Monthly Archives: July 2016

Chhawr tlak ni turin Home Minister in zirlaite a fuih

Aizawl : Home Minister R.Lalzirliana chuan zirlaite chu chhawr tlak, hmantlak leh rawih tlak ni ngei tura zir turin a chah.

Nimin Aijal Club a Tuichangral Zirlai Pawl ten Fresher Social leh zirlai titha chawimawina inkhawm an buatsaih ah he thu hi sawiin khuallian Home Minister chuan zirlaite chu duhthlanna dik siam tur chuan mahni inhriatchian a pawimawh hmasa tih sawiin, mahni tui zawng, thiam zawng, nuam tih zawng hrechiang apiangin kawng an thlang fuh duh bik tih a sawi a. Class room zirtirna atanga thiamna ngawt piah lamah tunlai khawvelin eng thiamna nge a mamawh tih ngaihtuah ran chunga skills hrang hrang nei tel ngei turin a chah bawk.

Khualzahawm Vanlalawmpuii Chawngthu MLA chuan zirlaite chu tum neia lehkha zir a, social media lakah fimkhur turin a chah a, tunlai khawvelah mi bik tan lo chuan hlawhtlin a harsa a, chuvangin lehkha zirnaah theihtawp chhuah a ngaih thu a sawi.

Nimin inkhawm ah hian Tuichangral Zirlai Pawl huam chhunga zirlai titha mi 80 chuang te hnenah chawimawina hlan an ni.

Facebooktwittergoogle_plusredditpinterestlinkedinmail

Sihphir chhinchhiahna hawng

Aizawl: Sihphir Veng hlun Branch YMA ten Sihphir khaw hming put chhan, Sihphir lui chhinchhiaha lun-gphun an siam chu nimin khan bial tu MLA, Deputy Spea ker ni bawk R.Lalrinawma’n a hawng.

R.Lalrinawma chuan thil hlui vawn that leh hlutthiam chu hnam changkang zia a ni tiin, “Mizo te pawhin kan hnam rohlu ngaihhlut a, chhinchhiahna chang kan lo hre chho zel hi hma kan sawnna ti langtu a ni a. Kan hnam nunphung leh ziarang te ngainepa zahpui mai lova chaw inun leh vawnhim hi hnam anga kan maw hphurhna a ni,” a ti.

Sihphir khaw hmi ng put chhan tak hi Sihphir Venghlun chhuahlam, khaw mawnga Sih, hnar sa-rih neih, thal va ek charah pawh kang ngai lo a awm a. Sihphir khuaa lo cheng hmasa tawh te paw hin tui tlan bera an neih a ni. He Sih hi khaw hmingah puin Sihphir tih a ni. Sihphir lui tuikhur hi a kang chah loh nan thing engemawzat ph un belh tum a ni bawk.

Facebooktwittergoogle_plusredditpinterestlinkedinmail

Thisen pe

Nimin khan Aizawl Civil Hospital a hman turin Lengpui bial TKP chuan thisen unit 41 an pe a, Mizoram Chakma Students Union in unit 32 leh Thanglailung Students Union in unit 12 an pe. Nimin vek khan Lengpui Branch KTP ten an kum 60 tlin diamond jubilee pualin Synod Hospital tan unit 38 an pe bawk a. Kawnpui Chhimveng YMA pawhin a mamawh a piangte hman turin Kolasib District Hospital tan thisen unit 47 an pe. Kawnpui Chhimveng YMA Branch hian ni 3.8.2016 hian an kum 75 tlin ‘Platinum Jubilee’ lawm an tum.

Facebooktwittergoogle_plusredditpinterestlinkedinmail

Nimina TKP Day hmang

Aizawl; Nimin khan Mizoram Baptist Kohhrana thalai pawl, Thalai Kristian pawl (TKP) din champha vawi 65-na a ni a. Mizoram pumah TKP member-ten urhsun takin an hmang a, kumin TKP Day thupui atan hian “Remna Siamtu” (Matthaia 5:9) tih hman a ni.

Hemi Ni hian Unit tam zawk chuan zing karah Vantlang hmun hma leh Biak In leh a chhehvel tihfai hnatlang an thawk thin a, a thei remchang ten chhun lamah Blood Donation Camp te neiin, Unit thenkhat chuan Intihlimna hun atan an hmang thin a ni. TKP Day hmanpuiin Mizoram Thalai Kristian Pawl (MTKP) hruaitute chu Unit hrang hrangah an fehchhuak dawn a TKP Day hun hman dân tûr programme kimchang chu Unit lamin an buatsaih ang. Hun enge maw chen kohhrana thalaite puala rawngbawlna huang hran siam tura uluk leh fimkhur taka an ngaihtuah hnuah Serkawn-a Thalai rualte leh Kohhran Upate chuan kan Zosap Missionary-te duhsakna leh kaihhruaina hnuaiah July 30, 1951 khan Thalai Kristian Pawl hi an lo din a ni.

Facebooktwittergoogle_plusredditpinterestlinkedinmail

Hming thehluh hun sawn

Aizawl; Synfo leh Inkspot Digiprint Solutions tangkawpin Branch KTP puala zaithiam thlanna, Praise On a buatsaih turah a tel tumte tana hming pek luh theih hun chu August 9, 2016 thleng pawhsei a ni.

Praise On buatsaih turah hian a tel tumte in-report theih hun chhung hi July 30, 2016 tih hmasak a ni a; mahse, Branch KTP thenkhat lehkha hmu tlai an awm avangin a hun hi pawhsei a ni leh ta a a ni.

Tel tumte inpek theih hun pawi sei ni mah se Audition Round neih hun erawh sawn a ni lo thung a ni.

Praise On-a tel tumte hi an remchanna ber Zone-ah tel theih a ni a, in-report chungchanga hriatchian duh nei a buatsaihtute leh intihsiak thlengtute chu biakrawn theih reng an ni.

Facebooktwittergoogle_plusredditpinterestlinkedinmail

PYD thukhawm

Aizawl; Mizoram UPC Pentecostal Youth Department General PYD Executive Board Meeting Vawi 153-na chu Thawhlehni khan neih a ni a. President Upa H.Lalrintluanga’n a kaihhruai.

General PYD hnuaia Committee peng hrang hrang hmalakna report ngaihthlak a nih bakah Thu leh hla kutpui hman zawh tak thlirletin, September thlaa PYD General ConferenceVairengte hmuna neih tur inbuatsaihnate thlir hovin hmalak zel dan tur an rel bawk.

Facebooktwittergoogle_plusredditpinterestlinkedinmail

Kawlkhuma Boy Hostel hawng

Aizawl; Zirtawpni khan Commissioner Lalngaihawmi, Territorial Commander chuan Kawlkhuma Boys Home, Lunglei-a building thar chu hawngin Pathian hnenah a hlan nghal.

Kawlkhuma Boys Home building hi a dung 45 ft, a vang 20 ft-a sak a ni a. Sweden & Latvia Territory tanpuina atanga sak a ni.

Home-ah hian tunah naupang 22 enkawl mek an ni a, incharge officer 2 leh thawktu mi 8-ten a hmunah awmchilhin an enkawl mek a ni.

Facebooktwittergoogle_plusredditpinterestlinkedinmail

Missionary 10 lak thar belh leh

Aizawl; Synod Mision Board chuan Missionary indaih lohna avangin Panel list atangin missionary mi 10 a lak thar thar belh leh.
Missionary atana lak tharte hi August 3-5, 2016 chhung hian Utility Room, Synod Office-ah Orientation an nei ang a, August 14, 2016 (Pathianni) chawhnuah Zarkawt Kohhran Biak Inah Tirhchhuahna neih tur a ni.
Missionary tharte:
1. Moses Vanlalchhanchhuaha
2. Lalsiamchhunga Vuite
3. PC Ramdinthari
4. Lalrintluangi
5. C.Vanrammawia
6. Malsawmtluanga
7. Laldinsangi
8. Vanlalthanpuii
9. C.Lalrinsiami
10. R.K.Zaithantluangi
%%%%%%%

Facebooktwittergoogle_plusredditpinterestlinkedinmail

UPC (Mz) SS Executive Meeting

Aizawl; Thawhlehni khan Mizoram UPC General Sunday School Executive Board meeting vawi 146-na chu Mizoram UPC General Headquarters Office Conference Hall, Tuikhuahtlangah neih a ni.

Meeting hi Rev. C.Lalremsanga’n kaihhruaiin an rorel langsar zual zingah kum 2017 Naupang Sunday Thu inchhangbu English leh Hindi-a siam chungchang te, kum 2017 Puitling leh Naupang Sunday School Syllabus chungchang te, Mizoram pawna hnam dang tawng hrang hranga naupang leh puitling zirbu tur siam belh chungchang te relin, kum 2017 naupang chawhnu Zirlaibu tur Rev. C. Liansanga ziah chu an thlirho bawk a ni.

Facebooktwittergoogle_plusredditpinterestlinkedinmail

Hmasawnna leh hlimna

Madhya Pradesh hi India rama state pachhe pawl leh loneitu rethei tamna a ni a. Nikum pawh khan khawkheng avangin loneituten harsatna namen lo an tawk a, loneitu mahni intihlum tam state zingah pathumna an nih phah a, kumin pawh hian sikul naupang 27 lai an exam kaihhnawih thil avanga mahni intihlum an awm tawh a. Taksa mamawh chaw tha ei pha lo tamna a nih bakah nausen thi leh raicheh tamna a ni bawk a. Dan bawhchhiatna leh pawikhawihna a pung nasa a, ram pum huapa chhutin hmeichhe chunga hleilenna leh pawngsual hluarna a ni leh zel bawk.

Hetiang hi Madhya Pradesh dinhmun a nih mek laiin July thla laihawl khan an cabinet meeting chuan department thar, ‘Anand Vibhag’ (Department of Happiness) din a rel a. India rama a hmasa ber tur he department thar hian khua leh tuite hlimna tur leh lungawina tur a ngaihtuah anga, chumi atan chuan ruahmanna a siam anga, hma a la bawk dawn a ni. Chief minister Shivraj Singh Chouhan ngaihtuah chhuah ni a sawi department of happiness hi a tobul chu Bhutan lam daih a ni thung.

Mihring nuai sarih chuang awrh chenna Bhutan hi India thenawm ram zinga te ber leh rethei ber pawl a ni a. Mahse, sum leh pai, sumdawnna leh thilsiam chhuah lam zawnga tehin rethei viau angin an lang naa ram hausa ber berte aiin an khawsak a nuam a, an zalen a, an lungawi a, mipui nun a hlim tlat si a ni. A chhan chu an sorkar (lal nei an ni a) leh mipuiin sum leh nawmsakna thil aiin nun hlimna an ngaih pawimawh zawk vang a ni. Hman atanga mithiamten ram hmasawnna (Development) tehfung pawimawh taka an hman chu sum leh pai dinhmun a ni, kum tina ramin sum a thawhchhuah/lak luh (Gross National Product/Gross Domestic Product) a pung a nih chuan hma an sawn tihna a ni. Kan politician-te pawh hian kan state sum thawh chhuah/lak luh a pun thu hmai uang takin an sawi fo thin hi.

Mahse, sum leh pai hmanga hmasawnna teh hi a dik meuh em? Hringnun a thil hlu ber ber – hlimna, thlamuanna, hmangaihna, lungawina, damna te hi pawisaa lei theih a ni si lo a. Khawvela ram hausa ber ber U.S.A leh Europe ram hrang hrangte khu ram ralmuang lo ber ber an ni mek a nih hi. Ramin sum a lak luh pung zel hi mi tlemte chauhin an hlawkpui thei a, mi tam tak tawrhna a thlen thei bawk. Entirnan, kan ramah hian lirthei a pung chak hle a, lirthei leh a kaihhnawih thil chi hrang hranga sumdawnna leh eizawnna hian state sum thawhchhuah/lak luh (GSDP) a tipung viau a. Mahse, langsar lo lamah hian nasa takin harsatna a siam a, boruak a bawlhhlawh phah a, hriselna lam pawh a nghawng a, traffic jam avangin hun hlu tak kan chan nasa a, sawi tur a tam ang. Sorkar laipui atangin sum tam tak kumtin a lo lut a, chu chuan state sum lakluh (GSDP) tipung hluai mahse, hruaitute nawmsakna leh an eirukna leh ho lam tak taka a liam zel avangin mipui nawlpui a thleng pha thin lo a, ram hmasawnna pawh a nih turin a chak chuang lo thin.

Bhutan lal Jigme Singye Wangchuck hian ram chhunga chengte hlimna hi thil dang aiin a ngai pawimawh zawk a. Kum 1972 khan lallukhum an khumtir hnu lawkah ram dinhmun tehfung atan ‘Gross National Happiness’ hman a nih tur thu hi a puang a. “Gross National Happiness hi Gross Domestic Product aiin a pawimawh zawk,” a ti nghe nghe. ‘Gross National Happiness’ (GNH)innghahna ban pali an siam a – Ram hmasawnna leh mipui vantlang hmasawnna rualkhai taka thlentir; Hnam zia leh nunphung leh sakhuana vawn him a, chawilar; Nungcha, thing leh mau, tui leh leilung humhalh; Sorkar inrelbawlna tha te hi.

Kum 2011 khan UN General Assembly-ah GNH chungchang hi ngaihtuah a ni a. Tichuan, a vawi khatna atan April 1, 2012 khan UN hnuaia peng pakhat United Nations Sustainable Development Solutions Network buatsaih ‘World Happiness Report’ chu tlangzarh a ni ta a, kumtin an buatsaih zui ta a ni. India dinhmun hi a chhuanawm lem loh thin khawp mai, kumina World Happiness report-ah pawh khan ram 157 zingah 118-na a ni a, ram thenawm – China (83), Pakistan (92) leh Bangladesh (110) te aiin a hniam zawk. Ram hrang hrang dinhmun tehna atan hian kum khat chhunga mimal sum lak luh chawhrual (GDP per capita) te, mihring dam rei zawng (Life expectancy) te, mamawh changa intanpui tawn dan – sorkar leh midang atanga puihna, chhawmdawlna, etc., dawn thin (Social support) te, zalen taka duh thlan theihna (freedom to make life choices) te hman a ni. Kum tina report tihchhuaha a lan dan chuan hnam hrisel ber berte hi hnam dam rei pawl an ni zel thin, hlim hi hriselna leh dam reina a lo ni.

GNH tichhuaktu Bhutan hian mihring nun hlimna an dah sang hle a, chumi kawppui an ngaih pawimawh em em chu ‘Hmasawnna Tlo’ (Sustainable development) hi a ni. Hmasawnna tlo an ngaih pawimawh avangin hmasawnnain a ken tel thilsiamna leh sumdawnna te, khawsak tiawlsamtu khawl leh hmanraw changkang tak tak te ai chuan an ramngaw leh nungcha te an ngai pawimawh zawk a, nuamsa leh changkang taka khawsak ai chuan environment venhim an duh a, thilsiamna lian pui pui din a, boruak leh leilung leh tui tihbawlhhlawh ai chuan ramngaw humhalh a boruak thianghlim tak neih an duh zawk. An hnam zia vawn him an tum a, incheina leh thawmhnaw changkang leh nalh tak tak ai chuan an hnam thawmhnaw an inbel nasa. Khawthlang nun dan phungin an hnam zia a luahlan an phal lo a, an hnamzia an ngaisang a, an hnam thil an humhalh tha hle a ni.

Mizoram dinhmun hi ngaihtuah ve leh ta ila. Mipui hi kan hlim em? Kan ram kalphungah hian kan lungawi em? Sorkarah rinna kan nghat ngam thin em? Tuna a lan dan chuan rorel lai party mi leh sa chauh hi sorkar kalphungah hian an lungawi emaw chu a tih theih. Kut hnathawkte leh eizawnna mumal nei lote khaichhuahna tur sum tam tak MIP leh NLUP ah sorkarin a seng ral tawh a, mahse, a hlawhtlinna hmuh tur a vang em em si. Thalaite leh nu leh pate zingah rilru hrisel lo leh hlim lo an tam hle a, nun beidawng intihlum an tam a, tharum thawhna leh pawikhawihna hrang hrang a hluar hle a, zu leh ruihhlo khuahkhirh that loh avangin khawpui nun a tawp hle a, tualthahna leh tualthihna a thleng fo a, chu chu mipui nun ralmuan lohzia entirna awm e. Eirukna leh hlemhletna, kuta man awm lem lo mahse, a hluar hle a, minister leh MLA nih hnu a hausa ta em em an tam hle a nih hi. Heng avang hian mipui an lungawi lo a, ram hruaitute sawisel ching, kalphunga lungawi lo an tam a. Heng zawng zawng ngaihtuah hian ram hruaitute pawh hian mipui hlimna leh lungawina leh hmasawnna tlo hi an thil tumah nei ve se a duhawm hle ang.

Facebooktwittergoogle_plusredditpinterestlinkedinmail

Login

Lost your password?