Monthly Archives: May 2016

Sawhkhawk (May 22, 2016)

SAWHKHAWK of the day
Miin an sawisel tawh thin cheu em ka hre lo va, kei chuan ka chhiar ve tawh chinah hi chuan in fakawm khawpin ka hria. In chanchin thar ziah pawh a huap a zau khawp mai. In chanchinbu hi a phek zawng zawng chhiar deuh zel chi ka ni ve a, sawiselna lai tur cheu ka nei ve vak lo. Chhut sual hi chu hetiang zar chhut chuan a awm ve zauh zauh lo thei lo niin ka ngai hmiah a, in eizawnna mah ni se fimkhur vek zen a ni lo vang tih ka rinpui cheu a ni. Chutih rual chuan hmasawnna tur nei miah lo chu in ni lo va, in tan zel chuan hei aia tha hian in chhuah thei tih ka chiang, tang zel teh u. – Asawmi

Chhut sualah hian an sawisel khât ta khawp mai cheu va; mahse, tun hnai issue hnih velah hian a awm leh ta zeuh zeuh niin ka hmu che u. Han tang mar lehzual teh u. – 8974107549

Zalen chanchinbu a chhiar uluk leh chhiarna pawh rei ve pawl tak niin ka hria a, ka fak thin khawp mai che u. Tun hnaia huang in rawn zauh thar, Feature in rawn dah thin hi a tha khawp mai. Kawng tam takah bengvarna min petu a ni a, kan hriat loh, kilkhawr tak tak min hrilhhretu tha tak niin kei chuan ka hmu a, a lawmawm ka ti hle a ni. – 8974107549

Engtik nge ni ta ka hre ta chiah lo, mi pakhat chauh thuziah chhiar chu a nawm rualin a rualkhai lo ang deuh zawng khan SAWHKHAWK-ah hian an rawn ziakin ka hria a. Kha thlirna kha a dik thei khawpin ka hria. Tuna ziaktu inneih, Pu Lalthlamuana Ralte hi ram pumin kan hriat chian, mi thiam, thil thlir thiam, inzir peih mi tak a ni a. A thu ziakte pawh hi min tibengvartu leh thil min hrilhhretu tha tak an ni hlawm a. Amah hrim hrim hi a tha lo tihna lam ni lovin, a ngai ang chi hi thlirna khat chauh a nih theihna lai a awm vein ka hria a, ka rawn vei ve deuh a ni. A thu ziah thin erawh kan chhawr khawp mai, mi zingah pawh titi tur ka hriat phah! – Mapuia pa

Kar hmasa khan Sawhkhawk-ah hian tual chher zu that zawk finfiahna thu kha a rawn lang a, ka ngaihdan chiah a ni. Tun hnaiah kan ram zu chhia a tam tih hi chu a dik mai thei a; mahse, hman deuh, heti taka sapzu a tam hma kha chuan kan ram zu siam chhuah kha a tha lo rau rauvah chuan a tha zawk niin ka hre ve thin a, a dik ka ti ve tlat. Thu rawn thawntu sawi ang khatih hun laia zuin kha an dam rei thei em mai. – 8794686442

Sapzu leh tualchher zu chungchangah kar hmasa khan mi pakhatin a hmuh dan a rawn thawn a, ka lo chhiar fuh ve hlauh mai a, a dik tawk lo deuhvin ka hria. Keia lo hmuh dan chuan tun laia Mizovin RV vel atanga zu an siam chhuah hi chu regular taka in chuan kum 10 vel bawr bak an in hman lo niin ka lo hre ve, “An mawng a depa an biang a puar hmain an thi zel,” an tih fiamthu hi dik niin ka hria. Sapzu ngawr ngawr fak lam ni lovin, hman deuhvah chuan kan ram zu siam chu a tha zawk ang, kan pate rual khan an in rei theiin an thihpui har thei em mai a; mahse, tun hnai bika kan ram atanga chhuak hi chu a tha tawh lo tih ka rawn sawi ve a ni e. A dik zawk pawh ka ring. – Zuala

Kan rama inthlanpui ngaihven hlawh tak tak result puan a ni ta a, ka lo thlir vena mawl tak atangin a ram pum ang hian Congress hi kan ning ta emaw tih theih niin ka hria. Assam meuhah pawh an tla ta mai a, a mak hial zawk a ni. Congress ngawr ngawr hi chu hman atanga kan rama political party pawimawh a ni ngei mai a; mahse, tun hnaiah hian an aia tha zawk an rawn chhuak a, rorel leh ram hruaia rintlak zawk, anni aia tha an rawn lang tan niin ka lo hmu ve. Keini sawi phak phei chu a awm chiah lo na a, a ram pum huap hian an insiam that ve hret hi chu a ngai niin a lang. Eng nge in ngaih ve dan ni hlawm le? – 8794686442

Sumdawng lirthei an han nuar chu a nia, a tuartu hi chu a nuar mek leh mi rethei bawk hi kan ni si a nih hi!! An nawrh chhan leh an thil phut hi thil awm lo a ni lo, chutih lai chuan mi retheih tete hi min hrek nasa lutuk a ni. A?bulpui chu sorkar rorelna fuh tawk lo hi a ni zel thovin ka hria, kan ramah hian mi retheite tawrhna hi a reh thei tak tak dawn loh a nih ber awm hi maw?!! – 9436360899

Sumdawng lirthei an han nawrh meuh chuan kan ram chu a buaithlak hle mai. A bikin keini nu leh pa, veng hlaa fate lo dah ve laklawh tawh tan phei chuan a buaithlak zual khawp mai. An sikul an tan hma si a, a hruaina tur lirthei kan nei ve bawk si lo va, an nawrh loh pawha zing thawh hlim atanga buai ngai kha a nia, kalna tur lirthei an nei ta bawk si lo va, tan zual a va han ngai em! A ngaihna hria khan an lungawi theih nan hma han la teh u, kan mangang a ni e. – Amtea

Fura kan ramin khuarel chhiatna a tawh thin chungchang kha ka lo chhiar a, a dikna chen a awm in ka hria. Fur laia leimin tam tak hi chu a bul hnaia cheng mihringte kan inven lawk loh vang leh kan fimkhur tawk loh vang a ni ve fo mai. Kan dithlifarfem duh duhnaah kan fartir a, kan tuichhe paihna lah kan uluk bawk si lo. Khuarel chhiatna tiin sawi fo mah ila, khuarel ai mahin keimahni leh keimahni kan inpek a nih theihna chen a awm. I fimkhur lehzual teh ang u. – Mamawitea

Pathian leh a Kohhranah hian han nghet phawt zel mai ila, a lo hahdam ber mai. Chhiartu duhtak, engtikah nge i Pathian hi i tawh dawn i hre lo va, kei pawhin ka hre lo; chuvangin, i awmna hmun apiangah Pathian hi tih la, a thupekte vawng la, a chhandamna che hi pawm la, i Pathian tawk turin inpeih rawh le!! – 8974232935

Mizo hmeichhiate hi hnamah kan chiang ta lo em ni aw a tih theih, hnam dang pasal nei kan tam tawh danah hian. Mipa zingah hi chuan a nei sawi tur an tlem khawp mai. Tin, hnam dang hmeichhiate hian Mizo mipate hi an duh ve vak lo, neih pawh tum ila min duh a rinawm loh. Kan Mizo hmeichhiate hi eng kan ti zo ta nge, Mizo mipa neih tlak kan awm lo em ni? I inngaihtuah chiang teh ang u. – 9856606371

Rihsang mual liam hnu chunnu lungdam tein biahthu min hlan thin a, hraite hringnun lamtluang hi luipui luang angin a liam leh mai thin a ni. Chu lui dai kaina zawnga raltiang ral i thlir laiin hraite Lal Isua ka nei si a, chu luipui chu min hruai kai ang. Saisen laiin chunnu hmangaihna ka lo hre thiam lo va, tunah chuan lo seilianin ka lo hre thiam ve ta. Chauh chang ni lo thleng thin mah se hruai kaitu Isua ka nei a, lairilah a lo thar leh thin, chunnu hmangaih biahthu zawngte kha. – 18yrs girl Lungsum

Facebooktwittergoogle_plusredditpinterestlinkedinmail

Jail-ah kumtlinglo tang 3 hmuchhuak; Mipa 1, hmeichhia 2

Aizawl: Nikum 2015-2016 chhung khan ni za inhlawhna tia Aizawl: District Child Protection Unit Aizawl, Child Welfare Committee, Juvenile Justice Board leh Aizawl District Legal Services Authority atanga aiawh Expert Panel ten Central Jail leh District Jail ah naupang kumtlinglo an awm leh awm loh an enfiah a, naupang 3 an lo awm tih an hmuchhuak.

Delhi High Court thuchhuak kal zel bawhzui in Jail pahnih te hi enfiah a ni a, The Juvenile Justice (Care &Protection of Children) Act, 2015 chuan naupangte hi Jail-a dah a khap tlat bawk a, he dan tihhlawhtlinna turin endiktu turte hi rawn ruat an ni a. Central Jail leh District Jail ah hian Expert Panel te chu Zirtawpni khan kalin heng Jail pahnih te hi an endik ta a ni.

Jail-ah hian naupang puitling ang a inchhal leh puitling emaw tih jail a lo dah mi 3, hmeichhia 1 leh mipa 2 an lo awm a, he mite hi sawn chhuah an nih theih nan leh anmahni chunga roreltu tur Juvenile Justice Board hnena hlan an nih theih nan hma lak nghal a ni.

Tang hmeichhiain an fa te an hruai luh naupang thla khata upa atanga kum 6 mi thleng naupang 5 an awm bawk a, heng zinga a lian deuh tawh mipa naupang pahnih kum 5 leh kum 6, unau te chu Child Welfare Committee-in jail-a an awm ai chuan Shelter Home a dah chhuah rih tha an tih thu an sawi.

Central Jail-ah hian tun dinhmunah mipa lamah mihring dawlzawh zawng (capacity) 480 anih laiin tang 619 an awm a, hmeichhe lamah capacity 77 a ni a, 68 an awm.

Facebooktwittergoogle_plusredditpinterestlinkedinmail

Tinreng Feature : Referral Hospital & mipuite

Aizawl: Hnam changkang leh ropui ni tur chuan a ram chhunga chengte an hrisel a, tisa leh rilru lamah an dam a ngai a. Damna nei tur chuan damdawi thiam tam tak ramin a mamawh thin a ni. India ramah hian kum tin Doctor zir chhuak 50000 rual vel awm anga chhut ni mah se Doctor indaih lohna a na hle a. A bikin hmarchhak state-ah te damdawi thiam mamawhna hi a sang zual hle a ni.

Mizoram ah pawh Doctor indaih lohna a nasat em avangin khaw thenkhat chuan Doctor pe turin sorkar an lo phut hial tawh thin a, Aizawl khawpui chhungah ngei pawh Doctor indaih lohna a nasa hle a ni tih chu mipui nawlpui ten kan hriat tlan a ni. Mizoram sorkar-in Medical College, ‘Mizoram Institute of Medical Education and Research’ nei tura ruahmanna a siam hi a hlawhtlin hun chuan Doctor indaihlohna hi nasa takin a ziaawm tur a ngaih a ni. Mizoram sorkar chuan Medical College nei tur hian nasa takin hma a la chho zel a, hetih lai hian Falkawn khuain Mizoram tana a pawimawhzia hriaa Medical College atana ram an pek State Referral Hospital-ah erawh Hospital-in a mamawh hmanrua a la awm famkim lo hle thung a ni.

Referral Hospital-a thawktute chuan Medical College puitling neih theih na tur hian sorkar bakah Mizoram mipui te kan tanrual a ngaih hle a ni tiin Zalen palai an hrilh a, state thenkhatah chuan Medical College an neih theihna turin ram chhung mi hausaten theihtawp an chhuah a, hmanraw hrang hrang te an pe (donate) thin tih an sawi. Mizoram chhunga neinung zawk te pawn ram mipui mamawh kan neih theih nan ui loa an tih theih angte ti ve tura an duh thu Zalen palai hnenah hian an sawi.

State Referral Hospital hi thuam that chhoh zel a ni a, tunah hian department 14 a awm tawh a, damlo pantu pawh a nei tam tial tial tawh. Hetih rual hian Medical College ni tur chuan ni khatah damlo mi 400 vel en tur an nih lai hian tunah erawh an la tlin lo viau a ni. State Referral Hospital hotute chuan mipui pan tlak a nihzia a lan theih nan Mizoram mipuite pawn tun ai nasa zawka an ngaih hluta an pan tam a tul hle niin Zalen palai an hrilh. Tunah hian thawktu mi 227 awm mekin Doctor 37, Nursing Staff 89, technical staff 39 leh office staff mi 9 vel an awm mek a. Heng mite hian Medical College neih a nih theih nan hian theih tawp an chhuah mek a ni.

Referral Hospital hi a tirah chuan khum 150 awmna damdawi in a ni a, khum 250 chuang awmna turin hmalak mek a ni. Ram a changkan zel theih nan chuan a chhunga chengte an tanrual a ngai a, tanrual hi chakna a ni tia sawi fo thintute hian sorkar hmalakna kal mek hmabak la ko tak awm ah hian mahni theih tawp chhuaha tanpuina an pek ve a ngai thin a. Mite ber atanga a neinung ber thlengin Medical college kan neih theih nan hian tan rual a tul zia chu State Referral Hospital-a thawktute chuan an sawi uar hle a. Ram mipui ten damna mi pe theitu damdawi thiam kan mamawhna phuhruk tura damdawi thiam chherchhuak tu tur Zirna In neih tumna ah hian mi neinung zawkte hian an sum leh pai te Mizoram tan an thawh a ngai a ni.

Falkawn khaw mipui thenkhat Zalen palaiin a kawm kualte chuan Medical College chu neih vat an duh thu sawi hlawmin, Political game atan chauh hmang lo a, Mizoram tan a ni tih hria a Sorkarna fawng cheltuten nasa taka tan an lak zel an duh thu an sawi a. Referral Hospital chu Falkawn khaw mipuiten an chhawr tangkai thu sawiin, hospital chu pan tlak leh chhumchhia zawk tan pawh innghahna tlak nia an hmuh thu an sawi hlawm. State Referral Hospital hi medical college atan a tling tâwk em tih endik a ni dawn a, sorkarin theihtawp chhuaha a lo buaipui tawh hi approve a nih loh chuan a mualphothlak hle dawn a ni.

Facebooktwittergoogle_plusredditpinterestlinkedinmail

Minister-in Sports

Aizawl: Nimin zing khan Sports & Youth Services Minister Zodintluanga chuan Darlawna Sport Centre sak mek tlawhin khawtlang hruaitu leh NGO te nen inkawmin Darlawn leh hmar tlangdung hmasawnna tur an sawiho.

Minister hian Multi Sport Centre for Northern Region Darlawna siam mek chu tun financial year chhung ngeia zawh tum turin thawktute a hrilh a, an hmalak tawh chin chu tha thawkhat a tih thu a sawi. Multi Sport Centre hi tun dinhmunah Mizoram Hmar tlangdunga infiamna hmun changtlung ber a nih tur thu Zodintluanga hian sawiin kum 2014 December ni 14 khan work order pein December thla atanga hna tan a ni a, sanction amount hi cheng nuai 359.17 niin Mizoram State Sport Council hmalaknaa North Eastern Council pawisa peka hmalak a ni.

Dawrlawn Sport Centre-ah hian Football playground, volleyball court, basketball court leh mi 300 leng gallery sak a ni dawn a, gallery-ah hian Sport Centre in a mamawh thil tam tak siam tel a ni ang. Minister chuan gallery, volleyball court leh basketball court te chu tun fur laia sa zo hman turin a ti a, fura lei a tlak muk hnuah field levelling khawih turin a hnathawktu Lushai Engineers te a hrilh.

Facebooktwittergoogle_plusredditpinterestlinkedinmail

CM-in nasa zawka tan la turin Kohhran a ngen

Aizawl: Chief Minister Lal Thanhawla chuan naupangte dikna chanvo humhalh kawngah nasa zawka hmala turin kohhrante a ngen.

Zirtawp zan khan Aijal Club Conference Hall-ah Chief Minister Lal Thanhawla hian Mizoram State Legal Services Association (SLSA)-in naupangte dikna chanvo humhalh kawnga inzirtirna tura documentary film a buatsaih ‘Documentary Film on Child Rights’ chu a tlangzarh a. Tlangzarh paha thu sawiin CM chuan, “Khawvel changkang zel mil in Mizoramah pawh naupangte dikna chanvo humhalhna dan siam that zel a nih bakah nu leh paten fate pawi mawhna kan hre thar zel hian naupangte tan hun tha a her chhuahpui mek a ni,” a ti a. Hmundang aiin Mizoramah naupang khuaikhem tlemin lang mahse thenawm khawveng hmaizah avanga puangchhuak lo harsatna tawk tam tak an awm tih hria a nasa zawka tanla turin dan hremi kalkhawmte a sawm. Naupangte chu nakin lawka chhungkaw khaidingtu tur, ram leh hnam nghahfak an nih avangin pi leh pute atanga Mizote chin thin, tihluihna tel lova naupangten hma an sawn theihna tura hnathawh dan zirtir leh kaihhruai tha a tih thu a sawi bawk.

Documentary Film tlangzarh inkhawmah hian Gauhati High Court Judge leh Mizoram SLSA Executive Chairman ni bawk Justice Ujjal Bhuyan pawhin State Legal Services Authority hmalakna hrang hrangte leh India Constitution leh dan hrang hrangten naupangte dikna chanvo a humhalh dan a tarlang a. Naupang tihduhdah tuar emaw harsatna tawk an awm chuan thuneitute hnena hriattir chu mitin mawhphurhna a nih thu a sawi bawk.

Gauhati High Court Judge Justice Michael Zothankhuma pawhin hmeichhe naupangten khawvel hmuntinah, an pian hma atangin thliarhranna an tawk nasa em em a. Hei hi India ram Constituition Article 16-na in a khap tlat a ni, a ti bawk.

Documentary Film hi minute 17 a sei a ni a, naupang te dikna chanvo humhim kawnga hmalatu hrang hrang te kawmna leh naupang te tan a Dan awm hrang hrang te tarlan an ni.

Facebooktwittergoogle_plusredditpinterestlinkedinmail

Mizoramah innei inziaklut 18084 an awm tawh

Aizawl; Mizoramah April 2008 atanga March 2016 thleng khan innei thar, inziaklut mi 18084 an awm tawh a, a tam ber hi Kristian an ni a, Buddhist leh Hindu in a dawt leh a ni.

Registrar of Marriages-in a chhinchhiah danin kum 9 chhunga innei, inziaklut zinga a tam ber hi Kristian niin inziaklut 17520 an awm a, hei hi za zela chhutin 96.88% a tling pha hial a ni. Christian dawtah hian Budhist sakhaw dana innei an tam ber a, mi 480 innei tawhin inziaklut atangin 2.65% a tling a, Hindu dan hmanga innei chu pathumna niin 82 an awm a, hei hi 0.45% a ni a, a dang 2 an awm a. Muslim dana innei chhinchhiah a awm lo thung.

Facebooktwittergoogle_plusredditpinterestlinkedinmail

Mizoramah sorkar hnathawk 1097206

Aizawl; Mizoram-ah mipui 1,097,206 an awm a, chung zinga 59591 te chu sorkar hnathawkte an ni a. Heng zinga 42029 te chu mipa niin hmeichhia 17562 an awm a. Mizoram sorkar hnuaia hnathwk zingah hian Group C an tam ber a, sorkar officer kan tih te erawh District tinah an tlem ber zel thung a ni.

Economics and Statistics department chhinchhiah danin Aizawl District-ah sorkar hnathawk hi an tam ber a, mi 32,397 awmin mipa 21,988 leh hmeichhia 10,409 te an ni a. Lunglei District chu sorkar hnathawk neih tam lamah dawttu niin mipa 6156 leh hmeichhia 2322 niin mi 8478 an awm a. Mizoram District zinga sorkar hnathawk tlemna ber chu Saiha niin mipa 499 leh hmeichhia 485 niin mi 1984 chauh sorkar hnathawk an awm a ni.

Mizoram sorkar hnuaia hnathawk mi 59591 awm zing ah hian District hrang hrangah No-Plan Fund hnuaia hlawh la an tam ber a, under plan fund-a hlwh la in an dawt a CSS Fund hnuaia hlawh la an tlem ber zel thung a ni.

Facebooktwittergoogle_plusredditpinterestlinkedinmail

Naupang venhimna ‘Run’ nei

Aizawl: Nimin zing dar 7 khan Childline Aizawl leh Mizoram Legal Service Authority tangkawp chuan naupangte venhimna kawnga mi tin ten tun aia tan an lak zual theih nan leh hleilenna tawk naupangte tuarpuina atan bakah anmahni tanpui tura mi tinte tanrual theih nan Vanapa hall kawt atanga Millennium Centre thleng ‘Run’ an buatsaih.
Naupang venhim zirtir bultanna, Vanapa Hall tuala neih ah hian Child Welfare Committee member Vanramchhuangi chuan thu sawiin, sualna leh a kaihhnawih tharuma vauna hmanga naupangte tihchhiat, tihnat leh an nu leh pa ten an ngaihthah turte tana dinga, an tuarnate hriatpui satliah mai ni lovin an tuarna tuamdam tur leh tuartirtute hmachhawn sak turin kalkhawmte chu a sawm a ni.

Kawngzawh tawpna Millenium Centre kawtah hian Childline Co-ordinator Lallawmzuali chuan hun kaihruaiin T.Lalnunsiama, President, Centre for Peace and Development (CPD) chuan thuchah tawi a sawi a ni. He hunah hian Gauhati High Court Judge-te leh naupangten an dikna leh chanvo chungchangah inkawmhona hun tha tak an nei bakah, Joy Zairemmawia kaihhruaina in naupangte dikna leh chanvo humhalh tur leh hlei lenna tawk naupangte tana theihtawp chhuah tura intiamna a huhovin balloon chhuah a ni bawk.

Nimin ‘Run’ ah hian Aizawl khaw chhunga Middle School leh High School 20 atangin naupang leh zirtirtu 1300 vel an tel a a ni.

Facebooktwittergoogle_plusredditpinterestlinkedinmail

Taekwondo Champion lawm

Aizawl: May ni 5-8,2016 inkar chhunga Mirme Cup – National Taekwondo Championship, Bilimora, Gujarat-a zawh taka champion, Mizoram Team te lawmpuina chu nimin khan Mizoram Amateur Taekwondo Association buatsaihin Electric veng YMA Hall-ah neih a ni.

Champion lawmna inkhawm hi MATA President Dr.Rualkhuma Colney in a kaihruai a. Championship khelh dan Dominic Rozamliana (Team Leader) leh Rosangpuii Hmar, Mission Team Secretary ten an pe. Khuallian Par.Secy. Hmingdailova Khiangte chuan Mizote a bikin thalai leh naupang ten ngaihtuahna thianghlim leh sukthlek dik neihna kawngah an hniam hle tih a sawi a, nu leh pa ten an fate an enkawlna kawngah mi dik leh rintlak ni thei tura chher an ngaih thu leh an fate tuina tuipuia kaihruai turin kalkhawm te a chah a. Thalai te pawhin an nu leh pa te phurrit ni lova a chhawk tu ni zawk turin a chah bawk a ni. Mizoram aiawh tute hi Mizoram Mission Team tiin an tel a, inelnaah hian endikna hrang hrang Basic technique, Aerobic, Creative Poomsae, Flip, Breaking, Self-defence te endik a niin Mizoram chu an champion a, No mawi leh Rs 1,51,000 an dawng a ni.

Taekwondo ah hian Kyorugi (fighting), Poomsae (Form), Aerobic, Breaking leh Demonstration inelna te a awm thin a. World level thlenga inelna awm vek a ni. Demonstration Competition bik hi India ramah a vawi khat buatsaihna ni nghe nghe a ni.

Facebooktwittergoogle_plusredditpinterestlinkedinmail

Thukhawm dawn

aktip Thawhlehni chawhma dar 11 hian Committee on Privileges chu an chairman PC Zoram Sangliana hovin Assembly Secretariat Annexe Building Committee Room-ah an thu khawm dawn.

Facebooktwittergoogle_plusredditpinterestlinkedinmail

Login

Lost your password?