Monthly Archives: March 2016

The Return of SUDDEN MUANGA

KHUHHAWNNA
Sawhthing Milianaire, Tribal Superstar chu a puakruk hnum hlerh hlawrh fual taka pai chung leh, a kekawr tlang arh ve tak chhung lama Burma underpants bekang rawng ha chungin, sa-um leh tuibur rim nam deuh chum chum chung chuan a sakawr Daii chungah rawn chuangin — Hmunkhawhar City — a rawn lut zan zan a; a sakawr no Patea chuan hnung lamah a rawn um dat dat bawk a. Khaw mipuite chuan a khabe duhthawh ve tak te, a hmuihmul sei zen zawn te, a hnar tawk angreng tak te, a pian inkhaithli deuh thik thiak te chu hmuhnawm ti angreng takin an lo thlir hlawm a, mahse eng atan mah a ngai lo; a sawhtling hralhna pawisa a ngah em!

Mary Saloon chu pan ding nghalin, zei fahrana a sakawr atanga a chhuk hnu chuan hawi sang deuh vah chungin, a hnapkhir, vaivut khu-in a bawh deuh lak chu thup tumna nei map lo chuan saloon chhungah chuan a lut ta zan zan a. Duh tawka Mary whiskey a in hnu chuan a ngaih em em, a ‘tawih’ Judy Thiaii rim tur chuan a chhuak leh ta a. Kawng lakah chuan misual tlawngawl Hrangeka leh a kid-te chuan a pawisa ruk sak tumin an lo…

Sudden Muanga comics, Lalsangzuala (Laisaizawks), Churachandpur khawpuia cheng mek buatsaih, Zofa-te rohlu zinga chhiar ngam hi thangthar lehzual tih loh chuan kan hre fur awm e. Television leh Internet-in Mizoram leh Zofa-te chenna hmun hrang hrang a luhchilh hma, kum 1970 chho tawp lam atanga a hnu, kum 1990 tawp lam thlenga min chawk hlimtu pakhat, tun thlenga mi tam tak thinlung luahtu la ni zel thei khawpa Mizo-te “popular culture”-a riahrun changtu hi theihnghilh leh a boral hi kan phal tur a ni lo.

K’u Muanga comics hi chhiar tur vang angreng tawh mahse, tunah hian mi thahnemngaite zarah a movie-in en theih a ni dawn ta.

Hmunkhawhar City movie chu
Leitlang lamin ‘Khawnglung Run’ an rawn ti chhuak a, Aizawl-in ‘Khuanu Samsuih’ an buai ve thung a. Champhai hun a thleng ve ta — Sudden Muanga ‘Hmunkhawhar City’ ah min hruai lut dawn. LSZ comics behchhanin — Sudden Muanga : Hmunkhawhar City — chu movie anga siamin, tunah hian tihchhuah mai theih turin an peih fel tawh a. Tlangzarh hun tur chiang tawh mah se; engtin nge an tlangzarh dawn tih erawh an la sawi thei lo — March ni 28, 2016 khian an ti chhuak dawn tih chauh chu an sawi theih a la ni.

Hmunkhawhar City movie producer B. Rosangzuala (Sangtea) chuan, “A tlangzarh leh kan tihchhuah dan tur hi kan la chiang thei lo. Kan la inrawnkhawm leh phawt ang,” tiin Thalai Khawvel a hrilh.

Foreign-ah an film, Budget
Movie anga Sudden Muanga character kan hmuh hmasakna ber tur ‘Hmunkhawhar City’ hi foreign-ah ngat an film a ni! Burma ram chhunga Bukphir khuaah he movie hi an chang a. Champhai atanga motor-in darkar thum leh a chanve vel tlan a ni a. Kawng chu tha ve pangngai deuh phei se chuan darkar khat chuang awrh chauh an kal ang.
Mizoram chhulchhuak angah he film siamna atana an sum sen ngaihtuah chuan ‘low budget film’ tia sawi theih a ni lo ang. Editing hnathawktu hlawh chu sawi loh, tun dinhmunah cheng nuai thum leh sing nga sen a ni tawh a. Hei bakah hian sing ruk leh sang nga thehchhuahna tur a la awm a. Chumi nen chuan nuai li (4) chuang a ni dawn tih a chiang.
Producer Sangtea chuan, “He film siamna atan hian khawi atang mahin sponsorship ka dawng lo a. Keima mimal pawisa ka seng,” a ti. Bukphir-ah chuan thla khat vel channa hun an hmang a ni.

Minute 15 atangin darkar khat chuangah
K’u Muanga bu keu tawh chuan in hria ang. A bu ang ngau ngau chuan siam dawn se ‘movie’ tia sawi tham a tling miah lo anga — chu chu he film producer chuan a hre chiang a. A bu ang ngau ngau kha chan dawn chuan minute 15 bak daih a ni lo. Sudden Muanga comics neitu Lalsangzuala (Laisaizawks) phalna ngeiin a ‘story’ a phuahbelh niin a sawi.

Sangtea chuan, “Ka phuah belh nual a. A thawnthu laimu ti bo chuang lem loin” tia sawiin, “A thawnthu phuah belhin hna dang thawk miah loin, thla thum inah ka tawm tawp,” a ti a.

He film-ah hian scene 78 a ni dawn a. A rei zawng hi darkar khat leh a chanve thuak a ni ang.

Funny Face, Holy War & Rualrem City
Thangthar zawkte hi kan vannei, Sudden Muanga bu hi chhiar tur vang tawh tak mai a ni a. A bu chhiar pha lo te pawhin rual-u zawkte ‘ka’ atang talin a vir tawka Sudden Muanga bu keu pha a ni ringawt tawh. Mahse, mi thahnemngai fal bikte zarah — Sudden Muanga : Hmunkhawhar City — kan hmu thei dawn a. Hetah mai hian a la tawp dawn lo zui!

Hmuhkhawhar City episode-ah hian Sudden Muanga hi a chawl mai dawn lo. FUNNY FACE-ah min pakai pui nghal dawrh dawn — Laisaizawks phalna ngeiin.

Sudden Muanga fans tan chuan ‘Funny Face’ chungchang hi hriat loh tur a awm lo. Funny Face hi series 1, 2, leh 3 thlengin a awm a. Amaherawhchu, hei hi script khatah khung a ni dawn a. Sudden Muanga movie series-a a pahnihna hi kumin May thla hian tihchhuah hman beisei a ni.

Hrangeka piantharna Funny Face a zawh chiah stage 3-ah K’u Muanga hi kohhran upa atan an thlang tling chhunzawm nghal dawn a. Chuta tangin ‘Holy War’ vel a ni tawh ang.

Sudden Muanga movie series-ah hian Rualrem City pawh min kawhhmuh dawn a. Rualrem City script tur pawh tunah hian buaipui mek a ni. He series bika ‘Bank’ vel tur pawh buaipui fel tawh a ni nghe nghe.

Hmawrbawkna
Sudden Muanga hi a chawrchhuahna LSZ comics kalphunga a fuh hle laiin, ennawm kalphung dang, drama ang zawng te pawhin chan a lo ni tawh a; mipui thinlungah a comics angin a tla na thei tak tak ngai lo. Tuna a movie an tichhuah tur hian K’u Muanga nihna lairil hi “Sudden Muanga hla”, L.T. Muana Khiangte phuah, Zira Hnamte-in thiam taka a lo sak thin ang tlukin rawn phawk thei se duhthusam a ni.

Engpawhnise, tlangval damrei, chuai ngah lo ve tak Hleizuama te; nula duhawm Linda Hermawii leh a pa Pu Darthuama te; K’u Muanga nupui ni ta Tumsangi te; sheriff pahnih — Abraham Chalchhuna leh Pu Kapa te; Zoram tana inhuam em em Tv. Zohmangaiha te; Dr. Hlychho te; a thianpa, mi tih harsa Tv. Lalkhirhvela te; a kid phakar ve tak Darringaia te; Pastor Gospelliana te; zu zuar Pi Dari te; Shabito leh Apache te leh mi chi hrang hrangte’n a hun lai mil zela Zoram khawvel boruak a hlimawm zawnga an rawn tarlang thin kha chhiar nawn leh chak kan kat nukin a rinawm. Tute emaw hian rawn ti nek nek se, “duak” tih tur khawpin Sudden Muanga comics pumpui kha rawn chhuah tha leh thei se tih hi mi tam tak duhthusam a nih hmel e. Sa-um Weekly (Nitin chanchinbu lar ber) te pawh chhiar leh a chakawm alawm le!

Facebooktwittergoogle_plusredditpinterestlinkedinmail

Tinreng feature : vaihlo ngawlvei rawngbawltute

Zuk leh hmuam ti- nasa hnam nia sawi kan nih laiin kan hotupa ber nupui lahin Zuk leh hmuam a do em em a, khawlaia meizu khu luai luai te pawn ‘Pi Rii a rawn kal’ tih thawm an hriat chuan an Meizial zuk lai an rap thi nawk nawk nghal mai thin.

Hriselna atan a that loh bakah sum leh pai ti hektu ti hiala sawi Zuk leh Hmuam chung-changah hian kohhran hrang hrang ngaihdan leh an kalpui dan a in ang lo tlang hle a. Koh-hran mipuite zuk leh hmuama fihlim tura inzirtirna an neih vek rual hian, Zuk leh hmuama fihlim lo rawngbawltu Pulpit lawn phal lo erawh UPC NEI kohhran chauh an awm niin Zalen thudawnna chuan a sawi.

Rev. Chhiarpuia, Treasurer, N. Mizoram District chuan Zuk leh hmuama fihlim lo rawngbawltu Pulpit-a din an phal loh chu kumin atanga kalpui a nih thu Zalen palai hrilhin, ‘thenkhat chu Zuk leh hmuam ah an fihlim loh avangin Pulpit lawn lo in Lectern-ah thu an sawi mai thin a ni,’ a ti a.

Kohhran kalphung chu kohhran mipui ten an sawisel loh thu sawiin, rawngbawltu zuk leh hmuama fihlim lo Lectern-a thusawi ngai hial te chu mipuiten an dem zawk thin thu Zalen palai a hrilh bawk.

Rev. Chhiarpuia chuan kohhran rawngbawltu Pastor emaw Tirhkohte chu zuk leh hmuama fihlim hle tura beisei an nih rualin an nupuite zuk leh hmuama fihlim lo an awmin an pasal te rawngbawlna chelh thlenga chawlh tirh an nih thin thu a sawi.

Presbyterian rawngbawltu pakhat chuan Synod chuan Pastor leh rawngbawltu tura lak te chu vaihlo laka fihlim a phut tawh niin Zalen a hrilha, ‘zuk leh hmuama fihlimlo te chu hna an pe tawh lo,’ a ti bawk. Hetih lai hian Baptist Kohhran a lawi member pakhat chuan zu a in lo nangin Kohhran te thlir dan chu a fuh lo nia ngaiin, ‘Zu hi amah ngau ngaua sual a ni hauh lo a, nunna pawh a nei lo a, kan Sakhua hian pawn leh chhunglam thianghlimna min zirtir a, zu zawrh chhan pawh in duh an tam a ni mai a, vaihlo leh zu hi a in ang reng. Pastor te’n an nghei thei lo anih chuan vaihlo leh drug ngawl vei nen a dangin ka hre lo,’ a ti a. Rawngbawltute chu hmanraw tha rei tak an nih theih nan an taksa sawizawi uar se a duh thu a sawi.

‘Tunlai ah chuan vaihlo hmangtute chu mahni intihlum (suicide) ah an ngai tawh a. Tur hlang a ni a, a thawk muang a ni chauh a, a hmangtute umphak hun a awm tho tho,’ tiin Aizawl Civil Hospital a vaihlo sim duh buaipuitu pakhat chuan Zalen a hrilh a. ‘Tha leh thalo a awmkawp tur a ni a, zu leh zial pawh awmse kan duh kan thlang tur a ni. Sual awmlohna ram a siam theih loh a, ramri kan pela kan buai ziah nachhan pawh hi sual laka inhungbing tumna rah a ni,’ a ti.
Seventh- Day a inkhawm thin pitar pakhat chuan, ‘Zial zu mi van ram an kai chuan zu inmi pawh an kai lohna chhan tur ka hre lo,’ tiin zu leh vaihlo chungchanga Zalen zawhna pekah a chhang thung bawk.

CKTP chuan kum 1990 khan Kumpuan-ah Zuk leh hmuam do kum tih a lo hmang tawh a, heng bakah hian KTP Branch thenkhat leh Bialah te pawh inzirtirna neih a lo ni fo tawh thin a. Hetih lai hian Kohhran Thalai pawl hruaitu KTP,TKP leh a dangte chu an fihlim lo tlang hle hlawm a ni.

Kohhran tam takah chuan Biak In leh a chhehvelah Zuk leh Hmuam tih khap a ni hlawm a, kohhran mipuiten an zawm that viau rual hian Kohhran Upa/ Pastor ngei Kohhran thurel zawm lo a Mei zu khu luai luai hmuh tur an la awm reng niin Zalen thudawnna chuan a sawi a. UPC NEI ten Zuk leh hmuam dona kawnga kohhran mipuite laka an duh khirh anga rorum taka thurel ngam an la awm mang lo nia thudawn a ni bawk.

Facebooktwittergoogle_plusredditpinterestlinkedinmail

Ram Hectare 2647 kangchhia

Aizawl: Environment and Forest Deptt. chhinchhiah danin nikum thal lai March atanga May thla chhung khan Mizoramah tum 1563 ram kang atangin ram Hectare 2647.2 a zau a kang chhia a. March ni 10, 2016 thleng khan tum 81 ram a kang tawh.

Forest Deptt. hotute chuan ram kang a awm leh awm loh hi Forest Survey of India chuan Satellite atangin ngun taka an vil reng thin thu Zalen palai hrilhin, kang mei chhuak a awm chuan Geographical Information System (GIS) hmangin rang takin hriattirna an dawng nghal thin tih an sawi a. Hei hi Deptt. chuan bawhzui nghalin, a huam chhunga thu-neitute chu kangmei chhuah chhan leh ram a tihchhiat zau zawng report kimchang theh lut turin an hriattir nghal a, a tul anga hmalak chhunzawm nghal zel a ni tih an sawi.

GIS Cell hotute chuan Mizorama ram-kang tam ber chu huan lo ram hal atanga chhuak a ni tih an sawi a. Kuminah pawh thal a intan leh tawh avangin mipuite chu fimkhur turin an chah thu an sawi bawk.

Facebooktwittergoogle_plusredditpinterestlinkedinmail

Bungraw chuh hman lovin kang ral

Nizan hmasa dar 8:15 vel khan Lawipu ah F.Malsawmtluanga (29) S/o. F.Zirlaina In Assam Type chu a kang a, bungraw kangral hlut zawng hi nuai 14 vel hu niin an chhut a ni.

Kangmei chhuah chhan hi hriat ani chiah lo na a, an bed room lama electric kal sual vang nia rin a ni a, gas cylinder 2, LCD TV 1 leh Sofa thenkhat tihloh chu bungrua dang chuh hman lohin a kangral vek a, kangthelhna ah hian hliam tanau tuar 2 an awm a ni. In kan lai hian a neitute chu Champhai lamah an awm a, an awmpui leh pitar 1 chauh an awm lai a ni.

Nimin zing dar 3 vel khan Serchhip bazara Rohming-thanga in, thingpui dawr atana Vanlalpeka luah mek chu bungrua engmah chuh hman lovin a kangral ve a, a thenawma dawr pakhat pawh tlem a kang hman a, in dang a kangkai zel tur chu ven hman a ni.

Kangmei chhuah chhan tak hi electric kalsual vang anih an ring a, bungrua nuai khat man hu a kang-ral a ni.

Facebooktwittergoogle_plusredditpinterestlinkedinmail

Thawhlehni atangin Ration Card siamthat hna tan tum : Hun tiam: April 2016 ah zawh hman beisei

Aizawl: Food Security Act hnuaia Ration Card diklo te siamthat hna leh inthunbelh hna chu Thawhlehni (22. 3.2016) atangin FCS&CA Department chuan thawh tan an tum a, tluang taka hna an thawh theih chuan April, 2016 chhungin zawh hman an beisei.

FCS&CA hotute hnen atanga Zalen thudawn danin FCS&CA thawktute chu veng/khaw hrang hrang-ah kal kualin Local Council/ Village Council te nen tang tlangin Ration Card a hming, kum leh thildang diklo siamthat hna hi an thawk ang a, hetih rual hian Ration Card la nei ve lo hrim hrim leh Card nei tawh si, FSA hnuaia Ration Card nei ve lo te pawh ‘capture form’ hmangin thunluh tum a ni a. Tun tuma thun thar tur hi category ‘C’ (FSA ham-thatna dawng lo tur, buhfai kg khat Rs.15 a lei tur an ni). Food Security hamthatna dawng tur hi kumtin ennawn a ni dawn a ni.
FCS&CA thawktute chuan Ration card siam tharah ‘bar code’ dah vek a ni tiin Retailer tinah Bar Code Reader dah tumin hma an la mek tih Zalen an hrilh a, smart card siamin hemi hmang hian retailer ten tun hnuah chuan buhfai leh thildang an pe-chhuak tawh dawn niin an sawi bawk.

Ration Card a pianni leh thla diklo a tam chhan chu capture form ah pianni, thla leh kum ziak lovin mi tam takin kum chauh an ziak a, chu chu Computer in automatic in 01/01 angin a tarlang ta mai tih an sawi a. Chhung-kaw member kimlo chungchangah pawh Photo ID (EPIC No) inang a tam avangin finfiah theihloh te chu paih phawt an ni an ti a. Inlaichinna a ‘Others’ tih lo lang leh thlalak diklo pawh form fill up naah thil tih famkim tawklo vang tih an sawi bawk a. Tuna ration card thar chu ration lakna tur chauh a ni tiin documentary proof atan hman phal a ni tawh lo tih an sawi bawk.

Facebooktwittergoogle_plusredditpinterestlinkedinmail

April 2016 atangin eng man sang dawn

Aizawl: Joint Electricity Regulatory Commission ruahman angin April 2016 atang hian Mizoram a eng chhit man chu tihsan a ni dawn a, eng chhit/-hman man sanna hi kum 2015-2016 atanga chhutin 4.02% a ni.

Power man sanna hi category hrang hrangah a inanglo nual a, mipui nawl-puiin an hman ber ‘domestic’ ah hian tuna hman mek hi unit khat Rs. 3.48 niin rate thar ah chuan unit khat Rs. 4.5 a ni dawn a, a sanna hi unit khat re. 1.02 a ni dawn a ni.

Thudawn danin power hman man hi kumtin enawn thin tur a ni a, hmarchhak bialah chuan Mizoram leh Manipur chauhin eng chhit man thar hi an la peih a ni.

Zalen thudawn danin Mizoram in power a mamawh san lai berin 100 mega watt vel a mamawh a, Mizoram chhungah hian 52.77 mega watt a siamchhuak thei tawh a, heng te hi hydel project atangin 29.35 mg, diesel 0.5 mg leh Bairabi Thermal atangin 22.92 mg te a ni.

Facebooktwittergoogle_plusredditpinterestlinkedinmail

Global Youth Day pualin thisen pe

Khawvel puma Seventh-day Adventist thalai nuai 80 chuang te chuan nimin khan nilengin Global Youth Day an hmang.

Mizoram chhung-ah chuan Global Youth Day pual hian nimin khan Adventist thalaite chuan hmun hrang hrangah midangte tana inpein hun an hmang a. Aizawlah chuan Adventist Youth Federation, Aizawl West Branch, Aizawl East Branch leh KLS Branch ten a hu hovin damdawi in hrang hrang tlawhin dam lo leh awmpuitute hnenah eitur leh mamawh hrang hrang an sem bawk.

Zing dar 10 atangin Helen Lowry Auditorium, Seventh-day Tlangah AYF Branch pathum, Aizawl West, Aizawl East leh KLS te huaihawtin thisen pek runpui neih a ni a. Mipa 97 leh hmeichhia 24 ten thisen unit 121 an pe a, chawhnu dar 1-ah Joint Fellowship, Seventh-day Adventist Biak in, Seventh-day Tlangah neih nghal a ni.

Facebooktwittergoogle_plusredditpinterestlinkedinmail

Huntharah NCD inhrilhhriatna hmang

Aizawl: Aizawl: Health Department hnuaia National Programme for Prevention and Control of Cancer, Diabetes, Cardiovascular Diseases and Stroke (NPCDCS), National Programme for Prevention and Control of Deafness (NPPCD) leh AIKO bultumin nimin khan Hunthar Veng MHIP Hall-ah Non-Communicable Diseases (NCD) Awareness Campaign & Screening Camp neih a ni a, Director of Health Services Dr. Rohmingthanga Ralte chuan kaihruaiin Health Minister Lal Thanzara chu khuallian a ni.

Health Minister chuan kan hriselna hi mahni kutah thui tak a awm a, hei vang hian ei leh in bakah zuk leh hmuam lamah kan insum a ngai hle a ni, a ti a. Mizote chu Kristian kan nih angin hrisel hle tur a beisei kan nih laia India rama a chhe zawnga a ber nihna kan hauh hi a zahthlak hle a, kan inthlahdahin sim tur kan nei tih i hrechhuak thar ang u, a ti. Lal Thanzara chuan Health Department in a vei ber chu HIV/AIDS hi a ni a, kan hriat leh hmuh theih aia nasa hian min luhchilh mek a. Tun hma chuan drugs avangin miin HIV an kai thin a, tunah erawh chuan mipat-hmeichhiat hman khawlohna avangin kan kai meka, tih takzeta kan do loh chuan kum 5 a ral meuh chuan kan do zawh loh khawpin kan kai nasa tawh dawn a ni, a ti.

Health Director Dr. Rohmingthanga Ralte chuan mimal hriselna mai duhtawk lovin vengchhung faina kawngah tan lak a ngaih thu a sawi a. NHM Director Dr. K. Lalbiakzuala pawhin kan khawsakzia changkang zel avangin kum 2008-09 atang khan zunthlum, thisen sang, stroke leh natna dang te a tam zia leh a vei te an naupang telh telh tih hmuhchhuah a ni a. Kum 30-40 kalta atang khan sawrkarin health programme engemawzat lo kalpui tawhin natna chi hrang hrang tihrem a lo tum tawh a, chutiang chiah chuan he programme in a tum chu Non-Communicable Disease (NCD)-te tihrem bakah in finchhuah a ni, a ti bawk.

State Nodal Officer (NCD) Dr. Eric Zomawia chuan NCD chungchanga hriattur pawimawhte sawiin Indian Council of Medical Research (ICMR) hnuaia Population Based Cancer Registry-ah Mizo hmeichhia leh mipate, a bikin Aizawl District chu cancer natna chi 9-ah a ber nihna a hauh fai vek a, Mizoramah kum tin cancer vei thar mi 1300 chuang hmuh chhuah niin mi 650 chuangin an thih pui ziah a ni, a ti bawk. Nunphung in a zirloh avang leh mahni inthunun theih loh vangin heng natna te hi lo awm a ni tih sawiin ei leh inah kan in her rem hret bakah vaihhlo laka kan fihlim a ngai a ni, a ti.

Minister nupui Zohmingthangi Sailo pawhin Cure Club Foot Mizoram leh sawrkar inkarah kum 3 kaltaa MoU an lo ziah tawh thu leh kelek nei te tana hma an lo lak tawhna te a sawi a. Kelek hi a hun taka enkawl chuan a dam thei tih hria in hetiang vei an hria a nih chuan an pawl hian an tanpui thei tih hre tur leh a remchanna hmun apianga an pawl thil tum lo sawi darh turin kalkhawmte a sawm a ni.

AIKO aiawhin Board Member R. Vanlalena’n thusawiin Hunthar Veng Local Council Chairman Lalhmangaiha Renthlei in lawmthu sawiin he hun hi a khar a ni.

Non-Communicable Diseases (NCD) Awareness Campaign & Screening Camp ah hian doctor te, physiotherapist te, dietician leh beng enkawl thiam bikte kalin a thlawna inentirna hun an hawn bakah damdawi a thlawnin an sem bawk a ni.

Facebooktwittergoogle_plusredditpinterestlinkedinmail

Referral Hospital ramah inhmun inpek a awm : Ruatkima

Aizawl: Aizawl West II bialtu MLA Lalruatkima chuan Falkawna Referral Hospital ram chhungah diklo taka inhmun inpek a awm ngei niin a sawi a, LSC pekna hi Zirtawpni khan House ah a pawtthler a ni.

Mizoram Legislative Assembly Session neih mekah Zirtawpni khan Aizawl West II bialtu MLA Lalruatkima chuan Referral Hospital, Falkawn ram chhungah rolrel lai Congress party hruaitu mi pahnih hnenah dik lo takin inhmun pek an ni tiin House a hrilh a, hei hian sawizui a hlawh hle nghe nghe a. Revenue Minister R.Romawia chuan a department chana nih anga hmalalak a nih tur thu a sawi a, Assembly Speaker Hipheia chuan MLA chu a thil neih te Revenue Minister pe se annin lo enfiah se tiin rawtna a siam a ni.

Lalruatkima hnena tanga thu dawn danin Referral Hospital chu Falkawn mipuiten tlawmngaih chhuahin rama an pe a, Compensation pawh tlem te te pek an ni a, a thenah chuan Rs. 400 chauh te pek an ni a, hetih lai hian sorkar zawkin Referral Hospital ram chhunga mimal tan an lo pe a. Sorkar ram chhunga thil ti thei faten ram an lo nei hi dik ka ti thei lova, Sorkar hotulute pawhin an hriatpui ngei ka ring a ni, a ti bawk.

MLA chuan Referral Hospital, Falkawn ram chhunga sorkarin mimal hnena inhmun a pek hi Revenue Survey No 228., Plot No. 40, Grade V., Square Metre 130.34 a zau – Lalrinchhana S/o Lalianpuia Hospital Veng hminga pek leh Seventh-a S/o Mangkhuma Hospital Veng Falkawn, hnenah Revenue Survey No.227., Plot No. 41 Square Metre 273.52 te niin a sawi bawk.

Facebooktwittergoogle_plusredditpinterestlinkedinmail

Chapchar Kut lady

Aizawl: Mizo Photographer Society ten kumtin an tih thin angin nimin khan Chapchar Kut Lady an thlan result an puang a, Top Lady atan R Vanrammawii, Armed Veng thlan a niin Kut Lady ah R. Malsawmdawngkimi Republic Veng, 1st Runner Up ah Maria Zosangliani Ramthar, 2nd Runner Up ah Zohlimpuii Upper Republic leh 2nd Runner Up ah Christy Lalnunpuii Armed Veng ‘S’ te thlan an ni.

Facebooktwittergoogle_plusredditpinterestlinkedinmail

Login

Lost your password?