Monthly Archives: July 2016

Triautrackx in hla thar record tan dawn: Aizawlah kan hmu ve dawn lo?

Thla ruk (6) zet band angin rimawi khawvel an chawlhsan hnuin, Triautrackx chuan hma thar an rawn la leh tan dawn a. Single thar lam an rawn melh ve leh tan ta a. Mahse, tunlai Zo rimawi khawvela inpawhna nasa tak avangin rimawi siam pawh an phur zak zak tawh lo hle a. An single thar tihchhuah hnuah band angin an rawn inlan tawh lo mai thei bawk a. Hei erawh hi chu hunin a la rawn hril turah ngai ang.
Triautrackx hian single thar an buaipui a, chu chu — Lungtat Par — tih a ni. He an single thar tur pawh hi a hla title atang chuan Triautrackx ‘signature’ a lang leh nghal mai a. Zo Folk/pop lam bawk hi an rawn hrut leh dawn a ang hle. Chutih rual erawh chuan, an single thar hi Aizawl lamah hian a rawn thleng phak kher ang em tih chu zawhna pawimawh tak a ni — a chhan chu… eng nge an sawi chhiar rawh le!

Tihchhan : Hnam dang rimawi kalphung kan inthiamsiak luih luih a, hnam dang rimawi mil a insiamrem ni mah ila, Mizo te’n guitar kan hmelhriat chhoh a an perh dan lar tak — Hringdup beat? — kha thalai te ngaihthlak that tir leh kan tum ber a. Chuvangin, a music hi a “ZO” dawn a, a hlui/hmanlai viau dawn tihna a ni.

Kan hla dang nen a inanglo viau ang. A hla thu tunlai tak, a rem dan hmanlai tak a ni dawn. A awmzia ber chu, ‘Hmanlai leh tunlai chawhpawlh’ tihna mai a ni awm e.

Recording process: Hmanlai ‘feel’ awm tir turin 3band tape recorder, kum 1975 chhuak-ah guitar vel record luh a, tunlai recording software tha ho a lakluh leh kan tum a. Chumai bakah, darkhuang leh Mizo khuang ri pawh dah tel ngei kan tum. Amaherawh chu, kan han ti chhin phawt anga. A inhmeh loh viau chuan a lang lo thei bawk.

Mipuiin an beisei theih: Mi la tih ngailoh eng emaw beisei tur a awm dawn. Lungkuai leh lungrun taka sak ani chungin nuih sukna tur hla thu a awm bawk ang. Vawi khat ngaihthlak a, a thluk leh a thu vawn nghal theih chi hla ‘catchy’ tak a ni dawn. Guitar tone thing/hmanlai zet a awm bawk ang.

Comeback : Keimahni lam thla ruk (6) zet kan chawl tawh bawk a. Rei tak atanga kan phur thar ber tum a ni hial awm e. Mahse, mi tam takin tihchi a an ngaih lohah risk kan la dawn a. Kan hla hmasa te a pha lo mai thei a, a khum thei tho bawk.

Mizo rimawi eng emaw kawng tal a tih hausak hi kan tum ber a la ni reng a. Kan ri hausa thei ta lo anih pawhin theihtawp chu kan chhuah leh hrim hrim dawn.

Tin, thalai te chauh nilo, nu leh pate benga mikhual lo chi in kan rem dawn a. Naupang atanga tar thleng ngaihthlak peih tur anih vangin a phurawm leh huphurhawm dan a dang hle!

TV lam: He hla hnuah hian hla khat bak tihchhuah kan tum tawh loh vangin MZI leh MDM te zawm zawk neih kan tumlo a. Kan rilru ang pu a Zo rimawi tih hmasawn an duh anih chuan an member nilo mah ila, TV lamah kan hla min lo chhuahsak ve mai turah kan ngai.

Zo-Rimawi aia an pawl hmasawnna tur an dah pawimawh anih chuan, Aizawl mipui ten kan hla TV-ah an ngaithla thei ngai dawn tawh lo a ni!
MZI leh MDM hi zawm zawk tur kan hrelo a, zawm loh zawk tur pawh kan hre lo. Amaherawhchu, Zo rimawi tana a tha lo zawnga an pawlin nghawng a neihte hi hre ve reng se kan duh a. Zo rimawi hmasawnna duh vanga pawl pahnih a awm hi a mak kan ti a. Zo rimawi hmasawnna tur an duh tak tak anih chuan thiam zawk leh thiamlo zawk sawilo in, Zo rimawi tan an tangkawp thei ngei turah kan ngai.

Facebooktwittergoogle_plusredditpinterestlinkedinmail

Nitin Vbc. 1+ZU manah sengral

Aizawl: Khawmpuiin a lo rel tawh angin Kristian Thalai Pawl, Mission veng Pastor bial chu Zu chungchang ziahna bu, Dr. C.Lalhrekima leh Dr. Laldinliana Varte te buatsaih chu kohhran intinah an sem a, he zirbingna ah hian zu chuan taksa tan thatna reng a neihloh bakah economics atanga chhutin Mizoram ah zu leina atan nitin vaibelchhe 1 chuang a kalral ziah niin a tarlang.

Economic lama mithiam filawr tlemte zinga mi Dr. Laldinliana Varte chuan Mizoram sawrkarin zu chhiah VAT leh Excise duty atanga a lakluh chu vbc.44 a tling pha nia tarlangin, “Mizoram chuan nitin nuai 101 zu manah kan sengral mek tihna a ni a, NIMHANS Karnataka zirchianna in zu atanga sum hmuh Rs.10 zel atangin pawikhawihna ah Rs.16 zel a kalral thin a. Zu tha man a tlawm a, zu in vanga thihna tlem nia sawi chu thu diklo a nih thu a tarlang bawk.

Mi tam takin Bible ah pawh Tirhkoh Paula’n Timothea hnenah zu in turin a hrilh thu leh damdawi ah pawh a tel nia sawiin Dr. C.Lalhrekima chuan, “Paula Permission tia a chheh hran sawifiahin Timothea hnena Paula sawi leh damdawia zu an telh hi 5% vel chauh a ni a, mahse kan in thin hi chu 40% chunglam te anih vangin sawimawi nan kan hmang mai mai a ni,” tiin Zalen a hrilh. Zu hian thluak, chuap, thin, lung, chaw dawt, hriatna thazam, vitamin tlakchham, tihrawl na a thlen ngei ngei niin Dr. Hrekima chuan a sawi.

Dr Madina chuan alcohol man a tlak hniam a piangin zu intu an pung tih tarlangin whisky, brandy, vodka ah a man 10% a a tlakhniamin a intu 15% in an pung a, Mizoram ah chuan 300% in a man a tlahniam a, chuvang chuan 281% thlengin zu in thar hi an awm thei niin a sawi.

‘Zu a zalen chuan kan inthiam ang’ tia sawi thin chu a diklo nia sawiin ruichhia an pun bakah hmeichhe zu in an pung a, thalaite zingah pawh zu in thar an tam niin a sawi bawk. Zu in thin zinga 50% in a ngawl an vei chhunzawm niin Mission veng Pastor bial KTP booklet siamah chuan a tarlang bawk a ni.

Facebooktwittergoogle_plusredditpinterestlinkedinmail

Tinreng Feature : Aizawl Taxi Versus 2-wheel Cab, Auto Rickshaw !?

Mizoram State Transport Authority (STA) chu Thawhlehni (26.7.2016) khan thukhawmin mipui vantlangin an tangkaipui zawk beiseiin Aizawl khawpui chhunga two wheeler taxi service turin permit pek chhuah an rem tih bakah Aizawl khaw daia auto-rickshaw tlantir chungchang pawh meeting chuan a remti bawk.

Hemi chungchangah hian Zalen palai chuan Aizawl khawpui stand hrang hranga taxi pu te chu be pawp nghalin mi tam zawk chuan STA thu thuthlukna chu thil lo la awm tur a nih avangin sawi lawk a harsa an ti a. Chutih lai chuan traffic jam tih thawlna atana an ruahmanna a nih ngei an ring hlawm a, traffic jam tih rehna atan sawrkarin a ti a nih chuan ataka an kalpui hunah chuan Aizawl khawpui chhungah taxi tam zawk te hi an in hnawh khawm anga tun ai hian traffic jam hi Aizawl khawpui hian kan tuar nasa zawk ngei ang an ti hlawm.

Khawpui daifema taxi tlan driver then khat te chuan khawpui chhungah an tan tlan luh a har thin a, chuvang chuan khawpui daifem lamah an tlan tam a vangin tunah hrih chuan an ni khat tlan pawh a ziaawm phah deuh niin an sawi.

Mahse, chung hmunah chuan auto rickshaw te an lo din tawh dawn a vangin mipui tam zawk te chuan a man tlawm zawk chu an bawh lo thei lo dawn a, chuvang chuan nakinah chuan harsatna eng eng emaw an tawh ngei an rin thu Zalen palai an hrilh bawk a ni.

Mizorama Taxi neitu pawl hruaitu R. Pahlira chuan Zalen palai zawhna chhangin auto rickshaw khawpui bathlara ding tur chu a buaithlak an rin thu sawiin, “Sawrkar hian ti lo se chuan kan duhthusam a ni,” a ti a. Two wheeler taxi chu tunhma pawhin tih an lo tum tawh nia sawiin mahse, tunah chuan mipa in mipa an phurh dawn avang leh hmeichhia in hmeichhia an phurh dawn avangin tlem chuan a zia awm an rin thu a sawi a. Two wheeler taxi a hman a nih chuan tunah pawh two wheeler te chu traffic jam tawt lutuk karah pawh an in zep lui thin a, taxi a hman a nih chuan hmanhmawh taka an tlan a ngaih tawh dawn avangin a buaithlak hle a rin thu a sawi.

Hetih lai hian Aizawl pa thenkhat chuan Aizawl khawpui lirthei tawt lutuk tih zia awm nana sawrkar in ruahmanna tha tak a siam chu tha ti tam tak an awm bakah thalai hna nei lo leh lirthei nei, khawlai a tlan mai mai ten eizawnna an neih theih dawn avangin ruahmanna tha tak a nih ngei an ring. Aizawl daifema Auto tlantir tum pawh taxi manto tak taka hman ngai thin kha nakinah chuan auto in man tlawm zawkin kan kal theih phah dawn avangin mipui ten an chhawr tangkai phah ringtu an awm bawk a ni.

Facebooktwittergoogle_plusredditpinterestlinkedinmail

Mipuiin Radio tangkaipui -CM

Aizawl: Chief Minister Lal Thanhawla chuan All India Radio chu mipuiin an chhawr tangkai hle niin a sawi.

Nimin Vanapa Hall a All India Radio, Aizawl in kum 50 ‘golden jubilee’ an tlin lawmnaah khuallian niin Chief Minister chuan AIR chu chanchinthar petu, hla mawi tak tak chhawpchhuaktu leh zualkona thleng pawha pawimawh a ni tih a sawi a. Mizoram mai bakah thenawm ram Bangladesh leh Myanmara a Zo hnahthlak ten an chhawr tangkai hle niin a sawi bawk.

All India Radio Aizawl Station hi July ni 31, 1966 khan din niin 150 Watt Transmitter hmangin bul tan a ni a. Hmarchhakah hian AIR Guwahati, AIR Shillong leh AIR Pasighat te hian Golden Jubilee an hmang tawh a, AIR Aizawk hi a palina a ni. Tun dinhmunah hian AIR Aizawl hian an Primary Programme hi nitin darkar 14 a tichhuak a, FM hi nitin darkar 8 a ti chhuak bawk a ni.

Hengte hi 20 KW Medium Wave Transmitter, 10 KW Short Wave Transmitter leh 6 KW FM Transmitter hmangin an tichhuak a. Tunah hian AIR Aizawl ah hian thawktu nghet 77 leh contract staff engemaw zat an awm a ni.

Facebooktwittergoogle_plusredditpinterestlinkedinmail

2016-Thubuai 1442 ziaklut

Aizawl: Kumin January atanga June thla inkar chhung khan Mizoram Police te chuan thubuai 1442 an ziaklut a, heng zinga 1255 chu IPC hnuaiah a niin a dang 187 chu Non IPC hnuaiah a ni. Thubuai ziahluh zingah hian rukruk thubuai a tam ber.

Mizoram Police chhinchhiah danin IPC hnuaiah thubuai ziahluh zingah hian rukruk thubuai 490 chu tam berin IPC thubuai ziahluh atanga chhutin 39% a tling. Kumin kum chanve chhung hian tualthahna tum 10 a thleng tawh a, hengte hi January ah 2, February ah 1, March ah 2 April ah 1 leh June ah 4 te a ni. Kum chanve chhung vek hian pawngsual tum 16 a thleng tawh a, tualthah tum case 7 ziahluh a ni tawh bawk. Chhinchhiahna atanga a lan danin kumin chhung hian mihring thihna thlen lirthei chetsualna tum 26 a thleng tawh bawk.

Non IPC hnuaia thubuai ziahluh 187 zingah hian naupang chunga hleilenna ‘Protection of Children from Sexual Offences Act’ hnuaia thubuai ziahluh 69 chu tam berin hei hi thubuai ziahluh atanga chhutin 36.89% a tling a, ruihhlo kaihhnawih vanga thubuai ziahluh (ND&PS Act) case 50 (26%) chuan dawtin, Zu leh a kaihhnawih vanga man 48 (25%) chu pathumna a ni. POCSO Act hnuaia thubuai ziahluh a tam chhan hi naupang chunga pawikhawihna a thleng tam thut lam ni lovin mipuite an harhthar tak vanga report a luh that vang niin Child Welfare Committee ten Zalen an hrilh.

Facebooktwittergoogle_plusredditpinterestlinkedinmail

Mipui Damdawi Dawr JAS leh CSC Patea’n a hawng

Aizawl: Health Minister Lal Thanzara chuan nimin khan Mizorama Jan Aushadhi Store (JAS) leh Common Service Centre inkawp dawr hmasa ber Hruaizel Pharmacy, Vaivakawn ah a hawng.

Lal Thanzara chuan Jan Aushadi chu mipui damdawi tihna niin damdawi tha, man tlawm taka leina a ni a, mipuiin awlsam taka sawrkar an dawr theihna tur CSC nena hawn kawp a ni chu a lawmawm hle a ni, a ti a. JAS dawr chu Mizoram chhunga district tinah hawn tuma hmalak mek a nih thu a sawi bawk.

Jan Aushadhi dawr a damdawi te hi a man to dan a zirin category 3 (A,B,C) ah then a ni a. A man to chi chu A, a laihawl B, a man tlawm chi C tia bithliah a ni. Company hrang hrang siam damdawi te nen a danglamna chu a tuamna (packing) leh a cheimawina te a awm ve lo a. Hei hian a man a tihniam a, a quality chhe chuang si lovin a man a tlawm theihnan a tuamna changkang lo zawk an hman bakah a hralhna hlep pawh a tlem zawk a ni. India hmarchhak state te zingah Mizoram hi Jan Aushadhi damdawi dawr nei hmasa ber leh awm chhun a ni a, state lian zawk tam tak pawhin an nei lo a ni.

Facebooktwittergoogle_plusredditpinterestlinkedinmail

Buhfai harsat MNYF in ring

Aizawl; MNF Thalai chuan FCI atanga thla li chhung (July – October,2016) ei tur buhfai qtls. 195783.60 chu Mizoram sawrkarin a lo ei puk a, hei vang hian August leh September velah harsatna a thleng ngei dawnin a lang a ni, an ti.

Nimin khan Aizawl Press Club ah chanchinbumite kawmin MNF Thalai President K.Vanlalvena chuan Mizoram in buhfaia harsatna a tawh chhan chu sawrkarin mimal duhsak bik a neih vang niin a sawi. “Sawrkarin buhfai supply tura a thlan ten an supply theihloh hnuah State Purchase Advisory Board in buhfai leina rate atan qtl. khat Rs. 2500/- a ruahman ah hemi rate a supply thei tur mi 2 te thlang lovin tender chhang ve lo MIZOFED a thlang daih hi a mak hle a ni,” a ti bawk.

Facebooktwittergoogle_plusredditpinterestlinkedinmail

MALARIA A TLA HNIAM

Aizawl: Kumin 2016 chhungin Mizoram ah Malaria vei zat a tlahniam nasa hle a, kum kalta 2015 Jan – June thleng khan malaria vei mi 8727 an awmlaiin kuminah erawh mi 3914 chauh an ni thung a, Case tlakhniamna hi 55 % a ni.

PF vei hi nikum (Jan.-June) ah 7543 an nih laiin kumin January -June ah chuan mi 2880 ah tlahniam in a tlakhniamna hi 62% a tling a. Nikum hetih hun chhunga Malaria vanga thi mi 13 an awm laiin kumin ah chuan 4 an awm tawh a, a tlakhniamna hi 69% a tling a, a tlakhniam belh zel beisei a ni. Health Department chuan January – June, 2016 chhung khan Mizoram mihring cheng 11% thisen an la tawh a, hei hi sawrkar laipuiin kum khatah 10% tal thisen la tura a tih chu an khum tawh a. Kumin chhung hian damdawi hmanga thosilen chiahsa khaw 733 ah sem a ni tawh bawk.

Facebooktwittergoogle_plusredditpinterestlinkedinmail

Chhiahtlang daia Godown sak, Kum 8 zet luah lohva awm a hmunah zirchian na nei

Aizawl; Nimin khan sub-hqrs. YMA Serchhip hnuaia hmasawnna hnathawh vil tura din vigilance & monitoring committee te chuan Chhiahtlang dai a, National highway kama FCS & CA department in go-down leh supply inspector quarter tura an sak, an sak zawh atanga tun thlenga luah lohva la awm chu zirchianna an nei a ni.

Vigilance & monitoring committee te hi an chairman Kapliana Pachuau in a ho a, Sub-Hqrs. YMA Se-rchhip president R. Ranghmingthanga hovin OB leh hruaitu dangte chuan an tawiawm bawk. Helai godown building hi Kum 2007 khan sak tan niin kum 2008 khan sak zawh a ni tawh a, Rs.nuai 40 zet senna niin Baffacos sum hmanga sak a ni a, PWD Aizawl division-III hnuaiah Ha uva & Sons fapa naupang ber Valtea sak a ni an ti.

He building sakphung hi a tha tha-wkhat hle niin vig ilance & monitoring committee hruaitute chuan an sawi a, kum 8 chhung zet luah lohva a awm reng avangin a kawngkhar kalhna tala te chu tihchhiat a ni a, darthlalang te chu a keh deuhvek tawh a, hnimin a bawh nasa hle tawh bawk. A hmun hma vela bawlhhlawh awm en in ruihtheih thil ti thin ten ruihhlo tihnan an hmang na-sa hle niin an hre bawk.

Godown chhakah supply inspector quarter tur a awm a, he building panna kawng phei chu mihring panbil aia sangin hnim a to phui vek tawh a, YMA hruaitu te hian an kalna tur chem nen insam kaw chawpin he building hi an pan ni a thu dawn a ni.

Serchhip Chhiahtlang daia godown leh a kaihhnawih buil ding saknan hian a vaiin Rs.nuai 51.5 sen a ni a, tun dinhmunah hian Tui leh electric connection a la awm lo a. Vawiin thlenga hman tangkai lohva a awm chu Sub-Hqrs. YMA Serchhip vigilance & monitoring committee chuan pawi tiin, a nih dan tur anga hman nghal an duh bawk a ni.

Facebooktwittergoogle_plusredditpinterestlinkedinmail

Sumdawnnan Silpauline hman vangin harsatna thleng

Aizawl; Chhiattawkte tana pek thin Silpauline chu mi thenkhat ten sumdawnna atana an hman thin avangin a dawng tur dik tak leh mamawh ten an dawng thei thin lo.

Disaster Management & Rehabilition thawktute hnen atanga thu dawn danin mamawh em em pawh ni si lo tu emaw hmelhriat tha nei ten silpauline chu an duh duh hunah an dil a. Thuneitu lamin pe tura an tih avangin an ni lam pawhin hnial lo in an pe thin tih Zalen palai an hrilh a. Chutih lai erawh chuan hmel an hmuh than leh an hriat than sumdawnna atan a hmang nia an rinhleh tawh te chu lo hnar pawh an nei fo tawh thin tih an sawi.

Zalen thu dawnna chuan mangang tak tak leh a dawng tur awm ngawih ngawih ten an dawn loh chhan ber chu hralh ru a eizawngte vang nia an hriat ber thu an sawi a. Silpauline dil tute chu verifying officer an awm loh avangin Asst. Engineer in a verify a pek tlak a an ngaih chauh an pe a, chu bakah chuan Minister leh Secretary ten pek tlaka an ngaih chu an pe bawk thin niin Zalen thu dawnna chuan a sawi bawk.

Zalen thu dawnna chuan silpauline dil tute zingah chuan mimal a dil an tam ber nia an hriat thu sawiin, chung zingah chuan sumdawng tam tak an inzep tih an sawi bawk.

Facebooktwittergoogle_plusredditpinterestlinkedinmail

Login

Lost your password?