Monthly Archives: February 2016

Thisen pe

Nimin khan Mission Vengthlang Branch KTP in Synod Hospital-ah thisen unit 40 an pe a, Tuikhuahtlang branch KTP-in Civil Hospital tan unit 38 leh Temple taxi stand welfare-in Civil Hospital-ah unit 12 an pe bawk.

Facebooktwittergoogle_plusredditpinterestlinkedinmail

Pension

Naktip February thla tawp hian Mizoram sawrkar hnathawk lian engemaw zat chu pension in an chhuak dawn a, pension tur zingah hian Principal Secretary PC Lallawmsanga, Transport Secretary Hrangtawna, Sericulture Secretary Lalsangpuii, PWD Secretary Er Lianchungnunga leh Principal Adviser Planning Ngunlala Chinzah te an tel a ni.

Facebooktwittergoogle_plusredditpinterestlinkedinmail

Thu dawn

Naktuk chawhnu dar 1 hian Committee on Local Fund Account chu an chairman John Siamkunga hovin Assembly Committee Room-ah an thukhawm dawn.

Facebooktwittergoogle_plusredditpinterestlinkedinmail

Zawhna lut

Assembly Session loawm turah Zirtawpni thleng khan zawhna Starred question 71 leh Unstarred question 1 a lut tawh a, Private Member Resolution 26 bakah paper lay tur 2 lut tawhin Bill lut a la awm lo.

Facebooktwittergoogle_plusredditpinterestlinkedinmail

ZNP Vice President MNF-ah

ZNP Vice President leh Aizawl South I bialtu MLA ni thin, K.Liantlinga chu naktuk Thawhtanni hian MNF party-ah a lut dawn. A rual hian ZNP Gen. Secretary pathum (3) pawh an lut dawn nia thu dawn a ni.

Facebooktwittergoogle_plusredditpinterestlinkedinmail

Minister tel

Nimin khan New Delhi Chanakyapuri-a Civil Services Officers’ Institute (CSOI)-ah Health & Family Welfare Central Council Conference vawi 12-na neih niiin, Mizoram Health Minister Lal Thanzara pawh a tel. Conference-ah hian National Health Policy puanzarna hun hman a ni.

Facebooktwittergoogle_plusredditpinterestlinkedinmail

Mi 3015 in Museum tlawh

February ni 22-26 inkar chhunga Museum Week hman chhungin mi 3015 in Mizoram State Museum an tlawh. Mizoram State Museum-ah hian Gallery 6 History and Mineral Gallery, Zoology Gallery, Anthropology Gallery, Ethnology Gallery leh Textile Gallery a awm a, mipuite en tura pho chhuah thil pawimawh chi hrang hrang 723 bakah dah that 3,034 a awm bawk a ni.

Facebooktwittergoogle_plusredditpinterestlinkedinmail

Taxi ten sawrkar thu zawm phawt se

Mizoram sawrkar Home Minister hova Coordination Committee on Traffic Management thukhawm chuan March ni 1,2016 atanga tan turin Aizawl khawpui chhunga Taxi te chu intlanchhawk turin ruahmanna a siam a. Ruahman dan chuan Taxi te hi ‘A’, ‘B’ leh ‘C’ ah thenin group khat zel hi ni khat an chawl dawn a. He ruahmanna thar hi sawrkar pisa kai ni ah chauh hman a ni dawn a, pisa chawlhni leh Pathianni ah chuan kalpui a ni dawn lo a ni.

Sawrkar ruahmanna thar hi Taxi a eizawngtu (Taxi neitu leh khalhtute) chuan an duhloh thu sawiin sut leh turin an ngen a. Taxi ah te puandum zarin Taxi hmanga eizawngte chu an thu leh hla ngaichang tur leh sticker pawh la hrihlo turin an ngen a. Mahse hetih lai hian mi 1000 chuang chuan sticker hi an la tho a. Zoram Taxi Drivers Association hruaitute chuan Aizawl khawpui ah hian Taxi service lai hi 3700 vel awm angin an sawi a, heti anih chuan Sticker la hi an tam tawh hle tihna a ni a, document nena lam tur anih avangin document felloh vanga lam mai ngam hrihlo pawh an la awm niin an sawi bawk.

Engpawhnise Coordination Committee on Traffic Management ten khawpui tawt lutuk tih ziaawm nana Taxi intlanchhawk an ruahman hi an thlirna atang chuan a awm em em a, hei bak hi thlan tur dang a awm chuang lo ang. Aizawl khawpui hi plan city a ni lo tih chu mitin hriat a ni a, a rem lai laiah in kan sa a, kan khawlai kawng a zim em em a. Lirthei a pung tual tual a, sum nei deuh chuan lirthei an lei zel mai bawk si a, inkhap theih lah ni hek suh le. Kawngpui zauhna a awm tawhlo bawk nen chetvel a harsa a, hmanhmawh thil leh emergency ah pawh chet ngaihna a awm tawh lo a ni.

India ram khawpui ber New Delhi ah pawh lirthei tawt tih ziaawm nan leh boruak thianghlim zawknan sawrkar chuan lirthei kawpkim leh kawpkimlo te chu an intlanchhawk tir a. He ruahmanna hi a thain traffic jam a ziaawm bakah boruak bawlhhlawh pawh a ziaawm sawt niin an sawi a. New Delhi a sawrkar hmalakna te hi kan sawrkar hian chhawr ve dan leh hman ve dan te pawh ngaihtuah thei se thil lawmawm tak a ni ngei ang.

Coordination Committee on Traffic Management te hian hna hmasa ah Taxi intlanchhawk hi kalpui phawt nise, a tul dan a zirin mimal lirthei leh sawrkar lirthei te pawh la tih zel nise an ti a. Sawrkar ruahmanna hi Taxi hmanga eizawngtute pawhin hrethiam a an zawm phawt hi tun dinhmun atan chuan tih makmawh niin a lang. Sawrkar ruahmanna hi kalpui phawt a, enchhin phawt nise a thalo anih chuan a aia tha zawk kan zirchhuah beisei ila, engahmah hmaa lo dodal rikngawt hi chu a fuh chiah lo ang. Hetih lai hian sawrkar pawhin Taxi neitute harsatna hi hrethiama an tana phurrit awmlo thei ang bera hmalak tum hram teh se.

Facebooktwittergoogle_plusredditpinterestlinkedinmail

Zalenna meichher chhit champha

Awpbehna laka tal chhuah tum ngam khawpa hnam huaisente hi hlawhtling vek lo mahse ngaihsan an hlawh zel thin. Engkim chan huama ralthuam nena zalenna sual an awm a, tharum tel lo a mipui fuihpawrh zawng leh mipui chakna hmanga hel an awm a (Mahatma Gandhi style ang chi), dan hmanga thuneitu sang zawk (UNO) inrawlh tir zawnga bei an awm bawk (Israel, East Timor). Kan hnam pasalthate pawhin kum sawmnga kal ta khan huaisen takin zalenna an lo sual ve tawh a ni.

Awp behna laka tal chhuah duh vangin zalenna an sual thin a, a awpbettu lam chuan helna an vuah a, awp behte chuan zalenna sual an inti thung. India ram (tuna Pakistan leh Bangladesh nen) pawh hi kum zabi 19-na laihawl atangin Kumpinu lakah a hel tan a, a tirah chuan East India Company lakah an hel phawt a, a hnuah Kumpinu sorkar lakah zalenna an sual zui ta a nih kha.

Sapho haw dawn lai vel khan ‘Zofate hi mahni ke a ding tur kan ni’ tih ngaihdan a lo chhuak a; mahse, duh thlang thei loin India hnuaia rin luh kan ni ta zawk a. Hun a lo kal zel a, kum 1960 chhoah khan min awptu India (leh Assam sorkar) laka lungawi lohna a inmun nasat laiin chu thu bawk chu Pu Laldenga’n thiam takin politics hmanrua atan a hmang a, a finna leh a tawngkam thiamna hmangin zalenna chu ban phak tawk leka hnaiah a rawn chhawp zui a. Thalai rualte rilru nasa takin a chawk tho a. India zalenna sualtu langsar Bal Gangadhar Tilak-a’n, “Mahni a ro inrelna/zalenna hi ka chanvo dik tak a ni a, kan nei ngei tur a ni” (Swaraj is my birth right and I shall have it) a tih ang chiah khan zalenna hi kan hnam chanvo dik tak a ni tih chu thalai rualte leh lehkhathiamte thurolum a ni ta a. Tichuan, zalenna kawl eng tur chu a nghaha nghah chhuah ai chuan tiin ralthuam nen a sualin an sual ta hial a ni.
History-a kan hmuh angin awp beha awm hnam hrang hrang zingah an chanvo/zalenna chang tura bei ngam an awm laiin ngam lo pawh an tam hle. Chutiang zawnga thlir chuan kum 1966 chho a kan hnam pasalthaten zalenna an lo sual ngam kha he hnam tan hian inchhuanna tham a tling a, thangthar zelte pawhin sawi nuam an ti ngei ang. Ram leh hnam tana beitu pasalthate hi an hlawhtling emaw an hlawhchham emaw a nih pawhin eng hnam mahin an hmusit ngai lo. Braveheart film-a kan hmuh Scottish pasaltha William Wallace, British laka zalenna sualtu kha tlawm zawk mahse an hnam pasaltha ropui ber zingah an ngai reng a, India zalenna atana beitu Tipu sultan kha tlawmin indonaah thih phah mahse vaiho hian zalenna sualtu ropui ber pawlah an ngai a ni. Hnam pasalthate hmusittu chuan hnam a phatsan tihna a ni zawk.

March 1, 1966-a Mizo pasalthaten zalenna an sual chhan kha eng ber nge niang? Khatih laia Mizoram dinhmun te, Assam sorkarin mautam tam tuar a ngaihsak loh dan te, India sorkarin a ngaihpawimawh tawk lohzia te, mipui dinhmun hniamzia te, hmasawnna a kal muanzia te kha tunlai thangtharte hi chuan kan ngaihtuah pha kher lo ang a. Tunlaia sorkar laka kan vuivai thinna te ngaihtuah hi chuan heng kan sawi ho ringawt pawh hi hel rilru putna tham a tling awm e.

Zalenna sual pasalthate kha an lehkha zirlai te, an eizawnna te, an chhungkua leh khawtlang, an in leh lo kalsanin an pen chhuak a ni a. Lehkhathiam tak tak, sorkar hna sang tak thawk ngei tur te, kamding te, pa rawnkai chin te, khawvel politics inlumlet dan hrethiam pha eng emaw zat an tel nawk avang khan atso thil ngawt chu a ni lo tih a chiang a. Mizote hmabak ngun taka thlir chunga pen chhuak an nih avangin ‘Hnam hmangaihna’ (nationalism) hi khatih hun laia thalai rualte turtu ber chu a ni awm e. Mawl vanga ralthuam lek ngawt an ni lo a, a der a tih chi a ni hek lo, engkim kal sanin hnam hmangaih vangin zalenna kha an sual a ni mai.

Lehlamah chuan zalenna sual chungchang hi party inchirhthehna hmanruaa hmang an awm thin avang hian politics a inhnamhnawih lo tan phei chuan sawi ve pawh a inthlahrunawm rum rum thin a. A nihna takah chuan neitu chan chang tur bik an awm chuang lo a, Mizoram history a thil thleng pawimawh ber pakhat a nih avang hian politics inbeihna hmanrua atana hman hi a sim a tha khawp mai.

Zalenna sual hlim chhawn atang khan rin phak bakin India sorkar kha a rawn che na a, a chhan pawh prime minister thar lam tak Indira Gandhi vang kha a ni ber awm e. Khami hma lawk January 11, 1966 a thi ta pa nunnem tak Lal Bahadur Shastri zawk kha la ni ta se la chuan rambuai vanga Mizoram tawrhna kha nasa takin a nep ngeiin a rinawm. Mahse, vanduaithlak takin politics thila rorum taka che thin, amah dodaltute ngaithei lo zet mai Indira Gandhi kha 1966 January thla tawpah prime minister a lo ni si a, party chhungah ertu a neih bakah ram sum leh pai dinhmun a chhiat lai a ni a, harsatna chi hrang hrang hmachhawn tur insehmur tuau tuau laiin lalthutthleng a luah hlimchhawnah hmarchhak kila helna lo chhuak kha chu eng hmanraw hmang pawha hmeh mih nghal a tum ni berin a lang.
Prime minister a nih chhunga a chet dan rawva zia te chhut neuh neuh chuan rambuai hlim a Silchar lam atanga lokal sipaite rawn chet rapthlak dan te, a hnu zela mipui tawrh nasat zia te, khaw khawm te, hleihluak taka sorkar laipui rawn tirh sipaite chet dan zawng zawngte kha a bultumtu ber chu hai rual a ni lo ang. Indo thlawhnain Aizawl leh khaw hrang hranga bomb an thlak a, mipui nunau nen lama an rawn beih pawh kha Indira Gandhi chuan ‘Bomb kan thlak lo, ration kan thlak’ tiin chanchinbu mi a hrilh nghe nghe a nih kha.

Zalenna sual kum 50-na champhaah hian kan hnung lam kan thlir kir lai hian kan hnam hmabak tur te pawh hi kan ngaihtuah fo a tha awm e. Zalenna beisei te hi thil atthlakah kan ngai maithei a, Europe khawmualpuiah ringawt pawh khuan tunah hian hnam 40 chuang inlakhran duh a bei mek an awm an ti. History hi a danglam reng..thil inthlang danglam thin hian history a siam a tih theih bawk ang. Kum 10 kal ta leh tun a world political map hi a danglam nasa tawh khawp mai. Kum 5 kal ta a India ram state awm zat leh tuna awm zat pawh a inang tawh lo. Reilo te karah hian ram thar a lo piang a, sorkar tharte a lo ding thin a lo ni. Tuna Burma politics insingsa kual vel te khi kum thum kal ta khan lo sawi lawk awm se tuman an ring kher lo ang. Chuvangin, keini pawh hian, zalenna hi Pathian ruat kan chanvo dik tak a nih phawt chuan, engtikah emaw kan la chang ve ngei ang.

Facebooktwittergoogle_plusredditpinterestlinkedinmail

Ka Huang (Feb 29, 2016)

Chawlhni hmasa KA HUANG-ah khan a sentence hmasa lamah Tawllawt kha thang hrui ka CHILH tir a, a hnu lawkah ka’n SEH tir khanglang chu!! Ngun tak leh chik taka chhiartuin min rawn hrilh a, ka lawm takzet a ni. Ka chhut lai khan engin nge min mawlh teh reng, ka chhu tlat si a.

Aizawl Dawrpui Bungkawn vel atanga Sikul Kawn ziak hmain thu lar tak si kan sawi thelh fo ka’n telh zauh teh ang.

Mi thahnem tak hian IT/ITAWM leh AWT/AWHAWM hi kan thlei hrang em em lo. Ka hriat dan chuan IT/ITAWM hi – mipain hmeichhia kan it, itawm kan ti bawk. Tin. ei tur tuihnai hi kan it a, a itawm bawk. It/Itawm hi chu he thil pahnih atan lo hi chuan hman ngai ni loin ka hria. AWT/AWHAWM hi chu thil tha – in ropui te, ram tha tak nia kan hriatte, nupui/pasal tura kan mi tha leh fel te angte hi kan awt a, an awhawm bawk. Mipain hmeichhia kan it (itawm kan tih) hi nupui atan kan awt kher lem lo, an awhawm lem kher lo bawk. Chuvangin, IT/ITAWM hi chu hmeichhiaah leh ei tur tuihnaiah chauh hian kan hmang niawmin ka hria. Hmeichhia hian mipain hmeichhia kan it ang hian mipa hi min it ve tak maw? Hman zan khan nuchang thil hre ruala ka ngaih mi 9 emaw ka zawt a, mi 6 atangin an ngaihdan chhanna ka dawng a, mipa ang chuan an nei lo deuh niawmin ka ngai. Pathian siamphungah mipa/a pa reng reng hi hmeichhia/a nu it tura siam kan ni a niang. Hmeichhiain mipa an pawngsual tak case pawh hi ka la hre lo! AWT/AWHAWM hmanna hi chu thil tha emaw, mi tha emaw nia kan hriat hi kan awt thin, an awhawm reng bawk a. Tun hnuah chuan IT/ITAWM leh AWT/AWHAWM hi hman hran i tum tawh ang u.

HRILHAI leh UIAWM tihah hian mi thahnem takin HRILHHAI ti leh UIHAWM tiin H an belh thin a, hei hi a dik lo. HRIL atangin HRIL-HAI tih a ni a, UI atangin UIAWM tih a ni bawk. HRIL leh HRILH pawh hi a inang renga ngai kan awm niin a lang. Hril hi chuan tih bik a nei lo – Pulpit atanga thu a hril (zuk hrilh bik a nei lo, a ngaithlatute hnenah khan a phek hril mai a ni). HRILH chuan tih bik a nei. Ka nuin min hrilh tih ang hian. UI/UIAWM hi chu ka nauin ka sana ui em em min vawm chhiatsak a, ka ui tak tak a ni ti ila, ka bula mi chuan a UI-AWM em tam a nih chu maw le a lo ti ang (UIHAWM ti loin).

Sawi takah chuan a pung zel a, tunlai hian tawng thar (ka ti mai a) Thanga EMAW, Lala EMAW kal rawh se kan tih thin kha (tun thlengin ka la hmang), Thanga EMAW Lala kal rawh se tiin saptawng kalphungin EMAW pakhat chauh an hmang ta mai. Tin, Thanga nge lian zawk Lala kan tih thin kha, Thanga nge Lala lian zawk tiin lian zawk kha Lala hmaah an dah ta vung mai. Hei phei hi chu a thumal pawh a inzat chiah tho a, a thu an thlak kualkawi mai mai a ni. Mizo tawng hi hum kan duh chuan heng tawng ulh leh dik lo pawh ni chuang lote hi chu kan chhawm nung zel tur niawm tak a ni. Thumal kan neih ve loh chher thar (coinage) te hi uar ila, hrilhfiahna ni loin hming tawi tek tawk chher mai ni se. Kan mi hluiten Gramophone tih Thingremzaithei tia an han let kualte kha chu a hming ni loin a hrilhfiahna ni mai awm zawk a nih kha! Camera te Thlalakna tia kan lette hi hman pawh kan hman peih tawh hlawm loh hi. Kawlphetha a awm lo tih ai chuan Curren a awm lo tih zeuh mai hi a awl tlat a nih hi. Hengte pawh hi “pank’ lo ti mai ila chu tun thleng hian ihe loin “pank a awm lo’ kan ti mai ang a, kan hre vek tho tur. Mi thiam zawk leh zir sang zawkte u, ngaihtuah teh u, kan tlai luat hma hian.

Dawrpui Bungkawn atanga Sikulkawn thleng hian kawng chhak leh kawng thlang velah chenna in, quarters lo chu a awm lo, sawrkhar quarters chu (sipai bahrik tiam loin). Tuna Assam Rifles Commandant bangla khi a hmasa bera (Sap hun lai khan an rawn rauhsan daih, inches 4-a a awn avangin), a dawtah tuna kan Chief Secretary bangla khi Bawrhsap dawltu SDC ten an luah thin. Governor bangla khi Bawrhsap bangla. Tuikhuah tlangah Civil Surgeon leh Supara (Engineer PWD) bangla a awm. Tuikhuah atanga tui lakchhawnna tuibel lian bul tlak lamah Tuipu Qtrs. te tak te a awm. Tuipu kekawr fuala kan ti mai a, Gorkhali a nia, Tuikhuahah khian lawngleng te tak te an dah a, hnahthel tla ilo a tifai thin. 1940 (Pawl IV) khan Sikul naupang lian deuhhoin (chung lai chuan thingtlang atanga kan sikul rwn zawm chu tlangvalte pawh an awm) tuipui lawnglengah chuan lung an thlak an thlak a, a pil ta daih mai a, kan sikul naupang tih a nih avangin an man chhuak a, hremna (vuak) pawh na tak a ni. Chuta tang chuan naupang sual vuak nan pawh 1st, 2nd, 3rd class tiang an siam ta nghe nghe a ni.

Vai sikul khi a awm bawk a, kan primary sikul a ni. Khita tang khian Lower Primary, kum 1939-ah ka pass chhuak ve.

Khatla khi Vai Hmeichhe Veng kan ti thin khi khi civil (vai) awmna a ni. Sipai puanthui te, Awmhmula te, Nuthaui te, Kaizathlera (mithai pu) te, Damai te an awm a. Khatla bus stand leh sikul kawn inkarah Aimana te, Pi Chibaii te an awm a. Pi Chibaii kha kan chhaih nasa thin a, bawngchaw laa a kal emaw, a phur hawng emaw kan hmuh chuan Ka pi Chibai han ti ila, a phur a keuh lawk a, chem kawm a keng a, min um a, min umphak loh tawpah a mawng min hlim khum tawrh a, LAL RO! a ti a, min kirsan thin. Keiniho kha chuan eng dang duh loin min hlim khum kha kan hmuh duh ber a nia, a um phak loh chiah hian kan tlan thin a ni, kan lo mawl teh e. Tuna, Johna (Lianthawmi pasal) te in khi Khuptuaha (Sebudar pension, tilpuk lian em em mai) in a ni. Sikulpui leh sikul sen khi chu a awm reng a. Republic Veng, Tuikual tih ang reng hi a awm lo. Venghlui hi chu a awm reng a ni. Khatla kan huamtir tak, Tuikual lam a in te khi pakhat te mah a awm lo nia.

Facebooktwittergoogle_plusredditpinterestlinkedinmail

Login

Lost your password?