Monthly Archives: May 2016

Dr. Hrekima titi (May 22, 2016)

Thianpa Jona nupui nei tharin, “Tual Upaa an thlan che atang hian i titi hi a sexy ta lo tlat!” mi’n ti pek a. Chuvang pawh ni loin, a pawimawh avang zawkin aw….
&&&&&&

NULA HNENA THURAWN SEXY
Nulate u, kan hlimpui tur ‘sex’ tahpui in awm leh thin. Hriat fuh loh in neih vang a nih ka ring. Sex avanga i tah loh nan, a ruh langin, thurawn sexy ka pe dawn che. Mipa rilru thenkhat ka hrilhru ang che u.

Mipa hian hmeichhe virgin an ngaisang reng tih hre rawh u. Tute emawin mahni thiam inchantir nan, “Tunlai chhanah mipain virgin an duh kher tawh lo,” te an ti a ni mai thei. Duh e, duh tehreng mai. Tuma la pawl loh, khawi lo kal chhuah nikhua pawha tu mipa mahin, ‘saw pa nupui saw ka .. hnu,” an tih tur ni miah lo, confi tawka an lenchhuahpui theih tur nupui an duh vek! Virgin lo an neih thluah avangin an iai lo tihna a ni lo, virgin an hmuh miau loh avangin lungawina nep zawkah lungawi an tum ta a ni zawk ang! Mipate hian hmeichhe virgin an la duh reng a, an duh zel bawk ang. Nula virgin kha in hlu hle tih inhre teh u.

Mahse, nula thianghlim duh viau si hian nula mutpui tur an zawng duk duk reng fo! An duh hmuh nan hmangaihna tih thupui ril zet mai hi pawnlang takin an hmatheh hreh lo. Mipa hian hmangaihna leh sex hi an kalhranpui thiam a, nangni hmeichhe rilru tha hian, ‘sex is equal to hmangaihna’ in lo ti si a! Chumi pahnih inthial fuh lo chuan tahna a thlen fo che u a nih kha.

Mipate hian hmeichhia an zah loh vang ni chuang miah loh hian, ‘nula chu fight deuh ngai’ niin an hria nia! Nawr luih ngai, nawr thiang, tihluih deuh ngai ve hrim hrim niin an hre tlat tawh! An thiam loh nge nangmahni thiam loh? Nawr hlawhtlin theih in nih fo vang a ni ang em? Tan ve deuh eih loh chu a mawi lo e tia tang der ve mai mai niawm taka, ‘ka duh looo’ tih paha nui uarh uarh in nih fo vang a ni ang em? Nawr nat hle che u pawha in thinrim thin loh tlat vang a ni ang em?

Mipain an nawr luih che u hian mak ti suh. An tih tur tiah an inngai hmiah! In duh loh tak tak a nih chuan, teu hlar mai rawh. Mipain a fawh theih vang ngawt che khan i taksa pum kha i pe kher tur a ni lo. I ta a nih kha. Phal loh chin ramri kham fel rawh. Chu ramri pela an nawr che u khan thinrim ta che u. Ka thianpa thusawi ka hre chhuak thin. “Han nawr deuh ila, an lo duh leh kan hlawhtling, an lo thinrim leh ka fiamthu a nih kha,” tih mai tur a ti nia! Mipa hian an enchhin ve che u alawm.

In duh loh hian in hmel leh chezia zawng zawng nen duh lo teh u. Tih tak takah chuan pawgsual case awrh hi an hlau ve tho. Mahse, pawng nek deuha hneh theih nia an hriat chhung che u chuan an nawr lui dawn che u. In duh lo tak tak a nih chuan in hmui hmai leh nungchang leh chezia zawng zawngin duh lo ta che u. Hmeichhe duh lo tak tak hi chu an nawr lui bik lo. Mipa hian hmeichhe tha hi chu an zah tlat thin. Chu zahawmna chu in hlawhchhuah ve a ngai.
Mipa hian an hmangaih tak tak chu an nawr lui tak tak ngai lo. “Ka duh si a, min then ka hlau sia,” tih vang mai maiin inpe tawh reng reng suh. Sex hman i duh loh vanga then duhtu che chuan a hmangaih lo che tih hre mai rawh. Ui duh suh. Then hlau suh. Bumin awm fo teh suh.

Sex hi kan hlimpui tura siamtuin min pek a ni. Tahpui tur a ni lo. Sex hman avanga tah hi ka ngei tlat! Sex hman hmain inngaihtuah fel hmasa rawh. Nawr luih theih i nih si chuan a hnuah tap duh lem suh. Nawr luih ngai lo i nih ngat phei chuan tahpui hauh suh.

Facebooktwittergoogle_plusredditpinterestlinkedinmail

Inthlan Result leh a behbawm

Mizoram hmar lam khaw 31-a Village Council inthlan result puan a ni a, state-a rorel lai congress party-in V/C 15-ah hnehna an chang a, party malah chuan an chak tam ber. MNF party-in V/C 8-ah hnehna an chang a, ZNP leh BJP-in V/C pakhat ve ve an la a, party chak bik awm lohna khaw pali a awm bawk. MLA inthlan a la hnaih lem loh avangin V/C inthlan result hian ram pum huapin politics-ah nghawng a nei lian vak lo niin a lang a, party hrang hrangte pawh hi an lawm tlang viauin a rinawm bawk.

Tunkar chhoah bawk hian state panga MLA inthlan result puan a ni a, India ram politics ngaihventute tana langsar tak mai chu national party lian pahnih BJP leh INC-te thawm na tak karah hian regional party-te hi an lian tial tial hi a ni. State lian leh pawimawh, tun hnai deuha inthlang zingah West Bengal, Andhra Pradesh & Telegana, Tamil Nadu leh Bihar-ah te hian tualto party (regional party) an sorkar vek a, national party an tla na vak lo vek. Chutih laiin state tê zawkah national party an lian thung – Puducherry-ah congress party hruai an sorkar dawn a, Assam-ah BJP sorkar a ding dawn bawk.

BJP leh Congress party-te hi national party lian ber pahnih an ni mek a, tun hnai hian, zep thu a awm lo a, congress party hi a tlahniam nasa hle a. Chuti chung chuan ram pum huapin an la inzar pharh tha viau a, state tin deuhthawah hian rorel khawlah mi leh sa an la nei a ni. Kum 2014 MP (Lok Sabha) inthlan atang khan BJP hi an thawm a na hle a; mahse, an thawm nat ang huin a hnua hmun hrang hranga inthlannaah hian an tling tha vak lo thung. Tun hnai MLA inthlanah pawh hian Assam-ah chiah sorkarna an la thei a ni.

Tun hnai inthlan result-a thil langsar tak mai pakhat chu a vawi khatna atan Assam-ah BJP an sorkar dawn a, hmarchhak bial pum puiah BJP sorkar hmasakna ber a ni dawn bawk. Congress sorkar term thum hmang tawh paihthla thei khawpa Assam-a BJP hmasawn chakna chhan langsar tak chu an president, Kachari tlangval Sarbananda Sonowal hi a ni. Hmarchhak zirlai pawlah chuan tunhma atangin Sonowal hming hi a mikhual lo viau, Assam-a zirlai pawl hlun ber AASU leh hmarchhak zirlai inzawmkhawm NESO president hlun a ni a.

Zirlai hruaitu a nih lai atanga foreigner chungchanga nasa taka lo bei thin, Bangladeshi foreigner-ho thawn haw duh em em a ni a. Tun tum MLA inthlan campaign-ah pawh chumi chungchang chu auhla berah a hmang a, dan loa pem lutte dang tura India leh Bangladesh inrina hung hi Assam-a BJP sorkar ngaih pawimawh ber a nih tur a sawi uar hle thin. Assam sorkar thar hmalakna hi dan loa pem lut vanga harsatna tawk mek hmarchhak state dangte pawh hian an lo thlir thup ang a, state hrang hrang politics pawh a la nghawng ngeiin a rinawm.

West Bengal-ah hian Mamata Banerjee kaihhruai Trinamool Congress-in party dang thawhpui nei loin hneh takin sorkarna an la leh thei a, an khingpui lam CPM-Congress party tang dunten an hneh lo hle a ni. Tuna a lan dan chuan West Bengal-ah hian Mamata hi a insawhnghet deuh deuh a, Left party-te, BJP leh congress party tan hmun a la awm lo. Nu thawm na ve tak mai ni mah se sorkar laipui (BJP sorkar) nena inkungkaihna tha nei tura hmalak rual a, an state chhunga BJP lian thei loa siam dan tawk a thiam viau a ngaih a ni.

Tamil Nadu inthlan result hi makti vak an awm lo mai thei bawk. West Bengal ang thoin inthlan hma atanga thawm lian ber leh rinkai ber an chak ni maiin a lang. MPF awm ve lohna hmun a ni bawk a, an campaign boruak pawh a sang khawp mai. Tunhma lam ang thoin inthlannaah hian a thlawna sem tur chi tawktarh a vote zawn (freebie politics) hi an uar hle a. Mi thenkhatin an sawisel chung pawhin AIADMK leh DMK te hian vote zawnna atan a thlawn a sem tur an tawktarh uar leh hle pek a. AIADMK hian man tlawm zawka scooty leh mobile phone hralh te, pawl 10 leh 12 zirlaite hnena a thlawna laptop sem te, ration card-a hming chuang hmasa ber hnena cell phone sem te, free wifi te leh hamthatna hrang hrang an zuar a. Hetianga a thlawna thil sem ang chi hi sorkar sum harsatna thlen belhtu leh mipui rilru tipiangsualtu a ngai a, duh lotu tam hle mah se vote huina tha tak a ni tih erawh a chiang hle.
India ram hmun danga communist party-te an chet that vak loh laiin Kerela-ah chuan CPM kaihhruai Left Democratic Front (LDF) Party an sorkar dawn a. LDF hian inthlan campaign-na atan kum nga chhunga eizawnna hna nuai 25 siam belh chu auhlaah an hmang a. Hei bakah hian corruption tihbo leh state hmasawnna te an thiltum langsar a ni bawk. LDF hian Kerela a zu tihtlem leh a khuahkhirh an tum thu an sawi a. Tamil Nadu-ah pawh party lian pali – AIADMK, DMK, party 6 thawhhona People’s Welfare Front, leh Pattali Makkal Katchi ten ‘zu khap’ chungchang hi inthlan campaign auhla atan an hmang bawk a. Zu hi Tamil Nadu sorkar sum hnar lian tak pakhat a ni a, kum tin Cheng vaibelchhe 27,000 vel an la lut thin. Zu leh a kaihhnawih avanga harsatna an tawh nasatzia leh mipui nun a him loh phah tih an hriat chian avangin khap bur an duh tih a lang reng.

Tun hnaiah hian India ram politics hi a inlumlet nasa hle a. Sorkar laipuiin kalphung thar eng eng emaw a duang thar bawk a, hengte hian state hrang hrang politics a nghawng lo thei lo a. Mizoramah pawh kum chuang awrh hnuah MLA inthlan a hun leh mai dawn a, party hrang hrangte hian chu chu an thlir tan mek a, politics kaihhnawih thei tura ngaih pawl thenkhat thawm pawh a ri tan feih feih bawk.

Facebooktwittergoogle_plusredditpinterestlinkedinmail

Ka Huang (May 22, 2016)

Tun tum chu ka lung a len avangin Ralleng (Naga) rama kum 1953/54 vela Lower Division Clerk, Rs. 129/- p.m. ka hlawh laia ka hnathawh dan ilo vel ka’n sawi teh ang.

1953 Oct/Nov vela Tuensang HQa atangin khawchhak lam, Burma border depa administration post thar Noklak an tihah Base Superintendent, Zothangseia hnuaiah LDC-in ka thawk a. Zothangseia hi Base Supdt. hmasa ber ka ni, kei hi LDC hmasa ber ka ni. Type-writer te a awm lo, ziak chawp vek a ni. Dawhkan chu Ralleng chem seia thing phek chap a ni a, a ban leia phun tlatah kan kilh bet mai, feet khat leh a chanve vela hlai a ni ve thei. Thutthleng chu raw dap khauh tak thung khamah kan ram bet a, a ban phun tlatah kan thu leh mai. Ka hna chu Dak hawn, put up, lehkha chhuak tur char leh envelope-a thun, Base Supdt lehkha ziak copy siam (kut ziakin) Stoke keeper an awm loh avangin, store keeper hna. W/T thawn tur hawrawppuia ziah a ni ber. An la mawl lehchhawn zia mai chuh Cheng 4 (coin)-in Note Rs 5/- ka thleng thin. Note an la duh mang lo. Christmas card min rawn thawn a lo thlente hian, “Babu, engati nge puitling i ni si a, heti ang milem mai mai an rawn thawn che?” an ti thin. Lungleng taka thlir laia min han zawh hi chuan ben sawk mai an châkawm! An la ngawngzia leh an la pikzia chuh.. U Rinpuiin an awmpui hnenah, “Yankhum, Lal Isua chanchin hi hre ve tawh ngai em?” tiin a zawt a, “Memsab, ka hre miah lo, kan khuaah a lo la kal lo a ni ang,” a ti heh mai a ni. Fiamthu ti takin ka sawi thin a, “Keimi te nen inpawlh deuh chuat kan nih avangin (an sawi danin) Lalruanga te hunah kan kir a ni. Keichala te pawh an awm ta ve ang,” ka ti thin. Keimi kha an nei deuh fur mai a, Tuensang HQs-a store chowkider Phulekha nupui pawh keimi niin an sawi a, zinga a thote hi a hma zana a sa hel eina, a ka vel a thi sung thin an ti thin, ka hmu ve hlei lo a!

Kum 1954 Khrismas dawn kha ni tain ka hria, Burma ram dep ber khua Pangsha (18 km from Noklak)-ah chuan kum khata thla bial hnuhnung berah hian kut an nei thin a, hmeichhe zan leh mipa zan an nei thin. 1953 khan kan Base Supdt. nen kan kal nghe nghe a, chawhnu dar 2 velah an khua (Nokyiing) kan thleng a, veng mawng atangin kan luhna apiangah chaw min hlui sia, chumi tlai chuan vawi 7 tlawng kan ei, kan kham ngei a nia! Chu kum tawp thla bial hnuhnung chu an la urhsun em em mai. Hmeichhe lam zan chuan kan tel ve a, an inchei dan chu, pawnfen dum, feet khat vela hlai bak chu Ngai zik no var lai hi inches 3/4 vela hlaiin an ngalrekah an tawn var far mai a, a kualin meipui an lam hual thin. Kan han kal veleh hla “Thongbu hong pe, Ti kiua dha?” tiin min lo sak khum a – Sawrkhar an lo kal ta sia, eng tak min pe ang maw? tihna a ni – Kan Base Supdt. chuan political present – Chi bag 20 a pe a ni. Mim zu (phuah an tih mai), keinina zupui kan tih ang mai da duak mai an/kan in tluk tluk mai a ni. Chutih lai chuan in tinah Lawi/Sial/Bawng/Vawk/Kel a eng emaw tal an talh a, thenawmte a phel phelin an inpe a, pathlang lamah hian an khai phek thler thlur mai a ni, a ram a vawh avangin a uih mai mai lo.

Kum 1954 Khrismas dawn chuan thla bial kut hnuah December ni 25, Christmas ni a tla tlat mai a, Thingsiu (Zu-in = Non-Christian) hoin kum khar kut hnuah kut dang awm a thiang lo. Khiemsiu (Tui-in = Christian) hoin an kut (25/12) chu kan kut hnuah an nei tur a ni lo an ti ngut mai si. 1954 tawp lam kha chuan Pangshaah pawh Khiemsiu (Khristian) chu in 40/50 lai vel an awm ve tawh a ni. Anniho chuan Khrismas ruai theh chu an tum tlat mai si. Insah an ngam takmeuh mai a ni. Lamtham an lo kal a, “Va rem rawh u, chuti lo chu an inthat teuh mai ang,” an rawn ti thin. Chutih lai chuan kan Base Supdt. an transfer tawh a, a thlaktu Mr. Dasa a lo la thleng si lo, kei LDC mai ka mal awm a, ka chhuahsan ngam si lo. W/T HQs-ah ka thawn sek mai a – a tawpah chuan Store keeper Sircar-a a lo thleng hlawl a, Va kal ka tum nghal a – Mel 12 phei deuh hlir (km 18 em ni) a nih avangin Sipai section khat – NCO 1 leh sipai 6 min pe a, chawhnuah kan chhuak ta vang vang a. Sipai chu an outpost-ah an riak a, kei chu Mongjona pa inah ka lum lut tawp mai a, sipaiho kha an lungawi lo deuh mah se ka tlangnel ve hrim hrim a, an camp lam ka pan lo. A tuk zingah kan kawmthlang pain min rawn ko a, ka zui nghal a. Raw thei No (Chunga) lian tawkin thingpui sen min pe a, lawi lung pum hi min pe tawp mai , ka puar kher mai!

Thubuai chu Morungah kan rem ta a, Sipai kha an lo thleng vat a, chu Morung chu an hual a. Ka thiam ang tawkin ka thlem a, Khristianho chu Khristian an nih avangin nem zawka thu kalpui turin ka thlem ngar ngar a. An biak in chu kulh pawn lama mi a nih avangin 25/12-a Khrismas ruai theh chu phal turin ka ngen ngar ngar a, a tawpah an phal ta hram a, “Mahse, Changel an inah leh an biak inah an tar tur a ni lo,” an la ti leh ta zel a. chu chu Khristianho chu ti lo ngei turin ka ti a, an remti ve ta a, an inrem ta hram a ni. A tira Court kan hawn tirh chuan an chem sei an phawi a, an vilik zuai zuai a, a kuk ruih ruih mai a, insah mai kha an ngam sarh mai a, an hlauhawm khawp. Tichuan, lungawi theia an awm tak avang chuan kei pawh chuan political present tiin Chi bag 20 Thingsiu ho ka pe a, bag 10 chu Khiemsiu ho ka pe bawk a, Khrismas thawhlawmah Rs. 20/- emaw ka pe ve bawk. A tlem ti suh, Mizo ar ang hi 20 a lei theih a nia!

Khang hunah kha chuan Clerk e bal e a awm hlei thei lo – chu kei pawhin ka va rem mai a, ka rem ang kha sawrkhar pawhin a pawm tho – khanglaia ka nihna kha ziak loin – Peon cum LDC cum Magistrate cum a tul apiang titu ka ni ber awm e. Mi sual (miscreant) nia kan hriat chu kan mantir a, Assam Rifles lock-up-ah kan khung ve mai zel, magistratial power neih lam pawh a ni lo. Ka pu Suakhnuna diary-in, “Vawiinah pisa ka kai, a tul apiang ka ti,” a tih ang mai, a tul apiang kan ti tawp mai a ni.

Facebooktwittergoogle_plusredditpinterestlinkedinmail

Serkawnah NE Kohhran Inkhawmpui

Aizawl: Ninga zan atang khan India hmarchhaka Kohhran hrang hrang inzawmkhawm pawl, North East India Christian Council (NEICC) Inkhawmpui chu Mizoram Baptist Kohhran, Sêrkâwn Biak Inah hman mek a ni a, zanin hian a tiak ang.

Kumin inkhawmpui hi Session 77-na a ni a, Second Biennial Session a ni bawk a. Thupui atan hian “Christian Presence in the World” (Christiante – Khawvela kan awm chhan) tih chu hman a ni a. India Hmar chhaka Kohhran pâwl hrang hrang aiawh (palai) 400 vel leh NEICC hruaitute an tel mek a ni.

Ningani kha palai leh zaipawl te thleng kim ni a ni a, Zirtâwp leh Inrinni chhunah Committee hrang hrang leh in dawrtawnna/inkawmhona (Bussiness Session) hmangin zan lamah vântlâng Pathian biak inkhawm hman thin a ni ve thung.

Zirtawpni nileng khan Standing Committee thut a ni a, nizan atang khan inkhawmpui thupui ngaihthlak tan a ni a, mi hrang hrangin thupui hi an insawi chhawk a. Zanin hian President kalchhuak, Rev. Zosangliana, Mizoram Synod hnen atangin Valedictory Sermon ngaihthlak a ni bawk ang.

NEICC hi November 23, 1937-a Assam Christian Council hming pua din a ni a. Kum 1962 khan tuna a hming ang hian thlak a ni a. Kohhran hrang hrang inunauna tha, thiltihho leh thawhho, hmarchhak Kohhran hrang hrang aiawha a tul hun atan hmalak, kohhran inpumkhatna dap, Mission lama thawhona tha siam leh khawtlang leh rama chhunga thil tha lo do te chu Kohhran hrang hrang inzawm khawm pawl din chhan ber a ni.

Facebooktwittergoogle_plusredditpinterestlinkedinmail

Hnuchham chawmna Enna In building thar hawng

Aizawl; Salvation Army, India Eastern Territory-in Kolasib-a rawngbawlna a kalpui zinga pakhat, hnuchham enkawlna ‘Enna In (Boys Home)’ building thar chu Zirtawpni khan Chief Secretary Lieut-Col. Davidson Varghese chuan Pathian hnenah hlanin a hawng.

Enna In building thar hi chhawng khat neia sak a ni a, a dung feet 80, a vang feet 40-a sak a ni a. Building hi SA Germany Territory tanpuina atanga sak a ni.

Enna In Boys Home hi SA hian kum 1980 atangin an lo kalpui tawh a. Mi eng emaw zat enkawl an lo ni tawh a. Tunah hian mipa 19 (kum 7 atanga kum 18 inkar) an enkawl mek a ni.

Enna In Boys Home rawngbawlna hlutpuitu, tun hun thlenga tanpuina pe thintu, SA member bakah sorkar thuneitute leh Sipai Pawl thian tha, mi mal, pawl leh kohhran te chungah leh Germany Territory te chungah SA Territorial Headquarters chuan lawmthu a sawi a ni.

Building thar hawnnaah hian Chief Secretary hi a nupui, Lt-Col. Mariamma Davidson, Territorial Secretary for Women’s Ministries te, Project Secretary Major Lalsangpuii leh Public Relation Officer Lieut. Charles Chalrimawia te’n an tawiawm a ni.

Facebooktwittergoogle_plusredditpinterestlinkedinmail

UPC driver-te pualin retreat

Aizawl; Ningani khan North East India huam chhunga UPC Driver-te pualin retreat thawh khatna chu UPC General Headquarter Office Mualpuiah neih a ni a, Resoure Person atana ruat, Rev. P.Chunga leh Rev. K.Darsailova General Superintendent hluite chuan an paper buatsaih an zirpui a ni.

Rev. P.Chunga hian ‘Motor enkawl dan leh Displine’ tih paper a buatsaih a, Rev. K.Darsailova hian ‘Driver Ethics & manner’ tih chungchang a buatsaih ve thung a ni.

Retreat thawh khatna neihah hian General Headquarter Office, North Mizoram District leh Aizawl East District-a thawkte pualin neih hmasak phawt a ni a. Thawh hnihna hi September thlaa neih tura ruahman lawk a ni a. Thawh hnihnaah hian thawh khatnaa tel loho zawng, Mizoram chhung leh pawn lam a mite an tel ve thung dawn a ni.

Facebooktwittergoogle_plusredditpinterestlinkedinmail

Pentikost Ni-ah kawngzawh

Aizawl; Pathianni hmasa, Pentecost Ni pual khan Mizoram UPC thalai pawl, General PYD buatsaihin ram pumah Mihlim kawngzawh leh Mual inkhawm neih a ni.

Mihlim kawngzawhna leh Mual inkhawm hmanna pui ber hi Aizawl District chhungah hmun hnihah neih a ni a, Aizawl Hmar lam Pastor Bial ngaten Bawngkawn atanga tanin Chaltlang Dawrkawn thleng kawng an zawh a, Tirhkoh Laltholeha, Tirhkoh R.Lalrawngbawla leh Tirhkoh Ramdinsanga ten Pathian thuhril rawngbawlna hun an hmang.
Aizawl chhim lam Pastor Bialte chuan Vaivakawn atanga Dinthar kawn thleng kawngzawh leh Mual inkhawm an hmang ve bawk a. Tirhkoh CH.Lalhmingmuana, Tirhkoh Lallawmsanga leh Rev. Thangliansanga ten Pathian thuhril rawngbawlna hun an hmang ve bawk a ni.

Facebooktwittergoogle_plusredditpinterestlinkedinmail

CKTP C/M-te pual retreat

Aizawl; May 13 & 14, 2016 chhung khan CKTP Committee Member-te chuan Synod Conference Centre-ah riak lutin Orientation cum Retreat an hmang.

Hun thumah thenin hun hmasa berah Rev. B.Sangthanga, Executive Secretary i/c KTP-in thuchah a sawi a. Hun hnihnaah Leader Rev. Zothansanga’n thuchah sawiin Gen. Secy. Upa Zonunmawian CKTP kalphung hrilhfiahna hun a hmang thung.

Hun then 3-naah Rev. K.Lalrinmawia, Synod Mission Board Secretary-in hun a hmang ve thung a. Heng hunah te hian zawhna leh chhanna hun hman a ni bawk.

Facebooktwittergoogle_plusredditpinterestlinkedinmail

A tak ram hmachhawn tura inzirtir

Lirtheia sumdawng pawl intel khawm Commercial Vehicle Joint Action Committee te’n Sawrkar lakah ngiat neiin an duh ang thu lawmawm an hmuh hma chuan lirthei tlan an chawlh tir zel an tum a. Sawrkar lirthei te chu service tir an nih phah a. CM leh Department changtu minister te pawhin theih tawpin sawrkar a fan tawh a, tihngaihna a awm rih lo tih thu a sawi tawh bawk a. State Transport Authority chuan mipui tana service leh nghal turin lirtheia sumdawng te chu thuchhuah hmangin a hriat nawn tir ta hial a ni.

Eizawnna/sumdawnnaah hian mipui nunphung buai nghal khawpa nghawng nei thei a awma, chutiang zingah chuan commercial vehicle te hi rinluh an ni saa, sum emaw hlawkna emaw ngawr ngawr an um thiang lova, rawngbawltu rilru pu ngam tura beisei an ni. CVJAC chet dan enletin mipui rilru an hliam a, thlawp an hlawh lo tih hriat a hun tawh a, in enlet sela a tha awm e.

Chutih rualin zawhna a awm thei nual a- hetiang dinhmun thleng thei tur hian ngaihsak an hlawh lo em ni? Mi mal vested interest a tel em? Pawlah kal fawr deuh an awm em ni? tihte an ni a. Mi mal tlawmngaite’n thlai zuarte leh mi dangte an phursak thlenga an hmer tel hi a pawi hle a, a tuartute chu kuthnathawk leh mi rethei te an ni a. Eizawnna petu mipui zahna nei lo niin ngaihdan lian tak a awm ang tih a hlauhawm khawp mai. Hetiang ang luai luai ngai lo hian tih dan dap sela mipui pawhin dem lovin an thlawp zawk ang.

Chief Minister leh Department changtu minister-te’n a tak ram an sawi bawl hi ngun taka ngaihtuah zui tlak niin a lang a. CM chuan license cancel sakah Sawrkar a inhuam thute, an thil ngiat chu a hlawhtlin a hlauh thu a sawi phah a. Transport Minister pawhin an phut ber nia lang life-time tax chu Session inkara dan siam Assembly thut leh hmasak bera pass tura ngaih ‘ordinance’ duan mek a nih thu a sawi tawh bawk a nih kha. Tun hma atangin pawl intel khawm anga sawrkar kartluk a ni tawh thin a, hlawhtling lo tur intiam te pawh a awm tawh a ni. Tun thil thlenga a nihna ang rawta ramhruaitute’n tawngkam an nei hi beiseina pe ting tanga inthlah ai chuan kan thatpui zawk a rinawm a. Mahse, ramin thawh chhuah a neih loh avanga rethei ram kan nihna hmatheh erawh Sawrkar tih tur a ni hauh lo thung a, inbuk tawk (standard)-tir Sawrkar chuan a tum tur a ni. Kum tam a inmun hnuah sum harsatna nasa tak kan tawka, inrenchem turin Sawrkarin hma la in a chhunzawm zel tur thu Finance Minister-in khauh taka a sawi a, kan dinhmun dik tak rilrua pawm phah an awm beisei ila, seilennain a zir loh vanga ‘awih thei miah lo’ an la awm nual a, hmabak a ko hle mai.

In bawl kual loa dinhmun dik tak ram hruaitute’n an sawi ngam ta fo hi hmasawnna chi khat a ni a, Sawrkar hi ‘’belte phai thei lo’ a ni bik lo tih pawm thiam a hun ta hle.

Lirtheia sumdawng pawl te’n Sawrkara an ngiat thenkhat tih hlawhtlin sak awm te chu tih mek a ni a, a lawmawm viau e. Thil awm lo anga lang te pawh an dinhmuna indah chuan tih awm rengah a ngaih theih mahna. Chutih rualin duh dan angin a kal vek ‘theih loh’ tih min hriat nawntirtu leh ‘a tak ram’ hmachhawn tura rilru min siam tirtu ni se a duhawm hle mai.

Facebooktwittergoogle_plusredditpinterestlinkedinmail

Lirnghing Hlau ve lo!!

– Dr. Laldinpuia
Gen. Secretary, GSM,
PUC: College Veng; 9862399478

Lirnghing tawk ve thei ram zingah zirbing miten min dah ang ngeiin, lirnghing nghawr hi kan tuar ve ta fo mai. Kan fel avang leh Pathian kan tih viau avanga lirpuiin min kal kahlen ang zawnga ngai kan awm mek laiin, kan sual tawh em avanga tawk ve anga ngai kan awm bawk. Hetia lir a’n nghin tak zeuh zeuhah chuan, mithiamte sawi leh DM&R lamin inzirtirna an pek thinten kan beng a fah tan a. Mahse, a reh rei deuh chuan hlau lo ang maiin kan ram neihna lai laiah lei kan lai a, awih pang pawh pawisa lovin in kan sa a, kan khawr pum nawk nawk si! Kan in leh lo dinhmun an hmuh hian, lirnghing tawk thei ram ni si ‘Lirnghing hlau ve lo’ min ti pawh ni se a mak lo ve! Kan hlauh ve deuh hleka kan inven theih nan lirnghing chungchang hi i han thual nawn leh teh ang.

Lirnghing tam ber hi chu leilung sakhat hlawm (plate) che atanga insiam a ni a. Leilung innawr tawnin a dawl loh chin, a chak lo laiah inpelhsawlh/khi chat (fault) a insiam a. Innek tawn reng, innawr tawn rengah leilung fan theihna in a tlin tawh loh tawpah hian, kum tam tak chhung thahrui lo inchhek khawl tawh kha vawi leh khatah a rawn chhuah ta thut thin a, hei hian lirnghing a rawn siam a. Lian tham taka thahrui a chhuah chuan leilung han insiam rem leh khan nghin nawn (aftershock) a siam leh a, lirpui aiin a nghawr na tawh lo. A chang chuan, lirpui thlen hmain thawn hmasa (foreshock) a awm thin a, hemi hnua lir lo nghing kha a na zawk thin. Lirnghing lian tham apiang hi a nghawr hun chhung a rei a, a nghawng pawh a na zel.

Lirnghing thlen theihna bawr leh a nghawng thei turte hi chu a hriat theih a, engtikah nge, engti anga nain nge a nghing ang tihte hi an chhut nasa hle. A thenah han sawi dik ve fuk mah se, a dik vek lo; lirnghing zirmi (Seismologist) te chuan lirnghin hun tur tak han sawi chut chutte hi an ching duh mang lo! Chuti anga nasain lo nghing ta se, tih lam hawi hi sorkar, khawtlang leh chhungkua, mimal kan lo inbuatsaih theih nan sawi a ni thin a. ‘An sawi ang taka na hian a nghing dawn’ a tih theih loh a, ‘a nghing dawn lo,’ tia han tan kawh viau pawh a theih chuang lo! A nihna takah chuan kan thiamna, zirna leh khawlin a hriat theih chin hi lirnghing hun tur hre tur hian a la tlem hle si a.

Zirbingna atanga hmuh chhuah dan chuan India ram hlawm (Indian plate) hian kum khata mm 58± 4—a chakin a thenawm ram hlawm (Eurasian plate) hi kan nek a, Himalayan tlangdung bawrah ringawt hian kum khata mm 17.52± 2 –a nawr chho ang a ni a, hemi awmzia chu kum tin cm 2 zelin Nepal ram hi nawr tawm zel a ni. Kum 100 a lo tlin hian Eurasian plate hi hmar zawngin cm 200 zeta nawr ang a ni a. Heti ang innek tawn atanga thahrui lo inchhek khawl hi lirnghing hmangin a lo inpaih thawl tawh thin a. Chung zinga India hmarchhak/Himalaya tlang hnaih ram nghawng na zualte chu – Shillong lirnghing (M 8.2, June 12, 1897) – mi tam zawkte pawn lama an awm lai tlai dar 5:15 vela nghing mi 1,542 thihna, sq. mile 30,000 bawra in zawng zawng chhe vek khawpa lirnghing nasa, India rama lirnghing chhinchhiah hmasak ber te; Kangra (H.P) lirnghing (M 8.0, April 4, 1905) te, Shrimangal (Assam) lirnghing (M 7.6, July 8, 1918) te, Dhubri (Assam) lirnghing (M 7.1, July 2, 1930) te, Nepal-Bihar lirnghing (M 8.3, Jan. 15, 1934), Assam lirnghing (M 7.2, Oct. 23, 1943) te, Arunachal Pradesh-China inrina bawra lirnghing (M 8.5, Aug. 15, 1950) mi 1,520 thihna, mi 400 vel an thihna Manipur-Myanmar inrina bawra lirnghing (M 6.6, Aug. 6, 1988), mi 9000 dawn an thihna Nepal lirnghing (M 7.8, Apr. 25, 2015), mi 11 an thihna Imphal (Manipur) khawpuichhak lirnghing (M 6.7, Jan. 4, 2016) leh Molaik lirnghing (M 6.9, Apr. 13, 2016) te hi a ni.

Satellite thlalak atang pawha Mizoram chhunga chiang taka lei inpelhsawlh/ khi chat (fault) hmuh theih, lirnghing pawh han siam ve thei nia rin chu Mat fault(Mat lui dung) hi a ni a. Ding lam zawnga inpelhsawlh chi anga ngaih a ni;a inpelhsawlh thui zawng atanga chhutin, Dr. Lalliana Mualchin chuan MMS/Mw 7-1/4 thlenga na lirnghing siam thei turin a ngai. He lai hmun hi che reng tura rin a ni a; mahse kum 6 (2006- 2011) chhung kum tin hunbi neiin, dahna hmun bikah hun bi tuk chhunga GPS hmanga a chet chak dan endik thin a nih hnuah, khawlin a enfiah theih chin km 6 thlenga thukah chuan ngaihmawh thama nain lei hi a che lo nia report a ni (Tiwari et al., 2015). Heti lai lei inpelhsawlh hian lirnghing hriat tham a siam lo tihna ang deuh a ni a; mahse, Mizoram leh a chhehvel lirnghing tehna khawl hmanga thlithlai tawhtu, Dr. Saitluanga (PUC) chuan, khawl hmang chauha hriat theih chi (M 0 to 3) a chhinchhiah nual thung. Zirbingna thuchhuah hrang hrang atanga thlirin kan ram chhunga insiam lirnghing aiin kan chhehvel rama lirnghing thleng hi kan tuar tam ber leh kan la tuar zin tur pawh a nih hmel.

Chhinchhiah theih china Mizoramin lirnghing kan tawrh nat berte chu kumin January 4 tuk dar 4:30-a nghing M 6.7-a na te, April 13 zan dar 7:25-a nghing M 6.9-a na leh February 4, 2011 zan dar 7:25-a M 6.4-a naa nghing te kha a ni. Hengte hi ram pawna lirnghing insiam ni mah se, Mizoram pumin kan hria a, concrete tuizem put leh in leh hmun thenkhat khi tih loh chu thi leh hliam an awm hriat a ni lo thung. Pu Laltanpuia Zadeng (MIRSAC)-in a zir chianin Mizoram chhunga lirnghing thlenna epicenter atanga khaw hnai ber zelah hetiang hian kan tuar bawk:- Vathuampui-ah, Nov. 25, 1994 (M6.1), Lamherh (25.7.1949; M6.0), Phullen (8.2.1986; M5.5), chhim tawp, Burma ramriah (2.11.1989; M5.4), Vaphai (27.11.1989; M5.2), Riangtlei (10.3.1990; M5.1), Dampa sanctuary chhungah (23.12.1977; M5.1) leh Sakawrdai (19.4.2011; M4.5) te a ni a, hengte hian thil tihchhiat liantham a nei lova hriat a ni.

Chhiatna thlen nasa thei bera sawi- lirnghing kan hlau a nih chuan in leh lo kan dinna hmunah han fimkhur phawt mai ila. Leimin tawhna ang chi leh, hmun awih lutuka in sak pumpelh zel nise. Hmun zâl leh rem thaah a awm vek theih loh; awih tlana in kan sa a nih pawhin a tlem thei ang ber lei laih ni se la. Pucca building kan sa a nih pawhin himna dan hrang hrangte zawm thlapin, Engineer/Architech rawnin sa ila. An duan ang leh an thu ang kan tlin dawn lo anih chuan, kan phak tawk thlirin, Assam-type building te hi i uar leh teh ang. In zâng leh hniam apiangin an tuar na lo a nia. In hi a san poh leh a sawi na a, a rih avangin a innghahna leiin a dawl loh a hlauhawm a. Lirnghing nghawrin an nghawng chhuah theih, ruah bawhawk sur avanga kan tuar fo leimin hi kan ram tan chuan a hlauhthawnawm zawk a. AMC Building regulation te hi a zawng a zain zawm thlap thlap vek lo mah ila, hmun dang ngaihtuahin kan in sak ngawr ngawr hi chua tha tawk mai thei; mahse, kan in sakna, building lian leh rit innghahna kan ram leilung hi a ngheh lutuk loh bakah ruahtui dawng tam ram kan ni si a.

Biak In leh puipunna hmuna awm tam kan ni a, hetih rual hian kan Biak In sak dan hmang leh puipunna hmun kan sak leh chei dan hian himna dan tam tak a phak lo a. Kohhran tam zawk chuan kan duantir Engineer thiam zawkte thurawn aiin, a sak danah Committee leh mi mal ngaihdan kan la lutuk em aw, a tih theih. Kan chenna in, vantlang punkhawmna leh Biak In hmunhma te hi kan sak hmain leilung zirmi (Geologist)-ten uluk taka an enfiah hnu ni thei se. Kan in sak pianhmang pawh a mawi dan tur ngaihtuah chunga a hmunhma ngheh dan leh a in sak ngheh dan tur ngaih pawimawh lehzual ni se la. A chhung kan cheimawina pawh a mawi tur lam thlir chungin, lirnghing ta se, a hnuaiah thlamuang takin kan awm ngam angem, tih ngaihtuah chunga siam ni thin se. In chung hi cement plaster ai mahin, rawng han hnawih mai emaw, kan bel mawi duh a nih paw’n plastic leh thil dang zangkhai hmanga cheite pawh hi a intihhmuh chi khawp ang. Khawpui mai ni lo, thingtlangah pawh concrete-a in sak kan uar chho ta hian ngaihtuahnaa ti kal thui khawp mai.

Kan khawtlang, kan in leh lo enfiah kawngah tanpui ngai leh puih ngai kan awm a nih phawt chuan Mizo Geologist-te awmkhawmna – GEOLOGICAL SOCIETY OF MIZORAM (GSM) te biakrawn theih reng kan ni.

Facebooktwittergoogle_plusredditpinterestlinkedinmail

Login

Lost your password?