Monthly Archives: April 2016

Tinreng Feature : Mizoram & khualzin

Mizoram chu ram nuam chhawrpial run iang hial khawpin a chhunga chengte chuan an sawi a, tlangram a nihna te chuan a timawi zual nia sawi a nih bakah ram ralmuang a nihna leh sik leh sa a nawmna chu chhuan pui a ni fo thin a. Chu ram nuamah chuan ram dang mite hi an rawn kalin khualzin a ngah reng em?

Mizoram sawrkar chuan Tourism lama hma a sawn theih nan tan an la a, khualzin a tam thei ang ber hip tumin Mizo hnamin Kut pui a neih bakah Kut phuah chawp hial an hmang thin a. Hetih lai hian Chawrpial run tlawh tum erawh an tam vak lo thung.

Mizoram Police, CID(SB) hnuaia Foreigner Branch-in an chhinchhiah danin nikum 2015 chhung khan Mizoramah ramdang mi khualzin 798 an lo lut a, kumin bikah chuan April ni 13,2016 thleng khan khualzin 310 an lo lut tawh. Mizorama ram dang mi lo lut tam ber chu khualzin anga lo lut an ni deuh vek a, chutihrual chuan heng mite hi Mizoram rawn tlawh tum hrim hrima rawn kal ai mahin Kohhran thil, inneihna leh chhungte leh thiante tlawha lo kalte an ni thung niin Zalen thudawnna chuan a sawi a. Khualzin lo lut zingah Business Visa nei pawh an awm nual a, heng mite hi chu sawrkar leh NGO te nen thawk ho an ni tlangpui a. Sawrkar nena thawk ho ni lo, hnathawk tura lo kal te chu Employment Visa in an lo lut a, hetiang visa nei Mizorama Football khel tura lo kal mi 4 vel an awm bawk niin Zalen thudawnna chuan a sawi. Tourist Visa hi neih a awlsam ber avangin khualzin anga lo lut an tam phah a ni.
Ram dang mi hip tum in sawrkar hian nasa takin hma la thin mahse Mizoram chhungah rawn lut an tam lo hle thin a. Zalen thudawn danin ram dang mi Mizoram rawn tlawh tum hrim hrima rawn kalte chu kum 1 chhungin mi 5 pawh an tling ngai lo niin thudawn a ni a. Ram dang mi hip tuma Kut siam a nih chang pawn chhungte tlawha rawn zin leh Mizorama awm sa bak an kal ngai lo niin thudawn a ni a. Zalen palai zawhna chhangin ramdang mi lo lut chhinchiah thinte chuan Kut hman a nih avanga rawn kal chu an awm mang ngai lo a ni, an ti.

Nikum chhunga ram dang mi Mizorama lo lut mi 798 zingah hian hmeichhia 269 awmin, a bak 529 chu mipa an ni a. Kumin January thla khan hmeichhia 50 leh mipa 72, an vaiin mi 122 in Mizoram an lo tlawh a, February thlaah hmeichhia 18 leh mipa 49, an vaiin mi 67, March thlaah hmeichhia 21 leh mipa 76, an vaiin mi 97 ten Mizoram an lo tlawh a. April bikah khualzin 24 in Mizoram an lo tlawh tawh a ni.

Facebooktwittergoogle_plusredditpinterestlinkedinmail

Thlipuiin chenna in 100 chuang a tichhia

Aizawl: Nimin zing khawvar hma deuha thli tlehin Mamit ah in 100 vel leh Baktawng ah in 17 a tichhia a, mihring thi leh hliam an awmlo thung.

Thlipui hian Mamit khaw chhung ah in 100 vel a ti chhia, luah tlak lova chhe vek hi hriattheih chinah in 17 niin a chung leh bang a tih chhiat hi In 100 vel a ni. Thlipui hian Hmar venga Seventhday Biakin chu a len darh vek a, Luangpawl venga In pakhat chu a bula thing tlu in a vaw chhe vek a, mimal chenna in a ban chawpa phawi a nei nual bawk. Zirna In, sawrkar Office leh Quarter tihchhiat a nei nual bawk a, Electric hrui leh TV Cable a chhe nase hle a, tun dinhmun ah Electric neih hun tur a hriat theih a ni lo. Mamit khawpui veng hrang hranga chhiatna thleng chhawmdawl dan tur leh in siam that dan tur chungchang ngaihtuah hian DC Lalbiaksangi hovin nimin zing dar 9 khan DC Conference Hall-ah meeting neih nghal a ni a, nimin vek khan VC leh YMA tangrualin khawtlang huap hnatlang koh nghal a ni a, 4th IR Battalion Mamit te chuan veng hrang hranga hnatlang te hi an pui bawk. DC ruahmannain in thawmthatna tur hi VC kaltlangin pek an ni ang. Mamit bialtu MLA John Rotluangliana chuan Mamit khawpui a VC tinte hnenah hnatlang te thingpui in nan Rs. 5000 theuh a pe a, DC Lalbiaksangi pawhin hnatlang te thingpui in nan hian Rs. 1000 theuh pe bawk.

Nimin zing thli tleh hian Baktawng ah pawh Biaktluanga in chu luah tlak lohin a tichhia a, Seventhday biakin tiamin in dang 16 a tichhe bawk. Nimin khan khawtlang huapin chhiat tawkte insak that hnatlang neih a ni a, bialtu MLA Er. Lalrinawma chuan a hmunah enin, chhiattawk te tanpui nan rangva bundle 2 leh hnatlangte thingpui lumnan Rs. 3000 a pe.

Facebooktwittergoogle_plusredditpinterestlinkedinmail

Zo hnahthlakten inzawmkhawm an duh -Hawla

Aizawl; Chief Minister Lal Thanhawla chuan, “Mizoram pawna Zo hnahthlak ten Mizoram hi an inpui ‘Jerusalem’ ah an ngai a, keimahni zawk hian zirtur kan nei a. Kan unaute hian inzawmkhawm leh hi an duh a ni,” a ti.

Nimin khan Cabinet room-ah chanchinbumite kawmin Chief Minister hian tunhnaia Myanmar a tlawh chanchin a sawi a, “Myanmar-a Zo hnahthlak awmte hi keini aiin an khawsa nuam a, an inlungrual bakah kut tling lova sum lakluh an duh lova, an entawn tlak hle a ni,” a ti. Myanmar a Zohnahthlak awmte chu sawrkarah an inghat lo nia sawiin, “Sawrkara thawh chu hlawh a tlem avang leh anmahni a thawh a hlawk zawk avangin an duh lo a. Thalai ten thawh hreh an nei lova, khawlaia rui buai hmuh tur an awm lo,” niin a sawi. Chief Minister chuan Myanmar Zohnahthlak ten ramri atanga km 25 ve ve huam chhungah Visa tel lova intlawhpawh theih ni leh se an duh nia sawiin, “Delhi kal hmasak bera kan home work tur a ni,” a ti a. Khampat Bungpui chu Zofate tan heritage ropui ber pawl nia sawiin tuilianin a lak mai lohnan chhan dan ngaihtuah a ngai tih a sawi a, a tul anga India Consul General pawhin hmalak pui a tum tih a sawi bawk.

Myanmar a zin tuma Chief Minister tawiawmtu Parliamentary Secretary Joseph Lalhimpuia chuan Chief Minister zin chuan Zohnathlak inunauna ah kawngro a su dawn niin a sawi a, “Chief Minister zin hi an lo ngai pawimawh a, hnam hrang hrang te huikhawmin rahbi thar a siam a. Hnam dang mite hmuhah Zohnahthlak hmel a ti danglam a ni,” a ti.
Central YMA General Secretary Lalhmachhuana chuan Myanmar Zohnahthlak ten an nihna ang anga pawm an duh thu leh unau kan nihzia tihlan an duh tih a sawi a, “Myanmar-a kan unaute nen inzawmna tha kan neih theih nan YMA chuan tan lak zel a tum a ni,” a ti bawk. MZP Vice President B.Vanlaltana pawhin Myanmar a Zohnahthlak awm ten tha takin an lo dawngsawng nia sawiin, “Mizoram hian an lung a len hle a ni,” a ti bawk.

Facebooktwittergoogle_plusredditpinterestlinkedinmail

Mizoramah Phar vei 92 hmuchhuak

AAizawl: Health Minister Lal Thanzara chuan tun dinhmunah Mizoramah phar natna vei mi 1508 an awm mek tih MNF member Lalruatkima zawhna chhangin a sawi a. Kum 6 liamta 2011-2016 thlengin phar natna vei thar mi 92 hmuhchhuah an ni a, heng mite hi enkawlna pek nghal zel niin, an zinga 73 chu enkawl dam an ni tawh a, a bak 19 chu enkawl mek an ni, a ti a. Phar natna veite enkawl nan hian National Leprosy Eradication Control Programme hnuaiah kum 2015-16 chhung khan cheng nuai 27.02 hmuh a ni tih a sawi bawk.

Kum 1973 atang khan Mizoram ah pharte hi enkawl bik niin pharte hi enkawl dam an ni a natna vei pawh an awm mang tawh lo a hetih rual hian kum 2013 atang khan vei hmuh chhuah belh niin 2013-14 sorkar kum kalta chhung khan phar natna vei mi 40 chuang hmuh chhuah thar an nih thu Health department hotute hnen atanga thudawnna chuan a sawi.

Health department-a Phar lam buaipui tu Doctor te chuan phar vei hmuh chhuah te chu Mizoram chhim lam mi deuh vek an ni thu sawiin, a tam ber chu Chakma mi niin Mizo erawh vei an tam loh thu an sawi. Mizoramah phar natna vei hmuh chhuah tam tawh loh mahse phar vei zawn kawngah nasa taka tan an lak thu Health Department-a thawkte chuan sawiin, ASHA te tan lak na in phar vei hmuh chhuah zel an nih thu an sawi a. Phar thinhrikna a awm tawh loh avangin tun hma lama enkawl bikna awm thin ang kha tunah chuan a tul tawh lo nia an hriat thu Phar natna buaipui thin Doctor te chuan an sawi bawk.

Phar enkawlna bik Leprosy Hospital Tlabung ami chu mumal taka kalpui a ni tawh lo a, phar enkawl tur an awm tawh loh avangin Doctor pawn a vil tha tawh lo nia thudawn a ni.

Facebooktwittergoogle_plusredditpinterestlinkedinmail

Huntiam a lo hal lo Police in an man

Aizawl: Nimin zing khan Mizoram Legislative Assembly Aizawl: Aizawl: Mizoram sawrkar in Lo hal hun hnuhnung ber tura a bituk March ni 15,2016 hnu lama lo hal nia hriat, Mamit khawpui chhunga mi engemaw zat chu Zirtawpni khan Police ten an man a, tunkar chho hian midang pawh koh leh tum an ni.

Thudawn danin March ni 15,2016 hmaa lo hal vek tur tih chu Mamit District chhunga huan/lo neitu engemaw zat chuan zawm lo an awm nia hriat a nih avangin Mamit District Bawrhsap Lalbiaksangi chuan Mamit Police Station ah F.I.R a theh lut a, Mamit Police Station te hian Case No 15/16 Dt. 13/4/2016 U/S 188 IPC ziak lutin Zirtawpni khan Hmar Veng V/C huam chhung ami 36 man in thu zawhfiah an nih hnu ah bail a chhuah lailawk an ni.

Heng mite bakah hian Mamit Police Station huam chhunga khaw hrang hranga mi 125 te chu hun tiam hnua lo hal nia puh an nih vangin thubuai siamsak an ni a, heng bakah hian ram tikangtu nia puh mi 6 thubuai siamsak an ni bawk.
Thudawn dan in heng khua / VC hrang hrang – Mamit Venghlun, N. Sabual, Suarhliap, Khanthuam leh Kananthar te chu hun tiam pelh hnu ah lo an hal nia hriat an nih vangin naktuk Thawhtanni hian Mamit Police te chuan man leh an tum.

Sawrkar thupek bawhchhia nia puhte hi Court in thiam loh a chantir a nih chuan Section 188 IPC hmangin hrem theih an ni a, Rs 200 chawi emaw, thla khat lung In tan emaw, a pahnih a hrem kawp theih an ni.

Hetih lai hian lo neitute chuan an duh reng vang leh sawrkar thupek an awih loh hrim hrim vanga lo hal hun tura tih a hal lo an nih loh thu an sawi a, March ni 12&13 zan ah ruah tam tak a sur avang leh an vahchap te a ro leh hman loh avanga hal ta lo an nih thu an sawi ve thung.

Facebooktwittergoogle_plusredditpinterestlinkedinmail

Mizoram thlai 75% a hmantlak

Aizawl: State Medicinal Plant Board CEO hnen atanga thudawn danin Mizorama thlai leh thei awm za-a 75 chuang chu damdawi a siam chhuah theihna atana hman tlak a ni a, State Medicinal Plant Board chuan tangkai zawka hman dan tur a ngaihtuah mek a ni.

Dr. C. Lallunghnema chuan Mizorama ramhmul damdawi chi hrang hrang awmte chu tangkai zawk leh mumal zawka hman a nih theih nan State Annual Action Plan, 2016-17 siam a nih thu Zalen palai hrilhin, hei hi tun thla chhung hian sawrkar laipui, Ministry of AYUSH-ah thawn a ni dawn a, hei hi a hlawhtling a nih chuan zau zawka hmalak theih beisei a ni, a ti a. Ramhmul damdawi (Local Health Tradition) chu mumal zawka khuahkhirh turin hmalak mek a ni a, damdawi siamchhuah reng reng mihring tan a him theih nan Quality Control turin License neih tur a ni a, hetianga License nei te chu damdawi siamna bungrua leh thil tul dang te deptt. chuan a man tlawmin a ngaihtuah sak dawn tih a sawi.

AYUSH Deputy Director ni bawk Dr. C. Lallunghnema chuan khum 50 awm theihna tur Thenzawla AYUSH Hospital sak chu luah mai theiha peihfel a ni tawh tih a sawi a, tunah hian he damdawi ina thawk tur hrang hrangte chu lak chhoh mek a ni a, hnathawktu turte chu lak fel an nih hun hunah damdawi in hi a nihna tur ang taka kalpui nghal a ni dawn tih Zalen palai hnenah a sawi bawk.

Facebooktwittergoogle_plusredditpinterestlinkedinmail

Lung tlain motor a delh

Aizawl: Nimin zing dar 7:30 vel khan Ngaizela Lalnghakliana Petrol Pump bulah Aizawl-Tuipang maxicab service Mz-03 4942 chu kawng chhak atanga lung tlain a delh a, motor khalhtu HC Jeremy s/o HC Siama, Tuipang chuan a lu leh ke ah hliam a tuar a, damdawiin panpui nghal a ni. Motor a chuang dang Lallawma, Rawlbuk khua pawhin hliam tenau a tuar bawk.

Ngaizel kawng ko lung chimna bula awm dawrkai leh Bus driver thenkhat te chuan Maxi-cab a delh hma nimin zing khawvar tirh atang khan kawng ko lung chu a tlak pheuh pheuh thu Zalen palai an hrilh a. Lung tla mai thei tur kopang lung khi la awm nual chu a tlak leh mai hlauhawm an tih thu an sawi a. Kawng ko lung chim thlithlai hian Kulikawn Local Council member te chu a hmun ah hian thleng nghalin lung tla in chhiatna nasa zawk a thlen loh nan thuneitu lam atanga kham ko lung tla mai thei tur chu thenfai vat nise an duh thu Zalen palai hrilhin hemi kawng paltlang lirthei khalhtute leh mipuite pawh fimkhur tura an duh thu an sawi.

Facebooktwittergoogle_plusredditpinterestlinkedinmail

Pa ei thi

Aizawl: Pa eisual vanga hun engemaw chen enkawl anih hnuin nimin zing dar 3 vel khan Vanlalhriata (24) s/o Khamliana, Tuikual South chu Aizawl Civil Hospital ICU ah a boral a, nimin khan vui nghal a ni. Tarlan tawh angin April ni 4,2016 khan Mamit Bazar Venga Saikhuma te chhung chu zanriah atana pa an ei a, a tukah an pum nain damdawiin panpui an ni a, an nupa bakah an fate 3 an boral a, an mikhual Vanlalhriata hi a boral veleh a ni. Hetih lai hian an fanu te ber Miriami erawh a dinhmun a tha nia thudawn a ni.

Saikhuma te chhungin pa an ei hi eng pa ber nge tih leh a chanchin hi mithiam ten an zirchiang mek a, Mizoram University ah endik tur lak a ni a, mahse endik tur hi duhthu a samloh avangin a dang endik leh tum mek a ni.

Facebooktwittergoogle_plusredditpinterestlinkedinmail

Minister-in a bial a tlawh

Aizawl: FCS&CA Minister John Rotluangliana chuan April ni 13-15,2016 chhung khan a bial chhung khaw hrang hrang Hruaitluang (Teirei Forest), Tuipuibari, Andermanik, Rajiv Nagar leh Damparengpui khua te a tlawh.

Minister hian April ni 14 zan khan Young Chakma Association te buatsaih ‘3rd Bizu Miloni 2016’ Andermanik khua neih chu khuallian niin a hmanpui a, Minister chuan Bizu hmangtu zawng zawngte chu hlim taka hmang turin duhsakna a hlan a ni. Genandu Chakma, President Young Chakma Association sawi danin Bizu Miloni Festival hi kumtin vawi khat hman thin a ni a, Chakma Traditional Festival lian ber niin ni thum chhung hman thin a ni, he festival ah hian sakhua bik sawi lovin Chakma hnam zawng zawng huap a hman thin a ni a. In tinnin eitur tuihnai thei ang bera siamin in leh a vel te uar takin an chei thin a, thiantha te lengah sawmin duhsakna an in hlan tawn thin a ni. A hma chuan mahni khua theuhva hman thin a ni a, kum 3 kalta a tang khan Rajiv Nagar I leh II, Andermanik, Khantlang leh Belkhai khua te chuan a huhovin an hmang ta a ni.

Minister hian khaw hrang hrang a tlawhna ah thu sawiin sawrkar hmasawnna leh hmachhawp hrang hrang te a tarlang a, tun dinhmunah Mizoram chu buhfai ah a hnianghnar thu leh Food Security hman vanga Ration Card siamthat a nih avanga hming dik lo leh kum diklo te chu April thla chhunga siam that vek tum anih thu te a sawi. Minister hian Mamit Bazar venga Pa eisual a vanga chhiat tawk ta Saikhuma (L) te chhungkua chu thinlung taka a tawrhpui thu a sawi a, Mamit Welfare te hmalakna chu fakawm a tih thu a sawi bawk.

Facebooktwittergoogle_plusredditpinterestlinkedinmail

SEM DAWN

Directorate of Sports & Youth Services chuan Aizawl District mite tan naktip Thawhlehni (April ni 19, 2016) chawhma dar 11 hian Hawla Indoor Stadium ah kum 2012 – 2016 inkara chhunga State pawn lam inelna hrang hranga medal dawngtute hnenah Mizoram Sports Incentive Cash Award a sem dawn. Award Semna inkhawm hi Sports Director Zothanmawia’n a kaihruai ang a, Sports & Youth Services Minister Zodintluanga chu khuallian a ni ang.

Facebooktwittergoogle_plusredditpinterestlinkedinmail

Login

Lost your password?