Monthly Archives: February 2016

Tinreng feature: Sawrkar hnathawk leh hun

Ram hruaitute ten hun hlut zia an sawi fo a, ram mipuite chu an hun neih hmang tha tur leh hmang tangkai turin an chah fo thin. Sawrkar hnathawkte phei chu mipui rawngbawl tura hlawh neia chhawr an nih angin an hun tam tak chu sawrkar leh mipui tana hmang tura beisei an niin fuih an ni thin.

Hun vawng dik tura ngen leh fuihna tawk fo thin sawrkar hnathawk tam tak hian pisa kai hun vawng dik an tam lo hle a. Zalen palai in Aizawl khawpui chhunga Sawrkar pisa thenkhat a tlawh kual ah office staff dar 9-a thleng hman an awm mang lo a, thenkhat phei chu dar 10 hnu lama pisa thleng chauh te pawh hmuh tur an awm a. Department thenkhatah erawh chuan dar 9:30 ah chuan mipui tana dawr theihin mipui rawngbawl tura sawrkar chhiah hlawhte hi an thu tlangpui thung. Heti hi a nih lai hian Department hotu thenkhat Zalen palai in a kawm kual te erawh chuan pisa kai hun an vawng dik tlangpui thin thu an sawi thung a. Land & Revenue Settlement department hotute thenkhat te chuan hun vawn dik kawngah an strict thu sawiin,’pisa tan hun bi tuka atanga darkar chanve hnuah Attendance Register dah bo thin a ni a, kal tlai thang te chu casual leave paih sak thin a ni’ an ti.

Pisa tan hun vawn dik kawngah hian General Administration Department (GAD) chuan sawrkar department/office tina hotute chu an department/office-ah surprise check nei tura hriattirna a chhuah thin a, department thenkhat hotute’n an zawm tha thin hle thin niin Zalen thudawnna chuan a sawi a. Chutihrual chuan GAD atanga hriattirna chhuah a nih loh chuan department hotute pawh an in thlahdah chhunzawm leh mai thin a ni thu kan thudawnna chuan a sawi.

Sawrkar department pisa tan hun vawn dik chungchangah hian department thenkhat chuan khauh taka kalpuiin kum khat ah tum 3 dawn te surprise check an nei thin a. Revenue department hotute chuan suprise check an neih thin thu Zalen palai hrilhin, kal tlai te chu an zilh bakah thenkhat chu casual leave paih sak hial an lo neih thin thu an sawi.
Sawrkar hnathawkte chu pisa tan hun vawng dik tura beisei an nih bakah mipui rawngbawltu an nih angin office dawrtu mipui te chu hawihawm taka lo dawr thin tura beisei an ni a. Sawrkar deparment thenkhat hotute Zalen palai in a kawm kual te chuan hawihawmna chungchangah zirtirna an neih fo thin thu an sawi deuh vek a, hetih rual hian hotute thu zawm hlei thei lo a hawihawm lo leh tawngkam mawi lo tak hmanga vin em em mai thin an awm thu an sawi.

Zalen palaiin Sawrkar pisa thenkhat a tlawh kual lai hian mipui dawrtu lo vin hlak hlak tu sawrkar hnathawk a hmu nual a, office dawrtu thenkhat Zalen palai in a kawm kualte chuan hawihawmna kawngah sawrkar hnathawkte chu zirtir an ngaih thu an sawi hlawm a. Mipui rawngbawltu an ni tih an in hriat tawk loh thu an sawi a ni.

Sawrkar office 20 chuang Zalen palai in a fan kualna ah hian pisa kai hun chhung ni si meeting emaw hna tul avanga buai ni lo dawr tur awm lo leng kual ta mai mai a hmu fo a. Department hotu thenkhat phei chu an thiante room-a leng kual mipui mamawhtu tana dawr theiha awm lo tei kual mai mai a hmu nual bawk a ni.

Facebooktwittergoogle_plusredditpinterestlinkedinmail

Tuichawngchhuah P/S a kâng: MSU hruaitu mante chhuah

Aizawl: Zirtawpni kalta tlai dar 3 vel khan Tuichawngchhuah Primary School chu a kang a. Police ten rinhlelh thuah MSU President PC Lalrinhlua leh hruaitu dang 8 an man a, Lunglei district jail ah dahluh nghal an niin nimin tlai khan chhuah leh an ni.

Tuichawngchhuah khua hi dan lova din niin MSU chuan an sawi a, December 2015 ral hma ngeia rauhsan turin khaw mipuite chu MSU te hian an lo hrilh tawh a. Mahse an la chhuahsan loh avangin enfiah tur hian MSU Gen. Hqrs. hruaitu PC Lalrinhlua, President; J.Lalmuanzuala, Secretary i/c Games & Sports; John A. Lalnghakzuala, Secretary i/c Higher Education; B.Lalkhawngaihzuala Secretary i/c.Information; RB Lalmalsawma, EM te bakah MSU Regional Hqrs. Lunglei atangin Lalrinngheta Sailo, Vice President; Lalfamkima, Asst. Secretary; Johan PC Lalruatdika, Fin.Secretary leh D.Engmawia Sailo, Secretary i/c Establishment te chu Zirtawpni khan an kal a, an haw lam zan dar 11 velah Lunglei an thlen dawnin Police ten an lo man a ni.

Nimin khan Central YMA Office ah YMA, MUP, MZP, MHIP, MSU te telna Joint NGO Coordination chu an thukhawm nghal a, thuchhuah siamin dan lova Chakma khawdin zirchiang tura kal, MSU hruaitute chhan leh vang awm lova Police ten an man chu thalo an tih thu an sawi a, an mi mante chu thu delhkilh awm lova chhuah vat turin sawrkar an phut a. Nimin vek khan Chief Minister hmuin thil awmdan an sawipui nghal.

MSU chuan thuchhuah siamin Tuichawngchhuah Primary School chu MSU hruaitute talawhtir tum vanga Chakma te hal ni ngeiah an ngai tih an sawi a, MSU hruaitu ten dar 2 velah khua an chhuahsan nia sawiin Primary School kang pawh hi MSU hruaitu ten khua an chhuahsan hnu dar 3 vela thleng niin an sawi bawk.

Facebooktwittergoogle_plusredditpinterestlinkedinmail

Nuai 10.85 senga sak Bungtlang West Community Hall hawng

Aizawl: Rural Development sum nuai 10.85 senga sak Bungtlang West community hall chu Zirtawpni khan bialtu MLA Chalrosanga Ralte in a hawng.

Hawnna inkhawm Bungtlang West VCP Sanghmingliana kaihhruaiah thu sawiin Chalrosanga chuan Hall thar chu neitu rilru pu a dimdawi taka hmang turin khawtlang mipuite a chah. Khua leh tui tha ni turin Bungtlang mipuite chahin, “Sawrkar atanga a thlawna thil dawn tur ringawt ngaihtuah lovin sawrkar tan enge ka tih ve theih” tia inzawt fo turin a chah bawk.

Bungtlang W community hall hawn tak hi a dung ft 45 niin a vang ft 24 a ni a, stage a phah tur red carpet pawh chah thlen tawh a ni.

Facebooktwittergoogle_plusredditpinterestlinkedinmail

MNF-in Independence Kum 50-na an lawm dawn

Aizawl: Mizo National Front (MNF) Party chuan March ni 1,2016 atanga March ni 1,2017 inkar chhung hian Mizoram independence puan kum 50-na ‘Golden Jubilee’ an lawm dawn.

Golden jubilee lawm tur chungchangah hian nimin khan khan Aizawl Press Club ah MNF hruaitute chuan chanchinbumite an kawm a, MNF Senior Vice President Tawnluia chuan, “Mizoten Politics-a kan tih theih sang ber zalenna suala hruaitu hmasa ten bul an lo tanna hi hre reng a, thangthar zelah Mizo Nationalism chi a lo intuh ngheh zel theih nan leh Mizo hnahthlak then hrana awm tawhte kan insuihkhawm leh theihna atan he ni hi urhsun taka lawm ni se tiin MNF Party chuan a rel a ni,” a ti a. Kum 20 zet zalenna suala an nunna hlantu Hnam Martarte pualin Remna Run Tlang, Luangmual ah Hnam Martarte thlanmual siam anih thu leh hming 1570 zet tarlan anih thu a sawi a. MNF Sr.Vice President chuan, ” MNF in Independence puanga hnam zalenna nei tura an thawhna hi hnam movement dik tak, Mizo hnahthlak zawng zawng huap vek tu a ni a. He Movement avang hian khawvel leh India ngei pawhin Mizote hi hnam angin min hriat phah a ni,” a ti bawk.

Ruahman dan chuan naktuk Thawhtanni hian Mizoram Independence puan kum 50 hmanna atan two wheeler rally neih a ni dawn a. A lawmna pui ber chu March ni 1,2016 hian Vanapa hall-ah neih a ni ang a, MNF President Zoramthanga bakah zalenna puan laia hming ziaktu ten thu an sawi ang.

Facebooktwittergoogle_plusredditpinterestlinkedinmail

State dang aiin Mizoramah chhiah chawi a tlem

Aizawl: Transport thawktute chuan February ni 8,2016 atanga rate thar hmanga Lifetime Tax an lak chu state dangte aiin a tlem niin an sawi.

Zalen palai Transport Department thawktute hnen atanga thu a dawn danin Transport Development Council in motor hrang hrang ah lifetime tax a tlem berah 6% la tura a hriattir angin hma an la mai niin an sawi a. State thenkhat ah chuan 8%,10% te an lak laiin Mizoramah chuan a hniam ber 6% in an la niin an sawi.

Transport Secretary Hrangtawna chuan tax hi a hma chuan lirthei engine chak dan hisapin an la mai thin tih sawiin mahse engine chak dan inang rau rau ah pawh a man a inthlauh em avangin tunah chuan a man atanga chhutin tax hi an la tawh dawn niin a sawi a. “Mi thenkhat ten chhiah la sang lutuka min sawi hi an hriatchian loh vang a ni a, tuna lifetime tax kan pek mek atanga chhutin rate thar hi 1.5% vel chauhin a pung a ni,” a ti a. Rate thar chu lifetime tax la pelo te tan chauh a ni tiin tax lo pe tawh te chu an ting nawn dawn lo tih a sawi bawk. Tax hlui leh thar inthlauh dan sawiin Transport Secretary chuan Scooty-ah a hmaa Rs. 3000 chawina thin ah Rs. 3300, Maruti ah Rs. 11,250 atangin 18,000 ah, Taxi ah Rs. 12,750 atangin rs. 18,000 leh Maxicab ah Rs. 37,500 atangin Rs. 42,000 te a ni dawn niin a sawi bawk.

Facebooktwittergoogle_plusredditpinterestlinkedinmail

FSA Ration Card siam mek

Aizawl: Food Security Act a hman tur Digitalise Ration card siam hna chu FCS&CA Department in ngawrh takin an thawk mek a, February thla chhung ngeia zawh hman an beisei.

Food, Civil Supply & Consumer Affairs Department thawktu ten Zalen an hrilh danin Ration card hi Internet nen thlunzawma siam hna thawh a ngaih avangin zan lamah pawh chawl lovin an thawk tih an sawi a. March 2016 atanga Food Security Act hman tan tum anih avangin siamzawh hman ngei tumin tan an la niin an sawi. Ration card print zo hman ta lo se FSA hman theih a ni dawn lo em ni tia Zalen zawhna chhangin FCS&CA thawktute chuan, ‘Register ah chhinchhiah a nih vek tawh avangin harsatna a awm dawn lo a, nakinah an Ration card ah an chhinchhiah leh mai dawn’ niin an sawi a. FSA atan March thla mamawh tur pawh FCI lamah an siam tawh niin an sawi bawk.

Facebooktwittergoogle_plusredditpinterestlinkedinmail

National Science Day hman a ni

Aizawl: Nimin khan Mizoram Science, Technology & Innovation Council (MISTIC) bul tumin Vanapa Hall-ah National Science Day 2016 lawmna neih a ni a. Planning Minister Lalsawta’n hmanpuiin, hemi puala tualchhung thil siam chhuah thar pho chhuahna chu a hawng nghal.

Khuallian chuan Mizopa siam ngei khawl thar tha leh tangkai tak tak tur pho chhuahte chuan Mizopa thluakin phak loh a neih bik lohzia a lan chiantir hle a ni tiin, a siamtute leh mi thiamte tan rualnaa chu aia changkang leh ropui zawk chu siam chhuah a la nih theih tur thu a sawi. Ni tin khawsak kawng eng kimah awlsam, rang leh hlawk zawka hna thawh nana Science chhawr tangkai thiam a pawimawhzia sawiin, Planning Minister chuan chuti lama thiamna neite chu an theihna leh thiamnate ram tana tangkai taka hmang turin a chah a. Hmasawnna kawnga pen thum pen turah hmanrua leh khawl tangkai siam chhuah chu pen khatna a ni tiin, a chhawr tangkai thei tur mipuite hnena thiamna hlan chhawn a, chuta tanga an thil siam chhuahte deh ralna tur lam buatsaih chu ke pen lehna tur a ni, a ti bawk.
Planning Secretary Dr C.Vanlalramsanga chuan Science leh Technology chuan thingtlang khaw kilkhawr ber thlenga a nghawng vek avangin a pawimawhzia hriat a, inzirtir uar deuh deuh a tul a ni, a ti.

Chief Scientific Officer Dr RK Lallianthanga chuan National Science Day hman chhan a sawi fiah a. India scientist Sir CV Raman-a’n February ni 28, 1928-a Raman effect a hmuh chhuah ni hriat reng nan, kum 1987 atang khan February 28 hi National Science Day-ah hman thin a ni tiin, kumin erawh chuan Chawlhni a nih avangin February 27 (Inrinni)-ah hman a ni, a ti a. Science & Technology Department chuan thil siam chhuah lama thiamna nei leh a tui mite tihphur a, dawm kan zel a tum thu sawiin, thil thar siam chhuah neitu nihna hauhtute chhinchhiah hna (patent filing) pawh an kalpui mek thu a sawi.

National Science Day 2016 thupui (theme)-ah hian “Make in India : Science & Technology Driven Innovation” tih hman a ni.

Facebooktwittergoogle_plusredditpinterestlinkedinmail

Hmeichhe kutthlak duh loh lantirna hun hmang

Aizawl: All Mizoram Women Federation, People United in Music with a Purpose, Centre for Peace and Development leh Mizoram State Legal Services Authority buatsaihin nimin khan hmeichhe chunga hleilenna leh kutthlak duh lohna lantirna leh ti lo tura intiamkamna hmingziah (Signature Campaign) Millenium Centre tualzawlah neih a ni.

He ni hmanna a thu sawitu All Mizoram Womens Federation President Dr. Jane R Ralte chuan khawvela hmeichhe pathum zinga 1 zelin tihduhdah an tawk niin a sawi a. Kutthlak duhloh lantir nan Eve Ensler hmalakna in hmeichhe kutthlak duhloh lantirna ‘One billion rising’ tan a ni tiin ram 200 chuangah hman a ni tih a sawi. Dr.Jane Ralte chuan CID report atanga a lan danin kum 2015 khan hmeichhe chunga hleilenna hi Mizoram ah case 303 ziahluh a ni a, January 2016 chhungin hmeichhe chunga hleilenna case 24 ziahluh a ni a, heng zinga 5 chu pawngsual case a ni tih a sawi.

Facebooktwittergoogle_plusredditpinterestlinkedinmail

Power & Electricity hotuten tlawh

Aizawl: Zirtawpni khan Power & Electricity Secretary Rajiv Kumar Gupta leh Engineer-in-Chief Lalnghinglova Pachuau te chuan 132kV Sub-station & Mini Hydel project, Khawiva bakah Kawmzawl-a bun mek 33kV Sub-station leh Pukpui-a 5kW Wind Solar Hybrid Sytem hmunte an tlawh.

Mizoram chhimlam zawng zawng kawlphetha pekchhuahna hmun 132kV Sub-Station, Khawiva hi November ni 4, 1994 khan commissioned a ni a, heta tang hian Chawnhnu Sub-station, Lungsen Sub-station, Theiriat Sub-station, Lunglei Sub-station leh PHE tuikhawlna/pekchhuahna hmun hrang hrangah kawlphetha thawnchhuah a ni ve thung a ni. Khawiva hmunah hian Mini Hydel Project (3x350kW) khuar a ni bawk a; hei hi December ni 8, 1988 khan commissioned a ni tawh a, 8.5MU a pechhuak ve thei a ni. Chhimlamah kawlphetha duhkhawplohna a sang zel avangin sawrkarin rem a tih angin tun hnai khan Kawmzawl hmunah 33kV Sub-station bun mek a ni bawk a, commissioned thuai thei turin hna chak taka kalpui a nih mek thu P&E hotute chuan an sawi.

ZEDA leh P&E tangkawpin Mizoram hmun hrang hrangah wind/solar energy project engemawzat kalpui mek a ni a, chumi zinga mi pakhat 5kW Wind Solar Hybrid Sytem, Pukpui chu an tlawh nghal a. He project hmang hian zirna sikul leh street light engemawzat tihen a ni a, hlawhtling taka kalpui mek a nih chu lawmawm an tih thu officials ten an sawi bawk.

Facebooktwittergoogle_plusredditpinterestlinkedinmail

Kut hman nan thla khat hlawh pe

Aizawl: Kolasib DC H. Lalengmawia leh SP C. Lalzahngoa te chuan Kolasib a Chapchar Kut hman nan an thla khat hlawh an pe.

Thudawn danin Kolasib a Chapchar Kut hman nan hian sawrkar chuan nuai khat a pe a, mahse a tlem tham deuh avangin Officer pahnih hian an thawh a ni. Chapchar Kut 2016 hi Kolasib Tumpui Field a hman a ni dawn a, Kut Pa atan Horticulture Minister P.C. Lalthanliana chu beisei a ni a. Cachar, Hailakandi leh Karimganj Districta DC, SP leh DFO te, CIJW School Vairengte a sipai hotulu te bakah NEEPCO, Railways, ONGC leh PSU dangte aiawh leh The Telegraph leh National media lam thawk midangte sawm tum a ni bawk. Chapchar Kut 2016 pual hian ZOOM Kolasib leh MJA Kolasib te chuan Photo Exhibition an buatsaih dawn a ni.

Facebooktwittergoogle_plusredditpinterestlinkedinmail

Login

Lost your password?