Monthly Archives: January 2016

Hero of the match chu Bengaluru FC Keeper Thuama; Osano goal Mikhual in chakpui hram

Nimin khan Aizawl chuan a tum khat nan India rama football inelna sang bera chhal I-League chu a thleng a, mual neitu Aizawl FC chuan inkhel thunun viau mahse, an hun tha neih te an hmang tangkai zo lo a, 2013 champion hi Curtis Omolo Osano a goal khat hmangin an chak.

Bengaluru FC hi tun season-a an I-League match pahniha an chak a, kaithar Aizawl FC hi minute 27-a Osano tauhluh hmang an hneh a, hei hi Federation Cup champion lai chakna atan a tawk a, I-League match Aizawla khelha chak hmasaber an ni.

Aizawl FC hian Mohun Bagan an hneh loh tuma an player pali ngawt chu thlakin Ricky Lallawmwma, Lalramchullova, Lalbiakhlua (Bikatea) leh David Lalrinmuana te chuan luh hmasak an chang a, hetihlai hian Ashley Westwood chuan an match hmasa zawka bul tantu zinga a tel Mizo tlangval Malsawmzuala chu substitude-ah a dah thung.

World Bank road lam atangin thenkhatin Rajiv Gandhi Stadium an pan a, Zampuimanga thlan lam atanga rawn kal pawh chhiar sen an ni lo, ITI lam atanga Mualpui road lama phei chu a tam ber an ni a, Republic leh Venghnuai kaltlangin Salem Veng atangin Mualpui Zero point tlan thleng an awm a, kal hma pawlin Stadium tual leh Mizoram State Sports Council Multipurpose Hall kiang velah lirthei an dah. Mualpui Zero point leh a chhevel hla tak thlengin lithei chi hrang hrang a ngir khup a, National Highway a motor lian tlan tur pawh an inkhel ban lai chuan an che hlei thei lo. VIP tan a VIP hleih theih bik lo a, traffic police lamin theihtawp an chhuah ngial pawhih Aizawl khawdai-ah traffic a jam, Aizawl Football Club-in India rama football inelna sang ber I-League match a thlen hmasakber tuma Mizo player panga ngawt kawltu Bengalutu FC a mikhual chuan ngaihhlut a hlawh hle.

Seat capacity mila ticket 6,000 an siamna match-ah khan mipui pungkhawm kha engzat tak nge kan ni ang tih sawi theih a ni lo a, Aizawl team-in ho ang reng taka Curtis Omolo Osanga a tih luh an sut zawh loh avanga an chak zawh tak loh avanga ui pawl an awm rualin Mizo nula leh tlangval Bengaluru FC scarf leh jersey nena lo tang em em tawk an bo lo, an unaute, an thiante leh an fate he India chhimlam khawpui club tan hian an khel ve miau alawm. Mizoram Premier League-ah theihtawp chhuahin club an inel a, club iner tak tak an nih ve miau avangin tam tak tan Aizawl FC tan ngawt theih a ni lo, Manchester City fans tan Europe-a chetha Manchester United tan ngawt theih a ni lo ang bawkin club thenkhat fans te tan Aizawl FC tan ngawtna chhan tur a awm bik lo a, mahse, he team-in I-League an khelh avanga kawng tinrenga hmasawnna kan neih erawh hriat tel a tha. India rama team tha pariat te Aizawl-a an rawn inkhel tur hi a ropui a, India player tha leh foreigner engemaw zat kan khelmuala an rawn chetla lai kan hmu thei hi a hlu. Mizoram hian I-League club neih belh phei sela chuan duhthusam a ni ngei ang.

Aizawla-a I-League hmasabera inkhelah hian mual neitu lam hian a tir atangin an nawr nghal a, ball pawh an chang tam zawk miau a, hun tha pawh an nei hmasa zawka a, Ruatthara ball cross chu Rino Anto chuan a lo clear a, minute 11 na lekah Aizawl lam hian hun tha an nei leh a, box chhunga David Lalrinmuana ball thlawh luh chu Eugenson Lyngdoh chuan tha takin a lo thunun leh a, minute nga hnu lekah Aizawl captain ball thlawh tha zet chu Begaluru goalkeeper Thuammawia chuan tha takin a lo nam per hram. Hemi hnu lawk hian mikhual team lamin hun tha an insiam a, dinglam sira Kumam Udanta Singh ball tlanpui chu box pawn hretah Chullova chuan a lo titlu a, Aizawl defender hian yellow card leh free-kick a chawi a, Keegan Pereira chuan hei hi rawn petin box chhunga Osano head turin a pet a, fuh takin a ni hian a lo tauhlut ta a ni.

Aizawl tana hun tha bera sawi theih chu minute 32-ah a thleng a, Lalbiakhlua corner pet tha tak chu Ruatthara chuan a lo tauh a, mahse, Bengaluru defence lam chuan eng-tin tin emaw lo khakin an vanneih a siamin ban a per hlauh a, an him ta hram. Aizawl lam hian half-time thleng hian 67% ball an chang a, a tum khat nana I-League khel team te hian an khingpui te hi hmun an siam lo a ni ber. Minute 60 velah Malsawmtluanga chuan tha takin goal zawnah a chhuih a, mahse, a pet hi nem per sak a ni a, hemi in a hrinchhuah atanga corner an hmuh pawh Aizawl lam hian hun tha an insiam thei ta chuang lo. Minute 20 ve la awmin Brandon a free-kick hmuh chu David-a chuan a chhuih a, mahse, hei hian Thuammawia tan harsatna a siam lo. hemi hnu hian Manuel Retamero chuan player pahnih a luh belh tir a, mahse, Valpuia leh Alber-a a te lutin awmzia a nei thui lo a, minute 480-ah CK Vineeth chuan mikhual tan thun theihna hun tha a nei a, mahse, a puitlin zo lo bik lo.

He inkhelah hian Bengaluru shot stopper Lalthuammawia Ralte chu Hero of the Match ah thlan a ni a, hei hian Aizawl FC lam hi an khel tha thawkhat a tih ngam a, mahse, hmatawng lamah an hriam tawk lo a tih theih a, midfielder lamin hmatawng lam ball tha an pe tam tawk thei lo a, box chhunga ball thlen turin ball inpekkual an mamawh rei a, leh lam goal thleng turin hun an mamawh hnem a, ball an inpek hnem ngaihtuahin hun tha erawh an insiam hlei thei lo a, ball thunun hrim hrimah erawh duhthu sam lo mah se, an tha thawkhat viau.

Facebooktwittergoogle_plusredditpinterestlinkedinmail

Champion lai lakah Aizawl FC tlawm

Barasat Stadium, Kolkata-ah 2015-16 I-League season atana match hmasaber chu nimin tlai khan khelh a ni a, hetah hian champion lai Mohun Bagan chuan a tum khatna atana he intihsiakna rawn hmachhawn Aizawl FC chu 3-1 in an hneh a, Mizoram team in an match hmasaberah Pritam Kotal own goal bak lawm tur an nei zo ta lo.

Kolkat-a a inkhelah hian Asia-a club upa ber Mohun Bagan hian a tir phat atangin an nawr nghal a, hun tha pawh an nei nghal, minute ruk a rawn inher chhuah meuh chuan Aizawl team-in si an phur der a, Trinidad & Tobago striker Cornell Glen chuan mual neitu hmahruaina goal a thun. He goal luh atanga minute sawm vel a ral hnuah mikhual team lamin lawm tur goal an nei a, Pritam Kotal chuan ball petchhuah a tumna lamah tisualin an lamah a ti lut a, si khat ve ve neiin Aizawl lamin an nih rual, mahse, Bagan lamin an hmahruaina an hloh rei lo a, minute 22 naah goal hmahruai thuntu Cornell Glen bawkin a thun leh. Inkhel hrim hrimah chungnung zawka han sawi tur an awm lo a, mahse, champion team an nihna Bagan lamin an lantir a, goal hmaah an hriam zawk. Minute 30 ral rualin an goal thumna an thun leh zui a, Balwant Singh chu tun tumah hian goal thutu a ni a, Aizawl defender ten he player tuan ran leh chakna hi an khan lo a ni ber.

Aizawl FC lamin darkar chanve chhungin goal thum an chhuah a, hemi hnu lamah hian an khelhdan phung thlak chhovin an dinhmun pawh an siamtha a, ball pawh an chang hnem zawk a, hun tha tak erawh team pahnih hian an insiam lo. Kinshuk Debnath chuan minute 51 naah Mariners hlauhthawnna a siam leh a, a ball petchhuah tum chu a pet sual a, he rawlthar ball pet hi an lamah a lut teuh hle. Darkar khat an inkhel hman tihah Balwant Singh chuan hun tha tak a nei a, mahse, Aizawl goalkeeper Pomrei Soram tan harsatna a siam lo a, minute 67 naah Glen bawkin hun tha a nei a, hat-trick siam thei dinhmuna a dinna hi a thutlukna fuh loh avangin a bawhpelh. He thil thlen hnu lawk hian Biak-thanga cross tha zet chu Liberian Jayran chuan ho ang reng takin a lo pet. Minute 20 vel a la awm tihin Mizoram team lamin free kick an hmu a, hei hi Malsawmtluanga chuan a pet a, wall a pet per rawn let chu ho lam takin entu mipui zawngin an petchhuak thei hram. Minute 79-ah Aizawl team lamin chance tha ang reng tak an hmu a, mahse, hei hi net sirah an pet thei hram a, an hun tha an neih an bawhpelh a tih theih ang.

He inkhelah hian hun tawp lamah Mohun Bagan hi an dinhmun a chhe zawk a tih ngam a, chutih laiin second division champion te hian an hun tha neih an hmang tangkai zo lo a, a hmawr bawk an harsat rual-in an hriam tawk lo a tih theih bawk. Champion lai tan hian point thum hmuh hi a hlu a, I-League title an kawl mek humhim turin han chhuan tur em em an nei hran bik lo. Hmel thar Aizawl tan bul tanna tha tak a ni lo chungin chhia han tih tur a ni hran lo a, tawnhriat an neih loh erawh a pawi a tih theih a, insiam that chu an mamawh hle ang. Mohun Bagan hian an match leh hmasaberah Salgoacar chu an lo mikhual ang a, Aizawl FC hian Bengaluru FC chu Rajiv Gandhi Stadium, Mualpui Aizawl-ah Jan. 16 hian an lo mikhual ve thung ang.

Facebooktwittergoogle_plusredditpinterestlinkedinmail

Tinreng feature : TUI

Tui tello in kan nung thei lo a, kan nitin nunah tui hian hmun sang tak a chang a. Thal lai phei chuan tui kan mamawhna a san rualin tui a vanga PHE department-in mipuite hnena tui an sem chu kan khawp kham lo a mimal tui zuarte kan mamawhna a sang hle thin a ni.

Aizawl khawpui chhungah hian Tui hmanga eizawng mi 60 ai tam an awm nia an hriat thu PHE department-a thawktute chuan Zalen an hrilh a. Tui zuar tute hian mipui hnena tui thianghlim an zawrh theih nan tum 2 lai an lo ko khawm tawh nghe nghe a ni.

Tui hmanga eizawngte hian thal lai chuan pek sên loh khawp dawrtu an neih thin thu Zalen palai an hrilh a. Tui man erawh fur leh thal ah a danglam thin thu an sawi a. An tui zawrhte chu a thianghlim tawk tura an ngaih thu sawi hlawmin anmahni dawr tute hnen atangin an tui a thianghlim loh avanga complaint an la dawn ngai loh hlawm thu an sawi.

Mipui hnenah tui an zawrh te hi pick-up leh 407 truck hmang ten an pe thin a. Tui zuarte hian Aizawl leh a chhehvel remchang ami tui hi an la tlangpui thin a, thenkhat chu anmahni tui a nih rual in thenkhat chuan tui nei hnen atangin an lei chhawng thin thung a ni.

PHE Department-a thawktute chuan Aizawl khawpui chhunga tui zuartute tui chu a tlangpuiin a thianghlim ani an ti a. Hetih rual hian ram palai lenga tui chu damdawi hmanga tih thianghlim a nih loh chuan natna a pai theih thin thu sawiin tui zuarte chu damdawi hmanga an tui zawrhte ti thianghlim tura an duh leh an chah thin thu an sawi.
Mipui ten tui thianghlim ngei an in theih nan hian tui zuarte hian an tui zawrh chu PHE Laboratory ah test tir nge thin se an duh thu PHE deppartment-a thawktute chuan Zalen palai an hrilh a. Ram pa laileng tui chu tih chhuanso emaw damdawi hmanga tih thianghlim loh a nih chuan tui in tu mihringin natna a kai theih thin avangin tui zuarte chu an tui zawrhah fimkhur se an duh thu an sawi.

PHE Department chuan kum liamta 2015 chhunga khan tuikhur,lei hnuai tui leh PHE tui lak atangin Sample 14000 chuang tui an endika heng zingah hian tui thianghlim lo hmuh an nei lo a ni. Department-a tui endik hna thawktute chuan mizoram tui chu a thianghlim tlangpui thu Zalen hrilhin, hetih rual hian tih thianghlim hmasak loh a tui in ngawt lo turin mipui an chah thu an sawi.

Facebooktwittergoogle_plusredditpinterestlinkedinmail

FEBRUARY 2016 ATANGIN food security hman tan dawn

Aizawl: Mipui nawlpuiin man tlawm zawka buhfai an lei theihna tur Food Security Act chu February 2016 atangin Mizoram ah hman tan a ni dawn ta a, FCS&CA Department pawh dan thar hmang tur hian a inpeih tawh.

Zalen palaiin Food, Civil Sipplies & Consumer Affairs Department hotute hnen atanga thu a dawn danin Food Security Act atana tih tur tul te chu tihzawh thawkhat a ni tawh a, February thla atanga kalpui tan phawt a ni ang a, thil tuldang chu la tihbelh zel an tum tih an sawi. FCS&CA department hotute chuan FSA a muan chhan chu Local Council lam an inpeih deuh vang niin an sawi a, tun dinhmun ah chuan enrollment pawh peihfel thawkhat a ni tawh tih an sawi bawk.

Food Security Act hi Mizoram mihring 7,06,296 in an chhawr tangkai thei dawn a, heng zinga mi 1,28,114 (chhungkaw 26,100) chu AAY chhungkua an ni a, a dang mi 5,78,182 chu Priority Household (List ‘B’) an ni. AAY chhungkua te hian thla khatah buhfai kgs 35 chu Kg ah Rs.3 in an lei thei ang a, Priority Household ah hian chhungkaw member pakhatin thla khat quota Kgs 8 zinga kgs5 chu Rs.3 in an lei ang a, a bak kgs.3 chu rate pangngai Rs.15 in an lei ang. FSA hian thing tlang mipui 81.88% leh khawpui a cheng 48.60% a huam dawn a ni.

Tun dinhmun ah Mizoram ah mihring Nuai 12 vel awm mek anga chhut a ni a, National Food Security Act, 2013 hnuaia Central sawrkarin Mizoram hnena thla tin a buhfai mantlawma a pek theih zat chu quintal 6,60,000 a ni a, buhfai phurhna man tur atan quintal khat ah Rs 75/- zel central in a tum dawn bakah Retailer margin atan quintal khatah Rs 143/- a tum bawk dawn a ni.

Facebooktwittergoogle_plusredditpinterestlinkedinmail

Serthlum thar a tam

Aizawl: Mizoram khawchhak lamah kumdang zawng aiin serthlum a thar tam a, kut hnathawktu mi tam takin an hlawkpui tawh. Zalen thudawn danin Biate, Khawlailung, N.Vanlaiphai, Leng, E.Lungdar, Mualcheng bakah Serchhip bul Sailam khua te chuan kumin hian serthlum an thar tha hle a. Heng an thei tharchhuahte hi a hmunah hnamdang sumdawng leh Mizo kharchhawng ten an leisak thin a, sum tam tak an hmju tawh a ni.

Zalen palaiin Leng khuaa serthlum chingtu pakhat a kawmnaah kumdang aiin kumin 2015-16 ah an thar tam zawk tih a sawi a. Nikum lama sethlum atanga Rs.70,000/- leichhuakte chuan kumin ah Rs. nuai 4 te an lei pha hial niin a sawi. An serthlum chu hnamdang (vai) sumdawng pawhin an lei tho nia sawiin mahse Mizo sumdawng ten an ngam huai zawk avangin Mizo hovin an lei tam zawk niin a sawi bawk.

Tennis Court thlanga kharchhawng a eizawng pakhat chuan an serthlumz awrh te chu an riahchilh mai thin niin Zalen a hrilh a. An zawrhna hmunah hian serthlum kharchhawng leh zuara eizawng mi 20 vel an awm nia a hriat thu a sawi bawk a. An thilzawrh chu mipuiten an duhin hralh a kal hle tih a sawi bawk.

Zalen thudawn danin tuna serthlum tharchhuah te hi kum 2004 bawr vela phun tan an ni tlangpui a, serthlum hi phun atanga kum 10 hnu velah a rah tan a, kum 15 vel hi a vanglai nia hriat a ni. Kharchhawng hian a kung nen an lei tawp mai a, hlawhfa ruaiin an lo leh thin a ni. Kumin ah hian hmun thenkhat ah serthlum hi a ‘tam’ a, mithiamte chuan tui a hmuh thatloh vang niin an sawi.

Facebooktwittergoogle_plusredditpinterestlinkedinmail

COTPA dan bawhchhia 5811 man tawh

Aizawl: Vaihlo khuahkhirhna dan COTPA hnuaiah kum 2008 atanga December 2015 inkar chhung khan dan bawhchhiah mi 5811 man an ni a, dan bawhchhia man te atanga pawisa chawi tling khawm hi Rs. 27,00,447 a tling a ni.

Zirtawpni kalta khan Mizoram State Tobacco Control Society huaihawtin an thawhpui pawlte nen I&PR Conference hall ah kumthar thingpui inhona neih a ni a. Inhlantharna hun kaihruaitu Hospital and Medical Education, Director Dr. Lalbiakkima chuan MSTCS te hmalakna chu fakawm a tih thu sawiin, “Mizo mipui nawlpui te hian meizuk that loh zia hi kan hre tawh a. Vaihlo zuk leh hmuam hian kan hriselna mai bakah kan economy thlenga a nghawng avangin a that lohna kan tu leh fate thlenga zirtir chhunzawm zel hi kan tih tur a ni,” a ti.

MSTCS a State Nodal Officer Dr.Jane R.Ralte chuan an hmalak tawhna leh hmachhawpte sawiin June 2016 atangin Global Adult Tobacco Survey neih leh tum a nih thu te, Cigarette mal (loose) a hralh khap anih thu, zirlai leh mipui nawlpui hnena zuk leh hmuam that lohzia inzirtir uar zel an tum thute a sawi a ni.

Indian Society on Tobacco & Health, Mizoram Chapter President Lal Riliani chuan vaihlo chu World Health Organisation (WHO) pawhin drug chikhat ang hialin a puang tawh a ni tiin tun aia nasa zawkin Kohhran hoten do se a duh thu a sawi bawk.

Facebooktwittergoogle_plusredditpinterestlinkedinmail

Mipuiin Cong-ah rinna an nghat tawh lo – Zorama

Aizawl: MNF President Zoramthanga chuan, “MLA By Election-a hnehna khuangpui an vuak nasat lai taka AMC ah sawrkarna kan chang leh thei hi mipuiin Congress ah rinna an nghah tawh lohzia tilangtu a ni,” a ti.

Nimin khan Zemabawka MNF party zawm tharte a lawmluhna hunah he thu hi sawiin MNF President chuan, “Congress party hian ‘rorelna dik chu luipui angin luang se’ an tih laiin,zu an zuar mup mup a, vbc sang tel an ba a, development pakhat mah a awm lo a, mipui kan rethei em em a, hei hi rorelna dik luipui anga luang chu a ni theilo a ni,” a ti bawk.

Thusawitu dang AMC Mayor PC Lalhmingthanga chuan, “Mipuiin MNF bak belh tur an hre tawh lo a. Sum leh pai tawktarha inthlanna a tlin ngawt hi kan tum a ni ve lo a, ram hmasawnna tura ataka hnathawh hi kan tum a ni. Kum 2018 inthlanpuiah MNF kan sawrkar chuan vai rilru pu a,vai ai pawha phakara politics khelh hi a bo tawh ang a, Mizo rilru dik tak puin ro kan rel tawh dawn a ni,” a ti bawk.

Facebooktwittergoogle_plusredditpinterestlinkedinmail

ACH Poor Fund-ah Rs. Nuai 8 chuang a lut

Aizawl: Aizawl Civil Hospital hotute hnen atanga Zalen thudawn danin kum liamta 2015 chhung khan Poor Fund-ah Rs. 8,15,950 chuang hmuh a ni.

Civil Hospital-a thawktute chuan Poor Fund atanga an sum hmuhte chu damlo harsa damdawi leina tur nei lo te hnenah pek a nih thin thu Zalen palai an hrilh a. Mi thahnemngai ten sum fai angin tanpui ngun viau mahse damlo harsa tak tak an tam avangin Poor Fund atanga an sum hmuh chu an khap kham lo hle thu an sawi.

Poor Fund atanga an sum hmuhte chu damlo hnenah pawisa fai-a an pek loh thin thu Hospital hotute chuan an sawi a. Damlo tanpui ngaite chu damdawi anga zawnga pek hram an duh thin an sawi. Poor Fund atanga damlo tanpui ngaite chuan tanpuina an dawn zat in ang tlang dawng se an duh angin Rs.2500 aia tam an pek chhuah ngai loh thu an sawi.
ACH medical superintendent Dr Rosangluaia chuan Poor Fund sem chhuah chu Nursing kutah an dah thin thu sawiin, a dawng tur thlan kawngah pawh kum dang aia uluk zawk an tum zel thu sawiin Managment pawh medical superintendent hona hnuaiah din chhoh a nih thu a sawi.

Dr Rosangluaia chuan Poor Fund chu hunpui ah a pung thin thu sawiin, nikum 2015 December thla khan Poor Fund atangin Rs. 404250 an hmuh thu a sawi. Civil Hospital chu mi lian atanga a te ber ten an pan khawm a nih avangin tanpui ngai harsa tak tak damlo an neih thin thu sawiin, Poor Fund-a an pek bakah thawktu tlawmngai ten damdawi man an tum sak thin thu a sawi.

ACH medical superintendent chuan Poor Fund pe thinte chu mimal an tam ber thu sawiin heng bakah hian pawl leh thianho anga pe an awm thin thu Zalen a hrilh a. Thenkhat chuan vawikhat mai pe lo in thla tina pe te an awm thin thu sawiin, kum liamta 2015 chhung khan mimal thenkhat chuan vawi 15 lai Poor Fund ah sum an chhun luh thu a sawi a. Sum fai anga pe an tam ber rualin damdawiin mamawh hmanrua anga pe te pawh an thin thu a sawi.

Facebooktwittergoogle_plusredditpinterestlinkedinmail

2015- ah ACH ah unit 12686

Aizawl: Mizoramah a thlawna thisen pek (voluntary blood donation) a that chhoh viau laiin thisen sawngbawlna man lak anih hnuah a thlawna thisen pek hi a tlahniam hret a, mahse mipui ten thil awmdan dik tak an hriat hnuah voluntary hi a pung leh. Nikum 2015 chhung khan Aizawl Civil Hospital chuan thisen unit 12686 an la.

Zalen thudawn danin Mizoram sawrkarin nikum laihawl vel atanga thisen sawngbawlna man unit 1 zelah Rs.550 a lak chu mi thenkhat ten thisen man nia an ngaih avangin mipui ten a thlawna thisen pek (volunary) an uar thin chu hun engemaw chen a khaihlak deuh a. Mahse thisen man ni lova a sawngbawlna man chauh a ni tih mipuiin an hriat hnuah a thlawna thisen pe hi an pung chho leh tawh a, December 2015 phei kha chuan Civil Hospital in thisen unit 1249 an lak zinga 1225 chu voluntary a ni a, hei hi thisen an lak zawng zawng atanga chhutin 98% a tling pha hial a ni. Nikum chhung khan Aizawl Civil Hospital in thisen unit 12686 an lak zinga 9355 chu mi tlawmngaite pek a ni a, a dang unit 3331 hi rulh leh ngai (replacement) a pek a ni a, voluntary a thisen pek hi 74% a tling a ni. Nikum chhung vek khan Civil Hospital Blood Bank hian private hospital hnenah unit 6902 an pechhuak a, hei hi an dawn atanga 55% a tling a, thla tin unit 575 pechhuak ang an ni.

Aizawl Civil Hospital Blood Bank thawktute chuan a thlawna thisen pe an tam avangin 100% voluntary an target hman niin an sawi a, mahse thisen sawngbawlna man lak anih atangin thisen pe an tlahniam leh a, tanlak a ngai hle niin an sawi.

Blood Bank thawk tute chuan, “Engemaw rikrum thil lirnghing, accident leh chhiatna liantham thleng thut thei reng anih avangin englai pawha thisen unit 200 tal awm/nei reng tura tih kan ni a, mahse mamawh an awm reng avang leh private hospital ah pekchhuah a ngaih ve reng avangin kan indaihlo hle a. Tlawmngaia thisen pe thei an awm chuan lawm takin kan lo dawng thei reng a ni,” an ti.

Blood Bank thawktute chuan tlawmngai pawl YMA leh Kohhran thalai ten thisen pek calendar an la siamloh avangin tunlai hian thisen an nei tlem niin an sawi bawk.

Facebooktwittergoogle_plusredditpinterestlinkedinmail

Plan sawiho

Planning Secretary Vanlalramsanga hovin Financial Year kal mek March 2016 thleng atana Plan sum ruahmante thlir nawnna neih a ni a. Sawrkar department 26 hotute nen sum hman dan, indaih lohna leh phuhruk dan an sawi ho.

Facebooktwittergoogle_plusredditpinterestlinkedinmail

Login

Lost your password?