Monthly Archives: December 2015

MJA?CHARITY FUND Lut hnem

MJA in Krismas puala mi harsa te tanpuinan Charity Fund an thawhkhawm thin chu nimin thleng khan a luhbelh zel a, sum lut hi Rs.12,000 a chuang tawh a, sum thawhtu zingah hian MJA Member nilo mi 4 an tel a ni. MJA Gen.Hqrs. chuan mi tupawh sum thawh tur hian a sawm a, sum tlingkhawmte hi Civil Hospital, Aizawl a damlo mangnangte tanpuina ‘Poor Fund’ ah chhunluh a ni ang.

Facebooktwittergoogle_plusredditpinterestlinkedinmail

Lehkhabu pe

MJA Public Library-a dah turin Florence LR Ralte chuan a lehkhabu ziah ‘Chenghnemi’ tih bu hnih a pe a. Lehkhabu petu chungah MJA chuan lawmthu a sawi.

Facebooktwittergoogle_plusredditpinterestlinkedinmail

Bank in hre lo

Pawisa note a pen tui kai/ziak awm te January 2016 atangin Bank pawm tawh dawn lo nia thuthang awm chungchangah State Bank of India (SBI) thawktute chuan engmah RBI atangin hriattirna an dawng lo tih Zalen an hrilh. SBI thawktute chuan pen tui hmanga pawisa note ziahran chu phalloh sa hrim hrim a ni tiin RBI lamin thuthar a neih chuan an hriat an ring tih an sawi bawk.

Facebooktwittergoogle_plusredditpinterestlinkedinmail

KHAWMPUI NEI

Mizoram Consumers Union chuan naktip Thawhlehni hian Central Hall, Venghlui ah annual general meeting cum consumer awareness programme an hmang dawn a, chawhnu lamah hruaitu thar an thlang ang.

Facebooktwittergoogle_plusredditpinterestlinkedinmail

Thisen pe

Nimin khan Krismas lo thleng tur pualin Ramhlun North KTP in thisen unit 37, Vaivakawn TKP unit 8, Sailo group unit 10, Tlau chhungkua unit 7 leh mimal tlawmngai mi 13, a vaiin mi 75 ten Civil Hospital, Aizawl ah thisen an pe. Krismas vuakvetah thisen tlakchham a awm thin vangin Civil Hospital hian December ni 1 atang khan thisen pek runpui an huaihawt a, mi thahnem takin thisen hi an pe.

Facebooktwittergoogle_plusredditpinterestlinkedinmail

Ka Huang (Dec. 13, 2015)

Ni 8-12-2015 (Thawhlehni) zana Synod Palai lawm zana damdawi in thar sak, ‘John Williams’ (Mizoin Pu Daka kan tih mai) tih an sawi khan, Pu Daka a han tih khan ka thinlung a deng zawk mai a. Pu Daka tih kha John Williams a ni tih reng ka lo hre ve ngai lo a. Kum 1934 nge niang 35, ka hre lo, ka chal pâng tak mai hi a khawihli mauh mai a, a hnai dawn chuan a zum vat a, a eng kalh mai. Ka pain Durtlang damdawi in min panpui a, thir thutthlengah min thuttir a, ka hriat dan chuan Pu Daka khan sakawrbakcheh hian a hmawr a chep hawng ni maiin ka hria, Sap sister kha Pi Sangi kha em ni ra (?) hian min dawm bet a, ka tap hlarh hlarh mai tih ka hria, a zang an sawr chhuah hnu chuan bandage-in min tuamsak a, chu zawng chu ka hriat a ni. Pu Daka ka hmuh dan chu ke lehlam tlawn niin ka hria. Ka naupang em a, ka chiang lo, kum 5/6 emaw chauh ka nih chu.

Chuta tang chuan ka ngaihtuahna chuan kan lo hawng thla a, Leitan kan lo thleng thla a (chung lai chuan tuna motor kawng lei tante khi a la awm miah lo. Khi khi chu kum 1943/44 vela ITA (Indian Tea Association)-ho laih chauh kha a ni. Khi leitan (chhakta zawk) khi Upa Laia, Mission Veng (Lalremliana, Aizawl College Lecturer pu)in a zuan kân a, U Rivela (Riwell Roy Diengdoh) khan zuan kân a tum ve a, mahse nulain a zuan kân zawh loh chuan a thi mai ang tih an hlauh avangin an pawt bet tlat tih thinte chu kan khum laizawl atang chuan ka hre chhuak chawp ta zel a. Chubakah chhun lam khan Doordarshan, Durtlang, Leitanah ka han kal a, BVT atangin Chite lui kanin World Bank Road kan zawh chho a, Chite hnar, Dhobi nullah an tih mai thinte chu eng factory in ni mai awm tak hian Green House te an lo sa thluah mai a. Chite kam lehlam atang chuan a khat tawk hian in awmin, a thente chuan Picnic spot ni mai awm, hmuh theih loha hung phui tlatte a nia. Chuta tang chuan Falkland, Thuampui, Bawngkwn a inzawm khir chho un ni ber maw ka ti mai. Bawngkawn kan tih tak rawk khu Bawngpu kawn tih thin a ni, chenna in pakhat te mah a awm ngai lo, Ramhlun pen atanga hla lo te, Durtlang lamah khian thutna chi reng reng loh, lung in thutthleng a inrem bur mai a, ka hriat ve chin chuan lungpui sam leh lung hmul eng eng emaw hian a bawm luk thin. Durtlang leh Chaltlang inkarah chenna in pakhat te pawh a awm ka hre lo. Tin, Bawngpu kawn leh Zarkawt inkarah chenna in a awm ka hre bawk lo. Tuna Ramhlun North, South tih velte khi ram palaileng vek (dik tak chuan tunah pawh RAMHLUN chu a awm lo tiraw?). Chaltlang khi chu khaw hlun tak a ni. Chaltlang atanga Zarkawt inkarah pawh khian kawng kamah chenna in a awm chuang bik lo. Chanmari, tuna Biak In hmun khi em ni ta? ah khian Assam Rifles kudam, an silai kah zirna bungrua eng eng emaw dahna, in khat chu a awm, mihringin an luah leh luah loh ka hre lo. Laipui tlang bulthut atanga Lower Chanmari lane phei zela Dawrpui Biak In kawmthlang thleng khian sipai chanmari kahna a ni.

Laipuitlang bulthutah khian target an dah a, Yard 50, 100, 500, 600, 1000 ti velin dawrpui Biak In thlangah sawn ral hla ber a tawp niin ka hria. Chuvangin, Chanmari Veng hming pu ta a nih hi. Kawng chung lam thung – High sikul tlang bulthut kawng chhak lawk atang khian Thingpui an phun a, Thingpui huan hming a pu. Mahse, lawn tham thama lian a ni. Chhawlhring leh Tik Tik sava hian chen nan tak a hmang a, thlikthliekbawm an ei kha an e chhuak a, thingpui kung chakna ringin a chawr mai si a, sawrkharin tik tik leh chhawlhring lu man chu a siam a, lu khat zelah siki (25 paise) a ni. Tlem ti suh, chung hun laia patling nileng hlawh chu 50 paise a tling lo. A zik ni loin, a rah phai lama chin atan an tirah a ni mai thei.

Tuna Zarkawt Biak In vel saw Babu tlang hla zawk kan ti a, vai babuho quarters-ah an awm thin. Zarkawt kawn leh Chanmari inkarah chenna in a awm ka hre lo. Kawn piah kawng chhak lamah Pu R.Buchhawna leh Pu Sainghinga an awm a, kawng thlang lamah chuan ka hriat sual loh chuan Pu Chhawnzinga te, Pu Hmartawnphunga (kan CM Hawla pa) te, Pu Lalaua, Counpounder (Biaksailoa pa) a awm. A in chung chu a lang phak ruau a ni. Tuna in hlui ber ni awm tak, Biak In kawmchara Pi Darawti in tih mai khi chu tlai khaw hnu, 1947 hnua mi a ni. Zarkawt tlangvalho infiamna (Basketball khelhna vel) khi Babu tlang hnai zawk kan ti a, Vai babuho an awm thin. Inder Singh-a khan hma khaw sang khan in a lo nei reng em ka hre lo. An awmna ka hriat ve chu Dawrpui phei, Man Hausaa thenawmah khuan a ni. Tawk rih se.

Kan indipenden tum lam kha – Thianghlima (mi ang lo) ka tih kha Pu Lalliana, Anti-Malaria Officer (Retd)-in min rawn phone a, 1990 vela thi tawh awmin min hrilh. A ât dan kha a naupan laia a damlohna hriin a tihkhawloh niin min hrilh, para-typhoid an tihte pawh kha a vei a ni mahna. A damloh hma chuan, naupang harh tak leh inkhen kalte pawh thiam tak niin min rawn hrilh a ni. Keini indipenden tum man khawmho kha chu kan chhangchhia: Matu Thanga te, Thianghlima te, Sampujoy-a (Tuikuk) te, Durtlang mel 6/8 vela mi Thianga bawk te, indipenden tum e ti loin Assamese tlangval Birena te, Kalusingh-a te, Tachhip zirtirtu fapa U Thanga te kan ri nuk mai. Matu Thanga te angduang phei kha chuan ‘ka tang’ tih pawh an hre (feel) kher lo ang.

Facebooktwittergoogle_plusredditpinterestlinkedinmail

Lei chim & a mawhphurtu

Tun hnai lawk khan Aizawl leh Lengpui inkara Tlawng lei a chim leh a, he lei (Bailey bridge) hi kumin kum tir lama dawh zawh mai kha a ni a, a hma pawhin a lo chim tawh nghe nghe. Tun hnai rei lo te chhunga vawi thum lai a chim ta hi a vanduaithlak tak meuh a, nunna chan an awm phei hi chu a pawi tak zet a ni. He lei chim chungchangah hian, a hma lama an lo tih dan ang thoin, sorkar (ministry leh PWD) lam thu leh hla kan hre nghal a. A mawhphurtu nihna an inbel lo a, lei chim a vanduaina tawkte demna lam hawi zawng tawngkam te pawh kan hre zui nghal a nih kha.

Chief minister pawhin Ningani a thuthar thehdarhtute a kawmnaah phal zat aia rit phur lirthei zawh vanga he vanduaina hi thleng anga ngaih theihin a sawi a. Hei hi he lei dawhtute sawi dan pawh a ni nghe nghe. Mahse, tun hnai rei lo te chhunga he lei chim zing ta malh malh lutuk hi mipuiin mak an ti a, ei ruk haw em em te sum che vel vangin an thin a rim a, ministry leh political party leh department lamin sawi fiah tum eltiang mahse a sawngsawhlawt vakin a rinawm loh. A kilhna ruk bo vangin a chim an ti a, a hnuah an dawh tha a, an dawh mek laiin a chim leh a. Sum tam tak sengin dawh a, kum a vei hmain lirthei pakhatin a zawh laiin a chim leh a. A nihin a ni zozai tawh lo. Chuti chunga mawhphur ngam lo a mi dang puh kual puh kual zel mai hi sorkar tha zia pawh niin a lang lo. Thil tha lam chauha mawhphurtu nih tum, harsatna lo thlen laia mawhphur duh miah lo a mi dang puh kual zel thin hi hruaitu puitling zia a ni lo a, sorkar inrelbawlna tha lo zia dik tak a ni zawk.

Corruption vang hian kan tuar nasa tawh hle a, kan ngaihtuah phak loh chhiatna leh harsatna thleng tam tak hi sorkar kalphung tha kan neih loh vang leh hlemhletna vang a ni thin. Hman kum lawk khan Bawngkawn leh Thuampui inkarah mi an lo bawr laih laih kan hmu a, chinchang kan han zawt a, kawng thlangah mi pakhat a tla tih min hrilh a. Kawng sir ke a kalna (footpath) a a chetsualna lai ni awm tak chu min kawhhmuh a. A kaw huau mai a, a hnuaiah chuan a chappal khing lehlam ni awm tak a la awm nghe nghe a ni. Chu footpath chu a chhe tawh hle a, kawngthlang lama tlak dalna chu han sawi pawhin a nghing lawih lawih thei. A chhuat pawh a chhe khawp mai, a tlakna lai ni awm tak phei chu a chhuat a awm tawh lo a, a hnuai lamah tlak palha han inham tanna tur a awm miah lo a, tlak hawlh palh hlauh chuan a hnuai kham a tlak ngei ngei na tur a ni hrim hrim.

Ka rilruah vanduaina tawk ta chu ka ngaihtuah a, a thiam loh vang ni loin chu kawng chuan a nih tur ang a nih tawh loh vang ni zawk tlata hriatna ka nei a, vanduaina tawk midang an awm leh reu reu ang tih pawh ka hlau hle a ni. Ka han thlek kual vel a, chu footpath siamtu contractor hming leh an siam zawh hun vel ziakna ka hmu zo lo a, engtia rei nge a nih tawh hriat ka chak khawp mai.

Aizawl khaw chhunga footpath siam, tuihawk luankawr siam, tlak dal siam, ko pang lung rem, etc., tam tak hi party mi leh sate siam a ni thin a. Contract hna sorkarin a pek danah thil fel lo tam tak a awm a, mi leh sa induhsakna thil a tam hle a, contractor hming hawha hna dil/hmu, a hnu a hralh leh thin tam zia ngaihtuah hian a thawktute hian tha takin an chhuah a rinawm loh. Fel lo taka deh chhuah teuh hi a hnu lawka harsatna thlentu a ni thin. Mipui himna lam thlir miah lo a sum tam tak hlep tumna nei thinte vang hian chetsualna hi a thleng leh hin dawn niin a lang.

Aizawl khawpui chhung kawng zim lutuk leh mi thenkhat in sain kawng an nek nasat thu te an sawi fo thin a. Hetianga mi sawi ka hriat apiang hian ‘chu chu corruption kan tih fo hi a ni’ tih hi ka rilruah a lang thin a, sorkar sum (mipui sum a ni zawk mah) dik lo taka eiruk chauh hi corruption a ni lo a, mahni chanai ni lo diklo taka neih hi hlemhletna (corruption) chu a ni. Chutiang vel chu lei chim chungchangah hian ngaihtuah ka ngaihtuah kai daih a. Tute emaw vanga hnam rinawm lo a inchhal chu tha ka ti lo a, mahse, thiltithei ber ber te, a thu ber berte an rinawm loh avang hian mipuiin ram hruaitute leh sorkar babute chungah rinna kan nghat ngam lo a ni ber.

Kum tin hian C&AG report ah Mizoram sorkar department hrang hranga sum hman dan felhlel leh dik lo engemaw zat tarlan a ni \hin a. Anni report hi chu dik lo thei lo a ngaih a ni tih chu tlema vengva deuh chuan an hre vek awm e. Mahse, C&AG report te chanchinbu lamin han chhuah viau thin mah sela a hnu lawkah a zuzi leh mai thin a ni.
Kan ramah hian corruption vanga tuar tam tak an awm tawh a, han inchhut ngun chiah phei ila chuan nunna chan phah pawh sawi tur an awm nual tawh ang. Chutihlaiin, mi hlelhle (corrupt) an thil tih dik loh vanga tuar erawh an lam vang hle thung. Dan hmanga hrem ngei ngei tura ngaih, an eiruk leh tih dik loh pawh mipui vantlang hriat vek te pawh mak takin an fihlim leh mai thin a nih hi. Mi dik lote hrem lohin an chhuak leh thin a, eiruk hmangte an fihlim leh zel avang hian kan hmabak hi a thim viau maithei a ni.

Thingtlang lam tihhmasawnna tur sum tam tak kan sorkarin a dawng thin a, lo neitute hamthatna tur pawisa pawh kumtin thahnem tak a lo kal ziah tih tu’n kan hai lo. Mahse, zokhaw lama chengte an bet tawlh tawlh a, lo neitu manganna phei chuan a vawrtawp a tawng tan ta hial a nih hi. Mi pamham, eiru thinte vangin mi retheiin an chanvo an chang lo zel a nih chuan tumah hi kan nuamsa rei lo ang tih pawh hlauhawm tak a ni ta.

Eirukna vanga harsatna chi hrang hrangin kan ram a tuam mek tih hi phat rual a ni ta lo. Kawngpui \ha kan nei thei lo a, kawlphetha siamna tur tui lah kan khuap thei lo a, damdawi in tha kan nei thei lo a, buh leh balah kan intodelh thei hek lo. Hetih mek lai hian Mautam tam lah kan hmachhawn mek bawk si. Heti reng renga kan kal chuan corruption avang hian kan tuar zel ang a, kan chhe telh telh anga, kan hnam hian chhiat vek bak hmabak a nei lo ang.

Facebooktwittergoogle_plusredditpinterestlinkedinmail

KRISMAS HIM TAKIN AW – Doctor ka zawhna

Kan hunpui ber kan lo thleng leh dawn ta a. Thalai tan phei chuan a boruak ringawt pawh hi zauthauna tham a ni ve hrim hrim. Event chi hrang hrang an buatsaih a, concert, dinner, party leh a dang te nen. Tleirawl leh thalai tan chuan a engemaw bera han tel ve ngei chu an thil tum lian tak ani ngei ang. Mahse January thla tawp lam atanga February chho ah a result a rawn lang ta thin a, nau tih tlakna damdawi hralh a rawn kal leh ngei anga, inring lo tak chung si a nau pai ta nawlh, laklawh viau tak vanga tlachawp taka nupui pasal neih ngai an awm leh nawk mai thei. Chutiang ang scenario chu doctor te hian kan lo hmu fo (observe) tawh thin a ni. Kei pawh hian hmeichhe tleirawl kum la tling si lo, pumpui lam fel lo anga rawn inringhlel, chutiang ringa an nu emaw pa te’n an rawn hruai hi ka lo en fova, ultrasound a han en chuan nau an lo pai leh nawlh thin a, a damlo ber lah hrilhhai hrehawm ti bawk, a rawn hruaitu lah hrilhhai thinrim bawk…..chutiang chu kan khawvel hi a ni. Nau han pai chhunzawm dawn se la naupang bawk si, pasal nei rual lah ni hek lo, an bialpa a raitu te lah anmahni rualpui emaw te an ni bawk thin a, thawh chhuah la nei bawk si lo, nupui neia chhungkua han din tir ngawt chi ani der bawk si lo. Tam tak chuan nau an tih tlak phah a, a then inrinhlelh nachang hria te erawh an zun an test mai a, an lo rai leh damdawi hmangin an ti tla leh mai bawk a. Engpawhnise kan fimkhur thiam nan tun tum chu helam biahthu hi ka han hlan teh ang che u.

Nu leh pa tam berin kan tihsual thin chu kan fate kan en naupang chhe rei lutuk hi a ni. Lian uaih tawh pawhin “Anu Apa” an ti duai duai a, nu leh pa te hmuh phak lovah chuan an lo naupang chhe aw zawng ta thin lova, thil te hi an lo hre bel phian tawh zel a, kan buai phah ta thin a ni. Tleirawl kum 16 naupai ka en chu natna tha lo te hi a lo kai mai ang em, a bialpa chanchin a hre chiang em tih te ka zawt a. Min chhan dan chu “keimah lo chu mi dang a la mutpui lovang, a zei lo em mai” zuk ti a mawle! “A nih nang?” kan ti leh talh a, “I va dilchhut e..” min ti teh daih bawk. A nu leh pa te rin ai chuan a hriatna a zau zek anih duh hmel. An zei leh zei loh lam chu kan sawi theih ani hauh lo na a, ngaihtuah tul ta zawk chu sex hman nachang an hre tawh a (an hre hleeee toh te pawh ani zawk mah), sex hmanin a kaihhnawih naupai te, nau tih tlak leh a nghawng theih te, sex hman atanga natna kai theih Sexually Transmitted Infections (STI) , nupui pasal neih leh chhungkaw din te thlengin information an dawng tha em tih hi a ni.

Mipa hi an mutlik (wet dreams) tawh a, hmeichhia hian thanthi an neih tawh bawk chuan chi thlah thei, naupai thei an ni tawh tihna ani a. Nu leh pa te hian naupai chungchang te, nupui pasal neih leh chhungkaw din chungchang te, fa te laka nu leh pa mawhphurhna te hi sawipui a hun tihna a ni. Kan hrilh loh chuan kimchang lo tak leh, zahmawh bawlhhlawh ang zawngin an thiante emaw film leh lehkhabu atang te in an la hre dawn tho a. Chu chu a pawi thei a ni. Chiang tak leh fel takin hrilh ila, theih phei chuan safe sex (sex hman dan him) te thlengin hrilh ila, invenna hman chungchang, condoms leh oral pill te pawh hrilh tel ila, chu chuan harsatna tam tak lakah a hum thei a ni. Nau tihtlak chungchangah hian han belh leh lawk ila, nau an pai lai kha 8 weeks (kar riat) hmalam a nih chauhin damdawi hmanga tihtlak tur a ni a, chumi confirm nan chuan ultrasound tih a ngai thin. 8 weeks hnu a lo nih chuan a tla fel har a, thi put nasa te a thlen thei a, naute a lo tlak mai loh a, nau an lo pai chhunzawm phei chuan a hlauhawm thei a ni.
A tawp ber atan hei leh lawk hi. Lirthei khalh chungchangah nu leh paten fate kaihhruai that a pawimawh hle. Lirthei chetsualna hian kan thalaite nunna a la hnem ta malh malh hle a, rui chunga lirthei khalh loh tur thu te, traffic rules zawm that te, midang an ti na tel thei ani tih hriattir te, lirthei kan khalh chuan keimahni mai bakah midang te himna chungchangah mawh kan phur thu te, lirthei hi inkhualtelemna toys ani lova, tangkai atana kan neih a nih thu te hrilh hram hram ang u. Him takin Krismas leh Kumthar i hmang tlang teh ang u.

Facebooktwittergoogle_plusredditpinterestlinkedinmail

Dr. Hrekima titi (Dec. 13, 2015)

Tleirawl sexy ho ka fuihna lo chhiar vetu hmeichhe doctor thiam tak Dr. Mahruaii thahnemngaiin (helam hi an tawng tam si a) ‘mipa lam pawh..mi pahnih thil tih a ni si a,” tiin min rawn fuihpawrh a. Ka lo ruahman lawk ka’n phawrh zui ang e.
&&&&&&

“YOU GIVE LOVE A BAD NAME”
Tleirawl leh nula mangang tam tak ka kawmna atanga ka thin tirimtu, tlangval huatthlala, hmangaihna tihmingchhe thintu chi hnih ka hria. E! Chi thum pawh a ni thei e! A chi khatna chu : Nula ngaih phet tum tlangval, an hlawhtlin veleha tlansan leh si hi.
Tlangval duhtak,
‘Di nei lo Pawla’n a sai an ti’ tih culture kha hunin a liampui tawh asin! Mahse, hmangaihna chhuanlama nula kar I la ching a, ‘hmangaihna chu a inhlan famkim thin’ tih thu changchawiin tleirawl lungmawl bumin a thianghlimna chu tihchhiat phet i tum a. Hmangaihna leh sex chu kalkawp ngei tura ngai thin hmeichhe rilru tha chuan a awih ta mai a. Mipa thinlungah hian sex leh hmangaihna hi a kal hrang thei tih a hre der si lo. A mawlna chu remchangah i la a, a hmangaihna che chu nawmsip bawl nan i hmang hreh loa maw? Hmangaih belh sawt tura i insawi tlat avang khan tleirawl hmangaihna thlahlel chuan a ringhlel phal ta lo che a. In lo khati ta kha ni a.
Mahse ka rei maw! I duh i hmu ta cheng a, i tum i hlawhtling ta ngei a, hmangaih sawt tura intiam si khan i hlat ta hret hret si maw? Chenna ngai loh ram thar fang leh turin hnutiang i chhawn leh si maw? Ui puar koh an sawi ang maiin i kal bo ta nal nal mai a nih kha! Hei zawng a dik mawlh lo. A thianghlimna, a hmangaih tana a lei khek chu hmangaihna avangin a hlan che asin! I tana a inhlanna hlutzia hrethiam lo tawk vel hian i mawl a, hmeichhe thianghlim tichhe duh tawk vel hian i sual roh a nih hi maw le! A rilru na kehchhe puak ri hi a ring thin teh asin! Hmangaihna hi a tan chuan thil tenawm a lo ni ta a, mipa zawng zawng hi a ring ngam tawh lo fo thin.
Nangmahni ang hi alawm hmangaihna hming tichhe zo vektu chu! Thianpa Dr. PC Hminga’n kan thianpa kawngkhar nem hawn rawk paha Bon Jovi hla, “You give love a bad name!” tih a va sak khum fiamthu ngawt laite kha ka hre chhuak e! Hmangaihna tih tawngkam hlu leh ril lutuk mai hi in tithangtlawm a, in titenawm zo ta a nih hi!
I rilru tenawm hi hmutlang thei lo tur khawpin a hmangaihna mit chu a del ve a ni si ale! Hmeichhe rilru thianghlim tan hian sex leh hmangaihna chu lakhran theih loh a ni asin. Nangmah ang mipa rilru danglam tak, hmangaihna tel miah lo pawha sex hmang thei thin thinlung hi hmu tlang se a heti bik lo tur. Mahse a tawpah chuan a hmeichhia zawk bawk an hmingchhe leh thin si! An lainatawm asin!
I demawm a ni. Khawvel hian a dem che a ni. I then leh dawn tho anih chuan engati nge a parmawina hi i thliah kher le? I duh zui leh dawn loh si chuan kar kar lul tawh teh suh. Nangmah avang hian nula thianghlim chu a bal zo ta a, i rilru tenawm avang hian a chingpen zo ta si! A rilru na inchhir lungchhiain tih loh loh tur a tih a, ngaidamtheitu ngaihdamna a chan hmaa famkhawpui a lawi anih ngat chuan a chan tur chu a chhe khawp ang! Chu hmuna thawn luttu chu nangmah i ni ngei dawn si a, a thisen mawh chu i chungah a tla khawp ang maw le! I phur zo dawn em ni?
Ngaihzawng i nei a nih pawhin ninhlei viau teh suh. Kan thil duh em em hi chul chul a, khalh khalh kher hian thlauh keh a awl zawk a nia! I duh a, I hmangaih a nih tak tak chuan palai tir la, nupui atan nei mai rawh. Puithiam hmaa ‘a nuamah pawh, a hrehawmah pawh’ tia in damdun chhung atana nei tura thu I tiam zanah inthlahrung hlek loin i ninhlei dawn nia! Tuman kan dem lo ang che!
Tlangval, thurawn pe ve dawn khanglang ta che ila i dawngsawng duh ang em? Hmeichhia hi duat ve la. An rohlu ber hi damchhung atana i duh a nih si loh chuan laksak tawh suh. Hmangaihna hming hi zawng tichhe lul tawh lo teh. Hmeichhe tana virgin a hlu ang tho hian mipa tan pawh virgin hi a hlu asin! A vanram kai chaw zawk.

Facebooktwittergoogle_plusredditpinterestlinkedinmail

Tlawmngaihna – Dr. C.Lalrampana

KAMKEUNA: He thumal Isua zirtirte zat chiah hawrawp 12 infinkhawm, lamrik zawng pawha min hneh em emtu hi khawvel hnamdangte hian keini ang chiah hian thumal hlawm ffelfai thlapin an nei ve hauh lo niin a lang. A awmzia lah a ril em em a, hringnun chawmtu leh a taka midangte tana malsawmna thlentu a ni. Mirethei leh Hausa, Mipa leh Hmeichhia, naupang leh puitling, mihang leh mi ngo emaw chi leh kuang leh hnamdang a thliar hek lo. A mamawhtu apiangte tana englaipawha hmanraw tangkai a ni.

A AWMZIA: Tlawmngaihna hi khawvel hnamdangte hian a awmze tlukpui dik tak an nei ve meuh lo niin a lang. Grik tawng leh Latin emaw, Hebrai tawng pawhhin thumal hlawm fel fak chuan an nei bik kher lo mai thei. Kan hriat phak ve chin Saptawng leh Hindi-ah pawh a awm lem lo niin a lang.
Saptawng Dictionary kan hmuh phak ve chinah chuan Tlawmngaihna hi “(n) unselfishness, self sacrifice, self denial perseverance” tiin hrilfiah a ni a, a awmze dik tak a phawk fuh chiah loh bakah thumal hlawm fel tak, a tlukpui tur a awm lo niin a hriat theih.
Hindi pawhin Tlawmngaihna hi “Aatmabalidan emaw Aatmatyag” tiin an hrilhfiah ve mai a, heng an hrilhfiahna hi Mizotawng chuan “Mahni inpumpek emaw Mahni inphat” tihna a ni thei ang. Tlawmngaihna tih thumal phawk chiah chu an nei lo niin a ngaih theih. Chutiang bawkin Saptawnga hrilfiahna pawh khian a awmze dik tak chu a phawk chuang lo niin a lang.
Mizo hahthlak zinga kan unau tawng zerang dang hmangte pawh hian a tlukpui an nei chiah cuiang lo niin a lang. A bikin kan unau Mara-hote pawh hian an tawngah a tlukpui an neih chiah loh avangin an tawng kar lakah an lam dawn chuan a ngai ngaiin an hmang ve mai thin niin a lang.

A TOBUL: Tlawmngaihna hi khawi atanga kan neih nge tih I chhut ngai em? Vawiin thleng hian mi tam takin YMA chin chhuah emaw tiin an thusawinaah pawh an sawi fo thin. YMA chin chhuah ni lovin Mizo hnam awmtirh atanga Pathian thilthlawn pek, Mizo hnamziaa bet tlat zawk niin a ngaih theih.
YMA din hma daihin Mizote hian Tlawmngaihna leh a tawngkam hi kan nei tawh a, YMA chu a chhawmnungtu zawk a ni tih kan hriat fo a pawimawh. YMA chhawmnunna hian tun thlengin Tlawmngaihna hi Mizo zingah mawi takin a la parvultir zel a ni tih erawh kan pawm thiam a pawimawh hle.

A RAH CHHUAH: Tlawmngaihna hlu tak kan neih avang hian Mizo nih a nuam em em a, mangan lungngaih, chhiatni thatniahte a taka kan hman tangkai thin avangin phairama chengte ai chuan kan dinhmun a rualkhai zawk hle a, Hausa leh rethei inthlarna pawh a la nep hle tih a hriat theih a va lawmawm em!
Hei vang hian hnamdang kan zinga khawsa thinte paw’n nuam an ti a, kan zinga in leh lo ngial nghet taka benbel ve an chak hle thin. Vai in sa mistiri leh helper chenin nuam an ti em em a, khauphar thawven takin an thawveng a, khawlaia veivah nuam an ti hle tih a hriat theih.
Thih hnua kan insawngbawl Dan leh inchhawmdawlzui dante hi an hmuhin mak an tih rualin tha an ti a, an awt ve hle thin. Aizawl Veng pakhata mithi ina Australian sap pakhat kal ve chuan kan insawngbawl Dan a hmuhin a awt em em a, video camera-in a la char char a, “Kan ramah chin ve tura zirtir atan ka duh takzet a ni,” a ti hial a ni.
Vai Mistiri helper palhat pawhin, “Mizo nih hi a nuam awm mang e, Kristiana inleha Mizo nula nupuia neiha Mizorama inbelbela damchhunga awm ka châk,” a ti ngawih ngawih thin.
An ram lama chhutia a haw laiin a pum a na thut a, a boral zui ta a , a duhna puitlin hman lovin a awm ta a ni
Tlawmngaihna kan chhawm nun tlat avangin khitiang khawp khian hnamdangte paw’n kan zinga awm leh Mizo nih an chak phah a, min entawn a, min zir ru reng thin a ni tih kan hriat a pawimawh.

TUNA KAN DINHMUN: Khawvel hnamdang leh ramdangte neih ve loh Tlawmngaihna hlu tak nei mah ila tuna kan dinhmun erawh kan bihchian a ngai ta. Thenkhat chuan YMA hmalakna kher lo chuan mirethei chhumchhia chhawmdawl an tum ta lo niin a lang. Zonet, LPS cable news leh Media hrang hranga puan chhuah leh tihlan beisei chunga tlawmngaih chhuah chakte pawh kan tam ta niin a lang. Khawihmunah pawh tlawmngaihna hi kan lantir a ngai tih I hrenawn mawlh ang u. Aizawl khawpui veng thenkhatah hian mirethei leh hausa kan thliar tan hle em tihte kan inenlet a tul ta hle. Tlawmngaihna erawh chuan tunah a thliar ve si lo. A letleh beisseina avanga tlawmngaihnate hi Mizo tlawmngaihnain a tum a ni lo. Chutiangte chu Pharisaite pawhin an ti ve thin asin! Chuvangin, a letleh beisei chungin tu chungah mah tlawmngaihna kan lantir loh a tha hle ang.Tin, tlawmngaihna hian thleibik a nei tur a ni lova, midangte tiha dah tur a ni hek lo. A hnuleha hmingthan mawina beisei vangin tlawmngaih kan chhuah tur a ni hek lo. Tanpui ngaiten an mamawhna ang takin an mamawhna zawnah beisei nei miah lova kan tanpui thin hi Tlawmngaihna dik tak chu a ni e.

Facebooktwittergoogle_plusredditpinterestlinkedinmail

Login

Lost your password?