Monthly Archives: April 2016

Tihhniam

Sawrkar laipui chuan nizan hmasa atang khan Oil man tlemin a ti hniam a, Aizawl a rate thar ang chuan Petrol litre khat Rs. 57.10 leh Diesel litre khat Rs. 45.19 a ni.

Facebooktwittergoogle_plusredditpinterestlinkedinmail

In 3 kang

Nimin chhun dar 12 vel khan Lawngtlai Kanan Veng, Chawngte Road a chhungkaw 3 luahlai chu a kang a, mihring thi leh hliam an awm lo. Thudawn danin kangmei hi Lalmuanpuia te vawkchaw chhum atanga intan a ni a, a bula Thangbika leh Zoremmawia in kangin bungrua tlem an chuh hman. Lawngtlai DC chuan vanduaina tawkte tan Silpauline leh hnatlang thingpui lumna tur Rs.3000 a pe.

Facebooktwittergoogle_plusredditpinterestlinkedinmail

Kumpuan hawng

Nimin khan Venghlui Branch YMA chuan Central Hall ah YMA kumpuan ‘Ram leh hnam humhalh’ hawnna leh Leadership training an nei a, Kumpuan hi Central YMA Finance Secretary Lalrochuanga Pachuau chuan hawngin Dr. Robert S Halliday chuan thu a sawi bawk.

Zirtawp zan khan Tuikual North Branch YMA pawhin kumpuan hi an Branch YMA Hall-ah an hawng a, Tv. Lalhmachhuana, Gen. Secy., CYMA chuan a hawng a ni.

Facebooktwittergoogle_plusredditpinterestlinkedinmail

Thisen pe

Nimin khan Ramhlun Vengthlang Branch KTP chuan an dincham pualin Aizawl Civil Hospital ah thisen unit 34 an pe a, thisen petute hi mipa 26 leh hmeichhia 8 an ni. Nimin vek khan Lunglei Chanmari bial PYD ten Lunglei Civil Hospital tan thisen unit 28 an pe bawk.

Facebooktwittergoogle_plusredditpinterestlinkedinmail

AICS-ah zirlai tirhchhuahna

Aizawl: Mizoram Baptist Kohhran hnuaia Pathian thu zirna, Academy of Integrated Christian Studies (AICS) chuan vawiin chawhnu hian zirlai zirzote tirhchhuahna leh thlahna inkhawm vawi 14-na (14th Valedictory Service) chu Pastor Thanzinga Chapel, AICS-ah an hmang dawn.

Tirhchhuahna inkhawm hi Principal Rev. Dr. R.Zolawman kaihruaiin, zirlai kal chhuakte puala thuchah (Valedictory Address) chu Rev. Dr. F. Hrangkhuma’n a sawi ang a, BCM aiawhin President Rev. Lalthangliana Hnamte-in thuchah a sawi bawk ang.

Zirlai zirzo tirhchhuah turte hi an vaiin mi 29; Diploma in Church Music (Dip.CM) mi 3, Bachellor of Divinity (BD) mi 20, Master of Divinity (M.Div) mi 6 te an ni a, kohhran pawl hrang hrang Presbyterian Kohhran (PCI), Methodist, Kuki Baptist Convention leh Baptist Church of Mizoram te an ni.

Valedictory Service hmanpui tur hian BCM hruaitute leh Aizawl khawpui chhung Pastor leh Tualchhung Kohhran Hruaitu te bakah kohhran pawl dang hruaitute leh Aizawl Theological College, Salvation Army Officer’s Training College leh Sorkar-a zirna lama hotute leh Mizoram University Hotute sawm an ni.

Facebooktwittergoogle_plusredditpinterestlinkedinmail

BCM hruaitu thar leh hluiten charge inhlan

Aizawl; Thawhlehni chhun khan BCM hruaitute chuan Sap Upa leh Pu Buanga Hall-ah post hrang hrang-ah Post chhuahsan tur leh luah thar turte charge inhlanna inkhawm urhsun tak an hmang.

Charge hlanna inkhawm hi Rev. Lalthangliana Hnamte, BCM President-in a kaihruai a, Pathian thu chhiarin tawngtaina a neih zawhah hruaitu lawmna leh chhuak turte thlahna thu tawi a sawi a, General Secretary leh AGS kalchhuak turten thu an sawi hnuah President-in tawngtaina hun a hmang leh a, Charge inhlanna hi neih a ni. Charge inhlan zawhah President Elect Rev.H.Lianngaia’n Malsawm tawngtaiin Inkhawm a khar ve thung a ni.

Facebooktwittergoogle_plusredditpinterestlinkedinmail

Gen. LAD Exe. Board thukhawm

Aizawl; Ningani khan Mizoram UPC Kohhran Hmeichhia General LAD Executive Board Meeting vawi 130-na chu General Headquaters Office Conference Hall Tuikhuahtlang-ah an thukhawm.

He meeting hi C. Renghlupuii, General LAD President-in kaihhruaiin Mizoram UPC Puipate atangin General Treasurer Rev. PC Parliana’n hmanpuiin thurel tura chhawpchhuah zingah Manipur, Churachanpur leh a chhehvelah Seminar leh Revival neihpui dan tur an rel a ni.

Hei bakah hian Bial hrang hrang Seminar leh Revival neih tur Lawngtlai Biala June ni 4-5, 2016 chhunga neih tur te, Dinthar Biala July 22-24, 2016 chhunga neih tur te, Bairabi Biala June 18-19, 2016 chhunga neih turte leh Thingsulthliah Bialin April 11-12, 2016 chhunga an hman turah sawmna an hmuh angin hmanpui turin ruahmanna an siam nghal.

Facebooktwittergoogle_plusredditpinterestlinkedinmail

Central ‘S’ Division Council

Aizawl; Salvation Army, Central South Division Division Council vawi 3-na chu Ningani leh Zirtawpni khan Aizawl Temple Corps-ah neih a ni.

Division Council hi Divisional Commander, Major S Biakliana’n a kaihruai a, Chief Secretary Lt. Col. Davidson Varghese chuan devotion hmanpuiin Division Council member 2016 – 2018 Pathian hnena hlanna ceremony a hmang bawk a ni.

Division Council chhung hian rawngbawlna report hrang hran ngaihthlak a ni a, Finance report leh Budget pharha sawihona a ni bawk.

Central South Division Budget 2016 – 2018 atan Rs. 4,61,01,081/- chu pawm a ni. Division Council ah hian Corps leh Society 96 atanga agenda thehluh te ngaihtuah leh sawiho a ni.

Facebooktwittergoogle_plusredditpinterestlinkedinmail

Tripura Dist. Hrqs. thar

Aizawl; Nilaini hian Commissioner Lalngaihawmi, Territorial Commander chuan Agartala-ah ‘The Salvation Army:Tripura District Headquarters’ thar hawnna leh Pathian hnena hlanna a nei dawn.

He hun hmang tur hian Lt. Col. Davidson Varghese CS leh Lt.Col. Mariamma Davidson TSWM te, Cabinet Secretaries te leh THQ Officers te, Territorial Staff Band leh Staff Songster te an kal bawk ang.

Member an lo pung zel avang te, hmun thar hawn belh a ni zel avang leh ringtharte tan IET chhunga Corps/Society zawng zawngte tawngtai turin headquarters chuan a sawm a ni.

Facebooktwittergoogle_plusredditpinterestlinkedinmail

Lirnghing hnuah engnge?

India Hmarchhak chu lirnghing mai thei dinhmuna ding reng a nih thu sawi rik a ni fo a, Mizoram pawh lirnghing pawi khawih tham awm theihna hmun a lo ni reng a, kumin chhung hian vawi 2 nghing tawhin kum thar tan tira mi chu kan thenawm Manipur atanga in tan a ni a, Zoram lei lung pawh a sawi hlawk hlawk a nih kha. April thla tira mi a hnuhnung ber kha a na ber zinga mi a nih a rinawma, mipui an phawk lek a, hlauhnain ram pum a tuam a, zan mutmu tuah lo an tam hle bawk a ni.

Lirnghing hnuhnung ber khan ngaihtuahna a ti thui duh hle a. A aia na thleng ta se keini ram leilung hnip angah chuan a rapthlak khawp ang. Ko pang kham tak takah In kan din zung zunga, sak phalna lak dawna architect duan chu tam takin an zawm lemlo a, hnamdang mistiri te’n a harsa an tih tlat chuan a hlawh petu thu a tlawm zawkah a trang fo a, RCC In chhawng ding uaih zingah lirnghing laka him zawk eng zah tak awm ang maw?

Nepal a lirnghing rapthlak tak khan mithiamte zir a hlawh hle a. Leilung hlawm pahnih innawk zel chu a hma aia na zawka innawr tawnin, lei chhung rilah na takin a pelh pup dawn niin mithiamte chuan an sawi a. Lirnghing zir mite chuan leilung innawk chuan India Hmarchhak lam a hnaih zel niin an sawi lawk tawh a, NE hnaih bawrah na takin a la nghing dawn niin an zirbingna te tlangzarh a ni tawh nghe nghe.

Tun tum lirnghingah khan pawnah mipui an tlan chhuak chiam a. Khami aia na leh rei zawk a thlen palh chuan pawna tlanchhuak te chu kawng sir tawna chenna In/dawr tlu te chuan a delh emaw a ni anga, kawlphetha, ei leh in leh nitin mamawh a awm mang dawn lo a. Chhanchhuah hnathawktu an indaih lo viau thei a, chu a chhapah dan kenkawh thlengin a nghawng thei bawk ang. A nihna takah chuan tih theih a tam lo hle a, hriat lawk theih a ni loa, dan theih a ni hek lo a, a thlen lai leh a hnua insaseng danin nunna chan a ti tlemin a ti tam thei a; a chhe zawnga a nghawng tih tlem hi tih theih tawk ni berin a lang.

Kan khawpui chenna hi felfai taka duan a ni lem lo a, hei hi a ti khawlh khamtu a ni thei bawk ang. Thuneitute hian hemi rilru pu chung hian chenna tlak loh ram thliar thain khawng takin keng tlang thei se a duhawm hle mai. Khawpui zauh thuah pawh dan leh hrai tha tak duana, In sak dan him zawk a awm zel theih nan hmalak a hun ta hle mai. Lei che laka kan him zawk nan In satu mistiri te chu zirtirna /training pek theih ni sela thawk lak a theih deuh mahna. Mistiri te pawh an thiamna ang zela phalna license pek ni hial tawh zawk sela kan hma hun a thlamuanpui awm deuh thei zawk ang. Ngaihtuah ngun a ngai hle a, policy thar duan tham a awm ngei ang.

Tun lai hian social media-ah lirnghing damkhaw chhuah pui theih dan zirna thar tlawhchhanin mithiamte thu chhuak nia sawi a darh mek a. He thu darh mek hian thil thar a tarlang nual a, inzirtirna hman mek chu a him tawk lo mai ni lovin a aia him zawk tarlan a ni a. Thu dik nge a hrul tih hriat a har hle. Chhiatrupna laka him theih dan tunlai thiamna tlawhchhan hmantlak a awm a nih chuan mipui hrilhhriata zirtir vat a tha ber a. Insaseng dan tha zawk mipui inzirtirnaah sum sen a ngai thei a, sum harsat lai ni mahse a tak a thlen palh chuan sum humna a ni thei zawk ang. In zirtir tam kan la mamawh hle a, tha thlah thian a ni lova, tan lak sauh sauh a ngai zawk ang.

Engpawhnise a pawimawh ber chu chhiatrupna a lo thleng palh anih pawhin ‘Chiailoh’ hi a ni. Lirnghing a ni emaw kangmei, thlipui leh a dangte a lo thleng palh anih pawhin rilru fim taka hmachhawn a tha. Mithiam ten hmarchhak hi lirnghing nat theihna ber hmun (Zone V) niin an sawi a, kan in sak dan kan uluk lehzual a pawimawh a. Chumai bakah lirnghing lo thleng palh laka kan buai lutuk lohnan ei leh in, damdawi, tui leh nitin mamawh zualpui te lo inchhekkhawl nachang hria ila, chhungkua ah tam zawk inzirtir bawk ang u.

Facebooktwittergoogle_plusredditpinterestlinkedinmail

Login

Lost your password?