Monthly Archives: December 2015

Mas a hnai; Bazar ah bo a tam thung

Aizawl New Market-ah tun hma leh tun hun thlengin thil bo a tamin rukru an hluar chho zel.

Krismas-ah thil bo leh rukru an tam thu Aizawl New Market office-a thawktute chuan Zalen palai an hrilh a. Kumin january atanga November thla nimin thleng khan thil bo market office-a report 85 awmin thil chhar report 73 chhinchhiah a ni a, htil chhar te hi a neitute hnenah pek thin an ni a, ni 7 chhunga lam a nih loh chuan a chhar tu hnenah pek a ni thin thung a ni.

Aizawl New Market office-a thawktute chuan tun hnaia rukru an man te chu ruihhlo ti ching ai mahin mi pangngai tak anga lang nula leh nutlingte an tam thu Zalen an hrilh a. Rukruk ching an man te chu Aizawl New Market police beat post kutah an hlan thin thu sawiin, rukru thang an man ngai hlir an man fo thin thu Zalen palai an hrilh. Market chhunga rukru thangte chu New market office chhungah hian an thlalak tar chhuah a ni a, heng thlalak tar chhuahte hi mi 77 vel anni a, an zinga 30 bawr vel chu hmeichhia niin a dang zawng chu mipa an ni a, heng zingah hian hnamdang vai leh khawchhak lam mi an awm nual bawk a ni.

Zalen palai zawhna chhangin New Market office-a thawktute chuan krismas laia pawisa bo a tam chhan chu kalkawnga thlai hnah emaw thil dang zuar an tam avangin rukru te hi an ngam pa zual niin an sawi a. Mi pawisa ruk sang chingte hi thenkhat chu thil zuar anga an awm thin thute an sawi.

Mahni thawmhnaw hak tur dawrkai hnen atanga ru thin an awm nual thu New market office-a thawktute chuan Zalen palai an hrilh a. Chung zingah chuan nual pangngai tak tak an awm bakah kum 15 atanga kum 20 inkar tleirawl chhuak tirte pawh an tel nawk thin thu Zalen palai an hrilh bawk.

Aizawl New Market police beat post-a Police te chuan Aizawl khawpui chhunga bazar lian ber new market chu tun hma ai chuan a tawp tawh loh thu Zalen palai hnenah sawiin, mutia ni paha zu zuar thinte pawh an tlem thu an sawi a. Tun hma lama KS anga mahni in zuar ang chu ualau taka hmeichhiat mipatna hmang lai an man thin ang pawh man tur an awm mumal tawh loh thu an sawi a. Market chhunga ti thianghlim tura darkar 24 chhunga an duty chuan rah tha a chhuah zel thu sawiin, rukru leh zu rui man tur erawh an la awm reng thu leh an rem tak tak theih loh thu Zalen an hrilh bawk a ni.

Trade & Commerce hnuai ami Aizawl New Market office hi Inspector enkawlna hnuaiah thawktu 11 an awm a. New market office thawktute hian market chhunga sumdawnna hrang hrang leh bazar chhunga thil bo leh a dangte an buaipui thin a. Thawktu indaih tawk loh avangin an buai fo thin thu bazar chhunga sumdawngte chuan Zalen palai an hrilh.

Facebooktwittergoogle_plusredditpinterestlinkedinmail

SYNOD MODERATOR

Aizawl: Tuikual Kohhran a Synod khawmpui vawi 92-na chuan kum 2016 a Moderator turin Rev. Lalzui thanga an thlan a ni.

Kum 2016 Synod inkhawmpui hi November ni 30 atanga December ni 11,2016 chhungin Mission veng kohhran Biak Inpui ah neih a ni ang. Synod puipa atan hian Secretary ah Upa H.Lalronghaka (Sr) leh Rev. Lianhmingthanga Pachuau (Jr) te an thlang a, Finance Officer ah Rev. PC Pachhunga & Rev. H.Remthanga. Statis tician ah Rev. R.Lalchang-liana, Exe. Secretary ah Rev.Lalramliana Pachuau leh Rev. B.Sangthanga te an ni.

Synod khawmpui hian Pastor bial thar 13 hawnbelh a remti bawk a, heng zinga 4 hi Mizoram pawn a ni a. Presbytery 2 siam thar a remti bawk. Khawmpui hi zanin hian a tiak dawn a, zanin hian khawmpui a tiak ang.
=====

Facebooktwittergoogle_plusredditpinterestlinkedinmail

Vaihlo bansan 12%; COTPA bawhchhia 5687 man tawh

Aizawl: October 2008 atanga November 2015 inkar chhung khan Cigratte and Other Tobacco Product Act (COTPA) bawhchhia mi 5687 man an ni tawh. Hetih lai hian Mizoram a zuk leh hmuam bansan/nghei zat chu 12% nia chhut a ni.

Nimin Aizawl Press Club a Mizoram State Tobacco Control Society (MSTCS) in chanchinbumite puala workshop an buatsaih ah he thu hi State Nodal Officer Dr. Jane R.Ralte chuan a tarlang a. COTPA dan bawhchhia 5382 hi Sec.4 bawhchhia an ni a, Sec.6(a) bawhchhia 6, Sec.6 (b) bawhchhia 40 leh Sec.7 bawhchhia 259 an man tawh a. Heng an man atanga an pawisa chawi tir tlingkhawm hi Rs. 2,62,617 a tling tawh bawk. Hemi hun chhung vek hian cigratte cartoon 3204 bakah packet 3824 man a ni bawk.

Dr. Jane R.Ralte chuan June 2009 atanga October 2015 inkar chhung khan zuk leh hmuam nghei duh vanga Tobacco Cessation Clinic (TCC) pantu mi 6381 an awm tih sawiin an zinga 3487 chu mipa an ni a, hmeichhia 2894 an awm bawk. TCC pantu zinga 3240 chu mei zu thin an ni a, 2481 chu a hmuam chi niin a ti kawp 660 an awm bawk a. TCC pantu zinga 12% chuan an nghei a, hei hi national average 3-5% aiin a sang zawk a ni.

Zirchianna atanga a lan danin India ramah zuk leh hmuam ti 35% an nih laiin Mizoram mipui zinga 67% chu zuk leh hmuam ti thin an ni a. Vantlang hmuna mei zu erawh a kum telin a tlahniam a, 2009 ah vantlang hmuna mei zu 62% anih laiin 2015 ah chuan 9% ah a tlahniam a, Mizoram ah chuan Mamit district chu a hniamna ber a ni. Mizoram zuk leh hmuam zirchianna ‘Global Adult Tobacco Survey’ (GATS) hi May 2016 ah neih leh tum a ni.

Facebooktwittergoogle_plusredditpinterestlinkedinmail

1000 zingah Mizoram 32-na Smart Technology Award dawng

Aizawl; India rama project 1000 kalpui mek leh zawhfel tawh atanga project ti tha 50 thlan chhuah zingah Mizoram chu tel ve in Smart Technology Skotch Award Inrinni khan New Delhi ah Mizoram aiawhin Er. Valbuanga, SIPMIU, Project Director in a dawng a. Chawimawina pawmna lantirna thu tawi ’acceptence speech’ sawiin ‘Kan ram aiawh in ka la a, Mizote kan duai loh zia tarlannaah a nih thu ka sawi bawk,’ tiin Zalen a hrilh.

Delhi a cham mek Er. Valbuanga chuan, ‘Urban area tana tuisem, thli chhe paihna thawh mek te; mipuiin khawlai vawng fai tura taima leh lungrual taka vantlang hnatlang an neih thin te chuan he chawimawina hi a hring chhuak niin thudawnna chuan a sawi a.

Aizawl Municipal Council Corporation in solid waste a sawngbawl danah hna thawh dan tur Central in a duan an zawm that te vangin chawimawi na dawn a nih thu sawiin, Project Director chuan ‘ Mizo te tanrualna rah a ni, ‘ tiin Zalen a hrilh bawk a ni. “Hnathawk tha zingah Mizoram SIPMIU chu 32 na a ni. Showcase 60 zingah popular vote ah 15 na an ni a, Smart City ah 19 na SIPMIU chu a ni.

‘Research emaw thil awm ngailo siamchhuah ‘invention’ lamah chhawp chhuah tur kan nei lem lo ­­­a, Kan project ah Mizoram Sawrkarin thu a tiama, a thawh lam keiniin kan hlen chhuak a, hemi vang hian ‘Complianced for Urban Tranformation Best Practices Technologies in India kan dawng bawk,’ tiin thudawnna chuan a sawi.

Inrinni kan SIPMIU chuan Republic Veng ah bawlhhlawh bawm an sem a, kumthar atang hian Aizawl khawpui chhung Local Council 83 a chhungkaw tin hnenah bawlhhlawh bawm 2, tawihthei leh tawihtheilo thliar hranna tur pek a tum a. Tunah hian veng thlan bik Tuikual N&S, Dinthar, Kanan, Mission vengthlang, Nursery, College veng, Republic Vengthlang leh Chawnpui ah te pilot project angin an pe tawh.

Facebooktwittergoogle_plusredditpinterestlinkedinmail

ASEP in bird race nei

Aizawl: Nimin khan Association for Environmental Preservation ( ASEP) chuan Sialsuk tlangah Sialsuk Bird Race an nei a, ASEP member leh Photographer mi 40 vel an thawk chhuak.

Bird race a kal turte hi Sikulpuikawn-ah K.Lianzuala, Ex MLA in a vailiam a, K.Lianzuala chuan,”Hetianga ASEP in nungcha humhalh inzirtirna kawng tha tak an buatsaih hi a lawmawm a, rah tha a chhuah ngei ang. Ram changkang zawkte anga silai leh sairawkherh nen ni lo thlalakna nena sava veh leh ramchhuah kan uar ta hi a lawmawm tak zet a, nungcha humhalhna kawngah rahbi thar pawimawh tak a ni,” a ti.

Bird race ah hian sava thlalak intihsiakna neih a ni a. Sava chi hrang la hnem ber, sava thla la mawi ber te hnenah leh thla laa thawk te hnenah lawmman tha tak pek a ni. Sialsuk tlang Zongaw hi hmun tha tak a ni a, sava chi hrang hrang leh ramsate pawh an la awm nual niin hriat a ni a. Tun aia tha zawka humhalh leh Bird Sanctuary ah te hial pawh puan atan a itawm thu ASEP thuchhuah chuan a tarlang a ni.

Facebooktwittergoogle_plusredditpinterestlinkedinmail

Consumer Forum in thubuai 73 dawng

Consumer Disputes Redressal Forum, Aizawl Dictrict te chuan kumin january atanga December ni 12 thleng khan sumdawng laka lungawilohna complaint 73 an dawng a, heng zingah hian mobile phone chungchanga harsatna a tam ber a ni.

Disrict Forum-a thawktute hnen atanga Zalen palai thudawn danin kum 2014 ah complaint 54 an dawnga kumin ah erawh 19 laia tam belhin 73 an dawng a ni.

Consumer Disputes Redressal Forum, Aizawl Dictrict-a thawktute chuan complaint lut tam takte chu chinfel sak an neih thu an sawi. Mobile phone warranty avanga buaina a tam ber thu Zalen palai an hrilh a. Mobile bakah Gas chungchangah complaint lut a awm nual thu an sawi.

Mizoram Consumer Union te pawn sundawngte laka mipui lungawilohna chu a kum tela a tam chhoh zel thu an sawi a, an mahni pui tura rawn kalte chu sum chawi tir lo in an harsatna an sut kian sak thin thu Zalen palai an hrilh a. MCU te puihna beisei-a lungawi lo tam ber chu Gas Subsidy avanga buaina a nih thu an sawi a, heng bakah hian mobile phone warranty avanga buaina an tam thu an sawi a. An hnena rawn kalte chu an theih ang anga buaipuia Dictrict foum thlenpui kher lo a sumdawngte an biak sak hnua sawifel pui an neih nual thu an sawi.

Mizoram Consumer Union te hian tunhnai khan Mizorama eirawngbawlna gas (LPG) distributor-te leh Indian Oil Corporation (IOC)-te’n gas chungchangah consumer-te ham?hatna tur dan zawm loh tam tak an neimer Court-ah complaint an thehlut a ni bawk a ni.

Facebooktwittergoogle_plusredditpinterestlinkedinmail

Anti-Corruption Week khar

Aizawl: Nimin khan PRISM chuan I&PR Conference hall-ah Anti-Corruption week kharna an nei a, Planning Board Vice Chairman, MZP in Politician eirulo an thlan a pakhatna H.Liansailova chu khuallian a ni.

Week kharna Pu F.Lalnienga, Prism Advisory Board member kaihhruai ah hian thu sawiin H.Liansailova chuan eiruk do kawngah hian Civil Society ten ke an pen nasat lehzual pawimawh a tih thu leh thil thalo leh diklo umbo a nih theihnan tan lehzual a tul thu a sawi.

Prism President Vanlalruata chuan Corruption hua leh do nia insawi zingah pen chhuah dawn a harsa ti thin an awm nia sawiin, ‘kan thahnem tawklo a nih pawhin beidawng lovin huaisen taka kan beih chuan hun reilo teah pawh hnehna kan chang thei ngei ang,’ a ti bawk.

Facebooktwittergoogle_plusredditpinterestlinkedinmail

Saiha District-ah BBBP kalpui dawn

Aizawl: Hmeichhe naupangte humhim a, zirna tha zawk an dawn theihna tur ‘Beti Bachao Beti Padhao’ chu Saiha district ah kalpui tum mek a ni.

Social Welfare Department hnuaia ICDS thawktu ten Zalen an hrilh danin India ramah a kum telin nau pianghlim zingah hmeichhia an tlem hle a, kum 1901 khan India ramah hmeichhia aia mipa an tamna chu maktaduai 3.2 anih laiin 2011 chhiarpui ah chuan hmeichhia hi maktaduai 35 in an tlem tawh zawk a. Naupang kum 6 hnuailam zingah mipa 1000 zelah hmeichhia 918 (Child Sex Ratio) awm anga chhut a ni a, hei vang hian sawrkar laipui a mangang a, hmeichhe naupangte chhanhim leh venhim an nih theih nan Beti Bachao Beti Padhao hi kalpui a ni ta tih an sawi.

He scheme kalpui nan hian sawrkar laipui chuan district 100 a thlang chhuak a, heng zinga district 87 hi national average (1000:918) aia hniam an ni a, a dang district 8 hi national average aia sang ni mahse hniam lam pan te an ni a. Heng zingah hian Saiha district pawh a tel a, Saiha district ah hian 2001 chhiarpui ah CSR hi 950 anih laiin 2011 ah 932 ah a tla thla a, national average aiin la sang mahse chhiarpui hmasa aia point 18 laia tlakhniam vangin thlan a ni.
He scheme hnuaiah hian hmeichhe naupang venhim chu a tum ber a ni a, rai laia hmeichhe naupang tih hriat anih vanga tih tlak te khap tlat a ni a. Hmeichhe naupang chu an pian hnuah enkawlna tha dawn tir leh zirna lama hma an sawn theihnana tanlak te a huma a ni.

Facebooktwittergoogle_plusredditpinterestlinkedinmail

MCON atangin zirlai 500 zirchhuak tawh

Aizawl: Mizoram College of Nursing atanga Nurse GNM (General Nursing & Midwifery) zirchhuak mi 500 vel an awm tawh a, BSc Nursing zirzo mi 203 an awm bawk.

Mizoram College of Nursing, Falkawn ah Nurse zir chhuakte hi India ram hospital hrang hrang leh foreing ram thenkhata thawk an awm nual tawh a ni. MCON hi Aizawl Civil Hoapital-ah kum 1980 khan din tan a ni a, a tirah chuan GNM(Diploma) chauh zirtir thin an ni a. Kum 2005 khan College ah upgrade a ni a, hemi hnu hian B.Sc Nursing (Degree) course zirna kalpui a ni. MCON hian tunkar Ningani khan MCON Hall-ah zirlai kal chhuak turte thlahna leh lukhum khumtirna hun leh lut thar lawmna inkhawm an hmang a, he hun hi Finance Minister Lalsawta chuan khuallian niin a hmanpui a, Dr Lalbiakkima, Hospital & Medical Education Director chu khual zahawm a ni. Finance Minister Lalsawta chuan, Mizo nurse te chu khawvel hmun danga thawk tur pawhin an that tawk thu sawiin, “Hnam inthliarna nei miah lo hnam kan nih vangin nurse zir chhuak Mizo nulate hi an tha lehzual a ni,” a ti.

Facebooktwittergoogle_plusredditpinterestlinkedinmail

Health Minister Thanzara’n vai liam

Aizawl: Nimin zing khan Health Minister Lal Thanzara chuan Long Lasting Insecticidal Nets (LLIN) Malaria venna atana damdawia chiah Thosilen, thingtlang lama sem tur chu New Secretariat Complex atangin a vai liam.

Minister chuan damdawi a chiah thosilen chu Health Department in Malaria laka invenna tura hma a lakna zinga pakhat a ni tiin Mizoram ah nikum 2014-ah Malaria vei mi 23,105 awmin mi 31 in nunna an chan thu leh kumin October thla thlengin Malaria vei mi 22,064 awmin mi 13 ten nunna an chan thu a sawi. Minister chuan thufing in ‘tihdam aiin inven a tha zawk’ a tih angin mipuite chu natna hrang hrang an pumpelh theihnan invenna lam ngai pawimawh turin a chah bawk. LLIN hi Global Fund-in National Vector Borne Diseases Controol Programme (NVBDCP) kaltlanga thosilen naran pawh ni lo, thosi ti hlum thei damdawia chiah sa 5,28,108 min pek anih thu Minister hian a sawi bawk.

Dr. K.Ropari, Principal Director, Health & Family Welfare chuan LLIN chu kum 2011 atanga sem tan anih thu sawiin size chi hrang pathum sem chhuah tura ruahman a nih thu a sawi a. Thosilen damdawi chiah chuan kum 5 a daih nia sawiin kum 5 chhung hian vawi 20 aia tam suk loh tur anih thu a sawi bawk.

Facebooktwittergoogle_plusredditpinterestlinkedinmail

Login

Lost your password?