexy te hi in chak ve ta sa sa, hei hi hre rawh : kan dam hian kan lo sexy ber zawk alawm le!
Chuvangin ka nau duhtak, i sexy rei theih nan i tleirawl lai khan sexy lutuk lo phawt teh!

Facebooktwittergoogle_plusredditpinterestlinkedinmail

Cutting Machine thar hlan

Aizawl; Ningani khan Synod Press khawl thar, Cutting Machine chu Rev. Lalzuithanga, Senior Executive Secretary-in Pathian hnenah a hlan.

Hlanna inkhawm hi Upa R.Lalmalsawma, General Manager, PRESCOM-in a kaihruai a, Pu Lalhruaitluanga Ralte, Manager, Synod Press-in report a pe a ni.

Synod Press-in cutting machine an neih 6-na a ni a. He Cutting Machine hi German Company Polygraph siam a ni a, a model hming chu SEYPA 115 a ni. Inches 50-a hlai lehkhapuan a tan thei a, fully programmable khawl a ni a. Lehkha a tan rual dan tur a duan lawk vek theih a ni a, computer hmanga thunun theih a nih avangin a sei zawng, a chhah zawng eng pawh tan hmain computer-ah thun lawkin a tan zawhah tan rual leh tura duansaah a insiamrem nghal zel thei a ni.

A sir tuak tuakah khawl mit a nei a, tan tura lehkha pek a nih hnuah thil dang va rawlh veleh a mitin lo hmuin amahin a in-off a, intihhliam palh lakah thawktute pawh a veng thei a ni.

Facebooktwittergoogle_plusredditpinterestlinkedinmail

Zonal Conference hmang turin Sri Lanka pan

Aizawl; Zirtawpni khan Commissioner Lalngaihawmi Territorial Commander, Lt.Col.Davidson Varghese Chief Secretary leh Lt.Col.Mariamma Davidson TSWM te chu Zonal Women Seminar leh Zonal Conference, Colombo, Sri Lanka-a neih tura tel turin an kal.

He Conference hi South Asia Zone niin India, Pakistan, Bangladesh leh Sri Lanka te an tel dawn a. IHQ atangin General Andre Cox te nupa, Commissioner Lalzamlova, IS leh Commissioner Nui, ZSWM te nupa leh Under Secy. te nupa an lokal a. IHQ atang vek hian Intenational Secy. for Bussiness leh Project lam atangin an lo tel bawk ang. Felcilitator turin India Central territory atangin Local Officer 1, Africa atangin Sipai 1 leh USA atangin Lt. Col.Dean a lo tel bawk dawn a ni.

Facebooktwittergoogle_plusredditpinterestlinkedinmail

Login

Lost your password?